Author: dhirjabhat

February 13, 2020

Om Namaha Shivaya
Aaj Ka Suvichaar 🙏🏻🙏🏻 # 725

              Namaha Shivaya

Namaha Shivaya par hai aadhaarit
Aaj ka ye Suvichaar
Namaha Shivaya kehne aur sunn-ne se
Khulte hain Guruji ke deedar ke dwaar

Ye uddhaar aur upaasana kee divya jyoti hai
Iske uchhaaran se bhog aur moksh kee praapti hoti hai
Kyunki na, ma, shi, va, ya basey Hain ismein
Shivji ke saare kaaraj sajey hain jismein

Namaha Shivaya mein ‘na’ jo hai
Uska taatparya hai dharti hamaari
Shivji dwaara sansaar kee rachna yahaan hoti hai
Aur ye rachna hai itnee divya aur pyaari

Dooja kaaraj Shivji ka
Hai paalan is srishti ka
Paalan aur vriddhi ke liye jal hai zaroori
Jal se ‘ma’ kee paribhaasha hoti hai poori

Agni hota hai ‘Shi’ ka arth
Isko bilkul bhi na samajhna vyarth
Kyunki ye bhi Shivji ka kaarya hai
Kyunki sanhaar karna bhi anivaarya hai

‘Va’ toh hai vaayu, veh jhonka jo gaya ya aaya
Is se samajh aata hai Shivji ka tirobhaav yaani ki maya
‘Ya’ ka matlab hai moksh ke baad milne wala akash
Shivji se anugreha aur ashirwaad mil jaaye sabko kaash

Shivji ke paanch mukh jo Hain
Ve Hain in krityon ke liye
Shivji har uss bhakt mein Hain bastey
Jo Om Namaha Shivaya japte huey jiye

MahaShiv Hain pyaare Guruji hamaare
Is mantra ke dwaara Unka bhakt Unhe pukaare
Is mantra se poori ho manokaamna
Aur aasaan ho jaaye karna mushkilon ka saamna

Namaha Shivaya ka panchaakshar mantra
Shivji ke paanch kaaraj samjhaaye
Om ke Pranav mantra sangg jod lo isko
Aur shradha se japte raho ‘Om Namaha Shivaya’

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 12, 2020

Om Namaha Shivaya
Aaj Ka Suvichaar 🙏🏻🙏🏻 # 724

                        Uss Paar

Guruji pyaar hamaara Hain
Guruji doobte huey ka kinaara Hain
Guruji udaasi ka sahaara Hain
Hum khushnaseeb hain ki Unhonei hamein sweekaara hai

Toote dil kee Guruji sunte Hain pukaar
Koi dhokha de hamein toh dete Hain hamein dulaar
Guruji ka pyaar hamein sambhaal leta hai
Aur hamaare har ghaav ko bhar deta hai

Guruji hamaare Bhagwaan hokar
Hamein har bhool ke liye kar dete Hain maaf
Toh kyun nahin hum doojon ko kshamaa kar ke
Kar sakte hain dil ko saaf

Mushkil lagey ye chaahe hamein
Lekin namumkin nahin ho sakta hai
Kyunki Guruji ka saath dega hamein shakti
Aur is safar mein nikhar jaayegi hamaari bhakti

Apni galatiyon ke liye maafi maangein
Aur doojon ko maaf karein
Apni ruhaani yaatra mein
Mayle mann ko saaf karein

Is se karmic bojh bhi kumm ho jaayega
Is jagg se jaane mein anand aayega
Kyunki atma Guruji ke rangg mein rangg jaayegi
Jab Guruji kee preet hamein uss paar bulaayegi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 11, 2020

Om Namaha Shivaya
Aaj Ka Suvichaar 🙏🏻🙏🏻 # 723

     Aapki Kripa Se Tartey Jaayein

Guruji kee praapti karni hai toh
Mann ko vash mein karna hai sabse zaroori
Aur mann ka ghulaam nahin bann-na hai
Chaahe ho kaisi aur kitnee bhi majboori

Ye mann hee badha hai sabse badee
Jispar nigraani rakhnee padti hai kadee
Guruji takk pahunchne ke raaste par ye baadha
Aksar bhulvaa deti hai atma-sanyam ka vaada

Isliye bhakt jann jaate hain bhatak
Aur adhyaatmik safar mein jaate hain atak
Na milta hai phir dil ko sukoon aur na chayn
Bebasi mein bechayni se kayee baar bhar aate hain nayn

Mann kaamuk sukh kee oar khichtaa chalaa jaata hai
Laukikta ke laalach ke kaaran bhatakta jaata hai
Shareer nashwar hai, mann yeh bhool jaata hai
Apni ahem se bhari harkaton se baaz nahin aata hai

Guruji, kripa keejiye hum sab par
Ki hamaari buddhi shuddhi se chale
Vicharadhara nek rahey
Mann mein paap na paley

Baahar khushi dhoondhne ke bajaay
Hum khushi aur shanti ko bheetar paayein
Mann ko buss Aapki sadhna mein leen kar ke
Hum Aapki kripa se tartey jaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 10, 2020

Om Namaha Shivaya
Aaj Ka Suvichaar 🙏🏻🙏🏻 # 722

Pooran Guru Hamaare Guruji Jaisa

Guruji toh sab kuch jaante Hain
Kuch kehne kee nahin hai zaroorat
Jab jab Unhe yaad karna chaaho
Tabb Tabb hai shubh mahoorat

Isliye kyun na yaad karein Unhe har pal
Taaki sudhar jaaye hamaara aaj aur kal
Beete huey kal ka bhi uddhaar hoga
Kyunki pichhle karam katne se aagey ka sudhaar hoga

Hamein toh buss karna hai Unko yaad
Aur karni hai Unse fariyaad
Ki Ve haath thaame rakhein hamaara
Kyunki Unke bina nahin hai hamaara guzaara

Hamaare jeevan ke geet ka sur likhte Hain Guruji
Bhakton ko anek sundar roop mein dikhte Hain Guruji
Hamaari har aah mein aur har chaah mein Hain Guruji
Shaktishali sahara bannkar hamaari raah mein Hain Guruji

Hamaare karam Apne oopar le lete Hain
Guruji
Hamaari hatheli kee lakeerein badal dete Hain Guruji
Unke alaawa koi kar hee nahin sakta hai aisa
Na aaj takk hua hai aur hoga kabhi pooran Guru hamaare Guruji jaisa

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 9, 2020

Om Namaha Shivaya
Aaj Ka Suvichaar 🙏🏻🙏🏻 # 721

Kyun Maanav Janam Ganvaaye Re

Kyun maanav janam ganvaaye re
Kyun jhooth tu bole jaaye re
Kyun sachchayee ko tu chhupaaye re
Kyun atma par kalank lagaaye re

Tere apnon ko dukh hota jaaye re
Kyunki tu unhe sach na keh paaye re
Kyun aisa zulm tu dhaaye re
Tere apne apne hain, nahin hain paraaye re

Guruji ko sab maalum pad jaaye re
Phir tu na bach paaye re
Asaliyat saamne aa jaaye re
Phir sharmindagi sataaye re

Guruji ko jo tu keh paaye re
Ki mann mein hera pheri aaye re
Galat kadam uthaane ko dil kar jaaye re
Toh phir tera Guru tujhe bachaaye re

Sachche dil se tu jo maang paaye re
Ki Guru tera uddhaar kar paaye re
Toh koi shakti Guru ko na roak paaye re
Guruji kee kripa se tera uddhaar ho jaaye re

Koshish toh tu kar paaye re
Ki sachchaayee kee raah par chal paaye re
Neeyat tu sahi rakh paaye re
Guru teri neeyat parakh jaaye re

Phir kya tu soche jaaye re
Kaahe tu ghabraaye re
Guru par sab chod paaye re
Aur Guru kee baat tu maan paaye re

Isliye abb se jo bhi ho jaaye re
Tu jhooth ka sahaara agar chod paaye re
Tujhpar Guruji kee mehar ho jaaye re
Aur tera jeevan safal ho paaye re

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 8, 2020

Om Namaha Shivaya
Aaj Ka Suvichaar 🙏🏻🙏🏻 # 720

          Ikalaute Sachche Meet

Is bheed se bhare sansaar mein
Ek anokha aur pyaara nijee ehsaas Hain Guruji
Is halchal se chalti hui duniya mein
Shanti aur sukh se bhara shwaas Hain Guruji

Yahaan apne aur paraaye kee kashmakash mein
Sampoorna apnepan kee moorat Hain Guruji
Is jahaan mein badalte chehron ke beech
Hameshaan sthir rehne wali saumya soorat Hain Guruji

Apne toh jhoothe ho sakte Hain
Lekin Guruji hameshaan sachche Hain
Apne toh hamaare sangg bura kar sakte hain
Lekin Guruji hameshaan achche Hain

Ve pyaar dekar jataate nahin
Ve dagaa dekar rulaate nahin
Ve kabhi vishwaas ko todte nahin
Ve kabhi bhi humse muh modte nahin

Ve toh hamaare jazbaaton ko samajhte Hain
Ve hamaari uljhanon mein hamaare liye ulajhte Hain
Aur unhe sulajhaakar hamein hal bataate Hain
Na ki hamaari majboori ka mazaak udaate Hain

Guruji toh sabse paawan aur niswaarth preet Hain
Ve kalyuga ke shor mein madhur divya sangeet Hain
Is behrupion se bhari duniya mein
Guruji ikalaute sachche meet Hain

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 7, 2020

Om Namaha Shivaya
Aaj Ka Suvichaar 🙏🏻 # 719

         Unnati Atma Kee

Kar liya poore sansaar ka bhraman
Kintu kiya nahin Guruji ka smaran
Toh kaise hogi unnati atma kee
Kya tumne socha hai kabhi?

Daulat kamaayee shauharat kamaayee
Kintu nahin kee Guru naam kee kamaayee
Toh phir kaise jaanoge Guruji kee vadiyaayee
Jis se Guruji ke deewaane bhakton ne dharti par hai jannat paayee

Guruji ke naam ka simran karne se
Kasht aur paap dhul jaate hain
Mann kee gaagar ko Guru naam se bharne se
Bhakt shanti aur shakti paate hain

Koi bhi mushkil ya roag ho
Simran se bada nahin hai koi ilaaj
Simran ke mangalmayee parinaam se
Nahin bann-na padta hai kisee ko bhi kisee ka mohtaaj

Kyunki simran toh hai ek anmol gehna
Jo sahi maayne mein banaa deta hai dhanwaan
Laukik dhan toh zindagi mein aata-jaata hai
Lekin ruhaani dhan har janam mein saath nibhaata hai

Simran toh hai uss shaktishali naiya ke samaan
Jo paar kar sakti hai bhayankar se bhayankar toofaan
Aur simran kee naiya mein safar karte huey musaafir par
Pyaare Guruji sadaa rehte Hain meharbaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 6, 2020

Om Namaha Shivaya
Aaj Ka Suvichaar 🙏🏻🙏🏻 # 718

               Aane Wala Daur

Guzar gaya jo daur
Uske liye pachhtaana kaisa
Jaisa humne karam kiya
Uska nateeja hoga vaisa

Mushkil kee baat buss ye hee hai
Ki karmon ka ganit kabhi kabhi
Usee janam mein dikhtaa nahin
Shaayad isliye insaan seekhta nahin

Guruji maalik Hain is poori srishti ke
Hum nahin bach sakte Hain Unkee drishti se
Pyaar dene waale naath bhi Hain Ve
Har kadam par saath bhi Hain Ve

Isliye hamaare har karam par hai Unkee nigraani
Jis par nirbhar karti hai hamaari aagey kee zindagaani
Jaayaz lagey ya nahin, yahee niyati ka usool hai
Isliye iske baare mein tark vitark karna bilkul fazool hai

Guruji sab kuch dekh rahei Hain
Isliye har pal ye hamein yaad rahe
Kshamaa karein Guruji hamein hamaare kukarmon ke liye
Dil mein sadaa ye fariyaad rahei

Aagey ke karam achche hon
Aisee buddhi kee guzaarish karein
Koi shikaayat na karein Unse
Na kaheen apne gumm kee numaaish karein

Apna aane waala daur sukh se beetey
Isliye aaj doojon ko dukh na pahunchaayein
Adhyaatmik uddhaar bhi ho jaaye hamaara
Guruji ke dikhaaye huey raaste par chal paayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 5, 2020

Om Namaha Shivaya
Aaj Ka Suvichaar 🙏🏻🙏🏻# 717

         Sweekriti Kee Seedhee

Hakeekat ko sweekaarna
Har baar aasaan nahin hota
Lekin Guruji sangg aasaan ho jaata hai
Hakeekat ka saamna karna

Yahee pehla kadam hai
Sweekriti kee seedhee ka
Jo uddhaar kar sakta hai
Kalyuga kee is peedhee ka

Sweekriti aur samarpan
Simran aur vandan
Sadhna aur poojan
Guruji ko sab arpan

Kuch samay lagg jaata hai, ek pal kee ye baat nahin
Lekin ye seekh jaate hain ki sirf Guruji ka hai saath sahi
Baaki sab toh aadambar hai
Iska gavaah yeh ambar hai

Jo poore sansaar par
Itne garv se lehraata hai
Aur nirantar apne aanchal ko
Poore sansaar par phailaata hai

Lekin ambar bhi Guruji ke aagey jhuk jaata hai
Kyunki Guruji saari srishti kee raksha karte Hain
Guruji ke sachche bhakt kabhi bhi
Hakeekat ka saamna karne se nahin darte hain

Isliye jaisi bhi paristhiti aaye
Guruji par vishwaas karo
Simran kee tijori mein shradha se
Tum apna har shwaas dharo

Sood milega ruhaani sukh ka
Sweekriti se nivaaran hoga dukh ka
Samarpan se khud ka bhaar kumm hoga
Hakeekat jaisi bhi ho, tumhe nahin gumm hoga

Guruji ke ashirwaad ka amrit
Tum vishwaas ke pyaale mein pee sakoge
Guruji ke bharose hakeekat ka saamna karte karte
Tum zindagi shanti aur sweekriti se jee sakoge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 4, 2020

Om Namaha Shivaya
Aaj Ka Suvichaar 🙏🏻🙏🏻 # 716

   Guruji Ke Aanchal Ka Aasmaan

Niswaarth prem ka ehsaas
Saath mein shradha aur vishwaas
Dil mein bhaav sachcha
Mann mein khayaal achchaa

Buss sunn-ni hai shant hokar gurbaani
Koi roak-toak nahin, ye hai Guruji ka darbar
Jo bhi prasad miley satsang mein
Usey grehen karein jagaa kar dil mein paawan pyaar

Guruji se jodni hai seedhi taar
Aur bhaav rakhna hai saral
Sangat duur duur takk phaylee hai
Waqt bhi har pal raha hai badal

Haisiyat, sabhyataa, praant, ya sanskriti ke mutaabik
Ho sakta hai satsang kee vidhi ho thodi see alagg
Lekin Guruji har satsang mein aate Hain
Ye toh jaanta aur maanta hai saara jagg

Isliye chai prasad ho ya coffee prasad
Har khaane peene ke prasad mein hai Unke ashirwaad ka swaad
Isliye har prasad ko sweekaaro prem bhaav se
Na ki tark vitark ke swabhaav se

Satsang suno aur sunaao
Ashirwaad batorte jaao
Guruji mein dhyan lagaao
Aur kisee kee baaton mein na aao

Guruji ke aanchal ke aasamaan mein
Swatantra panchee kee bhanti masti mein udo
Bandhan ho toh sirf Guruji kee bandagi ka
Baaki har bandhan se adhyaatmik taur par muh modo

🌹🌹🌹🌹🌹🌹🌹

Jai Guruji 🙏🏻🙏🏻
Dhirja