Author: dhirjabhat

May 5, 2022

Om Namaha Shivaya
Aaj Ka Suvichaar 🙏🏻🙏🏻 # 1537

           Guru Aur Bhakt Ka Rishta

Guru aur bhakt ka rishta bahut pyaara hai
Ismein sabhi ko milta sahaara hai
Swatantra ichcha, neeyat, ravaiye kee azaadi ka mahatva hai
Niyati dobaara likhnee hai ya nahin, ye dekhna Guruji ka kartavya hai.

Isliye tu fikr na kar
Tu bilkul bhi zikr na kar
Tere paas thi jo jaankaari
Toone uske aadhaar par nibhaayee apni zimmedaari.

Guruji jaante Hain teri neeyat thi nek
Toone dekha zarooratmand insaan ek
Uskee madad kee aur uskee zaroorat toone kee poori
Aur uss se pehle toone lee Guruji se manzoori.

Na tera koi swaarth thaa
Na thi teri koi maang na kisee se koi ummeed
Uss pal jo madad ka raasta tujhe nazar aaya
Toone bin aur kuch jaane vahee raasta apnaaya.

Zarooratmand ke chehre par dekh kar muskaan
Teri toh jaan mein aayi jaan
Toone kiya Guruji ka shukrana
Unhonei uskee zaroorat aur teri neeyat ko pehchaana.

Beshak imtehaan lete Hain Guruji
Maasoom galatiyan maaf kar dete Hain Guruji
Buss, kehte Hain Unke darbar mein ahankar aur tark kee nahin hai jageh
Lekin hum bhakt jann in dono ko na chodne kee banaa lete hain koi na koi vajeh.

Chaahe zaroorat na thi
Phir bhi Unhonei tere mann kee shanti ke liye kee anubhav dwara pushti
Aur itnee mamta se dee tere mann ko santushti.

Buss, isliye har baar kee tareh
Har faisla Unhee par tu de chod
Saansaarik maajaron ke dard se
Apne dil ko tu na toad.

Tujhe teri chetna ne madad kee koshish karaayee
Toone Guruji kee dee prerna kee kar lee sunvaayee
Sehni padi tujhe agar thodi rusvaayee
Rakh tasalli, kyunki teri koshish kisee ke kaam aayi.

Soch le kuch bhi koi aur
Tere Guru jaante Hain asal baat
Unka divya prakash ujjwal rakhega tera raasta
Chaahe tere jeevan mein aa jaaye kuch lamhon ke liye raat.

Buss, har taraf rahe ruhaani pyaar
Chaahe ho ya na ho uska ikraar
Guruji karte Hain har pal ke liye tayyaar
Chaahe vo pal ho is paar ya uss paar.

Vaise bhi apna farz nibhaane ke baad
Aur kuch bhi nahin apne haath mein
Aur sabse badi baat hai
Ki Guruji Hain har bhakt ke saath mein.

Yahee satya kal thaa aur kal hoga
Aur yahee satya aaj hai
Ki har janam mein har bhakt
Guruji kee marzi ka mohtaaj hai.

Guru aur bhakt ka rishta naazuk aur nirmal hai
Ismein samarpan aur shukrana avval hai
Guruji se jodni hai seedhi taar
Is rishte ka hai ye saumya saar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 4, 2022

Om Namaha Shivaya
Aaj Ka Suvichaar 🙏🏻🙏🏻 # 1536

         Guruji Ke Prem Kee Bahaar

Aye zindagi, jabb jabb tumne dee thokar
Guruji kee mehar se Unke bhakt sambhal gaye khade hokar
Jabb jabb saamne aayi chunauti kee khaayi
Guruji ke pyaar se unn sabne hai himmat paayi
Guruji ne unhe khaayi ke paar pahunchaaya
Har pal unpar Apna ashirwaad barsaaya.

Sabse prabhavshali marham hai Guruji ka pyaar
Dil aur deh ka dard duur kar deta hai Unka dulaar
Jitnee baar chaaho Unkee mamta, miltee hai uss se kayi zyaada baar
Kyunki Unka prem toh hai nirantar behti divya bahaar.

Jisko bhi chhoo le ye bahaar beshak sirf ek pal ke liye
Uska honei lagg jaata hai kalyaan
Is bahaar ka ek jhonka hee kaafi hai
Dene ke liye Guru kripa ka daan.

Guruji ke prem kee bahaar kee khushboo mein hai aisa anokhapan
Ki bhakt kee ruh ho jaati hai iskee deewani
Ye bahaar deti hai beparavahi kee daat
Ye bahaar laati hai simran kee saugat.

Guruji ke simran mein khokar
Bhakt Shukrana karta hai is bahaar kee ruhaaniyat ka
Guruji kee niswaarth sewa aur Unhe samarpan karte karte
Aadar badhne lagta hai Unkee inaayat ka.

Guruji ke prem kee bahaar nikhaar deti hai bandagi
Guruji ke prem kee bahaar sanvaar deti hai zindagi
Guruji ke prem kee bahaar laati hai santosh ka paigaam
Guruji ke prem kee bahaar is kalyuga kee dhoop mein hai sheetal dham.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 3, 2022

Om Namaha Shivaya
Aaj Ka Suvichaar 🙏🏻🙏🏻 # 1535

     Akshay Tritiya Ka Tyohaar

Vaishaakh maas ke Shukla paksh kee teesri tithi hai aayi
Daan dekar akshay punya milne ka vardaan sangg hai laayi
Isliye is parv ka Akshay Tritiya hai naam
Bin mahoorat ke bhi is din shubh hotey Hain sab kaam.

Akha Teej kahein ya kahein Akti
Saamanjasya aur shubh sandesh laati hai bhakti
Maa Laxmi ne kee Kuber par dhan kee varsha is din par
Maana jaata hai ki ye parv hai naya karobar shuru karne ka shubh avsar.

Ved Vyasaji ne lee sahaayata Ganesh Bhagwaan se
Ve vaachak baney aur Ganeshji ne shuru kiya likhna
Yeh shubh kaam shuru hua Akshay Tritiya ke din par
Is tareh se Mahabharat kee hui thee rachna.

Raja Bhagirath kee tapasya hui safal
Hua Ganga Maiya ka avataran
Kaha jaata hai ki Mata Annapoorna ka bhi
Is din hua janam
Tabhi se is parv par reet hai
Ganga mein dubki lagaana
Aur vidhaan hai
Gareebon ko bhojan khilaana.

Is tyohaar se juda hai Brahmaji ke putr Akshay Kumar ka avataran
Pitron aur Devon ko til ka tarpan
Japp, tapp, havan, aur vrikshaaropan
Aur isee din Mahabharata ka yuddh hua khatm.

Bhagwaan Krishna ne Draupadi par kiya upkaar chawal ka ek daana khaakar
Chawal ke uss bartan ko Akshay patra honei ka diya vardaan
Aur Apne pyaare mitra Sudama ke ghar ko
Banaa diya sukh samriddhi kee khan.

Nibhaate huey Apne maanav roop ka dharam
Krishna ji ne rok liya Draupadi ka vastra-haran
Adi Shankaracharya ji ne Kanakdhaara stotra sunaaya
Aur ek nirdhan naari ka uddhaar karaaya.

Yamunotri aur Gangotri Dham ke kapaat
Khul jaate hain is avsar par
Banke Bihari ke mandir mein Prabhu ke charan
Dete Hain bhakton ko aaj ke din vigreha darshan.

Vivah ke liye shubh mahoorat hai yeh tyohaar
Vishnu Bhagwaan aaye is din lekar Parshuramji ka avatar
Is din ann, namak, kapadon, svarna, jau ka daan
Inke aur jal ke daan se hota hai bhakton ka kalyaan.

Deen dukhiya zarooratamand ka na karein uphaas
Is tyohaar ka hissa hai yeh sandesh khaas
Vaani aur vichaar mein laaein mithaas
Aur karte rahein sadhna ka abhyaas.

Kaha jaata hai ki is din sona chandi aadi khareedne se
Ghar mein hota hai sukh-samriddhi ka vaas
Iske sangg chod dein bann-na hum manovikaaron ke daas
Taaki apni oar se aur bhi badh jaaye atma-shuddhi ka prayaas.

Guruji ke bhakton ke liye Unhee mein baste Hain saare Bhagwaan
Guruji kahein ki karein hum gupt paath, gupt sewa, aur gupt daan
Guruji chaahein Unka bhakt banda baney aur aish karey
Sachchaayee ke raaste par chalne se kabhi bhi na darey.

Kewal tann ko nahin, balki antarmann ko shuddhi ke swarna se sajaayein
Dhan ke saath daya aur anukampa ka daan badhaayein
Kshamasheelta ko sachche dil se nibhaayein
Aur oordhvagati ke path par badhte jaayein.

Jis sadachari kee shiksha aur sandesh deta hai Akshay Tritiya ka tyohaar
Hum uska anusaran karein toh khush hongei humse paalanhaar
Guruji kee nazar se koi bhi apne kiye se bach paaye, kisee mein bhi veh dumm nahin
Aur Guruji humse khush hon, toh phir kisee baat ka bhi gumm nahin.

Akshay Tritiya laata hai yug badalne ka sandesh
Kyun na hum apne bheetar karein satyug mein pravesh
Bheetar ke parivartan se hee sudharega baahari spandan
Hum sahi mainey mein bande banenge toh hee safal hoga hamaara vandan.

Sabhi ke liye shubh ho Akshay Tritiya ka tyohaar
Saari sangat ko shubhkaamnaayein aur dhed saara pyaar
Guruji ke ashirwaad se tarr jaaye saara sansaar
Akshay sukh se sampann rahe sabka ghar parivaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 2, 2022

Om Namaha Shivaya
Aaj Ka Suvichaar 🙏🏻🙏🏻 # 1534

                      Yeh Rishta

Yeh rishta jo hai Guruji aur tera
Ye hai tere jeevan ka sanatan savera
Yeh rishta hai sthaayi, anant, akhand
Ye tujhe pahunchaayega sachkhand.

Yeh rishta sabse uttam hai
Nibhaata chal tu isey pyaar se
Guruji ke aur bhi kareeb ho ja
Na darr tu sansaar se.

Yeh rishta hai mata pita aur santaan ka
Yeh rishta hai bhai bandhu ke pyaar ka
Yeh rishta hai murshid aur shishya ka
Yeh rishta hai paigaam tere ujjwal bhavishya ka.

Koi rishta nahin hai is se zyada anmol
Is rishte ko duniyavi tareekon se na tol
Is rishte mein nibhaani hai jo toone wafa
Toh apna har farz neki se kar tu adaa.

Is rishte kee doar Guruji ne hai thaami
Unpar apne atoot vishwaas mein na aane dena khaami
Satark reh apni bhakti mein, na kar koi bhi naadaani
Aur Guruji mein mastt rehkar honei de apni ruh ko deewani.

Jitna aagey badhega tu is rishte mein
Badhengi chunautiyan aur kathinaayiyaan
Jitna bheetar tu jaayega apne
Utnee bhaane lagengi tujhe tanhaaiyyaan.

Kyunki pooja mein tu baat karega Guruji se
Aur dhyan ke samay tu Unhe sunn paayega
Unke har hukm ka paalan kar tu rishte ko nibhaana
Dekhna, tu nishchay hee tarr jaayega.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 1, 2022

Om Namaha Shivaya
Aaj Ka Suvichaar 🙏🏻🙏🏻 # 1533

                   Abb Kee Baar

Na sirf saans le kar zindagi se naata jod
Balki apne zinda honei kee nishaani chod
Is duniya ko behtar banaane mein de apna yogdaan
Taaki tujhe tasalli ho ki teri zindagi aayi kisee kaam.

Har din tu bann pehle se behtar insaan
Koshish kar ki badhta jaaye tera adhyaatmik gyan
Simran aur dhyan ka badhaata chal prayaas
Badhaata chal dil mein Guruji ko paane kee aas.

Guruji ko arzi sunaane ke liye keh se tu apni jindri deewani se
Kyunki Unhe paana mumkin ho sakta hai Unhee kee meharbaani se
Isliye Shukrana ke sangg karta chal ardaas
Ve Apne naam ke amrit se bujhaayenge teri atma kee pyaas.

Jab tu jaayega vahaan
Sab kuch dharaa reh jaayega yahaan
Tere karma hee banenge teri dastaan
Guruji ke pyaar mein samay guzaar le tu yahaan

Unhe Apne chitt mein tu aise kar viraajmaan
Ki har pal mehsoos ho tujhe Unka sahaara
Zindagi aayi hai bannkar imtehaan
Koshish kar ki aisa imtehaan na aaye dobaara.

Kyunki jabb takk hongei aise imtehaan baar baar
Tabb takk kisee na kisee yooni mein bhogna hoga sansaar
Isliye kuch is tareh se jee le tu abb kee baar
Ki tujhe apne mein samaa le mukti kee jyotirmay bahaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 30, 2022

Om Namaha Shivaya
Aaj Ka Suvichaar 🙏🏻🙏🏻 # 1532

         Na Koi Dard Ho…..

Na koi dard ho, na ho koi laukik dukh
Aisa toh ho nahin sakta ki har pal ho laukik sukh
Yaheen par tere karma hain katne
Isliye na padd tu duvidha ke jhanjhat mein.

Tu nibhaata chal apna farz
Taaki adaa hota rahe tere karmon ka karz
Guruji teri madad kar rahe Hain poori
Tu bhi toh apni madad kar le thodi.

Guruji bade dayalu Hain
Guruji bade kripalu Hain
Beshak kayi baar lenge tera imtehaan
Lekin har baar karenge tera kalyaan.

Unhonei Apni sharan mein tujhe liya hai
Taaki Ve karein tera uddhaar
Ve karte Hain tujhse behad pyaar
Isliye tu himmat matt jaana haar.

Tu buss Shukrana kiya kar
Ve denge tujhe nirbhayta ka var
Unke haath mein hai doar tere jeevan kee
Tujhe bilkul bhi kamee nahin hai suraksha ke dhan kee.

Isee dhan se tu hoga is tareh se dhanwaan
Ki laukik sukh dukh bhi ho jaayenge sab ek samaan
Har pal tu karega Guruji ka chintan
Har pal divyata mein khoya rahega tera mann.

Bin kuch kahey kisee aur se
Tu Guruji ko sabb kuch bol
Tu maane ya na maane, tu jaane ya na jaane
Guruji kee nazar mein tere bhaav ka hai mol.

Tu rakhta chal saral aur shuddh bhaav
Ve bharte chalenge tera har ghaav
Tu buss jeeta chal Unke naam ke sahaare
Ve Apne pyaar aur dulaar se pahunchaayenge teri naiya ko kinaare.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 29, 2022

Om Namaha Shivaya
Aaj Ka Suvichaar 🙏🏻🙏🏻 # 1531

   Jeevan Kee Sarita

Behti hai sarita pahaadon ke beech se
Na sharmaati hai oonch neech se
Himmat aur dheeraj dhar kar rehti hai veh mastt
Saagar ko dhoondhne mein rehti hai veh vyast.

Kuch pahaad chhote, kuch vishal
Lekin sarita ka nahin badalta khayaal
Uska behna nahin rukta hai
Uska utsah nahin jhukta hai.

Agar aa bhi jaaye koi aandhi ya tufaan
Aur mayyla ho jaaye sarita ka neer
Behte behte veh patharon se takraaye
Aur isee se veh dobaara swachh ho jaaye.

Jeevan kee sarita bhi isee tareh se behti hai
Jeevan jeete jeete sukh aur dukh sehti hai
Mal rahit hokar shuddh hona hai uskee daud ka chhor
Taaki veh dekh paaye mukti kee bhor.

Uss uddeshya takk pahunchne ke liye hee
Guruji ne liya hamein Apni sharan mein
Taaki hum shraddha bhaav se karein aradhana
Aur yeh jeevan hee bann jaaye sadhna.

Jeevan kee sarita ka moksh ke saagar takk pahunchna hai zaroori
Guruji ke ashirwaad se awashya tayy hogi yeh beech kee duuri
Lekin apna dharma toh hoga nibhaana
Varna baar baar padega yahaan aana.

Isliye na honei dein atma ko ghaayal ya kalankit
Har haalaat se guzarte huey shant rakhein chitt
Utsaah rakhein barkaraar
Bin aasakti karein pyaar.

Guruji ka simran deta rahega ye sab kar paane kee kaabiliyat
Apni oar se prayatna karte rehna hoga rakhkar sahi neeyat
Guruji toh bhakton kee har zaroorat ka rakhte Hain khayaal
Unka ashish sada rahega hamaari suraksha kee dhaal.

Yoon hee guzarte huey zindagi kee khushi aur gumm kee raahon se
Bin katraaye, bin ghabraahat kee aahon se
Hota rahe ruhaaniyat se nirantar deedar
Aur Guruji kee mehar se hum pahunchein uss paar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 28, 2022

Om Namaha Shivaya
Aaj Ka Suvichaar 🙏🏻🙏🏻 # 1530

            Shukrana Karte Rehna

Shukrana nahin hai sirf ek alfaaz
Shukrana hai sukhi rehne ka raaz
Kyunki Shukrana bakhshta hai veh santosh
Jis se sukh ka anubhav hota hai har pal har roaz.

Shukrana hai veh avastha, veh sthiti
Jo hai lobh se bachne kee vidhi
Aur lobh se bachna hai zaroori
Taaki na ho panj choron ke samaksh majboori.

Kaam, krodh, lobh, moh, ahankar
Shukrana bachaata hai inse baar baar
Aur jis irshya ko janam dete hain ye vikaar
Shukrana nahin karne deta uss irshya ko bhakt par vaar.

Shukrana se miltee hai mann ko shanti
Shukrana ka spandan laata hai astitva par kanti
Shukrana Guruji ko karta hai prassann
Shukrana bhakt ko banaata hai sampann.

Shukrana aur khushi ek dooje par hain nirbhar
Isliye Shukrana deta hai khush rehne ka avsar
Aur Shukrana ka vishwaas ke saath hai aisa sundar naata
Ki dono mein se ek doosre ko hai badhaata.

Shukrana sakaraatmakta se aagey badhne kee prerna hai
Shukrana shuddhi par chalne kee chetna hai
Shukrana karte rehna, yeh rakhna yaad
Shukrana mein basaa hai Guruji ka ashirwaad.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 27, 2022

Om Namaha Shivaya
Aaj Ka Suvichaar 🙏🏻🙏🏻 # 1529

          Waqt Leta Hai Pareeksha

Waqt leta hai pareeksha
Isliye bahut aawashyak hai Guruji ke naam kee deeksha
Kyunki waqt kee haan mein haan milaana kaise kiya jaaye sahi andaaz se
Guruji hee waaqif kara sakte Hain is ruhaani raaz se.

Unka simran deta hai atma-shakti
Jo hai sehensheelta kee yukti
Ho jaati hai na badalne wale haalaat kee sweekriti
Aur badal sakne wale haalaat ko badalne ke liye janam leti hai jaagriti.

Guruji ke naam mein pyaar hai aparampaar
Guruji ke naam se Unpar vishwaas badhta hai baarambaar
Guruji ka naam laata hai ruhaani bahaar
Guruji ke naam se roag se mukt ho sakta hai jann beemaar.

Guruji ka naam hai shanti ka paigaam
Guruji ke naam se ho paata hai dhyan
Guruji ke naam se mit jaata hai chitt ka andhera
Guruji ke naam se dikh paata hai ujjwal savera.

Waqt kee dee hui pareeksha mein safalta dega Guruji ka naam
Safar mein yeh naam pahunchaayega sachkhand ke dham
Guruji ne Apna naam dekar kiya hai hamaare poorna kalyaan ka intazaam
Guruji ka naam lete lete Unke naam mein ho jaayein hum gumnaam
Na rahega koi wajood, ho jaayega poorna yog
Kuch virlon ko hee milta hai ye shubh sanjog.

Jo hai andhkaar aur prakash aur shabd ke bhi paar
Guruji ka naam dikha sakta hai veh divya sansaar
Guruji ka naam karta hai har japne wale ka uddhaar
Guruji ka naam yakeenan deta hai taar
Guruji ke naam mein hai Brahmand ka saar aur vistaar
Guruji ka naam hai santushti aur mukti ka dwaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 26, 2022

Om Namaha Shivaya
Aaj Ka Suvichaar 🙏🏻🙏🏻 # 1528

  Tere Aaspaas Hai Niswaarth Pyaar

Kalyuga mein bhi tere aaspaas hai niswaarth pyaar
Tu kyun usey thukraa kar ho raha hai mann se beemaar
Tann ka roag toh phir bhi jaayega mit
Lekin maansik beemaari ghaayal kar sakti hai tera chitt.

Abb irshya mein aur na jal, varna kaise hoga tera mann sheetal
Pyaar ke baare mein soch har pal, taaki tu hota jaaye komal
Kyun chaalaaki aur ahankar se sabko vash mein karne chalaa hai, is se tu na ho paayega taral
Abb atma par aur daag na lagaa, balki usey paak kar ke tu ho jaa nirmal.

Trishna chhootegi toh hee milegi tripti
Isliye lobh chod kar paa le santushti
Bandhan chhootega toh hee tu paayega mukti
Isliye vehem kee kayyd se nikal kar tu kar bhakti.

Chor ghar se bhagaayega toh tu paayega suraksha
Isliye panch choron se peechha chhuda kar tu kar apni raksha
Tujhe har janam mein Guruji ne simran hai bakhsha
Isliye tu simran ke nirantar prayaas se nikhaar le apne jeevan ka naksha.

Jab takk jhooth, chori, hinsa ka aayega tere mann mein vichaar
Ya phir teri soch ya karma mein hoga nasha ya vyabhichaar
Na ho paayega jitna hona chahiye tera uddhaar
Isliye tyaag de tu ye paap aur tyaag de har vikaar.

Har roz nireekshan kar tu swayam ka
Na chod iraada aur prayaas parishram ka
Parishram, khud ko sudhaarne ka
Parishram, atma ko sanvaarne ka.

Bhautik bhaag daud mein kho na jaana kaheen
Varna ek din shaayad paaon rakhne kee izaazat bhi na de ye zameen
Aadar kar tu zameen aur aasmaan ka
Kyunki ye agni, jal, aur vayu ke jaise roop hain Bhagwaan ka.

Na bhool kisee bhi pal tu karna Guruji ka Shukrana
Yaad rakh, ki ruhaaniyat hai atma ke liye khazaana
Atma-sanyam aur atma-bal badhaane mein kamzor matt bann jaana
Chaahe tujhe bhatkaane kee lakh koshish kar le ye zamaana.

Lagaa le gale se pyaar ko, aur har oar baant tu pyaar
Tu de apna yogdaan de taaki nirogi ho yeh sansaar
Tere shuddh spandan se kisee ek ke jeevan mein bhi ho jaaye sudhaar
Toh tujhse atyant prassann hongei tere Guru, tere parwardigaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja