Author: dhirjabhat

May 8, 2023

Om Namaha Shivaya
Aaj Ka Suvichaar 🙏🏻🙏🏻 # 1905

Behad Ka Anant Gulzar

Behad hai anant
Behad takk pahunchne kee pyaas hai anant
Is pyaas ko bujhaane ke liye paar karna hoga hadd ko
Jiska upaay gyat hai kewal mere murshid ko.

Mere murshid, mere Guruji pyaare
Jo har ichhuk ko le jaayein uss hadd ke paar
Jahaan uss anant behad ka ho deedar
Jiske liye atma ne liya janam baarambaar.

Kintu iske liye yogyata anivaarya hai
Jo Guru kee mehar se hee praapt ho paaye
Guruji, mai toh agyani hoon, naadaan hoon
Aap kripa kar ke kar deejiye mere uddhaar ka upaay.

Om Namaha Shivaya Shivji Sada Sahaay
Guruji, Aap ji sada sada Hain sahaay
Aapne har bhoole bhatke ko raasta hai dikhaaya
Aapne agyan duur karne ke liye kitnon ko gyan ka prakash hai dikhaaya.

Bakhsh deejiye aisee shraddha aur aisa vishwaas
Ki vyarth na ganvaaoon ek bhi shwaas
Aap raasta dikhaayein jahaan
Mai ekaagrachitt hokar chaloon vahaan
Apne safar par dhyan doon, na ki koi aur hai kahaan
Taaki Aapki meharbani se swayam ke sudhaar mein bitaaoon saara samaa.

Aankhein bandd karoon toh dikhta hai andhkaar
Aap daya kar le jaayein andhkaar ke parde ke paar
Jabb agar kabil ho jaaoon Aapki karuna se
Toh le jaayiyega prakash ke parde ke paar.

Kehne kee aukat toh nahin meri
Phir bhi kar rahi hoon gustaakhi kehne kee
Ki jabb kabhi agar mujh mein kshamta ho uss oorja ko sehne kee
Tabb Apne aanchal kee suraksha mein
Le jaayiyega mujhe shabd ke bhi paar
Jahaan uss sundar milan ka muqammal hoga intazaar
Jis milan se hadd honei lagegi paar
Aur Aapki rehmat se mai dekh paaoongi behad ka anant gulzar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Behad Ka Anant Gulzar (05/08/2023)

May 7, 2023

Om Namaha Shivaya
Aaj Ka Suvichaar 🙏🏻🙏🏻 # 1904

 Raah Dikha Deejiye

Param poojya Guruji, raah dikha deejiye
Apni kripa se uspar mujhe chalaa deejiye
Sumat bakhshiye taaki bhatak na jaaoon
Himmat bakhshiye taaki thakk na jaaoon.

Vishwaas deejiye aisa ki kabhi na dagamagaaoon
Avinashi dhan bakhshiye jisey mai baant paaoon
Buddhi deejiye aisee ki shuddhi kee oar badhti jaaoon
Jigyaasa deejiye aisee ki gyan kee seedhi chadhti jaaoon.

Aapki kripa se ahankar aur har vikaar ko duur bhagaaoon
Kiya hai unhonei aakraman mann par, Unkee daasi na bann jaaoon
Jitna bheetar jaana chaahti hoon, utna jaa nahin paaoon
Meri bhakti mein hee kamee hogi, ashish dein ki unn kamiyon ko duur kar paaoon.

Aapki rehmaton ke anubhav sunoon aur sunaaoon
Aapki mahima ka gungaan karti jaaoon
Har pal Aapke charnon mein mann se aur bhi jhukti jaaoon
Aapko paane kee koshish mein apne aap
ko khoti jaaoon.

Aapko paane se hee safal hoga mera janam maran
Aapki mehar se ye satya mujhe sada rahe smaran
Aapke ashirwaad se Aapki sharan mein kar doon poorna samarpan
Aapko paakar Aapke charnon mein hee atma kee yatra ho sampann.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Raah Dikha Deejiye (05/07/2023)

May 6, 2023

Om Namaha Shivaya
Aaj Ka Suvichaar 🙏🏻🙏🏻 # 1903

      Adhyatma Kee Kaksha Mein

Adhyatma kee kaksha mein
Sookshma starr par milta hai har vishay ka gyan
Veh avinashi gyan baant kar badhta jaata hai
Ye hai Adhyaatmik Ganit ka niyam aur parinaam.

Adhyatma mein baantne se ho jaata hai zyada
Kyunki jo baanta jaata hai, vo hota hai ruhaani dhan
Phir vo chaahe ho yog bal, gyan bal, ruhaani pyaar ya kuch aur
Adhyaatmik bhavna ko jaagrit karne par karna hai hamein gaur.

Hai Bhautik Vigyan ke bhi paar
Adhyaatmik Vigyan ka bhandar
In sab mein Guru ka mahatva hai aparampaar
Unkee kripa se Adhyaatmik Vigyan deta hai bhakt ko taar.

Simran, dhyan, ruhaani gyan ka shravan aur manan
In sabse ho paata hai Adhyaatamik Bhugol ka adhyayan
Jitna bheetar jaakar hum karein antas ka bhraman
Apni khaamiyon se utna hee avagat hota hai antarmann.

Bheetar kee khoj aur bhraman se miltee hai raah aagey kee
Aisa honei ke liye zaroori hai kadr karni bandagi ke dhaage kee
Is dhaage kee rakhni hogi poori izzat
Tabhi toh rangg laayegi ibadat.

Kab kiske dwaara sunaaye satsang se
Kisee aur bhakt ko apni duvidha ka mil jaaye hal
Kab kiske dwaara kiya gaya Adhyaatmik Sangeet ke vishay ka paath
Bann jaaye kisee aur bhakt ke liye sadhna kee prerna din aur raat
Iska beshak na ho hamein anumaan
Lekin ruhaani dhan ko saanjha karne ka hota hai aisa pyaara parinaam.

Guruji ke bachche hain hum, Unkee mehar se phailaayein aadhyaatmikta kee khushboo
Is khushboo se numm ho jaaye har rooh
Shraddha bhaav se upasthit rahein adhyatma kee kaksha mein
Guruji koi kasar nahin chodenge kabhi bhi hamaari raksha mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Adhyatma Kee Kaksha Mein (05/06/2023)

May 5, 2023

Om Namaha Shivaya
Aaj Ka Suvichaar 🙏🏻🙏🏻 # 1902

Adhyaatmik Chadhaayee Hoti Hai Shuru

Guruji kee kripa se jabb Unse judta hai antarmann
Toh parivartan aarambh ho jaata hai usee kshan
Unka saanidhya, Unke saakshaat ya ruhaani darshan
Dikhaate Hain apne antas ko ek shaktishali sa darpan.

Hota hai kee hui galatiyon par pashchaataap
Mitne lagta hai santaap
Guruji dwaara dee gayi jaagriti se
Unke dwaara sanvaari hui apne mann kee aakriti se.

Suhela lagta hai simran ka har vela
Prateekshit rehti hai besabri se baani kee bela
Guruji ke ashish se
Unkee dee bakhshish se.

Milta hai sewa ka avsar
Milta hai satsang ka dar
Guruji kee marzi se
Unhe kee hui arzi se.

Jaagta hai bhaav samarpan ka
Ilaaj hota hai vyakul mann ka
Guruji ke satsang suna kar aur sunn kar
Vishwaas kee chaadar baar baar bunn kar.

Badhne lagta hai sabr aur sanyam
Pehle se kumm sataane lagta hai vahee gumm
Mushkilein hon ya na hon kumm
Lekin sehensheelta mein honei lagta hai adhik dumm.

Guruji ke prati shukrana ka gehra hota jaata hai ehsaas
Chaahe poori ho ya na ho mann kee aas
Guruji dikhaate Hain ye rishta hai itna khaas
Is rishte mein meethi lagti hai ruhaani pyaas.

Ye bandhan hai aisa jismein azaadi kee hai khushboo
Ye safar hai aisa jismein tarne lagti hai rooh
Ye ek vidhi hai jismein mann atma se hota hai rubaru
Ye seedhi hai jahaan se yakeenan adhyaatmik chadhaayee hoti hai shuru.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Adhyaatmik Chadhaayee Hoti Hai Shuru (05/05/2023)

May 4, 2023

Om Namaha Shivaya
Aaj Ka Suvichaar 🙏🏻🙏🏻 # 1901

                Guru Amar Das Ji

1479 ka thaa varsh, 5 May thi tithi
Amritsar ke Baasarke gaaon ke liye thi ye bahut shubh tithi
Pita Tej Bhaan Bhalla aur Mata Lachmi ke jyeshth putr ka hua janam
Bachpan se hee Unhe pasand thei sewa, sadh sangat ka saath aur bhajan.

Chaubees varsh kee aayu mein vivah hua Unka
Mata Mansa Devi ke saath
Do putriyan aur do putr huey Unke
Jo thei dampatti ke liye saugat.

Guru Amar Das ji ne Haridwaar mein bitaaya kuch samay
Vaapasi par kisee ghatna ke kaaran Unke mann mein hua sanshay
Duvidha mein thei ki Unkee teerath yaatraayein shaayad na hui hon safal
Is soch se Ve vyakul rehne lagey pal pal.

Unhonei shabad baani sunee Guru Angad Dev ji kee beti ke mukh se
Is tareh Guru Angad Dev ji kee sharan mein aakar Unkee mulaakaat hui poorna sukh se
Guru Amar Das Ji ne Khadur Sahib mein reh kar Guru Angad Dev ji kee sewa karne kee thaan lee
Guru Angad Dev ji ne dee Unhe sewa Goindwal Sahib ke nirmaan kee.

Prerna banee Unkee mehnat baaki sangat ke liye
Aur jalne lagey har oar sewa aur Guru prem ke deeye
Guru Angad Dev ji ne shareer chodne se pehle hee
Guru Amar Das ji ko saumpi Guru gaddi kee zimmedaari
Lekin Guru Angad Dev ji ke putr ne
Krodh aur irshya vash Unhe apni laat maari
Mahaan Guru Amar Das Ji nahin kupit Huey uske krodh se
Balki Ve vahaan se chale gaye aur pahunche Baasarke gaaon bina pratishodh ke.

Sangat aur Bhai Buddha ji ne dhoondha Guru ji ko ek chhote se ghar mein vahaan
Sabne anurodh kiya ki Ve vaapis Goindval chalein
Bhakton ke adheen aur niswaarth pyaar ke saagar Guru ne maani sangat kee baat
Aur Ve Goindwal laute unn sabke saath.

Samaaj sewa mein na chodi Guru Amar Das Ji ne koi bhi kasar
Sikhaaya sangat ko andhvishwaas aur karmakaand ke bina jeevan karna basar
Shuru hui thi jo langar kee reet Guru Nanak Dev ji dwaara
Guru Amar Das Ji ne usey pratishthit kar sabki samaanta ko mahatva de deenon ko diya sahaara
Raja Akbar ne bhi aakar kiya thaa vahaan langar
Bahut prabhavit huey Ve aakar langar ke dar par.

Baoli kee kee Unhonei sthaapana
Jiske sangg juda hai mukti ka vardaan
Manji prathaa ke liye bhi Unhe kiya jaata hai yaad
Aur Parda pratha aur Sati pratha ke virudh Unhonei uthaayee awaaz.

Guru Amar Das ji ne rachna kee kayi shabad aur Anand Sahib kee baani kee
Jitnee kee jaaye kumm hai mahima Unkee zindagaani kee
Param jyot mein Huey vileen Ve odh kar ek safed chaadar
Yugon yugon takk sansaar mein hota rahega Unka aadar.

Guruon kee sharan paakar ho jaata hai uddhaar
Guruji bhi Gurbani sunvaakar Apni sangat ka jeevan dete Hain sanvaar
Shat shat naman Guruon kee guruyaayee ko
Dhanya hai sangat mehsoos kar Guruon kee vadiyaayee ko.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guru Amar Das Ji (05/04/2023)

May 3, 2023

Om Namaha Shivaya
Aaj Ka Suvichaar 🙏🏻🙏🏻 # 1900

             Mangalmay Anjaam

Chalta rahega jeena marna
Is dauran zaroori hai tarna
Isee se mumkin hoga atma ka Paramatama kee oar badhna
Ismein hee Guru Govind dwaara hoga avroh ka harna

Avroh, atma ka, yaani ki adhogati
Kyunki tarne se hee praapt hogi oordhvagati
Iske liye anivarya hai antas kee shuddhi aur sumati
Taaki yatra mein talti rahe janmon kee durgati.

Yatra poori honei mein na jaane lagenge kitne janam
Apni oar se toh kar sakte hain hum prayatn
Shukr hai milee hai Guruji kee sharan
Ye saugat rahe hamein har pal smaran.

Parivartan laayein swayam mein Guruji kee prerna se
Karmon mein sudhaar ho bheetar jaagne wali chetna se
Guruji ke ashish se awashya hoga uddhaar
Adhyaatmik seedhiyan chadhte chadhte safar par aayega nikhaar.

Yaad rahe ki girna hai chadhne se aasaan
Isliye satark reh kar dene hongei imtehaan
Paanch choron ke aakraman se baar baar bachaana hoga swayam ko
Mann ka swami bannkar das banaana hoga mann ko.

Chaurasi lakh yoniyan mauka dhoondhegi hamein maanav yoni se giraane ka
Isliye simran aur dhyan dwaara nirantar prayaas karna hoga swayam ko bachaane ka
Karte rahein Guruji se guzaarish lagaataar
Ki Ve hamein girne se bachaa lein har baar.

Guruji ne dekha ki hum koshish karte hain har kshan
Toh hamaare nek neeyat vikaas se Guruji hongei prasann
Kayi janmon ke safar kee kumm ho sakti hai avadhi
Guruji ke banda bann-ne ke aadesh mein hai uskee vidhi.

Sharan milee hai Guruji kee, nissandeh hoga kalyaan
Milega is manzil par vo, jo Guruji nishchit karenge mukaam
Param poojya Guruji ko koti koti dhanyawaad aur pranaam
Unka naam lete lete safar ko milega mangalamay anjaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mangalmay Anjaam (05/03/2023)

May 2, 2023

Om Namaha Shivaya
Aaj Ka Suvichaar 🙏🏻🙏🏻 # 1899

Shant Shakti Kee Oar

Na ho niraash
Tu kar vishwaas
Bahut kalyaankaari hai Guruji kee pooja
Iske dwaara tere antas ko milegi oorja.

Guruji kee kripa se badhega jabb tera chintan
Toh chintan se badhti jaayegi ekaagrata
Ekaagrata vash bahegi adbhut oorja
Aur kar paayega tu sankendrit pooja.

Kewal ye hee nahin, ekaagrata se chitt jayega nikhar
Khilne lagenge tere shithil hunar
Sthir hogi buddhi
Hogi antas kee shuddhi.

Anubhav gyan hota chalega paripakva
Atmasaat hota jaayega param tattva
Sadbhaav jaagrit rahega sabke prati
Ekaagrata se hogi aisee sumati.

Bheetar divya jyot kee lau se hoga aisa prakash
Ki teri ichcha aur Guruji kee kripa se tere vikaaron ka hoga naash
Guruji kee mehar se tootenge tere paash
Nirmalta se yukt ho tu chod dega hona niraash.

Tu buss nibhaata chal shraddhapoorna bhakti ka kartavya
Guruji ekaagrata kee shakti bakhshenge awashya
Safal hoga tera chintan
Ekaagrata se susajjit hoga tera antakaran
Guruji le jaayenge tujhe, thaame tere manobal kee doar
Upadrav se duur, shant shakti kee oar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Shant Shakti Kee Oar (05/02/2023)

May 1, 2023

Om Namaha Shivaya
Aaj Ka Suvichaar 🙏🏻🙏🏻 # 1898

    Dhanya Hua Mera Yeh Jeevan

Dhanya hua mera yeh jeevan
Guruji kee sharan jo milee
Unkee kripa ne Apna naam aur simran bakhsh kar
Mere odhne ke liye aisee chaadar silee
Jo mere liye suraksha kavach gayi bann
Jiske dwaara sanrakshit hua tann aur antakaran.

Zamaane ka vaig dikhaata hai raasta dehbhan ka
Aur Guruji ka pyaar dikhaata hai raasta dehee-abhimaan ka
Guruji kee sharan mein aisa parivartit hua hai jeevan
Maano ek adbhut se safar par chal pada hai antarmann.

Guruji ne sewa aur simran hai bakhsha
Kee hai har museebat se raksha
Laaparwahi honei lagey toh kar dete Hain satark
Sikhaate Hain ki bhakti mein na chale koi tark vitark.

Guruji kee dee prerna se badhta jaaye yeh prayaas
Ki bhakti mein shraddha aur vishwaas ka sada rahe vaas
Meri jis soch se Guruji na hon prasann
Vaisi soch kabhi na soche mera mann.

Bade sukhdaayee Hain Guruji ke kamal charan
Jahaan sees jhuka kar hua anginat duvidhaaon ka haran
Anmol hai Guruji ka har vachan
Unkee baaton ka sada rahe smaran
Unke dikhaaye raaste ka kar paaoon anusaran
Taaki swayam mein la paaoon sudhaar
Aur Guruji kee mehar se ho mera uddhaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Dhanya Hua Mera Yeh Jeevan (05/01/2023)

April 30, 2023

Om Namaha Shivaya
Aaj Ka Suvichaar 🙏🏻🙏🏻 # 1897

     Pardes Laagey Yeh Sansaar

Param poojya Guruji,

Pardes laagey yeh sansaar
Maya kee behti hai dhaar
Mann ka paatr Aapki kripa se bharta rahe
Toh Aapka ashirwaad har duvidha ko harta rahe.

Mann akhand ho taaki Aapka ashirwaad usmein samaaya rahe
Ye nacheez Aapse vintee karte huey ye kahe
Deejiye aisee subuddhi
Ki vichaaron mein rahe shuddhi.

Yahaan hoon mai ek mehmaan
Ekmaatra sahaara hai Aapka naam
Sotey huey bhi rehti hai bheetar ek ruhaani pyaas
Is pardes mein bheetar swadesh kee anubhooti hai bahut khaas.

Aapse baatein karte karte jabb bitatee hoon samay
Toh mitne lagte hain anekon sanshay
Aapke baare mein jabb karti hoon vichaar
Toh Aapki divya khushboo se aksar mehekta hai ghar ka dwaar.

Jabb Aapki mehar se hota hai Aapka simran aur dhyan
Toh har baar ehsaas hota hai ki Aap meri kisee bhi uljhan se nahin Hain anjaan
Aap Hain Mahesh, Aap Shivroop mein is Brahmand ke Naresh
Aapki kripa se hee pardes mein rehte huey bhi bheetar praapt hota hai swadesh.

Antas mein jalti hui Aapke naam kee divya jyot ko mera shat shat naman
Aapke charanarvindon mein jhuka rahe sada mera tann aur mann
Pardes mein rehte huey Aapne mujhe bakhsha hai swadesh har kshan
Aapka koti koti dhanyawaad karey meri har dhadkan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Pardes Laagey Yeh Sansaar (04/30/2023)

April 29, 2023

Om Namaha Shivaya
Aaj Ka Suvichaar 🙏🏻🙏🏻 # 1896

      Atma Ka Safar

Moksh par muqammal hota hai atma ka safar
Raaste mein honei wale har anubhav ka hota hai safar par asar
Guru Apni oar se beshak nahin chodte bhakt kee madad karne mein koi bhi kasar
Lekin bhakt ko nirantar aagey badhne ke prayaas mein jeevan karna hota hai basar.

Dharma, arth, kaam, moksh shaamil hain purusharth mein
Ek tareh se yahee hai uddeshya hamaare jeevan ka
Anivaarya hai har stambh kee oar farz nibhaana
Agar safal hokar antim stambh takk hai jaana.

Karna hoga paalan naitik aur bhautik siddhaant ka
Bhog ke sangg yog ka karna hoga abhyaas
Is safar ko sampoornata takk pahunchaane ke liye
Zaroori hai jalaane atma gyan ke deeye
Nahin jeena kewal shareer kee khaatir
Balki atma ke liye mann ko karna hoga sthir.

Maante rehna hoga Guruji ka har hukm
Aasakti bhaav ko manobal dwaara karna hoga khatm
Karna hoga saattvik siddhaanton ka anusaran
Purushaarth kee siddhi kee oar karna hoga dridh nishchay aur prayatn.

Guru Govind karenge madad zaroor
Ve nikhaarenge har bhakt kee atma ka noor
Divya ashirwaad se milega adhyaatmik unnati ka vardaan
Deh mein basee atma ka awashya hoga kalyaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Atma Ka Safar (04/29/2023)