Author: dhirjabhat

November 25, 2018

Om Namaha Shivaya
Aaj Ka Suvichaar 🙏🏻🙏🏻 # 280

    Kar De Jeevan Guruji Ke Havaale

Aye raaste par chalte musaafir
Kyun tu dheeraj kho raha hai
Guruji ne charnon mein dee hai jageh
Phir bhi tu kyun ro raha hai

Guruji tere kasht harenge
Tera beda paar karenge
Tere saare dukh le lenge
Tujhko mann kee shaanti denge

Guruji tere saath chalenge
Tere sooraj chaand banenge
Tere kayee khwaab sach karenge
Teri jholi khushiyon se bharenge

Guruji jaisa aur koi nahin
Sach mein is saari srishti mein
Lajawaab kalyaanmayi leela hai
Guruji kee divya drishti mein

Guruji kee vadiyaayi se hee
Tera hoga kalyaan
Guru naam kee kamaayee se hee
Tu hoga dhanwaan

Ab bhi der nahin hui hai
Kar de jeevan Guruji ke havaale
Guruji kee kripa ke kalam se tu
Apni niyati dobaara likhwaale

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 25, 2019

Om Namaha Shivaya
Aaj Ka Suvichaar 🙏🏻🙏🏻 # 645

Guruji Kee Sadhna Mein Leen Ho Jaayein

Paani chaahe jharne mein ho ya nadiya mein
Phool chaahe veeraane mein ho ya bagiya mein
Inka mool charitra toh paani aur phool ka hai
Fark sirf inke oopar padi paristhiti roopi dhool ka hai

Paani jabb chattaan se takraata hai
Toh lagta hai jaise kar raha ho aakramann
Lekin jheel kee sehmee hui sheetaltaa mein
Isee paani ka shant ho jaata hai mann

Mitti ismein padti hai jabb
Toh paani ke saanchepan mein ho jaati hai milaavat
Aise jaise kisee oopari prabhaav se
Paani ke sangg hui ho bagaavat

Phoolon kee kahaani bhi kuch is kadar hai
Inpar padta baag aur maali ka asar hai
Vaayu aur vaataavaran ka inpar padta hai prabhaav
Jis se inko mehsoos hota hai paalan poshan mein abhaav

Yahee hum insaanon kee bhi kahaani hai
Paristhitiyon ka hum par itna asar padta hai
Jahaan sukh aur neevanpann ho vahaan sab changa hai
Varna toh insaan kya kya nahin karta hai

Tabhi toh itna zaroori hai atma-bal
Taaki paristhiti hamaara charitra na bigaad paaye
Aao, Guruji kee sadhna mein leen hon jaayein
Taaki hum mein se har koi apna atma-bal sanvaar paaye

Guruji toh hamaari sahaayata karna chaahte Hain
Hum hee hain jo Unkee baat nahin maantey
Hum toh aane waale kal se bekhabar hain
Lekin Ve toh sab kuch Hain jaantey

Guruji ko samarpan kar ke aao karein Unkee sadhna
Bahut sukhdayee aur mangalkaari hai Guruji kee aradhana
Iske karne se atma roopi paani aur phool par aanch na padne paaye
Sach hai bilkul yeh vachan ki ‘Guruji sadaa sahaay’

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 24, 2018

Om Namaha Shivaya
Aaj Ka Suvichaar 🙏🏻🙏🏻 # 279

       Aapse Hee Atma Mein Shakti

Guruji, Aapke sab bhakton par
Hoti hai Aapki meharbaani
Tabhi toh Aapki saari sangat
Hai Aapki itnee deewaani

Aapki sharan mein aakar
Hamaare paap dhulne lagte hain
Aap bhakton ka dhyan rakhte huey
Kabhi bhi nahin thakte hain

Hum se hoti hain galatiyan hazaar
Aap maaf kar dete hain kayee baar
Yeh maafi toh hai anmol uphaar
Kripa kar hamein deejiye taar

Phir bhi kayee karmon ka phal
Hamein bhugatnaa padta hai
Yeh dekh kar hum par Aapka pyaar
Sach mein aur bhi badhtaa hai

Aapke aashirwaad se mil jaaye subuddhi hum ko
Aapke sneh kee shakti se hum bhool jaayein har gumm ko
Aapse hamaari yeh vinamra arzi hai
Aagey phir jaise Aapki marzi hai

Aapka hukm sir aankhon par ho hamaare
Aapki mamta kee bhaasha ke hum samajh lein ishaare
Aapse hee jeevan mein prem hai, Aapse hee mann mein bhakti
Aapse hee chehre par noor hai, Aapse hee atma mein shakti

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 24, 2019

Om Namaha Shivaya
Aaj Ka Suvichaar 🙏🏻🙏🏻 # 644

Shukrana Aur Vishwaas Ka Naata

Shukrana aur vishwaas ka naata
Sach mein hai bahut hee sundar
Shukrana aur vishwaas se yakeenan
Paawan hota hai mann ka mandir

Aisa anandmayee hai in dono ka naata
Ki ek ko karne se dooja bhi badh jaata
Azmaana hai toh dekh lo azmaakar
Guruji toh thakk gaye yeh samjhaakar

Guruji par karo atoot bharosa
Aur apne bharose par tum rakho vishwaas
Zindagi ke raaste par chalte chalo
Shukrana se seench kar har shwaas

Raaste ke kaante thoda kumm chubhenge
Mushkilein jhelne kee milegi shakti
Himmat aur protsaahan badhaa rahega
Apne prayaas aur parishram se milegi tripti

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 23, 2018

Om Namaha Shivaya
Aaj Ka Suvichaar 🙏🏻🙏🏻 # 278

     Meri Bigdee Taqdeer Bann Gayee

Guruji ko pyaar se yaad kiya
Dil mein Unkee tasveer bann gayee
Guruji ne har pal saath diya
Meri bigdee taqdeer bann gayee

Guruji ne sir par haath jo rakha
Mujh par aashirwaad kee baarish hui
Mera haath na kabhi bhi chodna
Unse phir meri yeh guzaarish hui

Guruji kee divya khushboo jabb aayee
Toh ghar ka har kona mehekne lagaa
Mera mann tabb khushi ke maare
Chidiya kee bhaanti chehekne lagaa

Guruji kee adbhut aur divya chhavi
Mere mann mein samaayee rehti hai
Unkee bhakti se milti hai shakti
Jo ragg ragg mein abb behti hai

Abb toh yahee ullaas aur utsah
Bann gaya hai jeevan ka hissa
Guruji kee meharbaani se sulajh gaya
Meri zindagi ka kissa

Arzoo hai Guruji se
Ke har din Unke naam se hee shuru ho
Khushkismat hai har insaan
Jiske naseeb mein Guru ho

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 23, 2019

Om Namaha Shivaya
Aaj Ka Suvichaar 🙏🏻🙏🏻 # 643

         Yeh Kalyuga Ka Samaa

Bada hee zaalim hai yeh kalyuga ka samaa
Tarehn tarehn ke aakarshan hotei hain yahaan
Oopari taareef karne wale le jaayenge tumhe saatvein aasmaan par
Gaur kar raha hai har koi kisee na kisee laukik armaan par

Idhar udhar dhyan agar dete jaaoge
Toh antt mein khali haath reh jaaoge
Lekin agar Guruji par dhyan kendrit rakhoge
Toh Guruji se Guruji ko tum paaoge

Guruji tabhi toh kehte Hain
Ki Unse judne mein lagan lagaao
Duniya ka tamaasha toh chalta rahega
Guruji mein hee tum magan ho jaao

Faisla tumhaare haath mein hai
Amrit paana hai ya daldal mein hai phansna
Yeh nirnay bhi tumhaara hee hai
Ki tum chaahte ho antt mein rona ya hansnaa

Isey bheed mein gumm jaane kee na tum banaao dastaan
Yeh Guruji ke sangg chalne ka safar hai suhaana
Isey shradha, prem, aur vishwaas ke phoolon se mehkaao
Aur bator lo Guru naam ka khazaana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 22, 2018

Om Namaha Shivaya
Aaj Ka Suvichaar 🙏🏻🙏🏻 # 277

    Zindagi Ke Har Pal Ka Shukrana

Hum bhakton par Aapke hain anginat ehsaan
Sach mein, Guruji, Aap Hain itne meharbaan
Detey Hain Aap mata pita ka dulaar
Detey Hain Aap bhai bandhu ka pyaar

Janmadaata bann ne ka shukrana
Annadaata bann ne ka shukrana
Is shareer ka shukrana
Is taqdeer ka shukrana

Hamaare kasht harne ka shukrana
Jholiyaan bharne ka shukrana
Galatiyaan maaf karne ka shukrana
Hamaara dil saaf karne ka shukrana

Sooraj, chaand, dharti, aakash ka shukrana
Andhere mein prakash ka shukrana
Jo jo bhi diya, uska shukrana
Jo nahin bhi diya, uska shukrana

Sewa karvaane ka shukrana
Satsang mein bulaane ka shukrana
Simran ka paath padhaane ka shukrana
Apne galey se lagaane ka shukrana

Raah dikhaane ka shukrana
Jeena sikhaane ka shukrana
Manzil takk pahunchaane ka shukrana
Vaada nibhaane ka shukrana

Har aas ka shukrana
Har ardaas ka shukrana
Har ehsaas ka shukrana
Har shwaas ka shukrana

Guzre huey kal ka shukrana
Aaney waale kal ka shukrana
Jeevan kee halchal ka shukrana
Zindagi ke har pal ka shukrana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 22, 2019

Om Namaha Shivaya
Aaj Ka Suvichaar 🙏🏻🙏🏻 # 642

Na Koi Rasam, Na Koi Reet

Na koi rasam, na koi reet
Kewal bhakton ke sangg sanchi preet
Guruji kee mamta ke aanchal mein raho
Ve naath Hain, Unse dil kee baat kaho

Na koi shart, na koi mannat
Guruji dharti par dikhaate Hain jannat
Unkee leela par rakho vishwaas
Unse bejhijhak karo tum ardaas

Na koi vehem, na koi ahem
Na karo tum chinta na jaana tum sehem
Guruji ke ashirwaad se utsaahit raho
Unke prem se protsaahit raho

Na badi badi baatein, na koi pravachan
Buss Guruji ke seedhe saral vachan
Guruji Hain taral, komal, aur nirmal
Unke pyaar kee chhaaon hai ati-sheetal

Na koi pratibandh, na koi upvaas
Buss, shradha, saboori, samarpan, aur vishwaas
Ve rakhein jis bhi haal mein
Tum na uljho kisee sawaal mein

Na koi pratinidhi, na koi doot
Buss, Guruji sangg taar jodo atoot
Unke sangg rishta jod lo khaas
Phir na rahegi aur kisee rishtey kee aas

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 21, 2018

Om Namaha Shivaya
Aaj Ka Suvichaar 🙏🏻🙏🏻 # 276

  Aur Hum Aapse Kya Kahein Guruji 

Kaash hamaari buddhi kee ho jaaye shuddhi
Aur hum Aapse maangein simran ka gehna
Apne aap hee aayegi riddhi aur siddhi
Na padega Aapse kuch bhi aur kehna

Na laukik maang, na sauda, na koi chaah
Buss hamein dikha deejiye jeene kee raah
Apni sharan mein hamein jageh deejiye
Apne charnon ka amrit peene deejiye

Banaa deejiye hamein neevan
Apna kartavya karne se na hichkichaayein
Satya ke raaste par sadaa chalein hum
Hamaare kadam kabhi bhi na dagmagaayein

Achche insaan hum sab bann sakein
Aapko yaad karte huey kabhi na thakein
Aapki mahima ka gungaan karte rahein hum
Aapki mamta ke sahaare har kasht sahein hum

Aap Hain hum sab ke Bhagwan
Aapke dhyan mein rahein hum magan
Hameshaan achche hon hamaare karam
Achchaayee ko banaa lein hum apna dharam

Kripa kar hum sabko taar deejiye
Naath Hain Aap, sabke kashton ka bhaar leejiye
Aapki karuna aur divya drishti
Is-se zaroor sanvar jaayegi sampoorna srishti

Aur hum Aapse kya kahein Guruji
Aap hamaare angg sangg rahein Guruji
Aap toh Hain sabke paalanhaar Guruji
Aapse hee hoga hamaara udhdhaar Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 21, 2019

Om Namaha Shivaya
Aaj Ka Suvichaar 🙏🏻🙏🏻 # 641

     Tere Jeevan Ka Raasta

Tere liye tere jeevan ka raasta
Tayyaar kiya hai Guruji ne
Uss raaste par chalne ka saahas
Tujhe diya hai Guruji ne

Kya hai Guruji kee yojna
Ye toh kewal Guruji hee jaante Hain
Samay aane par tujhe bhi Ve bataayenge
Tujhe tere dhairya ka nateeja dikhaayenge

Isliye shradha ko rakh barkaraar
Aur buss dekh tu waqt kee raftaar
Dheeraj se kar intazaar
Guruji kee leela dekhne ke liye reh tayyaar

Guruji kee mahima par rakhte huey vishwaas
Samarpan kar de Unhe tu apni har shwaas
Teri niyati ko sunehre aksharon mein likh denge dobara
Guruji ke aagaman se dhanya hoga tere mann mandir ka dwara

Raaste khud bakhud khul jaayenge
Tere kayee janmon ke paap dhul jaayenge
Bebasi kee bhavna dil se jaane lagegi
Manzil saaf nazar tujhe aane lagegi

Chalte jaana tu Guruji ka naam lekar
Ve hee manzil par pahunchaayenge
Yahaan takk lekar aaye Hain
Toh vahaan takk bhi awashya le jaayenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 20, 2018

Om Namaha Shivaya
Aaj Ka Suvichaar 🙏🏻🙏🏻 # 275

  Guru Naam Ka Dhan Kamaa Le

Gehri neend mein insaan hai so raha
Maya hee satya hai, soch vo raha
Apne antim pal mein veh jaanega
Ki simran hee ek satya hai, jo veh kho raha

Uth jaag musaafir nidra se
Aur sudhaar le apna jeevan
Simran ke zariye tu shaant kar le
Abb apna bechayn mann

Guruji takk pahunchne ka
Simran hee hai raasta
Simran karna matt bhool tu
Tujhe hai Khuda ka vaasta

Simran kee raah par chal kar hee
Tu Guru milan kee manzil ko paayega
Guru naam ke simran se hee
Tera mann shaant ho paayega

Abb kya soch raha hai tu
Abb aur samay na ganvaa
Buss simran mein leen hokar
Guru naam ka dhan kamaa

Khokli baaton se tu kuch nahin paayega
Inse apne dil mein ashaanti laayega
Tere karmon ka anjaam tujhe
Ek din toh zaroor nazar aayega

Sab yaheen ka yaheen reh jaayega
Jabb tera aakhiri samay aayega
Uss kshan mein keval Guru naam hee
Teri vidaayee ko aasaan banaayega

Jeevan ka ek bhi pal
Kabhi laut kar na aayega
Guru naam ka dhan kamaa le
Varna antt vele pachchtaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 20, 2019

Om Namaha Shivaya
Aaj Ka Suvichaar 🙏🏻🙏🏻 # 640

          Jitna Jiske Hissey Mein

Har uljhan kee suljhan mil jaayegi
Har moad par ummeed kee kalee khil jaayegi
Raahon ke shool bann jaayenge phool
Meharbaan hoga MahaShiv ka trishul

Hamein toh buss rakhna hai vishwaas
Apne Guruji Apne Bhagwaan par
Ve toh karuna barsaate Hain
Hameshaan har insaan par

Ve toh jaagte Hain raat bhar
Taaki hum chayn se so jaayein
Ve toh hamaare ho liye Hain
Buss hum bhi Unhee ke ho jaayein

Guruji, hum hameshaan ke liye buss Aap mein ramm jaayein
Aisee subuddhi aur shradha hamein bakshiye
Ab jo sweekaara hai Aapne Guruji
Sadaa ke liye Apne charnon mein rehne deejiye

Jitna jiske hissey mein hai likha, utna har shaqs ne hai paana
Jaisa bhi ho, jitna bhi ho, changaa laagey hamein Aapka bhaana
Chaahe ho bhandaar daulat ke chaahe kismat mein ho ek daana
Buss hamaare dil mein aur labhon par ho sadaa sadaa Shukrana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 19, 2018

Om Namaha Shivaya
Aaj Ka Suvichaar 🙏🏻🙏🏻 # 274

Guruji Ne Na Kabhi Hamein Thukrana

Chal raha yeh sansaar hai
Subah se lekar shaam takk
Is kalyuga ke chakravyu mein
Hai raha insaan thakk

Bhagwaan ka naam hai bhool raha
Simran ka kaam hai bhool raha
Phoolon mein bann hai shool raha
Atma par chadhaa dhool raha

Laukik padaarthon kee hai daud
Mann hai moh maya kee oar
Kamzor ho rahi hai sachchaayee kee doar
Na jaane kab aayegi satyuga kee bhor

Guruji ne bachaa kar rakhaa hai hamein
Anginat kashton ke jaal se
Lekin hum itne naashukr hain
Khush na rehte apne haal se

Bahut meharbaani hai Guruji kee
Apne sab bhakton par har pal
Humko yeh samajhnaa hee hoga
Aaj nahin toh kal

Guruji kee suraksha mein na hotei toh
Naa jaane abb takk kya ho jaata
Hamaara dheeraj aur maansik santulann
Sach mein bilkul kho jaata

Guruji kee is kripa ka
Jitna bhi karein shukrana
Veh kumm hai
Kyunki Unkee kripa hai anmol khazaana

Buss Unke bataaye huey raaste par chalein
Na bhatkein na dagmagaayein
Arzi karein Guruji se kee Unki meher ke diye
Sadaa sabki zindagi mein jagmagaayein

Chinta chod ke karein hum chintan
Uss Parampita Parmeshwar ka
Jinhonei maanav roop dhaaran kiya
Jab ki Unka astitva hai Ishwar ka

Duniya chaahe dhokha deti rahey
Guruji ne na kabhi hamein thukraana
Har pal, har din, aur har haal mein
Karte rahein hum Unka shukrana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 19, 2019

Om Namaha Shivaya
Aaj Ka Suvichaar 🙏🏻🙏🏻 # 639

    Atoot Vishwaas Karne Kee Adaa

Neembu kee tarehn nichodenge Guruji
Parantu kabhi tujhe akela na chodenge Guruji
Kabhi tujhse muh na modenge Guruji
Tere tootey dil ko ik din jodenge Guruji

Unke ruhaani taruar ka tu patta hai
Tujhe iske sabb raaz na samajh mein aayenge
Jabb Guruji ped ko hilaayenge zoar se
Toh bahut se patte jhadd kar gir jaayenge

Kuch patte daaliyon se judey reh jaayenge
Ve Guruji ke sachche bhakt kehlaayenge
Kalyuga kee aandhi mein Ve na tootenge
Guru prem ke dhaage na kabhi unse chhootengey

Kyun na hum sab koshish karein
Ki hum ve patte bann jaayein
Guruji ke sangg jo safar shuru hua hai
Uss safar mein hum na dagmagaayein

Jeevan safal ho jaayega hamaara
Sehen kar sakenge mushkilein sehej swabhaav se
Guruji bhi prassann hongei
Hum bhakton ke aise bhaav se

Guruji kee kripa toh banee rahegi
Apne saare bhakton par sadaa
Kyun na hum bhi seekh lein
Atoot vishwaas karne kee adaa

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 18, 2018

Om Namaha Shivaya
Aaj Ka Suvichaar 🙏🏻🙏🏻 # 273

                  Guruji Ka Dwaar

Guru amrit ke ashish mein
Aisa divya jaadoo hai
Jo hamaari atma ko aakarshit kar ke
Karta uspar kaaboo hai

Guru naam ka paawan amrit
Jo shradha aur prem se peeta hai
Chaahe aayein uspar mushkilein hazaar
Veh shukrana mein jeeta hai

Guruji ke aseem pyaar mein
Hai aisee adbhut shakti
Is pyaar ko paakar badh jaati hai
Bhakton kee Guru bhakti

Niraasha ke udaas kshanon mein
Guru naam kee jyot jab jalti hai
Dil mein asha ka sooryodaya hota hai
Gumm kee shaam zaroor dhaltee hai

Aisa tejomayi ujaala hai
Guruji kee sharan mein
Ki swarg ka nazaara dikh jaata hai
Unke paawan charan mein

Poorey Brahmaand mein aur kaheen nahin
Milta aisa niswaarth pyaar hai
Jahaan milta yeh beshumaar hai
Veh buss Guruji ka dwaar hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 18, 2019

Om Namaha Shivaya
Aaj Ka Suvichaar 🙏🏻🙏🏻 # 638

Chal Raha Thaa Bekhabar

Chal raha thaa bekhabar
Bin huey pareshaan
Kaat raha thaa veh safar
Bin huey hairaan

Na ho raha thaa usey asar
Zindagi kee sanjeedgi ka
Kyunki veh toh thaa deewana
Guruji kee bandagi ka

Guruji par usey thaa itna atoot vishwaas
Ki chaahe aur koi nahin thaa uske paas
Veh kismat se rootha nahin
Uska bharosa toota nahin

Guruji ka naam leta hua musaafir chalta raha
Jaise jaise waqt beeta sooraj dhalta raha
Lekin asha ka sooraj uske dil mein ujala kiye huey thaa
Guruji ka diya atma-bal usey himmat diye huey thaa

Thakaan mehsoos hui toh usne Guruji ko hee yaad kiya
Guruji ne yeh dekh kar musaafir ko ashirwaad diya
Jin haseen sapnon ne uska dil thaa aabaad kiya
Musaafir ne unn sapnon ke liye Guruji ko dhanyawaad kiya

Kalyaankaari sapne huey poore Guruji kee mehar se
Raat ke baad mulaakaat hui safaltaa kee seher se
Musaafir ne Guruji ko shukriya karte huey manzil par rakha kadam
Guruji ne uspar rehem kar ke kaat diye uske saare karam

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 17, 2018

Om Namaha Shivaya
Aaj Ka Suvichaar 🙏🏻🙏🏻 # 272

  Jabb Guru Milan Kee Poori Ho Aas

Dil mein ho Guruji ka dhyan
Rasna se ho Unka gungaan
Mil jaaye jo Guruji ka gyan
Toh hum ho jaayein dhanwaan

Har pal Guruji se baat ho
Har savera suprabhaat ho
Har nisha chaandni raat ho
Guruji jab saath hon

Shor bhi laagey madhur sangeet
Haar mein bhi ho hamaari jeet
Preet se hee ho jaaye preet
Guruji jo bann jaayein meet

Dukh sehna ho jaaye aasaan
Ghaav se na padein dil pe nishaan
Guruji toh Hain hamaare Bhagwaan
Unhe maalum hai hamaari daastaan

Yeh mithya yeh maya hai bekaar
Is se andhaa ho gaya hai sansaar
Hum pehen lein Guru simran ka haar
Guruji jo Hain hamaare paalanhaar

Karein hum achchaa bann ne ka prayaas
Dil mein jagaayein atma vishwaas
Abb toh tarr jaaye har shwaas
Jab Guru milan kee poori ho aas

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 17, 2019

Om Namaha Shivaya
Aaj Ka Suvichaar 🙏🏻🙏🏻 # 637

                   Raat Ka Andhera

Raat ka andhera
Uskey baad aaney wala savera
Keh raha hai kuch
Dhyan se tu sunn

Guruji ka ishaara
Unka divya nazaara
Keh raha hai kuch
Dhyan se tu sunn

Keh raha yeh ishaara
Keh raha hai yeh divya nazaara
Ki tu na bhatak bann kar awaara
Tu le le Guruji ka sahaara

Yeh ishaara keh raha hai
Ki itna waqt jo baha hai
Usmein toone bahut kuch saha hai
Aur kisee se kuch nahin kaha hai

Isliye abb aur na intazaar kar
Aa Guruji se izhaar kar
Beshaq tu baar baar kar
Abb na tu inkaar kar

Sunenge tere mann kee baat Guruji
Samjhenge tere jasbaat Guruji
Hameshaan sahi raah dikhaayenge
Aur uspar chalna bhi sikhaayenge

Dhyan de Unke nirdesh par
Tu chal le Unke aadesh par
Vishwaas kar Unke seedhe sandesh par
Apne mann mandir mein tu pravesh kar

Tere mann mandir mein hai Guruji ka basera
Jeevan dhanya hua hai tera
Keh raha hai tujhse raat ka andhera
Aur uske baad aaney wala savera

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 16, 2018

Om Namaha Shivaya
Aaj Ka Suvichaar 🙏🏻🙏🏻 # 271

Jabb Guruji Ne Hamein Liya Sharan Mein

Aaj kee baat nahin hai ye
Ye baat hai janmon puraani
Jabb Guruji ne hamein liya sharan mein
Aur badal dee hamaari zindagaani

Hamaari niyati ko likha dobaara
Hamein har janam mein diya sahara
Jeevan kee kashti ko dikhaaya kinaara
Saath na choda kabhi bhi hamaara

Aise maukey bhi aaye zindagi mein
Jab hua nahin Unkee maujoodgee ka ehsaas
Lekin Guruji toh mata pita hain hamaare
Ve toh tabb bhi thei hamaare bilkul paas

Har ghadi Unhe hoti hai fikr hamaari
Ek pal bhi na chodein hamaara haath
Hamaara saaya bhi agar naaraaz ho hum se
Guruji toh tabb bhi nibhaayein saath

Hum chaahe bewafaai karein Unse
Phir bhi Unse sab kuch lete hain
Ve toh sach mein naath Hain hamaare
Vafaa aur niswaarth pyaar hamein dete Hain

Toh kya hua agar kabhi kabhi
Guruji hamein sabak sikhaate Hain
Mata bann kar hamaari Ve hamein
Is tarehn se mamta dikhaate Hain

Unpar atoot vishwaas rakhna
Agar bann jaaye dharam hamaara
Toh Unka chintan karte karte
Sanvar jaaye har karam hamaara

Guruji hameshaan hamaari suntey Hain
Unhe keh sakte hum apne dil kee baat
Guruji ke charnon mein jageh milee hai
Yeh sach mein hai sabse anmol saugat

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 16, 2019

Om Namaha Shivaya
Aaj Ka Suvichaar 🙏🏻🙏🏻 # 636

              Khushi Aur Shukrana

Jaisi bhi dil kee dashaa hai
Khushi toh swaabhavik manodashaa hai
Jis insaan ko khushi ka nashaa hai
Uss insaan ke dil mein yeh nashaa basaa hai

Khushi toh dil ka veh bhaav hai
Jis se bhar jaata har ghaav hai
Kisee pe bhi nahin dabaav hai
Lekin sabko hee khushi ka chaav hai

Guruji kehte Hain hum bhakton se
Ki hamaara khush rehna zaroori hai
Khushi ke liye shukrana aur shukrana kar ke khush hona
In dono kee bahut hee badhiya jodi hai

Dono ek dooje par nirbhar hain
Dono se sakaaratmakta aati hai zindagi mein
Shukrana aur khushi dono ke mail-milaap se
Aur bhi anand aata hai Guruji kee bandagi mein

Guruji Hain na sab sambhaalne ke liye
Phir kaahe kee pareshaani
Khush aur shukrguzaar rehne mein
Samajhdaari hai, na ki naadaani

Maanav jeevan mila hai hamein
Khushkismati hai hamaari
Shukrana karne se aur khush rehne se
Karein karmic bojh ko kumm karne kee tayyaari

Khush rehkar Guruji ka Shukrana karne mein
Aayiye, na chodein hum koi bhi kasar
Aisa karne se sukh chayn se tayy hoga
Hamaare jeevan ka yeh ruhaani safar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja