Author: dhirjabhat

April 15, 2022

Om Namaha Shivaya
Aaj Ka Suvichaar 🙏🏻🙏🏻 # 1517

     Zindagi Ke Is Safar Ko Salaam

Zindagi ke is safar ko salaam
Jismein hum japp paa rahein hain Guruji ka naam
Na jaane kal is safar ka kya hoga anjaam
Lekin apni oar se koshish karna hai hamaara kaam.

Koshish, ki kabhi na bhoolein Guruji ka naam
Kyunki Unke naam mein hai hamaare mangal ka paigaam
Isliye chitt mein samaaye Unka naam subah shaam
Is naam ko japne se awashya pahunchenge hum sachkhand ke dham.

Guru naam ko japne kee koshish ho nek
Taaki chaahe aayein is safar mein chunautiyan anek
Banee rahe hamaari shraddha aur saboori
Aur ek pal ke liye bhi na ho Guruji se doori.

Zindagi ka safar hee hai manzil takk pahunchne ka raasta
Is safar mein sajaaye rakhein mann mein aastha
Is safar mein Guruji ke naam ka pehne rahein hum sehra
Kyunki kuch bhi aur nahin hai is se sundar aur sunehra
Safar ke har kadam par saath hoga is sehre ka pehra
Is pehre ka mahatva hai bahut gehra.

Kyunki ye pehra bachaayega hamein anginat kashton se
Ye pehra bachaayega agyan se
Ye pehra atma aur Paramatama ke milan kee dega prerna
Ye pehra kavach banega har tufaan mein.

Hum karte hain jis safar ko salaam
Veh safar karega Guru naam ko pranaam
Safar ka har mukaam jo hoga naam ka gulam
Toh kalyanakari hee hoga safar ka parinaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 14, 2022

Om Namaha Shivaya
Aaj Ka Suvichaar 🙏🏻🙏🏻 # 1516

                 Is Rishte Kee Jyot

Poojya Guruji, mere janam janam ke saathi
Aapki mahima ke jo bhi geet mai gaati
Aapki mehar se mai har alfaaz ko yoon mehsoos kar paati
Jaise kayee janmon se is rishte kee jyot hai jagmagaati.

Aapse judne ke baad
Jeevan ka naya arth ho gaya
Ya phir mai yoon kahoon
Ki mera naya janam ho gaya.

Aapke sangg jud gaya jeevan ke geet ka saar
Aapki mehar se har sukh dukh hua sweekaar
Aapke ashirwaad se hee Aapka naam le sakti hoon baar baar
Aapke bharose beet jaayenge jeevan ke ye din do chaar.

Aapne hee diya yeh jeevan
Aapne dee bharose kee daat
Aapne yoon jeet liya mera mann
Ki na chupana chaahoon Aapse koi bhi baat.

Yoon hee chalti rahoon Aapke aanchal mein rehkar surakshit
Jo bhi ho jaaye, Aap sada chaahenge mera hitt
Isee satya se santusht hai mera chitt
Aur har duvidha gayi hai mitt.

Is rishte kee jyot sada jalti rahe
Yeh yatra Aapki anukampa se falti rahe
Shukrana kee avastha mein rahoon sada
Har pal Aapka chintan karne kee aa jaaye ada.

Kabhi Apne se duur na honei dena, pyaare Parwardigaar
Hameshaan mehsoos karti rahoon Aapka aabhaar
Aapki kripa se laati rahoon khud mein sudhaar
Har janam mein mai Aapke charnon mein rahoon, mere sarkar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 13, 2022

Om Namaha Shivaya
Aaj Ka Suvichaar 🙏🏻🙏🏻 # 1515

        Aaya Baisakhi Ka Tyohaar

Aaya Baisakhi ka tyohaar
Sabko shubhkaamnaayein beshumaar
Sarbansdaani Guru Gobind Singh ji kee qurbani banee hai yaadgaar
Unke jeevan se prerna lekar hum bhi lein apna jeevan sudhaar.

Dashmesh pita ‘Kalgidhar’ wale
Jinhonei sangat ke kaaj sanvaare
Veerta ke Ve Hain prateek
Jalaaye chetna ke deep.

Adviteeya maane jaate Hain Ve balidaani paramparaa mein
Koi virla hee hota hai Unke jaisa pratibhavaan is vasundhara mein
Lekhak bhi thei, thei anek bhaashaaon ke gyani
Neeven thei, saahasi thei, aur thei Ve swaabhimaani.

1699 mein Shri Guru Gobind Singh ne sangat ke liye imtehaan
Jo sheesh bhent karne ke liye tayyaar huey, unhe diya Panj Pyaaron ka naam
Sikhon ke in dusvein Guru ne tabb Khalsa panth ko kiya shuru
Aur mahasamadhi lene se pehle Unhonei Guru Granth Sahib ji ko ghoshit kiya Guru.

Mughal sena ke saath ladey Ve anek yuddh
Gareebon ke prati Unke bhaav thei bahut shuddh
Maanav jaati ke liye Unhonei apna poora parivaar vaara
Isliye hee toh sabne Unhe ‘sarbansdaani’ naam se pukaara.

Sada diya sandesh bhaaichaare aur pyaar ka
Nishchay hee roop thei Ve nirankaar ka
1708 mein Guru Gobind Singh ji huey divya jyot mein vileen
Lekin Unke prati sangat ka bhakti bhaav kabhi na hua ksheen.

Aayiye karein is nav varsh ka abhinandan
Karte rahein apne Guruon ka vandan
Dua karein ki changi ho kheton mein fasal
Aur changey hon hamaare karam, taaki achche hon phal.

Sansaar ke mangal kee karein kaamna
Har chunauti ka karein saahas aur sachchaayee se saamna
Guruji sada Hain hum sabke sangg
Chadhne dein hum swayam par Unka rangg.

Mann ke paatra ko shuddh karein amrit roopi Gurbani se
Seekhein neki se jeena Guruon kee zindagaani se
Guruji bakhshein hamein hamaari galatiyon ke liye
Guruji kalyaan karein aur jalaaye rakhein mehar ke diye.

Guruji se hum jude rahein
Saadh sangat ke sangg rahein
Gupt sewa, paath, aur daan karein
Sachchaayee se kabhi na darein.

Baisakhi ke tyohaar par kar lein swayam se vaada
Ki insaaniyat ka dharam nibhaayenge pehle se bhi zyada
Sadaa rahein Guruji ke shukraguzaar
Unkee kripa se hee manaa paate hain hum har tyohaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 12, 2022

Om Namaha Shivaya
Aaj Ka Suvichaar 🙏🏻🙏🏻 # 1514

    Fakeer Ka Safar

Wafa ne kee bewafaai
Bewafaai ne nibhaayee apni haisiyat kee wafa
Parchhaayee ke alaawa kuch bhi na raha
Andhere mein parchhaayee ne bhi saath chod diya.

Chhaa gaya sannaata, kuch nahin aa raha thaa nazar
Maalum na chal raha thaa kahaan le jaayegi dagar
Uss chuppi ka thaa ek adbhut andaaz
Lekin fakeer samajh na paa raha tha yeh raaz.

Phir usee andhere mein ek jyot dikhee
Mann mein ummeed kee tarang uthi
Fakeer ke kadam le chale usey jyot ke paas
Ya kahoon ki jyot ne kheench liya usey apne paas.

Jyot mein aisa anokha thaa spandan
Ki fakeer karne lagaa vahaan vandan
Usey mehsoos hui apne paas ek shakti
Lagaa usey ki anugrihit hui uskee bhakti.

Aankhein moond kar khada raha
Prem bhaav mein uska aansoon baha
Kisee ne haath rakha fakeer ke sir par
Usey lagaa ki usey mila santosh ka var.

Aankhein kholi fakeer ne hokar hairaan
Dikhey apne saamne usey Guruji meharbaan
Chehre par noor, Unke hothon par mandd muskaan
Roop itna khoobsoorat, aur niraali thi Unkee shan.

Fakeer ne Guruji ke charnon mein kiya naman
Guruji ne diya usey charan sewa ka mauka
Fakeer kee hairaani kee seema na rahi
Jabb kuch der ke baad Guruji ne usey roka.

Kyunki jaise hee Guruji ne usey rukne ka diya aadesh
Fakeer ko lagaa jaise geele thei uske haath
Ruhaani khushboo thi uss geelepann mein
Fakeer sochne lagaa mann hee mann mein.

Chua usne Guruji ke charnon ko
Toh usey mehsoos hua vahee geelapann
Vahee khushboo phir se aayi fakeer ko
Usey lagaa ye sab thaa uska deewanapan.

Usne chakhaa usey Guruji ke kehne par
Uskee toh nayn aaye bhar
Samajh aaya usey ki veh geelapann darasal thaa amrit
Aur bhaav-vibhor ho gaya uska chitt.

Amrit ke paawan sparsh se aisa kuch honei lagaa
Ki veh ek hee saath hansne aur ronei lagaa
Guruji toh jaante thei uskee shraddha ke bhaav ko
Unhonei Apne prem ke marham se bhar diya uske mann ke ghaav ko.

Guruji ne fakeer ke kandhe par rakha Apna haath
Kaha Unhonei fakeer se ki Ve har pal rahenge uske saath
Dekhte dekhte Guruji ho gaye antardhaan
Aur fakeer ka gaya divya jyot par dhyan.

Jyot hui sooraj se bhi adhik ujjwal
Aur saaf nazar aane lagi dagar
Jaan kar ki Guruji Hain uske humsafar
Fakeer ka safar toh ho gaya safal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 11, 2022

Om Namaha Shivaya
Aaj Ka Suvichaar 🙏🏻🙏🏻 # 1513

                    Tu Kar Simran

Duur se aayi kisee kee awaaz
Ki zindagi aa nahin rahi raas
Guruji ne kaha, tu kar simran
Taaki tript ho jaaye tera mann.

Ek oar sunaayi diya kolahal
Kyunki mann mein thi halchal
Guruji ne kaha, tu kar simran
Shant ho jaayega tera mann.

Dooji oar se aayi yeh pukaar
Ki dukhi kar raha hai yeh sansaar
Guruji ne kaha, tu kar simran
Sukhi ho jaayega tera mann.

Phir kisee ne kee ardaas
Madad karo, mai hoon bahut udaas
Guruji ne kaha, tu kar simran
Prassann ho jaayega tera mann.

Ek bhakt ne zaahir kee abhilasha
Ki kripa kar mita do meri niraasha
Guruji ne kaha, tu kar simran
Ashavaan ho jaayega tera mann.

Ek shishya ne vyakt kiya santaap
Kaha ki mainey kiye hain bahut se paap
Guruji ne kaha, tu kar simran
Pashchaataap aur praayashchit karega tera mann.

Ek roagi ne kaha mujhe hona hai tann mann se niroag
Mujhe seekhna hai yog
Guruji ne kaha, tu kar simran
Yog kee oar jaayega tera mann.

Ek chele ne kaha mujhe ban-na hai maanav
Abb takk mai aise jeeya jaise hoon daanav
Guruji ne kaha, tu kar simran
Tujhe banda banaayega tera mann.

Ek anuyaayi aaya Guruji ke paas
Kaha usne ki usey karna hai nek bhog vilaas
Guruji ne kaha, tu kar simran
Aish karaayega tujhe tera mann.

Ek sewak ko hui chinta ki ho na jaaye usey ahankaar
Kaha usne ki mujhe neevan rakhna mere sarkar
Guruji ne kaha, tu kar simran
Neevanpann sikhaata rahega tujhe tera mann.

Ek shraddhaalu aaya Guruji ke dar par
Dhoondhte huey bakhshe jaane ka avsar
Guruji ne kaha, tu kar simran
Maafi milne ke yogya ho jaayega tera mann.

Ek tapasvi aaya lekar apne jazbaat
Kaha usne ki mai karna chaahta hoon dhanyawaad
Guruji ne kaha, tu kar simran
Shukrana se sajta jaayega tera mann.

Ek sangat aayi Guruji ke kareeb
Kaha usne ki rakhiye mujhe sada Apne kareeb
Guruji ne kaha, tu kar simran
Mujhse juda rahega tera mann.

Guruji ne diya hai simran ka anmol upaay
Yeh upaay hai har paristhiti mein sahaay
Simran karte karte dhyan lagne lagg jaaye
Ekaagrataa ho aur chetna jagg jaaye.

Rahein hum Guruji ke shukraguzaar
Ki hamein dee Unhonei daat simran kee
Unkee mehar se karte rahein simran
Hum hain kinkar, simran hai divya dhan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 10, 2022

Om Namaha Shivaya
Aaj Ka Suvichaar 🙏🏻🙏🏻 # 1512

           Ram Navami Ka Tyohaar

Tretayuga kee hai yeh baat
Lekin ye sada judi rahegi hamaari Sanskriti ke saath
Vasant ritu ke Chaitra maas mein
Liya janam Prabhu Ram ne
Hain Ve strot maryada kee prerna ke
Hain Ve mahasaagar daya, neevenpann, aur samvedana ke
Maane jaate Hain Ve purushon mein sarvottam
Isliye Unhe kaha jaata hai Maryada Purshottam.

Chaitra maas mein milee praja ko saugat
Ayodhya kee nagri bann gayi divya dham
Putreshti yagya ke kuch maheenon baad
Janmi Maa Kaushalya aur Raja Dashrath kee santaan.

Ram Navami kehlaata hai yeh paawan tyohaar
Manaayi jaati hai duraachaari kee haar
Vishnu Bhagwaan aaye Prabhu Ram ka lekar avatar
Dharma kee adharma par hui vijay, hui Prabhu Ram kee jaijaikar
Unke udaaharan se seekhe saara sansaar
Ki kitna zaroori hai soch aur karma mein sadachaar.

Raavan aur Lanka se judi kahaani
Anginat janon ne hai jaani
Prabhu Ram ka gungaan hai kalyankaari
Unka ashirwaad hai hitkaari
Kalyaan samaaye Prabhu Ram ke naam mein
Baste Hain Ram Apne sabhi bhakton ke praan mein.

Gyani sakaraatmak kritagya
Sadachari sahaayak aur dharmagya
Vidvaan saamarthyashali dridhpratigya
Jinka dheer shant kantimay hai vyaktitva
Jaagrook veer veeryavaan aur sundar
Prabhu Ram Hain karuna aur kripa ke samundar.

Guruji Hain hamaare shubhchintak karunanidhaan
Ve chaahein ki hum banein insaan
Tabhi toh safal hogi hamaare jeevan kee dastaan
Varna bhugatna padega chaurasi lakh yooniyan ka imtehaan.

Aayega baar baar Ram Navami ka paawan tyohaar
Yaad dilaane ki hum nirantar laate rahein apne charitra mein sudhaar
Koshish karenge toh dheere dheere sabhi sadgun kar paayenge atmasaat
Guruji madadgaar rahenge har pal, Ve kabhi na chodenge hamaara saath.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 9, 2022

Om Namaha Shivaya
Aaj Ka Suvichaar 🙏🏻🙏🏻 # 1511

 Ashtami Ka Tyohaar

Chaitra navratron ke aathvaan din par
Aaya Ashtami ka tyohaar manaane ka shubh avsar
Durga Mata banaati Hain bhakton ke bigde kaam
Unkee vishesh pooja ke din ka Ashtami hai naam.

Chanda Mundd Raktabeej Mahishasur
Mata ne kiya aise daanvon ka vinaash
Achchaayee kee buraayee par vijay hui
Isliye ye tyohaar hai khaas.

Maankar Maa Durga ka roop
Kanyaaon ko pooja jaata hai
Aur Ashtami aur navami ke beech
Sandhi Pooja ka samay aata hai.

Mahishasurmardini aur Mahagauri
Jis bhi roop mein dekhein ya jaanein
Ashtami ko Mata Rani ke bhakt
Bahut hee khaas tyohaar hain maanein.

Guru hon jis bhi bhakt ke jeevan mein
Uska jeevan Unke ashish se khil jaata hai
Guru ke roop mein bhai bandhu murshid bhi milte Hain
Aur mata pita ka prem bhi mil jaata hai.

Guruji ne sada dee hai maa kee mamta
Guruji ne bakhshi hai hamein uddhaar kee kshamta
Sneh ke sundar ashirwaad ke liye Guruji ko dhanyawaad
Guruji ne Apne maatritva se kiya hai hamaara jeevan aabaad.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 8, 2022

Om Namaha Shivaya
Aaj Ka Suvichaar 🙏🏻🙏🏻 # 1510

                       Har Din Naya

Har din naya
Har subah nayi
Laati hai sangg
Ummeedein aur anubhav kayi.

Kuch khwaab jo dekhe thei raat ko
Kuch upaay jo banaayenge bigdi baat ko
Kuch aise jann jo denge ahamiyat dooje ke saath ko
Kuch aise jo apanaayenge vishwaasghat ko.

Sabhi ke ravaiye ke bhin roop hain
Sabhi ke vichaaron ke bhinn hain rangg
Kayiyon ko jeevan kee kshanbhangurtaa yaad hai rehti
Aur lagta hai ki kayi ghoomte hain amaratva kee beema ke sangg.

Satya toh ye hai ki hona hee hai yahaan se ravaana
Kewal apna karma saath lekar hai jaana
Har koi hai yahaan banjaara
Dhoondh raha hai jeene ka sahaara.

Guruji kee sharan mein yakeenan hai aisa sahaara
Khushakismat hai har veh jann jisey Guruji ne hai sweekaara
Kyunki yahaan har uljhan kee hoti hai suljhan
Aur samarpan se mil paata hai befikri ka dhan.

Guruji apnaa lete Hain har mushkil hamaari
Aur saath mein dete Hain Apne naam kee khumari
Jis mein aalasya ke bajaaye hota hai ek aisa utsaah
Jo aagey badhaata hai chaahe kitnee bhi kathin ho raah.

Khwaab mein katvaa kar karam kayi
Guruji aksar likhte Hain kismat nayi
Yeh toh Unka ek hee tareeka hai
Kyunki Unka toh ruhaani saleeqa hai.

Kathin anubhav ka saamna karne kee
Guruji dete Hain himmat
Mayoosi ko muskuraahat mein badalne kee
Guruji aksar karte Hain inaayat.

Kyunki ummeed kee lau aur aagey badhne ka utsaah
Inse poori hoti hai har kalyaankaari chaah
Aur apni chaahat se kaheen zyada mahatva hai
Sarvgyani Guruji kee marzi ka
Isliye dheere dheere chhota honei lagta hai
Panna ichcha soochi aur arzi ka.

Isliye har nayi subah aur naya din
Na shuru karein Guruji ko Shukrana kahe bin
Guruji ke ashirwaad hum kabhi nahin sakte hain gin
Unse hee har janam mein jeevan hai, Unse hee jeevan ka har naya din.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 7, 2022

Om Namaha Shivaya
Aaj Ka Suvichaar 🙏🏻🙏🏻 # 1509

                Jeevan Ka Har Pal

Jeevan ka har pal
Samaa raha hai aane wale pal mein
Vaise hee tere karam
Badal rahe hain phal mein.

Phal, har karam ka
Chaahe tu jaane ya na jaane
Bhugatna toh hoga hee
Chaahe tu maane ya na maane.

Isliye tu bo le beej bhakti ka
Aur seench usey shaddha ke jal se
Taaki tujhe ghabraahat na ho
Kabhi bhi aane wale pal se.

Guruji kewal tera bhola bhaav chaahein
Satya kee meethi dhoop se sajaa tu apni raahein
Unkee razaa mein raazi hokar chal
Jabb takk saanson ka sooraj na jaaye dhal.

Guruji par vishwaas karta chal, Ve Hain sangat ke taaranhaar
Teri nek neeyat aur satkarma pahunchaayenge tujhe uss paar
Jahaan jhoomti hai sachkhand kee suhaani bahaar
Jahaan sooraj bhi Guruji ke charnon mein sees jhukaata hai baarambaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 6, 2022

Om Namaha Shivaya
Aaj Ka Suvichaar 🙏🏻🙏🏻 # 1508

    Aye Mann Pyaare

Aye mann pyaare, tere jeevan mein jabb hua Guruji ka aagaman
Thaa veh tere liye sabse sundar kshan
Guruji kee mehar ke bina na hota tujhe Unkee oar aakarshan
Na aane de tu is rishte mein kisee bhi kaaran vash koi bhi vikarshan.

Aye mann pyaare, kar Guruji ko nivedan
Ki Ve rok dein tera asaar bhraman
Taaki sudhar jaaye tera jeevan
Taaki tu sthir ho jaaye jaise hota hai gagan.

Aye mann pyaare, kar Guruji ka vandan
Vintee kar Unse ki Ve bakhshte rahein tujhe simran
Taaki tu khud par paaye sanyam
Aur nikharta jaaye tera spandan.

Aye mann pyaare, tujhe milee hai Guruji kee sharan
Nahin hai is se zyada anmol koi bhi dhan
Banaa tu swayam ko Shukrana ke phoolon ka upvan
In phoolon ko khushboo dega Guruji ke pyaar ka chandan.

Aye mann pyaare, kabhi na honei dena Guruji ke prati apne vishwaas ka khandan
Sukhi rehna hai toh kar de tu Unhe sarv-samarpan
Ve taarenge tujhe aise ki chamak jaayega tera darpan
Tu Unhe shraddha bhaav ke suman har pal kar arpan.

Aye mann pyaare, tera sir jhuka hai vahaan, jahaan Hain Guruji ke charan
Guruji ka dar hai kasht haran aur mangal karan
Tu jee le aise, ki Guruji rahein sada tujhse prassann
Unkee mehar se safal hoga tera janam aur maran.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja