Author: dhirjabhat

March 14, 2020

Om Namaha Shivaya
Aaj Ka Suvichaar 🙏🏻🙏🏻 # 755

                      Yeh Safar

Gurbani ke paawan rass mein doobna
Guruji ne hai sikhaaya
Jeevan mein sachchaayee ka raasta
Guruji ne hai dikhaaya

Bachaa liya hamein doobne se
Agyaan ke mahasaagar mein
Apni mamta ka amrit barsaaya
Bharpoor hamaare mann kee gaagar mein

Guruji ne niswaarth sewa karne ko kaha
Unhonei hamaari khushi ke liye itna dard saha
Aur aaj bhi hamaara kalyaan karte Hain
Hamaari maangon kee jholi bharte Hain

Kehte Hain Guruji ki hum buss itna hee karein
Achchaayee karein aur achche insaan banein
Kaam aayein hum insaaniyat ke
Anuyaayee banein hum ruhaaniyat ke

Jhooth aur anyaay ka saath na dein
Guruji humse ye kahein
Kyunki anyaay ka saath dena bhi anyaay hota hai
Jis se insaan apna drishtikon khota hai

Guruji chaahein ki simran mein hum lagaayein mann
Tabhi dhanya hoga ye jeevan
Anmol ratna hai har pal simran ka
Guruji ka naam hai simran kee mala ka
manka

Satya ka sangg kar ke satsangi banein hum, Guruji kehte Hain
Har satsangi ke dil mein Guruji rehte Hain
Sabka bhaav jaante Hain Guruji
Sabki neeyat pehchaante Hain Guruji

Sachchaayee kee raah par chalne kee
Neeyat, bhavna, aur koshish ko Guruji parakhte Hain
Jo yeh zimmedaari nishkapat hokar shradha se nibhaate hain
Unke dil shanti aur santushti se dhadhakte hain

Guruji ko apna ‘mai’ samarpan karna hai
Aur satya aur nyaay se nahin darna hai
Yeh safar kabhi kabhi mushkil hotey huey bhi hai bahut haseen
Iska gawaah hai ye asmaan aur ye zameen

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 13, 2020

Om Namaha Shivaya
Aaj Ka Suvichaar 🙏🏻🙏🏻 # 754

                          Dua

Awaaz mein dua, shwaas mein dua
Aas mein dua, andaaz mein dua
Dua ka dhangg ho swaarth se alag ka
Guruji, dua hai, ki kalyaan ho saare jagg ka

Dua se sajaa lein apne vichaar aur apni bhaasha
Aur jagaayein hum dilon mein asha
Chaahe ye duniya hai ek rangmanch par tamaasha
Kyun yahaan kee shokhi ko kum karey koi bhi niraasha

Sees jhukaakar dua
Haath joadkar dua
Har dil mein ho dua
Har pal mein ho dua

Nirogi ho atma aur shareer
Bann jaaye bigdee taqdeer
Jeevan na lagey moh maya kee zanjeer
Tal jaaye yeh samaa gambheer

Jagg ka kalyaan hoga
Toh nishchit hai hamaara bhi kalyaan
Kyunki jo doojon ke liye dua maangta hai
Uska kalyaan zaroor karte Hain Bhagwaan

Kya hua jo hum par kalyuga ka bhaar hai
Hamaare Guruji kee leela toh aparampaar hai
Har ghar mein Guruji ka gungaan ho raha baar baar hai
Hamaara Unke charnon mein hona Unkee khudaayee ka chamatkaar hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 12, 2020

Om Namaha Shivaya
Aaj Ka Suvichaar 🙏🏻🙏🏻 # 753

  Hum Sab Bahut Bhagyashali Hain

Pyaare Guruji ke liye
Saari sangat hai ek samaan
Hum sab Unke bachche hain
Ve Hain hamaare naath aur Bhagwaan

Unke anek hain ashirwaad
Jinse hoti hai hamaari duniya aabaad
Ek baar Unkee chaukhat par aane kee der hai
Ki bin maange poori ho jaati hai har mangalmayee fariyaad

Unkee mahima aur Unke tej ke samaksh
Pheekee pad jaaye har vidvaan kee vidvataa
Unke divya noor ke saamne
Ksheen hai koi bhi sundartaa

Hamaare gunon ko taraashte Hain Apni divyataa se
Hamaari soch ko sudhaarte Hain Apne dil kee sundartaa se
Pratibhasampann kaarigar Hain Guruji, hamaare jeevan ka karein nirmaan
Ve Hain hamaare Ishwar, hum Unkee naadaan santaan

Har kadam par dhyan rakhte Hain hamaara
Har pal hamein dete Hain sahaara
Agam agochar Hain, phir bhi aseem shakti hai Unke prataap mein
Apne har bhakt ko sambhaal lete Hain kasht aur santaap mein

Shikaayat ke badle karna Shukrana
Udaas rehne ke bajaaye muskuraana
Zindagi mein aise parivartan laate Hain Guruji
Murjhaate huey naseeb ke phool ko khilaate Hain Guruji

Hum sab bahut bhagyashali hain
Jo Guruji ne hamein sweekaara hai
Abb toh is sansaar roopi mahasaagar mein
Unka dwaar hee hamaari naiya ka kinaara hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 11, 2020

Om Namaha Shivaya
Aaj Ka Suvichaar 🙏🏻🙏🏻 # 752

Bhakt Kee Chhoti See Kahaani

Jabb jabb maayusi ka aalam chhaaya
Guruji ka pyaar nayee ummeed laaya
Is ummeed ne dil mein utsaah jagaaya
Aur bhakt ka beda paar karaaya

Bhakt ne pyaare Guruji mein paaya
Veh pita, jisne sukoon pahunchaaya
Veh maa, jiska jabb padaa bhakt par saaya
Toh bhakt ka muqaddar aur bhi nikhar aaya

Bhakt ne jaana ki Guruji mein hai samaaya
Veh meet, jo uskee har baat samajh paaya
Veh rakshak, jisne aisa kavach pehnaaya
Ki bhakt ke darr ko duur bhagaaya

Jabb jabb bhakt ne Guruji ko bulaaya
Yeh kripaalu Guru turant aaya
Guruji ne Apni maujoodagi se aisa mahaul banaaya
Ki kisee nakaaratmak shakti ne phir bhakt ko na sataaya

Bhakt ko na aakarshit kar sakte thei moh aur maaya
Guruji ne uska atma-bal aisa badhaaya
Bhakt ne Guruji kee mahima ka geet gaaya
Aur kashton ke beech reh kar bhi bhakt muskuraaya

Bhakt ka dil dukh sukh mein shant reh paaya
Usne apna koi pal phir na kiya zaaya
Usne sewa, simran, satsang mein jeevan bitaaya
Aur sarvsamarpan kar ke apne Guruji ko rijhaaya

Is kahaani se ye samajh mein aaya
Ki vyarth hain moh, lobh, aur maaya
Ki Guruji sadaa apne Hain chaahe jagg ho jaaye paraaya
Ki jeevan kee kadak dhoop mein Guruji Hain sheetal saaya

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 10, 2020

Om Namaha Shivaya
Aaj Ka Suvichaar 🙏🏻🙏🏻 # 751

               Holi Ka Tyohaar

Sharad ritu ke pashchaat
Jabb vasant ritu hai aati
Toh veh buraayee par achchaayee kee jeet manaane
Holi ka tyohaar hai laati

Saath hee saath changi fasal ke liye Shukrana
Holi ka mahatva hai badhaata
Rangon se ullaas phaylaakar
Har koi phoola nahin samaata

Phagun kee pooran-maashi par
Holi ka avsar hai manaaya jaata
Divyataa ke pannon mein bhi
Iska abhipraay likha hai jaata

Asur raja Hiranyakashipu ne kiya prajaa ko bhaybheet
Sabse zabardasti sammaan maangkar manaayee jhoothi jeet
Unke bete Prahlaad ne na chodi Vishnu kee bhakti
Toh Hiranyakashipu ne dikhaayee apni nakaaraatmak shakti

Asur raja ne apni behen Holika ko
Pehnaaya kapde ka kavach suraksha ke liye
Goad mein Prahlaad ko lekar Holika baithi
Agni kee chita mein ahankar ka ghoont piye

Vishnuji ke prataap se chogei ka kavach
Udd kar Prahlaad par aaya
Jis agni ne Prahlaad ko maarna chaaha
Usne Holika ko le jalaaya

Jo ho chuki, uska arth hai ho-li
Abb buss goonje pyaar kee boli
Guruji ke paawan prem se
Aao sab bharein apni jholi

Jo ho gaya so ho gaya
Beetey huey par abb rona nahin
Guruji ke ashirwaad kee Ganga mein Paapon ko dhona hai sahi

Holi ka yeh bhi matlab hai
Ki mai Guruji kee ho-lee
Guruji kee laadali sangat hee toh
Hai holi kee tolee

Holy ka angrezi mein hai ek aur taatparya
Jo hai shudh aur paawan
Sarvsamarpan kar ke thaam lo
Guruji ka tum daaman

Guruji kripa aisee keejiye hum par
Ki Aapke bhakti ke rangg mein rangg jaayein is kadar
Ki buss Aap, Aap, Aap hee nazar aayein
Jidhar bhi le jaaye jeevan kee dagar

Aapke rangg mein ranggkar
Har bhakt par noor Aapka chhaaye
Duniya ke har ek konei mein
Har bhakt Aapke hee gunn gaaye

Holi ke is tyohaar ko
Guruji ke ashish se manaayein
Guruji ke rangg mein rangkar hum sab
Sansaar ko pyaar ke rangon se sajaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 9, 2020

Om Namaha Shivaya
Aaj Ka Suvichaar 🙏🏻🙏🏻 # 750

        Anand Hee Anand

Guruji ke sangg baithne ke liye
Buss, mann ka ramm jaana zaroori hai
Na koi khaas upvaas rakhna hai
Na kisee teerath yaatra par jaane kee majboori hai

Buss, shudh hriday se karni hai Unkee pooja
Aur apni aradhana mein laani hai shradha kee oorja
Laukik dhan kee zaroorat nahin, buss karam honei chaahiyen sahi
Guruji har pal hamein dekh rahei Hain, isliye Unse kuch bhi chhupa nahin

Na koi kaayda, na koi kaanoon
Buss, chahiye sirf shradha aur prem ka junoon
Is junoon se milta hai dil ko sukoon
Aur is sukoon se aur bhi badh jaata hai junoon

Guruji MahaShiv Hain
Isliye Ve hamaare sabhi manorath poorna karne kee rakhte Hain shakti
Lekin, jo bhakt bin kuch maange apna sab kuch Unhe karta hai arpan
Guruji ati-prassann hotei Hain dekhkar uss bhakt kee bhakti

Aise bhakt ko toh apni kismat se bhi zyada sukh mil jaata hai
Guru kripa se karampaash mein bandhaa insaan mukti ke kareeb aa paata hai
Ye Guru bhakt ka rishta jeevan mein ek naya rangg laata hai
Aur ye bhakti ka ruhaani rangg anand hee anand laata hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 8, 2020

Om Namaha Shivaya
Aaj Ka Suvichaar 🙏🏻🙏🏻 # 749

Karmalok Se Gyanlok Takk Ka Safar

Guruji kee kripa se hoga poora
Karmalok se gyanlok takk ka safar
Lekin ye tabhi mumkin hai
Jabb hum par hoga Guruji kee baaton ka asar

Guruji sikhaate Hain saadaapan
Aur hum dikhaawe kee oar jaate hain
Guruji sikhaate Hain niswaarth prem
Aur hum hain ki shart rakhte jaate hain

Guruji kehte Hain karo gupt daan
Aur hum karte hain daan karne ka bhi bakhaan
Guruji chaahein ki hum gupt paath karte rahein
Lekin duniya na dekhe, ye hum kaise sahein?

Gupt savinay sewa ka paath sikhaayein Guruji
Lekin hum sewa mein laayein ahem
Guruji kahein atma ko kamzor nahin karo
Aur hum phailaayein tarehn tarehn ke vehem

Guruji chaahein ki hum Unse pyaar karein
Phir kyun aisa kuch kahein ki bhakt Guruji se darein?
Ye niswaarth bhaav aur vinamr prem kee hai yatra
Phir kyun zyada ho rahi hai mannaton kee maatraa?

Guruji ke kahe anusaar kyun na Guruji ka gungaan karein
Kyun na hum gupt sewa, gupt paath, aur gupt daan karein
Vehem aur ahem ko tyaag kar atma-bal badhaayein
Guruji se niswaarth prem karein aur mann se darr ko bhagaayein

Is ruhaani safar mein mushkilon ke baavajood bhi anand hai sukh ka
Guruji kee dee hui shakti aur mamta se nivaaran ho sakta hai dukh ka
Beete huey kal ke karam chaahe na hon hamein yaad
Lekin aaj ke achche karmon se hamaari punya kee poonji ho sakti hai aabaad

Zindagi hai isliye sukh dukh toh aate rahenge
Guruji kee mehar se hum har haal mein Unse himmat paate rahenge
Guruji mein magn rahein toh yeh jeevan paawan parv hoga
Karmon ke sudharne se Guruji ko hum par
garv hoga

Guruji kee kripa se karmalok se gyanlok takk ka safar achche se tayy hoga
Guruji par atoot vishwaas kee badaulat mann mein nahin koi bhayy hoga
Guruji kee mahima phaylegee duur duur
Har bhakt par chhaa jaayega Guruji ka noor

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 7, 2020

Om Namaha Shivaya
Aaj Ka Suvichaar 🙏🏻🙏🏻 # 748

               Niyati Aur Neeyat

Karmapaash mein bandhey huey hain hum
Aur karmon dwaara hee paap aur punya bhogtey hain hum
Jabb takk rehta hai saanson mein dumm
Isee se milta hai hamein khushi aur gumm

Saansein khatm ho jaane ke baad
Ye silsila jaari rehta hai har agle janam mein
Isliye kyun na ye zindagi jeetey huey
Hum rakhein sachchaayee aur nek iraada har soch aur har karam mein

Guruji karam ke parinaam se bhi zyada
Azmaate Hain neeyat hamaari
Neeyat aur karam par hee toh
Nirbhar karti hai niyati hamaari

Kitna thoda fark hai in dono shabdon mein
Niyati aur neeyat
Lekin neeyat ka mahatva itna khaas hai
Kyunki is se banti hai hamaari kismat

Guruji sikhaate Hain ki jo neeyat changi rakhey
Veh khaayega janam maran ke kumm dhakkey
Baaki pichhle karmon kee bhi kitaab hai
Aur Guruji ke paas hee saara hisaab hai

Kyunki kya galat hai aur kya sahi hai
Ye faisla hamaare buss ka toh nahin hai
Guruji hum sabke adhiktar karam apne par lekar
Hamaare liye karte Hain jo hamaare liye sahi hai

Isliye Shukrana karte huey chalte rahein
Hum jeevan kee dagar par
Har pal hamaara vishwaas badhta rahey
Guruji kee mehre nazar par

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 6, 2020

Om Namaha Shivaya
Aaj Ka Suvichaar 🙏🏻🙏🏻 # 747

     Shradha-Suman Ka Gulistaan

Aye bande, bandd hee rakhna giley-shiqve ka sandook
Varna har taraf se chal jaayegi ilzaamon kee bandook
Tark vitark mein dilon ko pahunchegi choat
Aur phir kaheen badh na jaaye dilon mein khoat

Guruji ka naam lekar seekh le karna maaf
Aur apni galatiyon ke liye bhi maang le kshamaa
Maafi dene aur maangne se dil ho jaayega saaf
Aur bigadne se bachh jaayega ye samaa

Ye samaa, jo mila hai is maanav vesh mein jeene ka
Na chod koi bhi mauka Guruji ke naam ke
amrit ko peene ka
Is samay ko bann jaane de ik haseen daastaan
Apne dil ko banaa le Guru naam ke shradha-suman ka gulistaan

Na lagne de thes apne atma-sammaan ko
Na khokhla kar apne sachche pyaar aur niswaarth balidaan ko
Doojon ke ahem kee vajeh se na ksheen kar apna spandan
Buss karta jaa tu Guruji ka manan aur vandan

Guruji ke dhyan aur simran mein
Tu ho jaa bilkul mastt
Guruji ke diye huey gyan mein
Tu ho jaa bilkul vyast

Baaki sab faisle tu Guruji par chod de
Ve tere naath Hain aur tu hai Unkee santaan
Unko Shukrana karte huey Unse guzaarish kar
Ki tujhe dikhein sabke bheetar basey huey Bhagwaan

Jeena saral ho jaayega
Mann nirmal ho paayega
Guruji kee aseem kripa se tera
Nishchay hee uddhaar ho jaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 5, 2020

Om Namaha Shivaya
Aaj Ka Suvichaar 🙏🏻🙏🏻 # 746

       Moksh Ka Raasta

Moksh ka raasta toh srishti kee shuruaat se vaisa hee hai
Lekin insaan agyanta-vash bhatak jaaye
Isliye insaan ko sahi raaste par vaapis laane ke liye
Bashar ke roop mein Guruji aaye

Sadaa sadaa ke liye
Sanaatan hai mukti ka raasta
Ispar vinamrataa aur vishwaas se chalna
Tumhe hai aman ka vaasta

Raaste mein jo archanein aayengi
Toh tumhaara suraksha kavach banega Guruji ka naam
Is naam ko har pal japte rahoge
Toh zaroor pahunchoge sachkhand ke dhaam

Mann mein vehemon ko paal kar atma ko kamzor na karna
Guruji sangg Hain tumhaare, isliye kisee bhi museebat se na darna
Agyan ke andhere mein Ve Apni gyanmayee jyot se tumhe raasta dikhaayenge
Dukhon kee moosalaadhaar baarish mein Ve tumhe bheegne se bachaayenge

Unkee ruhaani maujoodagi se prerna paakar
Unke simran aur dhyan mein mann lagaana
Tumhaare bin boley hee Ve sab jaante Hain
Isliye beshaq tum Unhe kuch na bataana

Lekin agar apna mann halka karne ke liye
Kabhi Unke aagey rona ya kehna bhi pada
Toh sharminda na hona tum bilkul bhi
Kyunki Guru ka ohada hai mata-pita se bhi bada

Tumhaari pakad kamzor ho sakti hai
Lekin Guruji kee pakad hai mazboot
Isliye Guruji ko tum apna haath thaamne dena
Chaahe baaki sab sahaare jaayein chhoot

Guruji ke haath mein apna haath thamaakar
Mann mandir mein Unkee chhavi ko basaakar
Vishwaas, prem, aur shradha se chale chalo tum Unka naam lete huey
Guruji tumhe bakshenge tumhaare safar ko anant anand ka anjaam dete huey

🌹🌹🌹🌹🌹🌹🌹

Jai Guruji 🙏🏻🙏🏻
Dhirja