Author: dhirjabhat

November 15, 2018

Om Namaha Shivaya
Aaj Ka Suvichaar 🙏🏻🙏🏻 # 270

      Tere Guruji Tere Saath Hain

Kisliye tu ghabrata hai
Kisliye neend ganvaata hai
Kisliye dil mein shankaa laata hai
Tere Guruji tere saath Hain

Mushkilein toh raah mein aayengee
Tere dil ko ghaav pahunchaayengee
Lekin samay ke saath ve chalee jaayengee
Tere Guruji tere saath Hain

Museebaton ka saamnaa kiye ja
Guruji kee razaa mein jiye jaa
Har pal se koi seekh tu liye jaa
Tere Guruji tere saath Hain

Chhaaya hai kalyuga ka pralay
Aa gaya hai vikarmon ka samay
Tere sadkarmon kee hogi vijay
Tere Guruji tere saath Hain

Pichchle karmon ka hisaab tu chukaaye jaa
Duniya ko sach kee raah tu dikhaaye jaa
Guruji kee mahima tu sunaaye jaa
Tere Guruji tere saath Hain

Dhalte huey sooraj ko dekh kar
Raat ke andhere se bilkul bhi na darr
Jeevan mein zaroor aayegee seher
Tere Guruji tere saath Hain

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 15, 2019

Om Namaha Shivaya
Aaj Ka Suvichaar 🙏🏻🙏🏻 # 635

          Sampoorna Trilok Mein

Zaroori nahin ki phoolon se bharee hon raahein
Zaroori nahin ki veh sab mumkin ho jo hum chaahein
Koshish karna toh hamaara kaam hai
Lekin kewal Guruji ke vash mein anjaam hai

Guruji hee niyati likh sakte Hain dobaara
Vahee dekhte Hain har karam hamaara
Chaaron oar phaylaa hai Unka prakash
Bahut kalyaankaari hai Unka sakaash

Guruji kee divya drishti se patit ka uddhaar ho jaaye
Unkee mehar se jeevan mein sudhaar ho jaaye
Unke ek ishaare par Yamraj bhi sweekar lein Apni haar
Sab bhakton ko milta hai Guruji ka aseem pyaar

Unke ashirwaad se bigde kaaraj sanvar jaate hain
Unke pratap se ummeed ke kinaare nazar aate hain
Unkee karuna se manobal na tootey kabhi
Unkee kripa ka sahaara mil jaaye toh na chhootey kabhi

Sampoorna Trilok mein koi nahin hai Guruji ke samaan
Hum itne bhaagyashaali hain ki hum hain Unkee santaan
Guruji kee leela se poorna hon sabke mangalkaari armaan
Guruji ne hee diya hai hum sabko jeevan daan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 14, 2018

Om Namaha Shivaya
Aaj Ka Suvichaar 🙏🏻🙏🏻 # 269

Zindagi Ke Jo Pal Guruji Ne Hain Diye

Ek jhooth ko chhupaane ke liye
Kehne padte hain jhooth hazaar
Aur jab jhooth pakda jaata hai
Toh rishton mein padd jaati hai daraar

Guruji satya ka paath padhaayein
Phir kyun hum jhooth ko apnaayein
Kyun hum apne ko asatya mein jakdein
Kyun na hum satya ka pallu pakdein?

Sachaayee apnaayenge toh
Zindagi behtar ho jaayegi
Sadgati ke hum kareeb hongei
Aur dil mein shanti aayegi

Jhooth toh aakhir mein
Ho jaata hai benakaab
Insaan ko chukaana padta hai
Apne karmon ka hisaab

Guruji hamaare gunaahon ko bakshein
Har pal hum ye fariyaad karein
Jhooth ke vish ko na grehen karein
Aur sach ka sabak yaad karein

Guru naam ka anmol amrit hamein mila hai
Kyun na usey hum shradha se pee lein
Zindagi ke jo pal Guruji ne Hain diye
Kyun na unhei hum sachchaayee se jee lein?

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 14, 2019

Om Namaha Shivaya
Aaj Ka Suvichaar 🙏🏻🙏🏻 # 634

                  Behtar Insaan

Kya hum Guruji se judne ke baad
Baney hain pehle se behtar insaan?
Kya hum sachche dil se maante hain
Apne pyaare Guruji ko Bhagwaan?

Zara sochiye aur swayam ko hee deejiye In sawaalon ka jawaab
Guruji toh sab jaante Hain isliye
Khud ko na dhokha dena janaab

Abb bhi samay hai
Kyun na hum sudhar jaayein
Jo rasta Guruji dikhaa rahein Hain
Kyun na hum udhar jaayein

Mushkilein aayengi
Toh Guruji denge himmat
Baadhaayein aayengi
Toh Guruji denge taakat

Guruji angg sangg rehkar
Beda paar karenge hamaara
Phir hum kyun bewafaa banein
Kyun jhooth ka lein hum sahaara

Vikaaron ko tyaagne kee koshish karein
Sach ka saath dene se kabhi na darein
Is jeevan mein apna kirdaar imaandaari se nibhaayein
Kyun karmon ka bojh saath lekar jaayein?

Mushkil chaahe lagey yeh sab
Namumkin magar nahin hai
Vahee karne mein bhalaayee hai
Jo Guruji kahein sahi hai

Guruji ke samaksh haar maan lena paraajay nahin hai
Kyunki Unhe toh vaise bhi asliyat ka gyan hai
Unse mann kee baat kehne mein kaisi sharam
Unhe toh sadaa hamaare kalyaan ka dhyan hai

Sadhna mein sunein dhyan se hum
Guruji hamein dete hain jo nirdesh
Is yaatra mein sudhaarein swayam ko
Maan kar Unka aadesh

Unke aadesh ka anusaran karne se
Bann sakte hain hum behtar insaan
Ruhaani safar ka mool gyan hee yahee hai
Ki hum sabke bheetar Hain Bhagwaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 13, 2018

Om Namaha Shivaya
Aaj Ka Suvichaar 🙏🏻🙏🏻 # 268

         Keechad Ke Beech Kamal

Jab apne bheetar jhaanktey hain hum
Zindagi kee bhaag daud ke shor ke beech
Aur suntei hain apni atma kee awaaz
Toh ek divya dhwani leti hai dil ko kheench

Usee dhwani ko sunein aur samjhein
Toh hogi jaagriti hamaari
Uss jaagriti se hogi satya kee praapti
Aur hogi adhyaatmik unnati hamaari

Guruji kehte Hain ki hum achche insaan banein
Guruji chaahte Hain ki hum achche karam karein
Unkee chaahat ko poora karna hamaara dharam hai
Unka kehna maan lena hee sabse uttam karam hai

Ekaagrachitt hokar agar
Guruji kee dikhaayee hui raah par chalengey
Toh Parampita Guruji kee divya awaaz Hum yakeenan sunenge

Sachche dil se karenge prayaas
Toh janm lega atma vishwaas
Is atma vishwaas ke bal par hum zindagi ka safar tayy karenge
Na ghabraayenge, na royenge, na hee kisee se darengey

Guruji har kadam pe hongei angg sangg hamaare
Buss, hamein samajhne hongei Unke hukm aur ishaarey
Phir kaisi shankaa, kaisa shaq, aur kaisa soch vichaar
Guruji par sab chod kar shaant kar lein hum vyavhaar

Yoon hee vyarth mein na samay ganvaayein
Sewa aur simran mein mann lagaayein
Guruji ne jo hai sikhaaya, unn baaton par karein amal
Kalyuga mein bhi aise khil jaayein, jaise keechad ke beech kamal

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 13, 2019

Om Namaha Shivaya
Aaj Ka Suvichaar 🙏🏻🙏🏻 # 633

 Guruji Se Tum Pyaar Karo

Guruji se tum pyaar karo
Guruji se apni bhakti ka izhaar karo
Guruji par aitbaar karo
Guruji ka simran baar baar karo

Guruji ka anusaran karo
Guruji ka hee smaran karo
Guruji ka tum naman karo
Guruji ke hee charan pado

Guruji ko apne dil mein basaao
Guruji ke sangg kuch pal baith jaao
Guruji ko apne dil kee baatein sunaao
Guruji ko apna dukh dard bataao

Guruji par vishwaas karo
Guruji ke naam ka shwaas bharo
Guruji kee maujoodgi ka ehsaas karo
Guruji se rishta khaas karo

Guruji ko har pal yaad karo
Guruji se fariyaad karo
Guruji se apne dil ko aabaad karo
Guruji ka sadaa dhanyawaad karo

Guruji ka har kshan ashirwaad paao
Guruji se mamta kee saugat paao
Guruji ke pyaar ka prasaad paao
Guruji se bandh kar baaki har bandhan se azad ho jaao

Guruji hee dharti, Guruji hee nabh Hain
Guruji tabb thei aur Guruji hee abb Hain
Murshid, naath, meet, Guruji hee sab Hain
Sach mein Guruji hee jagg ke Rabb Hain

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 12, 2018

Om Namaha Shivaya
Aaj Ka Suvichaar 🙏🏻🙏🏻 # 267

     Aglaa Savera Toh Hoga Zaroor

Raat kitnee bhi lambee kyun na ho
Aglaa savera toh hoga zaroor
Ghaav chaahe kitne bhi gehre kyun na hon
Guruji kee marzi hamei hai manzoor

Niyati ne jo bhi faisla hai kiya
Veh na tera thaa aur na mera thaa kusoor
Praarthanaa karein Guruji se hum kyunki
Vahee hain Bhagwan aur Vahee hain hamaare huzoor

Unhee kee kripa se ghaav bhar jaayenge
Unhee kee karuna se hum tarr jaayenge
Unke saath ke bina hum duniya se bahut darr jaayenge
Ek Vahee Hain jo hamaare kasht har paayenge

Yeh duniya toh moh-maya ka mela hai
Har koi apni khwaayishon ka ghulam hai
Guruji kee sharan mein rehne mein bhalaayee hai
Vaheen par shuru aur khatam har imtehaan hai

Baaki sab toh hai naatak is rangmanch par
Sabne apna abhinay nibhaana hai
Achche se kar lein hum sab apna har karam
Kyunki antt vela toh sabka hee aanaa hai

Tabb toh akele hee hum jaayenge
Koi rishtey naatey kaam nahin aayenge
Kitna sukhdaayee hoga veh pal
Agar Guruji Apni goad mein sulaayenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 12, 2019

Om Namaha Shivaya
Aaj Ka Suvichaar 🙏🏻🙏🏻 # 632

  Guru Nanak Ji Kee Saalgirah Par

Guru Nanak ji kee saalgirah par
Sabko bahut bahut badhaayee
Khushkismat hai saari sangat jo
Guruji aur Baba Nanak kee sharan mein aayee

Guruji ka divya abhamandal Sab bhakton ke jeevan mein prakash phailaaye
Guruji, aisee kripa keejiye
Ki sabke jeevan mein santushti ka akash samaaye

Akash kee aseemtaa ke jaise
Sabke dil mein santushti ka ho bhaav
Irshya na ho kisee ke dil mein
Har taraf chhaaya ho sadbhaav

Sab doojon ke liye sochein prem se
Aur apne karmon par dein dhyan
Chhal kapat mein barbaad na karein
Jo jeevan kiya hai Aapne daan

Shradha se grehen karein prasaad
Kyunki ismein hai Guruji ka ashirwaad
Usee ashirwaad ka aaye hamein swaad
Is prashaad ko khaane ke baad

Guruji kahein ki sunkar Guru Granth Sahib kee baani
Inkee shiksha se jeeyein hum apni zindagaani
Taaki yahee divya sukhdaayee gurbani
Bann jaaye tere mere jeevan kee kahaani

Aaj ke is shubh avsar par
Kyun na karein Guruji se yeh vaada
Ki hum shukrana mein jeeyenge
Chaahe hamaare paas kumm ho ya zyada

Shukrana rahega har pal dil mein
Toh jeevan ka safar kaatna ho jaayega aasaan
Hamaare liye toh har janam mein
Hamaare Guru hee Hain Bhagwaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 11, 2018

Om Namaha Shivaya
Aaj Ka Suvichaar 🙏🏻🙏🏻 # 266

 Prem Kee Jyot Jalaa Deejiye Guruji

Prem kee jyot jalaa deejiye Guruji
Jeevan ujjwal kardeejiye Aap
Jo bhi khaamiyaan hain mujhmein
Kripa kar duur unhe keejiye Aap

Dil mein jo bhi dard chhupaa hai
Usko marham deejiye Aap
Mai toh hoon deedaar kee pyaasi
Mujhko darshan deejiye Aap

Pyaar itna dete Hain Aap
Uspe toh mai vaari jaaoon
Aapki leela itnee nyaari
Sabko mai buss yahee sunaaoon

Aankhon mein buss Aap Hain bastey
Kisee aur dwaar ko mai dekhoon hee kyun
Hothon par hai naam Aapka
Kisee aur ko ab mai pukaaroon kyun

Bhakton kee naiya ko bachaakar
Laatey hain Aap kinaare par
Har pal humko raah dikhaatey
Phir kyun mujhko laagey darr?

Ab toh Guruji Aap hee Aap
Basey Hain mere kann kann mein
Aapne toh taqdeer sanvaar dee
Na jaane kaise ek hee kshan mein

Chodna nahin kabhi mera haath
Varna mai asahaay ho jaaoongi
Aapki kripa se toh mai Guruji
Har mushkil par fateh paaoongi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 11, 2019

Om Namaha Shivaya
Aaj Ka Suvichaar 🙏🏻🙏🏻 # 631

Kewal Mehsoos Karne Kee Der Hai

Jyot na bujhti hai kabhi pyaar ke diye kee
Zimmedaari uthaani padti hai sabko apne kiye kee
Lekin Guruji ka ashirwaad ho jahaan
Uddhaar hee uddhaar hai vahaan

Phir kyun rehte hain hum fikr mein
Kaisi hichkichaahat sachchaayee ke zikr mein
Duniya ko toh dhokha de sakte hain
Lekin Guruji se kuch bhi nahin chhupa sakte hain

Is adhyaatmik yaatra mein har din
Apne mein sudhaar laane ka prayatn karein hum
Achchee soch aur changey karmon ke dwaara
Mann ke bartan ko saaf karne ka yatna karein hum

Apne dil mein Guruji ke liye pyaar ka diya jalaayein
Apne naseeb ko Guruji kee divya shakti se chamkaayein
Guruji ke haath mein jo hai jeevan kee doar
Hamein zaroorat nahin jaane kee kaheen aur

Pyaar kee karein Guruji nirantar barsaat
Hamaari jholi mein sadaa hai Unka ashirwaad
Buss, kewal mehsoos karne kee der hai
Phir toh raat mein bhi saver hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 10, 2018

Om Namaha Shivaya
Aaj Ka Suvichaar 🙏🏻🙏🏻 # 265

                  Kalyaan Hamaara

Kshamaa yaachna kar lein
Hum apne burey karmon kee
Subudhi kee chhaaon mein aayein
Vikarmon kee agni mein na jal jaayein

Samay ka sadupyog karein hum
Mann ko simran mein lagaayein
Niswaarth bhaav ko jaagrit karein
Aur sewa mein lagg jaayein

Waqt toh paani ke budbudey ke jaise
Dekhte hee dekhte beet jaayega
Hum vaheen reh jaayenge
Aur waqt aagey nikal jaayega

Simran aur sewa se hee shaanti milegi
Varna mann bhataktaa reh jaayega
Simran aur sewa se hee shakti milegi
Taaki mann kasht aur peeda seh paayega

Antaraatma bahut shaktishaali hai
Phir kyun isey ksheen hum banaayein
Divyaswaroop hai yeh toh
Phir kyun hum isey moh maya mein phansaayein

Ab bhi samay hai Satsang mein dhyan lagaayein
Na hum vyarth kee baaton mein yoon hee samay ganvaayein
Guruji hamaare kalyaan ke liye hamein sewa simran ka paath padhayein
Veh kahein hum sarvsamarpan kar ke Satsang se jud jaayein

Guruji kee baat maan lene mein hee hai kalyaan hamaara
Guruji hee Hain hum sabka ekmaatra sahaara
Khud bhi jeeyein aur doosron ko bhi jeeney dein hum
Guruji se judne ka nirmal anand lein hum

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 10, 2019

Om Namaha Shivaya
Aaj Ka Suvichaar 🙏🏻🙏🏻 # 630

              Jeevan Kee Gaadi

Guruji kee banaayee jeevan kee gaadi mein
Vishwaas ka eendhan bharte chalo
Jaise jaise Ve ghumaayein pahiye
Is yaatra mein sayr karte chalo

Raaste mein jab kabhi bhi
Moad koi aayenge
Guruji chalaa rahein Hain gaadi
Ve hee moad par mudvaayenge

Ek pahiya sewa ka
Dooja pahiya hai simran
Teesra pahiya satsang hai
Aur chautha pahiya samarpan

Sab pahiyon ka mahatva hai
Saare hee anivaarya hain
Jeevan kee gaadi mein safar karte huey
Inhee se safal hotei sab kaarya hain

Kabhi kabhi toh safar hoga haseen
Aur lagega sab kuch aasaan
Lekin agar aisa na ho kabhi toh bhi niraash na hona
Kyunki saath mein hain Bhagwaan

Kashton ke pathar aayenge raaste par
Toh ho sakta hai gaadi ladkhadaayegi
Lekin pahiye aur eendhan salaamat hongei toh
Guruji kee kripa se gaadi aagey badh paayegi

Guruji kee banaayee is gaadi ke kann kann mein
Guruji ne baksha hai oorjaamayee shwaas
Ismein baithey ho toh jagaa lo dil mein
Shradha aur niswaarth prem ka ehsaas

Jeevan ke is ruhaani safar mein
Guruji karam katvaayenge
Ve hee maargdarshak Hain aur Ve hee sanchaalak
Tumhaari gaadi ko awashya manzil takk le jaayenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 9, 2018

Om Namaha Shivaya
Aaj Ka Suvichaar 🙏🏻🙏🏻 # 264

 Guruji Divya Gulaab Ka Phool Hain

Guruji divya gulaab ka phool Hain
Hum sab hain Unkee pankhudiyaan
Unse judey hain toh hum surakshit hain
Alagg hokar hamaara astitva kahaan

Guruji kee ruhaani khushboo
Hum mein bhi samaa jaati hai
Unke mulaayam spandan se
Hum mein bhi komaltaa aati hai

Apni har pankhudi ko Guruji
Apne prem se sanvaarte rehte Hain
Girne vaali pankhudiyon ko bhi
Bade sneh se taartey rehte Hain

Bichad gaye kabhi hum Unse
Toh hum bilkul murjhaa jaayenge
Unka pyaar na mila agar
Toh hum kaise jee paayenge

Isliye guzaarish hai Aapse Guruji
Ki Apne se jodey rakhna sadaa hamein
Aapne hee toh sikhaayee hai
Muskuraaney kee yeh adaa hamein

Zaroorat na hogi kisee aur sahaare kee
Agar Aapka pyaar milta rahega
Aapke ashirwaad se har pal
Hamaara ruhaani roop khilta rahega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 9, 2019

Om Namaha Shivaya
Aaj Ka Suvichaar 🙏🏻🙏🏻 # 629

    Guruji Ne Dhoond Liya Mujhko

Asha toot chuki thee
Ummeed chhoot chuki thee
Zamaane kee aandhi se ud gaye hosh
Lagaa jaise kismat ka hai dosh

Phir Guruji ne dhoond liya mujhko
Aur badi mamta se Apne aanchal mein sanjoyaa
Mainey Unke simran kee mala mein
Apni masoom bhakti ka moti pirohya

Kahaan se kahaan le jaayega yeh ruhaani safar
Mujhe toh bilkul bhi nahin hai khabar
Haan, yeh zaroor honei lagaa hai ehsaas
Ki Guruji ke sangg safar mein hai baat bahut khaas

Karmon ko katwaana kiya hai Unhonei shuru
Adhiktar bhaar uthaane lagey Hain mere Guru
Jo thoda bahut mujhe jhelna hota hai
Veh bhi Unkee nigraani mein hota hai

Isliye surakshit hoon har prakaar se
Guruji sambhaalte Hain bahut pyaar se
Har pal Guruji kee mujhpar hai nazar
Har pal Unkee Mamta ka ho raha hai asar

Unpar sab kuch chod dene mein hee bhalaayee hai
Ve toh parampita Hain, Unkee vaddi vadiyaayee hai
Guruji, kripa kar sewa, simran, aur satsang mein beet jaaye abb yeh zindagi
Dua hai Aapse ki mann ko shanti miltee rahe kar ke Aapki bandagi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 8, 2018

Om Namaha Shivaya
Aaj Ka Suvichaar 🙏🏻🙏🏻 # 263

      Duniya Ke Is Rangmanch Par

Kisee kisee ke naseeb mein
Agley din ka sooraj dekhna nahin hota
Isee pareshaani se kayee raatein
Uss insaan ka pariwaar nahin sota

Koi bhookh aur paise kee tadap mein
Daane daane ko taras jaata hai
Toh kisee kee kismat mein ann aur dhan
Baarish kee tarehn baras jaata hai

Khuda kee dee hui aankhein laajawaab hain
Lekin yahaan bhi toh karmon ka hisaab hai
Kisee badnaseeb ko nazar nahin aata
Toh koi aur jhooth fareb dekhne se nahin ghabraata

Duniya ke is rangmanch par
Aise udaaharan hain itne saare
Kaise sabka jeevan chal raha hai
Pichhle karmon ke sahaare

Beete huey karam jo huey so huey
Lekin aaj ke karam hain hamaare vash mein
Shaayad dil saaf aur neeyat sachchi ho
Toh na khaani padein hamein jhoothi kasmein

Bahut khushkismat hain hum sab
Jo Guruji kee sharan mein aayein hain
Unhee kee kripa aur karuna se
Hum ne saare sukh paaye hain

Ye saansein, ye shareer aur is shareer mein jaan
Ye sab hai Guruji ka diya hua vardaan
Shukrana karte chalein toh hee rahega
Zindagi ka yeh safar zyada aasaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 8, 2019

Om Namaha Shivaya
Aaj Ka Suvichaar 🙏🏻🙏🏻 # 628

Mann Mandir Ke Mahadev

Guruji hamaare har vichaar mein basey Hain
Ve hamein har pal rahein Hain dekh
Guruji hamaare iraade mein basey Hain
Toh phir aao apne iraade rakhein hum nek

Guruji basey Hain hamaare har karam mein
Isliye kyun na apna har karam ho achchaayee ka
Guruji hamaare dharam mein Hain
Toh aao hum tum dharam rakhein sachchaayee ka

Guruji aapsi pyaar mein Hain
Guruji sur mein aur sangeet mein Hain
Guruji insaaniyat ke riwaaz mein Hain
Guruji sachchaayee kee reet mein Hain

Guruji basey Hain shudh bhavna mein
Guruji basey Hain nek kaamna mein
Guruji basey Hain tere dil mein
Guruji basey Hain mere dil mein

Guruji neevenpan kee neev mein Hain
Guruji saraltaa mein Hain
Guruji shukraguzaar ke shukrana mein Hain
Guruji komalta aur taraltaa mein Hain

Guruji ka ashish har ann ke daane mein Hain
Guruji ka prem har bhakt ke gaane mein Hain
Devon ke bhi Dev Hain Guruji
Mann mandir ke MahaDev Hain Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 7, 2018

Om Namaha Shivaya
Aaj Ka Suvichaar 🙏🏻🙏🏻 # 262

           Guruji Ke Pyaar Ka Diya

Guruji ne liya hamein sharan mein
Mitaane hamaare jeevan ka andhkaar
Guruji se judte hee shuru hua
Hamaare liye diwali ka tyohaar

Guruji kehte hain ‘banda bann’
Phir kyun nahin maantey hain hum Unkee baat
Unkee agya ka paalan karne se hee toh
Khatam hogi yeh agyaan kee raat

Kuch bhi aur na chaahein Ve humse
Buss chaahein ki hamaare achche hon karam
Unke maargdarshan aur protsaahan se
Saral hai nibhaana sachchaayee ka dharam

Aaj is avsar par kyun na hum sab
Guruji kee ichchaa karein poori
Koshish toh kar hee sakte haina
Nek iraada hona hai zaroori

Guruji ke pyaar ka diya jalta rahei dil mein
Mit jaaye ahem ka andhera
Bhaasha samjhein sab pyaar kee
Uday ho ek shaant savera

Jhooth ka saath chod kar
Sachchaayee ka saath nibhaayein
Sabko aaj ke shubh avsar par
Dhed saari shubhkaamnaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 7, 2019

Om Namaha Shivaya
Aaj Ka Suvichaar 🙏🏻🙏🏻 # 627

MahaShiv Is Dharti Par Bashar Bann Kar Aaye

MahaShiv is dharti par bashar bann kar aaye
Pyaar se Ve Guruji kehlaaye
Saari sangat ka karte Hain uddhaar
Sabke Hain Ve paalanhaar

Jab Guruji maanav chole mein thei
Toh aksar sangat se thei kehte
Pehle vi Mai, hun vi Mai, aggey vi Mai
Aaj bhi Ve hee Apni gaddi par Hain baithte

Mahasamadhi lekar Ve huey sarvshaktimaan
Guruji sadaa Hain sarv-vyaapi sarvgyani Bhagwaan
Chaahe dhokha khaa le kisee se saara jahaan
Guruji toh sabko lete Hain pehchaan

Guruji kahein na karein hum sab koi bhi ahem
Guruji kahein na karein hum sab koi bhi vehem
Har shishya ka Guruji ke sangg rishta hai nijee aur seedha
Har bhakt ko sikhaane ka Guruji ka hai alagg alagg tareeka

Jo Guruji kehte Hain kisee ek sangat se
Veh baat usee bhakt par laaghoo hai hoti
Uss baat par amal karne ke liye sabko kehna
Veh sahi salaah nahin hai hoti

Har tarehn ka bhojan prashad hai
Agar shudh hai bhavna
Guruji toh buss dekhein bhakt ka bhaav
Aur parkhein uskee sadhna

Guruji kahein ki bhakt aslee cheez par dhyan dein
Guruji se jud kar bandhan-rahit ruhaani gyan lein
Saansaarik haan aur ‘na kee zanjeeron se mukt hon
Guruji kee sadhna aur satya ke sangg se tript hon

Guruji ka har bhakt ke sangg vyaktigat naata
Yahee toh hai is pavitra rishtey mein khoobsoorati laata
Har insaan aur uska kasht alagg aur anokha hai
Andhvishwaas se sabka ek jaisa ilaaj karne se Guruji ne roka hai

Isliye kisee sandeshvaahak kee zaroorat nahin
Har ghadi shubh hai, chaahiye koi mahoorat nahin
Buss, chaahiye toh prem, shradha, aur vishwaas
Aur Guruji mein leen ho jaaye shwaas

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 6, 2018

Om Namaha Shivaya
Aaj Ka Suvichaar 🙏🏻🙏🏻 # 261

Guruji Kee Bhakti Mein Hai Aseem Shakti

Koi bhi kasht asaadhya nahin hai tere liye
Phir kyun is gehre sach se hai tu anjaan Guruji ne haath thaama hai tera
Tere sangharsh ka hoga uttam anjaam

Agar raah par tujhe kaante chubhne lagenge
Guruji mamta ke phool bichhaa denge vahaan
Guruji tujhe taar denge aise
Ki dekhta reh jaayega yeh jahaan

Kaam chhota ho ya bada
Rakhna tu apni neeyat sahee
Guruji tere mata aur pita hain
Teri raksha karenge Vahee

Guru kripa se tere kasht taltey jaayenge
Kyunki Guruji swayam tere sangg chalte jaayenge
Dekhna, jald hee sukh ke din bhi aayenge
Tere kashton ka adhiktar bhaar Guruji khud uthaayenge

Guruji kee kripa se kar tu Guruji kee bhakti
Guruji kee bhakti mein hai aseem shakti
Guruji har pal Hain tere murshid aur madadgaar
Guruji Hain rakshak aur Guruji hee Hain parwardigaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 6, 2019

Om Namaha Shivaya
Aaj Ka Suvichaar 🙏🏻🙏🏻 # 626

Ye Pal Bhi Guzar Jaayenge

Chaahe duniya mein teri parvaah kisee ko na ho
Guruji ko teri fikr hai
Chaahe kisee ke dil mein tere liye jageh na ho
Guruji kee har saans mein tera zikr hai

Teri har kamzori ko aur har taakat ko
Guruji se zyada koi nahin pehchaanta
Tere dil mein kya hai
Yeh Unse zyada koi nahin jaanta

Jab chot lagti hai tujhe
Toh tujhse zyada dard Guruji ko hai hota
Tera har gumm Guruji jaante Hain
Chaahe veh bada ho ya ho chhota

Dukhi na ho tu, pareshaan na ho
Duniya kee baaton se hairaan na ho
Kalyuga hai, isliye ye sab toh hai hona
Phir kyun is sabki vajeh se hai apna santulan khona

Dheeraj rakh, tere kaaraj sanvar jaayenge
Haalaat tere sudhar jaayenge
Aaye hain jo imtehaan ke pal
Toh Guruji kee mehar se ye pal bhi guzar jaayenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja