Om Namaha Shivaya Aaj Ka Suvichaar ππ»ππ» # 1844
Aayenge Jaayenge Tyohaar
Har varsh laata hai apne aanchal mein Tyohaaron kee behti hui reet Yaad dilaane maanav ko Ki veh nibhaaye sabhi se preet.
Insaan hain hum, isliye aksar Hum par aakraman karte hain madd aur matsar Aur bhi anya vikaar banaate hain hamein shikaar Aur inse azad honei kee prerna bhi dete hain tyohaar.
Jhooth par jeet sachchaayee kee Buraayee par vijay achchaayee kee Mausam mein parivartan Shubh hota hua spandan.
Fasal bonei ka aur kaatne ka samay Yaad dilaana paarivaarik kartavya Dosti ka haath badhaane ka Dvesh ka bhaav bhulaane ka.
Niraavishikaran ( detox) aur pavitrikaran Jinke dwaara ho beemaariyon ka haran Sadhna kee taakeed ( reminder ) Ek nayi ummeed.
Kayi tyohaaron ka hai granthon mein itihaas Jaise Hiranyakashyap ka, jisne phailaaya thaa itna traas Prahlad thaa suputr uska, jiska dridh thaa Vishnu ji par vishwaas Isee vishwaas aur bhakti ne bachaaya uska shwaas.
Holika thee Hiranyakashyap kee behen Usey mila thaa vardaan ki na hoga uska dehen Prahlad ko maarne ke liye Holika kee goad mein usey gaya bithaaya Jis vastr ne Holika kee raksha karni thi, veh uss kar Prahlad par aaya.
Prahlad har pal jap raha thaa apne aaraadhya ka naam Unkee leela se hua Prahlad ka kalyaan Holika toh jal gayi Prahlad kee mushkil tal gayi.
Sangat ke liye Guruji ka naam Hai raksha kavach ke samaan Bhakt kee oar se buss bhaav shuddh ho Guruji toh Hain karunanidhaan.
Guruji le chalein andhvishwaas se duur Guruji kahein vehem se na hon hum majboor Shuddh bhakti bhaav se chadhta rahe atma par Guruji ka noor Maafi maang lein Unse jo bhi kiye hon jaane anjaane mein humne kusoor.
Har pal karey jo Guruji ka chintan Usey kabhi na mehsoos ho akelapann Bhakti mein leen rahe uska mann Guru naam ke sahaare veh jee le jeevan.
Jeevan ke har din ko agar Hum jeeyein maano veh ho tyohaar Toh ullaas aur utsaah rahega barkaraar Aur sadbhaav kee rahegi bahaar.
Ishwareeya shaktiyon ne aur poorvajon ne Hamein diya hai tyohaaron ka dhan Taaki hum naveekrit (renew) karein achche insaan bann-ne ka prann Aur sakaaratmakta se jeeyein yeh jeevan.
Kyunki bahut anmol hai yeh manushya janam Guruji kee sharan mein katne hain hamaare karam Anivaarya hai neki se nibhaana insaaniyat ka dharam Agar paana hai dham param.
Aayenge jaayenge tyohaar Na bhoolna inka mahatvapoorna saar Aane wali peediyon ko inke vishay mein bataayein Taaki chalti rahein tyohaaron kee sundar paramparaayein.
Om Namaha Shivaya Aaj Ka Suvichaar ππ»ππ» # 1843
Bhakti Ke Rangg Mein
Rangg jaayein Guruji kee bhakti ke rangg mein Guruji hee Guruji hon angg sangg mein Toh safal ho jaaye holi ka tyohaar Tann mann mastishk ka ho jaaye uddhaar.
Dhyan rahe Guruji ka Sammaan rahe Guruji ka Rangg na ho kachcha Bhakti ka bhaav ho sachcha.
Bhakti ka rangg ho jitna gehra Utna milega Guru Govind ka pehra Aagey ka safar hota chalega sunehra Guruji ke noor se khila rahega chehra.
Aaj holi ke tyohaar par Apne bheetar daalein nazar Chalaayein swayam par bhakti ke rangg kee pichkaari Taaki holi ka parv ho jaaye hitkaari.
Sabhi ko mubarak holi ke utsav kee Sakaaratmakta se sajey zindagi sab kee Koi bhi praani sukh santosh ke liye kabhi na tarse Guruji ka aisa anupam ashirwaad sabhi par sada barse.
Om Namaha Shivaya Aaj Ka Suvichaar ππ»ππ» # 1842
Sashakt Baney Ye Baanvra Mann
Zarooratein seemit hain lekin Khwaahishon kee kamee nahin Mann hai aisa baanvra Ki usey lagey ye hai sahi.
Lekin jaagrookta sikhaaye Ki khwaahishein nahin deti hain tripti Balki phanste jaate hain unke daldal mein Koi madad nahin miltee kisee mushkil ke hal mein.
Guruji ne diya hai naam ka daan Unkee mehar se ho paaye simran aur dhyan Unhe ardaas karein ki hum mein jaagrit ho adhyaatma ka gyan Aur hum khwaahishon kee nirarthakta ko lein pehchaan.
Mumkin hai ki zidd karne par Guruji poori kar dein khwaahish har Lekin unkee poorti se jude hongei jo parinaam Unka saamna karna hoga hamaara kaam.
Aur khwaahishein toh khatm na hongi kabhi Mann jab takk banaa rahega swami Santushti bhi aayegi tabhi Jabb mann ko das banaa lenge hum praani.
Manobal badhaana zaroori bhi hai Manobal badhaana majboori bhi hai Taaki mann ho paaye apne niyantran mein Aur badhauti ho santushti aur sanyam ke dhan mein.
Guruji chaahein hamein taarna Hamaare mann ko sudhaarna Hamaare jeevan ko sanvaarna Hamaari soch ko nikhaarna.
Simran, dhyan, aur sadhna Jabb ho inkee kaamna Guruji se ardaas ho ki aisee khwaahish poorna ho Taaki uddhaar sampoorna ho.
Hotey hotey hota hai simran Maalik kee bakhshish se Guru dwaara hee milan hai mumkin Bande ka apne Ish se.
Yahee khwaahish hai shubh Yahee khwaahish hai saarthak Is khwaahish mein kalyaan hai Ismein nahin hai koi shak.
Khokhli hai shaayad baaki har khwaahish Isliye Guruji se karein guzaarish Ki Ve karte rahein aisa maargdarshan Ki sashakt baney ye baanvra mann.
Om Namaha Shivaya Aaj Ka Suvichaar ππ»ππ» # 1841
Adhyaatmik Sukh Ka Hak
Abb bhi waqt hai bande, jaag Maya ke jaal mein phanse se duur bhaag Maya ne toh jaal phailaaya hee hai Aur phansaane hetu toh paryaapt maya ka saya hee hai.
Na hota chal maya se behaal Tujhe milee hai Guruji ke naam kee dhaal Tu toh hai Guruji ka laal Unhee se baanta kar tu apne dil ka haal.
Maya kee chamak jitnee prabal hoti hai Utna hee andhkaar laane kee hoti hai usmein kshamta Aur maya ke jaal mein phanste phanste Uss se nikal paane mein badhti jaati hai kathinta.
Maya toh rahegi har oar Lekin bandhi hai teri Guruji sangg doar Sansaar mein jeete huey apni disha le tu moad Toh baahar kee raat mein bhi tere bheetar hogi bhor.
Guruji ke simran aur dhyan mein hai adbhut shakti Jo deti hai jaagriti aur sumati Pavitrikaran dwaara sanvarti hai antarmann kee aakriti Aur gehri hoti hai bheetar jhaanke kee pravritti.
Is se sookshma gyan kee hoti hai vriddhi Badhti hai subuddhi aur chitt kee shuddhi Isliye karta chal Guruji se ardaas Ki lagti rahe tujhe simran kee pyaas.
Aisa prayaas dega tujhe adhyaatmik sukh Maya mein nimagn honei ke bajaaye asal gyan kee oar hoga tera rukh Tujh par kumm hota jaayega maya ka asar Aantrik safar mein hoga tera yeh jeevan basar.
Ho sakta hai ye mumkin Guruji kee mehar se Lekin jaise mahasaagar nahin hota ek hee leher se Vaise hee ek din kee nahin hai ye prakriya Lekin tu jalaa kar toh dekh hriday mein nek neeyat ka deeya Jisey bhi hui aise sukh kee praapti Usne Guruji ko samarpan hai kiya Tu bhi paa le adhyaatmik sukh Guruji ne ye hak tujhe bhi hai diya.
Om Namaha Shivaya Aaj Ka Suvichaar ππ»ππ» # 1840
Amrit Kee Dhaara
Guruji kee chuppi mein bhi shakti hai aisee aparampaar Ki saare sansaar ke shor ko bhi kar le veh paar Jo Mahadev Hain sampoorna srishti ka aadhaar Guruji Hain Unhee Mahadev ke avatar.
Har pal angg sangg Hain khade Phir bhi Hain Ve samay se parey Tu kyun apne bhaagya se ladey Guruji Hain sabse bade.
Teri har mushkil se bade Teri har khwaahish se bade Tere har khwaab se bade Kaayinaat ke har khitaab se bade.
Buss, paakar Unhee ka sahaara Teri raahein roshan karega har taara Guruji ka shukrana kar ki Unhonei tujhe hai sweekaara Unka ashirwaad hai nirantar behti amrit kee dhaara.
Om Namaha Shivaya Aaj Ka Suvichaar ππ»ππ» # 1839
Guruji Ka Kripa Prasad
Poore sansaar ka bhraman na de paaye vaisa sukh Jo milta hai Guruji kee sharan mein Bahut kismat wale hain hum sabb Jinhe jageh milee hai Guruji ke kamal charan mein.
Kitna kuch ho raha hai aaspaas Ek oar suvidhaaein, toh dooji oar tareh tareh ke traas Kalyuga ke spandan mein le rahein hain hum shwaas Sabhi ko ho raha hai ajab ehsaas.
Guruji kee mehar se hamein mil raha hai simran aur satsang ka ashirwaad Aarogyata bakhshne ke liye Guruji de rahe Hain chai prasad aur langar prasad Bhakti ka utsaah kar raha hai antakaran ko aabaad Guruji ke prem mein magn hai dil ka jazbaat.
Niyati mein likhi hai kshati agar Guruji hee kar sakte Hain kumm uska asar Jis bhi tareh se Ve karna chaahein hamein agrasar Unse vintee hai ki ho Unka hukm hamaare sir aankhon par.
Guruji Shiv avatari Hain Ve kripalu leela dhari Hain Kuch bhi nahin hai Shivji ke hukm se bada Har devta bhi Unke hukm ke aagey sir jhuka kar ho khada Isliye jisne Guruji ka hukm maana, veh adhyaatmik seedhi hai chadhaa Veh Guru bhakti se himmat paakar har haanikaarak taakat aur kamzori se hai ladaa.
Jaise jaise aa raha hai aagey ka samaa Aur bhi zaroori hota jaa raha hai karna sadhna Guruji se judi rahe jo mann kee taar Toh aise kathin waqt mein bhi awashya mumkin hai uddhaar.
Karte huey Guruji ka dhanyawaad Santushti se lein Unka ashirwaad Har paash se Unka ashirwaad karaayega hamein azad Dhanya hain hum paakar Guruji ka kripa prasad.
Om Namaha Shivaya Aaj Ka Suvichaar ππ»ππ» # 1838
Is Satya Se Koi Na Rahega Anjaan
Muskaan Jinkee mandd mandd hai Bhola bhaav Jinhe pasand hai Jinkee chhavi mein nirmal anand hai Jinkee leela aparampaar aur akhand hai.
Kisee mein kaabiliyat nahin Ki jhank sakey Unke naynon kee gehraayee mein Har bhakt kee har uljhan kee suljhan hai Unkee guruyaayee kee vaddi vadiyaayee mein.
Ve Hain parampoojya Guruji pyaare Jinke noor ke sanmukh sharmaate hain chaand aur taare Sooraj Jinhe karta hai naman Vayu karti hai Jinka vandan.
Akash Unke abhinandan mein jhuk jaata hai Paani Unke pavitra spandan se amrit bann jaata hai Prithvi Unke paawan paaon ke sparsh se anugraha Unka paati hai Agni Unke aagaman se maano yagya ke shrey se kritaarth ho jaati hai.
Guruji par vishwaas ka ehsaas Banaa deta hai jeevan ko khaas Chunautiyan aur aandhiyan aati hain magar Guruji unn sabke beech se bhi banaa dete Hain chalne kee dagar.
Bhakt ka socha aur kaha Kabhi ansuna nahin karte Hain Guruji Lekha dobaara likhte likhte toh Bhakt ke bhaagya ko badalte Hain Guruji.
Bin maange karte Hain bhakton ka paropkaar Unkee rehmatein deti hain har bhakt ko taar Unkee mehar se Unse seedhi jud jaaye jiske antakaran kee taar Sahi samay aane par nishchit hee hoga uss jann ka uddhaar.
Guruji ko hee hai sahi samay ka gyan Hum bhakt jann hain kewal insaan Guruji karte Hain sabka kalyaan Is satya se koi na rahega anjaan.
Om Namaha Shivaya Aaj Ka Suvichaar ππ»ππ» # 1837
Raah Kee Shubh Manzil
Chal raha thaa raahi darte huey Mann hee mann Guruji ko yaad karte huey Chitt ekaagra karna ho raha thaa mushkil Aur uske bina vyakul ho raha thaa dil.
Kisee aur se na karna chaahta thaa apni vyatha kee veh numaaish Guruji se karne lagaa veh yoon guzaarish, βSambhaal leejiyega is tufaan mein Subuddhi ka prakash dikhaayiyega agyan mein Chetna pirohte rahiyega mere praan mein Sthirta deejiyega simran aur dhyan mein.β
Sochta hua GurujΔ« ke baare mein Veh chalta raha raat ke andhiyaare mein Vilamb na thaa Guruji ke sahaare mein Uska mann sambhalne lagaa simran ke ujiyaare mein.
Na rasna hilee, na aayi mukh se koi awaaz Guruji kee kripa se uske mann mein hota raha simran Is prakaar se karte huey Guruji ka chintan Baahari tufaan ke baavajood shant aur nidar honei lagaa uska mann.
Veh jaanta thaa ki manzil thi abhi duur Lekin abb na mehsoos kar raha thaa swayam ko majboor Balki simran se chhaa raha thaa uske chehre par noor Vyakul na thaa kyunki uspar nazar rakh rahe thei Guruji, uske huzoor.
Chal raha thaa tabb bhi baahari tufaan Lekin mann gunguna raha thaa sukoon kee dastaan Raahi na thaa pehle jaisa pareshaan Guruji mein thaa uska dhyan.
Jeevan kee raah par chalte huey Raahi hain hum sabb Raah par chalna saral ho jaata hai Jabb hamein yaad rehte hain Rabb.
Guruji mein basey Hain Rabb Jo jaante Hain sabb Anubhav zaroor hota hai tabb Hum Unhe yaad karte hain jabb.
Sabka anubhav ek sa hota nahin Aur kayiyon kee kahaani rehti hai ankahi Lekin bhakt Guruji ko yaad karey toh sahi Buss, Guruji ehsaas karaate Hain ki Ve Hain vaheen.
Unse maang kar simran kee daat Chalte rahein hum raahi apni raah par Unkee mehar se simran dwaara mann ke tufaan par hoga aisa asar Ki hum ruhaani safar par hongei agrasar.
Shukrana Guruji ka ki Ve Hain rahanuma hamaare Unka har bhakt raah par chalta hai Unke sahaare Har raahi ko Guruji dikhaayein raah par anokhe anubhav ke nazaare Guruji kee divyata har bhakt kee raah ko anant ashirwaad se sanvaare.
Guruji har bhakt ka khayaal rakhein, bahut bada hai Unka dil Unkee mahima se raah ke murajhaaye phool phir se jaate hain khil Raah ke har baahari aur bheetar ke tufaan se raahat jaati hai mil Guruji kee kripa se Unke har bhakt ko mil jaati hai raah kee shubh manzil.
Guruji ko shraddha roopi kaliyan aur suman karoon arpan Unhe paane kee aas mein bahein jo aansoon, unn se karoon Unka tarpan Unka chintan karte karte hee dekhoon darpan Unkee chaah mein vyateet karti rahoon jeevan.
Ye saubhagya nahin toh aur kya hai Balki, ye saubhagya hai param aur anupam Ki Guruji kee soch aur Unke manan mein beet jaaye har kshan Aur Unhee ke khayaalon mein magn rahe yeh mann.
Guruji Hain mere Guru, Prabhu, meet, aur nath Unse vintee hai joad kar dono haath Ki Ve sada baney rahein mere humraaz Aur sada sunte rahein meri ankahi awaaz.
Kyunki Unhee ka saath hai sachcha Unka saath hai sabse achchaa Ve nath, mai Unka bachcha Har pal badhti hai Unhe paane kee ichcha.
Aaj Ka Suvichaar 