Author: dhirjabhat

February 23, 2020

Om Namaha Shivaya
Aaj Ka Suvichaar 🙏🏻🙏🏻 # 735

          Sachkhand Ke Dhaam

Guruji ko hum apna meet banaayein
Mann kee baat Guruji ko bataayein
Guruji toh vaise hamaare bin boley hee haale-dil Hain jaan lete
Na jaane kyun hum apne Guruji kee har baat nahin hain maan lete

Guruji kahein ki hum rakhein shradha aur saboori
Chaahe hamaari khwaayish ho ya na ho poori
Unpar hamein hona chaahiye vishwaas atoot aur sachcha
Kyunki Ve hee jaante Hain ki kya hai hamaare liye achchaa

Guruji adhiktar kasht Swayam par lekar
Hamaare kashton ko kumm kar ke dete Hain
Isliye chaahe burey waqt ke dauraan hum samajh na paayein
Hum Unhee kee dee hui himmat se uss waqt kasht seh lete hain

Agar saara ka saara kasht hum par aa jaata
Toh ye dil aur ye shareer uss dukh ya dard
ko na seh paata
Isliye Guruji ka shukrana hai baarambaar
Ki Ve hamaara itna dhyan rakhte Hain har baar

Meet bhi Hain Ve, aur Ve hee Hain hamaare naath
Guru ke roop mein MahaShiv Hain, aur hal pal Hain hamaare saath
Itne saubhagyashali hain hum, phir kyun hum laukik dukh se rotey hain
Kyun hum duniyaadaari ke jaal janjaal mein phanskar apne ruhaani sukh ko khotey hain

Aagey bhi sukh dukh ke pal aate rahenge
Aur pehle bhi aise kayee lamhe gaye hain beet
Guruji kee sharan kee suraksha mein hum sab sahenge
Aur yaad ke saath saath sabak bann ke reh jaayega hamaara ateet

Isliye beetee hui khatti-meethi yaadon se seekh kar
Bhavishya ka swaagat karein lekar Guruji ka naam
Bande banein aur changey karam kar ke tarne kee koshish karein
Taaki antt mein Guruji chalein hamein lekar Sachkhand ke dhaam

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 22, 2020

Om Namaha Shivaya
Aaj Ka Suvichaar 🙏🏻🙏🏻 # 734

MahaShivratri Kee Beet Gayi Raat

MahaShivratri kee beet gayi raat
Lekin bhool na jaana tu veh raasta aur veh baat
Jo raasta MahaShivratri hamein dikhaati hai
Aur jo baat MahaShivratri hamein sikhaati hai

Guruji Hain MahaShiv Bholenath
Guruji Hain trishuldhari Trilokinath
Guruji sadaa Hain bhakton ke saath
Guruji jaantein Hain teri aur meri har baat

Hamaare karmon ke anusaar dete Hain hamaare jeevan ko roop
Har pal hamaare angg sangg hotey Hain, chaahe chhaaon ho ya dhoop
Jabb takk Guruji kee marzi nahin, tabb takk koi abhilaasha na ho poori
Guruji kee kripa se poorna ho har ichchaa adhoori

Guruji kee sadhna mein leen hokar
Agyaan ke timir ko mitaata chal
Guruji ke har vachan ka anusaran kar ke
Apne zameer ko tu sahi raah dikhaata chal

Maanav janam mila hai tujhe
Shubh avsar hai ye Guruji ke simran ke liye
Antargrehen kar le ve buddhi aur adhyaatmik gyan ke ratna
Jo tujhe tere kalyaan ke liye Guruji ne Hain diye

Apni galatiyon ke liye maang le kshamaa
Simran se tu Guru naam ka dhan kamaa
Vikaaron aur jhooth ko de abb tyaag
Na lagne de abb atma par aur koi daag

Jo daag lagg chukey hain atma par
Guruji se anurodh kar ki Ve daag hataa dein
Unse keh de ki tu bilkul naadaan aur nasamajh hai
Taaki Ve hee tujhe teri zindagi behtar banaane ka tareeka sikha dein

