Author: dhirjabhat

September 16, 2018

Om Namaha Shivaya
Aaj Ka Suvichaar 🙏🏻🙏🏻 # 210

        Buddhi Aisee Deejiye Guruji

Buddhi aisee deejiye Guruji
Ki karam hamaare achche hon
Insaaniyat ka bhaav ho
Aur mann se hum sachche hon

Shradha aisee ho hamaari Guruji
Ki kardein Aapko sarv-samarpan
Antaraatma itni saaf ho
Ki dekh sakein bin laaj ke darpan

Bhakti hamaari itni gehri ho
Ki mahasaagar bhi uthalaa laage
Ahem vehem ko chod kar peechhe
Hum azaad hokar badhein aagey

Paakhand na karein kabhi bhi hum
Sachchaayi kee raah par chalein
Neeyat hamaari saaf ho
Aur karam hamaare phalein

Mann mein asur bhaav ka kachhraa hai
Usey Aap hee daata saaf karo
Paapi hain hum kayee janmon ke
Kripa kar hamein maaf karo

Chhoti see ek jageh de doh Maalik
Aap apne kamal charan mein
Koi bhi aur tamanna na ho dil mein
Buss le lo Aap Apni sharan mein

Khwaayish hai ki Apne dar se
Kabhi na Aap lautaana
Jabb aaye jagg se jaane kee bela
Guruji, tabb Aap hee lene aana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 16, 2019

Om Namaha Shivaya
Aaj Ka Suvichaar 🙏🏻🙏🏻 # 575

               Guruji Ke Bharose

Bekaar kee baaton mein waqt zaaya na kiya kar
Koshish kar ki doojon kee kamzoriyon par dhyan na diya kar
Zindagi ka ek ek pal hai ratnon se bhi anmol
Isliye isey tu kalyuga ke kachche taraazu mein na toal

Tujh mein hain jo khaamiyaan, unpar de tu dhyan
Guruji se tu baat kar, aur Unka kehna tu le maan
Abb takk toh swayam se bhi hai tu anjaan
Phir kis baat ka ghamand, aur kaahe kee jhoothi shaan?

Apni kamzoriyan aur apna har karam kar de Guruji ko arpan
Har pal kee kismat kar de Guruji ko samarpan
Shradha se Guruji ka naam tu japta chal
Agyan kee nidra se abb tu jagtaa chal

Sahaayta karenge teri, Guruji madadgaar Hain
Arzi sunenge teri, Guruji parwardigaar Hain
Murshid Hain Ve tere, jeena sikhaayenge tujhe
Maargdarshak Hain Ve tere, raasta dikhaayenge tujhe

Guruji ke bharose zindagi tu guzaarta chal
Beetey huey kal ko aaj ke marham se sanvaarta chal
Aane waale kal ke liye bhi Guruji ka ashirwaad paata jaa
Har kshan tu Guruji se pehle se bhi zyada kareeb aata jaa

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 15, 2018

Om Namaha Shivaya
Aaj Ka Suvichaar 🙏🏻🙏🏻 # 209

           Guruji Tujhko Dekh Rahei Hain

Shiv Yog kehta hai
Har cheez bhaav re
Phir kyun tu apni mukti ko
Lagaata hai daav pe?

Guruji tujhko dekh rahei hain
Tu reh sabke sangg pyaar se
Baaki loag jaisa bhi karein
Tu na mukarnaa achche vyavhaar se

Jhooth aur kapat hai phayl raha
Chhaaya hai kalyuga ka andhera
Lekin tu sachchi shradha rakh
Aur dekh apne bheetar ka savera

Oopari dikhaawe se milegi jo safaltaa
Veh pal doh pal kee hogi
Uske baad kee vifaltaa
Vahee jaane jisne hai bhogi

Guruji bhi dekhein teri shradha
Aur parkhein Ve teri bhavna
Jo Unse karey niswaarth prem
Uskee pooran karein Ve manokaamana

Jo mushkilon ke baavjood bhi
Unka naam prem se gaata jaaye
Uss bhakt ke dil aur chehre par
Guruji ka ujjwal noor chhaata jaaye

Guruji Apne ashish se detein hain
Uss insaan ko sheetal chhaaon
Aise shaqs ko dhonei dete
Guruji Apne paawan paaon

Unhee pairon ke charnaamrit se
Bhakt ka hota punar-janam
Guruji Apni divya leela se
Har letey phir uske karam

Guruji hee Hain jo bachaa sakte hain
Hamaari doobti hui niyati ki naav
Isliye sadaa rakh Apne Guruji ke prati
Tu shradha aur prem ka bhakti bhaav

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 15, 2019

Om Namaha Shivaya
Aaj Ka Suvichaar 🙏🏻🙏🏻 # 574

 Hamaari Kismat Kee Kori Chaadar

Kaun kehta hai ki aansoon bezubaan hain
Ve karte dil kee vyatha ko bayaan hain
Guruji ko toh hamaare har aansoo ka dhyan hai
Aur keval Unhe usey muskaan mein badalne ka gyan hai

Guruji se hee hamaara ateet hai juda
Guruji se ho raha hamaare bhavishya ka nirmaan hai
Har lamhe ke sarkar Hain Guruji
Aur Guruji hee hamaara vartmaan hain

Unke dil jaisa komal dil poori srishti aur uske paar bhi nahin
Guruji jo hamaare liye sochte Hain vahee hai sahi
Isliye hamein sochne kee zaroorat hee nahin
Sarvsamarpan kar dein Unhe, hamaare liye har nirnaya lein Vahi

Hum toh galat soch sakte hain
Lekin Guruji kee soch toh sarvottam hoti hai hameshaan
Hum tark shaashtra kar ke thakte hain
Phir antt mein hotey hain pareshaan

Kyun na shuruaat hee karein samarpan se
Guruji ko saump dein parinaam kee fikr
Buss shudh karam karne mein lagaayein dhyan
Aur simran kar ke paayein Guruji se gyan

Aankhon kee namee muskaan mein badal jaayegi
Hamaari raahon mein ummeed kee jyot jal jaayegi
Guruji kee leela ke indradhanush ke rangon se
Hamaari kismat kee kori chaadar rangg jaayegi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 14, 2018

Om Namaha Shivaya
Aaj Ka Suvichaar 🙏🏻🙏🏻 # 208

      Hamaara Ekmaatra Sahara

Shanti hee atma ka dharam hai
Aur shanti bhaav changaa karam hai
Phir kyun kalyuga mein hai ashaanti itni
Kyun hai ghor parivartan kee kranti itni?

Kaam aur krodh badhte jaa rahein hain
Moh mein, lobh mein, loag paglaa rahein hain
Ahankaar toh aise ho gaya hai insaan ko
Ki bhool hee gayein hain veh Bhagwaan ko

Ek dooje se aagey badhne kee dhun mein sabb sawaar hain
Pehle se kaheen zyaada insaan beemaar hain
Beghar ho gaye hain kitne loag
Aur sabhi koi dukh rahein hain bhog

Bhukamp, baad, jwalamukhi jaan le rahein hain
Aadmee hee aadmee par vaar kar rahein hain
Goliyaan chalti hain har din kaheen na kaheen
Banjar hoti jaa rahee hai dheere dheere zameen

Aise mein bhi humko mil gayee hai
Guruji kee sharan
Kyun na phir sudhaar lein apne toh hum karam
Guruji ne kiya hai hum par itna upkaar
Ki aise maadey samay mein sunee hamaari pukaar

Guruji, Aap sangg hain toh chaahe toofaan aaye
Chaahe zameen, chaahe aasmaan hil jaaye
Aap MahaShiv aayenge kar Nandi kee sawaaree
Aur Aapka trishul karega raksha hamaari

Guruji, Aap toh hain leeladhaari
Abb toh Aap par chod dee fikrein saari
Hamein toh maalum nahin ek bhi pal ka
Aur Aapko gyan hai kal, aaj, aur kal ka

Guruji, Aapko shukrana hamaara
Aap yakeenan har lenge kasht saara
Aap hee hain hamaara ekmaatra sahaara
Hamaara udhdhaar hoga Aapke hee dwaara

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 14, 2019

Om Namaha Shivaya
Aaj Ka Suvichaar 🙏🏻🙏🏻 # 573

                   Mool Lakshya

Jeevan ke raaste mein jab bhi aaye koi museebat
Guruji ne haath thaama hai tera, shaant hoja tu jaan kar yeh hakeekat
Agar lagey kabhi tujhe, ki bhar gayee hai tere paap kee gaagar
Toh praayshchit kar le, kyunki Guruji Hain kshamaa ka mahaasaagar

Zamaana kya kehta hai, tu na kar is baat kee parvaah
Tu buss Guruji kee bhakti mein badhaata chal apna utsaah
Mann kee veena se sajaa le tu sur Gurbani ka
Jiske aasre sanvaar le tu kissa apni zindagani ka

Guruji ko sarvsamarpan kar aur mai apni mitaa le
Ruhaani raaste par aane wali har baadha ko tu hataa le
Kyunki ruhaaniyat se duur honei se hoga atma ko nuksaan
Is atma ne shareer ka libaas jo odha hai, veh toh hai do pal ka mehmaan

Guruji ne toh tujhe kisee pravachan ka ghulam nahin hai banaaya
Unhonei toh tujhe sewa aur simran baksh kar bhalaayee ka raasta hai dikhaaya
Phir kis gehri soch mein khadaa hai tu?
Kyun abb bhi asmanjas mein padaa hai tu?

Atma-vishwaas ko banaa le apni dhaal
Aur saamna kar zamaane ka tu datt kar
Atma-gyan kee gehraayee ko khoj
Duniyadari nibhaa le laukikta se tu hatt kar

Divya gyan mein doobna hai mool lakshya ruhaaniyat ka
Achche karam karna hai kartavya aur dharam insaaniyat ka
Na rehne de tu apni zindagi ko ek mithyapoorna afsaana
Har haal mein tu kar Guruji ka beintehaa shukrana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 13, 2018

Om Namaha Shivaya
Aaj Ka Suvichaar 🙏🏻🙏🏻 # 207

  Aapse Hee Har Shubh Aarambh

Ganesh Chaturthi ke shubh avsar par
Sabko haardik shubhkaamnaayein
Guruji kee kripa se Aap sabki
Poorna hon sab manokaamnaayein

Guruji, Aap mein samaatey hain
Brahma Vishnu aur Mahesh
Aap maarg se har baadha hataayein
Isliye Aap hee hain hamaare Ganesh

Pyaar se sabb bhakt Aapko
Modak itiyaadi khilaayein
Shradha se pushp anek
Aapke charnon mein chadhaayein

Shubh kaaraj ke aarambh mein
Bhakt Gajanand ko poojein
Hamein Aap mein hee dikhein Ganesha
Is paheli ko hum kaise boojhein

Aap hee hain sabb dukhon ke harta
Aap hee hamaare sukh karta
Chintamani bhi Aap hamaare
Aapne hee hain kaaj sanvaare

Aap hee hain Avaniish
Aur Aap hee Jagdiish
Aap hee Prathameshwara
Aur Aap hee Vighneshwara

Aap hee hain Siddhipriya
Aur Aap hee Buddhipriya
Aapse hee hai kshamakaram
Aur Aapse hee hai jeevan maran

Aapse hee hai har shubh aarambh
Aapse hee is jagg ka praarambh
Milti rahegi jo Aapki divya drishti
Toh nikhartee rahegi sampoorna srishti

Sabb kuch Aapka hee diya hua hai
Abb kya hum Aapko dein uphaar
Buss dua hai ki yeh paawan tyohaar
Sabki zindagi mein laaye sukh aur pyaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 13, 2019

Om Namaha Shivaya
Aaj Ka Suvichaar 🙏🏻🙏🏻 # 572

              Uth Jaag Musaafir

Uth jaag musaafir bhor bhayee
Guruji kee nazar teri oar gayee
Is se milta hai yeh paigaam
Ki ab hoga tera kalyaan

Guruji toh MahaShiv ka avataar hain
Tera uddhaar karne ke liye bekaraar hain
Tu Unpar vishwaas kar ke dekh toh le
Unhe apne jeevan kee doar toh de

Tere bigde kaaj bann jaayenge
Zindagi ke toofan thamm jaayenge
Tere raaste mein badhaayein jo aayengi
Guruji kee mehar se hatt jaayengi

Tujhe Unse darne kee zaroorat nahin
Unse judne ke liye hai har mahoorat sahi
Tu keval Guruji se pyaar kar
Unke deedar ka tu intazaar kar

Ek din aisa zaroor aayega
Jab tera Unse divya milan ho jaayega
Tab tera shareer toh yahaan reh jaayega
Aur tu atma ke roop mein Guruji mein samaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 12, 2018

Om Namaha Shivaya
Aaj Ka Suvichaar 🙏🏻🙏🏻 # 206

Aapke Naam Ka Jo Lagaaya Hai Tilak

Guru kee khoj mein bhatakte hain kayee praani
Is talaash mein guzar jaati hai zindagaani
Kaheen par bhi jaakar shanti milti nahin
Aur koi bhi raasta lagta nahin sahee

Jo kayee kashtiyon mein daaltey apne paaon
Veh bhatakte rehte hain dar dar, gaaon gaaon
Aapka shukrana ki Aapne apne dwaar par bulaaya
Jahaan sangat ne teenon lok ka sukh aur chayn paaya

Guruji, Aapke naam ka jo lagaaya hai tilak
Chehre par tabb se atmavishwaas raha hai chhalak
Zindagi dekhne ka badal gaya hai nazariya
Swayam ke liye bhi sanvar gaya apna ravaiya

Guruji, Aapki sharan mein toh badal gayee hai kismat
Jee chaahta hai har pal karein Aapki sewa aur khidmat
Aapka naam japne kee har pal rehti hai chaahat
Aur naam japne se milti hai dil ko raahat

Vehmon se duur hongei, tabhi toh Aapke aur bhi kareeb aayenge
Ahem ko khoyenge, tabhi Aapki rehmat ko paayenge
Paakhand tyaag kar achche karam kamaayenge
Varna jeevan ke kshan yoon hee vyarth ganvaayenge

Na rakhein kisee se bhi koi apekshaa
Kewal Aapse milan kee karein prateeksha
Unn intazaar ke lamhon mein kar lein sewa aur simran
Aur apna samast jeevan kar dein Aapko arpan

Agar hum Aapko dhyaayein din aur raat
Toh ghabraane kee koi nahin hai baat
Aapne thaama hai jo hamaara haath
Toh Aap sadaa hain hamaare saath

Aapki baat maanenge hum
Toh hamein hee hoga laabh
Moksh kee oar le jaayenge Aap
Aur kar denge hum sabko maaf

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 12, 2019

Om Namaha Shivaya
Aaj Ka Suvichaar 🙏🏻🙏🏻 # 571

                    Aakhir Ek Din

Is zindagi ka taur tareeka
Hamein nahin aata samajh
Har tarehn kee uljhanon mein
Hum aksar jaatey hain ulajh

Uljanein toh Guruji suljhaayenge
Hamein karni hai ardaas
Guruji ka nirantar dhyan kar ke
Poori karni hai shanti paane kee aas

Yakeenan Guruji hamein apne kareeb laana chaahte hain
Tabhi toh Ve hamein Apne charnon mein bithaate hain
Hum par kripa kar hamein satsang mein bulaate hain
Sangat se divya anubhav suntei aur sunvaatey hain

Guruji ne hamein simran kee dee hai daat
Simran dwaara Ve sadaa rehte Hain hamaare saath
Sewa ka avsar jo miley toh veh bhi hai Unkee inaayat
Buss Ve chaahein ki hum karein dil se Unkee ibadat

Jitnee karenge hum sadhna
Utna aur hoga hamein Guruji se pyaar
Aur sadhna ke dwaara hee hum
Samarpan karne ke liye hongei tayyaar

Guruji hum sabko raah dikhaayein
Jeene ka tareeka sikhaayein
Kyun na hum Guru gyan ko apnaayein
Aur swayam ka drishtikoan badhaayein

Aakhir ek din aisa sabki zindagi mein aayega
Jab apna saaya bhi saath chod jaayega
Jo apna haath Guruji ke haath mein thamaayega
Veh yakeenan Unkee kripa aur karuna se tarr jaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 11, 2018

Om Namaha Shivaya
Aaj Ka Suvichaar 🙏🏻🙏🏻 # 205

            Raaste Ka Shukrana 

Aye raaste, tu mujhko lekar chal diya kahaan
Kya mujhe khushi kee seher milegi vahaan?
Kabhi daayein, kabhi baayein, tu mudta jaa raha hai
Mere dil ka panchhee tere sangg udta jaa raha hai

Raaste ne mujhe pyaar se diya yeh jawaab
Thoda sa mai hoon seedha, thoda hoon mai kharaab
Tu mujhpar chalte huey na rakh kadmon ka hisaab
Jahaan mai tujhe pahunchaaoonga, veh manzil hai lajawaab

Poochhne par raaste ne mujhse yeh kaha
Mai tujhe Guruji ke paas hoon le ja raha
Yeh sunn kar jaagrit hui mere dil kee aas
Sochne lagee ki kabb pahunchoongi Guruji ke paas

Is pyaare khayaal se aayee mujhmein itnee oorja
Ki Guruji ke alaava mujhe aur kuch bhi nahin soojha
Mai raaste kee baat maan kar uspar chal padee
Taaki jaldi aaye Guru milan kee shubh ghadee

Guruji ka naam lekar kasht gayee mai bhool
Raaste ke kaantey bann gaye komal phool
Paththar khud bakhud gaayab hotei chale gaye
Andhere mein divya roshni ke deep jal gaye

Guruji ke khayaalon mein hokar magan
Na dekhi zameen aur na dekha gagan
Buss Unkee hee dhun mein mai chalti gayee
Subah se hui shaam, aur veh bhi dhal gayee

Masti mein naach rahei thei vahaan moar
Peeli aur safed titliyaan theen chaaron oar
Gulab ke phoolon ka saundarya aur mehek
Akash mein udti chidiyon kee chulbuli chehek

Jhooley mein baithey Guruji lag rahei thei itne pyaare
Maathe par tejasvi Om aur nayn Unke itne nyaare
Charnon mein jabb Unke mainey sheesh jhukaaya
Toh Unka prem se bhara ashirwaad mainey paaya

Pahunchaaya jisne manzil par, uss raaste ka shukrana
Mera Guru mujhe mil gaya, phir kaisa abb ghabrana
Safal ho gaya abb meri zindagi ka afsaana
Yeh ati-anmol rishta har janam mein hai nibhaana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 11, 2019

Om Namaha Shivaya
Aaj Ka Suvichaar 🙏🏻🙏🏻 # 570

           Chaaron Oar Hain Aap

Shaayari mein Aap Hain Guruji
Kavita mein bhi Aap
Maatritva mein bhi Aap Hain
Aur mitrataa mein bhi Aap

Sapnon mein Hain Aap
Hakeekat mein bhi Aap
Maardarshan bhi Aapse
Naseehat mein bhi Aap

Ruhaaniyat mein Aap
Insaaniyat mein Aap
Karam mein bhi Aap
Aur dharam mein bhi Aap

Har granth hai Aapse
Har granth ka saar bhi Aap
Dharti ke is paar bhi Aap
Aur ambar ke uss paar bhi Aap

Aap hee Hain Rab kee moorat
Aap hee Hain farishtey kee soorat
Aapse hee hai har shubh mahoorat
Aap Hain is jind kee saanson kee zaroorat

Mann kee roshni hai Aapse
Gyan kee ujlee bhor Hain Aap
Sabka astitva hai Aapse
Sach mein chaaron oar Hain Aap

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 10, 2018

Om Namaha Shivaya
Aaj Ka Suvichaar 🙏🏻🙏🏻 # 204

            Jeevan Ko Saral Banaao

Guruji kehte hain
Jeevan ko saral banaao
Paanch khatarnaak dushmanon se
Apni jaan bachaao

Pehla dushman kaam
Kabhi na karne de aaraam
Har pal dil ko bhatkaata hai
Dil mein ashaanti laata hai

Krodh hai dushman dooja
Bhangg karta hai pooja
Sehat ko bhi pahunchti hai haani
Krodhit hona toh hai naadaani

Moh toh aur bhi bada dushman hai
Uss waqt toh rishta nibhaata hai
Jabb kisi se bichad jaayein hum
Toh phir yeh bahut sataata hai

Lobh toh maano jaise hai ik nashaa
Ho jaaye is se majboor mann kee dashaa
Jooaa hai yeh, jhoothi khushi deta hai
Badle mein hamaara sukh aur chayn chheen leta hai

Ahankaar bhi hamaara shatru hai
Pehle kitna oopar chadhaata hai
Phir ek jhatke mein dagaa dekar
Zor se neeche giraata hai

Kaam krodh moh lobh ahankaar
Detein hain nakaaraatmak shakti
Kabhi na honei dein mann ko tripti
Tabhi toh milti nahin inse mukti

Insaan daas bann jata hai inka
Kathputli kee tareh ye nachaate hain
Mann ashaant rehne lagta hai
Aur hum adheer ho jaate hain

Guruji kahein in mein matt phanso
In vish-roopi avgunon ka achcha nahin hai parinaam
Phir kyun na inhe hum tyaag dein
Aur jeevan mein paayein saatvik aaraam

Zara sochiye inke bina
Kitni phalegi hamaari bhakti
Aasakt na hongei inpar toh phir
Aasaani se mil jaayegi mukti

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 10, 2019

Om Namaha Shivaya
Aaj Ka Suvichaar 🙏🏻🙏🏻 # 569

          Madhur Aur Divya Jeet

Hamaara gyan aur drishtikoan toh seemit hai
Tabhi toh aksar hamaara hriday hota peedit hai
Guruji vahee karte hain jo hamaare hitt mein hai
Ve jaante hain jo bhi hamaare chitt mein hai

Jo bhakt satya ko apnaata hai
Veh Guruji se bahut himmat paata hai
Sachchaayee aur saralta ke anmol gehne
Guruji chaahein ki Unke sab bhakt pehnein

Neeche dharti aur oopar ambar hai
Inke beech mein toh sab aadambar hai
Is mithya aur dikhaawe se bach ke rehna
Varna karmon ka bhaari bojh padega sehna

Guruji ne liya hai hamein Apni sharan mein
Taaki hamein atma-bal miley janam aur maran mein
Simran aur sadhna se hee milegi shakti
Aur phir nishchay hee rangg laayegi bhakti

Insaan jeevan mein jab kabhi haarega
Ek simran hee hai jo hamein taarega
Jab sadhna se Guruji banenge meet
Toh vahee hogi hamaari sachchi jeet

Kyun na is madhur aur divya jeet ko Aamantrit karein jeevan mein apne
Taaki sach ho jaayein jo dekhey hain Humne Guru milan ke senehre sapne

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 9, 2018

Om Namaha Shivaya
Aaj Ka Suvichaar 🙏🏻🙏🏻 # 203

Andhere Se Tu Na Ghabraa Aye Bande

Andhere se tu na ghabraa aye bande
Tera Guru teri raah ka ujaala hai
Akelepan se na darrna kabhi tu
Tera Guru tera rakhwala hai

Jagg waalon ke chhote dil se maayoos na hona
Tera Guru bahut bade dil wala hai
Kalyuga mein duniya kitni bhi chaalaak ho
Tera Guru toh itna bhola bhaala hai

Jitna pyaar tu doojon ko dega
Tera Guru us-sey kaheen zyada tujhe dene wala hai
Jitne bhi kasht aayenge tere jeevan mein
Tera Guru unhey har lene wala hai

Bahut kumm kasht tujhe sehna padega
Tera Guru hee tere liye sehne wala hai
Tu buss shradha aur niswaarth bhav rakh
Tera Guru tere dil mein rehne wala hai

Thamaa dey tu Unhe apna haath aye bande
Tera Guru tere sangg chalne wala hai
Agar is dauraan zakhmi ho jaata hai tu
Tera Guru zakhm par marham malney wala hai

Abb takk baat bigad rahi thi toh niraash na ho
Tera Guru abb teri bigdi banaane wala hai
Bachcha bann kar rootha hai apne Guru se
Tera Guru pita bann ke tujhe manaane wala hai

Saara jagg chaahe tujhse rishta toad de
Tera Guru har rishta nibhaane wala hai
Agar tere jeevan kee naiya doobne lagey
Tera Guru tujhe kinaara dikhaane wala hai

Jahaan tujhe paaon mein chubhne lagein kaante
Tera Guru vahaan phool bichchhaane wala hai
Buss phir abb tu saari kee saari chinta chod de
Tera Guru tere liye dharti par bhi jannat banaane wala hai

🌹🌹🌹🌹🌹🌹🌹

Jai Guruji
Dhirja

September 9, 2019

Om Namaha Shivaya
Aaj Ka Suvichaar 🙏🏻🙏🏻 # 568

Guruji Se Hee Hain Saansein Hamaari

Guruji ke bheetar vaas karti hai Shiv jyoti
Unka har vachan hai ati anmol moti
Unke samaksh srishti kee har taakat hai chhoti
Unkee hukoomat sabki niyati par hai hoti

Har jeev ka karte hain Ve kalyaan
Hamaare liye dete hain Ve balidaan
Har chhoti aur badi baat ka Unhe hai gyaan
Unke liye hum sab hain ek samaan

Dete hain hamein niswaarth pyaar
Nainon mein Unke hai aseem dulaar
Dil Unka hai komal aur udaar
Aur leela Unkee hai aprampaar

Jiskee bhi atma mata ke sneh ke liye tarasti
Uspar Guruji kee mamta hai bharpoor barasti
Jisey pita ke pyaar paane kee ho manokaamna
Uska bhi haath pyaare Guruji ne hai sadaa thaamna

Guruji se hee hain saansein hamaari
Unhe ek pal bhi na bisraana
Yeh jeevan mila hai tohfe mein
Guruji ka baarambaar shukrana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 8, 2018

Om Namaha Shivaya
Aaj Ka Suvichaar 🙏🏻🙏🏻 # 202

             Zindagi Kee Raftaar

Itni tez raftaar se chal rahi hai yeh zindagi
Aao, Guruji kee hum kar lein bandagi
Duniyadaari ke silsiley toh chalte rahenge
Hamaare karam janmon takk phaltey rahenge

Apne pichhle karam lekar is duniya mein aaye hum
Phir kaisi khushi aur kaisa gumm
Dekhte hee dekhte yeh umr beet jaayegi
Karmon kee chakri phir bhi chalti jaayegi

Sabke saath prem ka rishta nibhana
Yeh prem hee hai zindagi ka khazana
Varna toh khaali haath yahaan hai aana
Aur khaali haath Guruji ne waapis hai bulana

Na khelein shatranj ahankaar kee
Phailaa dein roshni hum sab pyaar kee
Girtey huon ko uthaayein
Doobtey huey ko bachaayein

Sabb kuch jaante huey kyun banein hum anjaan
Achchhaayee ka hee hoga bhavishya mein achchhaa anjaam
Dua karein ki apni subudhhi se kabhi na karein galat kaam
Aur hamaare priy Guruji hum sabb par sadaa rahein meharbaan

Hamaare yahaan se chaley jaane ke baad
Hamaari prem bhari awaaz hee toh reh jaayegi yaad
Kyun na kar lein swayam ko ahem aur vehem kee zanjeeron se azaad
Phir bachh jaayenge hum honei se barbaad

Abb bhi hamaara bhavishya bigda nahin hai
Jabb hum nidra se jaagein vahee samay sahi hai
Hamaare achche karam zaroor rangg laayenge
Sachkhand mein Guruji lekar hamein jaayenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 8, 2019

Om Namaha Shivaya
Aaj Ka Suvichaar 🙏🏻🙏🏻 # 567

              Moksh Ka Kinaara

Karte hain Guruji har pal hamaara maargdarshan
Buss dekhna hai hamein apne dil ka darpan
Aur sun-ni hai apni chetna kee awaaz
Jiske sangg sajaana hai sukoon ke sur ka saaz

Na chahiye Guruji ko kuch bhi humse
Na hee hamaari kuch dene kee aukat hai
Unhee ka diya hua chadhaate hain Unhe bhog mein
Hamaari har saans bhi Unhee kee saugat hai

Hamaari zindagi kee doar hai Unke haath mein
Ve hee ummeed ka chiraag jalaate Hain niraasha kee raat mein
Ve hee likh kar phir dobaara likh dete Hain niyati
Ve hee hamaare karmon ke anusaar karaate hain hamaari adhyaatmik unnati

Itne jyotiswaroop Guruji ko paakar
Hamein nahin zaroorat aur kisee sahaare kee
Jeevan kee naiya ko mil gayee hai
Ek sunehri ummeed kinaare kee

Ab toh Guruji kee kripa se hamein
Tayy karna hai is zindagi ka safar
Aayiye, moksh ke kinaare takk pahunchne mein
Na chodein abb hum koi bhi kasar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 7, 2018

Om Namaha Shivaya
Aaj Ka Suvichaar 🙏🏻🙏🏻 # 201

          Sampoorna Samarpan

Aaj aur abhi mein hee jee lo tum
Kar lo simran Guruji ke naam ka
Subah dekhne ko miley toh shukr karo
Kyunki kya bharosa hai shaam ka

Sach mein Nanak dukhiya sabb sansaar
Yeh kshan zindagi mein na aaye baar baar
Ruhaani raaste par chal pado tum
Moksh kee manzil kee oar badho tum

Khushiyon se bhar poor ho jeevan sadaa
Kaayam rahe muskuraane kee yeh adaa
Zindagi mein kayee avsar milte hain baar baar
Lekin yeh zindagi toh milti hai sirf ek hee baar

Baahari dikhaavey se mugdh hokar
Maarg se vichlit na hona tum
Sabr aur shradha banaaye rakhna
Mushkilen bhi aayein toh na rona tum

Patthar par pistee hai jabb
Tabb mehndi rangg laati hai
Guruji imtehaan letei hain jabb
Tabb neeyat parkhee jaati hai

Ek baar jo Guruji ne tumhe chunn liya
Buss phir saari fikr chod doh
Unki razaa mein khushi se raazi rehkar
Tum Unke naam kee chunri oadh lo

Sewa, simran, aur satsang mein dhyan lagaao
Insaaniyat ko apna jeevan kardo arpan
Dekho toh sahi, kaise sanvarti hai zindagi
Guruji ko kar ke sampoorna samarpan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 7, 2019

Om Namaha Shivaya
Aaj Ka Suvichaar 🙏🏻🙏🏻 # 566

                 Simran Ke Phool

Jaise bhi rakhein Guruji
Yeh toh bilkul nishchit hai
Ki hum sab Unkee sharan mein
Poori tarehn se surakshit hain

Shukraana karein Unhe Unke dayaalu dulaar ka
Nazraana dein Unhe hamaare paawan pyaar ka
Sehensheelta se jhelein safar hum intazaar ka
Samajh lein ki koi kaaran hai Guruji kee oar se vilambh aur inkaar ka

Kyunki Guruji ke dil mein hamaare liye
Chinta bhi hai aur sahaanubhooti bhi hai
Hum sabki bhatkee naav ko Unhonei kinaara diya kyunki
Unhe hamaare adhyatmik safar kee anubhooti hai

Isliye ghabraane kee bilkul zaroorat nahin
Guruji ke chintan ke liye har mahoorat hai sahi
Chinta chod ke Guruji ka dhyan kar lein
Simran ke phoolon se apni jholi bhar lein

In phoolon kee khushboo se mehek jaayega hamaara jeevan
Is mehek se tarr jaayega mann, aur atma honei lagegi paawan
Saath mein jab hum kar denge Guruji ko sarv-samarpan
Toh ruhaaniyat ke komal patton se haraa bharaa ho jaayega dil ka upvan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja