Author: dhirjabhat

October 16, 2018

Om Namaha Shivaya
Aaj Ka Suvichaar 🙏🏻🙏🏻 # 240

Vahee Hoga Jo Manzoore Guruji Hoga

Raja ho ya ho bhikhaari
Guruji ke liye sabb ek samaan
Bheetar kee baat ko jaanein Guruji
Phir kyun tum karte ho abhimaan

Safalta ka swaad lene ke baad
Jabb hota hai uplabhdi ka ehsaas
Veh sach mein bekaar hai
Agar Guru nahin Hai tere paas

Guru ke sangg honei se
Khushkismati tujhe dhoondhti hai
Karmic khaata saaf ho
Toh safalta swayam kadam choomti hai

Kuch karmon ke phal milne se
Guruji bhi tujhe bachaa nahin sakte
Lekin Ve pyaar se tujhe dulaarein
Jabb jabb tere ghaav hain dukhte

Zindagi bakshtey Hain Guruji
Phir nirogi banaate hain kaaya
Uske baad hee dhan aata hai
Jitna karmaanusaar bann paata hai

Jabb sabb kuch Guruji ne Hai sambhaala
Phir tere itne sochne se kya hoga
Jitni bhi yojna banaa le koi
Vahee hoga jo manzoore Guruji hoga

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 16, 2019

Om Namaha Shivaya
Aaj Ka Suvichaar 🙏🏻🙏🏻 # 605

                Jeevan Ka Sikka

Sukh dukh ke do pehlu lekar
Chalta hai jeevan ka sikka
Kabhi toh sukh se chamakta hai
Kabhi hota hai dukh se pheeka

Guruji ko saump dein agar yeh jeevan
Sikke ke pehlu toh do hee rahenge
Lekin Guruji kee bhakti kee shakti se
Hum pehle se behtar sab kuch sahenge

Guruji ka naam lete huey
Dukh ka udaas vela bhi tal jaayega
Sikka chalte chalte kabhi toh paltega
Sukh aaj nahin toh zaroor kal aayega

Guruji se jode rakhein hum
Apne jeevan kee taar
Guruji Apni karuna drishti se
Awashya denge hamaare sikke ko taar

Phir na dukh se, na sukh se
Sikka kabhi bhi dagmagaayega
Balki Guruji kee kripa se chalte huey
Apni manzil takk pahunch jaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 15, 2018

Om Namaha Shivaya
Aaj Ka Suvichaar 🙏🏻🙏🏻 # 239

      Abb Bhi Samay Hai Maan Jaa

Jeevan mein kar saadhna
Shudh rakh mann kee bhavna
Guru naam kee rakh kaamna
Mushkil ka tu kar saamna

Bhaav shudh hoga tera
Toh Guruji saath denge
Tere haathon ko thaamne ke liye
Guruji Apna haath denge

Unkee kripa se hee tu
Bhavsaagar ko paar kar paayega
Unkee meharbaani se hee tera
Janmon ka dukh duur ho jaayega

Jo beet gaya so khatam hua
Usey vartmaan mein na laa
Bhavishya toh ek mithya hai
Uskey baarey mein na sochta jaa

Jo hai buss yahee ik pal hai
Is pal mein kar sewa aur simran
Taaki jabb Guruji pukaarein tujhko
Tabb bhaari na ho tera mann

Abb bhi samay hai maan jaa
Apne bhale ke liye yeh baat
Taaki chetna ka sooraj uday ho
Aur khatam ho andheri raat

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 15, 2019

Om Namaha Shivaya
Aaj Ka Suvichaar 🙏🏻🙏🏻 # 604

               Mann Ka Parinda

Guruji barsa rahein hain hum par Apne prem ke amrit kee boondein
Kyun phir hum yahaan vahaan bhatak kar sukh aur chayn ko dhoondein
Guruji jeevan ko saral rakhne ko kehte hain
Aur hum uljhan aur pecheedagi kee taraf behte hain

Hum sabke bheetar hai ek parinda
Kyun hum usey honei dein sharminda
Bahut arze se usne is bojh ko saha hai
Abb veh vikaaron se azad hona chaah raha hai

Aao apne bheetar ke parinde ko dein sehyog
Aao Guruji ka kehna maankar apnaayein Shiv Yog
Janm maran ka silsila toh chalega jabb takk mukti na milegi
Parinda tadapta rahega toh azaadi kaise milegi?

Koshish toh kar ke dekh hee sakte hain
Ki vikaaron se azad hokar is mann ke parinde kee udaan kaisi hogi
Jaise bina kisee roak toak ke baadal akash mein tehelte hain
Dekhna, mann ke parinde kee mauj masti bhi kuch aisi hogi

Azaadi kee khushboo hogi chaaron oar
Parinde ke aagey jhuk jaayega vikaaron ka chor
Guruji ne thaami hai hum sabke jeevan kee doar
Mann ke parinde ko Ve le jaayenge moksh kee azaadi kee oar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 14, 2018

Om Namaha Shivaya
Aaj Ka Suvichaar 🙏🏻🙏🏻 # 238

                   Jabb Takk....

Jabb takk nadiya mein paani hai
Veh nirantar behta rahega
Jabb takk insaan zinda hai
Karmon ka phal sehta rahega

Jabb takk shareer mein jaan hai
Kasht toh bhogne padenge
Himmat se inko jhelenge agar
Tabhi toh hum aagey badhenge

Guruji hee ekmaatra sahaara hain
Hum sabke uddhaar ka
Unke maargdarshan se aao kadam uthaayein
Hum jeevan mein sudhaar ka

Agar hum karenge koshish
Bilkul sachche mann se
Guruji sona upjaayenge
Maati ke bhi kann se

Yeh sona hoga saubhagya ka
Chaahe aarthik sthiti jaisi bhi ho
Yeh sona hoga divya gyan ka
Chaahe paristhiti jaisi bhi ho

Guruji hamaare parampita Hain
Unke alaava koi na dooja
Unhee se buss hum judey rahein
Unhee kee karein hum pooja

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 14, 2019

Om Namaha Shivaya
Aaj Ka Suvichaar 🙏🏻🙏🏻 # 603

   Karta Chal Tu Guruji Ka Shukrana 

Hamaare vash mein kuch bhi nahin
Guruji ke vash mein sab kuch hai
Insaan doojon ko dhokha de sakta hai
Magar Guruji jaantei Hain kya sach hai

Jab lagey ki har kaam bigadtaa jaa raha hai
Tabb bhi Guruji par rakh tu vishwaas
Jeevan mein haalaat chaahe burey bhi hon
Toh shukrana karte huey tu kar ardaas

Asehej bhi lagey, toh bhi kar Guruji ka shukr
Unhei saump de tu apni har fikr
Shaayad tujhe tera shukrana lagey vivekrahit
Phir bhi tu mushkil ka saamna kar shukrana sahit

Shukrana mein hai veh shakti
Jis-se rangg laayegi teri bhakti
Guruji ko shukrana jab tu karega har pal
Dekhna, Guruji zaroor sanvaarenge tera aaj aur kal

Shukrana se tu nakaaraatmakta kee gehrayiyon mein girne se bach jaayega
Shukrana karte rehne se tujh mein atma-vishwaas aur dheeraj samaayega
Kshitij par ummeed kee kiran nazar aayegi
Guruji se kee hui dua awashya asar laayegi

Shukrana ke sangg karta chal tu Guruji kee pooja
Dekhna, phir utpann hogi kitnee sakaaratmak urja
Haalaat ka saamna karna ho jaayega aasaan
Har kadam par tere sangg hongei tere Bhagwaan

Phir yoon abb tu kyun soch raha hai
Ek pal ke liye bhi na Guruji ko bisraana
Jin bhi paristhitiyon se tu guzar raha hai
Karta chal tu Guruji ka Shukrana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 13, 2018

Om Namaha Shivaya
Aaj Ka Suvichaar 🙏🏻🙏🏻 # 237

    Tere Aur Mere Daata Hain Guruji 

Duniya ke tamaashon se
Kyun hota hai tu hairaan?
Jabb Guruji tere rakshak hain
Phir kyun tu hota hai pareshaan?

Tu kitna Guruji se judta hai
Yeh tujhpar nirbhar karta hai
Unko har raaz bataa de tu
Agar bharosa Unpar karta hai

Tu nahin bhi bataayega
Toh bhi Guruji jaan hee lenge
Tere mann mein kya hai
Ve toh pehchaan hee lenge

Chaahe tu maane ya na maane
Har pal tera hai Unhe dhyan
Kabb kabb tu kya soch raha hai
Iska hai Guruji ko gyan

Kehde tu Unse jo bhi tere dil mein hai
Guruji sach mein suntei Hain
Duniya mein Apne bhakton ko
Guruji swayam hee chuntei Hain

Ek baar jo le liya tujhe
Unhonei Apni sharan mein
Phir tera sansaar samaay
Unke kamal charan mein

Teri zindagi Guruji kee dein hai
Teri har saans mein Guruji bastey hain
Muskuraakar shukrana kar Unka
Teri har muskaan mein Guruji hastey hain

Srishti ke nirmaata Hain Guruji
Vidhi ke vidhaata Hain Guruji
Pita hain aur mata Hain Guruji
Tere aur mere daata Hain Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 13, 2019

Om Namaha Shivaya
Aaj Ka Suvichaar 🙏🏻🙏🏻 # 602

Guruji Ishwar Ka Roop Hain

Raat ke andhere mein
Shaam mein savere mein
Savere ke ujaale mein
Sadaa is mann matvaale mein

Guruji ka hota hai ehsaas
Hotei Hain Ve sadaa aaspaas
Agam Hain agochar Hain
Saumya Hain manohar Hain

Murshid Hain, Naath Hain
Meet Hain, BholeNath Hain
Leeladhari Hain, Mahaan Hain
Maargdarshak Hain, Bhagwaan Hain

Jaan Hain, aur jahaan Hain
Ateet, bhavishya, aur vartmaan Hain
Zameen mein Hain, aasmaan mein Hain
Har bhakt kee jeevan dastaan mein Hain

Jyotiswaroop Hain, Shantiswaroop Hain
Shaktiswaroop Hain, Kantiswaroop Hain
Kalyuga kee sardi mein meethi meethi dhoop Hain
Jis bhi nazar se dekho, Guruji Ishwar ka roop Hain

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 12, 2018

Om Namaha Shivaya
Aaj Ka Suvichaar 🙏🏻🙏🏻 # 236

    Guru Naam Se Bada Na Koi Naam

Guru naam hai anmol dhan
Isey japne mein lagaa le tu mann
Guru naam ka kar tu simran
Guru ko sab kuch kar tu arpan

Guru naam veh gehna hai
Jo bhakton ne pehna hai
Is naam se chhaaya hai tujhpar noor
Isey japne se hongei tere kasht duur

Guru naam mein jabb tu ramm jaayega
Is se himmat tu har dumm paayega
Jabb jabb tu mushkil mein ghabraayega
Guru naam hee tujhe paar lagaayega

Guru naam ik aisa adbhut bandhan hai
Jis mein bandh ke tu azad ho jaata hai
Moh maya kee zanjeeron ko toadkar
Tu apne asal astitva ko paata hai

Har pal mann kee aankhon se
Guru kee chhavi ko nihaar
Japta jaa Guruji ka naam
Veh sunenge teri pukaar

Simran jo na kiya Guru naam ka
Toh bhalaa yeh jeevan kis kaam ka?
Simran raaz hai maansik aaraam ka
Isi se milega phal chaaron dham ka

Phir kaahe ko yeh deri bandey
Chod de abb tu mandey dhandey
Lagaa le mann ko Guru naam mein
Le chal khud ko param dham mein

Guru naam mein bhakti hai
Guru naam mein shakti hai
Guru naam jap subah aur shaam
Guru naam se bada na koi naam

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 12, 2019

Om Namaha Shivaya
Aaj Ka Suvichaar 🙏🏻🙏🏻 # 601

Ab Guruji Ke Charnon Mein Hee Hai Thikaana

Bashar bann kar aaye
Guruji is sansaar mein
Hamein naam ka simran sikhaaney ke liye
Aur mukti ka raasta dikhaaney ke liye

Guruji kee kripa se mushkilein pehle se aasaan lagne lageen
Guruji kee karuna se kayee beemaariyaan theek honei lageen
Jo bhi kasht aata hai, Guruji ne kumm kar ke hee hai diya
Unhee kee divyataa se karmon ka bhugtaan hota hai gaya

Hamaari khaatir Guruji dete Hain itnee qurbaani
Hum aise dheeth hain ki karte rehte hain beimaani
Chaahe chhupa lein hum apni asliyat ko jagg se
Guruji ko maalum hai hum sabke jeevan kee poori kahaani

Ateet ke karmon ka khaata saaf karenge
Bhavishya bhi Guruji hee sambhaalenge
Aaj ka jeevan sanvaara hai Unhonei
Aagey bhi Ve hee sanvaarenge

Guruji kee jo divya baani hai
Iskee leela badi ruhaani hai
Is baani mein basey hain Om aur Omkar
Iske simran se milta hai Guruji ka dwaar

Guru naam ke simran mein ramm jaaye har shwaas
Guruji ke deedar ke alawa na rahei koi bhi aas
Guruji hain har pal angg sangg aur aas paas
Sadaa rahein hum bannkar Unke hee daas

Guruji ka dar chod ke kaheen na ab jaana
Guruji se judne ke liye na chaahiye koi bhi bahaana
Ab Guruji ke charnon mein hee hai thikaana
Vintee hai Guruji se ki sadaa meetha laagey Unka bhaana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 11, 2018

Om Namaha Shivaya
Aaj Ka Suvichaar 🙏🏻🙏🏻 # 235

    Guruji Ko Banaa Lein Apna Meet

Hum sab kitne khushnaseeb hain
Kyunki hum Guruji ke itne kareeb hain
Par hum bahut hee ajeeb hain
Kyunki kehte apne ko gareeb hain

Asal dhan toh hai Guruji ka naam
Jitna japenge utna dhanwaan banenge
Agar hum karenge nishthaa se kaam
Toh bhalaa hamaara Bhagwaan karenge

Pehle toh hum maante nahin hain
Guruji ka hukm aur Unkee raai
Baad mein hum pachchtaatey hain
Aur phir hum karte hain ‘hai hai’

Guruji har pal sab kuch dekh rahein hain
Yeh sach sadaa yaad rahei hum sabko
Nyaay ka saath dein aur karam achche hon
Taaki pachchtaana na padey hamein kal ko

Jisne hamaare saath bura kiya
Karte chalein hum unko maaf
Jabb jaane kee bela aaye
Tabb dil ho hamaara bilkul saaf

Padaarthon kee bhaag daud ko chodkar
Rakhein hum shradha aur saboori
Oopari dikhaawon se muh moad kar
Karein Guru milan kee aas ko poori

Yeh heere moti paise kaam nahin aayenge
Laukik dhan hum saath lekar nahin jaayenge
Guruji ko toh hum keval tabb paayenge
Jabb hum sabb kuch haar ke aayenge

Vahee hogi hamaari sachchi jeet
Jabb Guruji se hogi sanchi preet
Chod dein abb har riwaaz har reet
Buss Guruji ko banaa lein apna meet

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 11, 2019

Om Namaha Shivaya
Aaj Ka Suvichaar 🙏🏻🙏🏻 # 600

                 Shukrana Karoon

Shukrana karoon har uss hawaa ke jhonke ka
Jo Guruji kee ruhaani khushboo lekar aata hai
Shukrana mere shareer ke har uss khoon ke katre ka
Jo Guru kripa se mujhe zindagi de paata hai

Shukrana karoon uss jal aur ann ka
Jismein Guruji ka ashirwaad milta hai
Shukrana mere dil ke darpan ka
Jismein Unka sowmya roop khilta hai

Shukrana karoon is maanav jeevan ka
Jismein Ve karam katvaa rahei Hain
Shukrana karmon ko katvaane ka
Is se Guruji mujhe Apne kareeb la rahei Hain

Shukrana karoon chaand, sooraj, aur taaron ka
Jinmein Guruji kee chhavi basti hai
Shukrana is dharti aur akash ka
Jinkee Guruji bin nahin koi hasti hai

Shukrana karoon har uss shaqs ka
Jisne kee hai mujhse bewafaai
Guruji ne haath thaam liya mera
Unkee divyataa se dhanya hui meri tanhaayee

Shukrana karoon har uss shaqs ka bhi
Jisne mera dil hai toda
Na jaante huey unhonei mujhe
Mere Guruji ke sangg aur bhi zyada joda

Shukrana karoon har uss insaan ka
Jisne mujhe dosti ka haath aur pyaar diya
Shukrana karoon har uss insaan ka bhi
Jisne kuch sikhaakar mera jeevan sanvaar diya

Shukrana karoon uss din ka uss pal ka
Jab jaan gayee ki Guruji se juda hai mera naata
Shukrana uss beete huey kal ka
Jisne mere saath safar hai kaata

Shukrana karoon unn sangaton ka
Jinhonei Guruji ke baare mein bataaya mujhe
Anantam Shukrana karoon mere pyaare Guruji ka
Jinhonei itne pyaar se apnaaya mujhe

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 10, 2018

Om Namaha Shivaya
Aaj Ka Suvichaar 🙏🏻🙏🏻 # 234

             Guruji Ka Nirmal Noor

Guruji ka nirmal noor andhere ko haraa deta hai
Guruji ka protsaahan utsaah ko badhaa deta hai
Guruji kee leela se paththar bhi moam hai bann jaata
Guruji ka prem bhakton ke mann mein hai samaata

Keh de Guruji ko tu apne dil kee baat
Ve na chodenge kabhi bhi tera saath
Unke liye tu sadaa bachcha hee rahega
Achchaa hoga agar tu sachchaa hee rahega

Ve sangg hain tere toh zaroorat nahin tujhe ghabraane kee
Unhe fikr hai teri har mushkil ke hal ko paaney kee
Aur kaun hai jo tera rakhega itna khayaal
Isliye tu na kiya kar Unse koi bhi sawaal

Karde apna dharam aur karam Guruji ko samarpan
Karde tu apna saara jeevan abb Unhee ko arpan
Guru naam ka geet tu har pal gaaye jaa
Guru ashish ke suman tu har pal paaye jaa

Jabb Guruji ka ho jaayega tera hriday
Hoga tere jeevan ke sooraj ka uday
Uss sooraj ke tej mein tu khil paayega
Uski roshni kee madad se Guruji ko mil paayega

Buss phir aur koi tamanna na reh jaayegi adhoori
Guru milan se hogi divyataa kee teri khoj poori
Chayn se is janam ko alvidaa tu keh paayega
Guruji kee jyot mein samaakar amar tu reh paayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 10, 2019

Om Namaha Shivaya
Aaj Ka Suvichaar 🙏🏻🙏🏻# 599

 Aapke Ehsaanon Ka Karz

Pyaare Guruji,

Aapke ehsaanon ka karz adaa karoon toh karoon kaise
Mujhmein aisee kaabiliyat kahaan
Jahaan bhi Aapki maujoodgi ka ehsaas hota hai
Mera toh sir jhuk jaata hai vahaan

Aap mere dil mein Aap meri rooh mein
Is kadar buss gaye Hain spandan bannkar
Aksar jab Aapke dhyan mein hoti hoon
Aati hai Aapki ruhaani khushboo gulab aur chandan bannkar

Aapse hee hota hai maargdarshan mera
Aapse hee shaam hai aur Aapse hee savera
Chaahe pareshaaniyon ne daala hai jeevan mein dera
Khushi bhi nahin, aur gumm bhi nahin hai mera

Kyunki asal satya toh hai Aapke sangg naata
Aapse hee sanvarega mere karmon ka bhi khaata
Jeevan kee laukik yatra ka anubhav toh har koi hai paata
Lekin kewal Aapse judne mein sachcha sukh hai mere daata

Raas aaye mere Bhagwan mujhe ruhaaniyat kee gehraayee
Sewa aur simran se mitt jaaye jeevan kee tanhaayee
Aapne Apni mehar hameshaan hameshaan hai barsaayee
Yeh hai khushkismati meri aur hai Aapki vaddi vadiyaayee

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 9, 2018

Om Namaha Shivaya
Aaj Ka Suvichaar 🙏🏻🙏🏻 # 233

Kyun Tu Dar Dar Phirta Hai Maara Maara

Mehsoos karne kee koshish jo karey
Vahee jaan sakta hai yeh ehsaas
Ki chaahe Guruji agochar hain
Veh Hain hamaare bilkul paas

Guruji jal ke pravaah mein Hain
Guruji is andekhi havaa mein Hain
Guruji ka ashish teri davaa mein hai
Guruji ka naam teri har dua mein hai

Guruji bagiya kee sundartaa mein Hain
Guruji har pushp kee komaltaa mein Hain
Guruji antar-mann kee namrataa mein Hain
Guruji vaani kee madhurtaa mein Hain

Guruji bhakton kee awaaz mein Hain
Guruji uss awaaz kee mithaas mein Hain
Guruji teri zindagi ke har saaz mein Hain
Guruji teri har shubh aas mein Hain

Guruji toh tere matwaale mann mein Hain
Guruji maujood kann kann mein Hain
Guruji dharti aur gagan mein Hain
Guruji shradha kee jyot kee agan mein Hain

Guruji teri bhakti aur vandan mein Hain
Guruji tere pyaar ke har bandhan mein Hain
Guruji tere subah aur shaam ke abhinandan mein Hain
Guruji tere aadhyaatmik spandan mein Hain

Dil mein utaar le sadaa ke liye tu Guruji kee tasveer ko
Sanvaar le hameshaan ke liye apni bigdee hui taqdeer ko
Guruji mein atoot vishwaas se hee tujhe shakti milegi
Guruji kee baat maanegaa toh hee is jeevan janjaal se mukti milegi

Guruji hee hain abb tera ekmaatra sahaara
Guruji bin abb toh na jeena ganvaara
Kyun tu dar dar phirta hai maara maara
Guruji mein paa le tu Brahmaand saara ka saara

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 9, 2019

Om Namaha Shivaya
Aaj Ka Suvichaar 🙏🏻🙏🏻 # 598

              Aapki Nazar Ka Asar

Pyaare Guruji,

Kalyuga ke vash mein hai yeh saari srishti
Is srishti par kripa kar daaliye Apni karunamayee drishti
Hum patit praaniyon ko taar de Aapki mehre nazar
Hum bann jaayein paawan, aisa ho Aapki nazar ka asar

Har insaan par Apni kripa barsaayiye
Hamein sadhna ka mahatva samjhaayiye
Hamaare bheetar soyi hui chetna ko jagaayiye
Hamaare mann mein jhulasti hui vikaaron kee agni ko bujhaayiye

Aapki sharan mein zindagi jeene ka anand lein hum
Na khud ko aur na aur kisee ko hum dein koi gumm
Kisee ke kaam aa sakein toh isey apna saubhagya samjhein
Tuchh aur khokhle maamlon mein vyarth mein na uljhein

Swayam ko behtar insaan banaane kee koshish karein har pal
Badon se bhi aur chhoton se bhi kuch seekh paayein toh hai achchaa
Is baat ka dhyan rahey hamein aaj aur kal
Ki Aap sadaa jaante hain kaun jhootha hai aur kaun hai sachchaa

Aap se hee judee rahey ummeed hamaare kalyaan kee
Aapne hee thaami hai doar har bhakt kee jaan kee
Aapke ashirwaad bina yeh zindagi nahin hai kisee kaam kee
Aap mein basee hai chhavi har Bhagwaan kee

Aapki karuna se hee ho sakta hai uddhaar hamaara
Aap hee Hain hum naadaan shishyon ka sahaara
Aapke bina na jeena aur na marna ganvaara
Sach toh yeh hai ki Aapke bina ek pal bhi nahin hai guzaara

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 8, 2018

Om Namaha Shivaya
Aaj Ka Suvichaar 🙏🏻🙏🏻 # 232

Dhanya Hai Guruji, Aapki Vadiyaayee

Oopar dekhoon toh, Guru gyan ke saumya sitaare akash mein timtimaate hain
Saamne dekhoon toh, Guru gyan ke divya deep meri raah mein jaagmagaate hain
Aankhein moondoon, toh bandd nainon mein bhi Vahee samaate hain
Jidhar dekhti hoon, mujhe toh mere Guruji hee nazar aatey hain

Guruji hee mere maat pita hain
Guruji hee mere rakshak
Guruji hee mere meet hain
Aur Guruji hee mere shikshak

Jeevan toh bilkul neeras thaa
Bin bhakti, vishwaas, aur samarpan
Abb toh chehre par Guruji ka noor
Dikhta hai jabb dekhoon mai darpan

Sach mein, Guruji se oonchaa nahin koi naam
Guruji ke charan se divya na koi dham
Guru sewa aur simran se bada na koi kaam
Abb toh Guru naam bin nahin hai aaraam

Apni sharan mein rakhna mujhe daata tu sadaa
Subuddhi dena aisee, ki apna farz kar sakoon adaa
Aapne toh jeene kee raah hai dikhaayee
Dhanya hai Guruji, Aapki vadiaayee

Jeevan toh kshanbhangur hai, bharosa nahin aaj aur kal ka
Jabb Aapne apnaaya mujhe, shukrana karoon uss pal ka
Duniya ke darr se abb mai apne aap ko azaad karti hoon
Pyare Guruvar mere, is himmat ke liye mai Aapko dhanyawaad karti hoon

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 8, 2019

Om Namaha Shivaya
Aaj Ka Suvichaar 🙏🏻🙏🏻 # 597

        Guruji Ke Naam Ka Kavach

Jeevan par na padne dein hum jhooth kee parchhaayee
Mann ke mandir mein basaa lein hum sachchaayee
Dhyan rahey na vash mein karey hamein koi buraayee
Guruji khush hongei dekh kar hamaari achchaayee

Safar chhota ho ya lamba, shuru karne ke liye badhaana padta hai kadam
Kahaani jaisi bhi ho, kaagaz par likhne ke liye chahiye kalam
Zindagi ke jis bhi moad par jaayein, karte hain hum kayee karam
Isliye Guruji ko na bhoolne kee khaayein hum kasam

Guruji ke naam ka kavach jo humne pehna hai
Veh hamaara sabse anmol gehna hai
Ab humne jo bhi kuch sehna hai
Is naam se ab judey rehna hai

Guruji ka naam hee bhakti hai
Guruji ke naam mein shakti hai
Guruji ke naam se miley mukti hai
Guru naam se miley mann ko tripti hai

Guru naam ke teer se vikaaron ka asur mar jaaye
Guruji ka naam japne se dil mein sukoon bhar jaaye
Guruji ka naam banaa dega bhakt ko sadgunon ka farishta
Abb bhi kuch nahin bigda hai, mazboot kar lein Guruji ke sangg rishta

Har lamha jab beetega Guruji kee yaad mein
Aur shukrana hee shukrana hoga har fariyaad mein
Guruji ke dhyan mein ramm jaayenge praan
Unhee se shuru aur Unhee se poora hoga phir har armaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 7, 2018

Om Namaha Shivaya
Aaj Ka Suvichaar 🙏🏻🙏🏻 # 231

        Ek Din Aisa Zaroor Aayega

Guruji ke pyaar kee khushboo se apne raaste ko mehekte dekh tu
Guruji ke gyaan kee roshni se apni raahon ko ujjwal hotei dekh tu
Bahut thakk gaya hai tu duniya ke tamashe se
Abb Guruji kee bhakti se shakti paakar dekh tu

Chhoti chhoti baatein jo tujhe thein bahut sataati
Unse na tu hoga pehle jitna pareshaan
Duniyawaalon ke taane jo tujhe chaunkaa dete thei
Unse na tu hoga pehle jitna hairaan

Jaise jaise apni ruhaani raahon par tu aagey badhega
Tera aur bhi dridh ho jaayega atma-vishwaas
Jaise jaise tu sewa aur Guruji ka simran karega
Tera aur bhi sthir ho jaayega Guruji par vishwaas

Guruji haath thaamei rahenge tera, aur tu chalta jaayega
Niraasha ka andhera mitegaa, asha ka savera aayega
Unkee madad se yakeenan tu apna lakshya paayega
Tera Guru teri kismat phir se likhkar tujhe safalta dilaayega

Uth, jaag musaafir
Guruji mein lagaa abb dhyan
Ek Vahee hain jo tujhe denge
Zindagi jeene ka gyan

Ve jaante hain tera bhalaa kismein hai
Isliye tu Unse kuch bhi maangna nahin
Unpar befikr hokar sab kuch chod dey
Jo Ve karenge tere liye hoga sahee

Dekh lena, ek din aisa zaroor aayega
Guruji ka noor tujhpar chhaayega
Tu Guruji mein magnho jaayega
Aur har pal Unkee mahima gaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 7, 2019

Om Namaha Shivaya
Aaj Ka Suvichaar 🙏🏻🙏🏻 # 596

                Saadar Pranaam

Guruji Aapko hamaara saadar pranaam
Aap takk pahunchaane wale raaste ko salaam
Aapne diya hai Apne naam ka jo daan
Khushnaseeb hain paakar hum yeh vardaan

Kripa kar hamein deejiye ruhaani gyan
Vehem mein rehkar na banein hum naadaan
Apni khaamiyon se bhi hain hum anjaan
Aapke dwara hee hoga hamaara kalyaan

Na prabhaavit karey hamein laukik saamaan
Na andha karey hamein kabhi jhoothi shaan
Na dhoondhtey rahein hum Aapki maujoodgi ka pramaan
Aapke ashirwaad ke dhan se banein dhanwaan

Kaayam rahei hamaara atma-sammaan
Doojon ka bhi karein hum sammaan
Aap mein lagaa rahei hamaara dhyan
Aap mein hee ramm jaayein praan

Sadaa rakhein hum Aapka maan
Kyunki Aap hee hamaare Bhagwaan
Ab jo hamein hai is baat ka gyan
Har mushkil ka hal hai Guru naam ka baan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja