Kismat ke bandd dwaar usee pal khul gaye, Jabb Aap Ishwar ke roop mein mil gaye, Uske baad ka safar ek anokhi gati se chal raha hai, Itna kasht toh mujhe chhoone se bhi pehle tal raha hai.
Jo meri kismat mein hai, veh mujhe milega zaroor, Balki Aapki kripa se milega uss se bhi behtar, Yeh ummeed nahin, balki mera vishwaas hai, Is vishwaas se itnee santushti ka hota ehsaas hai.
Kaise prashansa karoon Aapki, Kin shabdon mein karoon mai varnan, Kaise prasann karoon Aapko, Kis tareh se karoon mai vandan.
Aapki mahima sunaane ke liye, Kumm hain jitne bhi kahoon alfaaz, Aapke gunon ka geet gaane ke liye, Soojhta hee nahin hai koi kaabil saaz.
Agyaani hoon, anjaan hoon, Nasamajh hoon, naadaan hoon, Prabhu, meri galatiyon ko kar dena nazar andaaz, Aapki hee rehmat se niklee hai dil se ye awaaz.
Aapki mehar se judi hoon Aapse, Pyaar bhari bandagi ke bandhan mein, Arzoo hai ki meri vaani ramm jaaye sadaa ke liye, Aapke vandan ke shubh spandan mein.
Chot ka lagna bhi hai zaroori, Dard kya hota hai, ye ehsaas toh ho. Gir kar uthne kee koshish karna bhi hai zaroori, Taaki koshish karne ka abhyaas toh ho.
Itna toh nishchitt hai bin kisee sanshay ke, Ki Guruji se kabhi koi galati ho sakti nahin, Phir jo bhi Unkee razaa se hota hai, Veh bina kisee shaq ke hameshaan hoga sahi.
Kisee na kisee tarehn se jo bhi hota hai hamaari zindagi mein, Veh hamaare kalyaan ke liye karte Hain hamaare naath, Ya toh uss se hota hai karmon ka bhugtaan, Ya phir veh hota hai adhyaatmik unnati ka imtehaan.
Kalyuga kee har mushkil ne, Insaan ke manovikaaron se hai janam liya, Maano ya na maano, jaano ya na jaano, Hum insaanon ne hai veh karam kiya.
Jo dukh mil raha hai hamein, Veh nishchay hee kumm kar ke mil raha hai, Aur jo bhi sukh praapt hai hamein, Veh haq se aur hadd se zyada mil raha hai.
Aur phir Guruji ka pyaar toh har ghaav ko bhar deta hai, Unka ashish toh har kasht ko har leta hai. Koi dawaa nahin hai Unke prataap se zyaada prabhaavshaali, Koi bhi nakaaratmakta nahin hai Unkee divyataa ke aagey shaktishaali.
Jiske paas har saagar ko ek pal mein nirjal karne kee kshamtaa hai, Veh saagar ko anginat boondein dekar aseem honei ka deta hai vardaan, Yeh yakeenan hamaare dayaalu aur kripaalu Guruji kee mamta hai, Jo saagar kee tarehn saari srishti ko dete rehte Hain Apni daya ka daan.
Hamaare Guruji ke charnon mein, Basaa hai har teerath dham, Isliye aise pooran Guru ka simran karna, Hai bade hee punya ka kaam.
Zindagi ke safar mein zaroori hai ki sukh chayyn ke liye, Antarmann mein jalaayein ye do sundar diye, Ek hai sabr ka, dooja diya hai shanti ka, Inke liye bhi anivaarya hai ashish Guru simran kee kanti ka.
Sabr se miley maansik shakti, Aur kumm hota jaata hai sanshay, Shanti se badhti hai bhaavaatmak shakti, Aur duur honei lagta hai bhayy.
Guruji ke naam ke simran aur dhyan se, Jabb vikasit hoti hai Guruji kee sadhna, Toh sadhna se milta hai sabr aur milti hai shanti, Jin se rangg laati hai Guruji kee aradhana.
Kyunki phir maansik aur bhaavaatmak shakti badh jaati hai, Aur har tarehn kee pareshaani ko raahat mil jaati hai. Hamaare har kaarya par aisee shakti ka prabhaav jab padta hai, Toh Guruji ka ashirwaad hamaara kaarya safal karta hai.
Kyunki Guruji ke hotey huey bhi hamein apna karam toh hai karna, Lekin jabb Ve saath Hain, toh phir kaahe ka darna? Isliye sabr aur shanti apni dincharya mein kar lein aatmasaat, Dheeraj ke neeraj ko shanti se seench kar mehkaa lein apne karmon ka jazbaat.
Har pal, har din, Ek avsar hai sunehra, Ki hum Guruji ke saath baney rishte ko, Unhee kee mehar se banaayein gehra.
Koi sakht niyam nahin, Na hee koi andhvishwaas, Buss, mann se Unka shukrana hai karna, Jismein sanjona hai pyaar ka ehsaas.
Is pyaar mein yeh gyan basaa ho, Ki hamaare safar kee manzil Hain Guruji, Is pyaar mein shraddha aur vishwaas aisa ho, Ki har paristhiti mein dil mein hon Guruji.
Is pyaar mein ho aisee ruhaaniyat, Is pyaar mein ho aisee maasumiyat, Jo kabhi aankhon se bayaan ho, toh kabhi baaton se, Kabhi sewa se bayaan ho, toh kabhi iraadon se.
Koi shart na ho is pyaar mein, Na judi ho is se koi mannat, Buss sachche bhaav ka izhaar ho, Aur basee rahe ismein Guruji kee rehmat.
Guruji ke sangg bandhee rahe bandagi kee doar, Is paawan prem ke rishte se jeevan mein rahe bhor, Bhakton par prem bhare ashirwaad kee hoti rahe barsaat, Aye daata, Apne bhakton ko kripa kar ke deejiye yeh daat.
Pichhle saal ko peechhe chod kar naya saal hai aaya, Har kisee ne beetey lamhon mein kuch khoya aur kuch hai paaya, Kisee ne maayusi se aur kisee ne khushi se pichhla saal hai bitaaya, Naya saal aane waale samay ke liye ummeed kee saugat lekar hai aaya.
Umeed par hee toh duniya kaayam hai, Raasta thoda sa sakht, thoda sa mulayam hai, Naya saal aaya hai lekar Guruji ka avirat ashirwaad, Kuch beetey lamhe bhool jaayenge, aur kuch reh jaayenge yaad.
Har yaadgaar ka hoga koi na koi koi sabab, Kisee ka sabab hoga saadharan, toh kisee ka hoga gehra ya ajab, Kisee yaadgaar se aagey kee zindagi ke liye milegi prerna, Toh kisee yaad se milegi satark rehne kee chetna.
Kuch yaadein bhulaane ko jee chaahega, Kuch yaadon ke peechhe dil bhaagega, Lekin Guruji kee kripa se aagey badhte jaana, Aur adhyaatmik yatra kee seedhi chadhte jaana.
Yahee seedhi hai asal sukh kee, Laukikta se honei vimukh kee, Ispar chadhne ke liye apne bheetar hai jaana, Aur Guruji ke naam ka simran hai karte jaana.
Baaki sab zimmedariyan nibhaate huey, Mann ko laukikta kee kshanbhangurta yaad dilaate huey, Koshish jaari rahe shraddha aur vishwaas ko badhaane kee, Jo simran se duur le jaaye, aise har vichaar ko mann se hataane kee.
Guru naam ka amrit prem se peete rehna, Har lamhe ko sahi mainey mein jeete rehna, Koi lamha dobaara laut kar na aayega, Lekin, simran ka har lamha asal dhan kee oar lekar jaayega.
Guruji se Guruji kee praapti hee hai veh asal dhan, Moksh miley, taaki baar baar na bhogna padey janam maran, Guruji kee kripa se is dhan ko paane ke prayatna ko safal banaayein, Naye saal ko is prayatna kee yaadgaar dekar ruhaniyat ka safar badhaayein.
Jeena marna yakeenan ho jaayega kaamyaab, Jab atma ko roshan karega Guru naam ka aftaab. Guruji kee mehar se is iraade ko de dein hum sankalp ka khitaab, Taaki yeh hakeekat bann jaaye, na ki reh jaaye bannkar kewal ek haseen khwaab.
Aye jaane waale saal, Tumhaara aakar jaane ka shukrana, Kaun apna hai, kaun paraaya, Yeh tumhaare raaj mein hai jaana.
Tumne kitne achche se insaan kee har kamzori ko pehchaana, Abb jaate jaate apne sangg tum lekar jaana, Har tarehn ka roag, Jo insaan raha hai bhog.
Tumhaare hotey huey kitnon ko mahamaari ne sataaya, Kitnon par se uth gaya apnon ka hee saaya, Tumne sabko sudharne ka mauka diya, Lekin phir bhi kitnon ne kitnon ko dhokha diya.
Chaahe saamuhik satsang kee aas mein sangat tarasti rahi, Guruji kee mehar phir bhi tarehn tarehn se barasti rahi, Kyunki jyot jalne lagi ghar ghar mein Unke naam kee, Sangat ko aur bhi tamanna honei lagi Guruji ke simran aur dhyan kee.
Ghar ghar mein satsang honei lagey, Baahar bheed kumm ho gayi, Ghar ka darwaaza khulne ke bajaaye antarmann ke dwaar khulne lagey, Jinhonei shraddha se sadhna kee, unke paap Guruji kee kripa se dhulne lagey.
Jinhonei tumhaari dee hui chetaavani par abb bhi gaur nahin farmaaya hai, Ve shaayad abb takk anjaan hain ki kalyuga ka sab par saaya chhaaya hai, Tum jaate jaate kripa kar unhe samjhaate jaao, Aur sabko neevenpann ka paath padhaate jaao.
Kitne loag kisee na kisee vajeh se pareshaan hain, Jaate jaate unn sabko saantvanaa dete jaao, Anek kaaran se jo sangi saathi udaas hain, Apne saath sabki udaasi lete jaao.
Aane waale varsh ke liye dete jaao sabko shubhkaamnaayein, Taaki bhavishya mein mushkilein aayein toh hal bhi saath laayein. Tumhaare raaj mein ye hai dekha sabne kee padaarthon kee daud vyarth hai, Aur jeevan mein niswaarth pyaar aur saamanjasya ka anmol arth hai.
Ik dooje ko insaan maaf karey, Mayle mann ko saaf karey, Guruji ke ashirwaad se har insaan naye varsh ko jabb galey lagaaye, Toh naya varsh sabke dilon mein ummeed ke chiraag jalaaye.
Guruji, Aapki dee hui himmat se, Sab bhakt jann jaane waale varsh ka saamna kar paaye, Aane waale saal mein Apni anukampa ke amrit kee aisee varsha keejiye, Jis mein bheeg kar yeh sampoorna srishti haneshaan ke liye tarr jaaye.
Bahut shubh hai Shiv Purana kee katha ka shravan, Uske pashchaat kiya jaaye uska manan, Manan ke upraant ho iska dhyan aur chintan, In sabse hota hai chitt shuddh aur safal hota hai vandan.
Chitt kee shuddhi anivaarya hai, Bhakti ke janam ke liye, Aur is bhakti se janam lete hain, Pavitrataa ke do divya diye.
Shiv Purana mein likha hai ki bhakti ke do putr hain, Vairaagya aur gyan roopi buddhi, Inke sangg bhakti ke praakatya ke liye chaahiye, Ki hamaari chitt kee ho shuddhi.
Yeh bhi likha hai Shiv Purana mein, Isliye iskee saarthakta mein shaq kee nahin hai koi baat, Ki chitt shuddhi aur bhakti ke aagaman se, Divya mukti hoti hai praapt.
Shiv Purana kee katha uttam aur sukhdaayi hai, Jo shraddha se isey sunta ya padhta hai, uskee sadaa hoti bhalaayi hai, MahaShiv kee kripa se mitt jaate hain sab dosh, Hriday mein vaas karta hai nirmal anand aur santosh.
Guruji ke ashirwaad se Unke bhakt jabb padhein aur sunein Shiv Purana, Toh bhakton ko milta hai moksh praapti ka shudh gyan, Shiv Purana ke gyan ka anusaran karne par jo bhakt deta hai dhyan, Uss bhakt se ati-prassann ho jaate Hain Shiv Bhagwaan.
Isliye kyun na Shiv Purana ke maadhyam se, Chitt kee shuddhi se pahunchein bhakti takk, Aur bhakti ke do paawan putron kee madad se, Raasta tayy karein hum mukti takk.
Kar le Guruji se baatein tu do chaar, Kar le Unse tu baatein baar baar, Chaahe kar le baat Unke swaroop se, Ya phir apne antarmann mein basey Unke roop se.
Kabhi kar le sirf ek, Kabhi kar le baatein anek, Din raat ka fark na dekh, Har baat se Ve badlenge tere lekh.
Kabhi baaton mein kar le tu Guruji se apni ibadat ka ikraar, Toh kabhi baaton baaton mein bayaan kar le apna pyaar, Kisee kisee baat mein Unhe suna de tu apne dil ka haal, Aur kabhi baaton baaton mein pooch le tu Unka bhi haal.
Baatein karke Guruji se kumm kar le gumm ka bojh, Ve jaante Hain phir bhi tu baaton baaton mein keh de apni soch, Baat kar le Unse apni har kamzori aur har naadaani kee, Baat kar le Unse tu apni har khushi aur har pareshaani kee.
Baatein karte huey rona aaye toh ro le, Baaton mein apne bhaav tu piroh le, Mann karey toh baat ko geet banaa le, Baatein karke Guruji ko apna meet banaa le.
Baaton mein Guruji ke aagey Apne vichaaron kee kitaab tu khol de. Na ghabraa, na hichkicha Jo bhi dil mein hai veh bol de.
Baatein karte karte beech mein chup bhi ho jaana, Taaki tu sunn sakey jo Guruji ne hai tujhe bataana, Yoon hee har din Guruji se baatein karte karte kabhi Shukrana karna bhool na jaana, Aur phir yoon hee Unse baatein karte karte tu Unhee ka ho jaana.
Har janam mein har shwaas bhi karey Aapka Shukrana, Toh bhi mumkin nahin hai Shukrana ka poori tarehn se bayaan ho paana, Aapke naam ke amrit kee har boond mein jeevandaan kee shakti hai, Aapki mahima ke mahaan mahasaagar mein doob jaane se atma tarti hai.
Girne se bachaate Hain Aap, Aur girey huon ko uthaate Hain Aap, Apni goad mein bithaate Hain Aap, Dukh dard mitaate Hain Aap.
Aapke bhakt na royein, Iske liye na jaane kitne aansoon bahaa dete Hain Aap, Aapke bachche swasth rahein, Iske liye anginat roag Apne par lete Hain Aap.
Jabb hum sotey hain, toh Aap jaagte Hain hamaari raksha ke liye, Jabb hum jaagey hotei hain, toh bhi Aap satark rehte Hain hamaari suraksha ke liye. Jo bhakt Aap ke sangg jod leta hai seedhi taar, Uske toh bin boley hee Aap sunte Hain har baar uske dil kee pukaar.
Apne pratyek bachche ke sangg Aap nibhaate Hain mamta ka nirmal naata, Aapko sabb bhakton ka maasoom bhaav hai bhaata, Jaise oas kee naazuk boondon ko itne naazon se patte Hain sambhaalte, Aap toh uss se bhi kaheen zyaada nazaakat se hamaara noor Hain sanvaarte.
Jo moti seep mein rachit hokar seep mein rehte hain, Unkee rachna mein seep ko dard nahin hota, kehta hai vigyaan, Lekin hamaara uddhaar karte samay Aap jo peeda sehte Hain, Hamaari toh kshamtaa mein hee nahin hai karna uska anumaan.
Kripa kar aisee sumat bakhshiye Guruji, Ki na karein hum kabhi apni bhakti ya gumm kee numaaish, Aapko hamaari vajeh se kabhi dukh na ho, Dil mein aur labhon par hai ye vinamr guzaarish.
Aapki kripa se jeevan ke is rangamanch par, Apna kirdaar imaandaari aur lagan se hum karein adaa, Aapki hee raza mein raazi rahein hum, daata, Aur Aapka bhaana hamein meetha laagey sadaa.
Jabb doosri oar jaane kee bela aaye, Apni goad mein lekar jaana, pyaare Parwardigaar, Jabb takk atma ko mukti na mil jaaye, Aap taarte rehna hamein, taral Taaranhaar.
Jitne bhi janam lene likhen hon kismat mein, Ve saare hee beetein Aapki khidmat mein, Aur jabb moksh ka veh suhela vela aaye, Tabb buss Apne mein lena hamein samaaye.
Guruji jaanein akash, prithvi, aur paataal kee kahaani, Ve Hain MahaShiv, teenon lok ke swami, Ve Hain anant mahima wale antaryaami, Unhee ke bharose hain srishti ke sab praani.
Jo padti rahegi Guruji kee anupam kripadrishti, Toh awashya sanvar jaayegi yeh srishti, Lekin, maanav ko hoga samajhna, Ki veh chod de divyataa se ulajhna.
Bhaagi bann jaaye maanav sadgati ka, Prann le le veh adhyatmik unnati ka, Chitt kee zameen mein simran ka beej boye, Guru Govind ka dhyan karte huey jaagey aur soye.
Itnee museebaton se nikaala hai Guruji ne har baar, Toh abb kee baar bhi zaroor nikaalenge, Har baar sambhaala hai Guruji ne, Toh abb kee baar bhi awashya sambhaalenge.
Nirmal bhaav se hum maangein kshamaa, Abb bhi uddhaar ke liye hai samaa, Guruji kalyaan karna chaahte Hain, Ve sadaa sahi raah dikhaate Hain.
Guruji ko hum maatha lein tek, Guruji kee leela ko dekh, Unse bilkul na darein, Buss Unse ardaas karein.
Ardaas karein hum kalyaan kee, Na ki dhan kee ya saamaan kee, Kalyaan mein hai adhyatmik sukh, Kalyaan se mitt jaayega har dukh.
Arpan karein Guruji ko shraddha ke phool, Ve raaste se hataayenge dard dene waale shool, Guruji ko poojein hum har ghadi har pal, Unhe saump dein apna kal aaj aur kal.
Dhyan dete huey apne karam par, Chalein hum insaaniyat ke dharam par, Jo antarmann mein hongei bhakti ke phool, Toh hamaari ardaas awashya hogi qubool.
Sabke dil mein ek dooje ke liye maan hoga, Saansaarik saamanjasya mein sabka yogdaan hoga, Sanvar jaayengi sabki zindagaaniyaan, Hameshaan ke jaise, aagey bhi hoti rahengi Guruji kee meharbaaniyan.
Aaj Ka Suvichaar 