Author: dhirjabhat

April 5, 2022

Om Namaha Shivaya
Aaj Ka Suvichaar 🙏🏻🙏🏻 # 1507

Unkee Marzi Ko Apni Manzil Banaayein

Milee hai saubhagya se Guruji kee sharan
Sudhaar lein hum apni soch aur apne karam
Ek Ve hee jaanein kabb takk yahaan hain hum
Jabb takk hain yahaan, tabb takk aate rahenge khushi aur gumm.

Hamaara har shwaas pramaan hai Guruji kee inaayat ka
Isliye sanskaar rakhte chalein ibadat ka
Dharma hamaara ho insaaniyat ka
Raasta ho ruhaaniyat ka.

Na qurbaan karna hai ghar parivaar
Na tyaagna hai sansaar
Na chodna hai koi tyohaar
Na jaana hai abhi uss paar.

Na koi dharma sampradaay
Na koi tonei totke ka upaay
Karna hai apne saath nyaay
Na banaani hai kisee ke baare mein raay.

Ruhaani hogi dagariya
Tabb hee badalega nazariya
Jaise jaise badalega drishtikoan
Honei lagaa swayam mein parivartan.

Kyunki doosaron kee matt ko badalne ka khayaal
Yeh toh apne mein hee hai ek maya ka jaal
Lekin agar hum apni soch rakhenge ruhaani
Toh hamein jeene mein hogi aasaani.

Jo badal nahin sakte, uss se vyakul honei ka nahin koi fayda
Kuch aisa hai ruhaani bhaasha ka kaayda
Fayda nahin, lekin zaroor ho sakta hai nuksaan
Isliye kyun apni atma ko karein pareshaan.

Swayam mein laayein sakaraatmak parivartan
Aur sabhi ko dua dekar shubh karte rahein jagat ka spandan
Sabka safar anokha aur bhinn hai
Lekin phir bhi safar mein hain hum saath saath
Hamaari koshish se sadbhaav kee sugandh ko honei dein
Har sehchar mein atmasaat.

Isliye ruhaani raaste par chalte jaayein
Divyataa ke har niyam ka karte huey aadar
Guruji kehte Hain banda bann-ne ko
Guruji ka hukm sada rahe sir aankhon par.

Guruji kee mehar se chod kar andhvishwaas aur vehem ko
Tyaag sakein hum is raaste par paap aur ahem ko
Guruji kee chaahat anusaar atma-bal badhaayein
Unkee marzi ko apni manzil banaayein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 4, 2022

Om Namaha Shivaya
Aaj Ka Suvichaar 🙏🏻🙏🏻 # 1506

Guruji Se Duuri Na Ho

Muskuraa lo
Zindagi ka mazaa lo
Lekin sahi tareeka apnaa lo
Taaki Guruji se duuri na ho.

Agar samasyaayein hain jeevan mein toh socho
Ki is se burey bhi ho sakte thei haalaat
Aur agar sab nirvighn hai
Toh veh bhi hai Oopar wale kee dee hui daat.

Guruji toh swayam chaahte Hain
Ki Unkee sangat aish karey
Unhonei toh sabki jholi mein
Apne ashish ke uphaar Hain bharey.

Zidd karoge toh Guruji poori karenge maang tumhaari
Lekin zaroori nahin ki veh ho tumhaare liye kalyaankaari
Tumhe kya milna chahiye, Guruji par chod do veh silsila
Dekhna, tumhaare hee paksh mein hoga antt mein faisla.

Jo Ve dete Hain Apni ichcha se
Sarvottam hotey Hain ve uphaar
Kyunki unmein Guruji ne piroya hota hai
Apni vadiyaayee ke sangg Apna pyaar.

Uphaar sewa aur simran ka
Jis se uddhaar hota hai antarmann ka
Uphaar sangat aur satsang ka
Jismein Indradhanush hota hai ruhaani rangg ka.

Uphaar Shukrana ke ehsaas ka
Jis se kumm hota hai jvar bhautik aas ka
Uphaar samarpan kee kshamtaa ka
Aur dhyan aur mann kee samta ka.

In sabke saath saath Guruji dete Hain jeevan daan
Karaate Hain tumhaare karmon ka bhugtaan
In sab ke saamne kuch bhi nahin hain bhautik uphaar
Kyunki ye sab ruhaani uphaar hee sakte hain tumhe taar.

Isliye sewa, simran, satsang ko naman kar ke karo sweekaar
Shukrana aur samarpan se sajaao apna sansaar
Inhee se sudharenge tumhaare vichaar aur mitenge vikaar
Aur Guruji tumhaare prayaas se khush hongei baar baar.

Guruji se na hogi phir kabhi duuri
Aur yahee hai baat sabse zaroori
Kyunki Ve tumhaara har janam sanvaarenge
Aur Apni abha mein tumhe samaakar Ve taarenge.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 3, 2022

Om Namaha Shivaya
Aaj Ka Suvichaar 🙏🏻🙏🏻 # 1505

       Hum Sab Hain Aapki Santaan

Pyaare Guruji,

Keejiye aisa ashirwaad pradaan
Ki hum bann paayein achche insaan
Neeven rahein, na karein abhimaan
Kintu akhandit rahe hamaara swabhimaan.

Na hon duniyavi maajron se pareshaan
Na aakarshit kar paaye hamein oopari shaan
Kisee vikaar ke prabhaav se na khoyein apna imaan
Aapke kahe anusaar karein hum gupt paath, sewa, aur daan.

Aapki mehar se kar paayein simran aur dhyan
Aur badhta jaaye hamaare dil mein Aapke prati sammaan
Deejiye aisee sumat ka daan
Ki paa lein hum bhautik gyan ke saath atma-chetna ka bhi gyan.

Satya nishtha se atmasaat karein yeh adhyaatmik gyan
Yaad rahe hamein ki is shareer ko ek din chod denge ye praan
Na bhoolein hum ki ho jaayega yeh shareer tabb bilkul bejaan
Na rahein is tathya se hum kabhi bhi anjaan.

Aapke har vachan ka rakh paayein hum maan
Apna divya prakash dikhaakar mitaa deejiye hamaara agyan
Deejiye aise vichaar aur vyavhaar ka vardaan
Ki is sansaar ko behtar banaane mein de paayein hum yogdaan.

Aap sada rehte Hain hum bhakton par meharbaan
Karte Hain Aap sabhi ka kalyaan
Kripa keejiye aisee, ki har pal mann mein basa rahe Aapka naam
Aap Hain naath, hum sab Hain Aapki santaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 2, 2022

Om Namaha Shivaya
Aaj Ka Suvichaar 🙏🏻🙏🏻 # 1504

         Guru Naam Mein Prem Hai

Guru naam mein prem hai
Guru naam mein bhaav
Guru naam se hai santosh
Guru naam se thehrav.

Guru naam mein lagan hai
Guru naam mein raahat
Guru naam se baat baney
Guru naam mein ibadat.

Guru naam mein simran hai
Guru naam se dhyan
Guru naam se saahas hai
Guru naam se gyan.

Guru naam mein suljhan hai
Guru naam se mushkil ka hal
Guru naam mein neevanpann
Guru naam se atma-bal.

Guru naam mein sehejta
Guru naam mein sabr
Guru naam se chinta duur
Guru naam se shukr.

Guru naam mein bhakti hai
Guru naam mein Bhagwant
Guru naam se jeevan shuru ho
Guru naam par hee ho iska antt.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 1, 2022

Om Namaha Shivaya
Aaj Ka Suvichaar 🙏🏻🙏🏻 # 1503

Aane Wale Kal Ko Behtareen Banaayein

Divya jyot se hee shuru hota hai is atma ka safar
Divya jyot par hee hota hai khatm
Lene hain sabne is beech mein kitne janm
Iska faisla karte hain hamaare karm.

Praarabdh karma hee kismat bann kar aate hain
Ve hee toh bhaagya kehlaate hain
Aur is jeevan ke jo karma sanchit ho jaate hain
Ve apna parinaam abhi nahin toh agley janmon mein dikhaate hain.

Guruji ne saari sangat ko uddhaar ka raasta dikhaaya hai
Simran, sewa, satsang se swayam mein sudhaar laana sikhaaya hai
Ve hastakshep hamaari swatantrata ichcha mein karte nahin
Ve dekhte Hain ki hamaari neeyat aur hamaara ravaiya uchit hai ya nahin.

Isliye toh apne bheetar jhaankna hai itna zaroori
Mann na bhi karey toh yeh karna hoga jaan kar isey majboori
Nirantar prayaas karenge toh dheere dheere awashya aayega sudhaar
Hum koshish karenge toh awashya madad karenge Parwardigaar.

Kyun na simran aur dhyan se mann mein samta laayein
Aur nishtha bhare bhaav se Guruji ko rijhaayein
Kyun na Guruji ke dikhaaye raaste par chalte jaayein
Aur aaj se hee apne aane wale kal ko behtareen banaayein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 31, 2022

Om Namaha Shivaya
Aaj Ka Suvichaar 🙏🏻🙏🏻 # 1502

Guruji Ke Charnon Ke Taley

Peheni jabb se Guruji ke naam kee mala
Toh nirarthak mankon kee mala mainey utaar dee
Guruji ne ek anokhe dhangg se
Meri toh zindagi sanvaar dee.

Mann karne lagaa jab se Guruji ka simran
Tabb se mann ne chod diya sanshay
Mann Guruji kee dhun mein rehne lagaa
Har samay hokar nirbhay.

Hua jabb se mujhe Guruji par vishwaas
Zarooraton aur chaahton ne chod diya karna pareshaan
Veh bhi Guruji ka diya hua hai jo abb takk hai mere paas
Aagey ka bhi Ve swayam hee karenge intazaam.

Jabb se miley Guruji kee sadh sangat aur satsang
Tabb se jeevan par chadha ek anokha rangg
Jahaan jaati hoon Guruji hotey Hain angg sangg
Unhee ke khayaalon mein rehti hoon hokar malang.

Jabb se koshish karne lagee har ghadi Shukrana kehne kee
Phursat hee nahin miltee mujhe udaas rehne kee
Unhonei aadat daal dee hai vilamb ko bhi sehne kee
Unke sahaare intazaar karti hoon waqt ke behne kee.

Jabb se jaana hai ki beshak mai chodoon Unka haath, magar Ve thaame rahenge mera haath
Tabb se mai kar paati hoon har uljhan mein bhi Unse baat
Meri zindagi mein chaahe ho sunehra din ya phir ho andheri raat
Mai akeli ya asurakshit nahin hoti kyunki Guruji hotey Hain mere saath.

Ye sabb honei lagaa hai jabb se
Mainey jaana aur maana ki Guruji roop Hain Rabb ke
Mai nishchint hokar Guruji mein kho gayi tabb se
Kyunki meri har chinta mit gayi Guruji ke charnon ke taley dabb ke.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 30, 2022

Om Namaha Shivaya
Aaj Ka Suvichaar 🙏🏻🙏🏻 # 1501

               Anupam Ashirwaad

Prem mila Guruji se itna
Ki mera aanchal padd gaya chhota
Karuna milee aisee
Ki kritagya hua yeh mann khota.

Is se pehle ki mai dard se ro paati
Guruji ne mere ghaav par mamta ka marham lagaaya
Is se pehle ki mai langadaati
Girte samay Guruji ne mujhe aakar uthaaya.

Aankhein numm huin jabb jabb
Guruji ne sambhaala tabb tabb
Mai na jaanoon ki himmat aayi kab
Lekin Ve jaanein sab, aakhir Ve Hain Rab.

Jaanoon mai ye ki chaahe raasta ho tedha medha
Mere Guruji andhere ke baad laate Hain savera
Aisa hee Guruji ne sangat ke liye kiya intazaam hai
Kyunki Unkee sharan mein hota bhakt ka kalyaan hai.

Mushkil hee nahin, balki namumkin hai
Lagaana is satya kee sampoornata ka andaaza
Ki pyaare Guruji ne kitnee parivyaapak daat se
Apne har bhakt ko hai nawaza.

Har saans se Guruji ka Shukrana
Har saans ke liye bhi Unhee ko dhanyawaad
Mera toh har dukh dard hua begaana
Guruji ne diya mujhe aisa anupam ashirwaad.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 29, 2022

Om Namaha Shivaya
Aaj Ka Suvichaar 🙏🏻🙏🏻 # 1500

  Toone Guruji Par Kiya Hai Bharosa

Toone Guruji par kiya hai bharosa
Uss bharose par kar le vishwaas
Waqt kumm lagey ya zyada
Mitegi zaroor teri traas.

Unhe aa gaya thaa tujh par taras
Tujhpar Unkee rehmat rahi hai baras
Tujhe gyat nahin toh koi baat nahin
Lekin aisa nahin ki Guruji tere saath nahin.

Rakh tu sabr, kar Unka shukr
Beshak kar le Unse apni har mushkil ka zikr
Chaahe tere bin kahe hee hai Unhe khabar
Lekin zikr karne se shaayad kumm hogi teri fikr.

Karna hai toone duur fikr ko poori tareh se agar
Toh isee pal se sab kuch chod de Guruji par
Unhonei tujhe bulaaya hai Apne dar par
Awashya denge Ve teri kismat ko khilne ka avsar.

Tere pichhle kayee janmon ke bahut saare karmon ka bhugtaan
Guruji karva rahe Hain kumm samay mein
Ve Hain tere shubhchintak karunanidhaan
Isliye chod de tu rehna sanshay mein.

Toone bharosa kiya hai Guruji par
Abb bharose par vishwaas kar aur samarpan kar ke dekh
Unhe jeevan kee doar saumpne se na tu dar
Ve sahi waqt par badalenge tere lekh.

Buss, abb na soch tu kuch bhi aur
Tu bandagi par kar gaur
Keh raha hai tere antakaran ka moar
Ki tere jeevan mein aane waali hai sundar bhor.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 28, 2022

Om Namaha Shivaya
Aaj Ka Suvichaar 🙏🏻🙏🏻 # 1499

                  Mann Ka Haal

Dekhte dekhte beete jaa rahe hain saal
Poochein khud se ki kya pehle se achcha hai mann ka haal
Pehen kar Guruji kee suraksha kee dhaal
Phir khud hee jawaab deta hai yeh sawaal.

Yakeenan itna achcha pehle na thaa haal mann ka
Guruji ke bin saleeqa na seekha thaa simran ka
Guruji se judi seedhi taar jabb se
Ek naya safar shuru hua tabb se
Safar is atma ka aur mann ka
Mann ko dikhne lagaa naya andaaz jeevan ka.

Aisa nahin ki kasht aur niraasha ke lamhe nahin aate hain
Lekin ve shikshak aur anubhav bante jaate hain
Pehle bitaate thei sochte huey unke baare mein samay jitna
Abb mann ke paas aisee soch ke liye samay hee nahin hota utna.

Mann Guruji mein vyast rehne lagaa hai
Pehle se kaheen zyada mastt rehne lagaa hai
Khushi aur Shukrana kee chalti rehti hai khoob jugalbandi
Saath saath vichaaron kee hoti rehti hai sandhi.

Guruji ko khush karne ka karta rehta hai abb mann
Gavaara nahin ki Guruji nakhush hon ek bhi kshan
Phir bhi galatiyan toh hoti hee rehti hain humse zaroor
Kamzoriyon aur avgunon se hain aakhir hum majboor.

Ayb abhi bhi hain anginat
Maang lein Guruji se sumat
Sumat se sudhaarein apni kismat
Guruji karte rahein hum par rehmat.

Aaj hai, kal nahin
Zindagi hai yahee
Jo pal miley jee lein pal vahee
Har manishi jann bhi kehta hai yahee.

Sewa, simran, satsang, aur dhyan
Karte chalein inka abhyaas aur maan
Jeevan kee kshan bhangurta se na rahein anjaan
Na jaane kab shareer ko chod denge praan.

Ruhaani gyan ko atmasaat karein
Guruji angg sangg Hain isliye kabhi na darein
Chaahe jaisi bhi paristhiti ho jeevan mein
Har pal Shukrana ka ehsaas rahe mann mein.

Khush rahein, muskuraate rahein
Asthaayi jaankar har kasht ko sahein
Pyaar baantein bin ummeed kiye
Jalaate rahein sabke liye duaon ke diye.

Dekhte dekhte beet jaayenge aur kayee saal
Guruji ko sarvsamarpan kar ke sadaiv achcha rahe mann ka haal
Guruji kee mehar banee rahe suraksha kee dhaal
Aur hum oordhvagati kee oar chalein toadkar jeevan ka maya jaal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 27, 2022

Om Namaha Shivaya
Aaj Ka Suvichaar 🙏🏻🙏🏻 # 1498

   Ruhaani Raahat

Pyaare Guruji,

Jeevan hee bann gaya satsang
Jabb chadha vandan aur spandan par Aapka rangg
Abb toh aisa hua hai jeene ka dhangg
Ki koi pal nahin jabb Aap nahin hotey Hain sangg.

Aapka vaas hua hai yoon mann mein
Ki akelapann duur hua jeevan mein
Aap bheetar bhi Hain aur sangg bhi sada
Divyata hee nibha sakti hai yeh adaa.

Salona hai Aapka saath
Kar sakti hoon Aapse dil kee har baat
Baat na bhi ho paaye toh Aap jaate Hain samajh
Usee se kitnee uljhanein jaati hain sulajh.

Aapne sweekaara toh hua mera ek naya janam
Honei lagaa itne pehle se chale aa rahe kashton ka haran
Jeevan ka saaz hota chalaa pehle se kaheen zyada ruhaani
Befikr ho gaya mann saump kar Aapko zindagi kee kahaani.

Aapki sharan mein milee aisee ruhaani raahat
Ki abb nahin sataati swarg jaane kee bhi chaahat
Aapke charnon se pyaara nahin hai koi aur mukaam
Aapki sharan mein yakeenan praapt hoga sachkhand ka dham.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja