Author: dhirjabhat

June 23, 2021

Om Namaha Shivaya
Aaj Ka Suvichaar 🙏🏻🙏🏻# 1221

Kripa Kar Le Chalna Vaheen

Bahut royi jabb jagg mein aayi,
Jaate samay na roun mai,
Aisee kripa karna Guruji,
Ki Aapki goad mein soun mai.

Karmon kee hoon mai maari,
Lekin bhaati nahi yeh char deewaari,
Char deewari is duniyawee bandhan kee,
Dhun rehti hai buss Aapke vandan kee.

Abhi yeh atma hai bahut kamzor,
Pareshaan karta hai isey jagg ka shor,
Atma-bal aisa deejiye mujhe,
Ki ruhaaniyat kee bel par chadhti jaaoon,
Aapke hee simran mein leen rehkar jaagoon,
Aur Aapke khayaalon mein hee sooraj ke jaise dhal jaaoon.
Aapki karuna se itnee bheetar chali jaaon,
Ki anaasakti se yeh jeevan jee paaoon,
Baahar ka shor na sataaye mujhe,
Apne hee bheetar itnee shanti paaoon.

Aapki dee hui shiksha ko,
Aapki dee hui deeksha ko,
Is kadar aatmasaat karoon,
Ki kisee se bhi na daroon.

Kitne janmon ke karmon ka bojh hai mere khaate mein,
Isliye jaanti hoon ki ye sab nahin hai aasaan,
Lekin Aap hee mere naath aur mere murshid Hain,
Aur Aap hee Hain mere Bhagwaan.

Suna hai kuch virle aadaraniya insaan,
Jeete jee mukt hokar jeevan mukt kehlaate hain,
Lekin mujh mein veh kaabiliyat nahin,
Mujhe toh na jaane kitne aur janam bulaate hain.

Lekin Aapki mamta aur mehar se,
Kabhi toh mulaakaat hogi uss sehar se,
Jahaan sooryaast shaayad hota na ho,
Aur koi agley janam mein khota na ho.

Aapse pyaara koi nahin,
Kripa kar le chalna vaheen,
Jahaan Aapke siwa kuch nazar na aaye,
Jahaan Aapse milan kee manzil mil jaaye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 22, 2021

Om Namaha Shivaya
Aaj Ka Suvichaar 🙏🏻🙏🏻 # 1220

           Mujh Deen Kee Vintee

Justuju hai ki Aapse,
Aapko hee paa loon, Guruji,
Fariyaad hai ki kabhi kisee bhi vajeh se,
Simran ke pal na ganvaa loon, Guruji.

Jo bhi sajeev ya nirjeev kaaran,
Mujhe Aapse karne lagey duur,
Aapki kripa se mai uss kaaran kee taaseer se,
Na ksheen honei doon apne chitt kee oorja ka noor.

Kisee vajeh se uss kaaran se duur hona,
Na ho agar mere liye mumkin,
Toh mai Aapke dikhaaye raaste par chalti chaloon,
Uss kaaran se prabhaavit huey bin.

Simran kee aisee deejiye daat,
Ki mujhe pareshaan na karey koi bhi baat,
Aur deejiye mujhe aisa atma-bal,
Ki Aapse duur karne wali har baadha jaaye tal.

Sadaa apni aukat mein rahoon,
Kewal Aapke bhaav mein bahoon,
Aapse jude rehne ke liye jo bhi paristhiti sehni padey,
Aapki dee hui himmat se mai har uss paristhiti ko sahoon.

Deenanath Hain Aap, Guruji,
Mujh deen kee vintee bhi sweekar leejiye,
Mere hriday mein sadaa Aapka vaas rahe,
Aap kripa kar mujhe yeh vardaan deejiye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 21, 2021

Om Namaha Shivaya
Aaj Ka Suvichaar 🙏🏻🙏🏻# 1219

   Sabse Surakshit Thikaana

Haath dhoondhta hai ek aisa saath,
Jo le usey is tarehn se thaam,
Ki veh saath kabhi na chhoote,
Chaahe aa jaayekaisa bhi tufaan.

Dil dhoondhta hai aisa dil,
Jis ke sangg veh aise jud jaaye,
Ki beshaq har koi dil toad de,
Yeh dil kabhi dooji taraf na mud paaye.

Naata dhoondhta hai aisa naata,
Jiske sangg veh saamanjasya rahe nibhaata,
Ki chaahe har rishta ho jaaye khatm,
Yeh rishta barkaraar rahe har janm.

Meet dhonndhta hai ek aisa meet,
Jiske saath gehri hoti chale preet,
Aur insaan dhoondhta hai aisa Bhagwaan,
Jo har pal ho uspar meharbaan.

Guruji hee veh meet Hain,
Guruji hee Hain Guru ke roop mein Ve Bhagwaan,
Guruji ka dil sada wafaa nibhaaye,
Guruji ka haath kabhi na chod kar rulaaye.

Phir aur kaheen kyun jaana,
Jabb Guruji kee sharan mein hain saare sukh,
Guruji ne tumhe sweekaara hai,
Toh Ve har lenge tumhaara har dukh.

Isliye Guruji kee bandagi kee doar ke liye karo shukrana,
Kisee bhi haal mein buss Guruji ko na bisraana,
Apne kalyaan ke liye tum kaheen aur na jaana,
Kyunki sampoorna srishti mein yahee hai sabse surakshit thikaana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 20, 2021

Om Namaha Shivaya
Aaj Ka Suvichaar 🙏🏻🙏🏻 # 1218

               Parampita Pyaare

Parampita pyaare, Guruji hamaare,
Aapki izaazat se pahunche hain hum Aapke dwaare,
Aapne hee Hain hamaare kaaj sanvaare,
Hum sab toh chal rahe hain buss Aapke sahaare.

Aapne hum sabko goad mein liya,
Har pal itna laad aur pyaar hai diya,
Aapne Apne aanchal se aansoon ponchhe Hain hamaare,
Hamaare liye andhere mein akash mein sajaaye hain chaand aur taare.

Hamaara haath thaam kar hamein chalna sikhaaya,
Hamein sahi aur galat mein fark dikhaaya,
Andhvishwaas se duur rehne kee prerna dee,
Vikaaron ko tyaagne kee chetna dee.

Hamaari galatiyon ko Aap karte Hain maaf,
Hamaare mann ko Aap karte Hain saaf,
Aur phir hamein sikha kar jeene ka paath,
Rehte Hain har pal hamaare saath.

Aapne dee hai hamein nek jeeven jeene kee yogyataa,
Aapne dee hai hamein sachchaayee ke liye khade honei kee kshsmtaa,
Buss Aapke nakshe kadam par chal paayein,
Aur Aapke ashirwaad se Aapke gunn sadaa gaayein.

Shukrana shukrana Aapka,
Jo Aapne sadaa nibhaaya hai saath,
Shukrana Shukrana Aapka,
Ki Aap Hain hamaare naath.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 19, 2021

Om Namaha Shivaya
Aaj Ka Suvichaar 🙏🏻🙏🏻# 1217

           Ruhaani Suhaani Yatra

Chaahe kabhi kabhi yeh yatra hoti hai tufaani,
Phir bhi samast roop se hai bahut suhaani,
Guruji kee kripa se hee banee hai yeh yatra ruhaani,
Usey manzil milnee nishchit hai jisne pyaare Guruji kee baat hai maani.

Har seedhi par badh jaati hai chaahat,
Aur bhi seedhiyaan chadhne kee,
Har seedhi chadhte huey aur bhi sunaayee deti hai aahat,
Guruji ke sangg chalne kee.

Chalte Hain Ve sab par daalte huey Apni nazar,
Aur sajaate Hain chunautiyon se hamaara safar,
Safar mein idhar udhar se jaane-anjaane mein aakraman kar dete hain paanch chor,
Kaam krodh lobh moh ahankaar, ye chor kheenchte hain apni oar.

Is safar mein safaltaaon kee raunak mein,
Kabhi toh Guruji kee aahat sunaayi deti hai, lekin kabhi kabhi nahin,
Kabhi apni galatiyon ka ehsaas hota hai, Kabhi lagta hai ki hum kar rahe hain sab sahi.

Kabhi pachhtaava hota hai, kabhi kabhi nahin,
Kabhi seekhte huey aagey badhte hain, kabhi ruk jaate hain vaheen,
Guruji, sumat bakhshiye ki seedhiyan chadhte huey,
Dagamagaa na jaayein hum kaheen.

Girne lagein hum toh kripa kar sambhaal lena,
Kuch samajh na aaye toh apni suraksha ke saanche mein dhaal lena,
Peechhe reh jaayein toh Apni mamta se aagey chalne kee subuddhi dena,
Mann mein anuchit khayaal jo aaye toh mann ko shuddhi dena.

Seedhiyaan chadhte chadhte thakk jaayein toh himmat dena,
Oopar pahunchte pahunchte kamzori aaye toh taakat dena.
Karmon ka bhaari bojh abb aur nahin uthaaya jaata,
Aapki kripa se nishkalank ho jaaye karmon ka khaata.

Niraash ho jaayein toh yatra ko asha ke chiraag se kar dena ujjwal,
Galat kadam uthaane lagein toh roak lena hamein usee pal.
Aapko paane kee tamanna hee ho hamaari yatra kee manzil,
Isee tamanna ko poori karne mein ramm jaaye yeh dil.

Aapke kadmon kee aahat ka sadaa rahe hamein dhyan,
Hameshaan rakhein soch aur karam mein hum imaan,
Karte rahein yatra mein Aapki mahima ka gungaan,
Har pal Aapko hum apna shukrana karein bayaan.

Hamaare shareer ke khoon ka har katra neevenpann mein jaaye rangg,
Is yatra ke dauran itna sudhar jaaye hamaara jeene ka dhangg,
Ki hamaare mann mein sabke liye sadbhavna samaaye,
Aur yatra ke antt mein Aapse shubh milan ho jaaye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 18, 2021

Om Namaha Shivaya
Aaj Ka Suvichaar 🙏🏻🙏🏻 # 1216

Hai Meri Yeh Khwaahish

Yeh dil kee hai dastaan,
Karna chaahti hoon bahut kuch bayaan,
Mann hai ki Guruji se sab kuch kahoon,
Phir yaad aata hai ki chaahe chup bhi rahoon,
Guruji ko toh maalum hai sabb,
Kyunki Ve toh Hain sabke Rabb,
Rabb bhi aise ki har Devi Devta dein Unhe sammaan,
Rabb aise Jinhe poojta hai saara jahaan.

Dil kee dastaan ko dil mein sambhaale,
Khaamoshi kee bhaasha mein kar deti hoon bayaan,
Guruji se kuch bhi chhupa kahaan,
Ve toh Hain antaryaami mahaan.

Unke MahaSamadhi lene se pehle,
Unse milee nahin hoon,
Chaahe is safar mein mai,
Kuch kuch abhi nayee hoon.

Lekin itna toh maanti hoon,
Aur itna toh jaanti hoon,
Ki Guruji har pal saath Hain,
Bheetar bhi aur baahar bhi,
Har sangat ke sangg rehte Hain Ve,
Baahar bhi aur ghar par bhi.

Jabb takk saans rahe is shareer mein,
Guruji, Aap basey rehna meri taqdeer mein,
Kyunki is se zyada khushkismati ho sakti nahin,
Ki jahaan taqdeer le jaayegi, Aap hongein vaheen.

Isey bheekh samajhiye ya guzaarish,
Buss, hai meri yeh khwaahish,
Aapka naam lekar na jaagoon, aisa koi prabhat na ho,
Aapka naam liye bin neend aa jaaye, aisee koi raat na ho.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 17, 2021

Om Namaha Shivaya
Aaj Ka Suvichaar 🙏🏻🙏🏻 # 1215

     Paramatama Aur Pooran Guru

Na samaaye jinka noor kisee chitr mein,
Na samaaye jinkee mahima kisee kavita ya geet mein,
Na seemit hai jinkee leela rangon se bani kisee bhi tasveer mein,
Na milega jinka aishwarya kisee bhi jaageer mein,
Ve Hain hamaare MahaShiv Guruji mahaan,
Jinke niyantran mein hai yeh saara jahaan.

Guruji mamta aur sneh kee moorat Hain,
Unke saare swaroop kitne khoobsoorat Hain,
Guruji kee kripa se har swaroop Guruji ka hee roop hai,
Har swaroop anokha, divya, aur anoop hai.

Guruji toh Bhagwaan Hain,
Har bandhan se parey Hain,
Buss, Apne bhakton ke adheen Hain,
Jinke liye Ve sabse bade Hain.

Unke aagey hamaari koi aukat nahin,
Kuch nahin hai yahaan jo Unkee dee hui saugat nahin,
Unke ishaaron par waqt chalta hai,
Unkee marzi se sooraj uday hota aur dhalta hai.

Ve swarantra Hain, Sarveshwar Hain,
Param paawan Hain, Parmeshwar Hain,
Ve Brahmaand ke shehenshah, hum Unke gulam hain,
Hum hain Unke kinkar jo karte Unhe salaam hain.

Aseem Hain, anant Hain,
Naath Hain, Bhagwant Hain,
Adviteeya aur anupam hai Unkee mahima.

Jahaan hamaari soch khatm hoti hai,
Vahaan se Unkee soch hoti hai shuru,
Kyunki Guruji hee Hain Paramatama,
Aur Ve hee Hain pooran Guru.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

une 16, 2021

Om Namaha Shivaya
Aaj Ka Suvichaar 🙏🏻🙏🏻 # 1214

       Shehar Mein Aaya Ek Fakeer

Shehar mein aaya ek fakeer,
Subah shaam Maalik ka naam lete huey,
Thaa bin kisee moh maya kee zanjeer,
Jaata thaa sabko dua dete huey.

Din ho ya ho raat,
Karta thaa gairon se bhi baat,
Lekin apnapan chhalkaata thaa,
Sabka dukh dard samajh jaata thaa.

Na usey bhookh lagti thi na pyaas,
Na hoti thi usey kisee dhan daulat kee aas,
Buss, rehta thaa Veh sadhna mein,
Na jaane kis kee upaasna mein.

Uske aane se kheton kee hariyaali badhne lagi,
Sooraj kee kirnon ke liye taraste shehar mein dhoop chadhne lagi,
Har oar khushhaali chha gayi,
Sabke chehron par raunak aa gayi.

Saamanjasya badh gaya samaj mein,
Unnati hui sabke kaam kaaj mein,
Rachnaatmakata chhoone lagi oonchaayee,
Aur adhyaatmik gyan kee ujjwalta chhaayi.

Ek din fakeer ke jaane ka samay aaya,
Shehar ka har jann bahut ghabraaya,
Jabb fakeer ne apna faisla sunaaya,
Kisee ne kaha, jaao matt, toh kisee ko bahut rona aaya.

Lekin veh toh ek fakeer thaa, ya kahoon usey bairaagi,
Jisey dekhkar har jann ke mann mein ruhaaniyat jaagi,
Na jaane yeh khayaal aaya sapne mein ya hakeekat mein,
Kyunki yeh sabb dekhte dekhte mai neend se jaagi.

Jaana mainey, maana mainey,
Ki Guruji aaye roop mein fakeer ke,
Na jaane Unhonei kaunse rangg badle,
Meri kismat kee lakeer ke.

Lekin itna toh mai jaan gayi,
Aur bin sanshay ke maan gayi,
Ki ho gaya in swapn darshan se kalyaan,
Kyunki Guruji toh swayam Hain MahaShiv Bhagwaan.

Kaise karoon mai Guruji ka dhanyawaad,
Alfaaz kaafi nahin hain bayaan karne ke liye,
Buss, keh sakti hoon poore vishwaas ke saath,
Ki Unhonei jalaa diye meri bujhi kismat ke saare deeye.

Har janam mein liye huey har saans se bhi,
Shukrana karoon Unka toh hoga kumm,
Buss, har pal kehti hoon Shukrana Guruji,
Jabb takk saansein nahin jaati thumm.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 15, 2021

Om Namaha Shivaya
Aaj Ka Suvichaar 🙏🏻🙏🏻 # 1213

         Guruji Se Guzaarish Hai

Chehre ke nayyn bandd thei,
Magar khuley huey thei mann ke nayyn,
Saraahte huey Guruji ke saumya roop ko,
Unn nayynon ko mil raha thaa sukoon aur chayyn.

Bin kuch boley mann kee aankhein,
Bayaan kar rahin thi Guruji ko mann ka haal,
Guruji pyaar se sunn rahe thei,
Bin poochhe koi bhi sawaal.

Itna noor thaa chhaaya hua,
Kyunki Ishwar swayam thaa saamne aaya hua,
Anubhav ho raha thaa Gurbani ka madhur spandan,
Tabhi khushboo aayi jaise miley hon gulab aur chandan.

Aankhein kholne ke liye hui mai majboor,
Lagaa ki kuch kaaran hoga zaroor,
Uss anokhi si khushboo ka,
Jisne dard har liya rooh ka.

Dekha toh mere saamne mandaraa rahi thi ek titlee,
Itne shokh rangg thei uske maano chamak rahi ho bijlee,
Jahaan titlee mandaraati thi, khushboo bhi vahaan jaati thi,
Isliye titlee kee udaan ke saath saath hawaa bhi mehek si jaati thi.

Mann mein Guruji se hui mulaakaat,
Aur aankhein kholi toh bhi milee divya darshan kee saugat,
Guruji ka shukrana baarambaar,
Ki Unke darshan se mila itna pyaara pyaar.

Arzoo hai ki jidhar se bhi aayein,
Ye hawaayein Guruji ka paigaam laayein,
Abb toh chaahe aankhein khuli hon ya hon bandd,
Guruji se guzaarish hai ki Ve har pal nazar aayein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 14, 2021

Om Namaha Shivaya
Aaj Ka Suvichaar 🙏🏻🙏🏻 # 1212

                Zindagi Ke Pehlu

Zindagi ke pehlu hain kitne saare,
Sabhi aate hain hamaare dwaare,
Koi pehlu romaanchak toh koi sangeen,
Koi udaaseen, toh koi haseen.

Har pehlu kuch sikhaata hai,
Har pehlu kuch dikhaata hai,
Har pehlu is safar ka manzar hai,
Jiska hota hamaare karmon par asar hai.

Har pehlu par Guruji ka pehra hai,
Aur Unke ashish ka sehra hai,
Har pehlu ka mahatva hai,
Yeh baat bilkul satya hai.

Pehlu Guruji dwaara hee rachaaye huey hain,
Kyunki Ve Hain MahaShiv leela dhaari,
Hamaari har soch aur hamaare har karam se,
Ve bhaamp lete Hain neeyat hamaari.

Har pehlu mein apna kirdaar nibhaana hai zaroori,
Kyunki ek rangg manch hai yeh zindagi,
Tabhi toh ye yatra hogi poori,
Jismein madad karegi hamaari Guru bandagi.

Yoon hee samajh lein ki har pehlu hai ek imtehaan,
Jis se Guruji ko hoti hai hamaari asal pehchaan,
Chhupaa lein chaahe khud se aur saare sansaar se,
Lekin, kuch nahin chhupa hai hamaare Parwardigaar se.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja