Author: dhirjabhat

February 3, 2020

Om Namaha Shivaya
Aaj Ka Suvichaar 🙏🏻🙏🏻 # 715

         Jyot Guruji Ke Naam Kee

Baahar diye kee jyot jalaakar
Mitt sakta hai aaspaas ka andhkaar
Lekin antarmann kee roshni ke liye karna hoga
Bheetar kee jyot ko saakaar

Yeh jyot shagun hai sachche sukh ka
Yeh jyot nivaaran karegi dukh ka
Jaise jaise jyot mein mann leen hota jaayega
Vaise vaise nakaaratmakta ka prabhaav ksheen hota jaayega

Isliye jalaa lo apne mann mandir mein
Anant jyot Guruji ke naam kee
Is se badh jaayegi shobha
Mann mein sthaapit Shiv dhaam kee

Ghanghor se ghanghor andhera bhi
Na haraa paayega is jyot ke prakash ko
Simran se aur bhi oorja do
Is divya jyot ke sakaash ko

Ye veh shakti hai jis se Guruji kee bhakti ka anand aayega
Jo mann mein yeh jyot jalaa lega veh har pal Guruji ka saath paayega
Is jyot kee roshni se hameshaan ujjwal rahegi antaratma
Aur mann mandir mein sadaa ke liye basey rahenge Paramatama

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 2, 2020

Om Namaha Shivaya
Aaj Ka Suvichaar 🙏🏻🙏🏻 # 714

Shradha Ke Phoolon Kee Phulwaari

Chaahe ho rimjhim barastaa hua paani
Ya phir haalaaton ke kaarvaan se guzartee huee zindagaani
Har raahi kee hai apni anokhi kahaani
Har musaafir kee hai apni hee zubaani

Hamaari raahein bhi kitnee khushnaseeb hain
Kyunki Guruji unpar hamaare sangg chalte Hain
In raahon par itminaan se kadam rakhna
Inhee raahon par karmon ke nishaan padte hain

Khushboo gulab aur chandan kee
Vaani Guruji ke vandan kee
Shakti Unke sakaratmak spandan kee
Beintehaa khushi Unke sangg bandhan kee

Is khushboo se, is vaani se, is shakti se, is khushi se
Sajaa lein bhakt apni zindagi kee raahein
Bande banein aur changey karam karein
Guruji toh buss ye hee chaahein

Guruji kee chaahat ko poori karna
Bhakton kee zimmedaari hai
Sachche bhakt ke jeevan kee raah
Shradha ke phoolon kee phulwaari hai

Yeh sundar bageecha banaa hai
Prem bhaav aur vishwaas kee buniyaad pe
Guruji, mehar karna ki yeh gulistaan
Aabaad rahe Aapke ashirwaad se

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 1, 2020

Om Namaha Shivaya
Aaj Ka Suvichaar 🙏🏻🙏🏻 # 713

     Guru Bhakti Ka Beej

Simran kee mehekti maati mein
Beej boya bahut pyaar se Guru bhakti ka
Shradha ka bhaav jab usmein daala
Toh uspar barsa amrit Guruji kee shakti kaa

Har pal har din sadhna ke shudh spandan se
Beej se utpann hua ek ankur jo honei lagaa bada
Dekhte hee dekhte veh ankur se vriksh bann gaya
Apni teheniyaan pasaare veh honei lagaa khadaa

Ped kee jadon mein thaa atoot vishwaas
Isliye jab jab veh ped leta thaa shwaas
Uspar khilte thei ummeed ke phool
Jo hakeekat mein thei Guruji ke charnon kee dhool

Ummeed ke umdaa phoolon se
Guruji kee ruhaani khushboo aati
Bhakti ke vriksh ko yeh khushboo
Sach mein bahut hee bhaati

Guruji ke ashish ke khushnuma phal
Vriksh kee shobha ko khoob badhaate
Inhee phalon se bhakti ke aur beej nikal
Isee silsile ko phir aagey chalaate

Na aayee koi aanch vriksh par
Aandhi se ya toofan se
Guruji sabke Parwardigaar Hain
Kehta raha veh saare jahaan se

Saara jeevan veh ped neevan hokar
Guruji kee kripa se haraa bharaa raha
Bhakti ke vriksh ke jeevan chakra par
Guruji ka ashirwaad sadaa banaa raha

Guruji, Aapse yeh guzaarish hai
Ki aisa hee ho vriksh hamaari bhakti ka
Aapki mehre nazar se hamein saubhagya miley
Jeevan chakr ke antt mein mukti ka

Aap par jo hamaara vishwaas hai
Veh rahey sadaa dridh aur atoot
Hamaari bhakti ka vriksh simran kee maati mein samaa jaaye
Jab hamaare praan jaayein chhoot

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 31, 2020

Om Namaha Shivaya
Aaj Ka Suvichaar 🙏🏻🙏🏻 # 712

           Ek Guru Hee Apna Hai

Ek Guru hee apna hai
Unke alaawa koi na dooja
Unhee se jodo atma ka rishta
Unhee kee karo tum pooja

Guruji kee aradhana karne mein
Jo adbhut anokhi khushi milegi tumhe
Uss khushi kee talaash mein toh itne insaan
Kitne teerathsthaanon mein hain ghoomey

Guruji toh pooran Guru Hain
Rooh takk ko nikhaar dete Hain
Apni mehar aur gyan prakash se
Ve jeevan sanvaar dete Hain

Jitna karoge simran tum
Guruji ko utna kareeb mehsoos karoge
Zindagi kee mushkilon se pareshaan na hoge tum
Na hee tum vipattiyon se daroge

Guruji se judey rahoge
Toh har pal apne sangg Unhe paaoge
Unhee kee kripa se guzar jaayegi zindagi
Aur Unhee ke charnon mein tum samaaoge

Atma ko anand nahin milega
Udaas hokar ya darr kar rehne se
Buss, phir shubh kaam mein deri kaisi
Sajaa lo atma ko Guruji ke naam ke gehne se

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 30, 2020

Om Namaha Shivaya
Aaj Ka Suvichaar 🙏🏻🙏🏻 # 711

Sab Sawaalon Ka Jawaab

Kya maqsad hai maanav janam ka
Kya anjaam hai har karam ka
Kya hai bhavishya hamaare janam maran ka
Kya laabh hai Guruji ke manan ka

Sab sawaalon ka jawaab hai Guruji ke paas
Guruji kee sharan mein poori hoti hai hamaari aas
Divyataa kee aur ruhaaniyat kee
Yahaan pareeksha hoti hai insaaniyat kee

Ye paisa, ye dhan, ye yash aur ye naam
Kuch bhi tere saath nahin jaayega
Lekin Guruji ka manan toh amrit kee khan hai
Jis se tu sadaa ke liye tarr jaayega

Guruji kee sharan mein rehkar kar le Unka simran
Mann ko ekaagr kar ke kar le Gurbani ka shravan
Jabb bhi koi anuchit khayaal aaye toh kar le tu Guruji ka manan
Mangalkaari aur shudh banaa le tu apna
vaataavaran

Aisa karne se ho jaayegi unnati teri atma kee
Aisa karne se mehar badhegi tujhpar Paramatma kee
Tujhe Guruji kee sharan mein saugat milegi nirmal anand kee
Tujhe teri tapasya se praapti hogi satchittanand kee

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 29, 2020

Om Namaha Shivaya
Aaj Ka Suvichaar 🙏🏻🙏🏻 # 710

Aapki JaiJaikaar Karte Huey

Dil ko chot pahunchi hai
Kis se hum kahein?
Itna dard ho raha hai
Kaise hum sahein?
Humne jo apnon sangg wafaa ke vaade nibhaaye
Ve unkee bewafaai mein bahein
Ek ajab hee dhangg se jaagey hain abb
Kaise is hakeekat mein rahein?

Mann ho raha hai bhaari
Palkein bhi bheeg gayeen hain saari
Dil ne abb apni har khwaahish maari
Lekin ye sab toh phir bhi rahega jaari

Faisla hamein hee karna hoga
Hamein aur bhi zyada dukh varna hoga
Agar seekhein nahin hum abb
Toh phir seekhenge kabb?

Yahaan karmon kee hera pheri hai
Har rishtey mein matlab kee deri hai
Na ye duniya teri hai, na meri hai
Ye toh buss maya kee ik dheri hai

Guruji, Aapne kahaa
Ki kewal Aap hee Apne Hain
Aaj maan lee yeh sachchaayee
Kyunki laukik rishtey mehez sapne hain

Abb maan lee hai Aapki yeh baat
Kyunki isee mein sachchaayee milee
Jo poori duniya mein dhoondhne se na milee
Aapki sharan mein veh divya achchaayee milee

Kshamaa kar deejiye ki abb takk so rahe thei hum
Neend khuli, toh ro rahey thei hum
Sambhaal liya Aapne varna ho jaate hum barbaad
Abb Aapke aseem pyaar se kiya atma ko aabaad

Abb akele honei ka darr nahin
Kyunki Aap hamaare saath Hain
Abb sunnsaan ye safar nahin
Kyunki Aapne thaama haath hai

Aapke naam ko raasta aur manzil banaakar
Jeevan kee naiya mein doltey rahenge
Aapki jaijaikaar karte huey hum
Shukrana Guruji boltey rahenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 28, 2020

Om Namaha Shivaya
Aaj Ka Suvichaar 🙏🏻🙏🏻 # 709

    Satyuga Vaapis Laut Kar Aaye

Suna hai Satyug thaa saadaa aur saral
Tabb taur tareeke bhi hotei thei taral
Insaan ka vichar aur vyavhaar thaa komal
Aur vaataavaran chaaron oar thaa nirmal

Lekin abb chhaaya hai kalyuga ghor
Har oar machaa hua hai ek karkash sa shor
Aise mein Guruji hamaare uddhaar ke liye aaye Hain
Phir kyun hum abb takk Unkee baat na sunn paaye hain?

Hum sab hain peedit aur roag-grasth
Kayee tareekon se hua hai hamaara dharam bhrasht
Chugli aur buree aadaton ke ho gaye hain hum ghulaam
Ye bhi nahin sochte hum ki is sabka kya hoga anjaam

Kisee ko jhooth bolne kee hui beemari hai
Toh kisee aur insaan ko ahankaar kee laachaari hai
Koi dikhaawe ke nashe mein behaal hai
Koi shaareerik roag se nidhaal hai

Shukrana karna bhool kar kritaghn honei ka marz hai
Isliye hamaare karmon ka badhta jaa raha karz hai
Aswasth ho gaye hain laukik laalach aur shikaayat karte karte
Is kaaran se jee bhi rahein hain toh marte marte

Guruji sikhaayein ki hum karein gupt daan, gupt sewa, aur gupt paath
In nek karmon mein Guruji Hain hamaare saath
Jab hamaara haath thaame huey Hain swayam hamaare naath
Toh phir kyun nahin hum maante hain Unkee baat

Guruji ka simran hai ati mangalkaari
Guruji kee sharan hai ati kalyaankaari
Guruji ka anusaran karne se kalyuga ka awashya antt hoga
Jaise hamaare Guruji Hain, na kabhi aisa Devroopi Mahapurush ya santt hoga

Phir vilambh kis baat ka, kyun hum karein deri
Kyun na seedha raasta apnaayein chod kar raahein tedhi-medhi?
Satyuga vaapis laut kar aaye, aao is sunehre khwaab ko karein sachchaa
Karam achche ho jaayenge, toh anjaam bhi hoga achchaa

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 27, 2020

Om Namaha Shivaya
Aaj Ka Suvichaar 🙏🏻🙏🏻 # 708

   Har Mankaa Simran Ke Haar Ka

Na chinta karo, na haalaat se daro
Kyunki Guruji tumhaare saath Hain
Maargdarshan kar rahei Hain Ve tumhaara
Tumhaare sir par Unka haath hai

Tum ek pal ke liye bhi akele nahin
Tumhaare meet aur rakshak Hain Guruji
Guruji kee sadhna mein bahut shakti hai
Kyunki tumhaare shubhchintak Hain Guruji

Guruji kee sadhna karoge jitnee
Utnee shaktishali banegi tumhaari atma
Guruji kee sadhna toh hai raksha kavach
Kyunki Guruji Hain Paramatama

Kewal Unhee par dhyan do apni sadhna mein
Kisee ko beech mein na aane do apni aradhana mein
Guru shishya ke paawan rishtey ko nikhaarta hai sadhna ka stroat
Isliye na aane do apni sadhna mein kisee bhi swaarth kee khoat

Ek aur baat jo hai bhakt ke liye zaroori
Jis se khatm ho jaayegi beech kee saari doori
Sadhna mein darr nahin, balki Guruji ke prati ho bhaav pyaar ka
Taaki prem aur wafaa se goonj uthey har mankaa simran ke haar ka

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 26, 2020

Om Namaha Shivaya
Aaj Ka Suvichaar 🙏🏻🙏🏻 # 707

  Jeevan Ka Har Pal Tyohaar Hai

Khushi ke haseen mauke ke na kar tu intazaar
Har lamhe mein khushi dhoond kar tu kar uss khushi ka izhaar
Teri har saans mein jabb hoga Guruji ka Shukrana aur pyaar
Toh teri zindagi mein chaa jaayegi bahut khoobsoorat aur urjaamayee bahaar

Na ho chhoti chhoti baaton se tu bechain aur bekaraar
Ye toh hoti rahengi jabb takk chalega sansaar
Inmein ulajhna toh sach mein hai bekaar
Asli jeet chahiye, toh inse maan le tu haar

Kyunki asal jeet hai Guruji ko paane mein
Na ki vyarth kee baaton mein waqt ganvaane mein
Anand hai anokha Guruji sangg samay bitaane mein
Isliye na kar tu samay zaaya kabhi bhi aansoon bahaane mein

Simran kar le, lagaa le dhyan
Paa le Guruji se tu adhyaatmik gyan
Ye vo ujaala hai jo hai sarvshaktimaan aur khaas
Is ujaale ke prataap se andhera na aayega tere paas

Bade naseeb se mila hai yeh maanav janam
Saath mein mil gayee hai tujhe Guruji kee sukhdaayee sharan
Aise mein toh jeevan ka har pal hee tyohaar hai
Kyunki Guruji kee sharan toh sarvottam uphaar hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 25, 2020

Om Namaha Shivaya
Aaj Ka Suvichaar 🙏🏻🙏🏻 # 706

      Angg Sangg Pal Pal

Na dhanstaa chal laukik daldal mein aye bande
Namumkin hai is daldal se bachnaa
Na phanstaa chal maya ke jaal mein
Bahut mushkil hai is jaal se nikalnaa

Laukik padaarthon kee baanvree bhookh
Sach mein kabhi bhi na mitegee
Heere javaarahaat aur paise kee pyaas
Sach mein kabhi na bujhegi

Jitna inmein moh badhaayega tu
Tu inmein hee ulajhtaa jaayega
Lekin adhyaatmik taur se jo rahega inse vimukh
Toh tera jeevan sulajhtaa jaayega

Guruji kee sharan milee hai tujhko
Unkee baat tu maan le
Oopari dikhaawe mein kuch nahin rakha
Bande, tu ye jaan le

Laukik maya aur moh toh bhanvar ke samaan hain
Inse judey rehne se aate lobh ke laalchee toofan hain
Inke chakravyu mein na chayn hai na tripti
Inmein phanskar na sukh miley na miley mukti

Abb bhi samay hai laut jaa
Is haanikaarak aur mayavee raah se
Apna jeevan sanvaar le
Guruji ko paane kee chaah se

Guruji kee karega tu jitnee sadhna
Utnee anandmayee hoti jaayegi teri aradhana
Darshak bannkar jee tu is jeevan ko
Guru pooja se banaa le shaktishali apne mann ko

Mann jo ho jaayega tere vash mein
Toh tere safar kee manzil hongei Guruji
Tujhe tere prayaas mein madad karne ke liye
Tere angg sangg pal pal hongei Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja