Author: dhirjabhat

Chalte Jaao (01/08/2025)

dhirjabhatLeave a comment

January 8, 2025

Om Namaha Shivaya
Aaj Ka Suvichaar 🙏🏻🙏🏻

#2516
                      Chalte Jaao

Chalte jaao, chalte jaao
Guruji angg sangg Hain tumhaare
Tumhaare har kadam par
Ve Hain tumhaare atoot sahaare.

Ve hee Hain
Ik Ve hee Hain
Sach mein dooja koi nahin
Chaahte huey bhi ho sakta nahin.

Alag sa hai sab ka safar
Safar toh jaayega hee guzar
Lekin Guruji kee jo hogi nadar
Toh uss nadar ka hoga jo asar
Vo saarthak banaa dega zindagaani ko
Poornata dega purusharth kee kahaani ko.

Dharma, arth, kaam, har bhog mein milega Guruji ka ashish
Guruji kee kripa se miltee rahegi bakhshish
Dukh katvaate huey
Karmon ka karz ada karvaate huey
Guruji le chalenge sukh kee oar
Aur Unke charnon mein milegi mukti kee bhor.

Beshak jeevan mein chal raha ho jaisa bhi daur
Guruji ke charnon se zyada suraksha mil nahin sakti kaheen aur
Isliye jaan lo ki tum bahut khushnaseeb ho
Bheetar jhaank kar dekho ki tum Guruji ke kitne kareeb ho.

Is kareebi mein hai tumhaara kalyaan
Sabko nahin milta ye sundar vardaan
Jiska atoot sahaara ho Guru ke roop mein swayam Bhagwaan
Uska har shwaas choomta hai Guru charnon ke noorani nishaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Chalte Jaao (01/08/2025)

Tera Vishwaas (01/07/2025)

dhirjabhatLeave a comment

January 7, 2025

Om Namaha Shivaya
Aaj Ka Suvichaar 🙏🏻🙏🏻

#2515
                     Tera Vishwaas

Ye hai jo tera vishwaas
Ki Guruji sada Hain tere aaspaas
Ye vishwaas hai bahut hee khaas
Ye nahin hai koi kaalpanik ehsaas
Kyunki ye vishwaas hee hai hakeekat
Guruji ka saanidhya hai asaliyat
Jo tu mehsoos karta rahega
Jabb takk teri oar se tera bhaav bahega.

Yahee toh hai ruhaaniyat kee khoobsoorati
Ki ye naata deta hai teri insaaniyat ko gati
Guruji ne tujhe thaama hua hai har pal
Tu apni taraf se koshish karta chal
Judi rahegi jo Unse teri seedhi taar
Toh vishwaas bhi rahega barkaraar
Phir Guruji ke saanidhya ka anand hoga anokha
Tujhe kabhi Unkee maujoodagi ke ehsaas mein na hoga dhokha.

Isliye Unkee yaad ko dil mein basaa le is tareh
Ki Ve tujhe yaad rahein har samay har jageh
Unkee mehar aur teri koshish se aisa hoga zaroor
Aur phir tujhe kabhi lagega hee nahin ki Guruji Hain tujh se duur.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tera Vishwaas (01/07/2025)

Matt Ghabraa, Baanvre Mann (01/06/2024)

dhirjabhatLeave a comment

January 6, 2025

Om Namaha Shivaya
Aaj Ka Suvichaar 🙏🏻🙏🏻

#2514
    Matt Ghabraa, Baanvre Mann

Matt ghabraa, baanvre mann
Guruji angg sangg Hain har kshan
Tu koshish toh kar
Vikaaron ke aakraman se na darr
Ve toh karenge apna kaam
Tu leta chal Guruji ka naam
Guruji ke naam mein shakti hai prabal
Is se badhta jaayega tera bal
Tu apne nishchay par reh atal
Tu sthirta paane mein hoga safal
Laabhkaari hoga ekant
Is se tu hoga shant.

Aur jabb tu hoga shant aur sthir
Toh agar tu aakraman se jaayega ghir
Teri hee hogi vijay
Isliye tu ho ja nirbhay.

Guruji ne thaami hai teri doar
Tu bilkul na hona kamzor
Yahee tera imtehaan bhi hai
Aur ye tujhe mila vardaan bhi hai.

Waqt toh chalega, rukega nahin
Aur tu jo vikaaron ke saamne jhukega nahin
Toh Guruji hongei tujhse prasann
Isliye tu parishram kar, aye mann.

Tujhe mila hai Guruji ka dar
Tu idhar udhar na vichar
Tujh par hai Guruji kee nadar
Noorani hoga tera safar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Matt Ghabraa, Baanvre Mann (01/06/2024)

Shuruaat Se Antt Takk (01/05/2024)

dhirjabhatLeave a comment

January 5, 2025

Om Namaha Shivaya
Aaj Ka Suvichaar 🙏🏻🙏🏻

#2513

Shuruaat Se Antt Takk

Shuruaat se antt takk
Antt se anant takk
Guruji kee mahima hai beantt
Pooran Guru swayam Hain Bhagwant.

Ateet se seekhte seekhte
Pahunche hum vartmaan takk
Tabb se abb takk bhi Guruji ne
Har pal saath deeya athak.

Vartmaan se bhavishya ka drishya
Guruji ne hee hai dekha aur jaana
Ve hee nirdhaarit karein samay
Jabb moad lega afsaana.

Uss moad takk chalte rehna
Ye hamaara farz hai
Utarte utarte hee toh utarega
Jo bhi karmon ka karz hai.

Moad aane bhi ho jaayenge khatm
Jabb unhe milega Guruji se hukm
Raaste seedhe ho jaayenge
Guruji manzil par pahunchaayenge.

Guruji hee dukh ko kaatenge
Ve hee sukh bhi baantenge
Uss sukh kee umr hogi anant
Isliye Unpar bharose ka kabhi na ho antt.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Shuruaat Se Antt Takk (01/05/2024)

O Phulwaari, Pyaari Pyaari (01/04/2024)

dhirjabhatLeave a comment

January 4, 2025

Om Namaha Shivaya
Aaj Ka Suvichaar 🙏🏻🙏🏻

#2512
         O Phulwaari, Pyaari Pyaari

O phulwaari, pyaari pyaari
Teri sundarta hai itnee nyaari
Tere phoolon kee har kyaari
Dikhaati hai teri khoobsoorati saari.

Tere phoolon kee mehek matvaali hai
Har phool kee chhavi niraali hai
Divya si lagti hai teri dastaan
Bataa toh, kaun hai tera baghbaan?

Phulwaari ne dee prem bhari muskaan
Sunaane lagi veh apni dastaan,
“Mai thi banjar si zameen
Nahin thi pehle itnee haseen
Rehti thi mai bahut udaas
Mann hee mann karti thi ardaas
Ki meri madad karne aisa koi aaye
Jo mere chehre aur dil ko muskuraahat de paaye.

Ik raat jabb mai so rahi thi
Aur need mein bhi ro rahi thi
Tabb jyoti kee ek kiran yoon jagmaaayee
Ki lagaa mitne lagi meri tanhaayee.

Aankhein khuli toh dekha mainey
Itna manohar nooraani insaan
Ki mujhe lagaa veh insaan ke roop mein
Swayam Hain Bhagwaan.

Mainey hichkicha kar poochha, Aap kaun?
Toh Ve muskuraate huey pehle toh rahe maun
“Guruji,” phir Unhonei kaha
Sunte hee mera ik aansoo baha.

Ho gaya mujhe yakeen
Ki mai banjar si zameen
Abb jaaoongi tarr
Paakar in Guruji ka var.

Mere dekhte dekhte Guruji ne liya viraat roop
Unhonei gagan kee oar haath kiya toh ho gayi sunehri dhoop
Amrit kee varsha honei lagi
Mai Unkee leela mein khonei lagi.

Mujhe mila Guruji ke charnon ke taley rehne ka shubh avsar
Unke charnon ke neeche dabb kar mai yoon gayi tarr
Ki mai jo thi banjar si dharaa
Mujhe mehsoos hua haraa bharaa
Mujhe mila Guruji ka ashirwaad
Mil gayi phulwaari bann-ne kee saugat.

Guruji ne Apna viraat roop dikhaaya
Mujhe Unmein Ishwar nazar aaya
Mere dekhte dekhte Guruji Huey antardhaan
Dekar mujhe pyaara sa vardaan.

Tabb se mai bann gayi pyaari si phulwaari
Mai apne phoolon ko deti hoon apni mamta saari
Guruji kee kripa se Unse judi rehti hoon
Jo bhi dil mein hota hai, Guruji se hee kehti hoon.

Mausam jaisa bhi ho
Mujh par Guruji ka haath hai
Yahee sabse badi baat hai
Ki Vo Ishwar mere saath Hai. “

Ye hai pyaari si phulwaari kee kahaani
Guruji ne sudhaar dee jiskee zindagaani
Guruji ka shukrana ki sajj sanvar gayi ye phulwaari
Guruji se ardaas ki nikhar jaaye ye duniya saari.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

O Phulwaari, Pyaari Pyaari (01/04/2024)

Tumhaare Girebaan Kee Gehraayiyan (01/03/2025)

dhirjabhatLeave a comment

January 3, 2025

Om Namaha Shivaya
Aaj Ka Suvichaar 🙏🏻🙏🏻

#2511
 Tumhaare Girebaan Kee Gehraayiyan

Ek oar tumhaare girebaan kee gehraayiyan
Dooji oar Guruji Maharaj kee vadiyaayiyan
Unkee vadiyaayiyon se vadda nahin hai kuch
Har girebaan kee gehraayee bhi hai tuchh.

Tumhaare girebaan kee gehraayiyon ko cheer deti hain
Guruji Maharaj kee nigaahein
Tumhaare baare mein sabb jaante huey bhi
Tumhe sahaara deti hain Unkee baahein
Tumhaara safar sudhar jaaye
Iske liye Guruji ujjwal karte Hain tumhaari raahein
Taaki tum vaisa hee socho aur karo
Jaisa Ve tumhaare liye chaahein.

Kyunki isee mein tumhaara kalyaan hai
Aur Guruji sada rehte meharbaan Hain
Ve tumhe le kar jaana chaahte Hain ruhaani shikhar takk
Jiske liye Ve tumhe bakhshte bhi Hain athak.

In raahon par chalna na hota itna aasaan
Agar angg sangg na hotey Guruji karunanidhaan
Ye maan kar chalo
Ye jaan kar chalo
Shukrana mein yoon raho
Ki shukrana mehsoos karo aur kaho.

Koi aur darwaaza na khatkhataana
Guruji ke bataaye raaste par tum chalte jaana
Ho nahin sakta Unse bada koi shubhchintak tumhaara
Unse zyada sampoorna ho hee nahin sakta koi sahaara.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tumhaare Girebaan Kee Gehraayiyan (01/03/2025)

In Galiyon Ka Safar (01/02/2025)

dhirjabhatLeave a comment

January 2, 2025

Om Namaha Shivaya
Aaj Ka Suvichaar 🙏🏻🙏🏻

#2510
              In Galiyon Ka Safar

Kalyaan kee galiyon se rahe ho guzar
Rehmaton kee khushboo ko lo pehchaan
Bahut hee achchi kismat wale ho tum
Ki Guruji Maharaj ne tumhe liya hai thaam.

In galiyon mein gungunaate raho tum
Geet Guruji Maharaj ke
Goonj rahe hain yahaan taareef ke kissey
Bannkar satsang Inn sundar sartaj ke.

In galiyon mein jo bhi aata hai
Vo Guruji ka ashish paata hai
Chaahe ho in galiyon mein subah ya shaam
In galiyon ko roshan karta hai Guruji ka naam.

Isliye ghabraana nahin
Hichkichaana nahin
Tum ho Guruji kee nipun nigraani mein
Tumhe akhand suraksha milee hai zindagaani mein.

In galiyon mein kabhi nahin akele tum
Yahaan nahin hota koi bhi gumm
Guruji har lamha Hain tumhaare saath
Kaun kho sakta hai jabb sangg hon swayam naath?

Isliye bina huey laaparwaah
Hokar tum beparwaah
Guruji ke saanidhya mein rehkar nirbhay
In galiyon ka safar kar lo abb tayy.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

In Galiyon Ka Safar (01/02/2025)

Naye Varsh Kee Awaaz (01/01/2025)

dhirjabhatLeave a comment

January 1, 2025

Om Namaha Shivaya
Aaj Ka Suvichaar 🙏🏻🙏🏻

#2509
              Naye Varsh Kee Awaaz

Naye varsh kee hai ye awaaz
Ismein chhipe hain anekon raaz
Tere sudhaar ke
Tere uddhaar ke.

Raaz jaan-ne kee koshish na kar
Buss, Guruji par vishwaas dhar
Har pal ka tu sammaan kar
Har pal hai Guruji ka deeya hua var.

Aaj takk bhi Guruji ne Hai sambhaala
Aagey bhi Guru hee Hoga rakhwala
Har beetey huey kal par raha hai Unka ashirwaad
Aaney wale kal mein bhi milta rahega Guru prasad.

Guruji angg sangg Hain aur rahenge is varsh bhi
Is satya ka kar tu santosh aur harsh bhi
Varsh beet jaayein beshak kayi hazaar
Guruji ka tujh par ashish rahega aparampaar.

Kyun na naye varsh ke aagaman par
Apni khaamiyon ko sudhaarne ka kaam kar
Ardaas kar Guruji se ki Unse juda rahe tera mann
Taaki tere liye saarthak ho naye varsh ka har kshan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Naye Varsh Kee Awaaz (01/01/2025)

Ruhaani Azaadi Kee Oar (12/31/2024)

dhirjabhatLeave a comment

December 31, 2024

Om Namaha Shivaya
Aaj Ka Suvichaar 🙏🏻🙏🏻

#2508
               Ruhaani Azaadi Kee Oar

Prem, shraddha, vishwaas
Ye shabd hain itne sundar
Lekin uss se kaheen zyada sundar hai
Bhaav in shabdon ke bheetar.

Bhaav bina shabd ka arth gumm jaata hai
Bhaav ho toh hee inmein arth aata hai
Bhaav ho bhola aur bhalaa
Yahee hai bhakti kee kala.

Aisa bhaav Guruji Maharaj ko karey prasann
Is bhaav mein behne ka prayaas karey jabb mann
Toh mann bhakti rass mein ramta jaata hai
Aur anokha sukoon paata hai.

Aise bhaav mann mein bahein
Guruji Maharaj prasann rahein
Toh chahiye kuch aur nahin
Soch sada rehne lagey sahi.

Soch sahi, toh sahi hongei karam
Jis se sudharenge ye aur agley janam
Jitne bhakti bhaav se hoga Guru chintan
Aasaani hogi karne mein Unhe sarvsamarpan.

Jo samarpan mein kar le karmon ko bhi shaamil
Toh nirlepta bhi honei lagegi haasil
Duur hotey rahenge vikaar aur unse judey gumm
Ruhaani azaadi kee oar badhte jaayenge kadam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ruhaani Azaadi Kee Oar (12/31/2024)

Divya Jyot Akhand (12/30/2024)

dhirjabhatLeave a comment

December 30, 2024

Om Namaha Shivaya
Aaj Ka Suvichaar 🙏🏻🙏🏻

#2507
    Divya Jyot Akhand

Guruji kee kasauti par utarnaa nahin aasaan
Sabse badi baadhaa bann jaati hai apna hee abhimaan
Insaaniyat sikhaate sikhaate Guruji lete rehte Hain imtehaan
Kyunki hamein unnatt karna chaahte Hain Ve karunanidhaan.

Guruji kewal koi sadhu ya santt nahin Hain
Ve Hain Bhagwaan Shiv avatari
Pooran Guru Hain Guruji Maharaj
Hain Ve leela dhaari.

Maya Unn Maheshwar roopi kee shakti hai
Unke paas anekon prakaar kee yukti hai
Kalyaan karne kee sabhi bhakt jann ka
Ve jaante Hain haal sabke mann ka.

Koi jaan nahin sakta ki Guruji ek hee pal mein
Kis kis par daal lete Hain Apni nazar
Beshak lagey Ve yoon hee dekh rahe Hain
Unkee nazar ka ho raha hota hai asar.

Kis pal kis par Ve mauj mein aa jaayein
Kab aur kaise Ve kalyaan kar jaayein
Ye toh kewal Guruji hee jaanein
Ve har bhakt kee asaliyat pehchaanein.

Na jhooth, na paakhand
Na kaam aye koi vehem
Guruji ke aagey
Nahin chal paata kisee ka ahem.

Neevenpann kee Ve moorat Hain
Neevanpann karte Hain Ve pasand
Na maano toh kuch bhi nahin Hain
Jo maano toh Ve Hain divya jyot akhand.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Divya Jyot Akhand (12/30/2024)