Author: dhirjabhat

October 8, 2020

Om Namaha Shivaya
Aaj Ka Suvichaar 🙏🏻🙏🏻 # 963

      Jeevan Ke Is Daur Par

Pyaare Guruji,

Hamaare khoon ka katra katra ,
Aapki mehar ka mohtaaj hai,
Dil ke roam roam par,
Aapki marzi ka raaj hai.

Kal jo hua so ho gaya,
Abb hamaare saamne aaj hai,
Aapki mehar se isey sanvaar lein,
Hamaare karmon ke haath mein hamaari laaj hai.

Duniya ka drishya toh dekh liya,
Yahaan se chala jaayega jo bhi yahaan aaya hai,
Chaahe jitna bhi gehra rishta ho kisee se,
Phir bhi yahaan har koi paraaya hai.

Kyunki sabke saath laukik naata hai,
Jisne vyarth mein kayee baar sataaya hai,
Sadhna mein archan hai yeh sansaar,
Lekin karmon ka khel bhi isi mein samaaya hai.

Isliye yahaan par rehte huey hee,
Seekhna hai alag hona adhyatmik taur par,
Taaki dil ko chot na pahunche,
Jeevan ke is daur par.

Kyunki ruhaani seedhi par chadhte huey,
Dil kamzor ho toh nahin hai achchaa,
Niswaarth bhakti ke sangg yeh bhi chaahiye,
Ki iraada ho nek, dridh, aur sachchaa.

Isliye dikhaawe ka koi kaam nahin,
Na hee faayda hai kisee vikaar ka,
Banda bann ne ke liye hona zaroori hai,
Changey vyavhaar aur vichaar ka.

Jo khushi hum bhautikvaad mein dhoondh rahe hain,
Uss se zyada khushi ruhaaniyat mein paayein hum,
Guruji, aisee kripa keejiye humpar,
Ki abb toh bande bann jaayein hum.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 7, 2020

Om Namaha Shivaya
Aaj Ka Suvichaar 🙏🏻🙏🏻 # 962

         Sab Rishton Ka Samraat 

Guruji kee mamta kee mithaas,
Sangat kee Guruji ko paane kee aas,
Guruji ka naam leta hua sangat ka shwaas,
Sangat kee Guruji ke charnamrit ke liye pyaas,
In sabse banta hai yeh rishta bahut hee khaas.

Guruji ka laad aur pyaar,
Sangat par Unke kiye upkaar,
Guruji ka sangat ko diya dulaar,
Sangat kee Guruji ko pukaar,
In sabse rehta hai yeh rishta barkaraar.

Guruji ka sangat ko diya maargdarshan,
Sangat ka karte rehna Guruji ka smaran,
Guruji kee har bhakt par karuna har kshan,
Sangat ka pehen lena Guru naam ka aabhushan,
In sabse hota hai yeh rishta bahut paawan.

Guruji kee Apne bachchon par nadar,
Sangat kee Guruji par pyaar bhari nazar,
Guruji kee bhakti karne ka hamaari chetna par asar,
Sangat ke sukh mein na rahey koi kasar,
In sabse hota hai yeh rishta agrasar.

Guruji ka diya hua langar prasad,
Sangat kee Guruji sunte Hain fariyaad,
Guruji ka diya hua anant ashirwaad,
Sangat ko Guruji se milee hui uddhar kee buniyaad,
In sabse rehta hai yeh rishta sadaa yaad.

Guruji kee maujoodagi har pal,
Sangat ke kasht jo jaate hain tal,
Guruji ke paas hai har mushkil ka hal,
Sangat ka Guruji par bharosa atal,
In sabse hai salaamat yeh rishta kal, aaj, aur kal.

Guruji ne tabb tabb bhi diya sahaara,
Sangat ne jabb jabb Guruji ko pukaara,
Guruji bin hamaare boley bhi jaanein haal hamaara,
Sangat ka jeevan Guruji ne hai sanvaara,
In sabse banaa hai yeh rishta duniya mein sabse pyaara.

Guruji ne dee hai simran aur dhyan kee daat,
Sangat ka Guruji ke prati komal jazbaat,
Guruji ne dee hai sewa aur satsang kee saugat,
Sangat ke karam Guruji dete Hain kaat,
In sabse yeh rishta hai sab rishton ka samraat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 6, 2020

Om Namaha Shivaya
Aaj Ka Suvichaar 🙏🏻🙏🏻 # 961

              Saal Beet Raha Hai

Saal beet raha hai,
Waqt jeet raha hai,
Insaan haar raha hai,
Waqt maar raha hai.

Abb bhi nahin samjhenge,
Toh phir kabb samjhenge,
Ki insaan Bhagwaan nahin hai,
Aur Bhagwaan hee sahi hai.

Hum toh sach mein keede makode hain,
Apne hee karmon se humne apne bhagya madode hain,
Ye toh Guruji kee mehar hai,
Ki jeevan mein abb bhi sehar hai.

Is sehar ka ujaala rahe barkaraar,
Guruji kee kripa rahe aparampaar,
Isliye kyun na hum sab sudhar jaayein,
Jo raasta Guruji dikhaayein, hum udhar jaayein.

Guruji ke aagey waqt bhi har waqt jhuk jaata hai,
Guruji ke aagey har tarehn ka sankat ruk jaata hai,
Guruji kee kripa se hamaara bura ho hee nahin sakta,
Kyunki waqt bhi Guruji ko salaam karte nahin thakta.

Guruji hamein har pal neeven hokar jeena sikhaayein,
Aur hum Guruji ke charnon mein sadaachaari se waqt bitaayein,
Har pal hai boond ashirwaad kee aur waqt hai gehra saagar,
Waqt ke saagar mein basey ashish se hum bhar lein apne jeevan kee gaagar.

Madad karein kalyuga kee vidaayee mein,
Surakshit rahein Guruji kee vadiyaayee mein.
Kadar karein Guruji ke diye huey aashiyaane kee,
Taral hokar tayyaari karein satyuga ke aane kee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 5, 2020

Om Namaha Shivaya
Aaj Ka Suvichaar 🙏🏻🙏🏻 # 960

        Simran Kee Kalee

Ruhaani saugat hai ye,
Baahar nahin milegi,
Ye simran kee kalee hai,
Jo dhyan bannkar khilegi.

Guruji Apne prem ke amrit se,
Is komal kalee ko seenchenge,
Niswaarthta ka adhyatmik aahaar dekar,
Kalee ko divyataa kee oar kheenchenge.

Samarpan ka noor chhaayega kalee par,
Toh veh tarr jaayegi khilte huey,
Simran dhyan mein parivartit hoga,
Bahaar kalee ko chhoo jaayegi milte huey.

Guruji kee soch mein rehte rehte,
Kalee bann jaayegi sundar phool,
Uskee sakaratmakta hataati rahegi,
Uspar padne waali saari dhool.

Har bhakt ke simran kee kalee,
Jab phool mein badal jaayegi,
Toh sangat kee bagiya lagegi pyaari,
Vatavaran mein khoobsoorati aayegi.

Guruji kee divya mehek,
Bagiya mein khushboo phailaayegi,
Poore gulistaan mein,
Is khushboo se raunak aayegi.

Isliye, aayiye, Guruji ka kar lein simran,
Prem, bhakti, vishwaas ke saath,
Kyunki dhyan ka phool khilaane mein,
Guruji ka hee toh hai hitkaari haath.

Phool ke liye mokshdaayi ho jaaye,
Karna Guruji ke charnon mein sarvsamarpan,
Isliye aayiye dhyan suman ko shraddha se,
Karein Unkee sharan mein arpan.

Buss, phir simran kee kalee kee kahaani ka hoga sundar anjaam,
Kyunki dhyan ke phool ko mil jaayega MahaShiv ka dhaam,
Har phool ko deedar hoga Bhagwaan ka,
Aur uddhaar ho jaayega poore gulistaan ka.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 4, 2020

Om Namaha Shivaya
Aaj Ka Suvichaar 🙏🏻🙏🏻 # 959

  Bandagi Kee Chunariya

Guruji, Aapki bhakti ka har pal,
Mann ko meetha laagey,
Dua hai ki Aapki bhakti karte karte,
Pakke ho jaayein bandagi ke dhaage.

In dhaagon mein kabhi gaanth na pad jaaye,
Aapse vintee hai mere Bhagwan,
In dhaagon se pyari si chunariya banaa do,
Jisey atma par odh kar sajaaoon mai apna jeevan.

Meri atma par ho Aapki bandagi kee chunariya,
Uspar Aapki ruhaaniyat kee khushboo chhaaye,
Toh makhmali hogi janam aur maran kee dagariya,
Chaahe kaisa bhi kasht saamne aaye.

Is chunariya ko odhe huey,
Baadalon ke paar mai ud jaaoon,
Akash kee aseemta ko paar kar ke,
Baaki har bandhan se azad ho jaaoon.

Buss Aapke saath juda naata,
Veh sadaa rahe salaamat,
Toh aanch bhi na aayegi mujh par,
Chaahe aa jaaye poori srishti mein kayamat.

Swaarthi bann rahi hoon agar yeh maangkar,
Toh Aap kripya mujhe kar dena kshama,
Kya karoon, yeh ruhaani tamanna hai meri,
Ki Aapke sangg hee guzrey mera saara samaa

Isliye is tamanna ko poori karne kee koshish mein
Mera saath dena, mere daata
Buss itna yogya banaa dena mujhe
Ki Aapke charnon se juda rahe mera naata

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 3, 2020

Om Namaha Shivaya
Aaj Ka Suvichaar 🙏🏻🙏🏻 # 958

               Shukrana Ka Suvichaar

Pyaare Guruji,

Suprabhaat kee shuruaat Aapse,
Jeene ka jazbaat Aapse,
Divyataa kee daat Aapse,
Sewa kee saugat Aapse.

Bhalaayi ka bhaana Aapse,
Shanti mein samaana Aapse,
Kalyaan ka khazaana Aapse,
Aapke gungaan ka gaana Aapse.

Sukh kee mani Aapse,
Hariyaali ghani Aapse,
Sangat dhani Aapse,
Har baat bani Aapse.

Mann par mehar Aapse,
Shuddhi kee sehar Aapse,
Paath aathon pehar Aapse,
Lagan kee leher Aapse.

Shraddha bharaa shwaas Aapse,
Waqt par vishwaas Aapse,
Ehsaanon ka ehsaas Aapse,
Pavitrataa kee pyaas Aapse.

Mamta bhari muskaan Aapse,
Vaibhav ka vardaan Aapse,
Umangg ko udaan Aapse,
Daata ka dhyan Aapse.

Ruhaaniyat ka raasta Aapse,
Vishwaas ka vaasta Aapse,
Dil kee daastaan Aapse,
Ashirwaad kee aastha Aapse.

Simran ka shringaar Aapse,
Satsang ka sansaar Aapse,
Pyaar aur parivaar Aapse,
Shukrana ka suvichaar Aapse.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 2, 2020

Om Namaha Shivaya
Aaj Ka Suvichaar 🙏🏻🙏🏻 # 957

         Kisee Ne Na Jaani

Guruji kavach Hain suraksha ke,
Guruji bhandaar Hain shiksha ke,
Guruji uttardaayi Hain deeksha ke,
Guruji rahnuma Hain raksha ke.

Guruji Gurbani ke dwaara dard ghataate Hain,
Simran se bheetar kee mayyl hataate Hain,
Soye huey ko chetna dekar jagaate Hain,
Vikaar bhare mann ko saaf karaate Hain.

Guruji ko sarvsamarpan karne se,
Hamaari mushkilein nahin rehti hamaare paas,
Unke har satsang mein aane se,
Simran kee aur badhti jaati hai pyaas.

Guruji kee har ruhaani saugat ke liye,
Mann mein jageh banaani hai,
Isliye mann ke bheetar hamein,
Sadbhaavna aur sweekriti laani hai.

Tabhi toh shiksha aur deeksha aakar,
Basengi hamaare mann ke mandir mein,
Aur vikaar na ghar banaa sakenge,
Kabhi bhi hamaare bheetar mein.

Kyun na apne mann ka saanchaa saaf karein,
Maangein maafi aur doojon ko maaf karein,
Mann ka bojh halka ho jaayega,
Zindagi jeene mein anand aayega.

Jab Guruji par chod dee jeevan kee kahaani,
Phir kisee baat kee nahin hai pareshaani,
Do chaar din kee toh hai zindagaani,
Jaane kee bela toh kisee ne na jaani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 1, 2020

Om Namaha Shivaya
Aaj Ka Suvichaar 🙏🏻🙏🏻 # 956

        Shukrana Karna Bhool Gaye

Kisee ko shaareerik roag ne ghera hai,
Toh kisee aur ko hai maansik beemaari,
Koi na koi museebat se,
Pareshaan hai yeh duniya saari.

Kisee ko dhan daulat kee hai chinta,
Toh kisee ko hai ghar pariwaar kee fikr,
Har kisee ko koi maajra sataaye,
Shukrana karna bhool gaye karte karte inka zikr.

Shukrana uss maalik ka, jisne dee ye saansein,
Uss maargdarshak ka, jisne thaami hain hamaari baanhein,
Uss murshid ka, jo jeevan ke paath padhaata hai,
Uss naath ka, jo mamta ke aanchal mein sulaata hai.

Shukrana uss meet matvaale ka, jisne kabhi saath na choda,
Shukrana uss rakhwaale ka, jisne kabhi bharosa nahin toda,
Hamaare Guruji toh har rishta bakhoobi nibhaate aaye Hain,
Toh shukrana karein ki hum Unse jud paayein Hain.

Guruji bhakt ko Apni goad mein lekar,
Uske karmon ko katvaate Hain,
Aur bhakt kee bhakti aazmaane ke liye,
Imtehaan bhi dilawate Hain.

Ve ek ya anek janmon mein hamein taar dete Hain,
Apni divyataa se hamaare jeene marne ka bhaar bhi lete Hain,
Lekar kisee kee aasaan toh kisee kee kathin pareekshaa,
Antt mein mukti se puraskrit karte Hain sabki prateeksha.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 30, 2020

Om Namaha Shivaya
Aaj Ka Suvichaar 🙏🏻🙏🏻 # 955

     Aaj Kee Is Guftgoo Mein

Hoon mai bahut shukraguzaar ,
Lekin kaise karoon izhaar,
Jitne bhi alfaaz kahoon, ve kum hain,
Aankhein bol na paayein kyunki ve numm hain.

Guruji, paaya hai jabse Aapka pyaar,
Sanvar gaya hai jaise mann ka sansaar,
Jabb se bulaaya hai Aapne Apne dwaar,
Hai abb na kisee aur ke bulaave ka intazaar.

Guruji, jabb se Aapke charan chhoone ke liye sir jhuk gaya,
Tabb se dil pehle ke jaise fikr mein rehne se ruk gaya,
Aapke pyaar mein rooh takk bheeg gayi hai meri,
Aapke divya deedar mein abb seh na sakoon mai deri.

Jidhar dekhoon, Aap hee Aap nazar aate Hain,
Bin mere kahe bhi dil kee baat samajh jaate Hain,
Har dukh dard mein Aap saath nibhaate Hain,
Aapke gungaan mein abb raat din beet jaate hain.

Aisa adbhut anokha sukoon hai Aapke aanchal kee chhaaon mein,
Ki Aapke paas aane ka junoon hai abb mere dono paaon mein,
Aur kaheen jaane ko karta hee nahin hai dil,
Kyunki Aapke paas ruhaani khushi jaati hai mil.

Aaj kee is guftgoo mein mujhe Aapse ye hai kehna,
Ki Aapke naam ka moti hai mera sabse keemti gehna,
Abb chaahe jo bhi pade Aapke diye huey imtehaan mein sehna,
Buss, yoon hee Apne charnon mein mujhe rakhe rehna.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 29, 2020

Om Namaha Shivaya
Aaj Ka Suvichaar 🙏🏻🙏🏻 # 954

     Abb Toh Ek Hee Ummeed Hai

Abb toh ek hee ummeed hai

Veh hai hamaare manovikaaron ka khaatma,
Kyunki inke burey asar se,
Dooshit ho rahi hai hamaari atma.

Ahem ka pishaach ghoomta hai,
Hamaari soch ke aaspaas,
Krodh ne toh ghar banaakar,
Kar liya hai mann mein vaas.

Irshya kee aag mein jal raha hai,
Mann ka komal bhaav,
Jhooth ke dard se,
Dil mein hain peedajanak ghaav.

Lobh aur madsar kee dhool ud kar,
Charitra ke darpan par chadhti jaa rahi hai,
Kaam kee nakaaratmak oorja se,
Chetna bhi sadhti jaa rahi hai.

Dikhaawa karne ka nashaa,
Sabko bekaabu kar raha hai,
Paapon ka ghada din badin,
Maano jaise vish se bhar raha hai.

Phir bhi hum insaan soch rahe hain,
Ki kalyuga kahaan se aaya hai,
Jab ki jeevan ke chakravyuh par,
Hamaare hee manovikaaron ka saaya hai.

Guruji kee hee kripa drishti se,
Mann ka ganda bartan ho sakta hai saaf,
Guruji Bholenath Hain,
Ve hee kar sakte Hain hamein maaf.

Guruji, Aapne toh bade badon ka ahem,
Ek pal mein kiya hai chuur,
Hum manovikaaron ke roag se hain beemaar,
Guruji, Aapki karuna se yeh roag hoga duur.

Hamaari har soch sakaratmak ho jaaye,
Hamaara mann sahi vichaar kar paaye,
Gyan aur sadbhaav se prerit ho hamaara aacharan,
Prem aur neki se sugandhit ho maansik vaatavaran.

Guruji, kripa kar hamaare mann ke bartan ko,
Apni mehar ka marham deejiye,
Hamein subuddhi dekar, Guruji,
Hamaari shuddhi keejiye.

Insaaniyat ko apna dharam maankar,
Hum Aapki ichchaa- anusaar ‘bande bann’ jaayein,
Achchi vicharadhara apnaa kar,
Ek dooje ke jeevan mein khushiyaan laayein.

Aapki mehar jo hoti rahe hum par,
Toh hee hum tarr paayenge,
Varna toh janam maran ke silsile se,
Kabhi mukt hee nahin ho paayenge.

Aapke alawa na hai koi dooja,
Jo hamein sakta hai taar,
Hamein sudhaar kar, aye Parwardigaar,
Aap kripa kar keejiye saare jagg ka uddhaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja