Ve Parampita Paramatama Dee hai Jinhonei hamein yeh atma Kitna vishwaas kiya hoga Unhonei hum par Ki hamaare tann mein sajaayi atma, jo hai divya dharohar.
Hum sabki atma Unhee ka toh hai ansh Shareer mein aayi hai chalaane praaniyon ka vansh Paramatama ne hee dee hai , Paramatama mein hee ye samaayegi Jabb takk Unmein samaane ke yogya na hogi, tabb takk na jaane kis kis shareer mein aayegi.
Guruji chaahein ki hum dharohar ka sammaan karein Tabhi toh Ve kahein ki hum banda banein Kitne janmon ke pashchaat darja mila hai maanav ka Aisa kuch na kar baithein ki dekhna pade janam daanav ka.
Guruji ko jo maana hai Toh Guruji kee bhi toh maanein Vehem, vikaar, paap karna chodein Atma ko jakde huey hain jo bandhan, unhe todein.
Na jaane kitne janmon se atma bichdi hui hai Paramatama se Kyun na isey taraashein paakar ashirwaad Dharamatama se Mila hai Guru kripa se yeh divya mauka Agar abb takk atma ka poshan hai roka Toh abhi se shuru karein Karna sammaan is avsar ka Guruji kee baat maan kar Aadar karein is divya dharohar ka.
Jitna nekneeyat hoga hamaara prayatn Utnee ujjwal hogi kaamyaabi kee kiran Aur atyant sunehra hoga veh kshan Jabb is atma ka Paramatama se hoga punarmilan.
Saat July 1656 kee tithi thi atyant shubh Ek punyaatma ne janam liya mitaane sangat ke dukh Mata Krishen Kaur aur Guru Har Rai ji ke ghar Aaya veh khushi ka avsar Ki sikhon ke jo honei wale thei aathvein Guru Unhonei kiya jeevan ka safar shuru.
Panch varsh kee baal avastha mein Unke pita ne saump di Unhe guruyaayee Guru Har Krishan Sahib kehlaaye Ve In Baal Guru kee hui vaddi vadiyaayee.
Chechak ke bhayankar roag se In nanhe se baalak ne kitnon ko kiya theek Guru Nanak Dev ji jaisa noor thaa Unka Thei Ve janam se hee divyata ke prateek.
Raja Rai Singh ka bangla thaa jahaan Guru Har Krishan ji sewa ke liye pahunche vahaan Jahaan rahe thei Guru Har Krishan Dev uss samay Uske sameep hee thaa veh jalaashay Jahaan abb hai Gurudwara Bangla Sahib ka sarovar Vahaan par nibhaaya Unhonei chechak-grast mareezon kee sewa karne ka avsar.
Sewa mein jaat-paat aur oonch-neech ko kar diya Guru ne dar kinaar Isee niswaarth sewa ke dauran Ve huey bahut beemar.
Itnee pyaar bhari thi Unkee sewa Ki musalmaan bhi pyaar se bulaane lagey Unhe ‘Baala Peer’ Guru Sahib ne Apni maa ko Apne paas bulavaya Jabb Unkee sthiti hui zyaada gambheer.
Bhagwad Gita ka thaa Unhe sampoorna gyan Apne spandan aur ashish se Ve yeh gyan kar dete thei doojon ko bhi pradaan Teen varsh kee thi avadhi Unke shaasan kee Baba Bakaalaa ko saumpi Unhonei zimmedari Guru ke aasan kee.
Guru Har Krishan Dev ne anginat Sangat ka kiya kalyaan Bhagwaan ke roop mein thei Guru, aur Guru ke roop mein Bhagwaan Adhyaatmik paripakvataa kee moorat Sumat aur karuna kee soorat Lokpriya aur dayalu thei, saari sangat ke dil mein Unke liye aaj takk hai pyaar Unkee baudhik kshamtaa ka aaj bhi hota hai aadar satkaar.
Guru Har Krishan ke jeevan kee hai kitnee mahaan kahaani Waqt ke saath saath saari duniya ne Guruon kee mahima hai jaani Guruji kee sharan mein rehte hum bhi sunein Gurbani Gurbani se aur Guruon kee qurbaani se sudhar gayi sangat kee zindagani.
Shukrana Guru Sahib aur Unkee guruyaayee ka Shukrana Unkee vaddi vadiyaayee ka Sabhi ko Guru Har Krishan Ji ke Prakash Purab kee ho mubarak Pranaam har Guru ko, kyunki Guru hee toh Hain sangat ke pushtikaarak.
Na jaane kiskee talaash mein thaa veh jann Chalte chalte duur takk pahuncha vahaan jahaan thaa ek vann Pedon par phal dekhkar prassann hua uska mann Kuch na khane ko mila thaa teen dinon se, thaa veh bahut nirdhan.
Lekin veh prassannata thi kuch hee lamhon kee Kyunki sehsa uskee nazar apne paaon ke paas padi Nikat hee thaa ek saamp Veh jann yeh dekhkar gaya kaamp.
Shukr hai ki usey yaad aaya tabb ‘Om Namaha Shivaya’ ka japp Japne lagaa veh aankhein moond ke Girne lagin chheentein uske paseene kee har boond kee.
Saamp ne dooja raasta apnaaya Jann ne Prabhu Shiv ka shukr manaaya Phir dekha ki vann mein lagg gayi hai aag Usey lagaa ki jaana chahiye vahaan se bhaag.
‘Om Namaha Shivaya’ kehte kehte Vaataavaran ke santaap ko sehte sehte Dikha usey ek alagg sa panth Uss panth par dikhey usey ek santt.
Mantra ke jaap se aaya usmein aisa utsaah Ki apnaane ke liye chalaa veh uss nayee raah Maano uske pankh aaye thei nikal Itnee sheeghrataa se beete ve pal.
Agni chhoot gayi peechhe Santt kee oar bhaagte huey veh gira neeche Gira toh paas mein ek kaanton bhara jaal aaya nazar Usmein phansne se veh bach gaya, usne maana is saubhagya ko bhi Ishwar kee mehar.
Santt ke paas pahunchne hee wala thaa ki veh gaya fisal Ghutnon par chhote ghaav huey, utne mein veh kasht bhi gaya tal ‘Baba, baba!’ pukaarte huey pahuncha veh santt ke paas Santt ke ruhaani spandan se usey mehsoos hua adbhut ullaas.
Santt ka roop thaa viraat aur bahut sundar thaa Unka chehra Unka noor hee bataa raha thaa ki Unka sabb par hai pehra Santt ke maathe par thaa sainkdon sooryon ka prakash Aise lagg raha thaa ki Unhe naman kar raha ho akash Jann mugdh hokar ruk gaya Aur santt ke charnon mein jhuk gaya.
‘Kalyaan kitta,’ santt ne kaha jann se Jann ne Shukrana kiya mann se Santt jann ke mann kee baat gaye jaan Aur jann ne jaana ki ye santt Hain mahaan.
Santt ne jann ke dekhte dekhte Utpann kiya sachkhand se prasad Jann ko mila jabb Unse veh prasad Toh jann ne jaana ki kitna divya thaa uska swad.
Ek anokhi sheetalta, ek adbhut sa spandan Thei uss paawan prasad mein Usey chakhte hee veh jann Kho gaya unke swad mein.
Jo bhi hua thaa jann ke saath vann mein Santt ne jann ko bataaya Aur Ve hee usey bachaa rahe thei vahaan Unhonei jann ko ye bhi samjhaaya.
Jann ne poochhaa santt se Unka naam Tabb jaana ki Ve Dugri wale Guruji Hain Bhaav vibhor ho gaya veh is satya ko jaan Jinke baare mein sirf suna thaa usne, Unhonei bachaayee uskee jaan.
Guruji ne uspar daali Apni nazar Yeh jaan kar duur hua jann ka har darr Dekhte dekhte Guruji huey antardhaan Jann mann hee mann mein karne lagaa Unka gungaan.
Guruji ne diya jann ko sakshat darshan Aasaan kiye uske mushkil bhare kshan Prafullit hua jann ka mann Mil gayi usey Guruji kee sharan.
Guruji ne Apne har bhakt par Kiya hai itna ehsaan Pyaar se sajaaya hai har bhakt ko Maankar Apni santaan.
Simran kee dee hai mala Bada pyaara hai Guru rakhwaala Har manke par hai Guruji ka naam Simran mein chitt ko le jaate Hain Ve Apne dham.
Rangaa hai Unhonei Satsang ke rangg se Apne anokhe adbhut dhangg se Sewa ka diya hai daan Guru Sahib Hain itne meharbaan.
Kangan miley hain Unse shraddha aur dheeraj ke Jhumke miley hain nirlepta ke neeraj ke Karn ko shravan ke liye praapt hua hai Gurbani ka dhan Mann ko miley hain manan aur chintan ke kshan.
Aankhein khuli hon ya hon bandd Unn mein Guruji ke saumya roop ka khazaana hai Naasika mein bhi kabhi tez kabhi mandd Unkee ruhaani khushboo ka aana jaana hai.
Guruji ne mukh par sajaayi hai Apni dee hui muskaan Labhon aur rasna ko alankrit karta hai Unka gungaan Mann mein saji hai Unkee pooja Tann mein Unkee dee hui ruhaani oorja.
Samarpan piroya hai dil mein aur darpan mein Shukrana mukh par vibhooshit karte Hain har kshan mein Guruji Hain kitne dayaavaan Diya hai bhakton ko sundar shringar ka daan.
Aksar aate hain aise pal jeevan mein Jabb ghutan hoti hai mann hee mann mein Lagta hai ki itne kasht kyun aa rahe hain Jab ki pehle bhi itne sahe hain.
Guruji ka Apna tareeka hai karmon ko kaatne ka Guruji ka anokha dhangg hai sukh baantne ka Komalta se faisla karte hain bhakton ke karmon ke anjaam ka Har pal sahaara dete Hain bhakton ko Apne naam ka.
Jitne kasht aa rahe hon jeevan mein Nirdhaarit tha uss se kayi zyada kashton ka aana Ye toh Guruji kee karuna ka nateeja hai Ki thode mein hee Unhonei hai karmon ko bhugatvaana.
Bhakton ke adhiktar karma swayam par lekar Guruji karmon ke khaate ko banaate Hain behtar Dete Hain bhakton ko har janam mein sudharne ka bhi avsar Uss dauran banaaye rakhte Hain Apni nazar aur nadar.
Guruji jaise jaise sanvaarte jaate Hain bhakton ka aaj aur kal Itne kasht toh chhoone se pehle hee jaate hain tal Hamein hota hee nahin hai maalum yeh sabb Itna dhyan rakhte Hain hamaare Guruji mein basey Rabb.
Guruji ke kahe anusaar karte rahein hum simran Toh dheere dheere kumm hokar khatm ho jaayegi ghutan Jaan jaayega aur maan jaayega yeh mann Ki pehle se toh kitna adhik sudhar gaya hai jeevan.
Aksar beshak aate rahenge kasht bhare pal jeevan mein Lekin beet jaayenge bin shikaayat kiye Jin palon mein mann ghutan se hota thaa pareshaan Ve pal bhi sajj jaayenge ibadat ke liye.
Jabb mann mein Guruji ke prati Shukrana ho jaayega aabaad Toh aur bhi barasne lagega Guruji ka ashirwaad Jo kasht aayenge bhi, toh mann mein na chalega duvidha bharaa vaad-vivaad Kyunki mann ko prerit karega Guruji ke prati samarpan aur dhanyawaad.
Guruji hai Aapka naam Aap Hain anant rehematon kee khan Bakhshte Hain aarogyataa, dete Hain jeevan daan Mada samay aayega, nahin rakha Aapne is satya se bhakton ko anjaan.
Beshak aaj ke daur mein vigyaan ka hua hai vikas Lekin bhautik padaarthon kee itnee badh gayi hai pyaas Ki santusht hona kitnon ko toh aata hee nahin raas Vikaaron se atmabal kamzor hua hai aur kitne toh bann gaye hain mann ke das.
Kalyuga ka hua hai aisa parinaam Ki kaheen kaheen toh bandagi bhi ho rahi hai badnaam Kripa kar keejiye koi aisa intazaam Ki har dil hee bann jaaye dham.
Dham, itna shant aur sundar Jis mein ho Gurbani ka samundar Simran chalta rahe yoon is dham ke andar Ki bhakt dekh paaye Aapko swayam aur doojon ke bheetar.
Dham, itna prem bhara aur pavitra Ki swarnamayi ho jaaye sabka charitra Ki vahaan buss jaaye Aapka roop aur chitr Bannkar murshid, nath, aur mitr.
Dham, itna dayalu aur divya Ki sabhi nibhaayein apna kartavya Apna har kaarya Aapko arpit kar ke Apne har kaam mein bhaav bhar ke.
Bhaav vaisa, jaisa Aapko hai pasand Bhaav vaisa, jis se atma ko aaye nirmal anand Kyunki vahee jaayegi uss paar Jabb shareer reh jaayega is paar.
Sumat bakhshiye aisee ki uchit rahe hamaara aacharan Hamaari laparwahi se na haani sahe paryavaran Sakaratmakta phailaakar hum khushnuma banaayein vatavaran Doosaron ke kaam aayein taaki safal ho hamaara janam.
Dhoop chhaaon kee is zindagi mein Jitna rahenge hum bandagi mein Utna aasaan hoga lena dhoop aur chhaaon dono ka anand Kyunki kabhi dhoop aur chhaaon hotey hain tez toh kabhi mandd.
Jaisi dhoop lagti hai meethi Sharad ritu ke din Vaisee dhoop kashtadayi hai lagti Greeshma ritu mein chhaaon ke bin.
Veh chhaaon jo garm mausam mein deti hai sukh Sardiyon mein usee chhaaon se hum moad lete hain mukh Aur veh dhoop jo garmiyon mein hai sataati Vahee sardiyon mein kitnee hai bhaati.
Kitnee fasal hoti hai har khet mein har gaaon mein Kuch falti hai dhoop mein toh kuch chhaaon mein Aisa hee hai hum praaniyon ke jeevan ka roop Kabhi sukh, kabhi dukh, kabhi chhaaon, kabhi dhoop.
Shukrana Guruji ka Jinhonei hamein hai sweekaara Jinhonei kitnon ka lekha likha hai dobaara Ve dete Hain kasht sehene kee shakti Ve bataate Hain khush rehne kee yukti.
Na dhoop sadaa rehni hai na hee chhaaon hai sthaayi Ye qubool karte hain sooraj kee sunvaayee Dhoop chhaaon ke khel khel ke beech rukti nahin hai srishti Sukh dukh ke khel khel ke beech sada rehti hai bhakton par Guruji kee drishti.
Dhoop ka bhi apna maqsad hai Chhaaon ka bhi hai anokha yogdaan Sukh dukh bhi hain hamaare karmon ke prabhaav ke parinaam Inkee oar hamaari pratikriya aur kriya se nirdhaarit hota hai aagey ka anjaam.
Isliye rakh kar Guruji par poorna vishwaas Jeevan kee dhoop chhaaon mein banaaye rakhein apna santulan Guruji ke maargdarshan ka shukrana kar Jeete chalein nishtha se apna jeevan.
Bann jaayein Guruji kee kripa se Guruji ka hum roop Phir Shivmayi hongei hum sabb Chaahe jeevan mein chhaaon ho ya ho dhoop.
Guruji ke pyaar mein Guruji ke dulaar mein Nadiya kee bhanti mai behti rahoon Apne bhaagya ko shubh kehti rahoon.
Aisa kuch mujh mein hai nahin Ki Guruji ke charnon kee dhool kee aukat bhi rakh sakoon Phir bhi Maalik ne apnaaya hai Mai toh Shukrana kehte na thakoon.
Itne ayb jo mujh mein hain Guruji ne unn sabke bavjood Mujhe liya hai apni divya sharan mein Taaki ho jaaye shunya mera vajood.
Chaahe mai baithi hoon Ya rahi hoon chal Chaahe subah ho Ya sooraj raha ho dhal Chaahe mai mushkil mein hoon Ya har kasht raha ho tal Chaahe veh aaj ho Ya phir ho aane wala kal Guruji ke hee simran mein Beet jaaye mere jeevan ka har pal.
Jo bhi apne jeevan mein mai karti jaaoon Uss se Guruji ko khush kar paaoon Parampoojya pyaare Guruji ko rijhaaoon Har saans se Unkee mahima gungunaaoon.
Har saans Unhee ko samarpan Unkee chhavi se noorani ho mera mann Guruji se guzaarish hai ki jeevan mein Mil jaaye apne vajood se shunya honei ka dhan.
Kyunki tabhi toh antakaran mein hoga Guruji aur buss Guruji ka vaas Guruji ke charnon mein baithi hoon Lekar mann mein mai yeh aas.
Rabb mein hee sabb hai Aisa kal thaa aur aisa aaj aur abb hai Jiske liye Guruji mein Rabb hai Uske liye Guruji mein sab hai.
Rabb hee Hain Paramatama Aur har atma hai Paramatama ka ansh Isliye har atma divya hai Chaahe usey dhaaran kiye shareer ka ho jo bhi vansh.
Kitna spasht hai is satya se ye samajhna Ki vyarth hai ameeri gareebi kee maya mein ulajhna Bhautikvaad aur duniyavi starr juda hai is nashvar shareer se Lekin charitra ka starr juda hai adhyaatmik taqdeer se.
Atma hai har jann kee mitra Zaroori hai nikhaarna chitt ka chitr Jaise jaise chitt hota jaayega pavitra Jaise jaise swarnamayi hota jaayega charitra Vaise vaise toadte huey agyanta kee zanjeer Sanvarti jaayegi adhyaatmik taqdeer.
Ye mumkin nahin hai kewal ek hee pal mein Ye nahin honei wala kewal aaj aur kal mein Iske liye mann ko shant aur sthir rehna hona hoga halchal mein Taaki veh kaam aa sakey har uljhan ke hal mein.
Tabhi toh Guruji ne diya hai is jeevan ko darja safar ka Taaki hamaare is safar mein pramaan ho Unke vachanon ke asar ka Anivaarya hai sabhi ka yogdaan Varna kalyugi spandan karta rahega sabko pareshaan.
Gungaan karein Guruji kee vadiyaayee ka Anusaran karein Guruji kee guruyaayee ka Prayaas karein adhyatmik oonchaayee ka Mita dein is ukti ko, ki ‘zamaana nahin hai bhalaayee ka.’
Shraavan maas hai aaya Akash hai muskuraaya Baadal hain jal se garbhit Prassann hai prakriti ka chitt.
Shivmayi hai ye saara sansaar Aur Shivji Hain sabke paalanhaar Guruji Hain Shivji ke avatar Karte Hain bhakton ka kalyaan baarambaar Brahmand vyaapt hai Unka shareer Aur Unke vash mein hai Brahmand kee taqdeer.
Tabhi toh Shraavan maas mein Shraavan se hee hota hai Unka jal abhishek Devi devta toh Hain anek Lekin Devon ke Dev toh Hain Shivji ek.
Shraavan ke maheene mein baraste hain jabb baadal Hota hai abhishek Shiv Ashutosh ka Jaise veh neer dhota hai prithvi ko Aur deta hai dharti ka roop nikhaar Vaise hee kyun na hum bhi Guru naam ke amrit se Paapon ko dhoyein aur laayein swayam mein sudhaar?
Shraavan mein toh khaaskar Paramatama mein ramm jaati hai prakriti Hum bhi kyun na is pavitra maas mein Sanvaarein apni atma kee aakriti?
Jaise jaise soch aur karma mein vikaar aur paap jaate hain samaa Vaise vaise duuri badhti hai atma aur Paramatama ke darmiyan Koshish karein ki hamaare sanskaar ho jaayein paawan Shuddhi ka vaada karein swayam se is Shraavan.
Guruji, Shraavan ka ashish dete huey deejiye aisee subuddhi Ki Aapki mehar se ho hamaari atma kee shuddhi Kuch bhi nahin hai Aap Paramatama ko rijhaane se zyada zaroori Aapki kripa se mitaa paayein hum atma aur Paramatama ke darmiyan kee duuri.
Aaj Ka Suvichaar 