Author: dhirjabhat

October 26, 2018

Om Namaha Shivaya
Aaj Ka Suvichaar 🙏🏻🙏🏻 # 250

       Pyaar Hamaare Guruji Ka

Bahut hee pyaara hai pyaar hamaare Guruji ka
Dayaa se bharpoor hai dulaar Unka
Har galee har ghar har sheher mein
Naam goonjta hai baar baar Unka

Unkee kripa ke charchey
Duur duur takk hotey hain
Unke bharose hee toh bhakt
Chayn kee neend sotey hain

Kisee ko bakshtey Hain Ve zindagi
Kisee ko aarogyataa ka vardaan dete Hain
Samajhdaar aur agyakari hain ve loag
Jo Guruji kee baat maan lete hain

Zindagi baksh dete Hain Ve
Kayee janmon ke liye dete Hain taar
Nazariya badal dete Hain hamaara
Taaki hum sudhaar sakein apne vichaar

Nirogi kaaya ke pashchyaat
Aati hai baari laukik dhan kee
Guruji se kuch kehne kee zaroorat nahin
Kyunki Ve baat jaantey Hain mann kee

Hum gandey bartan ke jaise hain
Guruji hamein chamkaayein
Pehle bheetar se hamein saaf karein
Phir oopar kee mayl hataayein

Guruji chaahte Hain ki hum apni ‘mai’ ko mitaayein
Chalein hum uss raaste par jo Ve hamein dikhaayein
Vehem aur paakhand se duur rahein hum yeh Guruji hamein sikhaayein
Phir kyun hum apne Guru ke liye itna bhi na kar paayein?

Duniya kee tu-tu mai-mai se
Hum apne aap ko bachaayein
Guruji ke dikhaaye maarg par chal kar
Aao, dharti par swarg banaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 26, 2019

Om Namaha Shivaya
Aaj Ka Suvichaar 🙏🏻🙏🏻 # 615

           Aslee Aur Anmol Dhan

Guruji bakshein zindagi
Phir karein kaaya aur mann ko nirogi
Laukik dhan kee baari baad mein aaye
Samriddhi aur kushaltaa Guru kripa se hogi

Guruji se judkar yeh sab milega
Saath hee bhugtaan hoga karmon ka
Mann ko sadhna se milegi shanti
Bhar halka hoga kayee janmon ka

Mann kee shanti hai
Aslee aur sabse anmol dhan
Isee se haraa-bharaa hota hai
Sabke jeevan ka upvan

Mann kee shanti se hee miley
Atma- bal aur atma-vishwaas
Is shanti ko paane ke liye
Guru naam se seench le tu shwaas

Karta chal tu shradha se
Guruji ka vandan
Mehka le apne jeevan ko
Jaise mehke chandan

Is mehek se tujhe hota rahega
Guruji kee maujoodagi ka ehsaas
Aur Unke naam se jo shanti milegi
Uss-se aur bhi dridh hoga Unpar tera vishwaas

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 25, 2018

Om Namaha Shivaya
Aaj Ka Suvichaar 🙏🏻🙏🏻 # 249

     Guruji Ko Tu Kar Baarambaar Namaskar

Guruji Om aur Onkar Hain
Ve suntey sabki pukaar Hain
Guruji dil mein basaa hua veh pyaar Hain
Jisne jeet liya saara sansaar hai

Guruji kee sharan mein shanti hai itnee
Unke noor mein kanti hai itnee
Guruji hakeekat Hain, koi sapna nahin
Unke siwa jagg mein koi bhi apna nahin

Guruji ne diya bhakton ko divya gyaan Hai
Poora karein Ve, jo bhi tere dil mein armaan hai
Guruji yaad dilaatey Hain ki maangna nahin
Andhvishwaas se tu swayam ko baandhna nahin

Guruji kahein tu karde Unko sab samarpan
Mushkil ka hal Ve nikaalenge, tu kar de sab kuch Unhe arpan
Guruji MahaShiv Hain, isme na hai koi shaq
Tujhe yakeenan dilaayenge Ve tere saare haq

Guruji basey Hain har bhakt ke shwaas mein
Lagaa reh tu Unhe khush karne ke prayaas mein
Guruji se hee aadi, Guruji se hee anant hai
Unkee mahima toh aprampaar aur be-antt hai

Guruji hee tere maalik aur tere huzoor hain
Unhe tere saare nakhde sehne manzoor hain
Guruji ka bhola bachchaa tu bann ja
Neevan aur dil ka sachchaa tu bann jaa

Guruji tera awashya karenge kalyaan
Unhee se hai tera astitva aur sammaan
Guruji mitaayenge tere jeevan ka andhkaar
Guruji ko tu kar baarambaar namaskaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 25, 2019

Om Namaha Shivaya
Aaj Ka Suvichaar # 614

        Unke Pyaar Ko Tu Le Jeet

Guruji ke charnon mein sab kuch haar kar
Unke pyaar ko tu le jeet
Poori srishti mein chaahe tu dhoond le
Na milega Unsa koi bhi meet

Haath thaama hai Unhonei tera
Tu sach mein hai khushnaseeb
Tu Unse duur bhi jaane lagega agar
Ve sadaa rahenge tere kareeb

Niraash hoga agar kabhi tu
Unke pyaar se uday hogi asha kee kiran
Bahut kripadhari Hain karunamayee Guruji
Sanvaar denge tera janam maran

Har tarehn ka anubhav apna mahatva rakhta hai
Tu Unkee sharan mein yeh bakhoobi jaanega
Jab kar dega tu Guruji ko poorna samarpan
Tera dil Guruji ke har hukm ko maanega

Tu ek kadam toh badhaa Unkee oar
Dekhna, Ve teri oar sau kadam badhaayenge
Jab uss paar jaane ka samay aayega
Ve tujhe goad mein bitha kar le jaayenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 24, 2018

Om Namaha Shivaya
Aaj Ka Suvichaar 🙏🏻🙏🏻 # 248

                Zindagi Ka Safar

Zindagi ka safar avashya taiy hoga
Guruji kee hai badi meher
Raat ke andhere se kya darna
Aaney wali hai sundar seher

Raaste kee uljhanein sulajh jaayengi khud bakhud
Guruji kee bhakti mein itnee shakti jo hai
Doobne kee naubat kabhi na aayegee
Unkee daya ke saagar mein teri kashti jo hai

Zaroorat nahin hai tujhe ghabraane kee
Deri hai buss tere kadam uthaane kee
Guruji ko ek pal bhi tu na jaana bhool
Unkee leela se kaante bhi banenge phool

Shikaayatein karne ke bajaaye shukrana kiya kar
Sabki khushi kee dua karte huey tu jeeya kar
Guruji dekh rahei hain har pal teri neeyat
Chhupa le tu sabse par Ve jaante hain hakeekat

Unke bharose chod de tu zindagi kee naiya
Tu musaafir hai aur Guruji Hain tere khivaiya
Waqt kee nadee ke paar tujhe le jaana Unka kaam hai
Tujhe toh shradha se buss japna Unka naam hai

Dekhte hee dekhte samay beet jaayega
Apne har sangharsh mein tu jeet jaayega
Guruji se judey rishtey par kar le tu vishwaas
Tera haath thaamey huey sadaa hain Ve tere paas

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 24, 2019

Om Namaha Shivaya
Aaj Ka Suvichaar 🙏🏻🙏🏻 # 613

Paa Lee Guruji Ke Naam Mein Veh Kamaayee

Paa lee Guruji ke naam mein veh kamaayee
Jo abhi takk har vele kaam hai aayee
Mujhe ummeed hee nahin, vishwaas hai
Ki isee kamaayee se bujhnee bhakti kee pyaas hai

Paa lee Guruji ke naam mein jeene kee raah
Paa lee Guruji ke naam mein sewa, simran, satsang kee chaah
Ek adbhut anand aane lagaa aradhana ka
Bahut meetha lagne lagaa har pal sadhna ka

Paa lee Guruji ke naam mein aisee kashish
Ki Unkee oar mai khichtee chali aayee
Zamaane kee karvee baatein abb na lagein mujhe vish
Yeh hai mere Guruji kee vadiyaayee

Paa lee Guruji ke naam mein aisee sheetalta
Ki shareer aur atma ke roag duur honei lagey
Bin maange hee poore honei lagey ve sapne
Jo thei kabhi choor honei lagey

Paa lee Guruji ke naam mein meet kee mitrataa
Paa lee Guruji ke naam mein aseem pavitrataa
Sambhaal liya Guruji ne sab kuch, dekar mamta aur dulaar
Mera toh uddhaar ho gaya, paakar Guruji ka pyaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 23, 2018

Om Namaha Shivaya
Aaj Ka Suvichaar 🙏🏻🙏🏻 # 247

     Mujhe Toh Mere Guruji Mein Bhagwaan Mil Gaya

Guruji ne kadam rakha ek leher par
Toh poora saagar tarr gaya
Bhog lagaaya Unhonei ek daane ka
Toh dekho bhandaara bhar gaya

Unke ek phool ko chhooney se
Saara aangan khil gaya
Unki ek prem bhari drishti se
Jahaan bhar ko pyaar mil gaya

Sabr karna sikhaaya Unhonei
Toh utaavlaapan usee kshan gaya
Kadam rakha ghar mein Guruji ne
Toh veh ghar mandir bann gaya

Unhonei jab aankh ka aansoo ponchhaa Toh gumm na jaane kidhar gaya
Unhonei sir par haath jab rakha
Toh yeh jeevan sanvar gaya

Guruji ne kaha, ‘kalyaan kitta’
Toh dil mein umang jaagee
Unhonei kaha, ‘aish kar’
Toh antar mann kee oar utsaah kee tarang bhaagee

Unke ashish se andheri raah par asha ke chirag jal gaye
Unke kehne par taare bhi mere sangg chal diye
Unkee muskaan mein phoolon ka gulistaan mil gaya
Mujhe toh mere Guruji mein Bhagwaan mil gaya

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 23, 2019

Om Namaha Shivaya
Aaj Ka Suvichaar 🙏🏻🙏🏻 # 612

Hawaayein De Rahi Hain Paigaam

Hawaayein de rahi hain paigaam
Ki Guruji aaye Hain tere sheher
Jo tere jeevan kee andheri raat thi
Veh bann gayee hai abb sunehri seher

Tu sunn is paigaam ko dhyan se
Yeh sushobhit hai Guruji ke gyan se
Uddhaar kar apna tu Guruji ke har daan se
Aur ramm jaa Guruji mein tu jee aur jaan se

Isee paigaam mein chhupa hai tera kalyaan
Yeh paigaam keh raha ki Guruji kee baat ko maan
Khokhli baaton par na de tu koi dhyan
Guruji kee mahima ka tu karta chal gungaan

Hawaaon ke is paigaam mein hai yeh sandesh
Ki Guruji Hain sampoorna srishti ke Sarvesh
Chaahe ho koi bhi gaaon, praant, ya desh
Veh swarg bann jaaye jabb Guruji karein pravesh

Phailaaney de in hawaaon ko tu Guruji kee mehek
Nakaaratmakta ke dabaav se tu na jaana behek
Jaise jaise teri antaratma tujhe Guru gyan sikhaayegi
Yeh hawaa tujhe Guruji takk pahunchne kee disha dikhaayegi

Magn hokar phir tu usee disha mein chalte jaana
Divyataa ke kshitij par sooraj kee bhanti dhalte jaana
Jitna jhukega, utna ruhaaniyat kee oonchaayee par tu pahunch jaayega
Uss madhur oonchaayee par pahunch kar tu bahut sukh paayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 22, 2018

Om Namaha Shivaya
Aaj Ka Suvichaar 🙏🏻🙏🏻 # 246

           Hamaare pyaare Guruji 

Kabhi hon Unke swapn mein darshan
Kabhi ho Unka mann mein chintan
Kabhi ghar mehke jaise chandan
Har pal ho Unkee oar aakarshan
Buss Unhee ka karte rahein hum vandan

Unke saath kar sakein hum koi bhi baat
Ve jaagein hamaare liye din aur raat
Har kshan Hain Ve hamaare saath
Thaamey huey hamaara haath
Kehte Hain Ve karo gupt paath
Dete Hain Ve hamaare karam kaat

Ve suntei Hain hamaari kahaani dukhdaayee
Unka ashish hai bahut hee sukhdaayee
Unse humne itnee mamta hai paayee
Hamaare jeevan kee naiya Unhonei bachaayee
Yeh sach mein hai Unhee kee vadiaayee

Har pal dil mein hai basti Unkee hee tasveer
Kabhi muskuraate Hain kabhi dikhtey Hain gambheer
Unhee ke haathon mein hai hamaari taqdeer
Veh chaahein toh badal dein hamaare haath kee lakeer
Bachche hain hum Unke, phir kyun hum bann jaate hain fakeer?

Chaahte Hain Ve ki hum karein gupt daan
Dein hum ik dooje ko pyaar aur sammaan
Unke har vachan mein basaa hai divya gyan
Unhonei diya hai hamein jeevan ka vardaan
Unkee mahima toh hai atyant mahaan
Vahee toh Hain hamaare Bhagwaan

Unhe khush rakhna hee ho hamaara kaam
Chaahe ho subah ya chaahe ho shaam
Abb toh hamaara ekmaatra sahaara Unka naam
Unke naam bina ek pal bhi nahin aaraam
Sach mein, Guruji kee sharan mein hai abb Param Dhaam

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 22, 2019

Om Namaha Shivaya
Aaj Ka Suvichaar 🙏🏻🙏🏻 # 611

            Sadhna Hai Tera Raasta

Sadhna hai tera raasta
Guruji Hain teri manzil
Phir yoon khade khade
Kya soch raha hai dil

Buss, tu Guruji ka dhyan kiye jaa
Apne jeevan ko changa anjaam diye jaa
Baaki zindagi sab toh dhool hai udtee hui
Ek parchhaayee hai tujhse mudtee hai

Sadhna se tu ho jaayega har dukh se bekhabar
Loagon kee baaton ka bhi na hoga tujhpar koi asar
Duniya ke tamaashe ko tu dekhega darshak bann kar
Guruji tere sangg hongei har pal rakshak bann kar

Haan, yeh sach hai ki karmon ka bhugtaan karna hai
Pichhle janmon ke kukarmon ka bhi jurmaana bharna hai
Par sadhna ke raaste par yeh kaam aasaan hai
Kyunki tere sangg tera Guru, tera Bhagwaan Hai

Tere karam kaat-te huey Guruji tera bhaar halka karenge
Teri sadhna se prasann hokar Ve teri jholi Apne pyaar se bharenge
Unka pyaar paakar tu srishti ka sabse dhanwaan insaan bann jaayega
Bharosa rakh, teri sadhna se zaroor yeh shubh din aayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 21, 2018

Om Namaha Shivaya
Aaj Ka Suvichaar 🙏🏻🙏🏻 # 245

Hamaari Zindagi Ke Diye Kee Jyoti Hain Aap

Pyaare Guruji,

Jo bhi jab bhi bulaaye Aapko
Aap pukaar sunn lete Hain
Jo bhi dil se yaad karey
Usey Aap darshan dete Hain

Jo bhi sawaal ho bhakt ke mann mein
Aap bin uske poochhe jawaab dete Hain
Kabhi koi swapn aur kabhi koi shabad
Sandesh Aapka hamein dete hain

Hum himmat haar jaate hain
Toh Aap sabr ka paath padhaate Hain
Chalte huey hamaare paaon thakk jaate hain
Toh Aap kadam saath badhaate Hain

Itne bhaagyashaali hain hum
Ki Aapke charnon mein jageh milee hai hamein
Aapki kripa se har sangharsh ke baad
Hameshaan suneheri manzil milee hai hamein

Baksh deejiye hamaare gunaahon ko
Aur subudhi keejiye pradaan
Khotey ko bhi kharaa banaa dein
Aap toh Hain itne mahaan

Aapse hee hai udhdhaar hamaara
Aap hee Hain hamaare Bhagwaan
Hum jo bhi hain, jaise bhi hain
Hum sab hain Aapki santaan

Hamaari zindagi ke diye kee jyoti Hain Aap
Hamaare jeevan kee mala ke moti Hain Aap
Sowmya, satya swaroop Shiv avataar Hain Aap
Poojya Parampita Parmaatma paalanhaar Hain Aap

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 21, 2019

Om Namaha Shivaya
Aaj Ka Suvichaar 🙏🏻🙏🏻 # 610

Kyun Intazaar Karein Duniya Ke Badalne
Ka

Kyun intazaar karein duniya ke badalne ka
Kyun na uttardaayitva uthaayein swayam hee sudharne ka
Har koi agar apne aap ko sanvaarega
Toh hamaara Guru hamein awashya taarega

Guruji toh is dharti par aaye isliye
Ki Ve hum sabko taarein
Hamaare karmon ko kaat-tey huey
Hamaare jeevan ko sudhaarein

Ve toh jabb maanav roop mein bhi thei
Tabb bhi Ve aaj kee tarehn Bhagwaan thei
Lekin hum bhakt jaise aaj anjaan hain
Vaise hee tabb bhi is sach se anjaan thei

Anjaan, ki Guruji parwardigaar Hain
Anjaan, ki hum gunehgaar hain
Anjaan, ki hum kar rahei hain kaise karam
Anjaan, ki insaaniyat hai hamaara dharam

Insaaniyat ko bhool kar karam karte rahei
Apne bojh mein aur bhaar bharte rahei
Zinda hotei huey bhi vikaaron kee maut marte rahei
Janam maran ke janjaal mein adhte rahei

Guruji toh abb pehle se bhi zyada shaktishali Hain
Unke vachan toh aaj aur bhi zyada prabhaavshali hain
Kyun na Unke har vachan ka paalan kar hum jeevan guzaar lein
Aur Unkee kripa se apna aaj aur aane wala kal sanvaar lein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 20, 2018

Om Namaha Shivaya
Aaj Ka Suvichaar 🙏🏻🙏🏻 # 244

             Kaahe Ka Gumaan

Ye duniyavee sukh aur dukh
Pal doh pal ke mehmaan hain
Jab zindagi hee kshanbhangur hai
Phir kaahe ka gumaan hai?

Tumne mainey sabne ik din
Chod ke jaana hai ye jahaan
Jitna bhi jigri aur gehra ho
Har rishta hai laukik yahaan

Ek Guru shishya ka rishta hee
Sthir hai aur atoot hai
Ismey na toh swaarth hai
Aur na hee koi jhooth hai

Jab idhar udhar kee baatein karein hairaan
Toh apne mann ko samjhaayein
Ki ye sabb toh ik naatak hai
Ismey na khud ko uljhaayein

Khud ke mann kee shanti ke liye
Kar dein doojon ko maaf
Sabke liye ho shudh bhawna
Rakhein apne dil ko saaf

Har kadam har moad par
Guruji hamaare sangg hain
Phir kyun yeh tamasha dekh kar
Hum pareshaan aur dangg hain?

Apne samay ka karein achchaa prayog
Sewa aur Simran mein mann lagaayein
Karam hee hamaare saath jaayenge
Achche karmon kee poonji badhaayein

Simran aur saadhna se badal lein
Jeevan ko dekhne ka nazariya
Dekhna, hamein behtar lagne lagegee
Zindagi kee yeh ajab dagariya

Maya ke is timir ka hoga antt
Uday hoga Guru milan ka savera
Ek din thamm jaayengi ye saansein
Phir kya tera aur kya mera

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 20, 2019

Om Namaha Shivaya
Aaj Ka Suvichaar 🙏🏻🙏🏻 # 609

  Abb Toh Hai Unse Ardaas Yahee

Jee rahi thi ek alag see zindagi
Phir Guruji kee karne lagee bandagi
Guruji ne jabb se dikhaaya hai jeene ka saleeqa
Tabb se badal gaya hai jeevan jeene ka tareeka

Abb toh ann aur jal ka upvaas nahin
Mujhe Guruji bin kuch aata raas nahin
Vahee toh Hain Bhagwan Jinhonei srishti ko banaaya hai
Unhee ko poojne mein abb mainey sukh paaya hai

Upvaas seekhna hai ruhaani taur pe
Swayam ke bheetar jhaankna hai gaur se
Na rakhni hai koi apeksha kisee aur se
Aagey badhna hai apni hee daud se

Ruhaani upvaas se hogi mann kee shuddhi
Guruji, kripa kar deejiye mujhe sadbuddhi
Ki upvaas mai burey vichaaron se duur honei ka kar paaoon
Aur Aapka anusaran kar ke Aapke kareeb ho jaaoon

Jaisa Guruji par hai, vaisa kisee aur par vishwaas nahin
Jo Guruji na jaanein, mera aisa koi bhi raaz nahin
Guruji ka Shukrana karne ke liye mere paas alfaaz nahin
Unka Shukrana karti rahoon har pal, abb toh hai Unse ardaas yahee

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 19, 2018

Om Namaha Shivaya
Aaj Ka Suvichaar 🙏🏻🙏🏻 # 243

       Faisla Hamein Hee Karna Hai

Satyuga mein hui ladaayee
Asurlok aur Devlok mein
Vijay chaahe jiskee bhi hui
Dono hee kalpey shok mein

Tretayug mein Ram aur Raavan
Dono alag desh se thei aaye
Raavan ka vinaash kiya Ram ne
Bhakton ke dil mein Ram samaaye

Uske pashchyaat jab dwaaparyuga aaya
Toh niyati ne bhaaiyon ko ladwaaya
Ek pariwaar se hee thei kaurava aur paandav
Aur paandavon ne kauravon ko haraaya

Bhinn bhinn lok aur deshon ke baad
Itnee annbann hui ek hee pariwaar mein
Zara sochiye, abb kalyuga mein buraayee
Kahaan bastee hai sansaar mein?

Kalyuga mein asur aur devta
Dono hee basey hain hamaare mann mein
Yudh achchaayee buraayee ka
Dil mein jaari hai har kshan mein

Faislaa hamein hee karna hai
Ki vijay kiskee hogi
Jisne buraayee par vijay paa lee
Asli jeet uskee hee hogi

Guruji ne sharan mein liya hai humko
Kalyuga ke is pralay mein
Unke dikhaaye marg par chalein
Aise kathin samay mein

Tabb hee hoga udhdhaar hamaara
Keval Guruji ka hai abb sahaara
Kaam krodh moh lobh ko chodein
Ahem vehem paakhand se muh modein

Sewa simran mein samay beetaayein
Sachche dil se Satsang par jaayein
Shradha se langar prasad khaayein
Guruji kee mahima ka gungaan gaayein

Samarpan kar dein zindagi Guruji ko
Neevenpan se karein har kaam
Annyaay ko na sahein aur saraltaa se jeeyein
Sadaa Guruji ka lete rahein naam

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 19, 2019

Om Namaha Shivaya
Aaj Ka Suvichaar 🙏🏻🙏🏻 # 608

 Vikaaron Ka Jwalamukhi

Jwalamukhi phoot raha hai vikaaron ka
Pathhar khaultaa hua drutpunj bann kar behta jaa raha hai
Vikaaron se utpann hui nakaaratmakta ko
Behte behte veh sehta jaa raha hai

Kalyuga mein maanav ka
Kuch aisa hee haal hai
Laukikta se panap raha hai jwalamukhi
Abb toh sabke maansik swaasthya ka ho gaya sawaal hai

Guruji toh baar baar samjhaate Hain
Phir bhi hum swayam ko uljhaate hain
Samajhna hai vyarth ke chakkaron se duur rehna
Seekhna hai Guruji ke pyaar se bharpoor rehna

Guruji kee sadhna jitnee karenge
Utnee shanti milegi hamaare mann ko
Dhairya aur atma-bal badhega
Hum sudhaar paayenge jeevan ko

Vikaaron ko chodne mein hee bhalaayee hai hamaari
Pavitrataa aur sadbhaav maang rahi hai kaayinaat saari
Is jwalamukhi ko shant karna vash mein hai hamaare
Isey shant karne ko keh rahe hain Guruji ke saare ishaare

Aao hum sab badhaayein kadam
Taaki aur drutpunj na bahey
Yeh sundar sansaar dooshit hota jaaye
Aakhir koi bhi insaan kyun ye sahey

Guruji ka dhyan karte huey
Vikaaron ka khaatma karne mein dein hum yogdaan
Guruji ka kehna maan-na awashyak hai
Kyunki Ve Hain hamaare Bhagwaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 18, 2018

Om Namaha Shivaya
Aaj Ka Suvichaar 🙏🏻🙏🏻 # 242

  GURUJI Ko Hriday Mein Basaa Le

Insaan yahaan aaya akela hai
Yahaan se jaayega bhi akela
Jeena hai is jeevan ke rangmanch par
Oopar se hai kalyuga kee bela

Bhalaayee toh abb isee mein hai
Ki Guru se apne aap ko jodein
Baaki sabb rishtey hain laukik
Unn rishton mein moh ko chodein

Ek Guru ke sangg rishta hee toh
Maya aur swaarth se duur hai
Baaki sab toh ek naatak hai
Phir insaan ko kaahe ka guroor hai

Jisko mil gaya Guruji ka saath
Veh toh ho gaya maalamaal
Usey koi fikr koi chinta nahin
Uska toh Guruji rakhein khayaal

Jitna Guruji se judta jaayega
Utna hee tu divyataa ke kareeb aayega
Baaki sab peechhe chhoot jaayega
Lekin Guru praapti se tu tarr jaayega

Phir kis soch mein baithaa hai tu
Kyun abb bhi kar raha hai deri
Guruji ko hriday mein basaa le taaki
Sukhdaayee ho yeh ruhaani yaatra teri

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 18, 2019

Om Namaha Shivaya
Aaj Ka Suvichaar 🙏🏻🙏🏻 # 607

  Jabb Takk Saagar Mein Paani Hai

Jabb takk saagar mein paani hai
Tabb takk srishti kee kahaani hai
Jeevan mrityu ka silsila jaari rahega
Jabb takk saagar mein paani bahega

Guruji Hain maalik srishti ke
Kuch nahin chhupa Unkee drishti se
Janam maran bhi Hain Unke vash mein
Devta bhi mauj manaayein Unke yash mein

Guruji se hee shuruaat hai
Guruji par sab kuch hai nirbhar
Vahee Hain Nanak, Ganesh, aur Sai
Vahee Hain Ram aur Ve hee Giridhar

Unkee agya ke bina toh
Patta bhi hil nahin sakta
Unkee mehar barse jahaan
Vahaan koi kaam nahin rukta

Jeevan mein chaahe aayein laakh tufaan
Guruji sangg hon toh awashya hoga kalyaan
Duniya ke rangg toh badalte rahenge
Guruji kee madad se hum sab kuch sahenge

Jabb takk jis bhi jooni mein hum aate rahenge
Guruji hamein raasta dikhaate rahenge
Mukti mil jaane takk hum jeevan mrityu ke chakravyu mein rahenge
Jaise srishti chalne takk ye saare saagar bahenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 17, 2018

Om Namaha Shivaya
Aaj Ka Suvichaar 🙏🏻🙏🏻 # 241

Hamaare Guruji Jaisa Aur Koi Bhi Nahin

Pyaari sangatji,

Gaur keejiye, Guruji shabd ka har akshar aur har maatra
Sach mein bahut hee khaas hai
Dekhiye har anuchhed ke aarambh ke akshar
Har akshar mein arth ka vaas hai

Guroor toad dete Hain hamaara
Neevenpan aur gyan ka paath padhaatey Hain
Sewa aur simran baksh ke hamein
Gunaahon se Ve bachaate Hain

Ummeed dil mein jagaatey Hain
Dikhaatey Hain jeene kee raah
Utsaah bhakton ka badhaatey Hain
Jis se jaagti hai jeene kee chaah

Raaste ka Hain Ve sahaara
Doobtey huey ka Hain Ve kinaara
Har dukh dard mein saath Hain
Hamaare sir par Unka haath hai

Ujjwal Ve raah ko banaate Hain
Jeena hamein Ve sikhaatey Hain
Mushkil ka hal Ve bataate Hain
Sab kar ke bhi kabhi na jataate Hain

Jyoti swaroop Hain sabke dil mein
Bhagwaan Shiv ka Hain avataar
Jeevan kee naiya ke maajhee Hain
Kabhi na chodein beech majdhaar

Ishwar Hain hamaare Guruji
Rakhtey Hain hamaara dhyan
Zindagi mein har din har pal
Detey Hain hamein gyan

Guruji se jeevan kee kahaani shuru hui
Jo Ve karte hain, vahee hai sahee
Hum sabke paalanhaar Hain Vahee
Hamaare Guruji jaisa aur koi bhi nahin

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 17, 2019

Om Namaha Shivaya
Aaj Ka Suvichaar 🙏🏻🙏🏻 # 606

Tere Angg Sangg Hain Guruji

Tere angg sangg Hain Guruji, tu bilkul bhi nahin bechaara
Tere angg sangg Hain Guruji, nahin hai tu besahaara
Tere angg sangg Hain Guruji, na phirta chal tu maara maara
Tere angg sangg Hain Guruji, tere liye khula hai Unka dwaara

Tere angg sangg Hain Guruji, mitaa le apne bheetar ka shaitaan
Tere angg sangg Hain Guruji, na bann tu abb naadaan
Tere angg sangg Hain Guruji, abb toh bann jaa changa insaan
Tere angg sangg Hain Guruji, rakh tu nek iraade aur nek armaan

Tere angg sangg Hain Guruji, ho jaa tu har dukh se anjaan
Tere angg sangg Hain Guruji, Ve tere liye denge har balidaan
Tere angg sangg Hain Guruji, tu bhi kar de Unpar sab qurbaan
Tere angg sangg Hain Guruji, Ve tujhe denge Apni bhakti ka vardaan

Tere angg sangg Hain Guruji, nahin hona tu pareshaan,
Tere angg sangg Hain Guruji, na ho kisee bhi baat se hairaan
Tere angg sangg Hain Guruji, tu hai sabse dhanwaan
Tere angg sangg Hain Guruji, Vahee Hain tere Bhagwaan

Tere angg sangg Hain Guruji, buss tu chal de vahaan
Tere angg sangg Hain Guruji, chal jahaan dikhte hain Unke kadmon ke nishaan
Tere angg sangg Hain Guruji, Vahee Hain teri zameen aur tera aasmaan
Tere angg sangg Hain Guruji, Unmein paa liya hai toone saara ka saara jahaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja