Author: dhirjabhat

September 28, 2020

Om Namaha Shivaya
Aaj Ka Suvichaar 🙏🏻🙏🏻 # 953

      Tufaanon Ke Baavajood Bhi

Vichaar shuru hua jab poochhaa ek sangat pyari ne,
Ki saamuhik satsang kab shuru hongei is mahamaari mein,
Jawaab nikla ki Guruji kee hogi jab marzi,
Hum toh buss Unke aagey kar sakte hain arzi.

Arzi, ki jab aur agar Unkee ho manzoori
Tabhi ho hamaari ye ya koi bhi chaahat ya zaroorat poori
Kyunki Ve hee jaante Hain ki hamaare liye kab aur kya sahi hai,
Hamein toh is baat kee koi jaankaari hee nahin hai.

Guruji ne kaha thaa ki aayega maada waqt,
Guruji Hain toh aur kaheen kyun jaayenge Unke bhakt?
Unke kahe anusaar aaj satsang ho raha hai ghar ghar mein,
Unkee aseem kripa se toh kasht tal jaate hain pal bhar mein.

Is daur ka uthaayein hum adhyaatmik laabh,
Chodkar laukikta ka hisaab kitaab,
Guruji ka simran aur dhyan karte jaayein,
Aur swayam ke bheetar jhaank paayein.

Guruji kee baat maankar kar lein gupt paath,
Kar lein gupt sewa aur gupt daan,
Abb nahin sudhrenge toh kabb sudhrenge,
Sudhaar mein hee hamaara kalyaan.

Mahamaari toh mehez ek bahaana bannkar,
Is duniya ko bataane aayi hai,
Ki koi nahin hai Bhagwaan se zyada mahaan,
Kyunki Ve hee sambhaalte Hain saara jahaan.

Jabb takk hum Guruji ke hukm mein rahenge,
Toh chaahe jeevan mein aate rahein bhayankar tufaan,
Hum toh MahaShiv kee sharan mein hain,
Tufaanon ke baavajood bhi nishchit hai hamaara kalyaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 27, 2020

Om Namaha Shivaya
Aaj Ka Suvichaar 🙏🏻🙏🏻 # 952

                   Sukh Ka Taaj

Raat ke andhere mein bhi ek khaasiyat hai,
Kum se kum ujaale ka intazaar toh rehta hai,
Waqt ke mukhaalif honei kee bhi khoobi hai,
Ki paani mein milee hui mitti ke jaise veh behta hai.

Tabhi toh subah aati hai zaroor,
Aur waqt kee pratikoolta ho jaati hai duur,
Guruji ke aagey toh raat aur bura waqt,
Dono hee chale jaane ke liye ho jaate hain majboor.

Kabhi na kabhi kaheen na kaheen,
Guruji se preet jo ho jaati hai,
Toh Guruji kee ruhaani maujoodagi,
Dil ko itminaan pahunchaati hai.

Isliye Guruji kee raza mein razaamand tu ho,
Raat ho andheri toh Guruji ke aanchal mein tu jaa so,
Gurbani ke rass mein ramm kar tu usmein jaa kho,
Waqt kee maati mein change karam ke beej tu bo.

Waqt kee maati upjaaoo hokar,
Jeevan mein hariyaali laayegi,
Ummeed ka sooraj uday hoga,
Aur andheri raat beet jaayegi.

Tera kal bhi hai Guruji ke hukm ka mohtaaj ,
Unkee kripa se hee sanvartaa hai har kaaj,
Tera aane waala kal aaye pehen kar sukh ka taaj,
Isliye pehle nahin bhi kee toh Guruji kee bandagi shuru kar le aaj.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 26, 2020

Om Namaha Shivaya
Aaj Ka Suvichaar 🙏🏻🙏🏻 # 951

Chalta Chal, Tu Chalta Chal

Chalta chal, tu chalta chal,
Guruji zindagi ka rukh denge badal,
Tera jeevan hoga safal,
Tu buss apna bharosa rakh atal.

Chalta chal, tu chalta chal,
Na dhoondh tu apni sewa mein phal,
Kaheen ye ho na jaaye vifal,
Kyunki niswaarth sewa hai asal.

Chalta chal, tu chalta chal,
Chaahe sooraj bhi jaayega dhal,
Tere raaste mein diye jaayenge jal,
Amrit bann jaayega nal ka jal.

Chalta chal, tu chalta chal,
Tere kasht jaayenge tal,
Har mushkil ka milega hal,
Na baar baar tu haath mal.

Chalta chal, tu chalta chal,
Aaj ke jaisa na hoga tera kal,
Guruji denge tujhe atma-bal,
Ve sab kuch dekhein har pal.

Chalta chal, tu chalta chal,
Yeh kalyuga chaahe ho daldal,
Tu Guruji ke hukm par kar amal,
Bann tu jaise keechad ke beech kamal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Om Namaha Shivaya
Aaj Ka Suvichaar 🙏🏻🙏🏻 # 950

         Bhaley Kee Baat

Dhyan karo gungaan karo,
Guruji kehte Hain gupt daan karo,
Satyuga ka swaagat ek saath karo,
Guruji kehte Hain gupt paath karo.

Khokhli baaton se Simran ko na bhangg karo,
Guruji se seedhi taar jod kar satsang karo,
Zindagi ke din hain kewal do chaar,
Gupt sewa karo Guruji ke hukm ke anusaar.

Shraddha rakho, aur rakho sakaratmakta aur saboori,
Jo bhi divyataa se duur le jaaye, uss se banaa lo tum duuri.
Niswaarth prem ke moti piroh lo apni bhakti mein,
Vishwaas rakho Guruji kee anant shakti mein.

Sadaachaari se karo shareer kee shuddhi,
Dhyan dwaara badhaao adhyatmik buddhi,
Guruji kee mehar se aa jaayegi subuddhi,
Shuddhi aur subuddhi hai ruhaani sukh kee vidhi.

Guruji ka sikhaaya saleeqa saral hai,
Guruji ka taraasha har tareeka taral hai,
Guruji ka kiya har kalyaan komal hai,
Guruji ka kiya niyati ka nirmaan nirmal hai.

Guruji kee dee hui daat hai ye,
Isliye yakeenan bhaley kee baat hai ye.
Isliye taral tareekon aur saral saleeqon ko apnaa lo jeevan mein,
Komal kalyaan aur aise nirmal nirmaan ka anand samaa lo mann mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja
[11:57 PM, 9/24/2020] Dhirja Bhat M. D.: 💚🌹🌹🌹

September 24, 2020

Om Namaha Shivaya
Aaj Ka Suvichaar 🙏🏻🙏🏻 # 949

   Akhand Indradhanush

Safar hai ye, kabhi lagega mushkil,
Phir honei lagega aasaan,
Phir shaayad koi kathinaayi aaye,
Par sadaa saath Hain Bhagwaan.

Chalte chalein Guruji ka naam lekar,
Guruji har moad par angg sangg Hain,
Chaahe Ve dikhen ya na dikhen,
Chaaron oar Unkee divyataa ke rangg hain.

Ye divya rangg ek akhand indradhanush banaate hain,
Aur hamaari zindagi ke badalte mausam apne sangg laate hain,
Isliye chaahe jeevan ka patjhad bhi ho,
Ye rangg hamein jeena sikhaate hain.

Guruji kee divyataa ke rangg se zyada gehra,
Koi aur rangg nahin hai poori srishti mein,
Aur kisee kee nigaahon kee rehmat kee nahin zaroorat,
Kyunki hum hain Guruji kee mehar kee drishti mein.

Chaahe aa jaayein anginat tufaan,
Is indradhush ka rangg pheeka na hoga,
Isliye mann kee aankhon se dekhte rahein isey,
Aur sakaratmak soch ka na chodein koi bhi mauka.

Kyun na is rangeele indradhanush se,
Apne jeevan kee dhoop chhaaon ka saamna karte chalein,
Kyunki yeh indradhanush toh salaamat rahega,
Chaahe zindagi mein lakh sooraj dhalein.

Dekhte dekhte samay kee dhaara behti rahegi,
Aur Guruji hum par mehar karte rahenge,
Maayoosi kee baarish ko badal kar asha ke amrit mein,
Guruji is indradhanush mein rangg bharte rahenge.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 23, 2020

Om Namaha Shivaya
Aaj Ka Suvichaar 🙏🏻🙏🏻 # 948

  Hamaare Karunamayee Kartaar

Aajkal logon se milna julna hota hee nahin,
Kyunki paristhiti ke anusaar vahee hai sahi,
Har jageh mil raha hai yeh ruhaani sandesh,
Ki is samay zaroori hai karna apne bheetar pravesh.

Kyunki Bhagwaan kaheen baahar nahin,
Balki hamaare bheetar karte Hain nivaas,
Isliye Unka deedar karne ke liye,
Aawashyak hai ekaagrchitt karna apna shwaas.

Tabhi toh Guruji ne MahaSamadhi lene se pehle hee,
Aane waale samay ko maada bataaya,
Gurbani se joda Apne bhakton ko,
Simran aur dhyan karna sikhaaya.

Is maade samay mein ya iske pehle aur baad,
Saamaajik dikhaawe ne kaam nahin hai aana,
Lekin jo paath karega,
Uska mumkin hai bach paana.

Is samay ke liye Guruji ne bhakton ko,
Bahut pehle se tayyaar karna kiya shuru,
Hamaare kalyaan ka poora uttardaayitva liya,
Sach mein, kitne pyaare Hain hamaare Guru.

Isliye jo aan padee hai ye Mahamaari,
Toh itnee toh bantee hai hamaari zimmedaari,
Ki hum isey phaylne se bachaayein,
Aur is tarehn insaaniyat ke kaam aayein.

Guruji chaahte Hain ki hamaare hon changey karam,
Isliye zaroori hai nibhaana insaaniyat ka dharam,
Guruji sanvaarenge har bhakt ka ghar sansaar,
Kalyaan karenge hamaare karunamayee kartaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 22, 2020

Om Namaha Shivaya
Aaj Ka Suvichaar 🙏🏻🙏🏻 # 947

        Aapka Dhyan Karte Karte

Pyaare Guruji,

Aapke jo anek Swaroop Hain, mai kis Swaroop ko sabse behtar maanoon,
Aapke toh har roop ko Bhagwaan ke naam se jaanoon.
Aapka noor chhaaya hai har Swaroop par is kadar,
Ki mann hee nahin karta hataane ko apni nazar.
Buss, Aapko hee nihaarti rahoon mai din raat,
Aapke baare mein hee sunoon aur karoon baat,
Jidhar jaati hoon Aap saath hotei Hain mere,
Aapke sangg baatein karti hoon mai shaam savere.

Aapki ruhaani maujoodagi ka jo suhaana saath hai,
Aapke haath ne jo thaama mera haath hai,
Uss se uttam koi ashirwaad nahin,
Uss se paawan koi prasad nahin.

Aapka bhaana meetha laagey sadaa,
Aisee kripa karna mere daata,
Mere jeevan mein aane waale har dukh aur sukh kee badaulat,
Har pal gehra hota jaaye mera Aapse naata

Raat ke andhere mein Aap hee raasta dikhaayein,
Subah ke aseem akash mein Aap roshan sooraj bann kar aayein.
Sabse badi baat hai ki Aapne dil mein vishwaas ka diya jalaaya hai,
Sabse badi saugat hai ki Aapne har museebat mein dilaasa dilaaya hai.

Waqt ke sangg utaar chadhaav aayein
Toh bhi karti rahoon Aapki bandagi,
Buss yoon hee Aapka ka dhyan karte karte
Beet jaaye yeh zindagi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 21, 2020

Om Namaha Shivaya
Aaj Ka Suvichaar 🙏🏻🙏🏻 # 946

        Guruji Toh Sarveshwar Hain

Kalyuga kee is bela mein,
Mahamaari ne jo ghera hai,
Kitnon ne khoya hai apnon ko,
Hakeekat ne toda hai kitne sapnon ko.

Guruji ke simran ka hai sahaara,
Gurbani ka har shabd lagey saarthak aur pyaara,
Guruji kee har bhakt par dayalu nigraani hai,
Hum ye na maanein toh ye hamaari naadaani hai.

Jaane waale abb yahaan nahin hain,
Lekin unkee yaad hamaare saath hai,
Unke safar kee chinta matt karna,
Unke sir par bhi Guruji ka haath hai.

Buss, pehle ke jaise dua karte rehna,
Ki unhe aur koi kasht na pade sehna,
Guruji buss unhe Apne mein samaa lein,
Taaki ve janam maran ke chakkar se vidaa lein.
Phir unkee atma ka milan Paramatama se ho jaayega,
Aur unka anant takk uddhaar ho jaayega.

Jo sagey sambandhi peechhe chhoot gaye,
Guruji Hain unke bhi sangg,
Guruji toh sarveshwar Hain,
Har oar chhaya hai Unka rangg.

Kaha thaa Unhonei jis maade waqt ke baare mein,
Shaayad vahee hua hai shuru,
Guruji kee sharan se zyada suraksha aur kaheen nahin,
Kyunki Devon ke Dev Hain hamaare Guru.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 20, 2020

Om Namaha Shivaya
Aaj Ka Suvichaar 🙏🏻🙏🏻 # 945

Is Dharti Par Hum Mehmaan Hain

Hum toh mehez insaan hain,
Is dharti par hum mehmaan hain,
Mool gyan se kitne anjaan hain,
Sach maano toh hum bilkul naadaan hain.

Apni saanson par hamaara hukm nahin chalta,
Hamaari lakh koshishein karne par bhi kasht nahin talta,
Jabb takk divyataa ka ashirwaad saath na ho,
Jabb takk Guruji ke haath mein hamaara haath na ho.

Hum sab jo Guruji kee mahima ko maante hain,
Jo Unko Bhagwaan ke roop mein pehchaante hain,
Hum vaakeyi mein itne kashton se bachey huey hain,
Hamaare jeevan ke pal Guruji ne Apni divyataa se chuey Hain.

Kabhi kabhi Guruji kee kripa se,
Swapn darshan mein kasht hai mil jaata,
Is tarehn se aksar kasht asal mein
Aane se pehle hai tal jaata.

Aur jab bhi hakeekat mein kabhi
Kasht ka saamna karna padta hai,
Guruji is tarehn se katvaate Hain
Ki adhiktar asar Unhee par padta hai.

Hamein toh kewal dus pratishat,
Buss, itna hee hota hai sehna,
Aur ye sab Guruji khud karte Hain,
Hamein nahin padta hai Unhe kehna.

Aise Guru roopi Ishwar kahaan milenge,
Inhee kee karuna se hamaare paap dhulenge.
Apni goad mein baithakar bhavsaagar jo paar karaate Hain,
Na vehem ke adheen karte Hain, na hee niyamon se daraate Hain.

Kewal hamaara sadbhaav Ve chaahein,
Sadaa ujjwal karein hamaari raahein,
MahaShiv Hain, sabka kalyaan Hain karte,
Isliye toh Unke bhakt Unpar vishwaas hain dharte.

Isliye is dharti par rehte rehte,
Isey apni jaageer na maan lena,
Guruji ke kahey anusaar gupt sewa, gupt paath hai karna,
Aur hamein gupt daan hai dena.

Guruji ka ashish saath hoga,
Toh Ve har naadaani maaf karenge,
Guruji ko sarvsamarpan jo hoga,
Toh Ve saare kasht harenge.

Yahaan toh mehmaan hain hum,
Lekin kaash jab yahaan se jaayein,
Toh hamein janam maran ke chakkar se mukti dekar,
Guruji pyaar se sachkhand lekar jaayein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

SeptembVer 19, 2020

Om Namaha Shivaya
Aaj Ka Suvichaar 🙏🏻🙏🏻 # 944

            Abb Toh Dil Chaahe

Abb toh dil chaahe,
Simran karna raat aur din,
Kuch bhi achcha nahin lagtaa,
Abb toh simran kiye bin.

Simran mein Guruji kee bhakti hai,
Simran se miltee mann ko shakti hai.
Simran karne ko jee karta hai har pal,
Simran se hee kasht jaayenge tal.

Guruji ka simran karne mein,
Aisa anand hai aata,
Jaise registaan mein musaafir ko,
Sukhad antaraal hai mil jaata.

Simran prateek hai bhakti kee pyaas ka,
Simran prateek hai Guru praapti kee aas ka.
Simran gehra honei se lagne lagta hai dhyan,
Aur dhyan kee gehraayiyon mein basta hai divya gyan.

Isliye simran toh veh oonchi seedhi hai,
Jo le jaati hai ruhaaniyat ke shikhar par,
Lekin neevenpann ko pakka saathi banaana hai zaroori,
Nahin toh adhyatmik unnati reh jaati hai bikhar kar.

Pehle pehle mann ekaagrachitt na ho paaye,
Toh bhi koi baat nahin,
Seedhi taar jod kar Guruji se,
Simran kee koshish karte rehna bhi hai sahi.

Simran ke liye koi paabandi nahin, Guruji kehte Hain,
Sabse badi baat hai ki Ve hamaare dil mein rehte Hain.
Isliye har pal aur har jageh par kiya jaa sakta hai simran,
Kewal chaahiye shraddha aur vishwaas se bharaa mann.

Guruvar ke simran se karam kat-te jaayenge,
Simran se hum Guruji ke kareeb aa paayenge,
Isliye karte chalein hum Unka simran aur dhyan,
Kar ke Guruji ko mann mandir mein viraajmaan.

Jaise jaise hum karenge prayaas,
Dheere dheere ho jaayega abhyaas,
Simran mein milega itna ruhaani anand,
Aur simran aur dhyan dwaara praapt hoga satchittanand.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja