Chaahe tu kuch bhi na bol, Toh bhi Guruji hameshaan sunenge teri, Tujhe chaahe kehne mein vilamb ho jaaye, Ve sunn-ne mein kabhi bhi na karenge deri.
Kabhi lagey tujhe ki Guruji khaamosh kyun Hain, Toh yakeen kar, uss khaamoshi ka hoga koi kaaran zaroor, Isliye tu apne vishwaas ko dolne na dena, Kyunki Guruji khaamoshi mein bhi nahin hongei tujhse duur.
Tujhe mehsoos ho ya nahin, Ve har pal Hain tere saath, Chaahe tere jeevan mein ho sunehri subah , Ya aa jaaye ghor andheri raat.
Guruji ke paas hee hai teri uljhan kee suljhan, Isliye vyarth mein dheeraj khokar tu naadaan matt bann, Sabki bigdee banaayee hai Unhonei, teri bhi bigdee banaayenge, Sabke kaaraj sanvaare Hain Unhonei, tere achche din bhi aayenge.
Buss, apne karam karna na chodna, Unke naam kee chaadar tu odhna, Raksha ka kavach banegi veh chaadar, Isliye karna tu uss chaadar ka aadar.
Isliye is vilamb mein jo lamhe hain intazaar ke, Chaahe usmein aayein sankat kayee prakaar ke, Tu Guruji ka naam lete huey chalta chal aitbaar se, Sada tera maargdarshan karenge Guruji bahut hee pyaar se.
Na churaane de kisee chunauti ko tu apna chayyn, Na numm honei de kisee niraasha se apne nayyn, Balki chitt ko chayyn ke chandove se sajaa le, Aur Guruji ke noor ko nayynon mein basaa le.
Chunauti ka saamna karte samay, Chayyn ke chandove se chhaaon mil jaayegi, Aur niraasha ko asha mein badalne ke liye, Guruji ke noor se nayynon mein jyot jal jaayegi.
Veh chhaaon hogi itnee sheetal, Veh jyot hogi itnee nirmal, Sharad ritu kee meethi dhoop ka sa hoga vaataavaran, Antar-mann mein Guruji ke divya roop ka hoga aagaman.
Is divya roop ke saundarya se susajjit ho jaayega antar-mann, Toh ek anokhe andaaz se aanandit ho jaayega jeevan, Aur jabb is anand ko alankrit karega simran, Shukrana, aur sarv-samarpan, Toh Guruji kee mehar se safal hoga tera kiya hua vandan.
Yeh Guruji ka hai dar, Yahaan sabki sunvaayee hoti hai, Is dar kee kar lein hum kadar, Yahaan sabki bhalaayee hoti hai.
Yahaan chaahe koi ameer ho ya ho gareeb, Guruji sabka sanvaarte Hain naseeb, Ve bhakton ka lekha dobara likh dete Hain, Sabke adhiktar karam khud par le lete Hain.
Yeh Guruji ka hai dar, Yahaan neeyat parkhi jaati hai, Jisey bulaa liya Guruji ne is dar par, Usey Bhagwaan ke roop mein milta saathi hai.
Yahaan milta hai mata pita ka pyaar, Aur ashish aur dulaar paata hai ghar pariwaar, Yahaan par sachcha bhaav bahut zaroori hai, Kyunki yahaan jhooth aur fareb se rakhni duuri hai.
Yeh Guruji ka hai dar, Yahaan simran se sthir kar lo mann, Simran aur dhyan ka honei do atma par asar, Aur Guru naam ka paa lo dhan.
Yahaan Guruji kee mahima suno aur sunaao, Aur paa lo Guruji ka ashirwaad, Yahaan Guruji ka gungaan karte jaao, Aur dil ko kar lo Guru prem se aabaad.
Yeh Guruji ka hai dar, Yahaan Guruji se jod lo seedhi taar, Is taar se rishte ko banaa lo amar, Kyunki vyarth hai baaki saara sansaar.
Guruji ke charan bade sukhdaayee hain, Yahaan karmon ka hota hai bhugtaan, Guruji kee sharan kee vaddi vadiyaayee hai, Kyunki Guruji swayam hee Hain Bhagwaan.
Keh de tu dolti ghataaon se, Aur in bolti hawaaon se, Keh de tu noorani nazaaron se, Aur unn matvaali bahaaron se, Ki Guruji ke saath ke jaisa aur kisee ka saath nahin.
Keh de tu is neele gagan se, Aur keh de chaarul chaman se, Keh de har desh, har vatan se, Aur keh de prataapi agan se, Ki Guruji kee jaisi mahima kisee kee nahin.
Keh de har jhooth, har paakhand se, Aur har swaarth bhare anand se, Keh de tu samaj ke har khand se, Aur apni har soch se, har pasand se, Ki Guruji se achchaa aur sachchaa koi nahin.
Keh de tu sooraj ke prakash se, Aur anant aseem akash se, Keh de tu ruhaani sakaash se, Aur keh de apne vishwaas se, Ki Guruji ke jaisi divya saarthaktaa kisee mein bhi nahin.
Keh de har nakaraatmak tufaan se, Aur ateet, bhavishya, aur vartmaan se, Keh de tu phoolon ke har gulistaan se, Aur keh de saare ke saare jahaan se, Ki Guruji ke jaisa pyaara aur nyaara sahaara aur koi nahin.
Meri har khushi Aapki rehmat se hai, Meri har hansi Aapki rehmat se hai, Meri bandagi Aapki rehmat se hai, Meri zindagi Aapki rehmat se hai.
Mera har geet Aapki rehmat se hai, Meri aur Aapki preet Aapki rehmat se hai, Mera har meet Aapki rehmat se hai, Meri har haar aur har jeet Aapki rehmat se hai.
Mere shareer ka har angg Aapki rehmat se hai, Mere jeene ka dhangg Aapki rehmat se hai, Meri ruhaaniyat ka rangg Aapki rehmat se hai, Mila mujhe sadh sangat ka sangg Aapki rehmat se hai.
Meri Aap mein bhakti Aapki rehmat se hai, Is bhakti se milee jo shakti, veh Aapki rehmat se hai, Is bhakti se praapt hui tripti bhi Aapki rehmat se hai, Milegi jabb bhi mukti veh bhi Aapki rehmat se hai.
Meri himmat Aapki rehmat se hai, Meri taakat Aapki rehmat se hai, Meri hifaazat Aapki rehmat se hai, Meri ibaadat Aapki rehmat se hai.
Mera deewaanapan Aapki rehmat se hai, Mera tann mann dhan Aapki rehmat se hai, Meri Aap mein lagan Aapki rehmat se hai, Mera toh yeh jeevan Aapki rehmat se hai.
Mera uddhaar Aapki rehmat se hai, Mera har sanskaar Aapki rehmat se hai, Mera ghar parivaar Aapki rehmat se hai, Har ‘Aaj Ka Suvichaar’ Aapki rehmat se hai.
Jabb se Aapke charnon mein sir ko jhukaaya, Tabb se dil ne anokha sa sukoon hai paaya, Veh sukoon, jo vaada karta hai saath rehne ka, Veh sukoon, jo vaada karta sab kuch sehne ka.
Jabb se Aapke simran mein honei lagi hoon leen, Ho gaya hai Aapki divyata par poora yakeen, Mai toh hoon is deh mein samaayi hui ek atma, Aapka hee ansh hoon, kyunki Aap Hain Paramatama.
Jabb se dekhi hai Aapki pyaari si muskaan, Tabb se uss ko nihaarte rehne ka hota hai armaan, Aap mujhse khush rahein, Aapka dil na kabhi dukhaaoon, Koi galat kadam uthaane se pehle hee ruk jaaoon.
Jabb se Aapke noor ke huey hain darshan, Tabb se kar diya hai Aapko sabb kuch mainey arpan, Mere liye kya achchaa hai, yeh Aap hee jaante Hain, Aap vaisa hee karenge jo Aap mere liye uchit maante Hain.
Jabb se Aapki mahima ka karne lagi hoon bakhaan, Tabb se jeevan ka uddeshya banaa hai Aapka gungaan, Aapki prashansa karte karte kabhi na thakoon, Har pal har jageh mai Aapke prataap ke satsang suna sakoon.
Jabb se Aapne mujhe sweekaara hai, Tabb se meri manzil Aapka dwaara hai, Yeh manzil milegi mujhe Aapki mehar se, Vaheen mulaakaat hogi suhaani sehar se.
Jabb se seekha hai Aapka shukrana karna, Tabb se chod diya hai jagg se darna, Kabhi nahin lagta ki mai haalaat se laachaar hoon, Har pal, mere Daata, mai Aapki shukraguzaar hoon.
Aapko yaad karte karte, Aapke dar par aakar mai Aapki ho li, Aapse itnee mamta milee, Ki mujhe chhoti laagi meri jholi.
Duniya ke tamaashe dekh kar jee oob sa gaya, Buss, Aapki hee preet mein dil doob sa gaya, Sab kuch lagta hai ek naatak yahaan, Jahaan zikr na ho Aapka, mann nahin lagta vahaan.
Dil karta hai ki Aapse karti rahoon mai baat, Bahut hee madhur lagta hai Aapka ruhaani saath, Lagta hai kaash 31 May, 2007 se pehle Aapka hua hota deedar, Lekin phir lagta hai mera waqt nahin aaya thaa tabb kee baar.
Har pal hota hai Aapki maujoodagi ka ek khaas ehsaas, Kabhi khushboo, kabhi sapna, aur har samay ek vishwaas, Ki Aap kaheen nahin gaye, Aap Hain yaheen aaspaas, Aapki sameeptaa ka spandan mehsoos karta hai mera har shwaas.
Is duniya ke mele mein musaafir hoon mai, Musaafir bannkar rehna hai, khud ko dilaati hoon yaad, Kripa karna aisee ki meri atma ka ruhaani parinda moh maya se aazaad ho, Aapse karti hoon dil se yeh fariyaad.
Yeh ruhaani parinda aazaad udaan bharega, Aapki mehre nazar se ek din, Abb toh kuch bhi nahin karna Aapke bin, Abb na jeena aur na marna Aapke bin.
Pichhlee yaadon ko sametne mein itne vyast ho gaye, Ki hamein aaj ka anand lena raha hee nahin yaad, Jabb aaj kee khushiyaan beeta kal bann-ne lagin, Phir aur khushiyon ke liye hum karne lagey fariyaad.
Ummeed rakhein ki aagey bhi khushiyaan aayengi, Ummeed rakhein ki ye saansein hamein aane wala kal dikhaayengi, Phir bhi aaj kee khushi ko nazar andaaz na karein, Jo khushi mil rahi hai, shukrana karte huey uss se apni jholi bharein.
Guruji dekh rahein Hain ki hum shukr guzaar hain ya nahin, Guruji denge hamein jo hoga hamaare liye sahi, Isliye har pal har din lekar Unka naam, Karein poori shraddha aur lagan se apna kaam.
Chaahe ho veh khayaal rakhna ghar pariwaar ka, Ya ho kartavya kisee aur prakaar ka, Sakaratmakta rakhein soch mein aur karam mein, Sweekriti aur samarpan rakhein karam ke dharam mein.
Maan karein hum har pal ka, Maan karein aaj aur kal ka, Kal par na chodein jo aaj karna zaroori hai, Khushi se karein, na ki yoon ki koi majboori hai.
Vartmaan toh saamne hai, kya bharosa aane waale kal ka, Muskuraane kee vajeh nahin bhi hai toh dhoondhne se zaroor mil jaayegi, Shareer ke angg, swaasthya,jeene ka dhangg, mitr,dhan daulat, gyan, pyaar, parivaar, Kisee na kisee baat se toh dil mein khushi kee kali zaroor khil paayegi.
In sabse bhi badi daulat hai hamaare paas, Maanenge hum agar hoga poora vishwaas, Is se anmol koi daulat nahin hai sansaar mein, Yeh sarvottam daulat milee hai hamein uphaar mein.
Koi bhi daulat nahin duniya mein Guruji kee sharan se anmol, Saare dwaar bandd hon toh bhi Guruji apna dwaar sadaa dete Hain khol, Hameshaan kalyaankaari hota hai Unka har bol, Buss hamaara bharosa nahin hona chahiye daanva-dol.
Yeh daulat nahin hai kuch dinon kee mehmaan, Is hakeekat ko hum lein abb toh jaan, Hum isey paakar itne khushnaseeb hain, Kal bhi thei, aur aaj bhi hum Guruji ke kareeb hain.
Buss phir, khush rehne ke liye aur kuch nahin chahiye, Kyunki Guruji kee sharan mein har khushi samaayee hai, Bin maange veh sab miley yahaan, jismein hamaari bhalaayee hai, Aur kaheen jaane kee zaroorat hee nahin, yeh bhi Guruji kee vadiyaayee hai.
Isliye bhavishya kee chinta chod kar chintan mein lagg jaayein, Ateet kee yaadon ke gumm se khud ko toot kar bikharne se bachaayein, Ateet kee mushkilon se himmat paakar naya utsaah jagaayein, Aaj ko jee lein pyaar aur khushi se, aur Guruji ko Shukrana karte jaayein.
Jo bhi khoya humne, veh Guruji kee sharan jitna anmol kabhi thaa hee nahin, Is satya se, is tathya se santusht hokar jeena seekhna bhi bhakti ka imtehaan hai. Guruji kee mehar aur hamaari sachchi koshish se hamein safalta awashya milegi, Kyunki hamaara Guru hamaara shubhchintak Hai aur bada hee meharbaan hai.
Koi kahe safar par karna chahiye bharosa, Toh koi kahe ki raaste par rakhna chahiye vishwaas, Koi kahe kisee ke saath tayy kar lo safar, Toh koi aur kahe ki akele chalna hai behtar.
Kiskee baat maanein, aur kiskee maane nahin? Kaise maalum chale ki kiska kehna hai sahi? Kaise karein nishchitt ki kaunsi disha hai sahi, Taaki phir hum chal dein vaheen?
Kitaabi gyan toh paa liya, lekin mann ko sthir karna bhi zaroori hai, Chaahe samjhein isey swayam ka uddhaar, chaahe sochein ki veh majboori hai. Saath bhi ho toh aisa ki uspar kar sakein atoot vishwaas, Taaki sahi salaah dene wala ho apne bilkul paas.
Kaun hai aisa saathi, kaun karega is sabka intazaam? Kis tarehn se mann sthir rahega, kiska lein hum naam? Kis se kahein bina hichkichaahat ke, Ki sanvaar de Vo hamaare bigde kaam?
Ek Guruji hee Hain jo hamein Hain samajhte, Ek Unhee kee kripa se uljhe maajre hain sulajhte, Ek Ve hee Hain jinmein sab Devi Devta samaaye Hain, Ek Ve Hain jinhonei sabke bigde kaam banaaye Hain.
Tabhi toh Guruji ka simran hai har mushkil ka hal, Guruji ka naam japne se badhta hai atma-bal. Nirantar jo karenge hum is japp ka prayaas, Toh aur bhi pakka hota chalega Guruji par hamaara vishwaas.
Unkee dikhaayee hui disha hogi sadaa sahi, Jo Ve nishchitt karenge hamaare liye, uchit hoga vahi, Agar mann mandir sadaa rahega Unke naam se aabaad, Toh banaa rahega Unka saath aur Unka ashirwaad.
Bahut naadaan aur anjaan hai tu, Jo toone apne shareer ko apni pehchaan hai maana, Dar-asal isee kee vajeh se hee kabhi kabhi, Tujhe meetha nahin lagta Guruji ka bhaana.
Bhool gaya tu srishti ke is naatak mein, Ki deh toh milee is kirdaar ko nibhaane ke liye, Tu isey amar soch kar jee raha hai, Guruji aaye Hain tujhe jagaane ke liye.
Apna safar is dharti par tayy karne ke baad, Deh toh khatm ho jaayegi yahaan, Na jaane phir atma yahaan se jaayegi kahaan, Aur na jaane usey kaisa shareer milega vahaan.
In sawaalon se pareshaan honei ke bajaaye, Guruji ko saump de aisa har sawaal aur jawaab, Tere paas jawaab dhoondhne ka hunar nahin hai, Tu yoon hee karega apna waqt barbaad.
Sadaa kalyanmayee hoga Guruji ka bhaana, Tere adhyatmik safar ke vaaste, Unse zyada teri chinta aur kisee ko nahin, Ve Apne noor se ujjwal karenge tere raaste.
Guruji kee mehar se naadaani kee neend se tu jaag, Na moh maya kee nirarthakta ke peechhe tu bhaag, Nashwar shareer ka dhyan tu rakh zaroor, Lekin na honei de swayam ko shareer ke haathon majboor.
Apni atma ke uddhaar kee oar dhyan de, Guruji ka simran kar ke Unse adhyatmik gyan le, Is gyan ke sahaare atma ke safar ko bann-ne thoda aasaan, Aur Guruji kee rehmat se sanvaar le apni ruhaani dastaan.
Jitna hota chalega karmon ke hisaab ka khaatma, Utne kumm shareer ko dhaaran karegi teri atma, Utnee hee jald atma ka Paramatama se hoga milan, Tabb hee kaheen jaakar safal hoga jeevan.
Isliye kar tu Guruji ka maan, Kar le tu niswaarth sewa, simran, aur dhyan, Padh kar tu Shiv Purana, Guru aur Shiv ke advait isheetva ko pehchaan.
Shareer nashwar hai, yeh le tu jaan, Is satya aur tathya ko le tu maan, Kar ke apni atma ka khayaal aur sammaan, Roshan kar tu apne Guruji ke naam.
Aaj Ka Suvichaar 