Author: dhirjabhat

January 24, 2020

Om Namaha Shivaya
Aaj Ka Suvichaar 🙏🏻🙏🏻 # 705

     Antarmann Kee Aankhon Se

Musaafir hee toh hain hum sab
Hamein dekh rahein hain Guruji, Ve Hain hamaare Rabb
Beetey huey lamhon ko peechhe chod kar
Chalte jaa rahein hain hum har raaste aur har moad par

Guruji kee sharan mein na hotey
Toh bahut pehle hee haar gaye hotey
Guruji hee sab kaam sambhaal rahei Hain
Chaahe ve bade hon ya hon chhotey

Kyun is safar mein apne bhi bann jaate hain begaane
Ye rahasyamayee baatein toh kewal Guruji hee jaanein
Apna toh kaam hai safar karna sachchaayee se
Apna uttardaayitva hai karam karna achchaayee se

Guruji ko hee maalum hai
Ki kismein hai hamaari bhalaayee
Ve karam katvaate rahenge
Ye hai Unkee vaddi vadiyaayee

Guruji ne jidhar rehne ka hukm diya hai
Vaheen par hai abb baseraa
Antarmann kee aankhon se dekho toh jaano
Ki vaheen par hai sunehra savera

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 23, 2020

Om Namaha Shivaya
Aaj Ka Suvichaar 🙏🏻🙏🏻 # 704

             Is Naam Kee Mahima

Jabb doob jaao bhakti ke rass mein
Aur ho jaao jagg se beparwaah
Jabb museebatein aati jaa rahi hon zindagi mein
Phir bhi na nikley dil se dukh bhari aah

Jabb zamaana chal raha ho mukaable ke bhaav se
Jabb dard mehsoos ho raha ho mann ke kisee ghaav se
Phir bhi Guruji ke khayaalon se ho khushi ka ehsaas
Aur Guruji ka Shukrana hee karti rahe har shwaas

Toh is-se achchee aur pyaari koi baat nahin
Kyunki yahee nazariya aur manobhaav hai sahi
Mushkil hai yeh karna lekin namumkin nahin
Kyunki hamaara toh jeevan hee Guruji bin nahin

Guruji se hee hai har saans hamaari
Guruji kee madad se aao karein tayyaari
Har mushkil ko jhelne kee
Zindagi ke khel ko khelne kee

Apni taraf se karein nek aur sarvottam prayaas
Zindagi ka har lamha tohfe kee bhanti aaye hamein raas
Yeh khel hai bina kisee haar ya jeet ka
Yahaan mahatva hai sachaayee aur niswaarth preet ka

Laukik rishtey mein toh moh maya ka bada kaam hai
Lekin Guruji sangg rishtey mein shuru se antt takk Guruji ka hee naam hai
Is naam kee mahima bahut hee matvaali hai
Is naam ke sangg zindagi bahut hee niraali hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 22, 2020

Om Namaha Shivaya
Aaj Ka Suvichaar 🙏🏻🙏🏻 # 703

       Guruji Kee Sharan

Paawan dham hai Guruji kee sharan
Pichhle punya ka anjaam hai Guruji kee sharan
Deti antaratma ko aaraam hai Guruji kee sharan
Divyataa ka dooja naam hai Guruji kee sharan

Yahaan bigde kaam bann jaate hain
Yahaan soye bhaag jagg jaate hain
Yahaan sach hotey hain mangalkaari khwaab
Yahaan milte hain aashirwaad behisaab

Zamaane ke shor ke beech miltee hai shanti yahaan
Kalyuga ke andhere mein ullaasit karti hai Guruji kee kanti yahaan
Prem aur vishwaas ke suman hain bhali bhanti yahaan
Dil kee dhadkan atma kee baat maanti hai yahaan

Yahaan chhoo sakte hain hum Guruji ke kamal charan
Yahaan hota hai bechayni aur majboori ka haran
Sach mein, ati-sukhdaayee hai Guruji kee sharan
Tamanna hai ki yaheen ho jeevan aur maran

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 21, 2020

Om Namaha Shivaya
Aaj Ka Suvichaar 🙏🏻🙏🏻 # 702

               Yeh Kalyugi Raat

Chaahe kisee zaroorat ya chaahat se hon hum vanchit
Phir bhi Guruji mein ramm kar rahein hum har pal harshit
Shukrana karte rahein har pal
Shukrana mein jiyein kal, aaj, aur kal

Guruji sikhaayein ki hum kisee ko bhi dukh na dein
Aur shreshth hon hamaare karam
Doojon kee madad karne se na hichkichaayein
Aur nibhaayein hum insaaniyat ka dharam

Zindagi ka kya bharosa hai
Ye saansein bhi hain udhaar kee
Agar hum Guruji ke sachche bachche hain
Toh phir koshish honi chahiye sudhaar kee

Sudhaar apne vichaar mein
Sudhaar apne vyavhaar mein
Sudhaar apne ahankar mein
Tabhi hoga sudhaar is sansaar mein

Hum sabka uttardayitva bantaa hai
Ki hum chalein Guruji ke dikhaaye raaste par
Kyunki satyugi sansaar kee tasveer
Hai aaj ke kalyuga se kaafi hatt kar

Satyuga kee tamanna hai sabko
Lekin sirf koi virla chale uskee oar
Toh sansaar kaise badlega
Kaise shant hoga kalyuga ka shor?

Aao, Guruji kee baat maanein
Sakaaratmakta kee oar kadam badhaayein
Changey karam karein aur bande banein
Sadbhaav aur satya ko hum apnaayein

Guruji ka ashirwaad hai hum sabke saath
Isliye darne ya ghabraane kee nahin hai koi baat
Jabb hamaare sangg Hain hamaare nath
Toh awashya khatm hogi yeh kalyugi raat

🌹🌹🌹🌹🌹🌹🌹

Jai Guruji 🙏🏻🙏🏻

Dhirja

January 20, 2020

Om Namaha Shivaya
Aaj Ka Suvichaar 🙏🏻🙏🏻 # 701

             Brahmaand Ke Sultan

Aye bhatkey huey musaafir
Tu sach mein hai anjaana
Tujhe kalyuga kee hawaa aisee lagi
Ki toone Guruji kee mahima ka mol na jaana

Tu Guruji ko samarpan na kar paaya hai
Simran bhool kar toone waqt kiya zaaya hai
Tabhi toh ashant hai tera mann
Tabhi toh neeras hai tera jeevan

Satsang jaane ke bajaaye tu yoon hee bhataktaa rehta hai
Duniya aur duniya waalon kee baaton mein ataktaa rehta hai
Sewa karne ka punya nahin kamaaya hai
Tabhi tujhe nirmal anand nahin aaya hai

Der ho gayi toh kya hua
Abb bhi jeevan sudhaar le
Guruji niyati likh denge dobara
Unkee kripa se usey sanvaar le

Oopari dikhaawe se kuch nahin honei wala hai
Tera Guru teri har soch jaanta hai
Ahem vehem paakhand chod de
Agar tu sach mein Guruji ko maantaa hai

Niswaarth sewa kar, laukik yash ka ichhuk na bann
Sewa mein lagaa de apna tann, mann, aur dhan
Guruji ka gupt simran kar, aur sabke liye dil mein rakh sadbhaav
Adhyatmiktaa kee oar le jaa apne mann ka bahaav

Tujhe kewal bann-na hai changa insaan
Baaki sab sambhaalenge tere Guru, tere Bhagwaan
Unkee mahima ka har lok mein hai gungaan
Ve Hain sampoorna Brahmaand ke sultan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 19, 2020

Om Namaha Shivaya
Aaj Ka Suvichaar 🙏🏻🙏🏻 # 700

            Guruji Ka Prem

Guruji ke prem kee koi bhaasha nahin
Yeh aisa bhaav hai jismein kabhi bhi niraasha nahin
Yeh toh sakaaratmakta ka safar hai
Jiska hota atma par achcha asar hai

Guruji ke prem se atma kee hoti hai shuddhi
Guruji ka prem pradaan karta hai hamein buddhi
Is buddhi se sweekriti aati hai har haal mein
Aur waqt nahin zaaya hota vyarth ke sawaal mein

Guruji ka prem har sachche bhakt ka armaan hai
Guruji ka prem Guruji kee maujoodagi ka pramaan hai
Is prem se paawan koi ehsaas nahin
Is prem se zyada kuch bhi khaas nahin

Guruji ke prem aur Unkee bhakti se
Karmon ke bhaar mein hoti hai katauti
Unke protsaahan aur pyaar se
Aasaan lagti hai har chunauti

Guruji ka prem kavach hai suraksha ka
Guruji ka prem deta hai dil ko sukoon
Guruji ka prem vishwaas badhaata hai
Guruji ka prem manzil takk pahunchaata hai

Khushkismati hai Guruji ke prem mein behna
Guruji ka prem hai srishti ka sabse anmol gehna
Uss shaqs ke liye aasaan hai har kasht ko sehna
Jisne Guruji ke prem ka gehna hai pehna

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 18, 2020

Om Namaha Shivaya
Aaj Ka Suvichaar 🙏🏻🙏🏻 # 699

               Guruji Kee Sharan

Maano ya na maano
Jaano ya na jaano
Guruji kee sharan hai atyant sukhdaayi
Guruji kee sach mein vaddi hai vadiyaayee

Guruji kee sharan mein suraksha ka ehsaas hai
Guruji kee sharan mein milta sukoon khaas hai
Aur kaheen aisee shanti nahin
Aur kaheen aisee kanti nahin

Guruji kee sharan mein har vela hai simran ka
Guruji kee sharan mein anand samaata hai jeevan ka
Aur kaheen aisa nirmal anand nahin
Aur kaheen satchittanand nahin

Guruji kee sharan mein pyaar hai aur dheeraj hai
Guruji kee sharan mein neevenpann ka neeraj hai
Yahaan basey hain komal vichaar
Yahaan rangg laata hai har nek vichaar

Guruji kee sharan mein koi vehem nahin
Guruji kee sharan mein koi ahem nahin
Yahaan ruhaani rangg niraala hai
Aur yahaan jeene ka dhangg matwaala hai

Guruji kee sharan mein shradha hai aur bhakti hai
Guruji kee sharan mein sehensheeltaa aur shakti hai
Yahaan hoti mann ko tripti hai
Karmon se miltee mukti hai

Shukrana karein, ki mil gayee hamein Guruji kee sharan
Sadaa hamein Apne aashray mein rakhein Guruji ke kamal charan
Yeh manokaamna jo ho jaaye poori
Toh phir koi bhi sukhdaayee khwaayish na rahegi adhoori

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 17, 2020

Om Namaha Shivaya
Aaj Ka Suvichaar 🙏🏻🙏🏻 # 698

Paani Ke Budbudey Jaisi Yeh Zindagi

Kya bharosa is zindagaani ka
Budbudaa hai yeh paani ka
Dekhte hee dekhte gaayab ho jaayega
Chaaho bhi toh haath mein nahin aayega

Isliye har lamhe ko pyaar se galey lagaao
Jahaan bhi mumkin ho, madad ka haath badhaao
Ye pal kshanbhangur hain, isliye beh jaayenge
Karmon ke khaatey hamaari kahaani keh jaayenge

Karmon mein hee raaz chhupa hai hamaari mukti ka

Sadhna mein hee bhandaar basaa hai adhyatmik shakti ka

Is adhyatmiktaa mein hee rahasya hai hamaare mann kee tripti ka

Isliye sewa, simran, satsang se sajaa lein hum apna yeh safar bhakti ka

Aaney waale janmon mein bhi aasaani hogi
Jitnee aajkal hoti hai, na hamein utnee pareshaani hogi
Doojon ke durvyavhaar se na hamein hairaani hogi
Isliye sewa, simran, satsang se na judna toh naadaani hogi

Aao, yeh dua karein Guruji se
Ki Unkee hum sab par sadaa nazar rahey
Sab ruhaaniyat ke rangg mein rangg jaayein
Sab par Guruji kee har pal nadar rahey

Paani ke budbudey jaisi yeh zindagi
Dhanya hogi Guruji ke ashirwaad se
Safal hogi har bhakt kee bandagi
Guru kripa ke paawan prasad se

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 16, 2020

Om Namaha Shivaya
Aaj Ka Suvichaar 🙏🏻🙏🏻 # 697

     Pyaar Hee Jeevan Ka Saar Hai

Pyaar hee jeevan ka saar hai

Pyaar hee jeevan ka aadhaar hai

Pyaar se hee hota jeevan mein sudhaar hai

Phir kyun insaan ko insaan se pyaar mein inkaar hai?

Guruji ne banaaya yeh sansaar hai
Is sach se hum sabko ikraar hai
Maalum hai ki vair aur moh maya bekaar hai
Phir bhi inkee vajeh se hamaara zameer beemar hai

Yeh jeevan Guruji ka diya hua uphaar hai
Guruji ne har pal kiya hamaara upkaar hai
Jab Guruji har kadam par hamaare madadgaar Hain
Phir kyun hum vikaaron kee aadat se itne laachaar hain?

Guruji chaahein, ki hum swabhaav mein rakhein saraltaa
Guruji kahein, ki hum taur tareekon mein rakhein taraltaa
Guruji chaahein, ki hum karmon mein pirohein komaltaa
In sabse kismat ka rukh zaroor hai badaltaa

Guruji kee baat maan-ne mein bhalaa hai hamaara
Guruji ke sahaare bina nahin hai guzaara
Guruji hee toh Hain hamaare Bhagwant
Guruji kee mahima hai chirasthaayi aur anant

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 15, 2020

Om Namaha Shivaya
Aaj Ka Suvichaar 🙏🏻🙏🏻 # 696

      Nirvaana Kee Manzil

Kahaan se aata hai
Kahaan chalaa jaata hai
Saagar ka behta paani
Kis pal shuru hoti hai
Aur kaise khatm ho jaati hai
Hamaari yeh zindagaani

Sab samay ka khel hai
Karmon ka yeh mail hai
Pichhle janmon ke karmon ka
Is janam ke karmon ke saath
Aur aagey ke karam kaise hongei
Veh toh hai rahasya kee baat

Kewal Guruji hee samajhte Hain
Is uljhey huey khel ko
Buss Unhee ke bharose
Har paristhiti ko jhel lo

Guruji tumhaari neeyat parakh lenge
Isliye dhyan do apne vichaar aur vyavhaar
par
Guruji hee niyati ka faisla karenge
Unkee hukoomat hai sampoorna sansaar par

Pal pal ka rakhein Guruji hisaab
Unkee divya leela hai lajawaab
Chaahe tum padh lo duniya kee har kitaab
Phir bhi nahin paa sakte gyani honei ka khitaab

Kyunki praapt karna hai agar divya aur ruhaani gyan
Toh phir karo simran, sadhna, dhyan
Guruji kehte Hain karo gupt paath aur gupt sewa
Aur zaroori hai ki karo gupt daan

Guruji toh sarv-vyapi, sarv-gyani, aur sarvshaktimaan Hain
Nahin zaroorat is sachchaayee ke liye kisee pramaan kee
Kyun na Unke sachche bhakt bannkar
Hum paa lein manzil nirvaana kee

🌹🌹🌹🌹🌹🌹🌹

Jai Guruji 🙏🏻🙏🏻
Dhirja