Month: December 2024

December 20, 2024

Om Namaha Shivaya
Aaj Ka Suvichaar 🙏🏻🙏🏻

#2497

               Trishna Ka Baazaar

Ye duniya hai trishna ka baazaar
Yahaan chaahatein hain aparampaar
Yoon baandh leta hai ye sansaar
Ki bhool jaata hai janam lene ka saar.

Chaahatein toh hoti nahin hain kumm
Balki badhta jaata hai gumm
Zarooraton se kaheen zyada kar lete hain jamaa
Phir lagta hai ki paryaapt na sakey kamaa.

Ye trishna ka jaal hai, strot hai asantosh ka
Is se badhaava hota hai kitne tareh ke dosh ka
Badhta hai mann par vikaaron ka aakraman
Asthir aur ashaant hota jaata hai mann.

Guruji ke manan aur chintan mein hai veh shakti
Jo banti hai trishna se duur honei kee safal yukti
Besharte pakke hon neeyat aur nishchay
Taaki mit jaaye har duvidha aur sanshay.

Guruji se kee hui vintee awashya laati hai rangg
Jitna joad hota chalta hai Guruji ke sangg
Utnee badhti hai chaahat rehne kee Guruji ke hee chintan mein
Utna kumm ulajhta hai mann trishna ke phailey huey bandhan mein
Guruji kee kanti prabhaavit karti hai is bhanti
Ki mann paata hai sthirta aur shanti
Jud kar Guruji mein basey Ish se
Guruji kee hee bakhshish se.

Pal do pal mein aisa nahin ho paata
Lekin jo shraddha se Guruji se hai jud jaata
Aur saboori se safar mein hai chalta jaata
Uska Guruji sangg aisa judta hai naata
Ki Guruji sambhaalte Hain usey har kshan
Besharte vo kar de mann se samarpan.

Phir toh koi bhi trishna nahin chura sakti mann ka santulan
Na hee bigaad sakti hai uss bhakt ka jeevan
Guruji kee meher ho toh aise bhi agrasar ho sakta hai uska safar
Ki veh har tareh se jeevan mukt bhi ho sakta hai jeete huey yaheen par.

Mushkil beshak lagey pahunchna aise mukaam par
Koshish toh kee hee jaa sakti hai magar
Raasta lamba aur kathin bhi lagey agar
Toh yaad rahe, Guruji swayam Hain hum safar
Unke hotey huey sab kuch ho sakta hai
Kyunki Guru toh kalyaan karte huey nahin thakta hai
Isliye, tu hichkicha kar kyun hai rukta, aye insaan
Teri madad toh kar rahe Hain swayam Bhagwaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Trishna Ka Baazaar (12/20/2024)

December 19, 2024

Om Namaha Shivaya
Aaj Ka Suvichaar 🙏🏻🙏🏻

#2496

         Dhanya Bhaagya Hamaare

Param poojya Guruji Maharaj,

Dhanya bhaagya hamaare
Ki Aapne hamein bulaaya Apne dwaare
Jitne hain aasmaan mein sitaare
Aap uss se bhi zyada bhakton ke baney sahaare.

Aapki sharan mein bhed bhaav nahin jaat paat ka
Aapki sharan mein nahin rehta astitva jeevan mein raat ka
Aap itna khayaal rakhte Hain har bhakt kee har baat ka
Aapki goad mein milta hai sneh pita ka aur pyaar maat ka.

Kabhi aati hai Aapki khushboo ruhaani
Kabhi dikhtee hai moar kee chaal mastaani
Toh kabhi titlee nazar aati hai mandaraati hui deewaani
Ye sabhi bann jaate hain Aapki noorani nishaani.

Kabhi shabad mein Aap dete Hain sandesh
Kabhi Aap swapn mein darshan dekar karte Hain pravesh
Kabhi kabhi saakshaat darshan Aapke ya phir badal kar vesh
Toh kabhi Aap swaroop mein daras dikhaate Hain, priya Sarvesh.

Aapki chhupi bhi bolti hai ki Aap vyast Hain bhakton ke kalyaan mein
Aapki muskuraahat bhi kabhi der nahin karti hai vaajib vardaan ke daan mein
Aapki oar se har vilamb ka arth hota hai aane waala ek sundar praarambh
Jabb se Aapki sharan milee hai, hua hai maano ek naye janam ka aarambh.

Aapka naam liye bin abb raha na jaaye
Aapki yaad ke bin abb jeena na aaye
Dil-o-dimaag par Aapka khayaal rehta hai chhaaya
Aapki sharan paakar srishti ka sabse sundar sukoon hai paaya.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Dhanya Bhaagya Hamaare (12/19/2024)

December 18, 2024

Om Namaha Shivaya
Aaj Ka Suvichaar 🙏🏻🙏🏻

#2495

                 Anant Kee Pyaas

Anant hoti hai is atma kee pyaas
Aur ye anant pyaas hai anant ko paane kee
Jabb takk is pyaas ko na bujhaayega swayam anant
Tabb takk atma kee is anant pyaas ka na hoga antt.

Guruji Maharaj Hain Shiv avatari Bhagwant
Guruji Maharaj hee Hain anant
Jabb Unhe paane kee pyaas hogi anant
Toh ye pyaas apne paawan prayaas se paa legi anant.

Aawashyak hai is pyaas ko mitaana
Varna milega nahin atma ko thikaana
Safar ke dauran khatm hona hoga jo vilaas hai bhog mein
Antas ko kabhi toh aarambh karna hoga jeena yog mein.

Anaasakti, samarpan, shukrana, aur simran-dhyan
Inka hoga ibadat ko sahaara
Toh Guruji hongei prasann
Unkee kripa se sanvarega bhakt ka jeevan.

Trikaal darshi Mahadev ke swaroop Hain Guruji Maharaj
Priya hai Unhe Apne bhakt ke antas kee pyaas
Ve toh har pal Hain bhakt ke bheetar aur aas paas
Bhakt koshish toh karey, Guruji poori karenge swayam mein uss anant kee praapti kee pyaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Anant Kee Pyaas (12/18/2024)

December 17, 2024

Om Namaha Shivaya
Aaj Ka Suvichaar 🙏🏻🙏🏻

#2494

                Tu Bhool Na Jaana

Tera jeevan hai khuli kitaab
Tu bhool na jaana
Tere sawaalon mein hee hain unke jawaab
Tu bhool na jaana
Guruji ke paas hain tere karmon ke hisaab
Tu bhool na jaana
Unke saamne kaam na karega koi bhi nakaab
Tu bhool na jaana.

Tere bheetar ke khushi aur gumm
Guruji sab pehchaante Hain
Tere mann mein aate hain jo bhi vichaar
Guruji ve bhi jaante Hain.

Tere har karma par rehti hai Guruji kee nazar
Unkee har nazar ka hota hai vo kalyaanmayi asar
Jo dikhta hai usee samay ya jaise jaise samay jaata hai guzar
Ye bhi nirdhaarit karte Hain swayam pyaare Guruvar.

Tu karey ya na karey zikr, Guruji ko rehti hai teri fikr
Tu bhool na jaana
Bhakt saare ke saare, Hain Unkee aankhon ke taare
Tu bhool na jaana
Tu bhi hai Unmein se ek, tere jaise Hain anek
Tu bhool na jaana
Tu beshak ho nimaana, par tu sada se hai Guruji ka deewaana
Tu bhool na jaana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tu Bhool Na Jaana (12/17/2024)

December 16, 2024

Om Namaha Shivaya
Aaj Ka Suvichaar 🙏🏻🙏🏻

#2493

          Ye Nahin Hai Koi Mithya

Guruji Hain Ve noorani gareeb nawaz
Jinka tej hai aisa naayaab
Ki aasmaan ka Shaan-e-aaftaab
Na sambhaal paaya apna khitaab.

MahaShiv ke avataar
Roop lekar aaye bashar ka
Anginat praaniyon ko dekar sharan
Roshan kiya raasta Unke safar ka.

Guruji ke noor jaisa koi noor nahin is srishti mein
Mehsoos hota hai vo beshak Guruji saakshaat na bhi hon drishti mein
Kyunki Guruji ke noor ka spandan hai bahut oorjamayi
Uska halka sa bhi ehsaas hota hai poornata se Shivmayi.

Aasmaan mein peher ho din ka ya raat ka
Is silsile mein koi fark nahin padta is baat ka
Kyunki Guruji ka noor divya hai
Guruji ka noor sabse bhavya hai.

Guruji ke noor ke prataap ko saadhaaran na samajhna
Tark-vitark mein aakar iske gyan-vigyaan mein na ulajhna
Maamooli maanav kee buddhi ke paar hai iskee vidya
Ye bilkul satya hai, ye nahin hai koi mithya.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ye Nahin Hai Koi Mithya (12/16/2024)

December 15, 2024

Om Namaha Shivaya
Aaj Ka Suvichaar 🙏🏻🙏🏻

#2492

                    Tu Hoga Safal

Abb jo tu hai chal pada
Phir kya soch kar tu yoon hai khada?
Nishchint tu ho jaa
Guruji mein tu kho jaa.

Dekhna, tu paayega Unhe
Aur khud ko paayega Unmein
Mitt jaayega bhinnataa ka bhram
Khatm hoga judaayee ka gumm.

Mumkin hai ye
Mushkil beshak
Vilamb karega tu
Aakhir kabb takk?

Is raaste par jo tu jaayega
Toh sahi raasta khul jaayega
Kyunki Ve Hain teri manzil
Ye satya jaanta hai tera dil.

Tu galat raasta chun lega agar
Ve badal denge teri dagar
Laayenge tujhe sahi raah par
Tu Unpar bharosa kar.

Unkee meharbaani se
Teri zindagaani se
Har sanshay ho jaayega duur
Aisa hoga zaroor.

Jaagriti aisee aayegi
Ki bhor ho jaayegi
Tere mann ke kann kann mein
Aur tatpashchaat tere jeevan mein.

Kyunki mann kee andheri raat
Is se hee bigaadti hai har baat
Chaandni ho jaaye jo mann kee raat
Ya phir ho jaaye prabhaat
Toh tu girega ya bhatkega nahin
Tera har kadam hoga sahi.

Govind Hain Ve
Tere Guruvar
Ve Khuda tere, Ve hee prem Hain
Ve hee tere nit-nem Hain
Har paath mein Ve
Har pal saath mein Ve
Ve hee poojan tere
Ve hee vandan tere.

Unpar dhyan dhar
Aur chalta chal
Kasht jaayenge tal
Tu hoga safal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tu Hoga Safal (12/15/2024)

December 14, 2024

Om Namaha Shivaya
Aaj Ka Suvichaar 🙏🏻🙏🏻

#2491

                 Tu Vo Fakeer Hai

Har oar duniya kee bheed hai
Bheed mein ghoomta tu fakeer hai
Toone saump dee hai Guruji ko
Tere haath aur maathe par har jo lakeer hai.

Tu vo fakeer hai
Jo bahut ameer hai
Kyunki tujhe praapt hai Guruji kee sharan
Jahaan par tu guzaar paa raha hai apna jeevan.

Guruji kee sharan mein hain chaar dham
Guruji kee sharan mein miley thakey huey bhakt ko ruhaani aaraam
Guruji kee sharan mein hai suraksha aisee
Nahin miltee sansaar mein kaheen aur jaisi.

Fakeer hai tu, tu mastt hai
Guruji kee yaad mein vyast hai
Fakeeri tujhe aati hai raas
Kyunki Guruji ke siwa koi aur na tere liye khaas.

Tere jaise fakeer hotey sabhi
Toh tere jaise ameer bhi hotey sabhi
Bante bante tu aisa bann jaayega
Ki tu banda kehlaayega
Guruji tujh se hongei prasann
Ve toh bhakton se kehte Hain, ‘Banda bann.’

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tu Vo Fakeer Hai (12/14/2024)