Jo kismat hamaare liye nakaab mein hai Veh pehle se hee Oopar wale kee kitaab mein hai Guru ke haath mein hai kalam Ve lekha sakte Hain badal Isliye aye insaan Tu soch kar chal.
Teri kismat sanvar sakti hai kisee bhi pal Guruji ke paas hai aisa karne ka bal Isliye na mann ko honei de tu chanchal Aur Guruji ko sudhaarne de tu apna aane wala kal.
Sabhi ko milta hai apne karmon ka phal Guruji kee kripa se bhakton ke kasht jaate hain tal Guruji kee sharan mein chalta hai jiskee zindagi ka safar Har pal Guruji ke ashish ka hota hai uss shakhs ke jeevan par asar.
Guruji kee izaazat ke bin koi nahin pahunch sakta Unke dar par Tera saubhagya hai ki tujhe mila hai yeh shubh avsar Teri kismat ka lekha badalne ke liye kaafi hai Unkee ek hee nazar Unka simran karne mein tu na chod koi bhi kasar.
Buss, Unke hukm ko rakhte huey sir aankhon par Unka Shukrana karte rehna tu umr bhar Tu changi neeyat aur shuddh bhaav se apne karam kar Guruji kee mehar se tere karmon ka safar hoga mukhtasar.
Jabb Guruji lete Hain imtehaan Tabb aksar sunn-ne padte hain doojon ke kadve bol Lekin chaahe tujhe lakh ye zamaana le tatol Bhakti mein vichalit hokar na tu dol.
Kyunki tere pareekshak Guruji Hain Na ki yeh zamaana Tu Guruji ka kehna maante huey Sahi kadam lene se na hichkichaana.
Isliye beshak akele chalna padey tujhe Tu bilkul bhi na ghabraana Aur Guruji ka naam lete huey Safar mein aagey badhte jaana.
Raaste mein aayengi chunautiyaan Yeh sambhav hee nahin balki nishchit hai Tujhe gherengi kayee aandhiyaan Kyunki unhe paar karne mein tera hitt hai.
Nibha tu apna dharam Karta chal apna karam Kar tu Guruji ko sarvasamarpan Mehsoos kar Unke pyaar ka spandan.
Guruji ka naam hai tera kavach Shraddha hai teri dhaal Saboori ko banaa apni oorja Aur simran ko banaa apni chaal.
Isliye bin sanshay aur bin sawaal Tu swasth rakh apne antar-mann ka haal Tu milaata chal samay kee taal se taal Guruji tujhe har pal rahe Hain sambhaal.
Ye zindagaani hai ek anubhav Ya kahein isey anek anubhavon kee kahaani Kisee kee kahaani mein kumm, kisee mein zyada hotey hain adhyaaya Kahaani roopi is safar mein kuch jann apne lagte hain, kuch lagte hain paraay.
Atma hai Paramatama ka ansh Veh jaane kab kaunsa adhyaaya hoga shuru Aur atma ka Paramatama se milan karaane ke liye Zindagi mein aawashyak Hain Guru.
Guruji hee jaante Hain ki kaunsa waqt hai Kis bhakt kee zindagi mein Jab uchit hoga uss bhakt ka judna Guruji kee bandagi mein.
Guruji se judna itefaaq nahin Veh toh Guruji dwaara kee gayi vyavastha hai Jiske prabhaav se chaitanya Bhakt kee atma mein bastaa hai.
Jitnee jaagrit rahegi atma Utnee nazaakat se veh paayegi maargdarshan Jitna zyada hoga simran Utna zyada is maargdarshan se niyantran mein rahega mann.
Yahee toh hai safar ka saar Jiske liye janam lena padd jaata hai baar baar Isliye Guruji Apne naam kee naiya mein karte Hain bhakt ko sawaar Aur sikhaate Hain ki simran dwaara kaise jodni hai Unse seedhi taar.
Bhakt kee zindagaani kee kahaani mein uskee gavaah banti hai atma Jaise jaise chalta hai safar, kahaani ke naye adhyaaya kee shuruaat pehchaanti hai atma Guruji ke ashirwaad se unnati ke path par hota jaata hai har duvidha ka khaatma Aur Apne se bichdee hui atma ko swayam mein samaa lete Hain Paramatama.
Yaad vo, jo bhool na jaaye Phir chaahe vo baar baar aaye Veh yaad kitnee meethi ho jaaye Jis yaad mein Satguru bass jaaye.
Satguru kee meethi yaad Veh toh swayam hee hai prasad Veh bhi aaye agar ho Unkee mehar Unkee yaad se sundar ho jaaye har pehar.
Meethi yaad mein ho fariyaad Ki Guruji karein mera anta-karan aabaad Aur meethi yaad mein ho veh jazbaat Jis se Guruji sunn lein ye fariyaad.
Arzi karne ko jee chaahta hai, Guruji, Ki Apni mehar yoon barsaayiye Anta-karan mein yoon samaayiye Ki bichhoda na ho ek bhi pal ke liye Is arzi ko na multavi karna kal ke liye.
Phir kehti hoon mai swayam se Ki shaayad mai abhi is daat ke kaabil nahin Isliye Shukrana karti hoon Guruji ka Ki kumm se kumm yaad toh barkaraar rahi.
Meri tadap ke gavaah hain ye zameen aur ye aasmaan Aur Aapki nazar, Guruji, jo har pal leti rehti hai mera imtehaan Anginat khaamiyaan hain mujh mein, lekin pahunchna chaahti hoon vahaan Jahaan Aapse hee shuru aur Aap par hee khatm ho meri dastaan.
Kaabil banaa deejiye ki vaisi banoon jaisa Aap chaahein Vahee karoon jo Aapko lagey sahi Aapki yaad se sajee rahein ruh kee raahein Meri tadap ko dekh kar shaayad Aapse keh de aasmaan aur zameen Ki mujhe de deejiye Aap Apni daya ka daan Aur ho jaayiye mere anta-karan mein viraajmaan.
Ve Aapse na bhi keh paayein Toh bhi Aap khud hee jaan jaayein Mujhe yeh samjhaate huey ye hawaayein Mujhse apni nazrein milaayein.
Aalam ho aisa ki Aapki yaad yoon buss jaaye mere roam roam mein Ki Aapki yaad ke junoon mein baaki sabb bhool jaaoon Bann sakoon aisee ki Aapko itna khush kar paaoon Ki fariyaad qubool ho aur anta-karan mein Aapko paaoon.
Abb aur bichhoda na saha jaaye Iske aagey kuch aur na kaha jaaye Buss, jo ye bhaav hai vo baha jaaye Ki Aapke deedar bin abb na raha jaaye.
Zubaan par na aa paaye arzi Toh bhi na karna tum fikr Guruji toh jaanein tumhaare dil kee baat Chaahe Ve na karein is satya ka zikr.
Guruji toh Hain antaryaami Hum hain sangat nimaani Lekin tumhaari arzi se kaheen zyada mahatva rakhta hai tumhaara kalyaan Aur Guruji kabhi na chaahenge ki Unke bhakt ka bigad jaaye kaam.
Tabhi toh Ve kehte Hain ki bhakt zidd na karey Varna Unhe uske abheesht kee karni padegi poorti Is se Guruji ko na hogi prassannataa Kyunki uss abheesht mein zaroori nahin hai ki hogi bhakt kee sampannataa.
Guruji kee vaddi hai vadiyaayee Aur samarpan mein hai hamaari bhalaayee Yeh tathya hai seedha aur bilkul suljhaa hua Buss, mann hee hai jo hai uljhaa hua.
Uljhe huey mann ko suljhaayega Guruji ka simran Simran se duur ho jaayegi mann kee har uljhan Maangne ke bajaaye maan-ne lagg jaayega mann Aur fikr ke bajaaye shukr se saj jaayega jeevan.
Mann ke andar hai veh dar Jiskee tumhe hai talaash Mann ke andar hai veh mandir Jisey tum dhoondhte ho baahar apne aaspaas.
Mandir hai tumhaare mann ka dar Vaheen par hai tumhaare Bhagwaan ka ghar Kyunki jabb takk na ho tumhaare mann mein Unka vaas Tabb takk nahin mitt sakti tumhaari traas.
Lekin vaas ho sakta hai ek ka hee vahaan Isliye ya toh tum reh sakte ho ya reh sakte Hain Bhagwaan Isliye apni ‘mai’ ko tumhe hoga mitaana Agar mann ko banaana hai Prabhu ka ashiyaana.
Guru Govind se milaaye Isliye jabb bhakt Guru kee mahima gaaye Toh Prabhu bhi prassann ho jaaye Guru mein hee Prabhu kee chhavi samaaye.
Guruji kehte Hain Unke dar par ‘mai’ ka koi kaam nahin Kyunki ‘mai’ mitegi, toh hee mann mein Guruji bass paayenge Varna jitna bhi lagg raha ho tumhe ki tum kar rahe ho sab sahi Is ‘mai’ se upjey huey vichaar tumhaare mann par anuchit asar kar jaayenge.
Is ‘mai’ ko tyaagna hee hai achchaa Agar bann-na hai Guruji ka achcha bachcha ‘Mai’ se jabb khaali ho jaayega mann Guruji karenge vahaan sanatan vaas Mann ka dar sahi mainey mein banega mandir Sabse khaas hoga tumhaare liye veh ehsaas.
Kyunki Guruji hongei kewal saath nahin Balki basenge tumhaare bheetar Unkee maujoodagi se sada ujjwal hoga tumhaara mann mandir Tum prem bhaav se Guruji ka vandan karna Aur karte rehna Unka dhanyawaad Ve har pal tumhaari raksha karte huey Dete rahenge tumhe ashirwaad.
Khushkismati ka veh pal aaya bhakt ke jeevan mein Jabb Guruji ne liya usey Apni sharan mein Bhakt ko ho gaya Guruji se behad pyaar Aur Guruji usey dene lagey beintehaa dulaar.
Bhakt ne jaana ki antaryaami Hain Ve Bin bhakton ke boley hee jaan jaayein Aur Unke bhakt jann Unkee dee hui daat paayein.
Hasraton se keh diya uss bhakt ne Ki ve usey na sataayein Usne kaha, “Mere pyaare Guruji Jaante Hain tumhe.”
Keh diya usne ki agar ve laa rahi hongi uske liye kalyaan ka sandesh Toh Guruji swayam hee unkee poorti ka karaayenge uske jeevan mein pravesh Aur agar Guruji ko ve bhakt ke liye na lagin sahi Phir toh unhe vaise hee uske jeevan mein aane ka koi matlab hee nahin.
Hasraton ne keh diya bhakt ke mann se Ki ve chod rahi hain uska dar Lekin mann ko samjhaana kahaan hota hai aasaan Veh baat maan lene se jaata thaa mukar.
Guruji ka simran banaa mann kee aushadhi Sanyam mein aana seekhne lagaa mann Idhar udhar ke khayaalon se khud hee sambhalne lagaa Guruji ka shukriya ki Unhonei kiya rehem.
Abb hasratein hawaa kee bhanti paas se guzar jaati hain Lekin bhakt ke mann mein ghar nahin banaati hain Unhonei mann se darna chod diya hai Aur mann ne simran se swayam ko jod liya hai.
Abb toh bhakt chal chuka hai samarpan kee oar Apna kartavya nibhaate huey baaki sab usne Guruji par diya hai chod Guruji ne simran dwara suljhaa diya uska mann Bhakt ne Unhe shukrana karte rehne ka kiya hai prann.
Guruji se pyaar aur Unka simran Guruji ko shukrana aur Unhe samarpan Ye sab Unke bhakton ke liye hai divya dhan Is se safal hota hai bhakt ka jeevan aur vandan.
Vriksh na karey bhed bhaav Sabhi ke liye deta hai phal aur chhaaon Baadal barasne se pehle na poochhe Hai ye kaunsa desh ya gaaon Veh barsey bin pakshpaat Aur ho jaaye barsaat.
Koi phal apne liye na raakhe Taruvar hai itna dayalu Koi boond se apni pyaas na bujhaaye Baadal hai itna kripalu.
Aur jo maalik Hain Srishti ke Vriksh aur baadal hain mohtaaj Jinkee drishti ke Ve har uss jann ko dein ashirwaad Jo Unkee sharan mein hai aata Tabhi toh dekhte dekhte Bhakton ka lekha badal hai jaata.
Guruji Apne har bhakt par Vrishti karte Hain Apne ashirwaad kee Har bhakt kisee na kisee tareh se anubhav karta hai Leela Unke paawan prasad kee.
Taruvar ka har phal ek sa nahin hota Kuch kadve, kuch khatte, kuch hotey hain meethe Guru aur Govind ka har bhakt bhi ek sa nahin hota Kuch seedhi raah par bhi tedhe chalte hain aur kuch chalte hain seedhe.
Sabhi kee hai anokhi praathamikta aur pasand Sabhi ka safar alag hai Har tareh ke phal hain hotey Har tareh ke insaanon se bharaa ye jagg hai.
Guruji sabse kripalu baadal Hain Aur sabse neeven aur paawan taruvar Insaaniyat aur sadhusheelta sikhaane Bulaate Hain bhakton ko Apne dar par.
Ashirwaad ke amrit ko goad mein liye Barsaate Hain Ve Apni sangat par Ashish ke phalon ka poshan kar ke Unkee bauchaar karte Hain har bhakt par.
Kyun na mann ka paatr khaali kar ke In saugaton ko lein hum shishtachaar se Jo hamaara har tareh se rakhte Hain dhyan Ve Guruji khush hongei hamaare vichaar aur vyavhaar se.
Jitna khaali hoga paatr mann ka Utna zyada uddhaar hoga hamaare jeevan ka Guruji toh Hain raasta dikha rahe Buss, hamaari soch chetna rahit na rahe.
Soch mein jo hogi chetna Toh veh degi sadasheelta kee prerna Hum banenge swasth vicharon wale chhaatr Aur Guruji ka anugraha paane ke liye tayyaar hoga hamaare mann ka paatr.
Raat se dar kar kya hoga Raat ne toh aana hee hai Maut se dar ke kya hoga Usne bhi ek din aana hee hai.
Saath mein kalyuga ka chal raha hai daur Zamaana bhautikvaad par farmaa raha hai gaur Lekin baazaaron mein saansein biktee nahin Tabhi toh ye hain aur bhi anmol Varna neelaami ho jaati inkee bhi shaayad Dekhkar inka naap aur tol.
Kabb takk ke liye milee hain ye saansein Maalum nahin hum mein se kisee ko Is jeevan ke baad kya maalum kya hoga Isliye kyun na sahi tareeke se jee lein isee ko.
Phir aglaa sawaal hai ki kaun jaane sahi tareeka Sabhi ne seekha aur dekha hai bhinn bhinn saleeqa Mil jaati hai jinhe Guru kee sharan Guru sanvaarte Hain Unka janam aur maran Ve jaise jaise karte hain Guru kee agya ka anusaran Bhakt sahi tareeke se jeene lagte hain jeevan.
Hum khushnaseeb hain ki Guruji Hain pooran Guru Unhonei kabb se kar diya hai hamaara kalyaan shuru Bin pravachan ke Unhonei jeene ka saleeqa sikhaaya hai Apni sangat ko jeevan ka maarg dikhaaya hai.
Unhonei hamaare liye saral kee hai bhakti Hamaare uddhaar mein lagaa dete Hain Ve Apni saari shakti Kehte Hain Ve ki hum saanson ko simran se sajaayein har pal Usee mein hai hamaari har duvidha ka hal.
Saanson ke liye simran se sundar nahin hai koi bhi shringaar Tabhi toh Guruji simran karna smaran karaate Hain baar baar Vichaaron mein sudhaar Atma ka uddhaar Karmon ka bhugtaan, antarmann ka pavitrikaran Jeevan jeene kee sumat, kashton ka haran Simran se ye sab hota hai Jabb bhakt jaagta ya sota hai.
Kisee ko bataane kee zaroorat nahin Dhoondhna koi mahoorat nahin Jitna ho sakey, mann hee mann karte rahein simran Toh Guruji kee maujoodagi ke sangg beetega har kshan.
Simran saanson mein laata hai aisa spandan Ki nikharta jaata hai vandan Jaagrit hoti hai chetna Miltee hai sadasheelta kee prerna.
Mann mein nirantar simran chalta rahe Toh swaasthya par bhi hota hai achcha asar Pichhle karmon ka karz chukaane mein mil jaati hai raahat Bhakt ke kashton ka nivaaran ho, ye hai Guruji kee chaahat.
Jabb simran swabhaav ka hissa bann jaata hai Toh raha nahin jaata simran ke bin Simran se hee saansein susajjit hain hoti Simran se hee nikhartaa hai bhakton ka raat din.
Isliye Guruji se jodey huey hum seedhi taar Badhaate rahein poojya Guruji se pyaar Saanson ko simran se sajaayein baar baar Ruhaani saundarya se karein apni saanson ka shringaar.
Vaishakh maas kee poornima hai ek mahaan utsav Is din Gautam Buddha ke janam se anugrihit hua yeh jagg Nepal ke Lumbini mein dharti par aaye Bhagwaan Vishnu ke ye avatar Unkee vadiyaayee se tarne laga yeh saara sansaar.
Unke pita thei Ikshvaaku vansh ke raja Shuddhodan Aur mata ka naam thaa Mahamaya Kewal ek saptaah ke liye in navjaat shishu Siddharth Gautam ne Janam dene wali maa ka pyaar paaya.
Ve chal baseein Aur Unkee behen Gautami ne kiya Siddharth ka paalan poshan Siddharth ka putr hua Yashodhara se vivah honei ke pashchaat Aur Rahul naamak is baalak se Unka ghar ho gaya roshan Lekin kuch varsh baad Unhonei grihasth ko tyaaga Sansaar ka dukh, mrityu, roag dekhkar Unke mann mein uthne lagey thei kayee prashn.
Satya kee khoj mein nikal gaye chod kar saara rajya Bachpan se hee jo itne dayalu thei, Unhe ho gaya thaa vairaagya Yog sadhana mein rahe Ve anek saal Phir divya mahima se safal huey Unke sawaal Ashwatth ke taruvar ke neeche baithkar dhyan mein Vaishakh Poornima par hee Unhe praapti hui gyan kee Peepal ka naam hua Bodhivriksh aur Bodhgaya hua Gaya ka naam Saral tareeke se insaaniyat ka dharam nibhaane ka dene lagey Siddharth Gautam paigaam.
Apne anuyaayiyon kee madad se Unhonei madhyam bhaag ka upadesh dete huey kiya dharma ka prachaar Vaishakh Poornima par hee hua Unka Mahaparinirvaan Jiska zariya banaa Kundaa naamak lohaar.
Kundaa se jo bhojan Gautam Buddha ne kiya thaa sweekar Usey khaa kar Ve huey adhik beemar Kundaa bekusoor thaa, Unhonei Apne mitr Anand ko bataaya Yahee satya Anand ne Kundaa ko samjhaaya.
Aaj bhi duniya ke konei konei mein Gautam Buddha ke upadesh ka hota hai prachaar Aisee mahaan atmaaon ke ashirwaad se Anugrihit hai sampoorna sansaar.
Daya ahinsa saamanjasya aur dharam Satya neevanpann nishtha aur karam Sadhna aur dhyan Adhyaatmik gyan Duuri har vikaar se Duuri paap ke karma aur vichaar se In sabb sadachari ke gunon par Gautam Buddha ne diya zor Kitnon ne Unkee prerna kee thaam lee hai dor.
Guruji bhi kahein Apne har bhakt se Ki veh ‘banda bann’ jaaye Sadhusheelta aur sadachari ka karey anusaran Bhog karte huey nibhaaye insaaniyat ka dharam.
Kitne bhaagyashaali hain hum sabb Ki Mahapurushon ke roop mein hamein mil gaye Rabb Sabhi ko Buddh Poornima kee haardik shubhkaamnaayein Aayiye, jagg ko apna sarvashreshth yogdaan dein aur insaaniyat ka dharam nibhaayein.
Aaj Ka Suvichaar 