Author: dhirjabhat

December 6, 2020

Om Namaha Shivaya
Aaj Ka Suvichaar 🙏🏻🙏🏻 # 1022

               Timatimaate Taare

Raat thi andheri,
Raahi thaa pareshaan,
Chalte chalte ruk gaya,
Mehsoos hui thakaan.

Do din se kuch khaaya na thaa,
Madad ke liye koi aaya na thaa,
Raaste mein kisee apne ka saaya bhi na thaa,
Na aaspaas koi paraaya hee thaa.

Oopar dekha usne aasmaan ko,
Toh ek ajab sa khayaal aaya,
Sachchaayee thee uss khayaal mein,
Uss khayaal ke sangg yeh sawaal aaya,

Taare timatimaate huey kaise aate nazar,
Agar raat mein hota na kabhi andhera?
Isliye raat bhi jeevan mein zaroori hai,
Baad mein toh awashya aayega savera.

Usee pal usey ek ruhaani khushboo aayi,
Jis se mehek gayi uskee tanhaayee,
Samajh gaya ki Guruji Hain uske saath,
Aur Ve katvaa denge uskee niraasha roopi raat.

Uskee himmat badhaane ke liye,
Guruji ne hee uske mann mein diya veh khayaal,
Yeh jaan kar aur maan kar,
Veh toh ho gaya nihaal.

Phir raat ke andhere mein dekhte huey timatimaate taare,
Bhool kar apne dukhde saare,
Guruji kee dhun mein hokar magan,
Maankar Unkee khushboo ko shagun,
Raahi apne mukaam kee oar chalta chala,
Uska ullaas aur utsaah ummeed liye badhta chala,
Guruji chalte rahey uske sangg,
Dete huey usey ruhaani umangg,
Andhere ne hee dikhaaye usey ve timatimaate taare,
Jo usey lagne lagey bahut hee pyaare.
Usne kiya andhere ka shukrana,
Usey meetha laagaa Guruji ka bhana.

Subah ne toh aana hee thaa Guruji kee mehar se,
Usne andhere ko alvida kahaa aur mulaakaat karne lagaa sehar se,
Sunehre akash mein na dikh rahe thei timatimaate taare,
Lekin unkee chhaaon mein veh pahuncha Guruji ke sangg manzil ke dwaare.

Usne Guruji se kee yeh guzaarish,
Ki Ve apne har bhakt ke jeevan kee raat ko
Aise timatimaate taaron se bhar dein,
Aur har bhakt ko manzil par pahunchaate huey,
Uske saare dukh har lein.

Tabb se hee raat ke akash mein taare,
Timatimaate hain aur dikhte hain itne pyaare,
Niraasha aur dukh kee raat guzar jaati hai inke sahaare,
Aur raat khatm hotey hee dikh jaate hain sukhi savere ke noorani nazaare.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 5, 2020

Om Namaha Shivaya
Aaj Ka Suvichaar 🙏🏻🙏🏻 # 1021

   Shubh Aagaman

Utaar dee veh ghulaami kee chaadar jo usne odhi thi,
Samet li dil mein har veh chhoti khushi jo usne chodi thi,
Alishaan khwaabon se kaha ki Ve usey na sataayein,
Saral saadi tamannaaon se kaha ki ve usey galey se lagaayein.

Tamanna baag mein titliyon ke peechhe peechhe ghoomne kee,
Tamanna chhupan chhupaayi mein doston ko dhoondhne kee,
Tamanna indradhanush se dil ko rijhaane kee,
Tamanna sardiyon kee dhoop ko nihaarne kee,
Tamanna ki buss chaaron oar pyaar ho,
Tamanna ki pyaar se hee pyaar ka izhaar ho.

Tamanna ki loag chod dein dhokha dena,
Tamanna ki reet ho vishwaas ko mauka dena,
Tamanna ki buss chaaron oar sachchaayee ho,
Tamanna ki sabki neeyat mein achchaayee ho.

Ye chhoti chhoti baatein hee hakeekat mein sabse badi hain,
Usne chaaha ki duniya samajhe,
Dukh hua usey ki aajkal ke zamaane mein,
Insaan maya mein kitnee aasaani se hai uljhe.

Guruji se kaha usne ki is baat se veh hairaan hai,
Zamaane ke bhautikavaadi vyavhaar se pareshaan hai,
Guruji ne kaha uss se ki isliye yeh maada waqt hai aaya,
Kyunki insaan ne Rabb ko bhool kar ahankaar hai jataaya.
Guruji ne kaha uss se ki is dauraan insaan
sudhaar le swayam ko,
Aur sabke liye insaaniyat hee sabse bada dharam ho,
Antar-mann kee ruhaani unnati ho,
Jann jann ke mann mein sanmati ho,
Sab karein niswaarth sewa aur simran,
Sab karein Guru aur Ishwar ka manan,
Tabhi sahi upyog hoga samay ka,
Aur vinaash hoga kalyugi pralay ka.
Pralay ka vinaash laayega satyuga ka savera,
Jismein insaaniyat ke prati sammaan ka hoga basera.

Yeh sunkar kumm hui uskee hairaani aur pareshaani,
Veh apni taraf se karta raha koshish sayaani,
Apna farz nibhaate huey baaki sab Guruji par diya chod,
Aur mann kee aankhon mein basaa lee usne satyuga kee bhor.

Kyun na hum bhi uskee tarehn apna farz nibhaayein,
Aur satyugi savere ke aagaman ke raaste mein swaagat ke phool bichhaayein,
Jeevan ko saada aur saral banaayein,
Vyavhaar ko komal aur taral banaayein,
Niswaarth pyaar kee khushboo se mehekaayein waqt kee bahaar ko,
Aur meetha banaayein aane wale satyuga kee intazaar ko.

Har koi yogdaan de samajh kar isey ek farz,
Toh sabka chuk jaayega kalyugi pralay ka karz,
Har insaan ke mann mein baaki insaanon ke liye maan hoga,
Toh chhoti chhoti khushiyon ka bhi bada sammaan hoga.
Jeevan sukhad ho jaayega,
Kalyuga bann jaayega ateet,
Satyuga ka shubh aagaman hoga,
Aur insaaniyat ke dharam kee hogi jeet.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 4, 2020

Om Namaha Shivaya
Aaj Ka Suvichaar 🙏🏻🙏🏻 # 1020

Bin Kuch Soche Samjhe

Manchali si ek titlee,
Bagiya mein uddne chali,
Bagiya kee har kusum aur har kali,
Uskee chhavi kee chhaaon mein pali.

Koi rob nahin, na hee koi raag dwesh,
Jaisa bheetar, vaisa hee oopari vesh,
Koi shikayat nahin, na hee koi fikr,
Pyaar, pyaar, buss, kewal pyaar ka zikr.

Koi bojh nahin isliye udd rahi thi masti mein,
Bin jaane ki kitna saundarya hai uskee hasti mein,
Uske deedar se jhoom raha thaa chaman,
Jhuk kar uska naman kar raha thaa gagan.

Titlee ne dekha gagan kee oar,
Aur muskuraaya uske mann ka moar,
Kyunki gagan mein dikha indradhanush suhela,
Rangon ke spandan se rangeeli hui veh bela.

Titlee ne chaaha ki oonchi udaan bhare,
Lekin uss nanhi jaan ke liye veh nahin thaa mumkin,
Suna thaa usne ki indradhanush ke antt mein sona hota hai,
Toh veh uss oar udd chali kuch soche aur samjhe bin.

Raaste mein karti hui baatein hawaaon se,
Sureele geet sunti hui veh ghataaon se,
Pahunchi prem aur vishwaas ke sangg vahaan,
Indradhanush ka antt kadachit thaa jahaan.

Jab dekha usne thodi duur se,
Hairaan ho gayi vahaan ke noor se,
Itnee chamak ki sona pheeka laagey uske aagey,
Itnee divyataa ki har saadhak ka roam roam vahaan bhaagey.

Kaafi der ke baad pahunchi uss noorani chehre ke kareeb,
Phir toh nikhar hee gaya uska naseeb,
Pyaare Guruji khade thei vahaan,
Unkee hatheli par thaa saara jahaan.

Mandd muskaan Unkee, aur mamta se bhare nayn,
Dekhkar ye nanhi titlee ko mila sukoon aur chayyn,
Apne pankhon ko jodkar kiya usne Guruji ko pranaam,
Usne is ek pal mein paa liya sabse Divya dham.

Guruji ne Apne haathon se diya usey ashirwaad,
Veh itnee bhavuk hui paakar yeh paawan prasad,
Chaman ko, gagan ko, aur Indradhanush ko,
Usne neeven hokar kiya dhanyawaad.

Aise hee sab bhakton ke jeevan mein,
Dikhta hai Indradhanush zaroor,
Vishwaas aur prem rakhna aawashyak hai,
Aur ‘kintu parantu’ ka chodna hoga dastoor.

Titlee ne bin kuch soche samjhe,
Vishwaas aur prem se anmol uphaar paaya,
Hum bhi prem aur vishwaas se sarvsamarpan karein Guruji ko,
Is drishtaant se yeh samajh mein aaya.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 3, 2020

Om Namaha Shivaya
Aaj Ka Suvichaar 🙏🏻🙏🏻 # 1019

      Anokhi Azaadi

Aankh numm hui jab har sangi saathi chhoota,
Kisee ne awaaz na suni jab uska dil toota,
Aankhon ke aansoon ponchh kar,
Guruji ke baare mein soch kar,
Usne tootey dil ko rakha Guru charan mein,
Aur leen hua Guruji ke manan mein.

Dil mein basey simran ke manke prem se samet kar,
Veh shraddha se japne lagaa naam kee mala,
Dridh vishwaas ke sangg japta gaya,
Jaanta thaa ki uska Guru hai bade dil wala

Jabb se usne kiya thaa apna jeevan
Guruji ko samarpan,
Tabb se simran se saaf honei lagaa thaa
Uska mann,
Poora bharosa thaa usey Guruji ke saath par,
Usey maalum thaa Guruji dhyan denge uskee har baat par,
Isliye bheed mein kho jaane ke bajaay,
Usne Guruji ko apna haal diya bataay.

Guruji ne Apni divyataa ka prataap dikhaaya,
Manan ke dauraan uska santaap mitaaya,
Simran karte karte uska gehra hua dhyan,
Toh Guruji ne diya usey adhyaatmik gyan.

Guruji kee mamta ke marham se,
Tootey dil ka ghaav bhar gaya,
Jo dukh usey sataa raha thaa,
Guruji ne veh dukh har liya.

Shukrana kiya usne Guruji ko,
Ki Unkee kripa se uskee aankh khuli,
Guruji ke naam ke amrit se,
Uske mann se shikva kee mayl dhuli.

Dua niklee uske dil se har Uss shaqs ke liye bhi,
Jisne uske pyaar ka mol na jaana,
Guruji kee nigraani mein ye sab hua,
Isliye usne swayam ko khushkismat maana.

Guru prem kee gehraayi aur vadiyaayee se,
Uska atma-vishwaas aur utsaah raha barkaraar,
Bin kisee bhayy aur bin sanshay,
Usne kar liya har bhaavuk lamhe ko paar.

Guruji ne ek pal ke liye bhi usey choda nahin akela,
Duur kiya Unhonei uske dil se jeevan ka har jhamela,
Mehsoos hui usey azaadi jo thi anokhi aur ruhaani,
Guru kripa se nutan nirmalta se utsaahit hui zindagaani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 2, 2020

Om Namaha Shivaya
Aaj Ka Suvichaar 🙏🏻🙏🏻 # 1018

                 Zindagi Ka Safar

Kisee kee zindagi ka safar hai lambaa,
Toh kisee ka jaldi khatm ho jaata hai,
Kisee kisee ka safar neeras hota hai,
Toh koi safar mein khoob anand paata hai.

Koi kahe ye karta hai kaafi hadd takk nirbhar,
Raaste mein aane wali takleefon par,
Aur ye bhi ki kitna aishon-aaraam, sehat, aur dhan,
Jeevan mein paata hai har jann.

Dar-asal kisee ka bhi jeevan aisa nahin hota,
Jismein koi bhi mushkil ya dukh na aaye,
Kabhi Kisee ko muqammal jahaan nahin milta,
Kyun na hum ye yaad rakhein ye bhoolne ke bajaaye?

Kal ko koi humse keh de,
Ki hum uss se museebaton ko adal badal lein toh aasaan ho jaayega,
Toh unkee kahaani ko sunn lene par,
Hamein vinimay ka veh sujhaav pasand na aayega.

Jitna bhi gilah shikva karein hum Guruji se,
Ki kyun hamaare jeevan mein aisee vaisee museebat hai,
Phir bhi hum apni hee mushkilon kee potli rakhna pasand karenge,
Yahee is maajre kee hakeekat hai.

Kyunki Guruji ne hamaare karmon ke hisaab se,
Hamaare jeevan ka naksha banaaya hai,
Hamein kewal thoda sa bhugtaan karaakar,
Hamaare karmon ka adhiktar bojh khud uthaaya hai.

Ve toh ve thode se karam bhi bhugat lete hamaare liye,
Lekin phir aagey jaakar milti na hamein mukti,
Isliye hee Ve katvaate Hain hamaare karam,
Dekar hamein unhe jhelne kee shakti.

Ek bhi pal saath nahin chodte Guruji,
Kabhi bhi hum se muh nahin modte Guruji,
Hum chaahe Unse kitnee bhi shikaayat karein,
Ve phir bhi har pal hum par inaayat karein.

Aur kahaan milenge aise kripaalu karunamayee Guru,
Jo moksh ka intazaam itne pyaar se karte Hain shuru,
Jo Apni goad mein uthaakar har archan ko paar karaate Hain,
Jo Apni suraksha ka kavach pehnakar bhakt ko bachaate Hain.

Isliye chaahe chhota ho ya phir lamba ho safar,
Na karne dein hum uljhanon ko apne atma-vishwaas par bura asar.
Balki Guruji ko uljhan ka Shukrana karte huey,
Unke naam ka amrit apne utsaah kee gaagar mein bharte huey,
Maangein Unse Unke charnon mein rehne kee izaazat,
Aur karte chalein sachche dil se Unkee ibadat.

Dua karein Unse ki Ve moksh kee manzil par pahunchaayein,
Jo bhi uljhanein aaye safar mein, Unkee suljhan Ve dikhlaayein,
Hamaare mann mandir mein Ve Apne naam kee aisee ashamay jyot jalaayein,
Ki uss jyot kee roshni se agyan ke andhere kee saari sambhaavanaayein mitt jaayein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Om Namaha Shivaya
Aaj Ka Suvichaar 🙏🏻🙏🏻 # 1017

 Zindagi Ka Imtehaan

Zindagi toh hai ek imtehaan,
Karte huey Khudaayee ko salaam,
Tu salaamat rakh apni muskaan,
Aur Guruji kee baat le tu maan.

Banda bann aur kar tu changey kaam,
Baaki Guruji karenge intazaam,
Tu rakhta chal Unka maan,
Ve sambhaalenge tera atma-sammaan.

Guruji ne tujhe jeevan kiya hai pradaan,
Jo hai ek bahumoolya inaam,
Kyunki tu ismein kar sakta hai karmon ka bhugtaan,
Taaki tujhe bhavishya mein mukti dein Bhagwaan.

Guruji kee mamta hai amrit kee khan,
Unkee kripa se is amrit ka tu kar le paan,
Is amrit se tujhe milega divyataa ka jo gyan,
Uss se poora hoga adhyatmik unnati ka armaan.

Guruji ke simran mein leen kar le tu apne praan,
Yeh simran hai har samasya ka samaadhaan,
Simran ke abhyaas se gehra hoga tera dhyan,
Aur dhyan mein tujhe darshan denge Bhagwaan.

Isliye hokar baaki har tamanna se anjaan,
Maan kar is imtehaan ko ek vardaan,
Advait Siddhant ko banaa kar bhakti ka anjaam,
Kar le tu zindagi ka imtehaan dene wale ko pranaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 30, 2020

Om Namaha Shivaya
Aaj Ka Suvichaar 🙏🏻🙏🏻 # 1016

Guru Nanak Dev Ka Avtar Divas

Sikhon ke sabse pehle Guru,
Jinse hui Unke baad aane wale Guruon kee parampara shuru,
Ve thei poojya Guru Nanak Dev ji pyaare,
Jinhonei aaj takk saari sangat ke kaaj Hain sanvaare.

Lahore ke paas Nankana Sahib mein,
Pandravi sadi mein Baba Nanak ka hua janam,
Khud Nirankar dharti par aaye,
Kaatne saari sarbat ke karam.

Bachpan se hee ruhaaniyat kee chhavi thee Unke jeevan mein,
Ek anokha sa pyaar jagaaya Unhonei sabke mann mein,
Rehte thei magn Ve sadhna aur dhyan mein,
Bahut abhigya thei Ve adhyatmik gyan mein.

Jaise jaise Unkee umr badhi,
Unhonei andh-vishwaas ke khilaaf awaaz uthaayee,
Unkee divyataa ke kisse mashhoor honei lagey,
Aur har oar roshan hui Unkee vadiyaayee.

Kaha jaata hai ki jab Ve thei takreeban tees saal ke,
Tabb ek neher ke paas se Ve teen din ke liye adrishya huey,
Aur lautne par Guru Nanak ji maun rahey,
Phir bataaya ki kaise Unhe Divya jyot ke darshan huey.

Buss, phir uss divyataa ke paawan amrit ko,
Sab takk pahunchaane ka Ve karne lagey prayatna,
Har insaan mein dekh kar divyataa kee moorat,
Ve karne lagey samaaj ke uddhaar ka yatna.

Ek Onkar Satnam ka paath padhaaya,
Uss Akal moorat takk pahunchne ka raasta dikhaaya,
Niswaarthta aur sachchaayee ka mahatva samjhaaya,
Aur sabko Naam japna sikhaaya.

Bheetar kee jagriti kee dee Unhonei prerna,
Samaaj kee oonch neech ko mitaane ke liye jagaayi chetna,
Tibet bhi gaye aur Mecca, aur Sri Lanka bhi,
Jahaan gaye, vahaan kee Unhonei shuddhi kee.

Rogiyon ko bakshi arogyata,
Nirdhan ka kiya uddhar,
Patit ko banaaya paawan,
Sudhare sangat ke sanskaar.

Anant bhalaa kiya insaaniyat ka,
Dekar ashirwaad ruhaaniyat ka,
Aaj bhi kar rahe Hain aur sadaa karenge sangat ka kalyaan,
Dekar Apne Divya Naam ka daan.

Sadaa sabko Apni sharan mein rakhein Nirankaar,
Nirankaar hee toh Hain sabke taaranhaar,
Unkee mahima hai aparampaar,
Ve hee Hain sabke kirpadhaar.

Sabko Guru Nanak ke avtar divas par,
Badhaayi ho bharpoor,
Saari duniya par chhaa jaaye,
Ek Onkar ka divya spandan aur noor.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 29, 2020

Om Namaha Shivaya
Aaj Ka Suvichaar 🙏🏻🙏🏻 # 1015

                 Jeevan Ka Geet

Khush rehne ka dhoondh lein koi bahaana,
Aur har pal karte rahein Guruji ka Shukrana,
Unkee kripa se saansein chal rahi hain,
In saanson mein bhaavanaayein aur yaadein bahi hain.

Kuch yaadein meethi meethi hain,
Kuch yaadein hain namkeen,
Kuch yaadon se mann khush hota hai,
Kuch se ho jaata hai sangeen.

Zindagi sach mein pal do pal kee hai,
Kyun vyarth ka bojh uthaane mein isey bitaayein,
Isliye khud bhi jeeyein doojon ko bhi jeene dein,
Aur har taraf khush haali phailaayein.

Utkrishtta ko madhe nazar rakhte huey,
Mann mein koi aise vichaar ko ghar na banaane dein,
Jo pahunchaaye hamaare spandan ko nuksaan,
Ya jis se hum bhool jaayein ki sab kuch dekh rahey Hain Bhagwaan.

Hum sab adhyaatmik ansh hain,
Param pita Paramatama ke,
Phir apni taraf se kyun vikaaron ke,
Daag lagaayein hum atma pe.

Shukrana aur khushi ko banaayein meet,
Inhee ke sangg nibhaayein jeevan jeene kee reet,
Jeevan ke har pal ko dikhaayein apni preet,
Toh jeevan ka geet bann jaayega hamaara meet.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 28, 2020

Om Namaha Shivaya
Aaj Ka Suvichaar 🙏🏻🙏🏻 # 1014

   Maran Kee Pakki Hai Buniyaad

Kaheen tedha, toh kaheen pathreela,
Kaheen sookha, kaheen baarish se geela,
Kaheen aruchikar, toh kaheen suhela,
Kaheen saaf, toh kaheen keechad se mayla.

Aisa hee hota hai sabke jeevan ka raasta,
Jispar hota hai hamaara hamaare karmon se vaasta,
Ye karam hee manzil ka nishchay karte hain,
Ye hee hamaare khaate mein paap aur punya bharte hain.

Raaste mein chalte huey koshish hoti hai,
Ki pathar aur keechad se rahein duur,
Phir burey karam karne ke liye,
Kyun hum ho jaate hain majboor?

Raaste par chalna toh hai zaroori,
Aur mukti ke liye karmon ka bhugtaan hai majboori,
Jitna saral ho raasta, chalna lagta hai utna aasaan,
Jitne kukaram kumm hongei, utnee jaldi mukti denge Bhagwaan.

Guruji ka naam lete lete raasta karein tayy,
Unke naam se shakti milegi aur mitt jaayega har bhayy,
Phir himmat hogi sadaa achche karam karte rehne kee,
Aur kaam krodh moh lobh ahem ke bahaav mein na behne kee,

Nirnay toh hamaare haath mein hai,
Guruji ka ashish hamaare saath mein hai,
Kyun nahin har pal yeh rakhein yaad,
Ki janam kee nahin, lekin maran kee pakki hai buniyaad.

Guruji hamaare sangg Hain har jageh,
Paa lein hum apni har kamzori par fateh,
Raaste par chalte huey na maanein hum haar,
Aur is buniyaad kee yathaarthta ko kar lein hum sweekar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 27, 2020

Om Namaha Shivaya
Aaj Ka Suvichaar 🙏🏻🙏🏻 # 1013

   Tayrnaa Sikha Kar Taar Dete Hain

Na dekha idhar, na dekha udhar,
Maar lee ruhaaniyat ke saagar mein chhalaang,
Baaki har armaan ko chod kar,
Buss, Guruji ka saath liya maang.

Guruji ke saath se mil gaya Unka pyaar,
Mil gaya Unkee bhakti ka uphaar,
Sab kuch Unke aagey diya haar,
Aur maan liya Unhe apna sansaar.

Pyaare Guruji ke saath hotey,
Jabb gyan saagar mein lagaaye gote,
Toh atma sheetal aur tript hui,
Aur har nakaratmakta se rikt hui.

Guruji ne taarne se pehle tayrnaa sikhaaya,
Guruji ne Apna prataap dikhaaya,
Ek anokha sa ruhaani raaz bataaya,
Aur mere mann ka har sanshay mitaaya.

Jaise jaise Unke sangg waqt bitaaya,
Duniya ka asal roop achche se nazar aaya,
Kaun apna hai aur kaun paraaya,
Guruji ne ye ehsaas dilaaya.

Jo ghaav huey dil mein, Guruji ne Unhe bharaa Apni mamta se,
Gyan ke saagar kee boondon se marham diya Apni kshamta se,
Jab simran ka naam aur shabd saagar kee lehron mein mila,
Toh atyant sundar Om aur Naad ka sur khila,
Uss sur aur uskee taal ke aalam se,
Saagar kee lehron par Guruji ka noor chhaaya,
Uske jeevandayi jal kee pavitrataa mein,
Mera toh saans saans samaaya.

Jitna saagar hai gehra aur anant,
Uss se kaheen zyada leeladhari Hain Guruji mere Bhagwant,
Doobte huey ko tayrne ka mil gaya shubh avsar,
Jabb sab kuch chod diya Guruji par.

Tayrnaa sikha kar taar dete Hain,
Sab kuch sambhaal lete Hain,
Sach mein aur koi nahin hai Guruji ke jaisa,
Jaise haal mein Ve rakhna chaahein, jeevan ho jaaye vaisa.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja