Author: dhirjabhat

March 3, 2018

Om Namaha Shivaya
Aaj ka suvichaar🙏🏻🙏🏻

Jab lega Guruji ka naam
Hamaaraa har shwaas
Aur dil ko hoga poora
Guruji par vishwaas
Toh har mushkil lagne lagegi aasaan
Na hongei hum kabhi bhi pareshaan
Guruji ko kardein hum sab kuch arpan
Roshan kar lein apne dil ka darpan

🌹🌹🌹🌹🌹🌹🌹

Jai Guruji🙏🏻🙏🏻

Dhirja

March 3, 2019

Om Namaha Shivaya
Aaj Ka Suvichaar 🙏🏻🙏🏻

         Sach kehti hoon Guruji....

Jis raah par chalti thi mai niraash hokar
Veh udaas raah bhi suhaani ho gayi
Aapki sharan mein aane se mila mujhe jo sukh
Meri shakl soorat noorani ho gayi
Sach kehti hoon Guruji
Mai Aapki deewani ho gayi

Kshamaa kiya hai Aapne Guruvar
Jabb bhi mujhse naadaani ho gayi
Haath thaamkar sambhaala mujhe
Jabb jabb mujhe pareshaani ho gayi
Sach kehti hoon Guruji
Mai Aapki deewani ho gayi

Adhyatmik raasta dikhaaya Aapne
Aur yeh yatra ruhaani ho gayi
Aapki leela itni nyaari
Ki saarthak meri zindagaani ho gayi
Sach kehti hoon Guruji
Mai Aapki deewani ho gayi

Kaam hum aise karein ki Aap yeh kahein
Safal Aapki har qurbaani ho gayi
Har dukhi aap-beeti ko hum bhool jaayein
Kyunki veh baat puraani ho gayi
Sach kehti hoon Guruji
Mai Aapki deewani ho gayi

Mujh jaisi nacheez par Aapki
Itni meharbaani ho gayi
Abb toh Aapke naam
Mere jeevan ki kahaani ho gayi
Sach kehti hoon Guruji
Mai Aapki deewani ho gayi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 2, 2018

Om Namaha Shivaya
Aaj Ka Suvichaar 🙏🏻🙏🏻

Guruji hee thei, Guruji hee hain, aur Guruji hee rahenge sadaa
Guruji hamaare saath hain, chaahe duniya ho jaaye bewafaa
Isliye kyun na duniya ki baatein chhodkar
Hum Guruji mein hee magan ho jaayein
Unke hee paawan pyaar mein
Apne aap ko rangtey jaayein
Itna gehra hoga yeh pyaar ka rangg
Kyunki Guruji hain hamaare angg sangg

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 2, 2019

Om Namaha Shivaya
Aaj Ka Suvichaar 🙏🏻🙏🏻

                Aap Hee Aap Guruji

Phoolon ki meethi mehek mein
Chidiyon ki chulbuli chehek mein
Aap hee Aap Guruji, Aap hee Aap

Jal mein aur thal mein
Jeevan ke har pal mein
Hamaare kal, aaj, aur kal mein
Aap hee Aap Guruji, Aap hee Aap

Jyoti ke prakash mein
Dharti aur akash mein
Sadhna ke sakaash mein
Aap hee Aap Guruji, Aap hee Aap

Har kaam mein, har anjaam mein
Har ichchaa aur vardaan mein
Hamaare aatmasammaan mein
Bhakton ke dil-o-jaan mein
Aap hee Aap Guruji, Aap hee Aap

Mata pita ke pyaar mein
Bhakt ki pukaar mein
Jeevan ke aadhaar mein
Saare ke saare sansaar mein
Aap hee Aap Guruji, Aap hee Aap

Jeevan ke sukh dukh ka sahaara
Doobti hui naiya ka kinaara
Bhakti, prem, aur vishwaas hamaara
Sachkhand ke swarg ka sowmya nazaara
Aap hee Aap Guruji, buss Aap hee Aap

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 1, 2018

Om Namaha Shivaya
Aaj ka Suvichaar🙏🏻🙏🏻

Guru hee pehla satya hai
Govind satya hai dooja
Guru bin Govind ko na paayo
Chaahe karlo kitni bhi pooja

🌹🌹🌹🌹🌹🌹🌹

Jai Guruji 🙏🏻🙏🏻

Dhirja

March 1, 2019

Om Namaha Shivaya
Aaj Ka Suvichaar 🙏🏻🙏🏻

                Guruji Se Yaachna

Kalyuga ki tez aandhi mein
Hara bharaa vriksh hua hai khaali
Phir bhi khadaa hai is dharti par
Bann kar ek pareshaan savali

Aasmaan ki oar baahein pasaare
Is ped ki har tehni Guruji ko pukaare
Bin boley apne dukh ka izhaar karey
Ki kaise patjhad mein veh jeete jee marey

Kal takk jo phal deta thaa sabko
Aaj khud hee maange bheeksha
Kaan hain uske taras rahey
Sunn-ne Guruji ki deeksha

Kalyuga ke insaan kee haalat
Is vriksh ke jaisi hee hai ho gayee
Harey bharey jeevan ki bahaar
Patjhad mein kaheen kho gayee

Yahee haal hua hai hum insaanon ka
Hum bhi sanskaaron se huey hain khaali
Zinda hain Guruji ki kripa se kyunki
Ve hain hamaare upvan ke maali

Aao vriksh ki bhanti hum bhi
Guruji se karein yeh yaachna
Ki sadbuddhi ke phal upjaayein hum
Hamaare jeevan par aaye koi aanch na

Haraa bharaa rahei sadaa hamaara jeevan
Shubh sanskaaron ke phal aur phool se
Doojon ko bhi phal baantein neeven hokar
Bachey rahein kukarmon ki dhool se

Shudh bhawnaaon ki hariyaali se
Kitna sundar ho jaayega sansaar
Aao hum sabb is ped se seekhein
Jo khadaa hai apni baahein pasaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Feb. 28, 2018

Om Namaha Shivaya
Aaj ka suvichaar 🙏🏻🙏🏻

Guruji Ki sharan mein jaise hi hum aaye
Hamaare jeevan Ki bagiyaa khil gayi

Unhonei kahaa, “Tera kalyaan kitta”
Toh jahaan Ki har khushi mil gayi

Ab har saans mein pyaare Guruji ka hai naam
Unhee ko yaad karein, chaahe subah ho ya ho shaam

🌹🌹🌹🌹🌹🌹🌹

Jai Guruji🙏🏻🙏🏻

Dhirja

February 28, 2019

Om Namaha Shivaya
Aaj Ka Suvichaar 🙏🏻🙏🏻

            Jai Jai Guruji Dugri Waale

Jai Jai Guruji Dugri waale
Apne bhakton ke rakhwaale
Aapne sangat ke kaaj sambhaale
Har bhakt Aapko dil mein basaa le

Pyaare Guruji Aap hain Shiv avataari
Nandi ji hain Aapki savaari
Sach mein Aap hain leeladhaari
Aapke saamne har vipda haari

Dhan Dhan Guruji Aap hain pyaare
Sharan mein Aapki hain sukh saare
Aapki leela hamaara jeevan sanvaare
Aapke ruhaani rangg Hain nyaare

Sarvagyani Guruji Aap toh sab kuch jaanein
Khush hain ve jo Aapka kehna maanein
Chaahe yeh duniya deti hamein taaney
Hum toh phir bhi hain Aapke deewaane

Sarvavyapi Guruji Aapne sabko taara
Aapke bharose chal raha hai jeevan hamaara
Jab bhi hum bhakton ne Aapko pukaara
Aap sadaa aaye hamein dene sahaara

Parwardigaar Guruji Aapki aseem hai shakti
Aapki har razaa se hamein miley tripti
Aur hum karein Aapki niswaarth bhakti
Aur hamein mile janam maran se mukti

Waah Waah Guruji Aapka saath
Aap hee hain hum sabke naath
Aapse duur ho agyan kee raat
Hamaare sir par rahey sadaa Aapka haath

Jai Jai Guruji Dugri waale
Aapka deedar kismat badal daale
Aap hain bahut bade dil waale
Abb toh jeena marna sabb hai Aapke havaale

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 27, 2018

Om Namaha Shivaya
Aaj Ka Suvichaar 🙏🏻🙏🏻

Chaahey koi hamein kitna bhi achchaa kehle
Paapon kee mitti se hain hum maiyle
Aao Guru vaani ke Amrit se isey dho lein
Amrit ke saagar mein swayam ko kho dein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 27, 2019

Om Namaha Shivaya
Aaj Ka Suvichaar 🙏🏻🙏🏻

             Guruji Ke Siwa Na Koi Aur          

Chetna ki bandd aankhon ko kholein
Aur dekhein dhyan se apne aaspaas
Kalyuga mein asatya ka jo timir hai chhaya
Uss se kamzor na honei dein apna vishwaas

Guruji ne thaama hai hamaara haath
Har pal denge Ve hamein sahaara
Maang lein hum buss Guruji ka saath
Toh Kalyan ho jaayega hamaara

Machis ki teeli ki nok ke jitni chhoti
Sach mein hai atma hamaari
Is atma ko taarney ki
Guruji ne lee hai zimmedaari

Lekin hamein agar chukaana hai karz
Toh zaroori hai nibhana apna farz
Karna hai gupt paath, sewa, aur daan
In sabse hoga Guruji ka sammaan

Koshish toh kar hee sakte hain
Kaam krodh moh lobh se duur rehne ki
Ahankaar ko chod kar apne bhaley ke liye
Doojon ki raay ke antar ko sehne ki

Hum toh chaahkar bhi kabhi
Guruji ka dena na de sakein
Guruji hamein aashirwaad detey huey
Ek pal ke liye bhi na thakein

Zindagi beet jaaye achche karmon mein
Itne paap kiye hain humne kayee janmon mein
Guruji se vinti karein ki Ve hamein kshamaa kar dein
Apni kripa aur karuna se hamaari jholi bhar dein

Guruji ke divya haathon mein hai
Abb hamaare jeevan kee doar
Unke charnon mein hain swarg ke darshan
Kyun jaayein hum kaheen aur?

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Feb. 26, 2018

Om Namaha Shivaya
Aaj ka Suvichaar 🙏🏻🙏🏻

Boond boond se hee ghadaa bharey
Chhote se beej se hotei vriksh khade
Guru ke har hukm par amal kar bande
Usi se tu moksh ke kareeb badhe

🌹🌹🌹🌹🌹🌹🌹

Jai Guruji🙏🏻🙏🏻

Dhirja

February 26, 2019

Om Namaha Shivaya
Aaj Ka Suvichaar 🙏🏻🙏🏻

              Sadh Sangat Ka Saath

Ik bhanvre ki dosti
Hui ek gobari keede ke saath
Ek dost ne dooje se
Muskuraakar milaaya haath

Gobar mein rehne waale ne
Bhanvre ko diya nyota
Bhanvre ko mil gaya mitr
Veh khush kyun na hota?

Bhanvre ko hua pachhtaava
Jabb veh keede ke ghar aaya
Bhojan mein keval gobar thaa
Usne majbooran veh gobar khaaya

Abb aayee bhanvre ki baari
Usne gobari keede ko kiya nimantrit
Bhanvre ne bahut pyaar se
Gulab ke phool kiye ekatrit

Gobari Keede ko aadar se
Bhanvre ne gulab par bithaaya
Usee gulab ko pujaari ne aakar
Apni pooja ki thaali mein sajaaya

Gobari keeda thaali mein baith kar
Pahunch gaya divya sharan mein
Pujaari ne usey gulab ke sangg
Arpit kar diya Guruji ke charan mein

Bhanvre ki sangati ke kaaran
Gobari keede ka hua udhdhaar
Achche saath se usey praapt hua
Divya manzil ka uttam uphaar

Sadh sangat ke sangg reh kar
Sadgunn ka mil jaaye dhan
Kusangati ka saath dene se
Bhatakta reh jaaye mann

Guruji kee chaahat ke anusaar kyun na
Hum achchee sangati ko apnaayein
Taaki jeevan bann jaaye satsang
Aur hum Guru sharan mein samaayein

Achchee sangati se behtar ho jaati hai Insaan ki soch aur vichaardhara
Karmon ki naiya ko mil jaata hai
Guruji ki kripa ka komal kinaara

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Feb.25, 2018

Om Namaha Shivaya
Aaj ka Suvichaar🙏🏻🙏🏻

Neem se karva sach chaahe ho
Jhooth banda boley kaahe ko
Rabb Ke paas jaakar hoga poora hisaab
Phir, ae bande, Rabb ko tu kya dega jawaab

🌹🌹🌹🌹🌹🌹🌹

Jai Guruji🙏🏻🙏🏻

Dhirja

February 25, 2019

Om Namaha Shivaya
Aaj Ka Suvichaar 🙏🏻🙏🏻

          Sachkhand Ke Liye Tayaari

Hamaare Guruji humse chaahein
Ki hum kaam karein achche
Aur Guruji kitne khush hon humse
Agar hum sab hon dil ke sachche

Jhooth ki neev par rakhein rishton ki eenth
Toh aksar ghar toot jaata hai
Bahut dishaa-heen ho jaata hai insaan
Agar Guru ka daaman chhoot jaata hai

Jabb hum zindagi mein apnaate hain jhooth
Tabb apna hee zameer jaata hai rooth
Dil mein ashanti lagti hai badhne
Shankaa aati hai mann roopi ghar mein

Doojon ko khushi dene se
Apni khushi bhi toh badh jaati hai
Aur agar isme ahem na aaye
Toh apni ‘mai’ bhi mar jaati hai

Guruji chaahte hain ki hum vikaaron ko chodein
Mushkilon ka karein saamna, na ki unse muh modein
Niswaarth sewa karein aur insaaniyat ke kaam aayein
Taaki antt vele Guruji ke dham jaayein

Jeevan toh hai do din ka mela
Zyada duur nahin hai antt ka vela
Kyun na baant-te chalein pyaar
Aur sachkhand ke liye hon tayaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Feb. 24, 2018

Om Namaha Shivaya
Aaj ka suvichaar🙏🏻🙏🏻

Jeevan mein jahaan sundar phool khilein hain
Insaan ko vahaan anek kaante bhi milein hain
Guruji ko thaam lene doh apna haath
Phir yakeenan Veh chalengey saath saath
Tumhe gumraah honei se bachaayenge
Safar ko yakeenan safal banaayenge

🌹🌹🌹🌹🌹🌹🌹

Jai Guruji🙏🏻🙏🏻

February 24, 2019

Om Namaha Shivaya
Aaj Ka Suvichaar 🙏🏻🙏🏻

            Khwaahish Ki Arzoo

Khwaahish ne pakda zindagi ka daaman
Aur kee arzoo ki veh ho jaaye poori
Guruji ne khwaahish se kaha
Ki veh rakhe shradha aur saboori

Khwaahish thodi naaraaz hui
Aur thoda sa ghabraayee
Phir yaad kiya usne Guruji ko
Aur phir veh sambhal paayee

Guruji ke vachan yaad kiye toh lagaa
Ki abhi waqt nahin hai aaya
Isliye khwaahish ne sabr kiya
Aur Guruji ko hee dhyaaya

Din, hafte, maheene aur saal beetay
Khwaahish ki chaitanya shakti badhne lagee
Jaan gayee ki Guru naam se anmol kuch bhi nahin
Aur veh swayam Guruji kee oar chalne lagee

Dekhte hee dekhte pahunchi Guruji ke paas
Vahaan par mila usey itna sukh aur chayn
Guru naam mein ramm gaya uska har shwaas
Aur prem se bhar aaye uske nayn

Guru milan se poora hua
Khwaahish ka har khwaab
Mud kar dekha usne haalaat ko
Aur de diya yeh jawaab

Jabb mainey thaa janam liya
Tabb mai sach mein thee adhoori
Abb jo Guruji mil gaye hain mujhko
Mai ho gayee hoon poori

Haalaat ne phir Guru charnon mein
Neeven hokar sir ko jhukaaya
Shukrana Guruji Aapka ki Aapne
Khwaahish ko yeh din dikhlaaya

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Feb. 23, 2018

Om Namaha Shivaya🙏🏻🙏🏻
Aaj ka suvichaar🙏🏻🙏🏻

Nirmal tann ho nirmal mann ho
Nirmal ho har saans
Duniya Ke karamjaal mein bande
Na apne ko phaans

🌹🌹🌹🌹🌹🌹🌹

Jai Guruji🙏🏻🙏🏻

Dhirja

February 23, 2019

Om Namaha Shivaya
Aaj Ka Suvichaar 🙏🏻🙏🏻

      Bin Maange De Denge Guruji

Laukik dhan ka tu gumaan na kar
Kshanbhangur sukh ka abhimaan na kar
Maang maang kar Guruji ko pareshaan na kar
Laalach se apne hee zameer ko hairaan na kar

Jabb kiya hai bharosa toone Guruji par
Toh vishwaas ke sangg tu dheeraj dhar
Shradha ko apna le saboori ke sangg
Thodi aasaan ho jaayegi zindagi ki jangg

Mushkilein toh raah mein aayengee
Lekin Guru kripa se hal bhi ho jaayengee
Satya ka saath tu kabhi na chodna
Kisi ka vishwaas tu kabhi na todna

Atma-sammaan ko apni taakat banaa le
Atma-vishwaas ko apni fitrat banaa le
Kisi ko uthaane na de tu apna faayda
Guruji se oonchaa na hai koi kaanoon ya kaayda

Sab par barsaayenge Ve mamta Apni
Kyunki har koi Unka bachchaa hai
Bin maange hee de denge Guruji
Jo hum sabke liye achchaa hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Feb.22, 2018

Om Namaha Shivaya
Aaj ka Suvichaar🙏🏻🙏🏻

Saadagi hai Guruji ko pasand
Jo Unko pasand, usee mein anand
Phir kya karna jagg se ulajhkar
Guruji ko paaoge kewal sulajhkar

🌹🌹🌹🌹🌹🌹🌹

Jai Guruji 🙏🏻🙏🏻

Dhirja

February 22, 2019

Om Namaha Shivaya
Aaj Ka Suvichaar 🙏🏻🙏🏻

             Jeevan Mein Saadagi

Zindagi ki ye tedhi medhi raahein
Bhool bhulayiyaan ki tarehn gumraah karengi
Aur jabb tum kho jaaoge inmein
Ye bilkul bhi na tumhaari parvaah karengi

Isliye Guruji ki baat maan lo
Aur saralta se jiyo sabke sangg pyaar se
Jaise Guruji ne nirdhaarit kiya hai
Jeevan ko chalne doh usi raftaar se

Jo bhi ulajhanein aayengi path mein
Guruji suljhaa denge tumhaare liye
Jahaan kaanton ki bheed bhi hogi
Guruji phool khilaa denge tumhaare liye

Raat ke andhere se darne se kuch na hoga
Dil mein jalaa lo Guruji ke naam ki jyoti
Saadagi apna lo apne rangg aur dhangg mein
Na karo kabhi apni neeyat khoti

Har saans mein tum Guruji ko basaa lo
Abb na banaao koi bhi bahaana
Din chadhte karo shukriya Guruji ka
Aur din dhalte bhi karo shukrana

🌹🌹🌹🌹🌹🌹🌹

Jai Guruji🙏🏻🙏🏻

Dhirja