Month: October 2025

October 11, 2025

Om Namaha Shivaya
Aaj Ka Suvichaar 🙏🏻🙏🏻

#2792

                Layy Se Layy Milee

Apni mamta ke komal aanchal mein
Guruji ne dee raahi ko panaah
Kehne lagaa vo apne mann ko
Ho jaane ko beparvaah.

Mann ko pehle na aaya samajh
Vo baar baar jaata thaa ulajh
Phir jhelta thaa vyakulta
Phir kumm hoti thi nirmalta.

Raahi karta raha prayaas
Aakhir mein mann banaa uska das
Guruji par ekaagr kar ke sabhi soch vichaar
Raahi ne apni kamzoriyon par kiya prahaar.

Uskee koshish thi honhaar
Dekh rahe thei Guru sarkar
Unkee kripa se kaamyaab hua uska prayatn
Guruji ke chintan mein rehkar har tareh se beparvaah hua mann.

Lekin laaparvaah nahin, balki bilkul satark
Buss, abb mann mein na thaa koi tark
Maan gaya thaa, jaan gaya thaa raahi
Ki Guruji hee Hain Noor-e-elahi.

Duur ho chuka thaa uska har bhayy
Mitt chuka thaa uske mann se har sanshay
Mann hee mann kar liya thaa usne tayy
Ki milaani hai usne Guruji kee layy se apni layy.

Guruji ne jaan liya raahi ka iraada sachcha
Aur akhir kaar vo thaa Guruji ka bachcha
Guruji ne raahi ko liv jodne dee yoon Apne sangg
Ki layy se layy milee aur raahi hua malang.

🌹🌹🌹🌹🌹🌹🌹

Jai Guruji 🙏🙏
Dhirja

Layy Se Layy Milee (10/11/2025)

October 10, 2025

Om Namaha Shivaya
Aaj Ka Suvichaar 🙏🏻🙏🏻

#2791

Anokha Sa Santosh 

Apni aseemta ke liye Guruji ka shukrana karte huey
Jhuka aasmaan
Mila usey vardaan
Ki uska sada hoga kalyaan.

Beshak aayein jaayein mausam anek
Aasmaan ka aakaar rehta hai ek
Anginat baadal tehelte hain beshak
Par aasmaan sabko apne aanchal mein sambhaalta hai athak.

Baadal roop badalte hain
Kuch baraste, kuch garajte hain
Kuch chuppi mein badalte hain apna aakaar
Kuch ek dooje mein samaakar roop badalte hain baar baar.

Par aasmaan rehta hai sthir aur shant
Maano usne atmasaat kiya ho ekant
Aasmaan nahin hota pareshaan
Chaahe ho baarish ya tufaan.

Aasmaan jabb badalta hai rangg
Toh bhi bheetar sthirta hoti hai uske sangg
Aasmaan ke phailaav kee bhanti hai vistaar mann ka
Jo bann sakta hai das ya swami har jann ka.

Jitna hoga hamaare vash mein mann
Utna hee sthir usey hum rakh paayenge
Varna paristhitiyon ke oopar neeche honei se
Mann kee asthirta se pareshan ho jaayenge.

Jitna badhega manobal hamaara
Utna sthir aur shant rahega mann
Jitna chalega mann mein Guruji ka chintan
Utna sukhad hoga jeevan.

Guruji ke chintan aur manan dwaara
Mann ko milega ruhaani bal ka sundar sahaara
Mann kee aasmaani chaadar kee silvatein hatt jaayengi
Asthirta aur ashanti kee ghataayein chhatt jaayengi.

Chaahe badale paristhiyon ka mausam ya praant
Guruji kee kripa se mann rehne lagega sthir aur shant
Mann bahega Guruji kee bhakti ke ehsaas mein
Anokha sa santosh hoga har shwaas mein.

🌹🌹🌹🌹🌹🌹🌹

Jai Guruji 🙏🙏
Dhirja

Anokha Sa Santosh (10/10/2025)

October 9, 2025

Om Namaha Shivaya
Aaj Ka Suvichaar 🙏🏻🙏🏻

#2790

Har Kalyaan Ka Shukriya

Jabb paaon bhi thakk jaate hain
Chalte chalte ruk jaate hain
Tabb Guruji hee tumhe chalaate Hain
Ve hee aagey badhaate Hain.

Jabb himmat chod deti hai saath
Jabb taakat bin hotey hain haath
Guruji sangg tabb bhi Hain hotey
Phir kyun tum dheeraj ho khotey?

Jabb girte ho baar baar
Aur ummeed jaate ho haar
Tabb Guruji utsah jagaate Hain
Asha kee kiran dikhaate Hain.

Jabb sabhi apne chhoot jaate hain
Jabb sabhi sapne toot jaate hain
Tabb Guruji Apne saanidhya ka ehsaas dilaate Hain
Tumhe Apne paas bulaate Hain.

Isliye jabb bhi lagey tumhe
Ki kuch pratikool ghat raha hai tumhaare saath
Toh koshish karo ki Guruji ko yaad karo
Aur kaho Unse aur suno Unkee baat.

Ye hai ruhaani rishte kee khoobsoorati
Ki jabb judi hoti hai rooh se rooh kee taar
Toh Guruji se chuppi mein baat hoti hai baar baar
Na lafzon kee zaroorat na ishaare kee
Aisee pyaari leela hai Guruji ke sahaare kee.

Tumhaare har haalaat mein
Unkee har daat mein
Tumhaara kalyaan hee kalyaan hai
Ye Guruji kee daya ka daan hai.

Karte huey is daan ka aadar satkaar
Piro kar apne bhaav mein pyaar
Tum Guruji ke dikhaaye raaste par chalte jaao
Unke hukm ke saanche mein dhalte jaao.

Har subah Guruji ka shukriya
Har raat Guruji ka shukriya
Har pal Guruji ka shukriya
Unke kiye har kalyaan ka shukriya.

🌹🌹🌹🌹🌹🌹🌹

Jai Guruji 🙏🙏
Dhirja

Har Kalyaan Ka Shukriya (10/09/2025)

October 8, 2025

Om Namaha Shivaya
Aaj Ka Suvichaar 🙏🏻🙏🏻

#2789

Guru Mil Gaye Swayam Rabb Mein

Mahadev kee mohini moorat
Aayi lekar Guruji kee sundar soorat
Vesh mein insaan ke
Dikhaayein Ve roop har Bhagwaan ke.

Kisee ko dein Ve Krishna ji ke roop mein darshan
Kisee ko dikhe Unmein Guru Nanak Dev ka vesh
Kisee ko dikhe Sheshnaag ya Sai
Koi dekhe Unmein vighnaharta Ganesh.

Aur bhi kitne devi devta ke hon darshan
Bhakt janon ko har kshan
Jis ko bhi bhaje prem se bhakt ka mann
Guruji sweekaarein uss roop ko saara jeevan.

Kabhi roop lein Ve fakir ka
Kabhi kisee ameer ka
Kabhi roop kisee aur praani ka
Imtehaan lein Ve bhakt kee naadaani ka.

Kisee ko dein divya jyot ke darshan
Iska nirnay karein Guruji swayam
Ve jaanein kisey kaise jodna hai
Kaise bhakt ka dhyan kahaan modna hai.

Guruji Maharaj kee leela hai ye saari
Guruji Maharaj kee har leela hai nyaari
Har tareh se karte Hain Ve bhakt ka kalyaan
Unke har prataap mein basta hai daya ka daan.

Guruji mein hain sab
Guruji Hain sab mein
Hum kitne khushnaseeb hain
Jinhe Guru mil gaye swayam Rabb mein.

🌹🌹🌹🌹🌹🌹🌹

Jai Guruji 🙏🙏
Dhirja

Guru Mil Gaye Swayam Rabb Mein (10/08/2025)

October 7, 2025

Om Namaha Shivaya
Aaj Ka Suvichaar 🙏🏻🙏🏻

#2788

                 Tu Awashya Udega

Guruji kee aantarik drishti hai tujh par
Isliye tu chunautiyon se bilkul na darr
Tu aaya hai Unn maalik ke dar
Jo de sakte Hain sampoorna kalyaan ka var.

Maan le ki Unke charnon mein hai tera asal ghar
Jahaan koi pratikool prahaar na kar sakega haanikaarak asar
Isliye kintu- parantu jaise tark-vitark ko chod kar
Aur bhool kar har tareh ka agar-magar
Tu bhaj le bhaav se Guruji meharbaan ko
Ve sambhaalenge tujhe aur teri udaan ko.

Beshak tere pankh hain ghaayal
Guruji kee mamta ka marham hai nipun
Ve Hain tere Vaidyanath bhi
Tu Unke har hukm ko dhyan se sunn.

Na samajh tu swayam ko laachaar
Maan Guruji ka aadesh kyunki Ve Hain sarvopari sarkar
Bhool matt ki Guruji Hain tere praanon ka aadhaar
Pehle bhi Unhonei tujhe sambhaala hai kayi baar.

Tera ghonsala, tere bachche, sab par hai Guruji kee meher-e-nazar
Sab achcha hoga, aisa hai Guruji ke ashirwaad ka asar
Tu Guruji ka gungaan kar apni har chehek se
Ve tere jeevan ko paripoorna karenge Apni mehek se.

Vishwaas kee jis teheni par baitha hai tu
Vo kabhi na tootegi
Vo saboori jo toone Guruji se paayi hai
Vo kabhi na chhootegi
Tu vaapis apne uddeshya kee oar mudega
Ek baar phir Guruji kee kripa se tu awashya udega.

🌹🌹🌹🌹🌹🌹🌹

Jai Guruji 🙏🙏
Dhirja

Tu Awashya Udega (10/07/2025)

October 6, 2025

Om Namaha Shivaya
Aaj Ka Suvichaar 🙏🏻🙏🏻

#2787

Dhoop Ho Ya Ho Chhaaya

Dhoop ho ya ho chhaaya
Beshak kabhi na dikhe Guruji ka saaya
Par Guruji Hain bilkul yaheen
Is satya par tu kar yakeen.

Tere kann kann mein Ve
Tere jeevan mein Ve
Ve tere aas paas
Tu na ho udaas.

Tera ateet bhi
Vartmaan bhi
Bhavishya bhi
Unhe gyat hai
Aaj takk na chhipi
Unse koi baat hai.

Tere aane wale kal ko bhi
Jaanein Guruji
Ye satya hai
Yahee tathya hai.

Rehti hai Unhe chinta teri
Har lamha aur har ghadi
Har mushkil jo hai khadi
Koi nahin Unse badi.

Tyaag de tu bhayy
Tyaag de sanshay
Ve tere nath Hain
Ve tere saath Hain.

Unke chintan mein
Jeevan guzaar
Yaad kar Unhe
Tu baar baar.

Aaj nahin
Toh kal jaanega tu
Ki Unke deedar se
Poori hogi teri rooh
Adhoorapann mita
Guruji sangg waqt bita
Ve hee Guru Govind
Ve hee maat pita.

🌹🌹🌹🌹🌹🌹🌹

Jai Guruji 🙏🙏
Dhirja

Dhoop Ho Ya Ho Chhaaya (10/06/2025)

October 5, 2025

Om Namaha Shivaya
Aaj Ka Suvichaar 🙏🏻🙏🏻

#2786

               Janam Aur Maran Mein

Param poojya Guruvar,

Aapne apnaaya mujhe is janam mein
Kripa kar ke mujhe apnaa lena mere har janam mein
Rakhna mujhe Apni sharan mein
Mere har janam aur maran mein.

Itna sundar jagg Aapna banaaya
Apni maya se usey Aapne sajaaya
Yahaan Aap har pal lete Hain imtehaan
Swayam ko yaad dilaati hoon mai naadaan.

Manzil bhi Aap, Aap hee Hain raasta
Aapse hee rahe mera vaasta
Aap mein ramaa ho mera har shwaas
Aapke simran kee rahe mujhe nirantar pyaas
Aapko paane kee hee ho aas
Ek Aap hee rahein mere liye khaas
Is janam mein aur agley har janam mein bhi
Har din badhti hai chaahat yahee.

Rooh beshak basee hai is deh ke bheetar
Kintu ek saath hotey huey bhi alag sa hai inka safar
Deh ne panch bhoot mein samaa jaana hai
Rooh ne kisee aur deh mein samaa jaana hai
Tabb takk aisa rahega hota
Jabb takk rooh ka astitva Aap mein nahin khota
Aur aisa ho jaayega jabb
Aap meri rooh ko Apne mein samaa lenge tabb.

Mere param pita, mere sundar Rabb
Mai na jaanoon aisa hoga kabb
Par tabb takk jo milta rahe Aapka saath
Toh jaanti hoon, ghabraane kee nahin hai koi baat.

Mere har janam mein thaame rahiyega mera haath
Apni sharan mein rakhkar mujhe rahiyega mere saath
Jo mil jaaye mujhe Aapse ye sunehri daat
Toh chaahe jeevan ka din ho ya ho raat
Hota rahega mera hitt
Rahoongi mai surakshit
Aap meharbaan maalik ke kamal charan mein
Apne sabhi janam aur maran mein.

🌹🌹🌹🌹🌹🌹🌹

Jai Guruji 🙏🙏
Dhirja

Janam Aur Maran Mein (10/05/2025)

October 4, 2025

Om Namaha Shivaya
Aaj Ka Suvichaar 🙏🏻🙏🏻

#2785

Shukrana Unn Rabb Ka

Paristhitiyon ke prahaar se
Paapon ke pahaad se
Hokar bahut pareshaan
Aate hain anginat insaan
Guruji ke dwaar par
Guruji bulaate Hain agar.

Aksar kasht aane se pehle
Bhakt pahunchta hai Guruji ke dar
Beshak usey aane wale kashton kee na ho khabar
Guruji sabb jaante Hain magar.

Aisa bhi hota hai kisee kisee ke jeevan mein
Ki Guruji bulaava dete Hain taaki aur bhi sanvar jaaye safar
Guruji kee marzi se hee bhakt kee Guruji kee talaash hoti hai mukammal
Guruji hee nirnay lete Hain kabb kiske liye sahi hai kaunsa pal.

Jo bhi ho kaaran Guruji kee sharan mein bulvaaye jaane ka
Jo bhi waqt ho Guruji ke charnon mein aa paane ka
Vo waqt aur vo kaaran Guruji kee kripa se le chalta hai aise safar par
Jiskee shuruaat se hee honei lagta hai Guruji kee daya ka asar.

Bhakt toh jaan sakta nahin
Ki veh Guruji se juda kab
Par Guruji jaante Hain sab
Kyunki Ve Hain sabke Rabb.

Yakeenan is safar mein aksar aate hain imtehaan
Par is safar mein Guruji karte Hain bhakt ka aisa kalyaan
Jo hota hai bhakt kee soch se kaheen zyada uttam
Jo parivartit kar deta hai bhakt ka poora jeevan.

Guruji ka har bhakt hai bahut achchi kismat wala
Guruji ne bashar ke roop mein aakar kitnon ko sambhaala
Aaj Apni ruhaani maujoodagi ke paraakram se bhala kar rahe Hain Ve sabka
Srishti mein koi shabd hee nahin aisa jo atmasaat kar paaye shukrana Unn Rabb ka.

🌹🌹🌹🌹🌹🌹🌹

Jai Guruji 🙏🙏
Dhirja

Shukrana Unn Rabb Ka (10/04/2025)

October 3, 2025

Om Namaha Shivaya
Aaj Ka Suvichaar 🙏🏻🙏🏻

#2784

                Chhota Sa Paudha

Hoon chhota sa paudha
Nahin apna koi ohda
Guruji kee chhaaon mein raha hoon pal
Is se zyada chaahat na aaj ho na ho kal
Guruji kee sheetal chhaon ka ehsaas
Ye ehsaas hai bahut hee khaas
Ismein basta hai Unka ashish
Ismein basee hai Unkee bakhshish
Varna mai toh ik paudha nimaana
Taruvar kee vadiyaayee se reh jaata begaana
Shukr hai Guruji ne kee hai Apni meher
Ki Unke charnon mein guzaarta hoon har peher.

Aksar sunta hoon pakshiyon kee chehek
Aksar aati hai mujhe Guruji kee mehek
Kal ik titli bhi aayi thi
Mujhe dekh kar muskuraayi thi
Pehle bhi mainey usey dekha hua hai
Aksar usne mere patton ko chhua hai
Jabb bhi vo aati hai
Mujhe Guruji ke satsang sunaati hai
Mai bhi karta hoon uske samaksh Guruji kee aseem kripa ka gungaan
Kyunki mere Guruji Hain hee itne mahaan.

Mai toh ek beej thaa nanha
Guruji ne mujhe dee panah
Keede khaane wale thei mujhe ik din
Na bachta Guruji kee kripa ke bin
Guruji ne roka mera shoshan
Guruji ne kiya mera poshan
Varna mai aaj paudhe ke roop mein na hota yahaan
Na jaane kis roop mein mai hota kahaan.

Mere Guruji bade dayavaan Hain
Ve sach mein sarvshaktimaan Hain
Aaj jo mai yahaan hoon khada
Aaj jo mai hoon itna hara bharaa
Ye sab hai mere Guruji ka ashirwaad
Kumm hai jitna bhi karoon Unka dhanyawaad.

🌹🌹🌹🌹🌹🌹🌹

Jai Guruji 🙏🙏
Dhirja

Chhota Sa Paudha (10/03/2025)