Author: dhirjabhat

March 29, 2023

Om Namaha Shivaya
Aaj Ka Suvichaar 🙏🏻🙏🏻 # 1865

        Sajaa Hai Maiya Ka Darbar

Sajaa hai Maiya ka darbar
Manaaya jaa raha hai Ashtami ka tyohaar
Chaitra Navratri ka ho raha hai samaapan
Ashtami ke baad Navami ka ho raha hai aagaman.

Is varsh ke Chaitra Navratri kee
Samaapan bela hai aayi
Bhakton ke mann mandir mein
Vishwaas kee vriddhi laayi.

Ati sundar laagey
Mata Rani ka har Swaroop
Itna noorani hai
Mata Rani ka roop.

Mata Rani ka aathvaan Swaroop
Maa MahaGauri pooja jaaye Ashtami ke din
Vidhi vidhaan se kayi jann karein havan
Kanya bhoj se kanjakon ka gadd gadd ho jaaye mann.

Ashtami kee samaapti
Aur Navami kee shuruaat
Inke beech hoti hai sandhi arti Mata Rani kee
Jo kalyaan karti Hain sangat kee zindagaani kee.

Laal chunri, dhvaja bhi laal mandir ka
Sabhi bhakt ashirwaad lein Maa aur Maa ke dar ka
Makhaane aur bataashe kiye jaayein Maiya ko arpan
Maalpoore aur kheer ka bhog lagaaye maa ko bhakt jann.

Maa hee prakriti
Maa hee shakti
Maa de mamta
Maa de kshamta.

Maa dushton ka karey sanhaar
Maa sambhaale bhakton ka ghar parivaar
Maa kee shakti se sakaaratmak oorja paaye
sansaar
Maa kee kripa se bhakt hon bhavsaagar se paar.

Guruji Apni sangat ko dein mata aur pita ka pyaar
Unkee sangat harshit ho paakar Unka dulaar
Jis bhi roop mein Guruji ko bhakt pooje, veh pooja Guruji karein sweekar
Maa maanein Unhe, ya maanein pita, Ve karte Hain beda paar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sajaa Hai Maiya Ka Darbar (03/29/2023)

March 28, 2023

Om Namaha Shivaya
Aaj Ka Suvichaar 🙏🏻🙏🏻 # 1864

           Atma Hoti Rahe Unnat

Shaayad is janam mein
Kismat kar le hamaari khidmat
Lekin aane waale janmon mein toh
Is janam ke karma hee banenge hamaari kismat.

Kyunki jo kismat hai is janam kee
Veh pichhle janmon ke karmon se hai banee
Praarabdh kaho, ya kaho isey bhaagya
Chaahe veh ho saubhagya ya durbhagya
Ya kaho pichhle janmon ka hamaara itihaas
Jo kismat ke roop karta hai vartmaan mein vaas.

Isliye satark rehna hai zaroori
Laparawahi se hoga nuksaan
Bhavishya mein chahiye muskaan
Toh abhi se karna hoga intazaam.

Intazaam, satkarmon ke dwaara
Taaki agar janam lena padta hai dobara
Toh praarabdh ho paksh mein apne
Aur anukool hon kismat kee kitaab ke panne.

Guruji toh bade dayalu Hain
Ve sach mein bade kripalu Hain
Hamaare har karma par hoti hai Unkee nazar
Ve angg sangg rehte Hain chaahe jaisa bhi ho hamaara safar.

Hamaari swatantra ichcha mein nahin karte Ve hastakshep
Lekin sweekarte Hain hamein chaahe hon hum mein lakhon ayb
Karaate Hain Ve Gurbani ka simran
Taaki dikhe hamein mann ka darpan
Dekh paayein hum apne charitra par padey daag
Aur unhe mitaane ka karein prayatna, na ki jaayein unse bhaag.

Kyun na is janam mein har karma karein Guruji ko arpan
Mann se kar dein Unhe sarvsamarpan
Taaki jabb vartmaan baney itihaas bhavishya mein
Toh na hui ho gustaakhi hamaari oar se kisee kartavya mein.

Koshish sachchi ho
Kismat achchi ho
Guruji dete rahein aisee sumat
Ki atma hoti rahe unnat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Atma Hoti Rahe Unnat (03/28/2023)

March 27, 2023

Om Namaha Shivaya
Aaj Ka Suvichaar 🙏🏻🙏🏻 # 1863

Shubh Hai Unkee Panah

Na ho bhayy
Na ho sanshay
Layy ho Shivmay
Toh kalyaan hai tayy.

Jahaan Shiv Hain
Shubhta hai vahaan
Guruji Shivavatari Hain
Shubh hai Unkee panah.

Aseem hai Guruji kee mamta ka aanchal
Jismein Ve sambhaalein hamein har pal
Hamaare kasht nishchay hee jaate hain tal
Kyunki Guruji ke paas hai har mushkil ka hal.

Aur Unkee mamta mein hai itnee kshamta
Ki samaa tufaani honei ke baavajood na kar paaye shaitaani
Unkee muskaan kee chhataa de bhakt kee vipda hataa
Aur agar timir lagey daraane, toh na chalein uske koi bahaane.

Ho jaaye insaan jitna bhi yashaswi ya dhanwaan
Uske jeevan ka antt toh nishchitt hai
Isliye jo Shiv bheetar Hain swayam ke
Unke bodh aur saakshaatkaar mein hee hitt hai.

Shiv Hain sthir
Shiv Hain karunanidhaan aur leela dhari
Guruji kee kripa se
Shivmay honei ke bodh kee zaroor aayegi baari.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Shubh Hai Unkee Panah (03/27/2023)

March 26, 2023

Om Namaha Shivaya
Aaj Ka Suvichaar 🙏🏻🙏🏻 # 1862

                   Aapke Bharose

Pyaare Guruvar,

Aapke bharose rahi hoon chal
Aapka naam lete huey har pal
Guruji, deejiye aisee prerna
Jagaa deejiye yoon meri chetna
Ki dhul jaaye mere mann ka mal
Mujhe praapt ho vivek vimal.

Ye duniya toh lagti hai ek mela
Sabhi ke beech bhi mera mann thaa akela
Jabb se jaana ki Aap Hain angg sangg
Nahin hoti hai pehle jaise mann kee shanti bhangg.

Aapne samjhaaya ki raasta nahin hai aasaan
Jaanti hoon Aap maargdarshan karenge aur karenge gyan pradaan
Chadhaayee chadhne mein aaye kathinaayee
Toh Aap hee denge chadhte rehne kee himmat
Kamzor padne lagi jo mai
Toh Aap dete rahenge aisee taakat
Ki mai parishram kar paaoon athak
Aur na jaaoon raaste se bhatak.

Sansaar roopi ratri mein
Aapka naam hai mere raaste ka chiraag
Bhram kee nidra mein so jaaoon agar
Toh Aapke hastakshep se mai jaaoon jaag.

Swarg narak ka toh pataa nahin
Buss, rakhiyega sada Apne kamal charan mein
Trikaal darshi Shivroopi Hain Aap
Dhanya hoon aakar Aapki sharan mein.

Aap par mera bharosa na kabhi dagamagaaye
Deejiye aisee subuddhi kee shuddhi
Har haalaat mein rahoon shukraguzaar Aapki
Har pal Aapke prati meri shraddha mein ho vriddhi.

Meri sabhi khaamiyon ke baavajood Aapne mujhe sweekaara
Aapki mehar ne mera jeevan hai sanvaara
Aapke ashirwaad ke amrit kee dhaara
Sada se hai sarvashreshth sahaara.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapke Bharose (03/26/2023)

March 25, 2023

Om Namaha Shivaya
Aaj Ka Suvichaar 🙏🏻🙏🏻 # 1861

           Ramm Jaayega Mann

Khuda se koi nahin hai juda
Muda aisa kyun lagne lagta hai ki bahut duur hai Khuda?
Darasal toh swayam ke bheetar baste Hain Khuda aur khudaayee
Hamaari khaamiyon ke kaaran hamein ye baat samajh hee na aayi.

Kehna aasaan hai
Kintu vyavhaar aur vichaar mein mushkil hai aisa karna atmasaat
Kyunki kehte hain hum ki ahem tyaag rahe hain
Lekin hum shwaas lete hain uske saath.

Jo ho raha hai hamaare bheetar aur baahar
Veh juda hai hamaare shwaas se
Isliye kalyaan isee mein hai
Ki Khuda se hum judey rahein vishwaas se.

Guruji kee guruyaayee mein paayi Unke bhakton ne Khudaayee
Maha paraakrami hai Guruji kee vaddi vadiyaayee
Unke simran aur dhyan se shwaas ho jaayenge pavitra
Jitna pavitrikaran hoga, utna sanvarta jaayega charitra.

Safar hai ye
Kuch waqt toh lagega
Lekin Guruji kee mehar se
Nishchay hee chaitanya jagega.

Bodh hoga jis kshan
Baahar Bhagwan
Bheetar Bhagwan
Mehsoos karega mann.

Khaamiyon se paar
Hai jo sangam ka sansaar
Uska hoga izhaar
Uska hoga ikraar.

Guruji kee vadiyaayee laayegi yeh parivartan
Unkee kripa se saaf hoga mann ka bartan
Na rahegi koi pareshaani na rahega koi gumm
Shivoham Shivoham mein ramm jaayega mann.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ramm Jaayega Mann (03/25/2023)

March 24, 2023

Om Namaha Shivaya
Aaj Ka Suvichaar 🙏🏻🙏🏻 # 1860

         Paawan Oorja Se Paripoorna

Guruji ko kar de bahut prasann
Bhakt ka bhole bhaav se bharaa mann
Lekin jabb mann mein asur hon basey har kshan
Toh kaise praapt ho vahaan divyata ke vaas ka dhan?

Mann mein asur bannkar vaas karein vikaar
Kaam krodh lobh moh madd matsar ahankar
Inka kolahal na honei de paawan bhaav kee jhankar
Inse khali honei kee karni hogi koshish baarambaar.

Jis mann se ho paaye japp aur simran
Veh mann rehta nahin nirdhan
Ho sakta hai ki karna padey thoda ya bahut intazaar
Lekin aise mann mein rehte asuron ko maan-ni hee padti hai haar.

Isliye maangein Guruji kee aisee mehar
Ki japp aur simran ho paaye shaam seher
Sotey jaagte divya chintan se goonje mann ka upvan
Sharminda hokar haar maankar vikaar chod dein mann ka aangan.

Mann se jabb duur hongei ye vikaar
Shuddhi aur subuddhi se saj jaayenge vichaar
Mann mein tabb jaagega jo niswaarth pyaar
Veh paayega Guruji ka aseem dulaar.

Bhakti mein hoga bhaav bhola aur masoom
Guruji ko prabhavit karega yeh bholapann
Unkee kripa se ho paayega Unke charnon mein sarvsamarpan
Shiv Shakti kee paawan oorja se paripoorna hoga mann.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Paawan Oorja Se Paripoorna (03/24/2023)

March 23, 2023

Om Namaha Shivaya
Aaj Ka Suvichaar 🙏🏻🙏🏻 # 1859

      Aapki Rehmatein Anginat Hain

Param poojya Guruji,

Kehna chaahti hoon jitna
Utnee kaabiliyat nahin hai mujh mein
Aapki rehmatein anginat hain
Aapne kabhi ummeed kee jyot na dee bujhne.

Aapki mehar ka bakhaan
Kahaan se karoon shuru aur kahaan par karoon khatam
Karna chaahoon toh bhi
Lagg jaayein na jaane kitne janam.

Bholenath Hain Aap
Aur leela dhari bhi
Imtehaan bhi lete Hain
Aur Hain kirpadhari bhi.

Chadhta jaaye Aapki ibadat ka khumaar
Badhta jaaye Aapse pyaar
Aapke charnon mein har din hai tyohaar
Kabhi aaye na phir akelepann ka vichaar.

Aapse hee lau hai mere vishwaas kee
Aapse hee oorja hai mere shwaas kee
Aapse hee mehekti hai chhavi mere ruhaani ehsaas kee
Aapse hee ullaasit hoti hai har ghadi mere ruhaani prayaas kee.

Aapse surakshit hain mere jeevan kee raahein
Mujhe vaisi bann-ne kee sumat bakhshiyega jaisa Aap chaahein
Meri dhadakanein sada Aapki taareef ke geet gaayein
Aapka shukrana karte karte ve phooli nahin samaayein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapki Rehmatein Anginat Hain (03/23/2023)

March 22, 2023

Om Namaha Shivaya
Aaj Ka Suvichaar 🙏🏻🙏🏻 # 1858

           Shukrana Uss Doar Ka 

Mere param poojya Guru
Aapse mera naya jeevan hua hai shuru
Shukrana uss doar ka
Jiske dwaara Aapne mujhe baandha hai
Is paawan sundar bandhan mein
Taaki jeevan beete Aapke vandan mein.

Mujh nacheez naadaan kee pakad ho sakti hai kamzor
Kaheen chhoot na jaaye mujhse se ye doar
Shukrana ki Aapne liya hai isey thaam
Tasalli hai ki har paristhiti mein Aap karenge kalyaan.

Bakhshte rahiyega
Taarte rahiyega
Beshak imtehaan leejiyega
Saamarthya aur shakti deejiyega.

Yoon parivartit keejiye mere antas ka aakaar
Ki Aapki kripa se saakshaatkaar ka mera swapn ho saakaar
Aap mein aur Aapki bhakti mein yoon rahoon leen
Jaise mahasaagar mein jeevit rahe meen.

Guruji, koi vikarshan na bann paaye aisa aakarshan
Ki mai bhool jaaoon lena Aapka naam
Aapke hee charnon mein beete meri har subah aur har shaam
Aapki hee sharan mein hai mere liye sukhdayee shanti dhaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Shukrana Uss Doar Ka (03/22/2023)

March 21, 2023

Om Namaha Shivaya
Aaj Ka Suvichaar 🙏🏻🙏🏻 # 1857

                  Anantam Shukriya

Disha dikhe na mujhe is nisha mein
Guruji, dikhaayiye Apni chaah ke mutaabik raah
Niraasha ne gher liya hai asha ko
Aap Parwardigaar, baney rahiye aashvaasan ka aadhaar.

Aap par vishwaas honei ke bavajood pareshaan kyun hai shwaas
Is ashuddhi kee kripa kar keejiye shuddhi
Tark se na padega koi sakaaratmak fark
Deejiye samarpan ka vardaan, aye karunanidhaan.

Darr ke har avsar ka hota hai ye asar
Yaad taaza hoti hai ki Aapki mehar se ho raha hai jeevan basar
Ye sab bhi jo ho raha hai abb
Hai yakeenan Aapka pradaan kiya imtehaan.

Mujhe deejiye kshamta aur mann kee samta
Mera vivek rahe jeevit, hriday na ho peedit
Nirbhay rahoon bin sanshay
Bhakti mein daan keejiye aisee shakti.

Na karoon koi paap, mera haunsala na haraaye koi santaap
Aapse hee mera ghar parivaar, Aap Hain meri atma ka aadhaar
Har dosh se mukt keejiye, santosh se yukt keejiye
Sada Aapke darshan hon antas ke dono nayn ko, aur badhaate rahein chitt ke chayn ko.

Har seher hai Aapki mehar
Aap Hain Har roopi Guruvar
Aapke har ashirwaad ke prasad ke liye dhanyawaad
Aapka hee hai sab diya, shukriya, anantam shukriya.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Anantam Shukriya (03/21/2023)

March 20, 2023

Om Namaha Shivaya
Aaj Ka Suvichaar 🙏🏻🙏🏻 # 1856

             Unkee Mahima Kee Dhun

Guru Apne bhakton ke sankat harey
Phir kyun koi bhakt kisee bhi sankat se darey
Guru hee har shishya ka maargdarshan karey
Guruji ke gunn gaate gaate dil na bharey.

Kahaan se taareef Unkee karoon shuru
Ki kitne dayavaan Hain mere Guru
Kahaan par karoon khatam
Lagg jaayein na jaane kitne janam.

Meri utnee aukat hee nahin
Ki kar paaoon Unka stavan sahi
Phir bhi koshish har pal hai rahi
Ki jo Ve kehelvaayein, mai keh doon vahee.

Roop swaroop Unke itne sundar
Aankhon mein Unkee doob jaaye samundar
Aisee aseem hai Unkee aankhon kee gehraayee
Unkee aankhon ne na jaane kitnee paheliyan hain chhipaayee.

Chehre par Unke varnanaateet noor
Jo kar de bhakt ke jeevan ka andhera duur
Labon par kabhi soch ka sanket toh kabhi masoom muskaan
Saari sangat ke vichaar aur baatein sunte hain Unke kaan.

Kalyaankaari hai Unke kamal charan ka vandan
Sukhdaayee hai Unke dono kamal kar ka chintan
Om ka roop Hain Ve swayam
Unmein hai Poore Brahmaand ka darshan.

Jo bhi vastra Guruji pehenein
Ve Unkee mehek se anugrahit ho jaayein
Unhe zaroorat hee nahin koi gehne
Unkee divyata mein basee hain Unkee visheshtaayein.

Unka prem poori karey har sukh kee zaroorat
Unkee sharan mein mitt jaaye baaki har chaahat
Unke swapn kabhi dein chetaavani toh kabhi raahat
Ve saath chalein bin kiye koi bhautik aahat.

Jo ho samay se bhi parey
Unka poorna gungaan koi kaise karey
Hamaari soch khatm hoti hai jahaan
Unkee soch shuru hoti hai vahaan.

Unke samaan kshamta
Unke jaisi samta
Unkee sehensheelta
Unkee sadhusheelta.

Sangat ke liye Unka pyaar
Unka jaan lena sabhi ke soch vichaar
Unka diya kshamaadaan
Unke darshan mein Shiv darshan mahaan.

Unka dikhaaya raasta sewa aur simran ka
Unka sikhaaya paath satsang aur samarpan ka
Unke maargdarshan se veh divya Gurbani
Unke diye anubhav ruhaani.

Divya hai Unka diya amrit aur prasad
Paawan Unka har ashirwaad
Unka rutba alishaan
Unke hukm ka baan.

Swayam Unka darshan hai Unka har sapna
Har bhakt hai Unka apna
Saugat hai Unkee har bakhshish
Unke kadmon mein jhuke har bhakt ka sees.

Unkee vinamrata kee komalta
Unke ashirwaad kee divyata
Unkee mamta, Unkee nirmalta
Unkee taralta, Unkee saralta
Unkee dee hui aarogyata
Unkee dee hui safalta.

Guruji kee ek nazar de taar
Unka har vachan de zindagi sanvaar
Unkee agya paakar kaam karey aushadhi
Unke aadesh par duur ho har kshati.

Unkee oar se vilamb mein bhi hai shubh praarambh
Unkee karuna se har kaarya ka aarambh
Unkee raza se nikhar paaye har hunar
Unke kehne par sukhdaayee ho jaaye safar.

Ghar parivaar par Unkee mehar
Unkee kripa se har shaam aur sehar
Unka kiya kalyaan
Unka diya jeevan daan.

Namumkin hai mujh nacheez ka ginn paana Guruvar ke sadgun
Param poojya priya Guruji Hain adhyaatamik aishwarya mein sarv nipun
Jahaan bhi Unkee prashansa ho, mai bhi loon sunn
Arzi hai Unse ki sada gaati rahoon Unkee mahima kee dhun.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Unkee Mahima Kee Dhun (03/20/2023)