Author: dhirjabhat

February 4, 2021

Om Namaha Shivaya
Aaj Ka Suvichaar 🙏🏻🙏🏻 # 1082

Apni Ruhaani Dastaan

Bahut naadaan aur anjaan hai tu,
Jo toone apne shareer ko apni pehchaan hai maana,
Dar-asal isee kee vajeh se hee kabhi kabhi,
Tujhe meetha nahin lagta Guruji ka bhaana.

Bhool gaya tu srishti ke is naatak mein,
Ki deh toh milee is kirdaar ko nibhaane ke liye,
Tu isey amar soch kar jee raha hai,
Guruji aaye Hain tujhe jagaane ke liye.

Apna safar is dharti par tayy karne ke baad,
Deh toh khatm ho jaayegi yahaan,
Na jaane phir atma yahaan se jaayegi kahaan,
Aur na jaane usey kaisa shareer milega vahaan.

In sawaalon se pareshaan honei ke bajaaye,
Guruji ko saump de aisa har sawaal aur jawaab,
Tere paas jawaab dhoondhne ka hunar nahin hai,
Tu yoon hee karega apna waqt barbaad.

Sadaa kalyanmayee hoga Guruji ka bhaana,
Tere adhyatmik safar ke vaaste,
Unse zyada teri chinta aur kisee ko nahin,
Ve Apne noor se ujjwal karenge tere raaste.

Guruji kee mehar se naadaani kee neend se tu jaag,
Na moh maya kee nirarthakta ke peechhe tu bhaag,
Nashwar shareer ka dhyan tu rakh zaroor,
Lekin na honei de swayam ko shareer ke haathon majboor.

Apni atma ke uddhaar kee oar dhyan de,
Guruji ka simran kar ke Unse adhyatmik gyan le,
Is gyan ke sahaare atma ke safar ko bann-ne thoda aasaan,
Aur Guruji kee rehmat se sanvaar le apni ruhaani dastaan.

Jitna hota chalega karmon ke hisaab ka khaatma,
Utne kumm shareer ko dhaaran karegi teri atma,
Utnee hee jald atma ka Paramatama se hoga milan,
Tabb hee kaheen jaakar safal hoga jeevan.

Isliye kar tu Guruji ka maan,
Kar le tu niswaarth sewa, simran, aur dhyan,
Padh kar tu Shiv Purana,
Guru aur Shiv ke advait isheetva ko pehchaan.

Shareer nashwar hai, yeh le tu jaan,
Is satya aur tathya ko le tu maan,
Kar ke apni atma ka khayaal aur sammaan,
Roshan kar tu apne Guruji ke naam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 3, 2021

Om Namaha Shivaya
Aaj Ka Suvichaar 🙏🏻🙏🏻 # 1081

       Guruji Hain Hee Itne Pyaare

Guruji ke har bhakt ko lagta hai,
Ki Guruji Unhee ke Hain,
Guruji Hain hee itne pyaare,
Ki Ve dar-asal sabhi ke Hain.

Sabhi se ek jaisa pyaar karein,
Har bhakt ko dete Hain mamta,
Sabka kalyaan karte Hain,
Har bhakt ko dete Hain kalyaanmayi kshamtaa.

Chaahe mukti chaahta hai poora jagg,
Sabke safar kee kahaani hai alagg,
Guruji safar mein sabki madad karte Hain,
Aur har ek kee jholi Apne ashish se bharte Hain.

Guruji trikal darshi Hain, aur sabka bhalaa chaahein,
Unke maargadarshan se ujjwal hoti hain sabki raahein,
Yeh ujaala pal bhar ka nahin, balki hota hai anant,
Kyunki yeh ujaala dene wale swayam Hain Bhagwant.

Aisee mamta, aisa pyaar,
Aur koi de sakta nahin,
Aisa maargdarshan, aisa dulaar,
Jo kabhi bhi rukta nahin,
Yeh mil sakta hai kewal pyaare Guruji se,
Jaise milte hain jeevandaayi sahaare Guruji se.

Guruji ka ashirwaad sabb par banaa rahe sadaa,
Sabb seekhein usee mein raazi rehna jismein ho Guruji kee raza,
Guruji ka Shukrana karte karte jeeyein aur marr jaayein,
Guruji ka Shukrana karte karte Unkee kripa se tarr jaayein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 2, 2021

Om Namaha Shivaya
Aaj Ka Suvichaar 🙏🏻🙏🏻 # 1080

                 Dayaa Kee Daat

Guruji se jo tera rishta juda hai atoot,
Kitne jhamelon se tu gaya hai chhoot,
Iska tu andaaza bhi nahin lagaa sakta,
Tera Guru tujhe mushkilon se bachaate huey nahin thakta.

Tera rishta hota jaayega Guruji se jitna gehra,
Teri atma ka bhavishya hota jaayega utna hee sunehra.
Tujhe tere dehadhaari jeevan ke kartavya karvaate huey,
Saath hee moksh kee taraf le jaate huey,
Guruji tujhe taarte jaayenge,
Aur tera aane wala kal sanvaarte jaayenge.

Tu shraddha aur vishwaas ko rakh barkaraar,
Aur buss karta chal Guruji se niswaarth pyaar,
Rab Hain Guruji, aur Hain pita aur meet,
Unke sangg nibhaata chal tu preet kee ruhaani reet.

Basaa kar mann mein Guruji ke naam ka kamal,
Jee le tu yeh jeevan bann kar taral,
Apne vyavhaar aur apne vichaaron ko rakh tu nirmal,
Aur safar ko saralta se sajaa kar ho lene de safal.

Ruhaani hawaa bhi degi har pal tera saath,
Divya jyot jalegi dil mein din aur raat,
Har sur har saaz mein Guruji kee hogi baat,
Devon Ke Dev teri dehadhaari atma ko denge daya kee daat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 1, 2021

Om Namaha Shivaya
Aaj Ka Suvichaar 🙏🏻🙏🏻 # 1079

         Nayee Disha

Abb aur udaas na ho tu,
Abb aur niraash na ho tu,
Duur kar de is niraasha kee nisha ko,
Apna le tu nayee disha ko.

Dishaa lega tu badal,
Toh dashaa bhi badal jaayegi,
Guruji kee oar tu chal,
Toh zindagi sanvar jaayegi.

Unhonei kiya hai tujhe sweekaar,
Toone ek kadam badhaana hai abb kee baar,
Tere ek kadam badhaane par Guruji teri oar sau kadam badhaayenge,
Toone jaisa kabhi socha bhi na hoga Ve vaisa parivartan kar ke dikhaayenge.

Koi bhi mushkil na aaye tere raaste mein, yeh toh mumkin nahin,
Kyunki pichhle hisaab chukaane hain,
Lekin is satya ke sangg tu chalta chal,
Ki toone saare lamhe Guruji kee sharan mein bitaane hain.

Zindagi kee kahaani ke har pehlu mein,
Tu apna kirdaar nibha imaandaari se,
Zindagi kee raah par tu chalta jaa,
Shraddha aur sadaachaari se.

Jo bhi ho raha hai aur jo bhi bhavishya mein hoga,
Veh sab Guruji kee nigraani mein hai,
Tu toh buss beintahaa Shukrana kar,
Ki pooran Guru teri zindagi kee kahaani mein hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 31, 2021

Om Namaha Shivaya
Aaj Ka Suvichaar 🙏🏻🙏🏻 # 1078

              Poori Kaayinaat Mein

Guruji ka darbar bada sundar hai,
Jis dil mein Hain Guruji veh dil mandir hai,
Jab mann mein Guru bhakti kee hai kalee khilee,
Phir kyun tu ghoomta hai dar dar gali gali?

Guruji mein dhyan lagaa le,
Guruji mein vishwaas jagaa le,
Guruji mein mann ko ramaa le,
Guru naam ka dhan tu kamaa le.

Baaki sab hai mithya moh maya,
Yeh jagg kisee ke kaam na aaya,
Yahaan har koi aur sab kuch hai paraaya,
Aaj nahin toh kal sabko ye samajh mein hai aaya.

Isliye jo tera apna hai Uspar dhyan de,
Guruji Hain tere apne Unhe maan de,
Unhonei naam ka daan diya hai,
Toone uss naam ka amritpaan kiya hai.

Abb uss amrit kee pavitrataa mein vaas kar,
Ek Guruji tere apne Hain Unpar vishwaas kar,
Unke simran se tu har shwaas bhar,
Aur roam roam mein ruhaaniyat ka ehsaas kar.

Unse jud gaya hai tu, yeh koi itefaaq nahin,
Yeh toh hai Guruji kee dee hui daat,
Guruji kee kripa kshanabhangur nahin,
Yeh toh hoti hai anant saugat.

Isliye duniya mein reh, lekin duniyadaari ko apne bheetar na tu rehne de,
Guru praapti ke apne uddeshya par dhyan de, jo koi bhi kuch kehta hai usey kehne de,
Bahut khushkismati hai teri ki Guruji ne tujhe hai sweekaara,
Poori kaayinaat mein kaheen na milega tujhe Guru itna pyaara.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 30, 2021

Om Namaha Shivaya
Aaj Ka Suvichaar 🙏🏻🙏🏻 # 1077

                  Ghabraa Matt

Ghabraa matt, buss, yoon hee chalta chal,
Jaisi bhi hon jeevan kee raahein,
Na bebasi mein tu haath mal,
Guruji ne bahut itminaan se thaami hain teri baahein.

Tujhe chhoone se pehle har vipda ko,
Guruji ka saamna karna padega,
Tera Guru sadaa teri raksha ke liye,
Har chunauti se tujhse bhi pehle ladega.

Phir tujhe kumm se kumm kasht sehna pade,
Isliye Ve tujhe thoda sa hee honei denge kasht,
Aur uss dauran bhi Ve saath hongei,
Aur baaki saare kasht kar denge nasht.

Isliye chod de poochhna Unse tu sawaal,
Unpar chod dega toh Ve hee sambhaalenge tera haal,
Baney Hain sadaa aur aagey bhi banenge Ve teri dhaal,
Ve MahaShiv Hain, ek Unhee se darta hai kaal.

Guruji Hain mahaan aur sarvshaktimaan,
Unke samaksh jhuka hai ye saara jahaan,
Tere saath Hain khud Guru ke roop mein Bhagwaan,
Tera toh baal bhi nahin baanka kar sakega koi tufaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 29, 2021

Om Namaha Shivaya
Aaj Ka Suvichaar 🙏🏻🙏🏻 # 1076

Keh Dena Sachche Dil Se Om Namaha Shivaya

Jabb andhere vash kuch bhi nazar na aaye,
Jabb har ve loag jo apne thei lagne lagein paraaye,
Jabb tere dil kee baat koi aur samajh na paaye,
Toh keh dena sachche dil se Om Namaha Shivaya.

Jabb tujhe kisee uljhan kee suljhan samajh na aaye,
Jabb kabhi samasya ka samaadhaan na mil paaye,
Jabb waqt kee raftaar ke beech tera haunsla toot jaaye,
Toh keh dena sachche dil se Om Namaha Shivaya.

Jabb roag kee peeda aur dukh sehna mushkil ho jaaye,
Jabb niraasha ke baadalon mein ummeed ka chaand chhup jaaye,
Jabb sooraj kee kiran tere dar aane se katraaye,
Toh keh dena sachche dil se Om Namaha Shivaya.

Jabb taqdeer tujhe raasta na dikhaaye,
Jabb duniyadari tere dil ko chot pahunchaaye,
Jabb tera mann sanshay se ghabraaye,
Toh keh dena sachche dil se Om Namaha Shivaya.

Jabb kabhi tera vishwaas dagamagaaye,
Jabb kabhi teri shraddha sharmaaye,
Jabb tera dheeraj hee adheer ho jaaye,
Toh keh dena sachche dil se Om Namaha Shivaya.

Har uljhan kee suljhan hai,
Har samasya ka samaadhaan hai,
Guruji ne tujhe yeh sikhaaya hai,
Phir tu abb bhi kyun pareshaan hai?

Om Namaha Shivaya ka japp karte rehne se,
Tera drishtikon, tera nazariya jaayega sudhar,
Jidhar bhi modein Guruji tere jeevan kee naiya,
Tu shikaayat chod kar shukrana karte huey chal de udhar.

Om Namaha Shivaya ke japp mein,
Samaaya hai MahaShiv Guruji ka vardaan,
Om Namaha Shivaya ke japp se,
Shareer aur atma, dono ka hai kalyaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 28, 2021

Om Namaha Shivaya
Aaj Ka Suvichaar 🙏🏻🙏🏻 # 1075

    Jabb Se Lagan Laagee

Jabb se lagan laagee,
Guruji ke naam kee,
Jabb se honei lagi chaahat,
Guruji ke dhaam kee,

Tabb se jeevan hee badalne lagaa,
Har vyarth khayaal mann se nikalne lagaa,
Jabb kabhi aane bhi lagta hai dobaara,
Toh bandd paata hai veh mann ka dwaara.

Sud budh sab kho gayi,
Guruji kee jabb se mai ho gayi.
Kabhi sotey sotey jaagi,
Toh kabhi jaagte huey hee so gayi.

Unhee ke sundar vichaaron mein,
Vyast hokar mai rehne lagi,
Unkee ruhaniyat se mehekti leheron ke sangg,
Mastt hokar mai behne lagi.

Mere jeevan ke din beet-te jaa rahe hain,
Guruji ke sahaare dukh aur sukh sab sahe hain,
Mere sukh aur mere dukh bhi Unhee kee nigraani mein hain,
Kyunki Guruji meri zindagaani ke pal pal kee kahaani mein Hain.

Na Unke bin ye deh hai, na hee hai yeh atma,
Ve Hain mere param pita, Ve hee Hain Paramatama,
Unhee kee nadar se atma tayy karti rahegi har safar,
Jabb takk veh pahunch na jaaye mukti ke dar par.

Tabb takk jeevanmukt honei ka vardaan de deejiye Guruji,
Apne se sadaa jude rehne ka daan de deejiye Guruji,
Aap hee mehar ke maalik Hain, Aap hee Hain mera vishwaas,
Aapse hee mera har shwaas hai, aur Aapka hee hai har shwaas mein vaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 27, 2021

Om Namaha Shivaya
Aaj Ka Suvichaar 🙏🏻🙏🏻 # 1074

             Kaheen Bhi, Kabhi Bhi

Kaheen bhi, kabhi bhi,
Guruji se tu baat kar,
Toh Ve sunenge, sunenge zaroor.
Tujhe bulaana bhi na padega,
Kyunki Ve kabhi gaye hee nahin tujhse duur.

Tere bheetar aur tere aaspaas,
Shudh karte huey tera har shwaas,
Tujhe har pal ashirwaad dete huey,
Teri vipda apne oopar lete huey,
Ve har kshan Hain saath tere,
Jabb takk tu le raha hai jeevan ke phere.

Tu hameshaan apne baare mein kehta rehta hai,
Jab ki tera Guru tere liye sab sehta hai.
Kabhi pyaar se Unhe keh de tu,
Ki tu kritagya hai, Unka aabhaari hai,
Kabhi toh Unhe keh de,
Ki Unkee muskaan bahut hee pyaari hai.

Unkee taareef kar, Unhe dhanyawaad kar,
Sabr se Unke sangg samvaad kar,
Kuch suna de Unhe, kuch sunn le Unkee,
Pehchaan kar le tu Unkee divyata kee dhun kee.

Itnee aasaani se tu sabse kehta phirta hai,
Ki Guruji sabke adhiktar kasht swayam par le lete Hain,
Kabhi toh Guruji ke baare mein bhi soch,
Ki khud takleef jhel kar kaise sabko sukh Ve dete Hain.

Kabhi toh Unse savinay anurodh kar dena,
Ki Guruji, Aap meri beemaari apne par na lena,
Guruji ko lagey toh sahi ki toone jo kiya iska zikr,
Toh kaheen na kaheen tere dil mein Unkee bhi hai fikr.

Ek janam ka nahin, Guruji ke sangg hai bhakton ka,
Janam-janmaantar ka naata,
Toone jo yeh jeevan paaya hai,
Yeh bhi Unkee mehar ke bina tu kabhi na paata.

Isliye chaahe tujhe kuch bhi pade sehna,
Unkee kripa se tu sadaa Unse jude rehna.
Jeevanmukt karenge tujhe aur aagey Sachkhand takk lekar jaayenge,
Jabb bhi aayegi teri baari,
Isliye Unke sangg rishta gehra kar le,
Aur karta chal tu Sachkhand jaane kee tayyaari.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 26, 2021

Om Namaha Shivaya
Aaj Ka Suvichaar 🙏🏻🙏🏻 # 1073

         Dhan Baba Deep Singh Ji

Amritsar ke Pahuwind gaaon mein roshan hua ek diya,
Jabb 26 January, 1682 mein Baba Deep Singh ji ne janam liya.
Ve janme Mata Jiooni aur pita Bhagtaa ke ghar mein,
Aur Unkee taqdeer badli Guru Gobind Singhji ke dar ne.

18 saal kee umar mein gaye Ve Anandpur
Sahib,
Jahaan Unhe praapt huey dasham pita ke darshan,
Amritpaan ka saubhaagya mila Unhe,
Aur kiya Unhonei sadaachaari ko apna sab kuch arpan.

Gurbani ke adhyayan se huey sagun,
Shastra ke sanchaalan mein huey nipun,
Sikh dharma ka Unhonei kiya prachaar,
Aur yuva peedi par hua Unka bahut prabhaav.

Faarsi, Arbi, Gurmukhi aur Sanskrit,
Inke alaawa bhi aur bhaashaaon ka thaa Unhe gyan,
Sant aur sipahi, aur vidvaan ke gunn thei Unmein,
Poore vishwa mein aaj bhi roshan hai Unka naam.

Tayyaar kee Unhonei Guru Granth Sahib kee beed,
Talwandi saabo mein Bhai Mani Singh ke saath,
Shaheed misl ka netritva sambhaala,
Ahmad Durrani kee changul se bandhiyon ko nikaala.

Jab Durrani ne Harmandir Sahib ka vidhwans karna chaaha,
Baba Deep Singh ji ko bhakti se milee aparampaar shakti,
Unka khanda thaa 15 kilo se bhi zyada bhaari,
Sir bhi kataa Unka, lekin Unhonei himmat nahin haari.

Unhonei apna sees ka de diya balidaan,
Aur Harmandir Sahib ko bachaane ke liye tyaag diye apne praan,
Jahaan par hua Baba Deep Singh ke paartheev shareer ka daah sanskaar,
Vahaan banaa Gurudwaara Shaheed Ganj Sahib Guruon ka dwaar.

Itihaas ke pannon mein,
Sunehre aksharon mein hai Baba Deep Singh ji ka naam,
Amritsar ka Gurudwaara Shaheed Ganj Sahib,
Unhee ke mahaatmay se banaa divya dhaam.

Aaj Baba Deep Singh ji kee 339vee salagirah par,
Guruji ne Unkee mahima ke baare mein hai likhwaaya,
Dhan Baba Deep Singh kee shahaadat ke itihaas se,
Hamein bhakti mein shakti ka mahaan udaaharan dikhaaya.

Baba Deep Singh Ji ka sadaa roshan rahega naam,
Sikhaaya Unhonei ki zaroori hai surakshit rakhna atma-sammaan,
Unke tyaag se mila sainkdon ko jeevan daan,
Unkee bahaduri aur Unkee ataltaa ko baarambaar pranaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja