Author: dhirjabhat

September 6, 2018

Om Namaha Shivaya
Aaj Ka Suvichaar 🙏🏻🙏🏻 # 200

        Aapko Koti Koti Shukrana

Roam roam mein bastei hain Aap Guruji
Meri neend ke liye jagtei hain Aap Guruji
Jab bhi yaad karoon saath paati hoon Aapko
Kabhi kabhi apne bachpaney se bahut sataati hoon Aapko

Aapki awaaz aati hai shabad kee vaani mein
Dil saaf hai toh Aapka ashish basaa hai nall ke bhi paani mein
Kabhi jo Aapse kuch maang loon naadaani mein
Toh maaf karna kyunki hoon bilkul deewani mai

Apne haathon se hai thaama Aapne mera haath
Yeh abhi ka nahin, yeh toh janmon ka hai saath
Kabhi jo ho jaaye mere jeevan mein anisht baat
Aap Apni leela se mere karam detei hain kaat

Kahaan toh har chhoti baat bhi sataati thee
Pareshaani se kayee baar neend nahin aati thee
Aapse judne ke baad jeevan kee yatra hui ruhaani
Pehle se behtar honei lagee yeh zindagaani

Aapke hee dar par har baari aaoon mai
Aapki anokhi leela par vaari jaaoon mai
Aapki divya mahima ka gungaan gaaoon mai
Aapke charnon mein anand paaoon mai

Aap sach mein sadaa hotei hain sangg
Sikhaa rahein hain Aap mujhe jeene ka dhangg
Har dhadkan har saans hai abb Aapke hawaale
Aapko koti koti shukrana mere Guruji Dugri waaley

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 6, 2019

Om Namaha Shivaya
Aaj Ka Suvichaar 🙏🏻🙏🏻 # 565

            Dil Mein Hai Yeh Asha

Mitti se hee aaye hain hum
Mitti mein hee mil jaana hai
Agley pal kee khabar nahin
Phir kaahe ka itraana hai

Hamaari toh itnee bhi aukat nahin ki hum Guruji ke charnon kee dhool bann sakein
Phir bhi tamanna karte hain ki Unke aangan ke phool bann sakein
Guruji se prem hai toh karam kyun na is kadar karein
Ki Guruji humse khush hokar hum par sadaa nadar karein

Guruji kee anant kripa hai humpar
Lekin apni oar se koshish zaroori hai
Insaan hain hum isliye
Karmon ka bhugtaan karna kartavya aur majboori hai

Neevenpann ka beej boyein apne antarmann ke upvan mein
Aur seenchein usey sarvsamarpan ke jal se
Pyaar kee sheetal havaa se karein uss vriksh ka poshan
Apna uddhaar karein vriksh ke gyan roopi phal se

Guruji ke dhyan mein nirantar rahein
Toh ek na ek din uddhaar ho jaayega
Guruji ke vachan ka anusaran kar ke
Har bhakt divya gyan ke phal ko paayega

Isee gyan kee kripa se hoga karmon ka bhugtaan
Guruji kee anukampa dwaara hoga hamaara kalyan
Aukat toh hamaari kuch nahin lekin dil mein hai yeh asha
Ki ek din poori hogi hamaari Guru milan kee abhilaasha

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 5, 2018

Om Namaha Shivaya
Aaj Ka Suvichaar 🙏🏻🙏🏻 # 199

            Guru Naam Ka Rass

Kalyuga ka pralay chal raha hai
Insaan ka imaan kar chhal raha hai
Dukh aur vipadaa, krodh, laalach aur santaap
Inke kaaran se aur parinaam se badh rahein hain paap

Maanav jeevan baar baar miley
Shaayad aaye na aisa mauka
Jo sthaayi samjhey is zindagi ko
Veh de raha hai swayam ko dhokha

Is jeevan ko jee lo sampoornta se
Aur izzat doh har pal ko
Kya maalum kab tak samay mila hai
Bhool jaao pichhle aur aane wale kal ko

Yeh aaj aur abhi ka pal jo hai
Yeh sach mein hai vardaan
Jo hai isee pal mein hai
Is pal ka kar lo maan

Pichhlee baatein jaao bhool
Na apne dil ke baag mein upjaao shool
Khud bhi maafi maang lo aur doojon ko bhi kar doh maaf
Yahee khushi ka tareeka hai, kar lo dil ko saaf

Guruji ke bachche ho toh apne karmon ko sudhaaro
Na duniyadaari kee vajeh se apne noor ko bigaado
Guruji kee sharan mein aao aur samaao
Vikarmon aur vikaaron se tum duur ho jaao

Sakaaraatamak oorjaa phailaao
Vaataavaran ko swasth banaao
Guruji kee baatein suno aur sunaao
Dil ke upvan ko amrit se seenchtey jaao

Guruji toh bakshanhaar hain
Tumhe kshamaa Ve kar denge
Apne mann kee mayl nikaaloge toh
Apne naam ka rass Ve bhar denge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 5, 2019

Om Namaha Shivaya
Aaj Ka Suvichaar 🙏🏻🙏🏻 # 564

        Pooran Guru Kee Talaash

Thee mujhe pooran Guru kee talaash
Taaki antarmann ko miley sakaaraatamak sakaash
Lekin kayee saal takk samay nahin thaa aaya
Isliye tabb takk Guruji kee sharan ko na paaya

Sunaa thaa ki Guru Govind se milvaate hain
Aur bhakton ko jeene kee raah dikhaate hain
Sunaa thaa ki Guru ko paakar jeevan sanvar jaata hai
Sunaa thaa ki insaan kismat se hee Guru ko paata hai

Sochti thi kabhi toh mera naseeb bhi nikhar jaayega
Mere jeevan mein Guru naam ka gulab roopi arak bikhar jaayega
Kayee varsh beet gaye isee intazaar mein
Udaas honei lagee mai niyati ke is inkaar mein

Phir hui mujhpar Guruji kee mehre nazar
Aur Unkee kripa barsee mujhpar is kadar
Mera murjhaaya hua bhaagya khil gaya
Guruji mein mujhe Guru ke saath hee Ishwar mil gaya

Suljhaa dee Unhonei har uljhan
Roshan kar diya Unhonei mera mann
Mainey kar dee apni kismat Unhee ko arpan
Unkee chhavi se mainey ujjwal kiya apne dil ka darpan

Jeevan safal ho gaya jo Guruji ne liya Apni sharan mein
Uddhaar ho gaya jab jageh mil gayee Unke divya charan mein
Vahee dikhte hain mujhe jab mai hoti hoon Prabhu ke smaran mein
Abb toh Ve sadaa sangg hain mere har janam maran mein

Hadey intazaar ka hua abb meetha antt
Jaan gayee ki Guruji hain Bhagwant
Vahee hain mata pita bhai bandhu aur santt
Unkee karuna aur kripa sach mein hai anant

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 4, 2018

Om Namaha Shivaya
Aaj Ka Suvichaar 🙏🏻🙏🏻 # 198

Jab Pyaare Guruji Saath Hain Tere

Yeh zindagi jeene ka tareeka
Kisee bhi kitaab mein likha nahin
Jisne khud seekhne kee koshish nahin kee
Usey iska saleeqa dikha nahin

Har tajurbe se milegi tujhe seekh nayee
Aur tu zindagi ko behtar samajh paayega
Agar koshish hee nahin karega tu
Toh phir paheliyon mein tu ulajh jaayega

Guruji kehte hain himmat kar
Unka naam lekar tu chalta chal
Guruji kehte hain tu na darr
Tu seekhega, aaj nahin toh kal

Jabb pyaare Guruji saath hain tere
Toh tu parvat bhi hila sakta hai
Guruji ka shradhaalu bhakt hai toh
Tujhe koi bhi nahin daraa sakta hai

Jo koshish kar ke haara
Veh insaan tajurba toh paayega
Kintu jisne koshish hee na kee
Veh toh yoon hee maukey ganvaayega

Agar tooney prayaas na kiya
Toh apni kaabileeyat kaise tu jaanega
Guruji kee chaitanya shakti dwara hee toh
Tu apne dil kee awaaz pehchaanega

Guruji kee bhakti mein hai itnee aseem shakti
Ki doobne ke baad bhi kinaara paa leti hai kashti
Mrit ka dil bhi ek baar phir lagta hai dhadakne
Guru apne bhakton ko kabhi bhi na deta bhatakne

Phir Guru ke bande tu itna kyun soch raha hai
Guruji ne tujhe himmat rakhne ke liye kaha hai
Tu apni oar se koshish kar, baaki sab Unpar chod dey
Aur maayoosi aur niraasha se tu bilkul muh moad le

Pathreele raaste dekhna kitne nirvighna hotey jaayenge
Jahaan patjhad thaa, vahaan par phool nazar aayenge
Tujhe tere saare sawaalon ke jawaab
miltey jaayenge
Aur Guruji tujhe pyaar se Apni goad mein bithaayenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 4, 2019

Om Namaha Shivaya
Aaj Ka Suvichaar 🙏🏻🙏🏻 # 563

             Guruji Sadaa Sahaay

Jab ummeed haar kar tujhe kaheen na dikhey prakash
Toh swayam ko yaad dilaana ki Guruji hain teri aseem asha ka akash
Na ho kabhi bhi kisee mushkil mein pareshaan
Kyunki Guruji ke paas hai teri har samasya ka samaadhan

Koi lamha aisa aaye jab tu ho kisee bhi vajeh se dukhi
Toh dekh ki Guruji kee sharan mein tu vaakeyee mein hai sukhi
Jab sataane lagey tujhe koi bhi gumm
Toh yakeen rakh ki Guruji ne pehle se hee tujhe veh diya hai kumm

Jab maayoosi ho tujhe ki tere laukik mata ya pita is sansaar mein nahin
Toh saantvanaa de swayam ko ki tu jahaan hai tere Guruji hain vaheen
Koi saathi ya meet tujhse agar bichhad jaaye aaj ya kal
Toh yaad rakh ki Guruji tere sangg hain har pal

Jab raaste par chalte huey tujhe mehsoos ho thakaan
Toh Guruji ko yaad kar ke chehre par la tu muskaan
Chinta kee vajeh se agar ashaant ho tera mann
Toh Guruji ka chintan kar ke sanvaar le tu jeevan

Jab zindagi se oob jaaye aur na aaye tujhe anand
Apne bheetar dhoond aur paa le tu satchittanand
Is kalyuga ke kolaahal mein jab tujhe koi baat sataay
Toh yaad kar le is satya ko ki Guruji sadaa sahaay

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 3, 2018

Om Namaha Shivaya
Aaj Ka Suvichaar 🙏🏻🙏🏻 # 197

          Guruji Se Bada Koi Nahin

Mathura ke ek kaidkhaane mein
Mata Devaki ne janam diya
Pyaare Baal Gopal ko
Maama Kans ke kaal ko

Jaise hee janme Shree Krishna
Usi samay hua aisa karishma
Sipaahi gehri nidraa mein so gaye
Tootee zanjeerein aur bandd dwaar khul gaye

Kaash yeh Krishna roopi chetna
Hum sabke dil mein aaye
Aur uss chetna ke aate hee
Agyan ka andhkaar mit jaaye

Toot jaayein zanjeerein vehem, paakhand, aur ahankaar kee
Aur baansuri bajne lagey chaaron oar buss pyaar kee
Guruji ke vachan se goonj uthey akash
Vaatavaran mein phail jaaye sureela sakaash

Guruji bhi toh aaye dharti par
Bashar bann ke hamaare liye
Taaki agyan ke andhkaar ko mitaakar
Ve jalaayein gyan ke diye

Ve toh hameshaan Apna vaadaa
Kitne pyaar se nibhaate hain
Lekin hum insaan kitne bekadar hain
Nahin seekhte hain jo Ve hamein sikhaatey hain

Abb bhi samay hai paa lein Guruji ka gyan
Achchee sangati mein rahein aur bann jaayein achche insaan
Har pal har din kar lein hum Guruji ka dhyan
Guruji se bada koi nahin hai, yeh hakeekat hum lein maan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 3, 2019

Om Namaha Shivaya
Aaj Ka Suvichaar 🙏🏻🙏🏻 # 562

                 Ruhaani Unnati

Jab kabhi agar bebasi mein lagey
Ki kho gaye hain is jahaan mein
Aur dil pareshaan honei lagey
Shanti paane ke armaan mein

Toh dil ko samjhaakar Guruji ka karein dhyan
Unhee ko mann kee vyathaa karein bayaan
Sab kuch haar kar ankhein lein moond
Toh Guruji hamein lenge dhoond

Unke ashirwaad se hum bhool jaayenge
Ki hum kabhi khoye bhi thei
Yaad nahin rahega hamein
Ki kabhi ye nayn roye bhi thei

Poori hogi divyataa kee chaahat
Milegi peedit praanon ko raahat
Khud ko sambhaal paayenge
Mann mein vishwaas jagaa paayenge

Guru prem ke amrit se seenchein apni atma ko
Shradha se simrein apne Guru parmatama ko
Ruhaani unnati ko jeene ka uddeshya banaayein
Guruji kee bhakti ke anmol gehnon se swayam ko sajaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 2, 2018

Om Namaha Shivaya
Aaj Ka Suvichaar 🙏🏻🙏🏻 # 196

Zindagi Ke Din Ek Jaise Nahin Hai Hotey

Akash mein tairtey huey baadal ka roop
Har pal har kshan badalta hai
Dharti ka chehra bhi sooraj kee bhanti
Kabhi chadhta hai toh kabhi dhalta hai

Aise hee zindagi ke din bhi
Ek jaise nahin hain hotey
Kabhi toh hum itne khush hotey hain
Aur kabhi hum hain itne rotey

Guruji kehte hain buss chalte chalo
Ho kar Unki razaa mein raazi
Jisne Unki is baat par amal kiya
Veh toh jeet gaya zindagi kee baazi

Kyunki Unko jabb kar diya samarpan
Bhakt ne apna jeevan saara
Phir kabhi bhi veh mushkil ke samay mein
Na bhatkega dar-dar maara maara

Unhonei jo thaam liya tera haath
Unke bharose jo tu jeeyega
Toh Unke ashirwaad ka amrit
Har pal tu peeyega

Uss paawan amrit kee sheetalta se
Tere paap dhultey jaayenge
Badnaseebi ke din hongei khatm
Aur khushiyon ke din aayenge

Tabhi toh Guruji kehte hain
‘Kalyaan kitta’ aur ‘aish kar’
Har pal tu kar Unka shukrana
Apne gumm kee numaish na kar

Zindagi jeene ka nazariya tera
Har din behtar hota jaayega
Guruji kee divya leela mein jabb tu
Apne aap ko khokar Unhe paayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 2, 2019

Om Namaha Shivaya
Aaj Ka Suvichaar 🙏🏻🙏🏻 # 561

Guruji Kee Chhatrachhaaya Mein Hain Hum

Kalyuga kee leela hai badi niraali
Yahaan aksar ek haath se bajti hai taali
Ho jaati hai kayee baar hairaani aur pareshaani
Kyunki hum sab insaan karte hain bahut naadaani

Guruji kee chhatrachhaaya mein hain hum
Isliye sabka kaam chal pa raha hai
Lekin udaasi hoti yeh dekhkar
Ki kis tarehn se insaanon ka imaan ja raha hai

Sab kuch toh Guruji dekh rahei hain
Phir kyun swayam ko aur doojon ko dete hain hum dhokha
Kyun nahin sudhar jaate hain hum
Jab Guruji baar baar de rahei hain mauka

Keval Guruji ka bhakt kehlaana hee kaafi nahin hai
Hamein is ohdey par kharaa utarnaa zaroori hai
Sabke vichaaron aur karmon par nazar hai Guruji kee
Isliye jhooth ka saath dene kee nahin koi majboori hai

Ek na ek din sabne yahaan se chale jaana hai
Tabb jhootha dikhaawa aur fareb kaam nahin aana hai
Agar sach mein Guru naam ka dhan kamaana hai
Toh hamein achchaayee kee oar kadam badhaana hai

Bheed badhegi aur pakki sangat reh jaayegi muthi bhar
Yeh Guruji ne kahaa hai
Har sachche bhakt ne uss muthi mein rehne ke liye
Itna kuch sahaa hai

Sachchaayee hee hai sachkhand takk pahunchne kee pehli seedi
Niswaarthta bhi sachkhand kee oar le jaayegi
Jo bhakt Guruji ko sarvsamarpan karega
Uskee kismat Guruji kee kripa se sanvar jaayegi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 1, 2018

Om Namaha Shivaya
Aaj Ka Suvichaar 🙏🏻🙏🏻 # 195

       Tu Bahut Khushnaseeb Hai

Guruji shaktiswaroop hain
Guruji shantiswaroop hain
Soorya bhi Unke tej se sharmaata hai
Guruji swayam jyotiswaroop hain

Guruji tujhe detein avsar hain
Guruji kee vajeh se tu agrasar hai
Tere har karam par aye Guru ke bande
Guruji kee hameshaan nazar hai

Guruji hee tere sur ka saaz hain
Guruji hee teri awaaz hain
Saari duniya se beshaq chhupaa le tu
Guruji jaantei tera har raaz hai

Guruji teri hansee mein hain hastey
Guruji tere liye kashton mein hain phanstey
Mehsoos kar toh jaanega tu
Guruji tere dil mein hain bastey

Guruji sachkhand se aayein
Guruji tujhe sahi raah dikhaayein
Uspar chalna tera dharam hai
Guruji tujhe yahee sikhaayein

Guruji hee tere pita aur mata hain
Guruji hee tere annadaata hain
In saanson ke liye Unka baarambaar shukrana
Kyunki Guruji hee tere janmadaata hain

Abb toh Guruji hee tera naseeb hain
Aur Guruji tere bilkul kareeb hain
Yahee toh hai hakeekat
Ki tu Guruji ko paakar bahut khushnaseeb hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 1, 2019

Om Namaha Shivaya
Aaj Ka Suvichaar 🙏🏻🙏🏻 # 560

    Guruji Bin Nahin Hai Guzaara

Guruji se jod lo apne dil kee taar
Phir na hogey pareshaan baar baar
Guruji har pal sunenge tumhaari pukaar
Phir kyun hoga kisee aur ka intazaar?

Chaahe milenge kayee loag aam taur se
Na rakho apekshaa kisee aur se
Guzar rahey ho tum jis bhi daur se
Buss, swayam ke bheetar dekho gaur se

Apni antaratma mein jhaankoge tum jab
Guruji ko har pal sangg paaoge tum tabb
Chaahe apnapan dikhaayein tumhe sabb
Keval Guruji hee Hain sachche meet aur hamaare Rabb

Guruji jab saath Hain tumhaare
Phir chaahe chhoot jaayein baaki sab sahaare
Dhyan rakhna ki dil Guruji ko na bisaare
Vahee pahunchaayenge tumhaari naiya ko kinaare

Kyunki Guruji hee Hain aslee sahaara
Baaki sab kuch hai mithya ka nazaara
Agar bhool jaao toh khud se kehna tum dobaara
Ki Guruji bin tumhaara nahin hai guzaara

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 31, 2018

Om Namaha Shivaya
Aaj Ka Suvichaar 🙏🏻🙏🏻 # 194

               Zindagi Kee Kitaab

Har din zindagi kee kitaab ka
Ek anmol panna hai
Hamaari kitaab padhne yogya ho
Yeh hum sabki tamanna hai

Har panne par likhtey jaa rahein hain
Hum apne jeevan kee kahaani
Yeh kahaani kisee aur kee nahin hai
Yeh hai aapki aur meri zubaani

Maana ki Guruji ke anumodan ke bina
Ek patta bhi nahin hil sakta
Lekin hamaare karmon ka phal toh
Hamaare bhogne ke liye hee hai paktaa

Jaisi khaad baag mein daalenge
Phool vaisa hee khilega
Jaise karam karenge hum sabb
Phal vaisa hee milega

Karve phal ko khaakar
Maali ko na dena dosh
Niyati aisi badlegi
Ki ud jaayenge tere hosh

Meethe phal ka anand lekar
Karna Maalik ka shukrana
Aise karam na karna kabhi
Jis se baad mein padey pachchtaana

Tere yahaan se jaane ke baad bhi
Teri kitaab kabhi toh padhi jaayegi
Teri atma ko shanti milegi agar
Veh kitaab har chehre par muskaan laayegi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 31, 2019

Om Namaha Shivaya
Aaj Ka Suvichaar 🙏🏻🙏🏻 # 559

            Guruji Kee Divya Leela

Andhere se tu na hona niraash
Guruji har pal hain tere saath
Ve laayenge tere jeevan mein prakash
Unhee ka kar tu simran aur paath

Akelepan se nahin tu ghabrana
Guruji hain tere meet
Chalte huey peechhe na hatt jaana
Kyunki antt mein hogi teri jeet

Dhaane de zulm zamaane ko
Sabka hisaab hai Guruji ke paas
Ansunaa kar de tu har taane ko
Aur ab bilkul bhi na ho udaas

Museebaton ke pahaad dey rahei hain tujhe chunaauti
Guruji ka naam lekar tu badhta chal
Guruji kar rahei hain tere karmon kee kataauti
Tu safaltaa kee seedhi par chadhta chal

Teri suraksha ka kavach hain Guruji
Teri zindagi ka meetha sach hain Guruji
Khushnaseeb hai tu ki tu Unkee sharan mein hai
Tu Unka phool jaisa bachcha hai jo Unke charan mein hai

Ab toh yakeenan hee ho raha hai tera uddhaar
Buss sukh mein dukh mein tu Guruji ko pukaar
Guruji kee divya leela hai aprampaar
Tera bhi awashya hoga beda paar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 30, 2018

Om Namaha Shivaya
Aaj Ka Suvichaar 🙏🏻🙏🏻 # 193

 Aapse Hee Jeene Kee Shakti Guruji

Aapse hee jeene kee shakti Guruji
Aap hee mere jeevan ka geet
Aap hee hain mera atmavishwaas
Aur Aapse hee meri preet

Aapse hee ummeed ke chirag jalein
Aap hee dikhaatey hain raah
Aapse hee milta protsaahan
Aur Aapse hee jeene kee chaah

Aapse hee hai gurbani ka arth
Aap hee shabad ka sangeet
Aapse hee har sangharsh mein sahaara
Aur Aapse hee meri har jeet

Aapse hee yeh chaand aur sooraj
Aap hee hain Dhruv Tara
Aapse hee har rachna hai
Aur Aapse hee jagg saara

Aapse hee srishti ka nirmaan Guruji
Aap hee hain Ram aur Shyam
Aapse hee sabka uddhhaar Guruji
Aur Aapse hee sarv-kalyaan

Aapse hee mere shabd Guruji
Aap hee shabdon ka saaz
Aap hee detey hain prerna
Aur Aapse hee yeh awaaz

Aapse hee abb zindagi hai
Aap hee hain Bhagwaan
Aapse hee har saans hai meri
Aur Aapse hee hai nirvana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 30, 2019

Om Namaha Shivaya
Aaj Ka Suvichaar 🙏🏻🙏🏻 # 558

                Har Janam Ke Liye

Shradha se sajaa lein nainon ka darpan
Nishchint ho jaayein kar Guruji ko sarvsamarpan
Unhee ke divya prem mein kho jaayein
Har janam ke liye Guruji ke ho jaayein

Simran mein har pal Guruji ko yaad karein
Unke khayaalon se dil kee nagri ko aabaad karein
Neevenpann ke beej hum bo paayein
Har janam ke liye Guruji ke ho jaayein

Sewa kar lein niswaarthta aur chaav se
Satsang mein baithein bhakti ke bhaav se
Unhee ke gungaan ke nagme ko gaayein
Har janam ke liye Guruji ke ho jaayein

Seekh jaayein Guruji kee razaa mein raazi rehna
Guruji ke naam kee mala ko banaa lein apna gehna
Unhee ko arpan kar dein hum jo paayein
Har janam ke liye Guruji ke ho jaayein

Bahuton se achche hain haalaat hamaare
Hamaari saansein chal rahi hain Guruji ke sahaare
Apne aur doojon ke jeevan mein sakaaraatamakta laayein
Har janam ke liye Guruji ke ho jaayein

Guruji ka karein har pal shukrana
Unhe dein hum apne paak prem ka nazraana
Unhee kee goad mein sadaa ke liye so jaayein
Har janam ke liye Guruji ke ho jaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 29, 2018

Om Namaha Shivaya
Aaj Ka Suvichaar 🙏🏻🙏🏻 # 192

   Aye Musaafir Kahaan Chalaa Tu

Aye musaafir kahaan chalaa tu
Is agyan ke timir mein
Aa Guruji ke charnon mein aaja
MahaShiv ke shivir mein

Kyun tu itna ghabraa raha hai
Dekh ke chaaron oar andhera
Waqt ke saath Guruji kar denge
Teri zindagi mein sunehra savera

Itna tu kyun soch raha hai
Yoon hee baithey baithey
Kya teri aankhein thaki nahin hain
Jo tere ashru abhi bhi hain behte?

Peeth par jabb milti hai shabaashi
Tabb toh anand aata hai
Lekin peeth peeche hee milta hai dhokha
Toh veh sukh aur chayn le jaata hai

Guruji tere raksha kavach hain
Tujhe sambhaal Ve lenge
Jo karmon ke khaatey mein likhein hain
Veh kasht bhi kumm kar denge

Guruji ka prem aur ashish mil jaaye
Is-se anmol na hai koi bhi saugaat
Yeh bhi toh Guruji ki hee vadiaayi hai
Varna teri aur meri toh itni bhi nahin hai aukaat

Guruji kee sharan mein aane ke baad
Burey din burey nahin rehte
Subah ka bhoola shaam ko ghar aa jaaye
Toh usey bhoola nahin kehte

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 29, 2019

Om Namaha Shivaya
Aaj Ka Suvichaar 🙏🏻🙏🏻 # 557

        Kar Lein Guruji Kee Bandagi

Hum Guruji ko paakar kitne dhanwaan hain
Shaayad hum is sach se anjaan hain
Ve sanvaarte hamaare jeevan kee daastaan hain
Guruji toh sach mein itne mahaan hain

Bahut shakti hai Unki jai jai kaar mein
Bahut shanti hai Unke nirmal pyaar mein
Hamaare kalyan ka hee ikraar hai Unke inkaar mein
Isliye bahut meetha phal chhupa hai har intazaar mein

Guruji Apne har bhakt se karte hain aseem pyaar
Unke prem aur Unki shakti se hee chal raha hai yeh sansaar
Har pal har bhakt ke liye khulein hain Guruji ke dwaar
Har pal Guruji suntei hain Apne har bhakt kee pukaar

Kyun na kaam karein hum aise
Ki Guruji ko hum par garv ho
Kyun na har din ko jee lein aise
Jaise koi vishesh parv ho

Ek anmol saugat hai yeh insaaniyat
Anokhi shanti deti hai ruhaaniyat
Aayiye, Guruji kee kripa se jee lein ruhaani zindagi
Aayiye, shudh bhaav se hum sab kar lein Guruji kee bandagi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 28, 2018

Om Namaha Shivaya
Aaj Ka Suvichaar 🙏🏻🙏🏻 # 191

        Paa Lo Har Mandir Ka Sukh

Guruji ne sangat ke liye
Bade Mandir hai banaaya
Kalyuga kee kadak dhoop mein
Vahaan miley taaki sheetal chhaaya

Aajkal ke haalaat mein toh
Pareshaan karey apna bhi saaya
Aise mein Guruji kee sharan mein
Anginat bhakton ne chayn hai paaya

Chaar prakaar ke mandir hain
Jahaan hum sabb rehte hain
Ve Bade Mandir se bhi pehle aayein
Hamaare Guruji yeh kehte hain

Pehla toh hai mann Mandir
Jahaan prem ko vaas karaana hai
Mann mein shudh vichaar aur niswaarth-taa basaakar
Paana Guruji ke naam ka khazaana hai

Uske baad hai tann Mandir
Apne shareer ko swasth banaana hai
Swachhataa aur aarogya shastra se
Yeh farz bakhoobi nibhaana hai

Phir aati hai kamra Mandir kee baari
Jahaan raho sumel ke bhaav se
Saaf rakho sadaa kamre ko
Prem se aur bade chaav se

Ghar Mandir aata hai phir
Isko bhi jannat banaao
Pyaar se raho sabke sangg
Aur khushiyan phailaao

In sabke pashchaat hee aaye
Bade Mandir ka naam
Jahaan pahunch kar mil jaata hai
Bhakton ko Shiv Dhaam

Guruji kehte hain ki pehle sanvaaro
Mann, tann, kamra, aur ghar
Phir baaraahn teerath ka anand lo
Bade Mandir ke dar par

Kismat se hee milta hai
Avsar kisee ko itna shubh
Jaane na doh isey vyarth tum
Paa lo har Mandir ka sukh

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 28, 2019

Om Namaha Shivaya
Aaj Ka Suvichaar 🙏🏻🙏🏻 # 556

             Guruji Kee Jai Jai Kaar

Duur kshitij kee oar dekh kar
Saagar ne poochhaa lehron se
Mann ke darpan mein dekh kar
Nainon ne poochhaa chehron se

Vahee sawaal thaa sabka
Ki manzil chhupi kahaan hai
Vahee fikr thee sabko
Ki kaise pahunchnaa vahaan hai

Ambar mein uday hotey sooraj ne
Sabki fikr kee vajeh lee jaan
Usne muskuraakar vahaan ishaara kiya
Jahaan Guruji thei viraajmaan

Guruji ke abhamandal ka itna divya thaa noor
Ki ek pal mein hee mann ke saagar par chhaaya bhakti ka suroor
Dheere dheere har shankaa honei lagee duur
Aur har vehem aur ahem honei lagaa chuur chuur

Guruji kee karuna se antt hua agyan ke andhere ka
Dekhte hee dekhte aagaman hua gyan ke savere ka
Lehron ne kinaare par dee apne aane kee dastak
Chehron ne Guruji ke charnon mein jhukaaya mastak

Guruji kee kripa se sabka hua uddhaar
Manzil paa kar sabne kee Guruji kee jai jai kaar
Har bhakt kee yeh sundar kalpana kaash bann jaaye sachchayee
Sabka uddhaar ho jaayega, yeh hai hamaare Guruji kee vadiyaayee

🌹🌹🌹🌹🌹🌹🌹

Jai Guruji 🙏🏻🙏🏻
Dhirja