Author: dhirjabhat

March 18, 2022

Om Namaha Shivaya
Aaj Ka Suvichaar 🙏🏻🙏🏻 # 1489

         Guruji Ke Naam Ka Rangg

Beet gayi holi is varsh kee
De gayi yaadein kayiyon ko harsh kee
Rangon kee hui bauchhar
Aur phir beet gaya ye tyohaar.

Kuch rangg thei pakke aur kuch thei kachche
Khoob khele kayi bade aur kayi bachche
Kuch rangg khud hee padne lagenge pheeke
Kuch ke liye prayog karne hongei dhone ke tareeke.

Utar jaayega gulaal aur rangg neela
Dhul jaayega rangg hara aur peela
Na utarne dena tum Guruji ke naam ka rangg
Uss rangg se sanvaarna jeene ka dhangg.

Guruji ke naam ka rangg
Laata rahega ruhaaniyat kee tarang
Jabb takk is rangg mein rangey rahoge
Tum Guruji ke prem bhaav mein bahoge.

Is bhaav ko tum sewa se sajaana
Is bhaav ke rangg mein samarpan ka rangg milaana
Is rangg ke mandal mein simran kee jyot jalaana
Aur Guruji ka Shukrana kar ke Unhe rijhaana.

Ye koi saadhaaran rangg nahin hai pyaare
Is rangg se hongei tumhaare vaare nyaare
Is rangg mein rangna bahut khushakismati kee baat hai
Kyunki ye sanket hai ki Guruji ka ashirwaad tumhaare saath hai.

Yeh rangg bhakti bhaav ka hai
Ye kabhi pheeka na honei paaye
Is rangg mein rangenge tumhaare dwaara arpit kiye suman
Isliye dhyan rahe, koi phool na murjhaaye.

Guruji kee kripa se har aane wali holi par
Aur bhi gehra ho jaaye yeh rangg
Is rangg mein rangkar tum Guruji mein yoon leen raho
Ki tumhaare chitt mein har pal samaaye Guru naam kee umang.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 17, 2022

Om Namaha Shivaya
Aaj Ka Suvichaar 🙏🏻🙏🏻 # 1488

                   Holi Ka Paigam

Phagun kee poorna-maashi hai aayi
Holi ka paigam hai laayi
Rangon ka yeh tyohaar hai aaya
Buraayee par achchaayee kee jeet ka sandesh hai laaya.

Hiranyakashipu ne chali thi chaal
Ki uska putr Prahlad ho jaaye agni mein nidhaal
Apni behen Holika kee goad mein usey bithaaya
Aur Holika kee raksha ke liye uspar kavach chadhaaya.

Lekin Prahlad ka kalyaan kiya uskee bhakti ne
Kyunki Vishnu ji kee shakti ne
Kavach udaaya Holika ka aur Prahlad par usey chadhaaya
Holika agni mein jal gayi aur Vishnuji ne Prahlad ko bachaaya.

Holi ka yeh arth bhi hai
Ki veh ho li, yaani gayi beet
Isliye jo bhi anban hai kisee ke beech
Veh khatm hui aur ve bann gaye meet.

Guruji kee kripa se aisa sadbhaav
Saare sansaar mein samaaye
Har oar bhaaichaara ho
Aur pyaar badhta jaaye.

Guruji kee saari sangat
Guruji kee ho lee
Isliye bhi Guruji ke bhakt jann
Guruji ke sangg manaayein holi.

Angrezi bhaasha mein holi shabd hai shubh
Kyunki uska arth hota hai pavitra aur shuddh
Chalti rahegi khushi aur gumm kee aankh micholi
Bhakti ke rangg se khelein, aao, hum sab mil kar holi.

Is rangon ke parv par Guruji karein aisee mehar
Ki bhakti ka rangg gehra ho har pehar
Guruji kee bhakti ke rangg mein yoon rangg jaayein hum
Ki Unn mein hee ramm jaayein hum.

Rangg ho sewa, simran, aur satsang ka
Jismein mishran ho samarpan ke rangg ka
Saath mein ho neevenpann aur Shukrana ka rangg
Jismein umang bhare prem bhaav kee rangeen ho tarang.

Rangon ka yeh mishran
Ullaasit karey mann
Guruji kee bhakti ke rangg se
Har bhakt jann ka rangg jaaye jeevan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 16, 2022

Om Namaha Shivaya
Aaj Ka Suvichaar 🙏🏻🙏🏻 # 1487

  Uddhaar Kee Dagar

Kayi janmon ka bhaar lekar mai aayi
Aapne uddhaar kee dagar dikhaayi
Is kalyuga kee kadak dhoop mein, Guruji,
Aapke dar par mainey chhaaon paayi.

Kashton ke tufaan mein
Aapne dee panaah
Niraasha ke andhere mein
Aapne dikhaayee raah.

Rogon se mai beshak grast rahi
Lekin Aap sangg thei, isliye mastt rahi
Aapke diye huey dhairya se peeda sahi
Jo bhi baat mann mein thi, veh Aapse kahi.

Aapse jod kar seedhi taar
Mehsoos hua mujhe ek anokha pyaar
Aur uss pyaar par ho gaya aisa aitbaar
Ki abb na soojhe koi aur dwaar.

Shukr hai Aapka ki aaya Aapka bulaava
Yakeen hai mujhe ki mere Sarvesh aur koi nahin Hain Aapke alaawa
Guruji ke roop mein Bhagwaan Hain Aap
Deenanath karunanidhaan Hain Aap.

Aapne Apni sharan dekar mera jeevan hai sanvaara
Abb Aapke dar ko chod kar kaheen aur jaana nahin gavaara
Aap hee Hain is bhav saagar mein ek maatra sahaara
Aap hee kee kripa se mil paayega mujhe kinaara.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 15, 2022

Om Namaha Shivaya
Aaj Ka Suvichaar 🙏🏻🙏🏻 # 1486

Apni Sharan Mein Rakhna, Daata

Pichhla jo thaa so beet gaya
Aagey ka samaa abhi aaya nahin
Yeh pal jo abhi maujood hai
Is mein toh kar lein hum kaam sahi.

Guruji, bakhshiye aisee sumat
Ki sada shaant rahe chitt
Sada sochein sab ka hitt
Kukarma na karein sanchit.

Doobein rahein Aapke Shukrana mein
Khush rahein har pal
Maanein ki Aapki mehar ho rahi hai
Aur Aap mein vishwaas rahe atal.

Aapke kahe anusaar gupt rakhein
Paath, sewa, aur daan ko
Aapke kahe anusaar bande banein
Jaagrit rakhein apne imaan ko.

Aap hee ko samarpit ho
Hamaara har karam
Is bhavna ke sangg
Nibha paayein hum neki ka dharam.

Kuch bhi aisa na karein
Jo Aapko na lagey achcha
Aisa bhaav hoga hamaara
Toh sachcha hoga Aapka har bachcha.

Ye yug hai bhautikvaad aur badhte huey vikaar ka
Hamein sahaara mila hai Aap jaise taaranhaar ka
Vidya baney aadhaar hamaare har vichaar ka
Taaki atma kee chetna mool ho hamaare vyavhaar ka.

Aapke paas hai hum sabke karmon ka khaata
Rok lena, tok dena, agar kisee bhi paap se judne lagey hamaara naata
Abb aur koi bhi dar Aapke dar jitna nahin bhaata
Isliye kripa kar hamein sada Apni sharan mein rakhna, daata.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 14, 2022

Om Namaha Shivaya
Aaj Ka Suvichaar 🙏🏻🙏🏻 # 1485

               Shanti Kee Talaash

Har koi kisee aas mein hai
Har koi shanti kee talaash mein hai
Koi kaam chod kar shanti dhoondh raha hai
Koi kaam mein hee shanti dhoondh raha hai
Shanti ko dhoondhte huey phir raha hai har koi
Kitnon ne shanti kee khoj mein apni neend hai khoi.

Shaayad mil bhi jaati ye baahar agar ye kaheen baahar hoti
Lekin shanti baahar hai hee nahin
Jisne Guruji ke hukm ko maankar simran kiya
Usey kabhi na kabhi shanti milegi apne bheetar mein hee.

Ye Guruon ka diya upaay hai
Galat ye ho sakta nahin
Jis jis ne kiya hai simran aur dhyan
Usey hai is baat ka anumaan.

Gurbani ka amrit
Jabb jabb mann ko seenchta hai
Tabb tabb veh mann ko
Apni oar is kadar kheenchta hai
Jaise koi bichda hua meet
Jis se kayee janmon se ho ruhaani preet.

Ashanti ke marz ke liye
Amritmayi aushadhi hai Gurbani
Jis jisne iska shravan aur manan kiya
Usne Gurbani kee mahima hai jaani.

Gurbani kee mahima ka bakhaan
Itihaas mein bhi varnit hai
Kaash is amrit ka ashish har uss jann ko bhi miley
Jo aaj takk is dhan se vanchit hai.

Ve meethe bol, Guruon aur santon kee veh bani
Sach mein sanvaar deti hai zindagaani
Shanti deti hai aur duur karti hai mann kee pareshaani
Anivaarya hai ye uske liye jisne simran kee ghadiyan hain kamaani.

Simran kee ghadiyan anmol hain
Ye bhi santon ke bol hain
Inmein bahut gehraayee hai
Inkee vaddi vadiyaayee hai.

Simran se mann kee mayyl hatt jaati hai
Simran se trishna mitt jaati hai
Simran se sadgati aati hai
Simran se jaagriti aati hai.

Mann kee mayyl hatt jaane se
Trishna ke mitt jaane se
Bechayyni kumm ho jaati hai
Mann mein santushti ghar banaati hai.

Phir shanti dhoondhne kee zaroorat hee nahin
Kyunki jahaan hum hain, shanti bhi sangg hai vaheen
Shanti karegi mann mein vaas
Shanti kee sthiti mann ko na honei degi udaas.

Chalta rahega mann mein simran
Ashaant na hoga mann
Saath saath hota rahega pavitrikaran
Mann kee shanti banaayegi jeevan ko sampann.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 13, 2022

Om Namaha Shivaya
Aaj Ka Suvichaar 🙏🏻🙏🏻 # 1484

Jeevan Kee Koi Bhi Andheri Raat

Guruji sada Hain tumhaare saath
Isliye jeevan kee koi bhi andheri raat
De na sakegi tumhe maat
Ye hai pakki baat.

Basharte tumhaari bhakti ho bin pratibandh
Tumhaara vishwaas ho buland
Tumhaari oar se samarpan bhi ho poora
Tumhaara Guru ke prati prem na ho adhoora.

Guruji na chodenge tumhaara haath
Chaahe jitnee bhi lambi ho jaaye raat
Ve tumhaare antar-mann ka ashvaasan banenge
Ve saath rehkar tumhaara bhayy duur karenge.

Jeevan kee andheri raat mein jo aayega tufaan
Toh Guruji khade hongei tumhaare aur tufaan ke darmiyan
Tum buss japte rehna Unka naam
Aur karte rehna apna kaam
Baaki sab Ve sambhaalenge
Ve tufaan ka rukh bhi badal daalenge.

Andhere mein agar lagi tumhe thokar ya tum gir gaye
Toh Guruji himmat denge uth kar chal paane kee
Jo tumhe theek se raasta na samajh aaya
Toh Ve sumat bakhshenge sahi disha mein jaane kee.

Agar chalte chalte tumhe gehra saagar dikha baadha ke roop mein
Toh Guruji tumhe goad mein uthaakar saagar paar karaayenge
Yeh toh chhoti chhoti baatein hain
Ve toh tumhaare liye kaal se bhi ladd jaayenge.

Is andhere mein tum dekhoge ki kaun apna hai aur kaun paraaya
Guruji tumhaara saath denge jabb chod dega tumhe tumhaara hee saaya
Guruji ko nishchit karne dena subah ke aane ka samay
Na minnat karna Unse ki subah jald aaye, na hee karna sanshay.

Andheri raat zaroor hogi khatm
Bhar jaayenge tumhaare zakhm
Kyunki Guruji lagaayenge zakhm par Apni mamta ka marham
Aur Apne ashirwaad kee aushadhi se har lenge Ve tumhaara har gumm.

Tum buss karo Unse niswaarth pyaar
Saump do Unhe poori tareh se apna bhaar
Unka naam lo aur Unhe Shukrana karo baarambaar
Ve bakhshenge tumhe shraddha aur sabr aparampaar
Apna farz nibhaate huey karo tum subah ka intazaar
Guruji zaroor karaayenge tumhaara uss subah se deedar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 12, 2022

Om Namaha Shivaya
Aaj Ka Suvichaar 🙏🏻🙏🏻 # 1483

  Samet Paayega Tu Apne Jeevan Ko

Chaahe lamha ho asha ka
Ya phir daur chal raha ho niraasha ka
Pyaare Guruji ko toh usee samay chal jaata hai pata
Beshak tu Unhe bataa ya na bataa.

Ve hee denge tujhe sanyamsheel samvedana
Ve hee denge tujhe niraasha mein bhi aagey badhne kee prerna
Ve jagaayenge tere chitt mein ummeed na rakhne kee chetna
Ve sikhaayenge tujhe tere jeevan ko sametna.

Samet paayega tu apne jeevan ko ek aise saar mein
Jiska mool taatparya hoga leen rehna Guruji ke pyaar mein
Unhee ko hoga samarpit tera har karam
Bakhoobi se nibhaa paayega phir tu insaaniyat ka dharam.

Isliye kendrit kar le jeevan ko Guruji kee bhakti mein
Ek nayee oorja aayegi teri shakti mein
Is oorja ke sanchaalak rahenge Guruji
Sada tere pratipalak rahenge Guruji.

Is nayee oorja ke prabhaav se teri soch badalti jaayegi
Asha aur niraasha kee kashmakash na tujhe sataayegi
Tu prayaas karega toh aisa lamha aayega zaroor
Jabb tu pahunchega asha aur niraasha ke chakravyuh se bahut duur.

Phir mann mein na hoga kisee ummeed ka vaas
Aur taralta ke sangg tripti ka hoga tujhe ehsaas
Pehle se bhi zyada teevra hogi Guru milan kee teri paawan pyaas
Aur Guruji ke simran ke sur se sajega tera har shwaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 11, 2022

Om Namaha Shivaya
Aaj Ka Suvichaar 🙏🏻🙏🏻 # 1482

                      Nayi Zindagi

Jab jeevan mein milte Hain Guru
Ek nayi zindagi hoti hai shuru
Ek anokhi si zindagi
Jisey sajaa deti hai bandagi.

Jab Guruji ka bulaava aaya
Mera bhi naseeb jagmagaaya
Vaapis lautne ka toh thaa hee nahin koi sawaal
Kyunki Guruji ne apne ashirwaad se kar diya maalaamaal.

Diya Unhonei jeevan daan
Aur liye anek imtehaan
Har imtehaan mein Unka ashish thaa saath
Isliye har imtehaan mein mehsoos hui ye baat
Ki imtehaan jitne kathin hotey jaa rahe hain
Guruji utna hee saahasi banaa rahe Hain.

Guruji ne asal dhan ka arth samjhaaya
Kitne logon se Unhonei milvaaya
Kuch bichhad gaye, kuch reh gaye saath
Is dauran bhi sir par sada raha Guruji ka haath.

Meri aankhon par se parda hataaya
Hakeekat se mujhe waaqif karaaya
Beshak chot milee aur dil bhar aaya
Lekin in anubhavon ne atma-bal badhaaya.

Badalte gaye Ve mera nazariya
Sanvaari Unhonei jeevan kee dagariya
Ye sochne ke bajaaye ki mere saath aisa kyun ho raha hai
Mai jaan-ne lagi ki vaisa mere liye ho raha hai.

Swatantra ichcha, neeyat, ravaiye mein hastakshep kabhi nahin kiya
Jabb jabb maargdarshan maanga, kabhi bhi inkaar nahin kiya
Unkee khaamoshi aur vilamb mein chhipa hota hai koi shubh aarambh
Koi kaarya sthagit ho toh Unkee ichchavash hota hai uska prarambh.

Guruji ne Gurbani kee mahima par zor diya hai
Shabad simran ke sangg jod diya hai
Har vehem se duur karte gaye
Ahankar ko chuur karte gaye
Sewa aur satsang ka arth samjhaaya
Sewa, daan, paath ko gupt rakhna hai, Unhonei bataaya.

Apni mahima ka gungaan karaate Hain
Jis se itne karam katt jaate hain
Duur kiya hai Guruji ne har sanshay
Apni karuna se banaaya hai nirbhay.

Swaasthya aur hunar hai bakhsha
Har pal karte Hain Ve raksha
Safar mein samarpan ka mahatva dikhaaya
Shukrana ke ehsaas ko atmasaat karvaaya.

Protsaahan diya ki satya bann kar chalti jaaoon
Mehar kee ki Unke banaaye saanche mein dhalti jaaoon
Ehsaas dilaaya hai ki apna paraaya sab mithya hai
Chetna kee jaagriti hee asal vidya hai.

Samjhaaya Guruji ne ki har kisee ka safar alag hai
Kalyaan karte huey Unhonei dikhaaya ki aisa hee yeh jag hai
Har kisee ko jeevan mein hai koi kashish
Har koi kar raha kisee khwaahish ko poori karne kee koshish.

Guruji ne ehsaas dilaaya ki Unse judna hai is nayi zindagi ka saar
Is sansaar ke padaarthon aur logon mein aasakti rakhna hai bekaar
Apni taraf se nibhaani hai wafaa
Aur apni oar se nibhaana hai pyaar
Badle mein wafaa aur pyaar na miley
Toh nahin uthaane maansik, vaachik ya bhautik hathiyaar
Kyunki pyaare Guruji dekh rahe Hain sab
Vahee sabse badi baat hai kyunki Ve Hain Rabb.

Kripa karte rehna Guruji, ki mann ka bartan karti rahoon saaf
Aapki bakhshi hui is zindagi mein meri galatiyon ke liye kar deejiyega mujhe maaf
Saari sarbat par Apna anugreh banaaye rakhna, mere Daata
Dua hai ki har janam mein Aapse juda rahe mera naata.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 10, 2022

Om Namaha Shivaya
Aaj Ka Suvichaar 🙏🏻🙏🏻# 1481

          Neki Kar Kuen Mein Daal

Neki kar kuen mein daal
Is ukti mein nahin hai koi banaavat
Aisee har lokokti aur kahavat
Aashrit karti hai satya ke anubhav kee aahat.

Iska anusaran karne mein
Hamaari hee hai bhalaayee
Yahee sikhaati hai hamein
Guruji kee vadiyaayee.

Achcha kaam karein lekin na karein uske badle mein phal kee asha
‘Neki kar kuen mein daal,’ is sookti ki kuch kuch aisee hee hai paribhasha
Guruji kahein ki hamaari sewa ho nishkaam
Na intazaar karein hum ki uska kya hoga parinaam.

Kyunki Guruji sewa dwara bhi karaa rahein hain hamaare praarabdh ka bhugtaan
Is se achchaa vaise bhi kya ho sakta hai anjaam
Praarabdh chukaaye bina toh chhutkaara nahin
Aur bhakt par saara bhaar aaye, yeh pyaare Guruji ko gavara nahin.

Tabhi toh karuna ke mahasaagar Guruji
Bhakton ke karmon ka adhiktar bhaar lete Hain swayam par
Aur bilkul thoda sa bhaar bhakt ko dekar
Dete Hain bhakt ko karmon ke bhugtaan ka avsar.

Guruji sab dekh rahe Hain, ye hai sabse badi baat
Humne toh Guruji ko khush karna hai jo Hain hamaare Naath
Isliye neki kee numaish karne kee koi zaroorat hee nahin
Balki nirlipt sewa hee hai adhyaatmik unnati ke liye sahi.

Isliye na mehsoos karein bedili ya niraasha
Balki dein apne mann ko sakaraatmak dilaasa
Koi baat nahin agar koi bhi badla na chukaaye hamaare kiye ehsaan ka
Aisee ummeed karne se bhi kumm hoga avsar hamaare kalyaan ka.

Aaj ya kal yeh yathaarth hamein aayega samajh
Iske anusaran se kaafi uljhanein bhi jaayengi sulajh
Atmasaat hoga iska hamaare vichaar mein
Toh chhalkega ye hamaare vyavhaar mein.

Na rahega ye naam, na rahega ye chehra
Phir bhi sada rahega hamaari atma par Guruji ka pehra
Guruji kee mehar se karte chalein is atma ka uddhaar
Taaki kareeb aaye veh vela jabb atma ka ho Paramatama se deedar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 9, 2022

Om Namaha Shivaya
Aaj Ka Suvichaar 🙏🏻🙏🏻# 1480

               Apne Girebaan Mein

Simran karte karte
Dheeraj dharte dharte
Chalta chal, tu chalta chal.

Karte huey har subah ka Shukrana
Shraddha se sweekaarte huey har shaam ka nazraana
Chalta chal, tu chalta chal.

Rehte huey tu dhyan mein
Jhaank apne girebaan mein
Usspar chadhi hui mayyl utaar
Swasthiti mein laata chal sudhaar.

Guruji Hain tere angg sangg
Tujhpar chadha hai Unke pyaar ka rangg
Unka pyaar kar raha hai kavach ka kaam
Isee se ho raha hai teri suraksha ka intazaam.

Abb mohnidra ko tu tyaag de
Apni jagriti mein khud bhaag le
Tujhe hee karna hoga ye prayaas
Taaki tu abb aur na ho udaas.

Apne girebaan kee gehraayee mein jaakar
Guruji ke ashish se aatmabodh paakar
Tu chayyn paayega jidhar jaayega
Tu tarr kar nikhar jaayega.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja