Author: dhirjabhat

January 4, 2020

Om Namaha Shivaya
Aaj Ka Suvichaar 🙏🏻🙏🏻 # 685

Kuch Bhi Nahin Hai Guruji Ke Pyaar Se Pyaara

Guruji kee kanti se ghanghor andhera bhi sharmaata hai
Guruji ke jeevan daan kee shakti se Yamraj bhi ghabraata hai
Guruji ke divya noor ke aagey
Duniya kee saari khoobsoorati pheeki laagey

Guruji Hain akhand jyot poori srishti ke liye
Sabb bhakt ichchuk rehte hain Guruji kee drishti ke liye
Guruji ke naam mein hai aisa prabal prataap
Jo mitaa deta hai saare dukh aur santaap

Guruji ke har swaroop mein
Ek adbhut aakarshan hota hai
Jo bhi dekhta hai nishthaa se swaroop ko
Veh Guruji kee chhavi mein khota hai

Guruji ke har roop mein shakti hai anant
Kyun na ho, akhir Ve Hain sabke Bhagwant
Unse hee srishti kee rachna, paalan, aur asatya ka vinaash
Unse hee yeh dharti, vaayu, jal, agni, aur akash

Kuch bhi nahin hai Guruji ke pyaar se pyaara
Sabb Devi Devta bhi maanein Guruji ka ishaara
Kyunki Guruji toh MahaShiv ka avataar Hain
Aur srishti ke taaranhaar Hain

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 3, 2020

Om Namaha Shivaya
Aaj Ka Suvichaar 🙏🏻🙏🏻 # 684

 Hamaara Baanvra Mann

Kisee ko bhi duniya ka saara sukh mil nahin sakta
Kisee ko duniya ka saara dukh bhi nahin mil sakta
Ye toh sab pichhle aur abhi ke karmon ka bhog hai
Jisey koi kehta hai kismat, koi kehta sanjog hai

Guruji sikha rahey Hain hamein
Seekhna hamaare vash mein hai
Lekin ye jo hamaara baanvra mann haina
Ye paglaa rehta bahut kashmkash mein hai

Jaanta hai ye mann, ki kya hai sahi
Jaanta hai, ki kaunsa karam karna chaahiye nahi
Phir bhi bekaaboo aksar ye ho jaata hai
Aur ahankaar ka ghulam apne aap ko banaata hai

Guruji bhi imtehaan lete Hain is mann ka
Ki kitna ichhuk hai ye ruhaani dhan ka
Ki ye kewal dikhaawe ke liye Unke gunn gaata hai
Ya phir Unkee dikhaayee raah ko apnaata hai

Dhanya ho jaata hai veh insaan aur uska mann
Jo Guruji kee sharan mein aakar karta hai apni mai ko samarpan
Guruji kee sharan toh hai asal dhan
Kaash is satya ko maan le har bhakt jann

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 2, 2020

Om Namaha Shivaya
Aaj Ka Suvichaar # 683

     Sachkhand Kee Oar

Sachkhand kee oar ka raasta
Bahut hee pathreela thaa
Guruji ke rangg mein rangey huey
Musaafir ka andaaz rangeela thaa

Pareekshaaon ke patharon se hokar lahu-luhaan
Lete huey har saans mein Guruji ka naam
Veh kashton aur arachanon ke pahaadon par
Kabhi rengtaa, kabhi chalta, kabhi uthtaa gir kar

Sachchaayee ko banaaya usne apna sahaara
Dhoondtaa raha apne moksh ka kinaara
Duniya mein kya ho raha thaa, unn sab baaton se thaa veh bekhabar
Kisee kee chiknee chupdee baaton ka na ho rahaa thaa uspar asar

Aaspaas laukik aakarshan bhi thei
Jinse raasta aasaan ho jaata
Lekin musaafir unse aakarshit nahin hua
Nahin toh veh sachkhand ko kaise paata

Isliye Guruji mein shradha aur vishwaas rakh
Veh kadee mehnat se raasta tayy karta raha
Guruji toh sadaa ke jaise sab dekh rahey thei
Musaafir Unke ashish se apni jholi bharta raha

Jo ahem aur vikaaron kee chaadar usne saari zindagi odhee thee
Imtehaan kee in ghadiyon mein phatt kar nasht ho gayi veh chaadar
Abhimaan uska choor choor ho gaya
Neevenpann ka kiya usne aadar

Tartaa raha musaafir har kadam par
Jaagriti kee jyot jal gayee uskee antaratma mein
Jab uskee mai bilkul khatm ho gayi
Toh uska milan hua Parmatama mein

Guruji kee kripa se hua musaafir ka uddhaar
Guruji ati-prassann huey dekhkar usmein yeh sudhaar
Guruji ne rakha musaafir ke sir par Apna haath
Aur sachkhand kee manzil kee oar le gaye Apne saath

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

January 1, 2020

Om Namaha Shivaya
Aaj Ka Suvichaar 🙏🏻🙏🏻 # 682

             Toh Koi Baat Baney

Jeevan mein kabhi hogi chhaaon toh kabhi dhoop
Apnon aur paraayon ke badalte rahenge roop
Laukik taur se toh kisee kisee ko apna maan logey
Lekin Guruji ko dil aur atma se apna maano toh koi baat baney

Yoon toh hum sab atmaayein nikleen hain zindagi ke safar par
Kabhi kisee ke saath kabhi akele kisee dagar par
Saath dene vaale toh kabhi na kabhi saath chod denge
Guruji ko humsafar banaao toh koi baat baney

Laukikta ke jaal janjaal mein hum sab hain phansey huey
Chaahton aur aakarshanon ke daldal mein hain dhansey huey
Maang poori honei par sabhi Guruji ko Bhagwaan maante Hain
Bin kuch maange ya miley Guruji ko maano toh koi baat baney

Yoon toh har din bahut see ghatnaayein ghat-tee hain
Kuch hansaatee hain aur kuch rulaatee bhi hain
Hanste hanste toh kabhi kabhi aansoon aa jaate hain sabko
Lekin rotey rotey hansna seekho toh koi baat baney

Jeevan ke raaste aur anek moad tayy karte huey
Gumm aur khushi ke pal toh aate hee rahenge
Khushi mein toh har koi muskuraana jaanta hai
Jo gumm mein bhi muskuraao, toh koi baat baney

Kabhi ummeed aur kabhi niraasha har kisee kee kahaani ka kissa hai
Sukh aur dukh ka aana toh sabkee zindagi ka hissa hai
Sukh mein toh Guruji ka Shukrana karna sab jaante hain
Jo dukh mein bhi Unka Shukrana karo toh koi baat baney

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 31, 2019

Om Namaha Shivaya
Aaj Ka Suvichaar 🙏🏻🙏🏻 # 681

       Abb Toh Manzil Vaheen Hai

Maan liya jabb se Guruji ko
Apne jeevan kee naiya ka khivaiyaa
Tabb se zindagi mein museebaton kee oar
Kaafi badal gaya hai ravaiya

Mann kee fikrein kar dee hain
Guruji ke havaale
Jeevan ke har pehlu ko
Abb Guru hee sambhaale

Pehle jin baaton se dil hota thaa pareshaan
Abb veh uss pareshaani se hai bilkul anjaan
Pehle har sadme se ye dil jaata thaa toot
Abb kaafi hadd takk yeh aadat gayi hai chhoot

Har roz aata hai dil mein yeh vichaar
Ki pehle se behtar hon charitra aur vyavhaar
Iskee koshish jaari rehti hai lagaataar
Ismein madad karte Hain parwardigaar

Soch din-b-din sakaaraatmak hoti jaa rahi hai
Jo ho raha hai jeevan mein vahee lagta sahi hai
Guruji kee meher ke bina toh zindagi hee zindagi nahi hai
Jidhar Guruji le jaayenge, abb toh manzil vaheen hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 30, 2019

Om Namaha Shivaya
Aaj Ka Suvichaar 🙏🏻🙏🏻 # 680

Guruji Kee Bhakti Mein Doob Jaayein

Guruji hamaare paalanhaar Hain
Ve hamaare taaranhaar Hain
Ve hee bakshanhaar Hain
Ve hee parwardigaar Hain

Guruji koi jaadugar nahin
Jo Apni chhadee chalaayenge
Guruji koi saudaagar nahin
Jo hamaari maang ka mol lagaayenge

Guruji toh Bhagwaan Hain
Ve toh jaane-jahaan Hain
Ve murshid Hain hamaare
Madadgaar Hain hamaare

Ve Hain MahaShiv ka avataar
Karte Hain Ve divya chamatkaar
Lekin, saath hee saath karmon ka poora hisaab karvaate Hain
Aur hamaari mai ko marvaate Hain

Sachkhand kee seedhi chadhne ke liye
Karmon ka bhugtaan zaroori hai
Mai ko mitaana zaroori hai
Vikarmon ko tyaagna zaroori hai

Guruji hamaare maargdarshak Hain
Ve hee hamaare rakshak Hain
Ve banda bann-na sikhaate Hain
Aur sahi raasta dikhaate Hain

Lekin, hamaara hee hai uss sahi raaste par chalne ka farz
Tabhi toh utar paayega hamaare karmon ka karz
Dhyan rahe ki apne ahankaar aur vikaaron mein adhkar
Gir na jaayein hum Sachkhand kee seedhi kee oar chadhkar

Kyun na hum mukt ho jaayein
Har khokhli aur laukik kaamna se
Buss, Guruji kee bhakti mein doob jaayein
Niswaarth prem aur samarpan kee bhavna se

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 29, 2019

Om Namaha Shivaya
Aaj Ka Suvichaar 🙏🏻🙏🏻 # 679

Bhool Hee Gaye Hum Shukrana Ka Zikr

Peechhe ateet kee yaad
Aagey bhavishya ke liye fariyaad
Beete kal par pachhtaava aur aane waale kal kee fikr
Ismein bhool hee gaye hum Shukrana ka zikr

Jo pal aaya hee nahin ya phir jo pal beet gaya
Uskee soch se kyun karein aaj ko barbaad
Har pal ka shukrana karte huey
Karein Guruji se ye fariyaad

Ki Ve sadaa rakhein Apni sharan mein
Ki Ve jageh dein hamein Apne kamal charan mein
Ki Ve hamein behtar insaan bann-ne mein madad karein har din
Abb na jiyaa jaaye ek bhi pal Guruji ke ashirwaad ke bin

Guruji kee kripa se saahas milega aane waale kal ka saamna karne ka
Guruji kee sharan mein rehte huey nahin koi matlab hai darne ka
Pichhlee bhoolon ka pashchyaataap hai toh Guruji karenge maaf
Dil mein sachchee shradha hai toh mann ho jaayega saaf

Lekin yeh sab karte karte Shukrana karna hai bahut zaroori
Shukrana se mit jaayegi bebasi aur majboori
Shukrana aur vishwaas se milegi himmat aur taakat
Shukrana aur niswaarth sewa se mitegi har buri aadat

Guruji toh har pal sangg Hain lekin apna farz toh hamein hee nibhaana hai
Guruji sab kuch dekh rahei Hain toh aur kisee ko kya dikhaana hai
Zindagi toh ek tajurba hai, ik safar hai, ik afsaana hai
Guruji kee nigraani mein hee yahaan par aana aur yahaan se jaana hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 28, 2019

Om Namaha Shivaya
Aaj Ka Suvichaar 🙏🏻🙏🏻 # 678

          Guruji Ka Mantra Jaap

Guruji ka mantra jaap hai har dukh ka upaay
Japp lein hum sabb Om Namaha Shivaya Shivji Sadaa Sahaay
Guruji MahaShiv Hain, yeh aagey kee pankti bataaye
Sach hai ye ki, Om Namaha Shivaya, Guruji Sadaa Sahaay

Mantra jaap ko har pal dil mein jo bhi gungunaaye
Mantra jaap uske jeevan se niraasha ko duur bhagaaye
Iskee shakti itnee, ki jeevan ka andhkaar mitt jaaye
Mantra jaap har bhakt ka vishwaas aur saahas badhaaye

Is mantra jaap kee mahima har koi suney sunaaye
Kyunki iske japne se kasht hamein sataaney na paay
Jo bhi vipdaa jo bhi mushkil hamaare jeevan mein aaye
Veh Guru Apni kripa se kumm kar ke hee laaye

Saral hai mantra jaap aur sakaaratmakta yeh phailaaye
Iske shradha poorvak uchhaaran se ghar mein khush-haali aaye
Udaasi se bujhe hriday mein yeh asha kee jyot jalaaye
Kalyuga mein bhatakte musaafir ke dil mein yeh utsaah jagaaye

Mantra jaap ka koi kaanoon nahin, yeh kaheen par bhi kiya jaaye
Mantra jaap se jo shanti miley, uske bina phir nahin jeeya jaaye
Mantra jaap mein magn rehkar Guruji ka naam jabb bhi liya jaaye
Bhakt mantra jaap kar ke Guruji ko apne paas bulaaye

Mantra jaap karte rehne se mann mein Guru samaay
Jaap aur Guruji ka anusaran karne se insaan changaa bann paaye
Chaahe Guruji ke dwara bhakt neembu ke jaise nichodaa jaaye
Antt mein Guru hee bhakton ko moksh kee manzil takk le jaaye

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 27, 2019

Om Namaha Shivaya
Aaj Ka Suvichaar 🙏🏻🙏🏻 # 677

   Duniya Chaahe Saath Chod De

Duniya chaahe saath chod de
Aap na kabhi muh moadna
Mushkilein aani hain toh aayein beshaq
Aap na kabhi saath chodna

Kyunki Aapke saath se har mushkil
Lagne lagegi aasaan
Aapki mamta se hee himmat milegi
Aap hee Hain karunanidhaan

Dena aisee buddhi
Ki Aapki mahima ko jaanein
Dena aisee shuddhi
Ki Aapke har hukm ko maanein

Apne kiye paapon kee mayl ko dho sakein
Hum praayashchit kar ke sachche mann se
Aapki kripa se neeven aur sadaachaari rehkar
Apna uddhaar karein achche jeevan se

Aap hee Hain Devon ke Dev
Aap hee Hain mool divya gyan ke daata
Aapka haath sadaa rahey hamaare sir par
Yeh uphaar hamein dena daata

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 26, 2019

Om Namaha Shivaya
Aaj Ka Suvichaar 🙏🏻🙏🏻 # 676

Jaan Se Hee Toh Jahaan Hai

Guruji hee maalik Hain is jahaan ke
Unkee hukoomat hai is zameen aur aasmaan pe
Ve gyata Hain hamaari har tammanna, har armaan ke
Vishwaas hai toh anjaam achche hongei har imtehaan ke

Guruji ne thaama hai hamaara haath
Isliye ghabraane kee koi baat nahin
Unse kar sakte hain hum koi bhi baat
Unse sharmaane kee koi baat nahin

Jinke ishaare par chalti hai yeh saari srishti
Jinkee hai itnee kripaalu dayalu divya drishti
Unka shukrana karne se sanvar jaata har haalaat hai
Unke bachche kehlaana itnee khushi kee baat hai

Guruji se hee yeh shareer hai
Guruji se hee shareer mein shwaas hai
Shwaas se hee jaan hai
Aur jaan se hee toh jahaan hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja