Author: dhirjabhat

Guruji ne banaayee hai itni nyaari srishti
Har cheez par padti hai Unki dayaalu drishti
Sabka dhyan rakhein Guruji mamta aur sadbhaav se
Ped paudhe bhi saans
lete hain Unke divya prabhaav se

Kabhi soorajmukhi ke phoolon ko dekho dhyan se
Mud jaate hain ve sooraj ki kirnon ki oar
Aao hum seekhein is paawan gyan se
Chalo Guruji se jodein apni doar

Jab baadal chchaa jaate hain akash mein
Aur sooraj bhi chhup jaata hai
Toh soorajmukhi na murjhaata hai
Na niraasha mein sir ko jhukaata hai

Har phool dooje phoolon ki taraf
Dekhne lagta hai umang ke saath
Bagiya ke soorajmukhi ek dooje ki urja se
Khiley rehne ki kar lete hain baat

Buss, isliye koi bhi soorajmukhi
Nahin hai murjhaata
Baarish bhi aa jaaye chaahe
Ek phool dooje ka saath nibhaata

Prakriti ki is pyaari leela se
Kyun na seekhein hum sabb
Ek dooje ki hum madad karein
Guruji kitne khush hongei tabb

Kyun na is maanav jeevan mein
Hum ek dooje ke liye soorajmukhi bann jaayein
Guruji baagbaan hain hamaare
Kyun na Unki phulwaari ko mehekaayein

Aao har taraf Guru gyan ke diye
Guruji ke ashirwaad se jalaayein
Soorajmukhi se hum kuch seekh kar
Is dharti par swarg banaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji ke dwaar par bhakt laayein arzi
Uske baad phir jaise Guruji ki hai marzi
Vahee manzoor karte hain Ve, jo bhakt ke liye sahi ho
Bhakt ko yeh samajhna hoga, taaki veh niraash nahin ho

Agar bhakt jann zidd karenge, aur kuch maangenge baar baar
Toh Guruji ko majbooran sunn-ni padegi unki pukaar
Phir chaahe veh maang uchit ho ya nahin
Guruji maan lenge bhakton ki kahee

Guruji sarvagyani hain, hai Unki divya drishti
Unhee ki kripa se chal rahi hai yeh poori srishti
Maango nahin, maano, jab Guruji humse hain kehte
Phir kyun hum Unki marzi mein khush nahin hain rehte?

Unhee par sab chod dene mein hee apni bhalaayee hai
Jinhonei aisa kiya hai unka jeevan bada sukhdaayi hai
Jab hamaare jeevan mein Guruji ka hai Khuda ka oudaa
Toh phir Unki baat maan-na hai bahut munaafey ka sauda

Guruji bin maange denge jo hamaare liye hai achchaa
Unka toh har bhakt ke liye pyaar hai bilkul sachchaa
Kyun na Unki marzi ko sweekaarein kar ke hum shukrana
Na ki dhoondte rahein hum shikaayat ka bahaana

Buss phir dekhenge hum Guruji ki leela ka asar
Ve hamein har khushi dene mein chodenge na kasar
Hamaare kashton ko Guruji kum karte karte
Apne ashirwaad ka haath hum par dharte dharte

Ve sukhdaayee banaa denge jeevan hamaara
Aur shaant aur tript ho jaayega mann hamaara
Hum kashton aur museebaton ko himmat se sahenge
Aur hameshaan ‘Waah Waah Guruji’ kehte rahenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kya karenge duniya ko jaan kar
Pehle apne aap ko toh pehchaanein
Kuch nahin hoga badi badi baaton se
Pehle Guruji ka kahaa sunein aur maanein

Jaanein ya na jaanein hum
Har pal ek imtehaan hai
Guruji sab kuch dekh rahei hain
Kyunki Ve swayam Bhagwaan hain

Har maa baap ye chaahein
Ki pareeksha mein safal ho unka bachchaa
Hum jeevan ke imtehaan mein ho kaamyaab
Yeh hai Guruji ki bhi ichchaa

Jo maalik hamein sab kuch deta hai
Jisne hamein poora sambhaala hai
Uski baat maan lein hum
Veh hee hamaara rakhwala hai

Kalyuga ki bela mein raahon mein
Chaahe aayein sainkdon baadhaayein
Laukik sukh ke laalach mein bhi
Apne aap ko bhatakne se bachaayein

Kendrit rakhein apne mann ko
Guruji mein lagaayein dhyan
Ekaagr rakhein apne chitt ko hum
Taaki paa sakein Guruji ka gyan

Jeevan toh ek mithya hai
Guru milan hai sachchaayi
Guru se paa lein chaitanya shakti
Isi mein hai sabki achchaayee

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji toh tere naath hain
Ve sunenge teri pukaar
Tu buss Unhee se fariyaad kar
Tu har pal Guruji ko yaad kar

Guruji hee tere kaaj sanvaarenge
Sabse pehle Unhe yaad kar
Baaki sab iske baad kar
Tu har pal Guruji ko yaad kar

Guruji karuna ka saagar hain
Unki kripa aur meharbaani se
Tu apna jeevan aabaad kar
Tu har pal Guruji ko yaad kar

Duniya ka kya bharosa hai
Aaj sangg hai toh kal nahin
Isliye vyarth na tu apne jasbaad kar
Tu har pal Guruji ko yaad kar

Guruji hee tere maargdarshak hain
Unhee ke bharose pe aye bande
Tu khadi jeevan ki buniyaad kar
Tu har pal Guruji ko yaad kar

Guruji tujhe jo bhi detey hain
Usme Unka ashirwaad basaa hai
Tu khushi se grehen Unka prasad kar
Tu har pal Guruji ko yaad kar

Jab bhi yaad karega tu Unko
Guruji ko apne sangg paayega
Isliye ab aur waqt na barbaad kar
Tu har pal Guruji ko yaad kar

Guruji ne tujhe dee hain yeh saansein
Isliye Unka beintehaa shukrana kar
Tu qubool Unki har saugaat kar
Tu har pal Guruji ko yaad kar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji ke paawan pyaar mein
Jhoomta hai har bhakt ka mann
Dhanya hua hai jeevan uska
Jisne paaya Guru naam ka dhan

Jo sukh milta Guru charnon mein
Uski toh koi seema nahin
Guruji ke bharose hai zindagi
Guruji ke prem bin jeena nahin

Guruji ke ek ishaare par
Sooraj bhi jhuk jaaye
Guruji chaahein toh ik pal mein
Yeh waqt bhi ruk jaaye

Guru kripa se chalein havaayein
Aur mausam aayein jaayein
Guruji ke aseem aanchal mein
Saare bhakt samaayein

Har ek bhakt se Guruji ka
Hai anmol anokha naata
Apne haq se zyada sukh
Har bhakt Guruji se paata

Guruji se hee yeh shareer hai
Guruji se hee hai yeh jaan
Guruji se hee toh taqdeer hai
Guruji par sab qurbaan

Guruji ki nirmal mamta se
Pathar bhi moam bann jaaye
Guruji ki divyata se bhakt
Om mein ramm jaaye

Guruji ke naam ki dil mein
Aao jyot jalaayein akhand
Jisne Guruji ko paa liya
Usne paa liya sachkhand

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Vaayu ki sheetalta mein Guruji
Jal ki nirmalta mein Guruji
Phoolon ki khushboo mein Guruji
Meri har aarzoo mein Guruji

Sooraj ke prakash mein Guruji
Anant neele akash mein Guruji
Chaand ki narmi mein Guruji
Dhoop ki garmi mein Guruji

Asahaay ki aahon mein Guruji
Zindagi ki raahon mein Guruji
Nirdhan aur dhanwaan mein Guruji
Sant mein aur shaitaan mein Guruji

Ibadat aur awaaz mein Guruji
Har geet ke saaz mein Guruji
Nritya ki rachna mein Guruji
Bhakt ki archana mein Guruji

Maathe ke chandan mein Guruji
Sangat ke vandan mein Guruji
Tann ke kann kann mein Guruji
Sangat ke mann mein Guruji

Duniya ki hal chal mein Guruji
Jeevan ke har pal mein Guruji
Jeevan mein maran mein Guruji
Insaaniyat ke dharam mein Guruji

Har nek karam mein Guruji
Har pal ke naman mein Guruji
Ekaant ke divya anand mein Guruji
Tapasya ke parmanand mein Guruji

Har taraf, har pal, Guruji hee Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji bhakton ko detey hain darshan
Anekon anek roop mein
Indradhanush mein dikhtey hain Ve
Aur chaaon mein, aur dhoop mein

Kisi ko dikhein chole ya aasan par
Toh kisi ko phoolon aur gubaare mein
Koi kahey unhey Om Onkar dikha
Toh koi trishul dekhey phavvaare mein

Kisi ko hotey saakshaat darshan
Toh koi dekhe Unhe sapne mein
Koi Unkee awaaz sunnkar
Kho hee jaata hai Unmein

Guruji ke swaroop bhi
Kayee baar dein darshan
Aankhein, hoth, ya haath hain hilte
Gadd gadd hota hai mann

Guruji swaroop mein pyaar se
Aankhon se hain muskuraate
Aur Unki muskuraahat se
Sabke chehre khil jaate

Kabhi swaroop toh kabhi charnon mein
Amritvarsha ho jaati
Saari sangat dekh kar ye leela
Phooli nahin samaati

Kaheen kaheen toh deewaaron se
Paavan amrit hai behta
Kabhi bhakt ko Guruji ki mehek hai aati
Aur veh apne ko dhanya hai kehta

Jyot mein, mombatti aur diye ki lau mein
Mandir mein aur bhakton ke ghar par
Kabhi Shiv ji kabhi Sai ke roop mein
Guru darshan ka milta hai avsar

Sabse anokhe darshan Guruji ke
Hotey hain dil hee dil mein
Jahaan bhi dekho Guruji hain dikhte
Ekaant mein aur mehfil mein

Guruji ki maujoodgi ka sundar ehsaas
Veh bhi ek tarehn ka darshan hai khaas
Guruji ke darshan ki pyaas
Hoti hai har bhakt ki aas

Kabhi Guruji ko dekh na sako
Toh na hona pareshaan aur udaas
Kyunki, Guruji ki karunamayi nazar hai sabpar
Ve hain hum sabke paas

Buss phir magan hokar Guru bhakti mein
Vishwaas rakh kar Guruji ki shakti mein
Shradha se jhoomta rahei yeh mann
Aur hum karte rahein Guruji ke darshan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji hee mere raakha hain
Aur Guruji hee mere daata
Sabse pyara rishta hai jag mein
Guru shishya ka naata

Mai toh kuch na jaanoon lekin
Guruji sab hai jaanein
Mai nidar hokar chalti hoon
Kyunki Guruji har khatra pehchaanein

Unki kripa ki dhaal pehenkar
Masti mein mein chal deti hoon
Jo bhi kathinaayiaan aati hain
Mai Guruji se himmat leti hoon

Unke vachan ka paalan karey jo
Guruji sadaa rahein uske saath
Uss bhakt ke liye ghabraane ki
Kabhi na hai koi baat

Buss Guruji mein leen hokar
Sewa aur simran karna hai
Unke Satsang mein dhyan lagaakar
Apna aanchal Unki kripa se bharna hai

Guruji hee hain mere maargdarshak
Har mushkil se mujhe nikaalenge
Ab takk bhi Unhonei sambhaala hai
Aagey bhi Vahee sambhaalenge

Guzaarish hai meri Guruji se
Kabhi na chodein Ve mera haath
Unko samarpan kar apna har sukh dukh
Mai nishchint rahoon din raat

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bahut hee kismat se milta hai
Kisi ko yeh maanav janam
Aur bhi achchee kismat ho toh
Praapt hota hai Guru dhan

Guruji bin kaise tarey yeh jeevan
Kaise katenge karam
Guruji ne haath jo thaam liya toh
Unka naman hai param dharam

Kyun tu bekaar ki baaton mein
Ye anmol lamhe ganvaaye
Shareer toh raakh ki dheri bannkar
Maati mein jaata samaaye

Udhdhaar hoga uska
Jo Guruji mein dhyan lagaaye
Guruji ki sharan mein aakar
Beda paar ho jaaye

Duniya toh moh maya ka hai dera
Yahaan kuch nahin tera ya mera
Guruji ke bin har pal hai andhera
Guru kripa se hee hota hai savera

Jo bhi hai yaheen dharaa rahega
Jab praan jaayenge chhoot
Nirmal naata jod Guruji ke sangg
Ek yahee rishta hai atoot

Har saans mein simar Guruji ka naam
Har pal mein Guruji ka kar le dhyan
Vahee satya aur paak hai jo Guruji denge gyan
Jisey Guruji mil gaye, usey mil gaya Bhagwaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ghooma tu gurudware aur girjaghar
Aur phir masjid aur mandir
Miley na Bhagwan idhar ya udhar
Jab tak na khoja apne andar

Jin Guruji ko dhoond raha tu
Har mele mein, har mehfil mein
Unki awaaz tu dhyan se sunn
Ve basey hain tere dil mein

Simar le Unka naam tu pyaare
Ramm ja Unke hee rangg mein
Tera Guru tujhko pukaare
Tu dhal jaa Unhee ke hee dhangg mein

Har satsang mein aakar Guruji
Sangat ko dete hain ashirwaad
Jo bhi dil se Unse ardaas karey
Ve suntei hain Uski fariyaad

Guruji hain tere roam roam mein
Pyaar se kar Unhe mehsoos
Is kalyuga ki bela mein bhi
Tujhe Ve rakhenge mehfooz

Guruji se seedhi taar joad le
Phir dekh tu chamatkaar
Jahaan bhi, jab bhi pukaarega tu
Guruji aayenge har baar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja