Author: dhirjabhat

December 29, 2021

Om Namaha Shivaya
Aaj Ka Suvichaar 🙏🏻🙏🏻 # 1410

     Jannat Takk Pahunchne Ke Liye

Jabb kisee apne ka aslee chehra aaya nazar
Dil bilkul toot gaya aisa hua asar
Guruji ne diya dilaasa aur itna pyaar
Dil ke liye marham banaa Unka dulaar.

Jabb zindagi ke safar mein koi pyaara sa saathi bichhad gaya
Ya aashaaon ke aangan ka chaman ujad gaya
Guruji ne santvanaa dekar samjhaaya
Aur protsaahan dekar aagey badhaaya.

Jabb kabhi chalte chalte paaon thakne lage
Jabb madhur sapnon ke khatm honei par hum jagey
Guruji ne diya sahaara aur bakhsha utsaah
Aur dikhaayee hakeekat ko apanaane kee raah.

Jabb har oar chhaaya andhera
Kaheen duur takk bhi na dikha savera
Guruji ne Apni divyata kee lau ko kiya aur bhi ujjwal
Aur toad diya andhere ka saara bal.

Chaahe bhakt ho ullaas ke upvan mein
Ya phir ho udaasi ke uss maayoos kshan mein
Guruji bheetar aur saath saath rehte Hain
Bhakt ke kalyaan kee baat sada kehte Hain.

Koi swaarth nahin Unke pyaar mein
Bhakt kee khairiyat hai Unke har vichaar mein
Isliye kyun kaheen aur jaana yoon bekaar mein
Jabb hamaari jannat basee hai Guruji ke deedar mein.

Isliye hokar har sukh dukh se bekhabar
Apne astitva par honei dein Guruji ke prem ka yoon asar
Ki usee mein khokar jeevan kar lein basar
Aur jannat takk pahunchne ke liye tayy kar lein ye safar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 28, 2021

Om Namaha Shivaya
Aaj Ka Suvichaar 🙏🏻🙏🏻 # 1409

                        Har Din

Har din ek chunauti sa hai
Har din ek ashirwaad bhi
Har din mein kuch anchaaha ho shaayad
Lekin har din hai prasad bhi.

Har din mein khwaab bante bhi hain
Aur toot-te ya sach hotey hain
Har din hum kuch paate bhi hain
Aur kabhi kabhi kuch kuch khotey hain.

Har din mauka hai vichaarne ka
Ki hamein chaahiye kya zindagi se
Paramatama se Unhee ko maang lein
Aur anand lein Unkee bandagi se.

Har din maang lein kshamaa
Har din bator lein samaa
Guruji se baatein karne ka
Mann ke asuron se ladne ka.

Har din badhaate chalein simran
Har din dhyan mein rahein magan
Har din sudhaarein apne karam
Har din sewa mein lagaayein lagan.

Har din atma-bal badhaayein
Har din Guruji ke gunn gaayein
Har din Guruji ke kareeb aayein
Har din Unhee ko samarpan karte jaayein.

Har din Guruji ke dum se hai
Guruji par poori tareh se nirbhar
Isliye har din ko maan ke avsar
Unhe Shukrana karein umr bhar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 27, 2021

Om Namaha Shivaya
Aaj Ka Suvichaar 🙏🏻🙏🏻 # 1408

Na Koi Thaa Unse Pehle, Na Hua Koi Unke Baad

Jab takk rahenge ye dharti aur aasmaan
Jabb takk rahega ye jahaan
Uske bhi baad takk hoga Guruji ka gungaan
Kyunki Ve Hain MahaShiv Bhagwaan.

Jeevan ke chakravyuh ke daata Hain
Poore vishwa ke vidhaata Hain
Brahmagyan ke gyaata Hain
Srishti ke nirmaata Hain.

Na insaan ka rangg rahega na roop
Shaayad kabhi mitt jaaye ye chhaaon aur dhoop
Lekin Jinke kehne par hawaa ruk jaaye
Aur ye aasmaan bin hichkichaaye jhuk jaaye
Unn Guruji kee maujoodagi hai anant
Ve Hain sabhi devi devtaaon ke bhi Bhagwant.

Ve toh swayam divya prakash Hain
Ve nahin Hain chaand ya taaron par nirbhar
Balki chaand aur taare bhi
Unhe khush karne ka dhoondhte hain avsar.

Har phool kee hoti hai ye arzoo
Ki Guruji ke charnon mein aakar tarr jaaye uskee rooh
Guruji ke charnon ko dhone ke liye jal kee har boond tarasti hai
Baarish bhi Unkee agya paakar hee baadalon se barasti hai.

Na jad na chetan ka astitva hai Guruji ke bin
Unkee agya se hee hotey hain raat aur din
Unke bhakt Unkee dee hui saugaatein nahin sakte gin
Chaahein bhi toh kabhi nahin chuka sakte Unka rin.

Isliye karte rahein Guruji ka hum dhanyawaad
Unkee kripa se hai hamaari duniya aabaad
Na koi thaa Unse pehle, na hua koi Unke baad
Yeh satya hai, jismein na hai koi tark ya vaad-vivaad.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 26, 2021

Om Namaha Shivaya
Aaj Ka Suvichaar 🙏🏻🙏🏻 # 1407

        Guruji Ke Naam Kee Chunri

Guruji ke naam kee chunri jabb se hai odhi
Badi se badi mushkil bhi ho gayi hai thodi
Yoon badal diya Guruji ne nazariya
Yoon sanvar gaya Unkee mehar se ravaiya
Ki lagne lagaa kuch sambhalaa sa jeevan ka safar
Guruji sangg hotey Hain jahaan bhi le jaati hai dagar.

Jabb se simran ka gehna hai mainey pehna
Tabb se aisee saj gayi mai ki kya kehna
Jo itnee aasaani se aate thei, ve aansoo kumm ho gaye behna
Aur aatmabal badhaa toh saral ho gaya kaafi kuch sehna.

Jabb se Guruji ne sewa mein lagaaya
Tabb se vyarth kee baaton se mann hatt paaya
Abb toh aathon pehar Guruji ka roop mann mein hai samaaya
Jiska noor mere bheetar aur baahar hai chhaaya.

Guruji ke satsang mein sunn kar aur kar ke Unkee mahima ka gungaan
Prassannataa itnee hoti hai ki shabdon mein na kar paaoon bayaan
Chaahe poora vishwaas hai ki Ve Hain MahaShiv Bhagwaan
Phir bhi har satsang se milta hai Unkee keerti aur kanti ka aur bhi gyan.

Andhvishwaas aur vehem se Guruji ne kar diya duur
Guruji kee hee baatein karne aur sunn-ne ka rehta hai fitoor
Unka noor itna ujjwal ki Unke aagey dikh bhi na paaye kohinoor
Unke pyaar mein is kadar kho jaaoon ki mera ‘mai’ ho jaaye chuur chuur.

Guruji ke naam kee chunri lagti hai bahut hee pyaari
Guruji kee har baat par mai jaaoon vaari
Unkee mahima hai kitnee kalyaankaari
Ki duvidha duur ho jaati hai saari
Guruji hee Hain Vo karunanidhaan leeladhari
Jinke charnon mein kabhi toh zaroor aayegi moksh milne kee baari.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 25, 2021

Om Namaha Shivaya
Aaj Ka Suvichaar 🙏🏻🙏🏻# 1406

                Vyom Se Aayi Vaani

Vyom se aayi vaani
Ki pal do pal kee hai zindagaani
Jisne iskee kadar na jaani
Badkismat hai veh praani.

Vyom se aayi vaani
Aye insaan, kyun ho gayi hai teri jaat nimaani
Na bhool ki Guruji Hain antaryami
Unke hukm kee mohtaaj hai sabke jeevan kee kahaani.

Vyom se aayi vaani
Ki amrit bann jaata hai veh paani
Jismein Guruji ke charan hain dhulte
Aur uss se bhakton ke bhaagya hain khulte.

Vyom se aayi vaani
Ki simran kee daat hai suhaani
Simran mein doob kar ho paata hai dhyan
Aur mil jaata hai asal gyan.

Vyom se aayi vaani
Ki Guruji ke kahe anusaar
Gupt paath, sewa, aur daan zaroori hai karna
Punya poora nahin hota varna.

Vyom se aayi vaani
Ki maaf ho jaati hai uss naadaan kee naadaani
Jo banda bannkar nibhaata hai insaaniyat
Kyunki uskee soch aur karmon mein buss jaati hai ruhaaniyat.

Vyom se aayi vaani
Ki jisne Guru kee baat hai maani
Veh tarr jaayega aaj nahin toh kal
Isliye kyun na Guruji ka kehna maanein har pal.

Vyom se aayi vaani
Guruji Hain kripa karne wale sundar swami
Saari sangat hai pyaare Guruji kee deewani
Guruji kee badi vaddi hai meharbaani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 24, 2021

Om Namaha Shivaya
Aaj Ka Suvichaar 🙏🏻🙏🏻# 1405

  Na Kar Tu Gumaan

Na kar tu gumaan
Tujhse kaheen zyada shaktishali hai ye aasmaan
Veh toh rok leta hai agar rokna chaahe koi tufaan
Teri koi aukaat hee nahin, na reh tu is tathya se anjaan.

Tu kathputali hai, teri doar chalaate Hain Bhagwaan
Tera har vichaar jaante Hain Guruji meharbaan
Tu hai tuchh, Ve Hain MahaShiv mahaan
Shukr kar ki Unhonei tujhe diya hai jeevan ka daan.

Kya hua agar tu hai mashhoor
Na kar is baat ka guroor
Sab mitti mein mil jaana hai
Jabb uss paar se bulaava aana hai.

Achcha hai agar tu hai dhanwaan
Lekin dhan daulat hain pal do pal ke mehmaan
Guruji ke naam ka dhan jod le
Vyarth ke jhamele chod de
Karta chal niswaarth sewa bin dhindhore peete
Hota chal Guruji ke kareeb jaise jaise samay beete.

Sewa aur simran ka dhan aayega kaam
Usee se milega moksh ka inaam
Agar moksh jald paane kee hai ichcha
Toh karna hoga jo atma ke liye hai achcha.

Sanskaar sudhaar le
Jeevan sanvaar le
Yaheen par karmon ka karz utaar le
Guruji ka naam baarambaar le.

Niswaarth bhakti ke ashru beshak ro le
Guruji ke ashish ke amrit se dho le
Vikaaron se maylii hui antakaran kee chaadar
Aur kar le Guruji ke har vachan ka aadar.

Guruji ke kahe anusaar banda bann
Nirantar prayaas se nirmal kar le mann
Antt vele kaam aayega buss yahee dhan
Ye na hua toh antt mein tu reh jaayega nirdhan.

Na rahega astitva, na rahega shareer
Naam kamaa kar nikhaar le apni taqdeer
Keh gaye hain bade bade santt aur peer
Ki Guru shehenshah Hain aur hum sab hain fakeer.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 23, 2021

Om Namaha Shivaya
Aaj Ka Suvichaar 🙏🏻🙏🏻 # 1404

        Sunn Leejiye Aaj Meri Ardaas

Pyaare pyaare Guruji,

Meri har saans hai dein Aapki, mere daata
Aur kitnee saansein bachi hain, uske bhi Aap Hain gyaata
Mai toh agyaani anjaan hoon
Aapki nimaani santaan hoon.

Har janam mein Aap nath Hain mere
Chaahe lagaaoon jitne bhi janmon mein phere
Aapki mehar kee rahoongi sada mohtaaj
Aur Aap sada hongei mere sartaaj.

Meri har saans mein piroh deejiye Apna ashirwaad
Mere chitt kee ruhaaniyat hai Aapki mehar se aabaad
Jabb jaana hoga yahaan par jeene ke baad
Toh bhi ek Aap hee samjhenge mere jazbaat.

Is paar bhi rakhna Apni sharan mein Guruji
Aur antt vele Apni goad mein bitha kar rukhsat honei dena is jahaan se
Uss paar bhi sambhaale rakhna mere Maalik
Varna kiske paas jaaoongi vahaan se.

Aapki rehmat se zinda hoon
Aapki izaazat se hee maroon
Yahee hai is nacheez kee arzi
Daata, baaki jaise Aapki marzi.

Abb aur kuch bhi kaha nahin jaaye
Aapke saath bin kaheen raha nahin jaaye
Aapse vichhoda kisee bhi haalat mein seh na paaoongi
Sunn leejiye aaj meri ardaas, kal antt vele shaayad keh na paaoongi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 22, 2021

Om Namaha Shivaya
Aaj Ka Suvichaar 🙏🏻🙏🏻 # 1403

             Aap Hongei Sada Saath

Pyaare pyaare Guruji,

Mai kabhi bhool bhi jaaoon Aapko
Jaanti hoon ki Aap kabhi na mujhe bhoolenge
Aapki sharan mein aa gayi Aapki mehar se
Yakeenan abb janam janam ke paap dhulenge.

Aisee kripa banaaye rakhna, mere Parwardigaar
Ki Aapki bhakti mein beet jaaye har pal aur har vaar
Aapki rehmat ne sambhalaa hai ghar parivaar
Aapki inaayatein hain beshumaar.

Bin kuch liye Aap kalyaan kee daat diye jaate Hain
Bhakt nibhaayein ya nahin, Aap Apni oar se har tareh rishta nibhaate Hain.

Shukrana hai Aapka aur uss pal ka
Jisne Aapka hukm maankar mujhe joda Aapke sangg
Indradhanush bhi pheeka laagey
Itna gehra hai Aapke sangg rishte ka rangg.

Aur koi nahin jo galatiyon ko Aapke jaise karey nazar-andaaz
Aur koi nahin jiskee maujoodagi ka hota hai itnee kareebi se ehsaas
Aapke sangg ka rishta hai rishta sabse khaas
Isee se utsaah milta hai jabb kabhi mann hota hai udaas.

Aap mein khoyi hui meri rooh
Aapki veh ruhaani khushboo
Divyataa ka sukhad anubhav
Hua hai Aapki leela se sambhav.

Har pal mujh par hoti hai Aapki mehar-e-nazar
Aur uska ho raha hai jeevan par yoon bakhoobi asar
Ki ummeed mein buss gaya hai atoot vishwaas
Ki Aap sadaa bheetar bhi Hain aur Hain aaspaas.

Yoon hee sadaa angg sangg rahenge Aap
Kismat ke har kissey ko prabhaavit karega Aapka prataap
Karte karte Aapke naam ka jaap
Seh loongi agar aayega dukh santaap
Buss, Aap hongei sada saath
Toh antt mein bann jaayegi agar bigdi bhi hogi koi baat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 21, 2021

Om Namaha Shivaya
Aaj Ka Suvichaar 🙏🏻🙏🏻# 1402

Adhyaatmik Pahaad Par Aagey Badhein

Pahaad par se utarnaa hota hai chaahe aasaan
Pahaad par chadhna hota hai kathin aksar
Isliye agar manzil pahaad kee oonchaayee par hai
Toh na jaane dena pahaad par chadhte jaane ka avsar.

Adhyaatmik oonchaayee ka raasta beshak hai pahaad kee bhanti
Lekin adhyaatmikta kee oonchaayee par miltee hai anant shanti
Isliye is pahaad par chadhne mein hai insaan ka kalyaan
Is oonchaayee ko sambhaale huey khade Hain swayam Bhagwaan.

Is pahaad ko chadhte samay
Aaye koi tufaan ya pralay
Toh bhi hum himmat na haarein
Guruji baithey Hain hamein taarne.

Adhyaatmik pahaad ke raaste par insaaniyat ke bhi paath hain
Aur Guruji har kshan hamaare bheetar aur hamaare saath Hain
Adhyatmik pahaad ke raaste par Bhagwaan se duuri kumm hokar khatm ho jaati hai
Aur Guruji kee leela kee anubhooti si ho jaati hai.

Ve khayaal rakhenge hamaara
Denge har vipatti mein sahaara
Dekhenge Ve hamaari neeyat aur mehnat
Aur har pal barsaayenge Apni rehmat.

Guruji hamein girne se bachaayenge
Agar gir gaye toh phir se uthaayenge
Unke naam ka simran jo hum karte jaayenge
Toh avashya lakshya takk pahunch paayenge.

Pahaad par se utarnaa shaayad lagey aasaan
Lekin yeh soch bhi apne mein hai ek imtehaan
Utar bhi gaye toh vaapis chadhna pehle se zyada mushkil lagega
Aur kabhi na kabhi hamaara zameer jagega.

Kisee ke behkaave mein aakar
Raaste se nahin hona hai vimukh
Chaahe aayein kitne bhi dukh
Isee raaste par hai param sukh.

Guruji toh kahein banda bann-ne ko
Aur ye ki hum Unse rakhein seedha naata
Koi aur beech mein na aaye is naate ke
Varna is rishte ka saundarya na hai reh paata.

Isliye chaliye chadhte chalein
Adhyaatmik pahaad par aagey badhein
Chaahe is safar ke dauran anginat sooraj dhalein
Chaahe rituon ke aane jaane mein phool khilein ya patte jhadein
Hum Guruji ka naam lekar prayatna karein pahunchne ka uss oonchaayee par
Jis par hamaare pahunchne se hum se prassann hon hamaare Guruvar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 20, 2021

Om Namaha Shivaya
Aaj Ka Suvichaar 🙏🏻🙏🏻# 1401

       Qayamat Bhi Aa Jaaye Toh

Pyaare Guruji,

Suna thaa ki Aap sangat ka haath nahin chodte
Kabhi bhi apne bhakton se muh nahin modte
Aur dekha bhi hai is sundar satya ko
Jaana bhi hai is taarne wale tathya ko.

Phir bhi aaj ye ashru chaahein behna
Dil chaahe Aapse ye kehna
Ki kabhi na chodna mera haath, mere taaranhaar
Kabhi na thukraana mera saath, mere paalanhaar.

Jeevan ka bhavsaagar tarangi sa hai
Kalyuga ka charitra satrangi sa hai
Yahaan khoobsoorat mausam ke saath saath
Aksar karni padti hai aandhi aur tufaan se bhi baat.

Beech majdhaar mein bhanvar hai
Is baat kee bakhoobi khabar hai
Lekin zaroori hai jaana uss paar
Isliye minnatein karti hoon Aapse baar baar
Ki kripa kar subuddhi deejiye
Subuddhi ke sangg shuddhi deejiye.

Imtehaan beshak leejiye
Lekin safalta deejiye
Aisee safalta, jo Aapki raza mein ho
Aur mera har karam Aapse wafa mein ho.

Aayenge jaayenge ye duniyaadaari ke jhamele
Chalte rahenge is jeevan mein maya ke mele
Karmon ka hisaab jo chukaana hai
Yahee toh zindagi ka fasaana hai.

Mere jeevan kee raat ke chaand aur taare Hain Aap
Mere jeevan ke din ke sooraj roopi sahaare Hain Aap
Raat andheri honei par Aapki divya jyot hee chiraag hai
Aapne sweekaara hai mujhe, jabb ki na jaane meri atma par kaun kaunsa daag hai.

Aap sada angg sangg rehna, kyunki ye jhamele mai akele na jhel paaoon
Vo hunar nahin hai mujh mein jis se mai bheetar se kuch aur oopar se kuch aur dikhaaoon
Mujhe aisa hunar seekhna bhi nahin
Kyunki Aapki nazaron mein veh sahi nahin.

Aisee hee hoon mai, kya karoon
Aapka sahaara hai, isliye kabhi na daroon
Aapki dikhaayee raah par chalti jaaoon
Aapki mamta bhari goad mein palti jaaoon.

Aapke sambhaalne se sab kuch sanvar hai jaata
Aapke ashirwaad se jeevan sudhar hai jaata
Mera chitt sada Aapka Shukrana rahe gaata
Ye Shukrana apne sangg himmat kee daat hai laata.

Yoon hee sambhaale rakhna mujhe mere daata
Mera dil Aapse judey rehkar sukh hai paata
Is rishte ke sukh mein yoon masroof rahoon
Ki qayamat bhi aa jaaye toh mai uff takk na kahoon.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja