Anmol Hai Aapka Pyaar (02/02/2025)

February 2, 2025

Om Namaha Shivaya
Aaj Ka Suvichaar 🙏🏻🙏🏻

#2541

            Anmol Hai Aapka Pyaar

Anmol Aapka darbar, Guruji
Anmol hai Aapka pyaar
Is pyaar ka nahin koi paar, Guruji
Ye pyaar hai aparampaar.

Aapka pyaar barasta hai nirantar
Koi swaarth nahin is pyaar ke bheetar
Dete rehte Hain Aap bin jataaye kabhi
Aapka pyaar paate rehne ke utsuk hain sabhi.

Aapka pyaar hai har marz kee aushadhi
Aapka pyaar hai atma-vishwaas kee vidhi
Aapka pyaar deta rehta hai prerna
Aagey badhte rehne kee
Aapka pyaar deta hai chetna
Is safar mein jaagte rehne kee.

Aapka pyaar niraash lamhon mein bhi
Laata hai mukh par muskaan
Aapka pyaar deta hai ruhaani sanket
Ki Aap har pal Hain yahaan.

Kyunki Aapka pyaar hai vo paawan saath
Jo hamesha thaame rehta hai mera haath
Aapke pyaar se dekha aur suna kitne bhakton ka kalyaan hotey huey
Anokha nirmal anand milta hai Aapke pyaar mein khotey huey.

Aapka pyaar hai bhakton kee shakti aur utsah
Aapka pyaar sada ujjwal karta hai bhakton kee raah
Aapka pyaar badhaata hai chaah, Aapse aur zyada pyaar karne kee
Aapka pyaar teevra karta hai tamanna sudharne kee.

Itna kshamasheel hai Aapka pyaar
Itna sehensheel hai Aapka pyaar
Aapka pyaar Aapne mujhe hai bakhsha
Shukriya is pyaar ka jo sada karta hai meri raksha
Meri, aur mere ghar parivaar kee
Arzi hai ki ye raksha karey saare sansaar kee.

Aapka pyaar hai ashirwaad
Aapka pyaar hai prasad
Aapke pyaar ne kee hai meri duniya aabaad
Mujh mein kshamta nahin ki mai kar sakoon Aapka paryaapt dhanyawaad
Buss, guzaarish hai ki mere pyaar ka neevan nazraana qubool keejiye
Aur Apne pyaar kee chhatr-chhaaya mein mujhe sada rehne deejiye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Anmol Hai Aapka Pyaar (02/02/2025)