Yeh duniya nahin hai hamaara aslee ghar
Sachcha ghar toh hai Guruji ka dar
Isliye aye bande, tu apni manmaani na kar
Jo ashish Guruji tujhe de rahey Hain, shukraguzaar hokar uss se tu apni jholi bhar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 21, 2020

Om Namaha Shivaya
Aaj Ka Suvichaar 🙏🏻🙏🏻 # 733

 MahaShivratri Ka Paawan Utsav

Maha Shivratri ka utsav jabb jabb hai aaya
Sab Shiv bhakton ne khushi se isey hai manaaya
Hamaare Guruji hamaare liye MahaShiv bannkar aaye
Unka har bhakt bhi ullaas se MahaShivratri manaaye

MahaShivratri kee gaathaayein hain anek
Ek hai ki Parvati ji aur Shivji is din vivah se huey ek
Aur jahaan takk srishti, paalan, sanhar kee hai baat
Shivji ne Taandav nritya bhi kiya thaa is raat

Samudra manthan iti aadi jaisi hain aur bhi anek kathaayein
Jo MahaShivratri ke tyohaar ka mahatva bataayein
Shivratri kee kathaayein insaaniyat ka raasta dikhaayein
Kitnee pavitra aur gehri hai hamaari sanskriti, ve hamein ye bhi samjhaayein

MahaShivratri kee shuruaat hui Brahmaji aur Vishnuji kee ek kahaani se
Yoon kahein, ki dono Devta majboor huey Apne ahem aur Apni naadaani se
Ve sabse pramukh Hain, dono ne kahaa
Aur dono ne ek dooje ka abhimaan na saha

Isliye Unn dono mein ho gaya vaad-vivaad
Ghabraakar baaki sab devtaa gaye Shivji ke paas iske baad
Shivji huey phir Nandiji par savaar
Gaye dekhne Brahma Vishnu ka aapasi prahaar

Apni leela se liya Unhonei stambh ka roop
Jiska prataap thaa maha-agni ke anuroop
Brahmaji hans ka aakaar banaakar oopar gaye dhoondhne stambh ka praarambh
Vishnuji ne vaaraah ka roop lekar neeche jaakar stambh kee seema ko khojna kiya aarambh

Lautkar Vishnuji ne satya kaha
Ki Unhe stambh ka antt milne se raha
Lekin Brahmaji ne kiya chhal-kapat aur kaha jhooth
Jis se Shivji krodhit hokar gaye Unse rooth

Phir Vishnuji aur Brahmaji ne Shivji ko
Shreshth susajjit aasan par baithaaya
Dhoop deep aur anya pushp vastuon se
Prem aur shradha se pooja kar ke Unko rijhaaya

Shivji ke charnon mein girkar
Unhonei sachche dil se maangi kshamaa
Bholenath ne Unhe maaf kiya
Aur sakaaratmak hua vaataavaran aur veh samaa

Shivji ne pavitra aur mahaan tyohaar ka ailaan kiya
Aur srishti ko MahaShivratri ka utsav pradaan kiya
Poore saal mein lagaataar Shiv poojan se miley jo phal
Vaise hee Shivratri par Shiv poojan se sanvar jaaye ateet, aaj, aur kal

Jab Devon ne bhi kiya jhooth ke liye praayashchit
Toh hum nacheez insaan kyun jhooth nahin chodte?
Jabb Devtaaon ne bhi Shivji se maafi maang kar kiya pashchaataap
Toh kyun hum insaan paapon se nahin muh modte?

Aao, aaj hum MahaShivratri ke paawan parv par
Agyaan ka timir mitaakar moksh ke kareeb aayein
MahaShiv Guruji se apne gunaahon ke liye maafi maangein
Aur apne bhavishya ko nirmal banaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 20, 2020

Om Namaha Shivaya
Aaj Ka Suvichaar 🙏🏻🙏🏻 # 732

        Paawan Mann Aur Simran

Nahin khareed sakta koi kisee bhi keemat par tripti
Na hee kisee bhi bazaar mein biktee hai mukti
Kyunki tripti aur mukti shareer kee nahin, balki atma kee dashaa ka karte hain varnan
Ye tabhi milte hain agar paawan ho jaaye ye mann

Laukikta se agar shanti mil jaati
Toh ashanti ke roag se kyun tadaptaa ye jahaan
Bheed se agar sukoon mil jaata
Toh kyun tanaavpoorna hota kalyuga ka ye samaa

Mukti aur tripti milne ke liye zaroori hai mann ko rakhna paawan
Mann ko paawan rakhne ke liye zaroori hai karna simran
Tanaav aur ashanti ka ilaaj bhi hai simran
Simran se sach mein nikhar jaaye jeevan

Kalyuga kee bheed mein hum kaheen gumm na jaayein
Isliye Guruji ke simran mein mann lagaayein
Guruji ke paawan prem se bandh jaayein
Aur jeevan ke har pehlu ko ruhaani nazariye se dekh paayein

Phir hamein yaad rakhna aasaan hoga
Ki kshanbhangur hai hamaara jeevan
Aur jabb is rangmanch par karenge adaa apna kirdaar
Toh chhoti ya badi baaton se pareshaan nahin hoga mann

Guruji ke simran mein hai shanti aur shakti
Guruji ke simran se rangg laati hai bhakti
Guruji kee sadhna mein hai sukh ati-ruhaani
Guruji kee upaasna se sanvar jaaye
ye zindagaani

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 19, 2020

Om Namaha Shivaya
Aaj Ka Suvichaar 🙏🏻🙏🏻 # 731

           Har Peher, Har Pal

Har roaz subah aati hai
Subah se dopeher ho jaati hai
Dopeher jaate jaate karti hai shaam ke aane ka ailaan
Aur shaam lekar aati hai aane waali raat ka paigaam

Ye silsila kitne yugon se chalta aa rahaa hai
Har peher ne apne hisse ka sukh dukh sahaa hai
Ek peher se dooje peher kee oar har pal samay bahaa hai
Na jaane har lamhe ne beete huey lamhe se kya kahaa hai?

Kabhi socho ye gehraayi mein
Ki kya moolya chhupa hai jeevan kee dhaara mein
Jo ek lamhe se dooje lamhe ko jodti hui
Pirohtee hai kshan roopi moti samay kee mala mein

Guruji ne hee har din ko banaaya hai
Aur itne prem se usey lamhon se sajaaya hai
Ve chaahte Hain ki hum karein samay ka sahi prayog
Ve MahaShiv Hain, sikhaate Hain Ve Shivyog

Apne jeevan ke lamhon ko lagaayein gupt sewa, gupt paath, aur gupt daan mein
Doojon ke kaam aakar chaar chaand lagaayein atma-sammaan mein
Saadagi, pyaar, aur neevanpann apnaa kar poornaviraam lagaayein apne abhimaan mein
Aur ramm jaayein apne Guru apne Bhagwaan mein

Karmic hisaab chukaane mein bilkul na karein bewafaai
Ghar aur kaaryaalay ke saath saath mann mein bhi rakhein safaayee
Simran aur satsang se apne taur-tareeke sudhaar lein
Apne karam aur kartavya achche se kar ke har pal ko sanvaar lein

Chhal kapat na karein, nahin toh baad mein dil pachhtaayega
Paapon ka praayashchit kar lein, toh Guru kripa se har janam sanvar jaayega
Jitnee bhi koshish kar lein, beeta waqt laut kar nahin aayega
Har pal agley hee pal mein itihaas ka hissa bann jaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 18, 2020

Om Namaha Shivaya
Aaj Ka Suvichaar 🙏🏻🙏🏻 # 730

          Thoda Sa Waqt

Jo jeevan hamein Guruji ne bakshaa hai
Usmein se thoda sa waqt Guruji ko de dein
Unse baatein kar lein, Unka kar lein Shukrana
Bator lein Guruji ke naam ka khazaana

Is waqt ke liye har pal shubh hai
Is waqt se mann hota shudh hai
Is waqt se badhti hai Guruji ke liye preet
Is waqt ko banaa lein hum jeene kee reet

Waqt bitaayein simran aur dhyan mein
Kyunki shanti toh bastee hai adhyaatmik gyan mein
Saansaarik jhameley toh hain maya ka jaal
Inmein saara waqt bitaane se vichlit hota hai dil ka haal

Haan, ye satya hai, ki sansaar mein jeena hai toh laukikta ke bina mumkin nahin
Lekin, ruhaani nazariye se dekhein, toh moh maya se judna nahin hai sahi
Kyunki moh aur maya, yahee kaaran hain lobh aur ashanti ka
Aur inmein phanskar, hum bhool jaate hain mahatva Guruji kee kanti ka

Guruji kee kanti mein hai divyataa anant
Guruji kee kanti se hota hai har andhere ka antt
Guruji kee kanti toh dusht ko bhi banaa de sant
Guruji kee kanti mein samaay Hain Guru aur Bhagwant

Phir kyun hamein hota hai Guruji ke sangg samay bitaane se inkaar
Kyun na Guruji ko yaad kar ke karein Unse hum Unke prati apne prem ka izhaar
Guruji ke sangg waqt bitaane se jeevan mein awashya hoga sudhaar
Guruji mein dhyan lagaane se nishchay hee hoga hamaara uddhaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 17, 2020

Om Namaha Shivaya
Aaj Ka Suvichaar # 729

Guruji Ke Prem Ke Mahasaagar Mein

Jab kabhi bhi aisa lagey tumhe
Ki duniyadari mein andhera hee behtar thaa ujaale mein jeene ke bajaay
Jabb aankhein khulen tumhaari
Aur dil ke tootne ka koi kissa tumhe sataay

Toh Guruji ke swaroop ke paas baith jaana
Ya phir Guruji ka dhyan kar sachche mann se Unhe bulaana
Guruji mein leen kar lena apne shwaas
Phir dekhna, Guruji ko paaoge apne paas

Guruji tumhe denge sahaara
Isliye himmat na haarna
Guruji ne Apne har bhakt ko
Antt mein bhavsaagar se hai taarna

Safar mein ho sakta hai
Ki lagg jaaye kuch samay
Lekin Guruji haath na chodenge
Chaahe jeevan mein aa jaaye pralay

Shradha aur saboori aur saath mein vishwaas
Inkee khushboo se jabb mehekega tumhaara shwaas
Toh Guruji kee divya khushboo se jeevan mehek jaayega tumhaara
Unkee kripa se tum dekh paaoge dharti par bhi sachkhand ka nazaara

Ye mumkin hai sirf Guruji ke prataap se
Ve mukt karenge tumhe har dukh aur har santaap se
Unhe arpan kardo apni zindagi
Kar lo sachche mann se Unkee bandagi

Guruji kee dee hui himmat se
Tum har mushkil se ladd paaoge
Guruji ke prem ke mahasaagar mein
Tum doobkar tarr jaaoge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 16, 2020

Om Namaha Shivaya
Aaj Ka Suvichaar 🙏🏻🙏🏻 # 728

Poori Srishti Par Drishti Hai Jinkee

Har jeev apne agley janam mein
Maanav bann-na chaahe
Aur maanav aisa jeev hai jo na jaane kyun
Is saugat ko nahin saraahe

Chauraasi lakh yooniyon ke baad
Milta hai kismat se maanav janam
Phir bhi kyun bhool jaate hain
Hum karne is janam mein achche karam?

Itne yatna se milee hai ye zindagi
Isko vyarth na jaane dein
Apne insaaniyat ke kirdaar ko
Is sansaar ke kaam aane dein

Moksh praapti karne ke liye
MahaShiv mein samaana zaroori hai
Lekin karam achche jo na huey hamaare
Toh hamaari atma aur moksh mein bahut duuri hai

Is duuri ko khatm karne ka hai ek pakka ilaaj
Guruji kee baat maan lo aur banaa lo Unhe apna sartaj
Guruji kahein ki hum bandey banein aur kar lein changey karam
Sachchaayee aur neki se nibhaayein insaaniyat ka dharam

Koi kaayde kaanoon niyam nahin
Buss, jo Guruji kahein hum karein vahee
Is se zyada aasaan ho nahin sakta Ishwar ko paana
Sach mein Guruji ka naam hai moksh ka khazaana

Kuch nahin bigdega koshish kar ke dekh leejiye
Shradha aur prem se Guru naam ka amrit peejiye
Devon ke Dev MahaShiv taaranhaar Hain Guruji
Poori srishti par drishti hai jinkee Ve parwardigaar Hain Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 15, 2020

Om Namaha Shivaya
Aaj Ka Suvichaar 🙏🏻🙏🏻 # 727

Guruji, Aisee Kripa Karna

Dil ko na dukhaaye zamaane kee choat
Mann mein na aaye koi bhi khoat
Koi chaahe karey mere sangg duraachaar
Mere swachh rahein vichaar aur vyavhaar
Guruji, aisee kripa karna

Kabhi rona aa bhi jaaye, toh uske baad mast ho jaaoon
Buss, Aapke hee dhyan mein hameshaan ke liye vyast ho jaaoon
Sansaar ke kaam aa sakoon kisee tarehn
Kisee ke dard kee na banoon kabhi bhi vajeh
Guruji, aisee kripa karna

Lakhon ayb hain mujhmein, mai hoon nacheez aur heen
Aap hee uddhaar kar sakte Hain, Aap Hain divya aur deen
Ek Aap hee Hain, Prabhu, jo sikhaa sakte Hain ye adaa
Ki Aapki nazron mein gir na jaaoon, aur neeveen rahoon sadaa
Guruji, aisee kripa karna

Haalaaton kee majboori se na padd jaaoon kamzor
Aapke sakaash se shakti paaoon dekhoon jis bhi oar
Mann magn rahey Aapke dhyan mein
Atma ramm jaaye Aapke gyan mein
Guruji, aisee kripa karna

Har kshan mere nayn rahein Aapke daras mein
Jis se har pal mera roam roam ho harsh mein
Seekhoon chalna Aapke nakshekadam par
Aapki karunadrishti se jaaoon mai tarr
Guruji, aisee kripa karna

Aapka Shukrana karna kabhi na bhooloon
Aapki mamta ke aanchal mein jhooloon
Aapka diya har dukh sukh aa jaaye mujhe raas
Aapki Jaijaikaar karte huey sadaa rahoon Aapke paas
Guruji, aisee kripa karna

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 14, 2020

Om Namaha Shivaya
Aaj Ka Suvichaar 🙏🏻🙏🏻 # 726

Sabse Anmol Kamaayee

Guruji, jab jab Aapke paas baithtee hoon
Ek divya sukoon sa milta hai
Dil mein kitnee bhi niraasha kyun na ho
Aapki mehar se ummeed ka phool khilta hai

Aapke amrit se milta hai jeevan daan
Aapke prasad se bach jaati hai jaan
Aapke simran se milta hai aisa chayn
Ki Aapke khayaalon mein muskuraate hain ye nayn

Aapke darshan se vishwaas badhta jaata hai
Aapki divya khushboo se dil itnee khushi paata hai
Sadhna mein Aapka divya aabhamandal jab nazar aata hai
Toh aksar Aapki awaaz ka ashirwaad saath laata hai

Charan sparsh kar ke Aapke
Jab vaheen par sir ko jhukaati hoon
Aur chupke se Aapko
Apne dil kee baat bataati hoon

Toh Aap kisee na kisee tareeke se
Jawaab ya sandesh de dete Hain
Jab satsang mein hum sab baith kar
Shabad aur anubhav sunn lete Hain

Waqt ko apne palle mein tezi se kheenchte huey is kalyuga mein
Aapke angg sangg honei ka jo ehsaas hai
Uss-se bechayni aur ashanti ka ilaaj ho jaata hai
Isliye yeh ehsaas bahut hee khaas hai

Isee ehsaas mein jeevan kee sachchaayee hai
Isee ehsaas mein meri suraksha samaayee hai
Ye saugat jo Aapki sharan mein aane se mujhe mil paayi hai
Yahee toh meri sabse anmol kamaayee hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja