Author: dhirjabhat

March 19, 2023

Om Namaha Shivaya
Aaj Ka Suvichaar 🙏🏻🙏🏻 # 1855

                   Sabka Maalik Ek

Sabka Maalik ek
Roop hain Jinke anek
Shraddha se maatha tu tek
Maalik sambhaalein tera kaaraj pratyek.

Guruji ke swaroop mein MahaShiv kahein
Ya kahein Shivji ke avatar
Hain Ve bhakton ke taaranhaar
Hain Ve kalyaan ka aadhaar.

Gyan hai Guruji ko hamaare ateet aur bhavishya ka
Unka chintan bhakt ko de bodh uske daayitva ka
Maalik Hain Ve, Hain Ve bakhshanhaar
Uthaate rahe Hain tere karmon ka adhiktar bhaar.

Aagey bhi uthaate rahenge Ve is bojh ko tere liye
Tu kalpana bhi nahin kar sakta ki Ve kitna sehte Hain tere liye
Maafi maang le unn dukhon ke liye jo toone Unhe hain diye
Aur unn sab paapon kee maafi jo toone hain kiye.

Jis bhi roop mein Unhe tu poojega
Unn takk tera poojan pahunchega
Unke sangg har bhakt ka rishta hai anokha
Ve dete Hain har bhakt ko seedhi taar se judne ka mauka.

Is seedhi taar kee khoobsoorati hai veh aatmeeya anubhav
Jo Guruji dete Hain Apne har bhakt ko
Guru bhakt mein ho paata hai nijee vyaktigat vaartaalaap
Adbhut si raahat paatein hain dukh santaap.

Guruji aur bhakt ke rishte kee gehraayee ke liye
Is seedhi taar ka hona hai bahut zaroori
Veh apnapan, veh divya saanidhya
Veh gopneeyataa, veh saameepya
In sabse duur ho jaati hai beech kee duuri.

Is taalmel se milti rahegi santushti
Ki Guruji kee tujh par sada hai kripa drishti
Tu shraddha aur prem bhaav se karta chal dhanyawaad
Ve karte chalenge tujhe teri har shankaa se azad.

Isliye beshak aayein imtehaan anek
Kaheen chun na lena tu avivek
Tu jaagrit rakhna apna vivek
Aur Guruji dwaara hoga tera poorna shuddhikaran abhishek.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sabka Maalik Ek (03/19/2023)

March 18, 2023

Om Namaha Shivaya
Aaj Ka Suvichaar 🙏🏻🙏🏻 # 1854

         Safar Toh Abhi Baaki Hai

Na jaane kitne janmon mein muqammal hoga tera safar
Kyunki antt mein pahunchna hai moksh kee manzil par
Guruji ka haath hai tere sir par
Chalta chal chaahe mushkil bhi lagg raha ho safar.

Safar toh abhi baaki hai
Tere Guruji tere sanatan saathi Hain
Phir veh safar chale jitne bhi janam
Ve tere rath ke sarvashreshth saarathi Hain.

Jin bhi raahon par tere safar ka rath chalega
Waqt ke pahiye bhi chodenge unpar apna nishaan
Kuch nishaan mitti mein ghul jaayenge jabb aayenge safar mein tufaan
Lekin mumkin hai ki kuch nishaan reh jaayenge vahaan.

Tu buss saarathi ke sanchaalan par rakh vishwaas
Kar Unhe samarpan apna har karma aur har shwaas
Ve le jaayenge uss disha mein jo hogi tere liye sahi
Tu Unse liv jode rehna, ansuni na karna Unkee kahi.

Waqt ke pahiye kisee kaaranvash jo gaye ladkhadaa
Toh bhi tera saarathi tere sangg hoga khada
Guruji ka mahaatmay hai sabse bada
Unhee kee kripa se toh tu rath par hai chadha.

Guruji ke sahaare tayy karta chal safar
Har janam ka safar jaayega guzar
Waqt ke pahiye chalte jaayenge Guruji ke hukm par
Andekhi chunautiyon kee bhi Guruji ko hogi khabar.

Shukrana karta chal saath saath
Kehta ja Unse jo bhi hai tere dil mein baat
Is safar mein aayenge sainkdon din raat
Guruji ka sanatan saath banaa rahega sabse sundar saugat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Safar Toh Abhi Baaki Hai (03/18/2023)

March 17, 2023

Om Namaha Shivaya
Aaj Ka Suvichaar 🙏🏻🙏🏻 # 1853

                Kabhi Na Bisaar

Simar simar simar le
Tu Guruji ka naam
Guruji ko maante huey
Guruji kee tu maan.

Unke hukm ka mool pehchaan
Jod kar Unse seedhi taar
Guruji tujhe bakhshenge
Asal gyan ka rahasya aur saar.

Simran mein hai ibadat
Simran mein hai ruhaaniyat
Simran hai tujh par Guruji kee inaayat
Shukrana kar, bhool ja har shikaayat.

Simarte simarte saaf hoga mann ka bartan
Pehle se adhik swasth hoga mastishk, tann, aur mann
Guru sahib kee mehar barasti rahegi har kshan
Praapt hoga tujhe dhyan aur gyan ka dhan.

Guruji ne tujhe raasta hai dikhaaya
Apni leela se Unhonei tujhe uspar chalna hai sikhaaya
Unke chintan se sanvar jaayegi tere antakaran kee kaya
Naam ke kavach kee badaulat na chhoo paayega tujhe nakaratmakta ka saya.

Naam hai uddhaar ka aadhaar
Shraddha se leta chal naam ka sahaara
Chuk jaayenge karmon ke udhaar
Guruji ke sanatan saath ko kabhi na bisaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kabhi Na Bisaar (03/17/2023)

March 16, 2023

Om Namaha Shivaya
Aaj Ka Suvichaar 🙏🏻🙏🏻 # 1852

             Kalyaan Tera Aur Mera

Rayn basera hai ye sansaar
Jaana hai bhavsaagar ke paar
Guruji ne thaami naiya kee patvaar
Toh abb toh nishchit hai uddhaar.

Guruji ka naam simar simar kar
Hota chal har darr se nidarr
Tu pahuncha hai aise dar par
Jahaan har pal hai Guruji kee nadar.

Peeche chodta chal har fikar
Aagey dikhta jaayega shubh avsar
Guruji ke sangg rishte kee kar kadar
Jeevan karta chal basar.

Guruji kee bhakti mein jaan le veh vidhi
Jis se praapt ho tujhe samarpan kee sthiti
Phir kuch na bigad paayegi tera koi paristhiti
Aur tujhe mehsoos hogi shubh har tithi.

Apni oar se rakh sabke prati sadbhavna
Karta chal har anubhav ka tu saamna
Guruji ko paane ke uddeshya par kendrit rakh apni kaamna
Toh Unkee tujhse prasann rehne kee badhti jaayegi sambhaavna.

Sansaar walon ka kya hai, ve toh aksar jaate hain rooth
Aisa nahin ki sachchaayee nahin hai, lekin kayi baar samaksh aata hai kisee ka jhooth
Lekin Guruji ke sangg na koi jhooth, na koi dhokha
Na dil par chot, ye rishta hai sabse anokha.

Ek din is sansaar ka rayn basera
Na rahega tera, na hee mera
Guruji kee shashvat sharan main hai jo sanatan savera
Uske ujaale mein hai kalyaan tera aur mera.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kalyaan Tera Aur Mera (03/16/2023)

March 15, 2023

Om Namaha Shivaya
Aaj Ka Suvichaar 🙏🏻🙏🏻 # 1851

         Ruhaaniyat Kee Roshni

Raaste mein ruhaaniyat kee roshni phailaate huey
Meri zindagi ko nayi ummeed aur utsah se sajaate huey
Guruji ne liya jabb mujhe sharan mein
Sabse shubh din thaa veh is janam mein.

Kyunki Guru bin gati nahin
Guru bin sumati nahin
Guru kee nigraani mein sab hota hai sahi
Guru kabhi shishya ko besahaara chodte nahin.

Jeevan badal sa gaya
Guruji kee sharan mein aane ke baad
Suraksha ke ek adbhut ehsaas se
Vyaapt hua dil ka jazbaat.

Guruji se honei lagaa pyaar
Dil karne lagaa Unka satkaar
Maanav roop mein toh Unhe dekha na thaa
Maan liya Unhe kirpadhaar.

Suna thaa ki sangat karti hai
Guruji ke swaroop se baat
Bilkul der na lagi
Aisa honei lagaa mere bhi saath.

Uss vartalaap ka toh alag hee hota hai andaaz
Jo bhi karta hai Unse yoon baat, veh jaane ye ehsaas
Guruji hee jaanein iske mumkin honei ka raaz
Mai toh buss itna jaanoon ki aise vartalaap se dhanya hota hai shwaas.

Aisa nahin hua ki sadak seedhi gayi ho
Lekin chunautiyon kee baadhaaon mein mai na gayi kho
Kyunki Guruji rahe Hain angg sangg har pal
Itne kasht aane se bhi pehle gaye tal.

Aksar lagta hai ki tez ho gayi hai safar kee raftaar
Lekin safar ko tayy karne kee himmat nirantar dete Hain Guru sarkar
Bakhshte Hain satsang, sewa, paath, simran
Dete Hain dhyan aur gyan ka dhan.

Ve Hain Brahmand ke Badshah
Sangat ke nath, murshid, shehenshah
Unke ashirwaad se ujjwal hai meri raah
Sada Unke charnon mein rehne kee hai chaah.

Nacheez hoon, naadaan hoon
Guruji kee poori mahima se toh anjaan hoon
Jaayaz bhi hai ye, kyunki Unkee mahima toh hai anant
Apne bhakton ke liye Ve Guru ke roop mein Hain Bhagwant.

Shukrana karna na bhooloon ek pal ke liye
Aise Guruji ka jinhonei itne hitkari ashish Hain diye
Guruji kee raza ko sweekaaroon bin kisee shikayat
Guruji ka har hukm maanoon jaan kar usey Guruji kee inaayat.

Har janam mein rahe mere sir par Guruji ka haath
Nahin ho sakti is se achchi koi bhi baat
Unhee ke charnon mein loon mai aakhiri shwaas apna
Kitna achcha ho jo poora ho jaaye mera ye sapna.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ruhaaniyat Kee Roshni (03/15/2023)

March 14, 2023

Om Namaha Shivaya
Aaj Ka Suvichaar 🙏🏻🙏🏻 # 1850

         Na Soch Isey Akelapann

Na soch isey akelapann
Ye toh hai ekant
Aise mein kar le simran
Kar le mann ko shant.

Divyata ke saanidhya mein
Neerastaa jaati jaayegi
Guruji ke baare mein vichaar kar
Ekaagrata aati jaayegi.

Tajurba hoga anokha
Ekant mein hee hai aisa mauka
Vaheen par hoga uchit pratigyan
Uday hoga ruhaani gyan
Vichaaron kee leherein hongi sanyam mein
Anupam divya jyot jalegi mann mein.

Apni khaamiyon se bhi hoga saamna
Unpar vijay paane kee phalibhoot hogi bhavna
Khatm honei lagegi bhautik kaamna
Hoga vyarth vichaaron ka khatma
Adhyaatm praapti kee badhegi ichcha
Guru Govind ka deedar hoga sachcha.

Baahar kee bhaag daud se alagg
Ekant mein anubhav hoga jo jagg
Vahaan hogi aakarshak tanhaayee
Aur divya deedar kee shehnaayee.

Atyant sukhdaayee hai ekant ka prant
Shuddh, shubh aur shant
Guruji kee kripa se mann mein rahe Unka dhyan
Guruji bakhshte rahein bhakti, vairagya, aur gyan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Na Soch Isey Akelapann (03/14/2023)

March 13, 2023

Om Namaha Shivaya
Aaj Ka Suvichaar 🙏🏻🙏🏻 # 1849

      Guruji Dwaara Diya Divya Dhan

Musaafir thaa bahut pareshaan
Usey badla badla sa lagne lagaa thaa jahaan
Moh ne bhi diya usey bahut dukh
Badalna chaahta thaa mann ka rukh.

Na khushi milee bann kar mann mukh
Bann-na chaahta thaa Gurumukh
Lambe samay se raha thaa bhatak
Adhyaatmik unnati bhi rahi thi atak.

Dhoondha usne yahaan vahaan
Ja sakta thaa veh jahaan jahaan
Beet-ta gaya samaa
Veh samajh na paaya ki jaaye toh jaaye kahaan.

Thakk kar veh ruk gaya
Akash kee oar dekha, phir jhuk gaya
Bin moondey nayyn
Dhoondhte huey chayyn
Pehle toh udaas hokar lagaa veh ronei
Phir yakaayak kisee dhvani mein lagaa khonei.

Thodi hee duur thaa ek mandir
Pujari aur bhakt thei shaayad bheetar
‘Om Namaha Shivaya’ ka ho raha thaa japp vahaan
Jiskee dhvani ka prabhaav thaa itna mahaan.

Musaafir ke kadam le chale usey dhvani ke kareeb
Lagaa jaise milee hai utsaah kee koi tarkeeb
Usey lagaa ki uske antarmann mein jaise jal gaya koi chirag
Aur jaise veh koi agyan kee nidra se gaya ho jaag.

Mandir pahunch kar gaya veh bheetar
Baithe thei bhakt jann Shivji kee moorti ke samaksh
Kuch kee aankhein khuli thein aur kuch ne aankhein thein moondi
Kayion ke chehre par bhakti bhaav thaa pratyaksh.

Musaafir bhi baith gaya jod kar haath
Japne lagaa veh bhi unn bhakton ke saath
‘Om Namaha Shivaya’ japte japte usey mehsoos hui antas mein oorja
Mann hee mann Shivji se baat karte huey karta raha veh pooja.

Amrit aur prasad paakar hua veh prasann
Uska toh vahaan se jaane ka nahin kar raha thaa mann
Pujari ji ne sabhi se kaha ki pooja hui sampann
Aur kaha ki sabhi japte rahein is shadaakshar mantra ka dhan.

Pujari ke aadesh ko maan kar
Usey apne liye kalyaankari jaan kar
Veh japne lagaa nirantar ‘Om Namaha Shivaya’
Ye mantra banaa uske uddhaar ka upaay.

Antt hua adhyaatmik nirbalta kee nisha ka
Is mantra dwaara sahaara mila sahi disha ka
Uska vichalit mann hota raha shant
Abb usey pasand aane lagaa ekant
Antakaran ka hota raha pavitrikaran
Safal honei lagaa uska janam.

Guruji ke naam ke japp kee shuruaat
Hoti hai ‘Om Namaha Shivaya’ ke saath
Mantra ke roop mein jaap hai Guruji dwaara diya divya dhan
Isko japne se shant aur sthir hota hai mann.

Guruji Hain Shivji ke avatar
Bashar bannkar aaye karne bhakton ka uddhaar
Shukrana Guruji ka aparampaar
Dete Hain Apni sangat ko itna pyaar
Sanvaarte Hain bhakton ka ghar sansaar
Karaate Hain bhavsaagar se paar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Dwaara Diya Divya Dhan (03/13/2023)

March 12, 2023

Om Namaha Shivaya
Aaj Ka Suvichaar 🙏🏻🙏🏻 # 1848

        Atyant Pavitra Hai Ye Rishta

Atyant pavitra hai ye rishta
Guruji aur shishya ke beech
Guru Apne paawan ashirwaad se
Dete Hain iskee neev ko seench.

Hotey hain badi kismat wale
Jinhe Guru Apne aanchal mein sambhaale
Is rishte ke aakhyaan hotey hain bahut anokhe aur niraale
Bhaagyashaali hai har bhakt jo apne Guru kee mahima gaa le.

Bhakt apne aaraadhya Dev ya Guru se judta hai
Bhakti ke niswaarth naate se
Guru Govind azad karaate Hain
Bhakt ko karmon ke khaate se.

Guruji Shiv avatari Hain
Ve divya leela dhari Hain
Unke ashirwaad jann hitkari hain
Unke vachan kalyaankaari hain.

Kripa karein Guruji har bhakt par
Ki bhakti par na ho bhautikvaad ka anuchit asar
Vikaar grasit swaarth kee dhool
Na karey bhakti bhaav ko pratikool.

Guruji kee sharan mein har bhakt ka uddhaar hai
Guruji ke kamal charan mein jeevan ka sudhaar hai
Is rishte mein har dosh se nivritti miley
Is rishte mein sampoorna sweekriti ka suman khiley.

Yeh rishta hai ruhaani reet
Is rishte mein ho niswaarth preet
Bhakt kee oar se ho poorna samarpan
Toh Guruji hon atyant prasann.

Is rishte kee bakhshish jo paaye
Is rishte ka satkaar jo kar paaye
Apne Guruji kee mahima jo gaaye
Veh is rishte se Guruji ka ashish paaye.

Kyunki anugraha kee Hain khan Guruji
Dete Hain jeevan daan Guruji
Asal gyan karein pradaan Guruji
Praanon mein basey Bhagwaan Guruji.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Atyant Pavitra Hai Ye Rishta (03/12/2023)

March 11, 2023

Om Namaha Shivaya
Aaj Ka Suvichaar 🙏🏻🙏🏻 # 1847

Awashya Lautega Ujiyaara

Ek daur vo bhi thaa
Jabb waqt jaagte jaagte thaa so gaya
Ek daur ye bhi hai
Jabb waqt ne angraayi lee hai.

Jaag raha hai waqt ek baar phir
Isliye tu aalasya aur nishkriyataa se aur na ghir
Toad de gati heenta kee zanjeer
Kewal Guru Govind ke aagey hai tu fakeer.

Na tootne de apna atma vishwaas
Kaayam rakh apna atma sammaan
Aisa mumkin hai bin kiye abhimaan
Agar yaad rahe ki tera jeevan hai naashvaan.

Guruji ko bataa apna dukh aur apni uljhan
Ve pradaan karenge sukoon aur suljhan
Unka diya hua mantra japta chal shaam savere
Adrishya ho jaayenge teri vyatha ke baadal ghanere.

Guruji ka hukm maan
Apna kartavya pehchaan
Na ho pareshaan
Guruji kar rahe Hain tera kalyaan.

Beshak abhi aisa lagg nahin raha tujhe
Lekin dhyan rahe ki teri shraddha ka deep na bujhe
Aur beshak tujhe koi hal na soojhe
Kintu Guru teri har paheli hai buujhe.

Abb khaaskar waqt jo gaya hai jaag
Tu bhi gatiheen avastha ko tyaag
Apni gati ko waqt kee raftaar se kar le ek
Dobaara shuru hongei tere rukey huey kaam anek.

Guruji Hain tere sanchaalak
Ve Hain tere pratipaalak
Unka har bhakt hai Unkee aankhon ka tara
Isliye tere jeevan mein bhi awashya lautega ujiyaara.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Awashya Lautega Ujiyaara (03/11/2023)

March 10, 2023

Om Namaha Shivaya
Aaj Ka Suvichaar 🙏🏻🙏🏻 # 1846

               Mann Kee Dehleez

Aandhi ke saath paani raha thaa baras
Ghar ke bheetar jaane ko raha thaa taras
Beshak paani ka vaig thaa jaise uttejit leher
Kintu dehleez ne usey na aane diya andar.

Surakshit rahe ghar mein rehne wale
Bann gaye ve swayam ko khushkismat kehne wale
Na mitti, na paani, na keechad
Ghuss paaya ghar ke bheetar.

Kaash mann bhi apni dehleez ke bheetar
Na pravesh karne de kuvichaaron kee barsaat ko
Jitna jhaankega mann bheetar kee oar
Utna surakshit rakh paayega apni paawan aukat ko.

Jo mann hua agyani aur kamzor
Toh na chalega uska zor
Aur kuvichaaron ka paani laayega ashuddhi ka keechad apne sangg
Mann par chadhta jaayega unhee vichaaron ka rangg.

Mann kee safaai chalti rahe nirantar
Taaki mal na jamne paaye andar
Swacch rahe manobhaav ka samundar
Manobal ka dwaarpal khada ho dehleez par.

Guruji kee mehar se aisee ho bhakt kee bhakti
Ki Guruji ke simran se mann ko miltee rahe aisee shakti
Jis se mann par aakraman na kar paaye koi anuchit prabhaav
Aur shuddhi aur subuddhi se sajaa rahe mann ka bhaav.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mann Kee Dehleez (03/10/2023)