Author: dhirjabhat

January 28, 2022

Om Namaha Shivaya
Aaj Ka Suvichaar 🙏🏻🙏🏻 # 1440

         Titlee Hai Tu

Nibha le Guruji se preet kee reet
Ve anant ke liye rahenge tere meet
Gaa tu Unke stavan ke geet
Na ho kisee se bhi bhaybheet.

Jabb Guruji Hain tere angg sangg
Aur chadha hai tujh par Unke naam ka rangg
Phir koi nahin kar sakta tere sukh ko bhangg
Kyunki Guru naam se hai tere antarmann mein ruhaani umang.

Titlee hai tu Unke pyaare ke upvan kee
Kaha kar tu Unse baat apne mann kee
Ichhuk reh tu Unke naam ke sanatan dhan kee
Unhe saump de fikr tu apne jeevan ke har kshan kee.

Jinhonei banaaya hai tujhe illee se titlee
Jinke kehne par tere liye sukh kee kaliyaan khilee
Tu abb takk bhi Unhee kee goad mein hai palee
Unke aanchal mein tujhe laad kee chhaaon hai milee.

Tere pyaare se safar ko phoolon se Ve sajaayenge
Tu har phool par ruk kar karna uska naman
Tu karna is kadar Guruji ka shukrana
Ki teri prerna se Unke vandan mein jhuk jaaye saara chaman.

Udd kar upvan kee har disha mein tu
Karti jaana Guruji kee mahima ka gungaan
Hawaa ke jhonke bhi mehek jaayenge
Dete huey Guruji kee maujoodagi ka pramaan.

Guruji ko sarvsamarpan kar ke
Tujhpar na rahega kisee tareh ka bhaar
Guruji ne tere jeevan kee doar hai thaami
Diya hai Unhonei tujhe tere upkaar ka uphaar.

Yoon hee mauj aur masti mein
Khush swabhaav se tu udtee rehna
Har pal har din har mausam mein
Guruji ko Shukrana zaroor kehna.

Guruji ko tu ek lamhe ke liye bhi na bisraana
Guruji ke naam kee dhun mein tu udti jaana
Jahaan Guruji kahein, tu uss disha mein mudti jaana
Kyunki Unhee ke hukm mein reh kar milega tujhe param sukh ka khazaana.

Leti chal har pal tu Guruji ka naam
Bhar le is gagan mein tu umda udaan
Tere Guruji Hain MahaShiv mahaan
Unhee ko arpit kar de tu apne praan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 27, 2022

Om Namaha Shivaya
Aaj Ka Suvichaar 🙏🏻🙏🏻 # 1439

   Aansuon Ka Koi Bhaar Nahin Hota

Aansuon ka koi bhaar nahin hota
Phir bhi na jaane kyun palkon ko lagte hain ye bhaari
Jaise hee palkein jhapak kar ye aankhon se beh jaate hain
Toh halkapan mehsoos karti hai mann kee bhi chaar deewari.

Lekin, na jaane aisa kyun hota rehta hai
Ki karmon ka bhaar insaan dhota rehta hai
Ho kar uss bhaar se bilkul bekhabar
Bina kisee hichkichaahat ya darr.

Oopar se agar jaagriti na aaye
Toh aur karma sanchit honei se badhta jaata hai bhaar
Palak jhapakne se aansoo toh beh jaata hai
Lekin, karma ka bhaar toh atma par hee reh jaata hai.

Atma isee bojh ko dhote dhote
Karti hai na jaane kitne safar
Har janam mein alag shareer ko kar ke dhaaran
Atma dhoondhti rehti hai apna nivaaran.

Guruji ko toh sab hai pataa
Ki kisne kee hai kaunsi khataa
Kaun khota hai aur kaun kharaa
Kaunsa paap chhota hai aur kaunsa hai bada.

Unhonei toh diya hai bhakton ko Apne naam ka sahaara
Hamaare karmon ka bhaar kumm ho sakta hai is sahaare ke dwaara
Jis jis ne shraddha bhaav se hai Guruji ko pukaara
Guruji ne uske ateet ke karmon ke vartmaan parinaam ko hai sanvaara.

Guruji ke naam se hoti hai antar-mann kee shuddhi
Jis se bhaar ka ehsaas hona shuru ho jaata hai
Guruji ke naam se aati hai jaagriti aur subuddhi
Aur bhakt bhavishya ke liye zyada saavdhaan ho jaata hai.

Guruji bakhshte Hain saahas maafi bhi maang lene ka
Guruji bakhshte Hain neevanpann sabhi ko duayein dene ka
Simran, sewa, satsang se karte rehte Hain Ve bhakt ka pavitrikaran
Unka ashish hota hai kasht haran aur mangal karan.

Aisee hai Guruji kee mehar
Ki Ve toh har pal karte Hain nadar
Hota rehta hai bhakt ke antar-mann par Unkee mehar ka asar
Pichhle karmon ka bhaar kumm hota rehta hai
Jaise jaise samay jaata hai guzar.

Tann aur mann ke saath saath
Guruji karte Hain bhakt kee atma ka uddhaar
Karmon ka bhugtaan bhi karaa dete Hain Guruji
Har tareh se kumm hota jaata hai atma par bhaar.

Kewal yahee nahin, balki Guruji kee kripa toh itnee aseem hai
Ki Ve aksar lekha bhi likh dete Hain dobaara
Bhakt ke shraddha poorna bhaav aur samarpan ko dekhkar
Pehle se bhi zyada chamakne lagta hai kismat ka sitaara.

Buss, aish karte huey yeh yaad rakhna hai anivaarya
Ki Guruji se hee mila hai karmon ke bhaar ko kumm karne ka upaay
Isliye Unka Shukrana karna zaroori hai har pal har din
Kyunki banda bann-na namumkin hai Guruji ke ashirwaad ke bin.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 26, 2022

Om Namaha Shivaya
Aaj Ka Suvichaar 🙏🏻🙏🏻# 1438

Pichhle Karmon Ke Kisson Kee Kahaani

Pichhle karmon ke kisson kee kahaani
Bann jaati hai vartmaan kee zindagi kee zubaani
Chaahe lagey vo timir tufaani
Ya phir lagey ek subah suhaani.

Chaahe yeh niyam pasand aaye ya nahin
Guruji ke anusaar toh yahee hai sahi
Isliye hamein isey maan-na hee hoga
Varna hum khud ko de rahe honge dhokha.

Hamaare haath mein hai hamaari swatantra ichcha
Isliye hum swayam hee soch-vichaar aur karam kar sakte hain achcha
Isliye rakhkar iraada nek aur sachcha
Kyun na hum mein se har koi baney Guruji ka pyaara bachcha.

Ye bhi toh rakhna hai yaad
Ki is janam ke jeevan ke antt ke baad
Isee janam ke isee jeevan ke karam saath jaayenge
Jo aane wale janmon ke jeevan mein kismat bann kar laut aayenge.

Aise hee yeh silsila chalta rahega
Pichhle karmon ka prabhaav bahega
Jabb takk bachte rahenge bhugatne wale karam
Chaahe lene padein hamein jitne bhi janam.

Kyun na abhi se rok lein is bahaav ko
Aur tyaag dein anuchit soch, karam, aur har burey bhaav ko
Taaki abb aur na badhe yeh khaata
Kyunki bhaari khaata mukti ko pasand nahin aata.

Aur zaroori hai paana mukti
Kyunki yahee toh hai ek yukti
Sadaa ke liye Guruji ke charnon mein samaane kee
Aur janam maran se sada ke liye chhutkaara paane kee.

Kar dein Guruji aisee mehar
Ki mann mein simran chalta rahe aathon pehar
Anuchit karma karne ka na mauka miley na aaye vichaar
Aur Apni karuna se Guruji dein hamein taar.

Phir khatm hogi pichhle karmon ke kisson kee kahaani
Aur ye na banegi aane wali zindagi kee zubaani
Hamaari nek neeyat dekh hamaare soch vichaar par hoti chalegi Guruji kee meharbaani
Aur mukti kee haseen manzil par pahunch kar muqammal hogi yeh yaatra ruhaani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 25, 2022

Om Namaha Shivaya
Aaj Ka Suvichaar 🙏🏻🙏🏻 # 1437

                Jahaan……

Jahaan tumhe gunaahon ke saath sweekaar liya jaata hai
Jahaan pashchaataap se tumhaara har paap dhul jaata hai
Jahaan tumhaare asahaay mann ko atma-vishwaas mil jaata hai
Jahaan tumhaara udaas chehra khil paata hai.

Jahaan ansuon kee keemat anmol hai
Jahaan paawan arzi ka bada mol hai
Jahaan bhookhe pyaase rehne kee zaroorat nahin
Jahaan jo sachche bhaav se kiya jaaye, vahee tapp hai sahi.

Jahaan simran aur dhyan se miley chayyn
Jahaan divyata ka ehsaas ho, chaahe khule ya moonde hon nayyn
Jahaan raasta khud bakhud bann jaata hai manzil
Jahaan parkhaa jaata hai mann ka mandir

Jahaan karmakaand ka nahin hai riwaaj
Jahaan bahut mahatva rakhta hai ‘aaj’
Jahaan aaj hee beete huey kal ka bojh kar sakte hain hum kumm
Jahaan aaj hee sudhar jaane se kumm ho sakte hain aane wale gumm

Jahaan tarti hai sangat kar ke sewa aur satsang
Jahaan gehra hota rehta hai simran ka rangg
Jahaan langar prasad kee aushadhi nirogi kar deti hai tann mann ko
Jahaan samarpan se raahat mil jaati hai har bhakt jann ko

Jahaan sukh badhta hai dil aur labon par Shukrana rehne se
Jahaan sukoon milta hai nirmal aur saral bhaav ke behne se
Jahaan neevenpann par chadhta hai divya noor
Jahaan miltee hai santushti bharpoor.

Jahaan banda bann kar aish karne ko kaha jaata hai
Jahaan MahaShiv dwaara bhakt ka adhiktar kasht saha jaata hai
Jahaan niswaarth hoti hai prem kee bhaasha
Jahaan tript hoti hai ruhaaniyat kee abhilaasha.

Jahaan pahuchkar mit jaati hai har thakan
Jahaan ho jaata hai chintaaon aur kashton ka haran
Jahaan miltee hai bhatki hui atma ko sharan
Ve Hain pyaare Guruji Maharaj ke kamal charan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 24, 2022

Om Namaha Shivaya
Aaj Ka Suvichaar 🙏🏻🙏🏻 # 1436

               Simran Kee Syaahi

Kalam mein bharenge jaisi syaahi
Usee rangg kee hogi likhaayi
Kyunki kalam toh kewal hai ek paatr
Jismein bhari syaahi se likhta hai chhaatr
Usey diye huey imtehaan mein
Vidyaalay ya kisee anya sthaan mein.

Vidyaalay hee toh hai yeh zindagi
Adhyaatmik imtehaan hai ik bandagi
Hamaara mann hai ek paatr
Aur hum sab hain Guruji ke chhaatr.

Hamaari chetna hai hamaari buddhi
Isliye anivaarya hai iskee shuddhi
Kyunki kalam toh chetna ke hukm par chalega
Aur lekha syaahi ke rangg mein dhalega.

Isliye kyun na mann roopi kalam mein
Bhar lein hum simran kee syaahi
Taaki bandagi ke imtehaan mein
Shuddh aur shubh ho hamaari likhaayi?

Hum jo banenge chhaatr honhaar
Toh hamaare Guruji ko lagega achchaa
Kyunki Guru ko veh chhaatr awashya bhaata hai
Jo adhyayan mein prayaas karey sachcha.

Nek neeyat aur prayaas dekhkar anekon baar
Guruji hamaari maasoom galatiyon ko kar denge nazar andaaz
Isliye adhyaatmik adhyayan mein jo honge sachchi lagan aur pyaar
Toh hum imtehaan mein likh paayenge achche alfaaz.

Simran kee ye syaahi
Feeki na padne paaye
Simran kee is syaahi mein
Mayyl na jamne paaye.

Mann roopi kalam ko rakhna hoga swachchh
Nikaalna hoga mann se har khayaal jo ho tuchchh
Saaf kalam mein shuddh syaahi hogi, aur chetna sochegi sahi
Toh phir likhaayi mein koi bhi galati hogi hee nahin.

Saath mein ekaagrata rakhni hogi zaroor
Isliye vikarshanon ke prabhaav se na hon hum majboor
Hamaara lakshya ho imtehaan mein hona safal
Isliye hum prayaas ko na honei dein vifal.

Shuddh syaahi kee boondein banti rahein pal pal ke nirantar simran se
Jaagrit chetna likhwaaye uttam likhaayi mann roopi kalam se
Adhyatmik imtehaan mein safal hokar karein hum Guruji ko prassann
Aur Unkee mehar se hamaara yeh ruhaani safar ho sampann.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 23, 2022

Om Namaha Shivaya
Aaj Ka Suvichaar 🙏🏻🙏🏻 # 1435

         Is Kaayinaat Ke Chitrakaar

Vo ghaas aur paudhon ke beech
Dikhti hai jo nanhi si kali
Vo baag mein khelti hui bachchi
Jo bade laadon se hai pali
Pavitra prem mein bandhe huey premi
Nirantar chalti hui waqt ke pahiye kee nemi
Veh bagiya mein khila hua sundar sa phool
Jo hawaa ke jhonke mein raha hai jhool
Veh akash kee aseemta mein udta hua vihangam
Ve nirmal nadiyaan, jinka hota hai saagar se sangam
Veh sooraj, jo baadalon mein khele aankh micholi
Aur vahee baadal, jo tehelein bannkar ke ek toli
Veh chaand, jo apni chaandni se jagg ko sajaata hai
Har veh taara, jo ambar mein timtimaata hai
Prakriti ke ye sabhi nazaare
Khatkhataate hain hamaare anubhav ke dwaare.

Guruji kee mehar se hai inn sabka vajood
Aur inn sab mein divyata hai maujood
Inkee saralta mein bhi hai gehraayee
Inhe nikhaarti hai Guruji kee vadiyaayee.

Jeevan bhi shaayad hai kuch kuch aisa
Aur nitya khushiyon ko nahin khareed sakta hai paisa
Saralta mein basta hai anokha sukh
Saralta kitna kuch sikhaati hai bin khole apna mukh.

Lekin hamein ye rehta nahin hai yaad
Isliye toh Guruji se kar lete hain hum fariyaad
Uskee, jo asal daulat hee nahin hai
Uskee, jiska maangna sahi nahin hai.

Guruji toh hamein yaad dilaate jaa rahe Hain
Ki itne dukh humne apni maangon kee vajeh se sahe hain
Inhee maangon se ulajh gaya hai jeevan hamaara
Inhee maangon se asthir aur ashaant hua hai mann hamaara.

Isliye agar sanvaarna hai jeevan ko
Aur shaant aur sthir rakhna hai mann ko
Toh karte huey Guruji ka Shukrana
Hamein har maang, har shikaayat ko hoga bhulaana.

Jo bin hamaare maange sab dein, jo bin hamaare boley sab kuch jaanein
Jo hamaari neeyat, ravaiye, aur swatantra ichcha ko pehchaanein
Unhonei jo socha hai hamaare liye hamaare karmon ke anusaar
Usee ko sweekaar lein hum, bin kuch maange ek bhi baar.

Abhi takk nahin kiya agar, to abb na karein aur vilamb
Guruji par sab kuch chod kar, lein hum zindagi ka anand
Hum sabka yakeenan lagega beda paar
Kyunki Guruji thei, Hain, aur rahenge is kaayinaat ke chitrakaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 22, 2022

Om Namaha Shivaya
Aaj Ka Suvichaar 🙏🏻🙏🏻 # 1434

   Dhanya Ho Jeevan

Kisne kya kiya ya kya kaha
Kaun kaun bin jawaab diye na raha
Kis kis ne chup hokar saha
Jabb ki aisa nahin ki aansoo na baha….

Aisa hota aaya hai aur aagey bhi hota rahega
Manobhaav hai na, kisee disha mein toh zaroor bahega
Guruji se dua hai ki Unhee kee disha mein hamaara bhaav bahe
Unhee mein hamaara dhyan rahe
Hamaare mann mein Guruji ke prati sammaan rahe
Phir beshak chaahe jo bhi ye jahaan kahe.

Guruji se judi rahe paawan rishte kee seedhi doar
Phir kyun jaana hai kaheen aur
Hamaare Guruji takk rahe hamaari daud
Aur kabhi na mehsoos karein swayam ko kamzor.

Satya ke liye khade hokar satya bann jaayein hum
Jo kuch ya koi Guruji se duur le jaane lagey, usey chodne mein na katraayein hum
Guruji angg sangg Hain isliye kisee bhi chunauti se na ghabraayein hum
Dhanya ho jeevan is kadar, ki Guruji mein hee samaayein hum.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 21, 2022

Om Namaha Shivaya
Aaj Ka Suvichaar 🙏🏻🙏🏻 # 1433

    Divyata Aur Ruhaaniyat Ka Madhur Milan

Har jageh har pal har mauke par
Divyata se judein aankhein mann kee
Toh Guruji kee mehar se
Praapti hoti rahegi adhyatmik dhan kee.

Kaheen duur jaane kee zaroorat nahin
Chaahiye koi mahoorat bhi nahin
Kyunki har pal shubh hai is prayaas ke liye
Guruji ka darbar sada khula hai Unke das ke liye.

Mann ke mandir mein basaa hua hai yeh darbar
Simran karne se khulte hain is darbar ke dwaar
Shraddha aur sabr rakhne se vahaan hota hai satsang
Pyaare Guruji ke divya satya ke sangg.

Dhyan gehra honei se darbar ka spandan hota chala jaata hai ruhaani
Guruji ka naam japte japte mann kee gati ho jaati hai mastaani
Guruji kee divya khushboo se hawaa ho jaati hai suhaani
Mann hee mann mein haseen ho jaati hai zindagaani.

Guruji kee kripa se mehsoos karo is ruhaani spandan ka saaz
Ek Guruji hee jaante Hain tumhaare dil ka har raaz
Shaant mann se koshish karo, tum sunn sakoge Unkee awaaz
Aur Unkee awaaz mein barsegi mehar-e-mumtaaz.

Is mumtaz mehar se badhta chalega adhyaatmik dhan
Isliye abb bin ganvaaye tum ek bhi kshan
Lagaa lo Guruji kee disha mein apna mann
Karte chalo Unkee mahima ka shravan aur manan.

Ye mehar hai, isliye toh kalyaankaari hai Guruji kee sharan
Yahaan kashton ka hota rahega haran
Yahaan ashirwaad milta rahega mangalkaran
Aur hoga divyata aur ruhaaniyat ka madhur milan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 20, 2022

Om Namaha Shivaya
Aaj Ka Suvichaar 🙏🏻🙏🏻 # 1432

                 Guruji Kee Cheli

Aye maut matvaali
Tumhaari adaa hai ek paheli niraali
Tumne toh aane ka dhoondh hee lena hai koi bahaana
Jabb yahaan se jaane ke waqt ne hai aana
Phir kaahe ka hichkichaana
Aur kaahe ka sharmaana.

Koi bhi tumse bach na paaya hai aaj takk
Na hee aagey jaakar koi bachega
Is baat mein bhi nahin hai koi shak
Ki tumhaara yeh kaarya chalta rahega.

Guruji sabhi praaniyon ke Hain niyantaa
Aur tumhaari bhi Unkee kripa ke bin nahin hai kshamtaa
Sabke janam maran par Guruji ka raaj hai
Tumhaara saamarthya bhi Unke hukm ka mohtaaj hai.

Isliye mai jaanti hoon ki tum Unke kehne par hee aaogi
Aur Unkee manzoori se hee mujhe lekar jaaogi
Hai ye mera vishwaas mere uss aakhiri pal se sambandhit
Ki Guruji na rakhenge tabb bhi mujhe Apne saath se vanchit.

Dar-asal yeh jeevan toh mithya hai
Aye maut, tum toh ho sachchaayee
Tumse bhayy nahin hai koi
Ye bhi hai pyaare Guruji kee hee vadiyaayee.

Guruji swayam satya Hain
Aur tum bhi ho sachchaayee
Jaise jaise Guruji ke kareeb hui mai
Unhonei har sachchaayee se hai mitrataa karaayee.

Apne anginat divya haathon se
Guruji sambhaalein tumhe aur jeevan ko
Ve atma ko raasta Hain dikhaate
Jabb tum le leti ho praaniyon ke tann ko.

Tum ho satya, tum ho ek saheli
Guruji har pal tum par karein niyantran, isliye tum bhi nahin ho akeli
Koi baat nahin, agar tum lagti ho ek paheli
Dhanya ho tum, kyunki tum bhi mere jaise ho Guruji kee cheli.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 19, 2022

Om Namaha Shivaya
Aaj Ka Suvichaar 🙏🏻🙏🏻 # 1431

     Mukti Paane Ka Hai Yeh Raasta

Mukti paane ka hai yeh raasta
Simran hai is raaste kee chaal
Shuddh bhaav se badhti jaayegi chaal kee oorja
Jeevan mukti ke liye raasta nahin hai koi dooja.

Is raaste par chalte chalte satsang mein lagaao haaziri
Ve hain is raaste mein ve saumya shivir
Jahaan Guruji kee mahima ka gungaan karne aur sunn-ne se
Mit jaata hai raaste mein aane wala timir.

Yeh raasta nahin hai kaheen baahar
Yeh toh bheetar hai antarmann ke
Isliye is aantrik safar ka karo aadar
Ye le jaayega tumhe paas asal dhan ke.

Uss asal dhan ko paane mein jut jaao tum
Uskee khoj mein beshak mit jaao tum
Idhar udhar bhatakne mein na waqt ganvaao tum
Raaste se har vikarshan ko hataao tum.

Pashchaataap kar lo kiye huey paapon ka
Isee mein hal hai tumhaare santaapon ka
Raasta tayy karte samay chinta ke bajaaye kar lo chintan
Har pichhle kadam ke liye karo shukrana aur aane wale kadam ke liye samarpan.

Aati rahengi raaste mein pareekshaaein har moad par
Lekin niraash ya na-ummeed hokar na jaana raaste ko chod kar
Baadhaayein anand lena chaahengi tumhe toad kar
Lekin tum datt kar chalte rehna, vishwaas ko shraddha ke sangg jod kar.

Gupt sewa, gupt paath, gupt daan karo
Kalyuga mein satyugi bann-ne se na daro
Jahaan takk ho sakey punya kee poonji apne khaate mein bharo
Safar mein mrityu bhi aaye agar toh kuch achcha karte huey maro.

Guruji ne Apne pyaar ke pushpon se yeh raasta sajaaya hai
Aur har seema chinh par naya imtehaan rachaaya hai
Shuddh bhaav kee oorja se simran kee chaal ko banaakar mastaani
Ho jaane do apni rooh ko Guruji kee bhakti mein deewani.

Na ho tumhe koi aur sudh budh
Buss, bhaav banaa rahe shuddh
Ho jaao panj choron ke viruddh
Tyaag do ve vichaar jo hon ashuddh.

Swayam mein laate chalo sudhaar
Tumhaari madad karenge Parwardigaar
Yeh raasta chalega jabb talak chalegi zindagaani
Guruji kee mehar se raasta aur manzil dono hongei ruhaani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja