Guruji ke divya prem ko apni ragg ragg mein behne do Shankaa aur bhayy ke daag hatt jaayenge Unkee divya chhavi ko har pal apne mann mandir mein rehne do Udaasi ke pal dekhna phir jald hee katt jaayenge
Guruji ka pyaar veh vaada hai jo kabhi tootega nahin Guruji ka ashirwaad veh saath hai jo kabhi chhootega nahin Guruji kee sharan veh suraksha hai jis se milta hai har pal chayyn Guruji kee divya sundartaa se tarr jaate hain ye nayyn
Dheeraj kee dhun mein Guruji sangg tum chalte jaao Jis saanche mein Guruji tumhe dhaalein usee mein tum dhalte jaao Bejhijhak hokar chalo sadaachaari ke raaste par Guruji ko tumhara nek iraada aa jaayega nazar
Neeven hokar maan lo ki tumhe Unkee pal pal zaroorat hai Jabb bhi yeh sweekaaro tum, vahee shubh mahoorat hai Dekhna phir kaise Guruji kee shakti Nikhaar degi tumhaari bhakti
Navjaat shishu ko jis pyaar se uskee maa Seene se lagaakar dulaarti hai Vaisa hee prem dene ke liye tumhe Guruji kee baani pukaarti hai
Is baani kee oar jabb tum jaaoge Toh Guruji ko apne aur bhi kareeb mehsoos kar paaoge Unke paawan prem ke rass mein doobkar Tum hameshaan ke liye tarr jaaoge
Waqt ka yeh tathya hai bilkul sachchaa Ki chaahe veh bura ho ya ho achchaa Veh kabhi bhi ek pal ke liye bhi rukta nahin Ishwar ke alaawa kisee ke samaksh veh jhukta nahin
Guruji Ishwar Hain, kyunki Ve MahaShiv Hain Unke saare upaay bilkul anokhe aur divya Hain Varna kabhi paan ke patte ya chammach se ilaaj kaise hota? Aur jisko neend naa aati veh bhakt Guruji kee kripa se aaraam se kaise sota?
Isliye waqt bhi Guruji ke vash mein hai Aur Guruji ka raaj niyati aur waqt pe hai Waqt ke vyavhaar ko burey se achche mein badal denge Guruji Ghabraao nahin, har bhakt ke sankat ko har lenge Guruji
Waqt ne jo hum par paabandiyaan lagaayeen hain Ve bhi Guruji se chhupee nahin In paabandiyon mein abhi hamaari hee bhalaayee hai Isliye hona chaahiye hamein dukhi nahin
Ye bhi toh Guruji ka hee tareeka hai Karmic hisaab aur kalyuga ko sambhaalne ka Guruji kee marzi se hai toh kalyaan awashya hoga Aur is mein koi rahasya chhupa hoga yug ko sanvaarne ka
Jeevan ke chakravyu ke mutaabik Kalyuga ke pashchaat hee satyuga aayega Vikaaron, beemaariyon, aur buraayiyon ka antt hoga Satyuga sadaachaari, sadbhavna aur changi sehat laayega
In sab baaton par agar bharosa nahin, toh bhi chalta hai Lekin waqt ke saath saath subah ka sooraj shaam ko zaroor dhaltaa hai Is se toh koi nahin kar sakta hai inkaar Aur subah phir sooraj uday hota hai, is baat ka bhi hai sabko ikraar
Guruji ne thaama hai hamaara haath Isliye kyun na hum chalein waqt ke saath saath Katt jaayegi yeh kathin raat Kyunki hamaare sangg Hain hamaare naath
Mil kar karenge subah ka swaagat Guruji ke paawan ashirwaad se Dhanya hongei hum sabb Guruji ke diye jeevan daan ke prashad se
Kaheen par hoti madhu kee varsha Toh kaheen par amrit hai barsa Kaheen par khushboo gulab ya chandan kee Toh kaheen jyot jalti hai Guruji ke vandan kee
Kaheen kaheen par Om Onkar hain bann jaate Darbar mein, ya chai prashad ya naivedyam prashad mein Kabhi Guruji, Shivji, Nandi ya Ganpati ke saakaar roop ke darshan ho jaate Toh kabhi swapn darshan hotey satsang ke pehle ya baad mein
Kabhi kabhi saakshat darshan Kabhi shabad mein sandesh Jis bhi tarehn se Guruji chaahein Ve hamaare dil mein karte Hain pravesh
Kabhi kabhi toh Kisee insaan ya titlee ya panchhee ke roop mein Ya kabhi labh ya aankhein ya haath hilaa dete Hain Guruji Apne kisee swaroop mein
Jabb jabb dekho mann kee aankhon se Aur saraaho Guruji ko pyaar se Jabb jabb shradha suman arpit karo Ve ashirwaad denge Apne deedar se
Har roop mein Guruji ka deedar bada pyaara hai Is deedaar aur darshan se milta dil ko sahaara hai Ye achchaa naseeb tumhaara aur hamaara hai Ki pyaare Guruji ne hum sabko sweekaara hai
Guruji ka sabse pyaara darshan Hai hamaari antaratma mein Jahaan Ve ruhaani taur pe sadaiv rehte Hain Aur hamaare liye jo uchit hai, veh humse kehte Hain
Chaahe hamein Guruji nazar naa aayein Hum sabke naseeb mein Unn ka divya pyaar hai Aur Ve hum sabko har pal dekh rahein Hain Is satya se sabko milta karaar hai
Guruji har kshan hamein sambhaal rahei Hain Hamaari har saans is sachchaayee kee hai gavaah Hum sabka jeevan dhanya hua hai kyunki Hum sabko Guruji kee sharan mein milee hai panaah
Jo bhi hoga hamaare sangg Uske spandan ka chadhega hum par bhi rangg Isliye sangg karein uska jo sachchaa ho Sangg karein uska jo achchaa ho
Sangg ka rangg jo lagg gaya Toh utaarna nahin hota aasaan Yeh ruhaani maamla hai janaab Ek oar insaan hai aur doosri oar Hai Bhagwaan
Guruji kee sadhna kar ke atma-bal ko badhaayein Susangati ka saath dhoondhein aur apni sakaratmakta badhaayein Guruji kahein ki hum Unse judein, logon se nahin Jitna kum uljhengey logon se, vahi hoga sahi
Guruji sambhaalenge hamaara karmic hisaab Apni zindagi ko dein hum sakaratmak honei ka khitaab Guruji ne sabko in saanson ka uphaar diya hai lajawaab Aur sabka charitra Guruji ke liye hai ek khuli kitaab
Susangati ka ruhaani rangg jaise jaise hum par chadhtaa jaayega Vaise-vaise hamaara adhyatmik spandan badhtaa jaayega Guruji kee kripa se aur bhi zyada ruhaani anand aayega Aur neki, niswaaarthta, aur sachchaayee ka suroor chhaayega
Bheed mein gumne ke bajaaye Guruji kee mutthi bhar sangat mein samaane ka prayatna karein Logon ka anusaran nahin, Guruji aur Unke vachanon ka anusaran karein Na ghabraayein logon ke kalyugi vichaaron se, na hee sachchaayee se darein Niswaarth sewa aur simran kar Guruji kee kripa se apni jholi bharein
Guruji agar ek bhakt se kehte Ki uske liye koi cheez uchit nahin Toh veh salaah usee shaqs ke liye hoti Baaki bhakton ke liye zaroori nahin
Kisee se Guruji ne kaha ki kaali pagdi na pehno Kisee se kaha veh rajma na khaaye Toh usee sangat ke liye veh hukm hota Isliye baaki koi bhakt andhvishwaas mein na aaye
Kisee se kehte Guruji Ki veh Hanuman Chalisa sunei ya gaaye Toh kisee aur se kehte Ki veh Sai Chalisa padhne mein samay bitaaye
Shabad aur beej mantra karne ko Guruji ne sab bhakton se kaha Aur satsang mein shant hokar baitho Ye hameshaan Unka hukm hai raha
Guruji ke mahasamadhi lene ke pashchaat Unke MahaShiv roop ke mahatva ko jaan aur maan Sangat ne mantra jaap shuru kiya Aur beej mantra ke bajaaye uska kiya gaan
Kisee se Guruji ne kaha ki veh pardes jaaye Kisee ko desh mein waapis bulaaya Kisee beemar bhakt ko aspataal bheja Toh kisee aur ko paan ka patta lagaaya
Mudda yeh hai ki raasta jo bhi hho
Sabki ek hai manzil
Jis bhaav se bhi hum bhakt judein Guruji se
Buss, mann ko banaa lein hum mandir
Aisa mandir, jismein Guruji ke prati ho shradha aur vishwaas Koi kaayda kanoon ya niyam nahin, buss, ho Guruji ko paane kee aas Guruji sangg jodni hai seedhi taar Guruji se karna hai niswaarth pyaar
Koi shart nahin, na hee koi mahoorat ya mannat Buss, Guruji ke charnon ko maan-na hai jannat Kyunki yahee bilkul satya hai Yahee jeevan ka tathya hai
Guruji kahein paath aur jaap Kabhi bhi or kaheen par bhi kar sakte hain aap Na koi roak toak, na koi paabandhi, aur koi vehem nahin Jitnee bhi baar karne kee ho ichcha, vahee hai sahi
Jo Guruji ne sabke anusaran ke liye kaha Ve Unke kahey huey vachan hain Aur kaha Unhonei bhakton se ki karo sewa, simran, satsang Unhe sarvsamarpan kar ke chadhaa lo khud par Unkee bhakti ka rangg
Isliye Guruji ke kahey huey vachan Hain hamaari yaatra mein gyan ke diye Ismein har veh baat hai Jo Guruji ne kahi saari sangat ke liye
Aao, Guruji ka satsang karein Aur Unke ashish se apni jholi bharein Na kabhi bheed kee zaroorat, na kabhi kisee vehem ya dikhaawe kee Buss, zaroorat hai toh Guruji ke bulaave kee
Pyaar se Guruji ko viraajmaan karein Mann ke mangal mandir mein Laukik taur par swaroop ya aasan ho ya nahin Agar bhaav sachcha hai, toh dono hain sahi
Charnon ke liye agar gulab kee pankhudiyaan bhi na milein Toh bhi na ghabrana, na hona tum niraash Kyunki Guruji toh sangat ke maasoom bhaav ko chaahte Hain Aur shradha roopi suman kee karte Hain talaash
Pyaar se ghar mein basey sadasya Dhyan mein baith jaayein Gurbani kee meethi awaaz ke sur mein Is sangat ke dil beh jaayein
Shabad na bhi samajh aayein toh Kar lein hum unka shravan Guruji se seedhi taar jodkar Karein shradha se Unka manan
Jo bhi naivedyam hum rakhenge prem se Apne param pita Guruji ke aagey Usmein Guruji piroyenge Apna ashirwaad Istemaal kar ke mamta ke divya dhaage
In dhaagon ka prabhaav aur inkee mazbooti Hum sangat ke vishwaas par nirbhar hai Atoot bharose aur niswaarth prem se grehen karo Toh is naivedya ke prasad ka asar jeevan bhar hai
Shabad ke pashchaat Kar lein Guruji ka mantra jaap Shukrana karein aur maafi maang kar Kum karein apne paap aur santaap
Mann chaahe toh arti awashya karein Lekin iskee koi majboori nahin hai Guruji ke dhyan mein rahein Sabse zaroori vahee hai
Guruji se judey huey divya anubhav Utsaah aur shradha se sunein aur sunaayein Guruji toh sthiti ke anuroop dhalne aur dhaalne waale Bhagwan Hain Buss Unkee JaiJaikaar hum karte jaayein
Guruji ke simran kee shakti se Satsang zaroor phalega Jo bhi kasht sangat par hai aaya Veh Guru kripa se zaroor talega
Satya ka sangg jahaan Guru Govind kee maujoodagi mein ho Veh kehlaata hai sahi maainey mein satsang Kyunki Guru Govind bhi vaheen baste Hain Jahaan satya aur niswaarth prem ka hota hai rangg
Aaj sansaar kee sthiti jaisi hai Ismein hum sabka sehyog zaroori hai Jisne niswaarth bhaav se Guruji kee baat maan lee Ye jaan lo ki uss bhakt kee sewa poori hai
Bheetar se Aap hamaare mann ko saaf karein Gunaahon ke liye Aap hamein maaf karein Guruji, kripa kar Aap hee insaaf karein Aap hee ka sahaara hai, Guruji
Begunaahon ko bachaayein Aap adharam se Niyati ko Aap jodte Hain hamaare karam se Taarte Hain bhakton ko Apne rehem se Aap hee ka sahara hai, Guruji
Gupt paath, gupt daan, gupt sewa karne ko Aap kehte Hain Sabhi bhakton ke dilon mein Aap rehte Hain Hamaare liye Aap tarehn tarehn ke kasht sehte Hain Aap hee ka sahara hai, Guruji
Aap sikhaate Hain ki hamaari sewa mein na ho hamaare kisee bhi laukik laabh kee asha Aap bataate Hain ki simran mein ho Aapko paane kee abhilaasha Aap kehte Hain ki satsang mein satya ka sangg kar duur ho saari niraasha Aap hee ka sahara hai, Guruji
Aapke prem se ullaas ke phool khil jaayein Aapke protsaahan se hum aagey badh paayein Aapke prataap se rukh badlein ye hawaayein Aap hee ka sahara hai, Guruji
Pyaar Aapka hai itna madhur aur komal Dil Aapka hai itna divya, itna nirmal Vyavhaar aur khayaalaat Aapke hain itne taral Aap hee ka sahara hai, Guruji
Aapki karuna se miltee hai har kasht jhelne kee shakti Aapki kripa se hee rangg laati hai hamaari bhakti Aapke ashirwaad se hee milegi ek din mukti Aap hee ka sahara hai, Guruji
Guruji ne diya Hai yeh maanav jeevan Is tohfe ka karein hum aadar Aur Guruji ko sarv samarpan kar ke Hataa lein apne mann se andhvishwaas kee chaadar
Guruji kahein hum Unpar vishwaas karein Aur na swayam mein, na doojon ke dilon mein andhvishwaas bharein Guruji kahein is shareer ka rakhein hum dhyan Satya ke sangg aur simran se paayein adhyatmik gyan
Yeh avsar hai swayam ke bheetar jhaankne ka pehle se bhi zyada Is mauke ka faayda uthaayein aur simran karne ka aur bhi pakka karein iraada Logon se judne ke bajaaye Guruji se aur bhi zyada jud kar jeeyein Sadhna karein, Guruji ka naam japein, aur Gurbani ka amrit peeyein
Yeh Guruji ka kahaa hua ek vachan hai Ki kewal maree hui machhlee bahaav ke sangg behti hai Isliye Guruji ke hukm anusaar jaagriti laayein Kehne dein, jo bhi baaki duniya kehti hai
Na darein, aur sansaar ke kalyaan ke raaste par chalte jaayein Shaayad hamein dekh kar kisee aur kee aankhein khul paayein Achche naagrik bannkar nibhaayein insaaniyat ka dharam Dar kar, yoon chup baithkar kyun karein hum burey karam
Hakeekat ka saamna karne kee rakhein himmat Anyaay se ladne kee rakhein taakat Sach mein Guruji par vishwaas hai toh Rangg laayegi sachchaayee se kee hui ibadat
Anyaay ka saath dena bhi kukarm hota hai Yeh jaante huey bhi na banein is satya se anjaan Guruji sab kuch dekh rahein Hain Ek ek shaqs kee hai Unhe pehchaan
Hum sabse galatiyan ho jaati hain Maanav roop mein jeete huey Kash hum sab sahi raaste par aa jaayein Guruji Aapke ashish ka amrit peete huey
Guzaarish hai Aapse Guruji, ki Aapke sab bhakton ka pyaar ho niswaarth Aur Aap kripa kar thaamein hum sabka haath Taaki ummeed ke prakash se ujjwal ho yeh raat Aur bann jaaye har bigdee hui baat
Shukrana hai Guruji Aapka har pal Aapke ashirwaad se aayega sunehra kal Saare kasht zaroor jaayenge tal Aapke paas hai har museebat ka hal
Aapse yeh darkhwaast hai Guruji Ki Aapke sab bachchon ka ho uddhaar Sampoorna jagat ka kalyaan ho Niklee hai dil se yeh pukaar
Guruji kehte Hain shaant aur nishchint raho Aur rakho vishwaas ke sangg itminaan Lekin Unhonei jo maanav ka roop diya hai Uska zaroori hai rakhna dhyan
Guruji ke anusaar tann aur mann hai mandir Isliye inka dhyan karo aur inse pyaar karo Baad mein aata hai kamra, ghar, aur Bada Mandir In paanchon mandir ka aadar satkaar karo
Maanav roop mein toh Devi Devtaaon ko bhi Karmic hisaab thei chukaane pade Toh hum insaan kya cheez hain Jo hum itne ahem mein hain khade?
Guruji Hain sambhaalne ke liye hamaara karmic karz Lekin Ve chaahein ki hum bhi adaa karein apna farz Jeevan kee yaatra mein nibhaana zaroori hai insaaniyat ka dharam Isliye hamein bhi jhelne hee padenge kuch karam
Guruji kahein vishwaas karo, andhvishwaas nahin Guruji kahein achche naagarik bano, karo jo samaaj ke liye hai sahi Guruji kahein ki hum banein doordarshi, saavdhaan, aur ek dooje ko dheeraj dilaayein Aur hum ek dooje ka khayaal kar insaaniyat ke dharam ko nibhaayein
Guruji agar aisa na chaahte Phir toh naukari kee bhi zaroorat na hoti Paisa khud bakhud aa jaata Aur haath mein mil jaata kapda aur miltee roti
Bachche bhi bina kisee padhaayee likhaayee ke Imtihaan mein paas ho paate Hum sab haath dharey baithey rehte Aur saare kaam khud bakhud ho jaate
Haath bhi na dhonei padte baar baar Zarroratmand cheezon ke liye koi jaata nahin baazaar Koi chikitsak ke paas beemaari ke ilaaj ke liye na jaata Har koi ghar baithey baithey bin kuch kiye hee jee paata
Niswaarth hoti hai sewa jo ho sachchi Aur jismein neeyat hoti hai achchee Swayam ke liye aur doojon ke liye bhi Jaise hoti hai lau jalte huey diye kee
Sakaaratamak vichaaron aur khandan mein hota hai bahut fark Is sachchaayee par na laaghoo hota hai koi bhi tark Guruji par vishwaas karo aur mushkil se lado, na asliyat ka inkaar karo Guruji ko samarpan kar ke sab kuch, har chunauti ko sweekaar karo
Fikr na karo, lekin laaparavaahi bhi nahin Zikr na karo, lekin beparvaahi bhi nahin Daro nahin, kyunki hamaare sangg Guruji ke roop mein Hain Bhagwaan Lekin sambadh raho aur sahaanubhooti se lo kaam
Na phaylaao udaasi ya aakasmik bhayy (panic) Mann hee mann mein ye kar lo tayy Chaukas raho aur raho tayyaar Aur rakho khushi, ullaas, pyaar ko barkaraar (maintain)
Is jeevan kee karmic aur kalyugi yaatra mein Hamaare sehchar( fellow travelers) hain kitnee badi maatra mein Sabse prem karo agar vishwaas rakhte ho Bhagwaan mein Apna sehyog do sabke kalyaan mein
Abb bhi samay hai, sunn lo waqt kee pukaar Ek dooje par ummeed karte huey juda hai saara sansaar Sehyog se badhaao duniya mein pyaar Aisa mauka aata nahin hai baar baar
Hum sabko Guruji ne banaaya hai, isliye mil kar mushkil par vaar karo Kewal simran mein nahin, sewa mein bhi Guru prem ka izhaar karo Guruji ke vachan maankar Guruji se sachcha pyaar karo Phir subah jaldi hee aayegi, buss, thoda intazaar karo
Waqt kee lehrein vyast rehti hain Naam aur nishaan ko mitaane mein Guruji ke bhakt hokar kyun na hum vyast rahein Simran mein waqt bitaane mein
Simran bhi waqt kee lehron kee bhanti Naam ka gumaan mitaane ka kaam karega Jab ‘mai’ poori tarehn se mitt jaayegi Toh mann ka vinamr panchhee azad udaan bharega
Kyunki ek samay par ek hee bass sakta hai mann mein Ya ‘mai’ ya phir Bhagwaan Guruji Bhagwaan Hain isliye vaheen basenge Jahaan se duur ho jaayega gumaan
Mann ka vinamr panchee udaan bharkar Guruji sangg sachkhand ka kar sakega bhraman Kyun na aise panchhee banein hum sab Maan kar Guruji ka har vachan?
Guruji ka naam simar simar kar Simran hee hamaari shakhsiyat bann jaayega Jaise bhi haalaat hon zindagi mein Simran se shanti hamaara mann paayega
Simran mein aseem shakti hai Simran mein basee Guru bhakti hai Simran hai andhkaar mitaane waala diya Uska beda paar hua jisne Guruji ka simran kiya
Aaj Ka Suvichaar 