Month: April 2024

April 10, 2024

Om Namaha Shivaya
Aaj Ka Suvichaar 🙏🏻🙏🏻

#2243

          Guruji Ke Charnon Mein

Guruji ke charnon mein namaskaar
Inhee charnon mein ho bhakt ka uddhaar
Yaheen gyat ho janam maran ka saar
Yaheen tarey sangat ka ghar parivaar.

Guruji ke charnon mein miley jo pyaar
Vaisa na miley beshak dhoondh lo saara sansaar
Uss pyaar se sukh miley beshumaar
Uss pyaar mein barasta hai divya dulaar.

Guruji ke charnon mein miley jo jaagriti
Uss se sanvar jaaye rooh kee aakriti
Uss se badhe Guru Govind se preeti
In charnon mein miley naseeb waalon ko sweekriti.

Guruji ke charnon mein jhukey jo sheesh
Inhee charnon mein usey mil jaaye Guruji se bakhshish
Yaheen praapt ho bhakt ko mangal ka ashish
Yaheen milein Guruji ke roop mein Gireesh.

Guruji ke charnon mein hai aseem aasmaan
Guruji ke charnon mein anokhi ho jeevan kee dastaan
Guruji ke charnon mein jo swayam ko kar de qurbaan
Inhee charnon mein ho jaaye uska pooran kalyaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Ke Charnon Mein (04/10/2024)

April 9, 2024

Om Namaha Shivaya
Aaj Ka Suvichaar 🙏🏻🙏🏻

#2242

                       Ek Baar Phir…

Ek baar phir Guruji se mulaakaat hui
Rooh se rooh kee baat hui
Baat karte karte din se raat hui
Aur phir aise hee agli prabhat hui.

Lekin pataa hee nahin chala samay ke guzar jaane ka
Bayaan nahin kar sakti anand uss khazaane ka
Jo mujhe mila Guruji kee meharbaani se
Jabb Unhonei baatein kee is deewani se.

Kuch suna kuch sunaaya
Beech beech mein mainey gaana bhi gaaya
Sach kahoon toh rona bhi aaya
Aur kitnee baar mera antas muskuraaya.

Agya lene ke liye mainey sees jhukaaya
Phir Guruji ne mujhe yaad dilaaya
Ki Unhe yaad karna na bhooloon kabhi
Kintu nibhaati rahoon apne farz sabhi.

Rakhe huey Unke hukm ko sir aankhon par
Unka shukrana kiya mainey haath jod kar
Ki Unhonei ruhaani guftagu ka diya avsar
Jiska hua meri rooh par aisa asar
Ki ek oar se saarthak bann gaya ye safar
Aur dooji oar mitne lagaa vyarth ka darr.

Guruji ke sangg har bhakt ka rishta hai kitna anokha
Guruji Apni manzoori se dein sabhi ko swayam se judne ka mauka
Guruji ka ashirwaad har bhakt ke jeevan mein vardaanon kee vrishti hai laaya
Har veh bhakt bahut khushkismat hai jisey Guruji ne hai apnaaya.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ek Baar Phir… (04/09/2024)

April 8, 2024

Om Namaha Shivaya
Aaj Ka Suvichaar 🙏🏻🙏🏻

#2241

            Mit Jaaye Har Sanshay

Mit jaaye har sanshay
Duur ho jaaye har bhayy
Tabhi hoga ye tayy
Ki Guruji se judi hai layy.

Jeevan mein Guruji ka ho agrasthaan
Koi kaam na kiya jaaye bin liye Unka naam
Tabhi yoon hoga sammaanit hriday mein basaa Guruji ka dham
Ki Guruji bhakt ke hriday mein baney aasan par nirantar rahenge viraajmaan.

Guruji se sada ho arzi
Ki hamaare jeevan mein chale Unkee marzi
Tabhi pehchaanega ye mann
Ki kitna sukhdayi hai Guruji ko samarpan.

Guruji ka har hukm sada ho sir aankhon par
Unka anusaran karte huey har pal jaaye guzar
Tabhi Guruji kee mehar ka aisa hoga asar
Ki mangalmayi ho jaayega jeevan ka safar.

Guruji se na ho koi shikaayat
Har sukh dukh mein mehsoos ho Unkee inaayat
Tabhi Unke prati shukrana ka aisa hoga ehsaas
Ki shukrana mein jeevan bita lega Unka das.

Jabb Guruji ke ruhaani deedar mein beetne lagey kshan pratyek
Jabb sotey jaagte bhakt kewal Guruji ke charnon mein raha ho maatha tek
Jabb Guruji mein liv aise jude ki bhoolne lagg jaayein vichaar anekanek
Tabb Guruji ke sangg rishte mein bhakt ka jhukaav hoga nirmal aur nek.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mit Jaaye Har Sanshay (04/08/2024)

April 7, 2024

Om Namaha Shivaya
Aaj Ka Suvichaar 🙏🏻🙏🏻

#2240

                Sakaaratmak Soch

Soch mein bahut oorja hoti hai
Ye vyaktitva ka hissa kabb jaati hai bann
Ye jaan hee nahin paata ye baavra mann
Soch bigaad ya banaa sakti hai jeevan.

Guruji Maharaj hotey Hain prasann
Apne bhakton ke sakaaraatmak soch vichaar se
Apne bhakton ke sadachar se
Apne bhakton ke shuddh vyavhaar se.

Simran bakhsh kar, bakhsh kar dhyan
Pavitrikaran karte Hain karunanidhaan
Dete Hain sakaaraatmak soch ka paigaam
Sumat bakhsh kar karte Hain bhakt ke vyaktitva ka nirmaan.

Jabb bhi aaye mann mein koi nakaaraatmak vichaar
Ya kabhi bhi duvidha ya sanshay karein bhakt par prahaar
Toh Guruji kee yaad mein leen ho jaayein
Simran aur dhyan mein Unse prerna paayein
Sakaaratmak soch vichaar kee
Swayam ke uddhaar kee
Sanvarte huey ghar parivaar kee
Sudharte huey sansaar kee.

Samast srishti mein mahatvapoorna hai sabhi ka spandan
Aur sakaaraatmak soch se sudharenge sabhi ke karam
Sadbhaavna aur shubhta se anand poorna ho jaayega vandan
Sabhi ke sehyog se shuddh spandan dwaara khil jaayega srishti ka upvan.

Kalyuga mein ye hai bahut zaroori
Taaki mit jaaye Guru Govind se bhakt kee bhi duuri
Sakaaraatmak soch se kisee kee bhi niyat na hogi buri
Aur kalyuga mein satyugi jeevan jeene kee tamanna ho paayegi poori.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sakaaratmak Soch (04/07/2024)

April 6, 2024

Om Namaha Shivaya
Aaj Ka Suvichaar 🙏🏻🙏🏻

#2239

             Itnee Rehmatein Hain

Jabb se dil hua Guruji ka deewana
Tabb se kar diya dil ne Guruji ke liye gungunaana
Labon par aksar hota hai Guruji se juda shabad ya gaana
Na bhi ho toh bhi Guruji kee yaad mein mausam lagne lagta hai suhaana.

Karuna hai ye Guruji kee
Ki Unhonei bulaaya mujhe apne dar par
Kripa hai ye Guruji kee
Ki Unhonei diya pyaar karne ka avsar.

Guruji ke pyaar mein
Zindagi gayi hai nikhar
Ye hai Unkee mahima
Ye hai Unhee kee meher.

Aisa nahin ki aate nahin hain duvidhaaon ke kshan
Lekin pehle se zyada suljha hua nazariya apnaane lagaa hai jeevan
Neeras aur saadhaaran lamhe bhi jaate hain khoobsoorat bann
Jabb Guruji ke khayaal se aabaad rehta hai mann.

Bhautikvaad kee daud kee nashwarta ka aur bhi gehra ho raha hai ehsaas
Jo shwaas Guruji kee yaad mein ho, safal lagta hai vahee shwaas
Phir veh yaad ho chaahe sewa, satsang, shabad ya aur kisee roop mein
Phir veh yaad ho chaahe meethi chhaaon mein ya kadak dhoop mein.

Guruji kee yaad mein hota hai Guruji ke prati jo pyaar
Lagta hai kumm hai aur usey badhaane ko jee chaahta hai baar baar
Guruji ka shukrana hai ki kar paati hoon apni bhaavanaaon ka kumm se kumm thoda toh izhaar
Guruji kee toh itnee rehmatein hain ki kaafi nahin chaahe mai shukrana karte huey doon apni ye saari umr guzaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Itnee Rehmatein Hain (04/06/2024)

April 5, 2024

Om Namaha Shivaya
Aaj Ka Suvichaar 🙏🏻🙏🏻

#2238

   Bahut Koshish Kee

Param poojya Guruji Maharaj,

Bahut koshish kee mainey
Ki pareshaaniyaan mujh se ho jaayein naaraaz
Kintu aisa atal hota hai unka andaaz
Ki ve duur nahin jaati aur aati nahin hain baaz.

Piroh kar apni ye pareshaaniyaan
Apni har fariyaad mein
Aapke saamne laati rahi hoon
Jabb bhi Aapke paas aati rahi hoon.

Mere is swaarth ko kar deejiye maaf
Mai aur jaaoon bhi toh kahaan aur kyun jaaoon
Chalte chalte thakk chuke thei mere paaon
Phir mujhe milee Aap mein taral taruvar kee chhaaon
Meri rooh kehti hai ki mai abb yaheen par ruk jaaoon.

Kyunki Aap hee Hain sarvshreshth aur param
Aap Hain poornataya sampoorna Shiv avatari
Jo himmat aur protsaahan mila hai mujhe Aapke dwaare
Jo jo seh aur kar paayi hoon Aapke sahaare
Vo hakeekat mein toh kya balki sapne mein bhi thaa namumkin
Abb yakeenan jeevan chal nahin sakta Aapke saath ke bin.

Aapke prati jo hai mera pyaar
Usey niswaarth banaa deejiye
Aapke prati mera har izhaar
Usey aisee panah deejiye
Ki usmein na ho koi bhautik chinta ya fikr
Usmein ho kewal Aapke prati prem bhaav ka zikr.

Pareshaaniyon ka aana jaana toh tabb takk chalta rahega
Jabb takk jeevan kee har shaam ka sooraj dhalta rahega
Pareshaaniyon kee chinta karte karte mai chintan ko na gavaaoon
Unse bhramit hokar Aapke dikhaaye raaste par na dagmagaaoon
Aapke kisee bhi hukm kee avahelanaa kar Mai jadta kee neend mein na so jaaoon
Apne har swaarth ko tyaag kar
Mai Aapse Aapko paane kee dhun mein kho jaaoon.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bahut Koshish Kee (04/05/2024)

April 4, 2024

Om Namaha Shivaya
Aaj Ka Suvichaar 🙏🏻🙏🏻

#2237

           Sajde Mein

Dekar apratim pyaar
Sangat ko taar
Guruji le chale Hain uss paar
Jahaan hai shubhta kee bahaar.

Na zaroorat hai kisee dooje lok mein jaane kee
Na aawashyakta mrityu ke aane kee
Balki jeete jee Guruji ke kamal charan mein
Hamein poori madad mil rahi hai kashton ke haran mein.

Guruji kee bakhshish hai bemisaal
Unkee daya hai divya dhaal
Unkee vaani se vinamr hon vichaar
Unke simran se ho sanskaar mein sudhaar.

Chalte huey Guruji ke nakshe kadam par
Sangat ko mil raha hai ye anupam avsar
Kitna dayalu hai Guruji Maharaj ka dar
Ve haanikar haalaat ke halahal ko rahe Hain har.

Kal bhi sambhaala Jinhonei saari sangat ko
Nikhaara sangat kee ruhaani rangat ko
Aaj bhi rakh rahe Hain jo saari sangat ka khayaal
Bhavishya mein bhi jo sanvaarenge sangat ka haal
Aise meharbaan Mahadev avatari Guruvar ka dena koi na de paaye
Unke ehsaanon ke prati aabhaar ke ehsaas se antas sajde mein sees jhukaaye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sajde Mein (04/04/2024)

April 3, 2024

Om Namaha Shivaya
Aaj Ka Suvichaar 🙏🏻🙏🏻

#2236

Dhanya Hua Hai Tera Safar

Jhuk raha hai aasmaan
Karne Guruji ko pranaam
Neeveen ho kar ke pawan
Karey Guruji ko naman.

Prithvi choome Guruji ke charan
Neer ho nirmal Unkee meharbaani se
Agni oorja aur tej paaye
Guruji kee shakti aur prataapi bani se.

Brahmgyani adhyaksh Hain Guruji, Hain Ve Maheshwar Pradhaan
Purush aur Prakriti dono, sada karein Guruji ka sammaan
Guruji sambhaalte Hain saari sangat ke praan
Kyunki saari sangat hai Unkee santaan.

Guruji swayam Hain Bhagwaan ke swaroop
Sangat ko taarne ke Unke tareeke hain anoop
Kaheen na dekhi itnee saralta ke sangg aisee anant gehraayee
Kaheen na dekhi itne neevenpann ke sangg aisee aseem vadiyaayee.

Guruji samdrishti barsaane wale SadaShiv vardaata Hain
Guruji disha dikhaane wale karma daata Hain
Koi hamdard, koi humsafar Unke jaisa nahin
Jo bhi ho raha hai Unkee sharan mein rehte huey, vo bhakt ke liye hai sahi.

Yakeen kar is baat par
Na kar tu agar-magar
Guruji ke charnon mein hai tera sir
Dhanya hua hai tera safar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Dhanya Hua Hai Tera Safar (04/03/2024)

April 2, 2024

Om Namaha Shivaya
Aaj Ka Suvichaar 🙏🏻🙏🏻

#2235

    Asthaa Kaayam Rakhne Ke Liye

Asthaa kaayam rakhne ke liye
Karishme kee na rakhein kabhi shart
Varna hamaara kiya karaaya prayatn
Saara ka saara ho jaayega vyarth.

Guruji kee mahima kee jo hai dastaan
Namumkin hai karna uska poorna bakhaan
Arey, Unkee mahima ko toh sabhi devi devta takk dete Hain sammaan
Phir hum toh thehere bhautikvaad mein phanse anjaan insaan.

Guruji ke liye karishme karna toh hai atyant aasaan
Lekin karishmon se bahut aagey hota hai Guruji ka kiya kalyaan
Kyunki Unhe hamaare ateet, vartmaan, aur bhavishya kee bhi hai pehchaan
Ve toh hamaare antakaran aur atma kar karte Hain kaam.

Sewa, simran, satsang dwaara dete Hain Apni rehmaton ka Ve daan
Unka naam aur Unka gungaan hai amrit kee khan
Guruji ko kewal jaadugar kehkar na karein Unka apmaan
Kyunki Ve Hain pooran Guru ke roop mein swayam Shiv Bhagwaan.

Vo asthaa hee kaisi jo ho shart ya karishme par nirbhar
Vo bandagi hee kaisi jiska na ho bhakt par adhyaatmik asar
Vo rishta hee kya jismein pyaar kee hadd se na jaayein hum guzar
Vo jeevan hee kya jo na baney Guruji kee sewa mein rehne ka safar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Asthaa Kaayam Rakhne Ke Liye (04/02/2024)

April 1, 2024

Om Namaha Shivaya
Aaj Ka Suvichaar 🙏🏻🙏🏻

#2234

Zindagi Tumhe Rulaayegi Jabb Jabb

Zindagi tumhe rulaayegi jabb jabb
Guruji tumhaare aansoo ponchenge tabb tabb
Ye hee nahin, balki tumhaare aansoo Unkee aankhon se bahenge
Ve har museebat mein bhi tumhaare angg sangg rahenge
Kahaan, kaise kalyaan hoga tumhaara, aur kabb
Guruji jaante Hain ye sabb.

Jisey mil jaata hai Guruji ka sahaara
Vo na rehta phir kabhi kismat ka maara
Guruji ko poora khayaal hai tumhaara
Varna abb takk bhi na chalta tumhaara guzaara.

Isliye shraddha se jhukaate raho Guruji ke charnon mein sees
Maangte raho Unkee kripa kee bakhshish
Bakhshte rahenge jo bakhshanhaar
Toh hota jaayega tumhaara uddhaar.

Kalyuga mein miley Hain Guru pooran
Avsar mila hai ki sanvaar lo tum jeevan
Kitne jann toh taraste hain maargdarshan paane ke liye
Aur tumhaare liye toh Guruji ne jalaayein Hain anginat diye.

Tumhaari raahein Ve kar rahe Hain roshan
Apni mehar se kar rahe Hain tumhaari rooh ka poshan
Jiskee raah roshan aur rooh ka poshan
Swayam ho Guruji dwaara
Uss bhakt ke jeevan kee naav ko
Awashya milega kalyaan ka kinaara.

Isliye, chalte chalo lete huey Guruji ka naam
Apne har sanshay par tum lagaa do abb viraam
Guruji ko samarpit karo apna har kaam aur har kaam ka anjaam
Nishchay hee jeete jee hee paaoge tum Sachkhand ka dhaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Zindagi Tumhe Rulaayegi Jabb Jabb (04/01/2024)