Author: dhirjabhat

June 23, 2022

Om Namaha Shivaya
Aaj Ka Suvichaar 🙏🏻🙏🏻 # 1586

 Kal Aaye Ya Na Aaye

Kya maalum kal aaye ya na aaye
Hamaari is zindagi mein
Isliye kyun na har saans se simar lein
Guru Govind ka naam hum bandagi mein.

Koshish karein ki kumm se kumm pal hon aise
Jabb sir jhukaana pade sharmindagi mein
Guruji ne banaaya hai hamaare liye ye aasaan
Kyunki Ve dariyadil Hain bakhshindagi mein.

Kya maalum kal aaye ya na aaye
Miley ya na miley priya janon se kehne ka avsar
Ki ve hamein pyaare hain
Isliye keh dein mauka miley jis pal.

Sudhaar lein apne vichaar aur apna vyavhaar
Beete kal kee maayusi se na mehsoos karein laachaar
Aane wale kal ke liye na himmat dein haar
Lekin yaad rakhna na bhoolein baar baar
Ki is janam maran ke khel mein
Koi insaan na bach paaye
Karmon kee is heir-pher mein
Kal aaye ya na aaye.

Veh daan jo mann mein hai ki karenge agley saal
Usey gupt rakh kar kar dein bin kisee sawaal
Veh khaami apni, jis se waakif hain hum
Uspar kaam karna aaj, balki abhi kar dein aarambh
Jaane anjaane mein kee hain jo gustaakhiyan
Maang lein Guruji se is pal hee kshamaa
Baad mein na ye dil pachhtaaye
Kya maalum kal aaye ya na aaye.

Kya maalum hamaare jeevan mein
Kal aaye ya na aaye
Agar ye soch kar mann ghabraaye
Toh mann ko har koi samjhaaye
Ki ye pal bhi hain paraaye.

Miley Hain ye pal udhaar par Nirankaar se
Taaki inhe jeene mein hum khud ko sanvaar lein
Guruji kee mehar se inka sadupyog karein satkaar se
Unhonei diye Hain hamein ye pal bade pyaar se.

Aaj se shubh koi din nahin
Abhi se shubh koi pal nahin
Kyunki aaj aur abhi hai vash mein hamaare
Bahut fark padta hai ki hum inhe kaise guzaarein
Kya maalum is safar mein
Kal aaye ya na aaye
Is kshan mein jee lein sahi tareh se
Taaki abb bhi baat bann jaaye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 22, 2022

Om Namaha Shivaya
Aaj Ka Suvichaar 🙏🏻🙏🏻 # 1585

                       Pradhaanta

Beete huey kal mein jo bhi hua
Uspar toh tera zor nahin
Lekin aane wale kal ke liye tu kuch na karey
Tu itna kamzor nahin!

Isliye Guruji ka lekar tu naam
Karta chal apna kaam
Jin galatiyon ka ho gaya hai tujhe ehsaas
Unhe doharana matt
Guruji tere bheetar aur angg sangg Hain
Ve denge tujhe sumat.

Ho sakta hai tujhmein ho koi vikaar
Usey tyaagne ka kar prayatna
Har soch aur kaarya mein sachet rehkar
Uss vikaar ko duur karne ka kar tu yatna.

Ho sakta ki tu aisa insaan ho
Jiskee nekneeyati ka faayda uthaate hon loag
Toh swayam ka atmabal yoon badha
Ki tujhe doojon kee vajeh se thaise ka na karna padey bhog.

Agar teri oar se mehnat ya shraddha thi kumm
Toh sudhaar ka sachet prayaas kar bin kiye gumm
Guruji bahut dayaalu Hain, zaroor dete Hain sudharne ka avsar
Buss, tu Unke har hukm ko rakh sir aankhon par.

Laparwahi ya dvesh ya aalasya agar hai tere vyavhaar mein
Toh unhe badhaava na de bekaar mein
Kyunki anmol hai zindagi ka har pal
Har pal agley pal bann jaata hai beeta hua kal.

Guruji toh vaastavik jeevan jeene ke liye kehte Hain
Unhe yakeenan na bhaata hoga jabb hum anyaaya karte ya sehte hain
Aur agar tujhe grast kar rahe hain karmakaand aur andhvishwaas
Toh Guruji kee kripa se inse kamzor na kar apne shwaas.

Balki har shwaas ko simran se sajaa le
Har shwaas se Guruji ka naam lekar usey shaktishali banaa le
Gupt paath, sewa aur daan kar
Ruhaani vimaan mein udaan bhar
Khud bhi jee doojon ko bhi jeene de
Kisee aur ko apna sukh chayyn na chheen-ne de.

Jisey kadar hai tere pyaar kee, uske saamne vyakt kar pyaar
Har kisee ko duayein deta chal, iska bahut zarooratmand hai saara sansaar
Tu karta chal apni atma ka poshan
Na karne de kisee ko apna shoshan.

Apni kee gayi galatiyon ke liye maang le kshamaa
Sakaaratmak soch se sudhaarta chal aaj ka samaa
Is se tera aane wala kal hoga guzare huey kal se behtar
Na chod apni oar se koshish karne ka tu koi bhi avsar.

Duniya toh tujhse ek pal khush hogi aur dooje pal naaraaz
Tera rishta Guruji aur ruhaaniyat ke sangg sada hoga tere kalyaan ka raaz
Kyunki is se kal milega jo sukh, uskee nahin hai koi samaantaa
Isliye ‘banda bann’ aur apne aaj aur aane wale kal ko deta chal pradhaantaa.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 21, 2022

Om Namaha Shivaya
Aaj Ka Suvichaar 🙏🏻🙏🏻 # 1584

               Satyuga Ka Sooraj

Satyuga ka thaa sundar saaz
Lekin kewal Ishwar ko maalum thaa raaz
Ki tretayuga, dwaapar aayega uske baad
Aur phir hoga kalyuga aabaad.

Chandd aksharon ka fark hai
Aabaad aur barbaad mein
Lekin pehle se dooje takk pahunchne ka chhota hai safar
Jabki dooje se pehle par vaapis lautne mein
ho jaata hai yugon ka asar.

Kyunki oonchaayee se girne mein waqt nahin lagta janaab
Jab ki oonchaayee takk pahunchne mein umr beet jaati hai
Aisa hee hota hai adhyatmik safar mein bhi
Jo safal ho jaaye toh hee atma sukh paati hai.

Adhyatmik safar mein vifalta kalyuga mein hai prabal
Kyunki bhautikvaad aur vikaaron se kumm hua hai atmabal
Baahar se jo lagta hai aksar roab wala
Veh ruhaani taur par hota hai nirbal.

Ye satya hai ki bahut unnati laaya hai vigyaan
Lekin phir isee se badh gaya hai ‘mai’ aur abhimaan
Swayam ko karta maan kar
Samarpan aur neevanpann bhool baitha hai insaan.

Kalyuga kee beshak hai ye hawaa
Lekin dua se badi nahin ho sakti dawaa
Dua ka veh spandan hai is baat ka gavaah
Jiske prabhaav se kaam karti hai dawaa.

Isee hawaa mein jaise jaise badhta rahega
Niswaarth sewa, aur simran ka spandan
Jaise jaise is hawaa par asar karega
Guruji kee mahima ka gungaan aur Unka vandan
Vaise vaise hawaa mein sakaaraatmak oorja ke badhne se sudhartaa jaayega spandan.

Guruji Hain itne mahaan
Ve chaahein hum karein gupt sewa, paath, aur daan
Na aaye hum mein abhimaan
Aur neeven rehkar hum banein changey insaan.

Adhyaatmikta aur ahankar bann nahin sakte meet
Ahankar tyaagna zaroori hai agar nibhaani hai Guruji se preet
Vikaaron aur paapon se peedit hai saara sansaar
Ismein ahankar hai bahut bada gunehgaar.

Jeevan saadaa aur saral banaayein agar hamein hai tarna
Guruji sangg Hain, phir kaisa darna
Apna farz nibhaate huey gehra karein bhakti ka rangg
Shraddha aur saboori se chalein waqt ke sangg.

Waqt ka jharna toh behta jaayega
Satyuga zaroor laut kar aayega
Srishti ke is parivartan mein kyun na dein hum apna yogdaan
Adhyaatmik oonchaayee haasil karne kee koshish karein tyaagkar abhimaan.

Yeh karna mumkin nahin divyata ka saath chod kar
Guruji hamein manzil takk le jaayenge aur saath rahenge har moad par
Raasta banta chalega vikaaron kee har baadha ko toad kar
Satyuga ka sooraj phir se uday hoga adhyaatmik oonchaayee kee bhor par.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 20, 2022

Om Namaha Shivaya
Aaj Ka Suvichaar 🙏🏻🙏🏻 # 1583

               Shukrana Ka Saaz

Sooraj ko aksar chhipa dete hain baadal
Kalyuga ke kolaahal mein aksar kho jaata hai raajal
Ashruon mein aksar beh jaata hai naynon ka kaajal
Aksar chhota lagne lagta hai akash ka aanchal.

Lekin iska arth ye nahin ki sooraj ya raajal hain hee nahin
Aur kaajal bilkul hai unn mein, jo ashrudhaaraayein hain bahi
Akash ka aanchal toh hai anant
Buss, ashruon ka nahin ho raha hota hai antt.

Bodh aur anubhav kaisa hai
Karta hai ye sab uspar nirbhar
Paristhiti mein pratikriya jaisi hoti hai
Vaisa hee dekhti hai nazar.

Bahurangi yeh jagg hai
Sabhi ka nazariya alag hai
Kisee mein zyada hai sehensheelta, kisee mein kumm
Kisee ko kumm mein bhi santosh hai, aur kisee ko zyada bhi prateet hota hai kumm.

Guruji Shukrana ka paath padhaate Hain
Shukrana mein hee hai santosh ka raaz
Jitnee kumm shikayat karenge
Utna madhur hoga Shukrana ka saaz.

Santosh mein sukh aur tripti ka sangam hai
Santosh mein Shukrana ke geet kee sargam hai
Apni oar se karein sachchi mehnat
Aur aadar se sweekaarein Guruji kee rehmat.

Har niraasha mein bhi paayenge
Hum ummeed kee kiran
Baadal ke peechhe chhipe sooraj ka Anubhav kar paayega mann.

Ashruon mein bahe kaajal ka aur kalyuga ke kolaahal mein khoye raajal ka
Hoga hamein anubhav aur ehsaas
Guruji kee mehar se is ehsaas aur santosh ko protsaahit karega
Hamaare mukh aur mann se nikla Shukrana ka saaz.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 19, 2022

Om Namaha Shivaya
Aaj Ka Suvichaar 🙏🏻🙏🏻 # 1582

Pita Ka Paawan Pyaar

Mai na jaanoon kab Guruji ne Apne charnon se lagaaya
Lekin ye jaanoon ki tabb se yakeenan mera naseeb jagmagaaya
Shukrana Unka ki mere jeevan mein veh suhela vela aaya
Kitne kashton se toh mere bin jaane hee yakeenan hai Unhonei mujhe bachaaya.

Beemari mein dheeraj bandhaaya
Kitne roagon ko duur bhagaaya
Udaasi mein hansna sikhaaya
Mere har ghaav par mamta ka marham lagaaya

Duniya ka aslee roop dikhaaya
Girne lagi toh himmat dee aur uthaaya
Mann kee har uljhan ko suljhaaya
Mere karmon ka adhiktar bhaar uthaaya.

Andhere mein nidarr hona sikhaaya
Roshni ka raaz bataaya
Duvidha hui, toh duur karna samjhaaya
Har haalaat mein saath nibhaaya.

Aansuon ke baavjood muskuraana sikhaaya
Museebaton mein aagey badhne ka utsaah dilaaya
Dete hee rahe par kabhi na jataaya
Meri har zaroorat aur chaahat par gaur farmaaya.

Thakk gayi jabb jabb duniya kee dhoop se
Apni goad kee thandi chhaaon mein bithaaya
Jabb jabb neend na aa rahi thi mujhe
Simran karvaakar mujhe sehlaaya.

Insaaniyat ka paath padhaaya
Ruhaaniyat ka raasta dikhaaya
Satsang mein bulaaya
Prasad khilaaya, amrit pilaaya.

Asal dhan se parichit karvaaya
Thode samay mein adhik karmon ka bhugtaan karaaya
Kitnee saari sangat se milvaaya
Ghar parivaar ka mahatva bataaya.

Aish se jeevan jeena sikhaaya
Befikr, beparwah honei ka nuskha bataaya
Samarpan karna yaad dilaaya
Mujh par daya kar mujhe sewa mein lagaaya.

Mai toh is sabke kaabil bhi nahin thi
Phir bhi Guruji ne diya hai aisa anokha dulaar
Ki Unhee mein paaya mainey Ishwar ko
Aur Unhee mein paaya mainey pita ka paawan pyaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 18, 2022

Om Namaha Shivaya
Aaj Ka Suvichaar 🙏🏻🙏🏻 # 1581

 Mera Adhyaatamik Safar Aur Sadhna

Mere pyaare Guruji,

Aankhon mein yoon samaaye Aapka roop
Ki sheetalta ko kumm na kar paaye kadak se kadak dhoop
Hriday mein yoon viraajmaan hon Aapke kamal charan
Ki har dukh ka is sukh ke sahaare ho jaaye haran.

Naasika mein Aapki ruhaani khushboo ka yoon ho samaavesh
Ki hamesha ke liye hota rahe uska saanson mein pravesh
Aise dhanya ho jaayein tvachaa ke roam chhidr Aapke ruhaani spandan se
Ki usee spandan se nimagn hokar mai tarti jaaoon Aapke chintan se.

Kaanon mein aise goonjti rahe Aapki awaaz
Ki veh bann jaaye maargdarshan ka raaz
Labhon par yoon rahe sada Aapki mahima ka gungaan
Ki jeevan bann jaaye Aapke gungaan kee dastaan.

Aise kar paaoon mai Aapka simran
Ki vyarth ke khayaalon se vichlit na ho mann
Sewa, paath, aur daan ho paaye vaisa
Aapko lagta hai achchaa jaisa.

Meri awaaz Aapke Shukrana aur stavan ke geet aur satsang aise sunaaye
Jaise jharne ka nirantar bahaav paani ka paraakram dikhaaye
Rasna par aise aata rahe Aapka naam
Ki Aapke naam mein khokar mai ho jaaoon khud ke liye bhi gumnaam.

Sir aankhon par ho Aapka hukm
Bhool kar har zulm aur zakhm
Pairon ke taley yoon dabb jaaye jo bhi ho ghamand
Ki veh sada ke liye mitti mein ho jaaye dafan.

Mera wajood, meri saansein, meri atma
Sabhi par Aapka noor, Aapki hukoomat chhaa jaaye, mere Paramatama
Astitva kee bhautikta ka yoon ho jaaye khaatma
Ki safal ho jaaye mera adhyaatmik safar aur sadhna.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 17, 2022

Om Namaha Shivaya
Aaj Ka Suvichaar 🙏🏻🙏🏻 # 1580

  Samasya Ka Pehar

Beeta jaa raha hai samasya ka pehar
Aane hee wali hai samaadhaan kee sundar sehar
Har pehar mein samaayi hai waqt kee lehar
Jisey aabaad karti hai Guruji kee mehar.

Guruji kee tu baat kar
Guruji se tu baat kar
Sakaratmakta atmasaat kar
Insaaf tu apne saath kar.

Jis tareh se tujhe pata nahin chalta
Ki kab baadal jal se jaate hain bhar
Aise hee tujhe shaayad maalum nahin hai chal raha
Ki tu Guruji kee kripa se har pal hai tarr raha.

Ye samasyaayein toh tu jaanta hai
Lekin kitnee aur hain jinse tu hai anjaan
Guruji tujhe pataa bhi nahin lagne dete
Aur karte rehte Hain tera kalyaan.

Bahuton se achchaa hai tera haal, na tu chod muskuraana
Rakhta chal shraddha aur karta chal shukrana
Bharta chal pichhle karmon ka jurmaana
Paata chal kalyaan ka khazaana.

Chinta hai chita samaan
Tu yeh jaan aur maan
Guruji Hain mahaan
Unke paas hai har samasya ka samaadhaan.

Isliye chinta chod kar tu Unka chintan kar
Sachche dil se tu Unka stavan kar
Apne har bhakt kee har samasya par Guruji de rahe Hain dhyan
Tu kis kis haalaat se guzar raha hai, Unhe hai iska poora gyan.

Teri har samasya ka hoga hal
Isliye na reh tu udaas
Teri shraddha zaroor hogi safal
Tu Guruji par kar vishwaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 16, 2022

Om Namaha Shivaya
Aaj Ka Suvichaar 🙏🏻🙏🏻 # 1579

Tu Tayyr Paayega Is Kadar

Andhere kee gehraayee mein doobne se na darr
Zindagi ko jee le, yoon jeete jeete toh na mar
Guruji ne tujhe dee hai sharan
Shukrana se bhar le tu apna mann.

Ye zameen ye sansaar aur ye gagan
Sabhi karein Guru ko naman
Andhera bhi Unke hukm se ho jaayega khatam
Tere jeevan ko roshan karne ujaala zaroor lega janam
Andhera na dhaa paayega tujh par koi sitam
Andhere mein Guruji ke sahaare tu badhaata chal kadam.

Tera muqaddar dikhaaye tujhe jaisa bhi nazaara
Guruji sanvaar sakte Hain nazaara saara
Beshart aur niswaarth hai Guruji ka sahaara
Unhe Apna har bhakt lagta hai pyaara.

Tu gair nahin Hain Unke liye
Tera kalyaan hai Unkee zimmedaari
Is vilamb ka bhi koi kaaran hoga
Jab tere liye sahi hoga, tabb aayegi teri bhi baari.

Tu ho ya na ho chaahe is baat se sehmat
Tujh par bhi baras rahi hai Unkee rehmat
Jo tujhe sambhaale huey hai har pal
Ambar se bhi vishal hai Unka veh aanchal
Jinkee nazar mein hain tere din rayyn
Mahasaagar se bhi gehre hain Unke ve nayyn.

Guruji shakti pradaata Hain
Guruji hee vidhaata Hain
Guruji tere haal ke gyaata Hain
Guruji jeevan daata Hain.

Isliye doobne se bilkul na darr
Doobte doobte bhi tu jaayega tarr
Aur phir tu tayyr paayega is kadar
Ki kalyaanmayi hoga tera safar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 15, 2022

Om Namaha Shivaya
Aaj Ka Suvichaar 🙏🏻🙏🏻 # 1578

Jeevan Kee Paribhaasha

Basaaye huey mann mein asha
Raahi dhoondhne chala jeevan kee paribhaasha
Chalte chalte raah mein mila ek bhikhaari
Jisey thi na jaane kaunsi beemaari
Chehra thaa murjhaaya sa
Jwar se peedit lagg raha thaa
Bura waqt jaise uska aaya thaa
Na jaane aur kya kya usne saha thaa.

Raahi se yoon raha na gaya
Bhikhaari se kuch kaha na gaya
Raahi ne kurte kee jeb se kuch paise nikaale
Aur dua karte huey jhuk kar bhikhaari ko de daale.

Uska dil chaaha
Ki kaash veh aur kuch kar sakta bhikhaari ke liye
Bahut nek bhaav se jalaaye vaataavaran mein
Raahi ne bhikhaari ke liye duaon ke diye.

Chala simran karte karte veh thoda aagey raah par
Ek aur bhikhaari usey aaya nazar
Paise nahin thei abb uske paas
Isliye thoda sa veh hua udaas
Phir haath jod kar pyaar se usne dee duayein
Kaha usne, “ Baba, dua karta hoon, tumhaare kasht duur ho jaayein.”

Raahi chalte chalte dooba raha jeevan kee paribhaasha ke vichaar mein
Sabhi ke liye shuddh soch liye vinamrata rakhte huey vyavhaar mein
Uskee atma ko khabar thee uske har vichaar aur ravaiye kee
Yoon hee chalti gayi nemi samay ke pahiye kee.

Karta chala Shukrana aur simran
Pashu pakshiyon ke liye paani se bharta raha chhote chhote bartan
Veh jaantaa thaa ki beshak usey koi aur dekhe na dekhe
Oopar wala sab dekhe aur jaane
Aur koi uskee neeyat se waaqif ho ya nahin
Ishwar uskee neeyat ko pehchaane.

Guruji kehte Hain, “Banda bann,”
Achanak bol pada raahi ka mann
Jeevan kee paribhaasha ka jo uske mann mein thaa sawaal
Usey lagaa ki uskee soch aur uske karma mein hee hai jawaab.

Kisee kee madad kar paao toh zaroor karo
Sabhi se anaasakt pyaar karo aur andhvishwaas se na daro
Madad na kar paao toh bhi raho neeven aur vineet
Ahankar aur tark ko tyaagkar haar mein bhi hai jeet.

Bin jataaye, bin dikhaaye karo sewa, paath, aur daan
Unhe gupt rakhne se khush hotey Hain Bhagwaan
Insaan ho, anusaran karo insaaniyat ka
Atma basee hai shareer mein, har saans ko poshan do ruhaaniyat ka.

Mitti se aayein hain hum sab, mitti mein hai mil jaana
Jab antim samay aayega, na chalega koi bahaana
Jaisa Guruji ne hai kaha, usee tareh se jeena hee hai jeevan kee paribhaasha
Isliye samarpit kar dein Guru charnon mein hee har asha aur niraasha

Yahee sochte sochte raahi pahunch gaya apne shivir par
Uske chehre ka noor bhaari padd raha thaa timir par
Guruji ka ashirwaad thaa uske sangg
Guruji kee dee deeksha se khila thaa uska rangg
Kuch kuch samajh aane lagi usey paribhaasha jeevan kee
Guruji kee mehar se badhauti hui uske adhyaatmik gyan ke dhan kee
Usne paribhaasha ko saarthakta se jeene kee koshish kee, jabb takk chalta raha uska shwaas
Antim samay mein shareer mitti hua, lekin atma ka raha Guru charnon mein nivaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 14, 2022

Om Namaha Shivaya
Aaj Ka Suvichaar 🙏🏻🙏🏻 # 1577

         Japta Chal Tu Unka Naam

Zindagi ko tu paheli maan
Ya phir ek ajab sa imtehaan
Guruji ka kehna maan
Aur japta chal tu Unka naam.

Paheli lagey ya imtehaan
Aankhon mein aansoon hon ya phir ho chehre par muskaan
Na chodna japna Guruji ka tu naam
Kyunki isee mein hai tera kalyaan.

Guruji ke naam ko jo rasna hai gaati
Ye naam banta hai uss jann ka saathi
Rasna se antarmann mein basaa le tu Guruji ke naam ko
Unke naam ke amrit se bheegne de tu apne har kaam ko.

Guruji ke naam ko kar le atmasaat
Bann jaayegi teri har bigdi baat
Aaj banegi ya kal
Ye toh Guruji hee jaanein
Tere hitt mein toh ye hai
Ki tu Unka kaha maane.

Guruji ka naam hai tere raaste ka vo anokha chirag
Jiskee roshni anginat diyon se bhi zyada hai
Sainkdon tufaan bhi is chirag ko na bujha paayenge
Is chirag kee lau se raahon mein aur kayi diye jal jaayenge.

Andhere mein bhi andhera na dass paayega tujhe
Guruji ke naam ka chirag roshan karega teri raahon ko
Tu ek pal ke liye bhi asahaay nahin hai
Kyunki Guruji ne swayam thaama hua teri baahon ko.

Zindagi kee paheli ko maan le kuch palon kee saheli
Zindagi ke imtehaan ko maan le kuch lamhon ka mehmaan
Guruji ne baahein Hain thaami, tu le yeh hakeekat jaan
Aur jo kuch bhi ho jaaye, japta chal tu Guruji ka naam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja