Author: dhirjabhat

Bhool Se Bhi… (11/06/2024)

dhirjabhatLeave a comment

November 6, 2024

Om Namaha Shivaya
Aaj Ka Suvichaar 🙏🏻🙏🏻

#2453
                     Bhool Se Bhi…

Param poojya Guruji Maharaj,

Bhool se bhi Aapko na bhool paaoon
Aapke dar ko kabhi ka chod kar jaaoon
Aise rakhiyega mujhe Apne se jod kar
Mujhe baaki har aasakti aakarshan se toad kar.

Zindagi ke din bache hain abb do chaar
Asal cheez yakeenan na de paaya ye sansaar
Ek Aapki sharan mein hee ho sakta hai mera uddhaar
Kaheen aur jaane kee chaahat hee nahin, mere Parwardigaar.

Aapki preet, Aapki dee prerna
Aapki sheetal samvedana
Aapki paawan panaah
Arzi karte huey Aapse ye kahoon
Ki inse kabhi vanchit na rahoon.

Jabb Aap Hain angg sangg
Toh duniya ka ho jaisa bhi dhangg
Mere dwaara kiya gaya Aapka chintan na ho bhangg
Chadhaa deejiye mujh par yoon Aap Apna rangg.

Kyunki baaki har rangg pheeka padta jaayega
Par Aapke rangg mein rangg kar mera antas tartaa jaayega
Mera charitra sudharta jaayega
Meri atma ka noor nikharta jaayega.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bhool Se Bhi… (11/06/2024)

Ginte Ginte Sitaaron Ko (11/05/2024)

dhirjabhatLeave a comment

November 5, 2024

Om Namaha Shivaya
Aaj Ka Suvichaar 🙏🏻🙏🏻

#2452

Ginte Ginte Sitaaron Ko

Ginte ginte sitaaron ko
Subah ho jaati hai aksar
Lekin agar roshni aaye hee nahin nazar
Toh sochna ki haalaat ka hai ye asar
Uss mann par, jo abhi hai kamzor
Isliye uspar chalta hai haalaat ka zor.

Varna har subah sooraj toh uday hai hota
Aur beshak vo kabhi baadal ya ghata mein hai khota
Uska wajood nahin chhup paata
Kyunki vo roshni hai phailaata.

Nazar bhi chaahiye roshni ko dekh paane wali
Varna kaise dikhegi roshni niraali
Yogya hon mann aur nazar
Iske liye mil jaaye jo Guruji se var
Toh bhaagya jaaye sanvar
Sakaraatmak soch vichaar dwaara
Paakar Guruji ka sahaara.

Yahee toh hai vo roshni jo zaroori hai aani nazar
Aur isliye anivaarya hai Guruji kee nadar
Varna hum sitaare ginte reh jaayenge
Aur subah ke lakshan na dikh paayenge.

Guruji bakhshein sumat, shakti, aur simran
Taaki swasth, sthir, sashakt hota chale mann
Roshni dikhtee rahe andhere mein bhi
Beshak chhoti si kiran hee sahi.

Kiran se kiran judti jaayegi
Sunehri subah dikh jaayegi
Guruji ke chintan mein
Sudh budh na rahegi sitaare ginte rehne kee
Zaroorat na mehsoos hogi
Kisee aur se kuch bhi kehne kee
Guruji ke sangg hoti rahengi baatein
Chaahe sitaaron se khaali ya khilee hongi raatein
Kyunki roshni dikhtee jaayegi Guruji kee meher se
Har peher safar sajta rahega seher se.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ginte Ginte Sitaaron Ko (11/05/2024)

Unhe Prasann Karte Huey (11/04/2024)

dhirjabhatLeave a comment

November 4, 2024

Om Namaha Shivaya
Aaj Ka Suvichaar 🙏🏻🙏🏻

#2451
           Unhe Prasann Karte Huey

Kar ke ekaagrata kee shakti ko atmasaat
Apni atma kee anant oorja ko pehchaan
Varna itne bahumoolya avsar ko gavaa dega tu
Rehkar asal gyan se bilkul anjaan.

Guruji ko paane ke liye
Anivaarya hai jaana apne bheetar
Vaheen hai prakash gyan ka
Jahaan kendra hai divyata ke dhyan ka.

Baahar bhatakne aur bhatkaane waale hain kayi hazaar vikarshan
Isliye bahut zaroori hai satark rehna har kshan
Duniya mein rehte huey judna nahin yahaan se
Guruji sangg judey rehne ka nirantar prayaas karna wafa se.

Sammaan karna hoga Guruji ke charan ka
Shukrguzaar rehna hoga Unkee sharan ka
Paalan kar ke Unke har vachan ka
Paawan poshan kar ke apne antarmann ka.

Laparwaahi bilkul bhi nahin chalegi
Agar sach mein Guruji ko hai paana
Vinamrata aur sweekriti mein rehna hoga
Na chalega duuri ka koi bhi bahaana.

Parmaarth kee praapti ka hai ye safar
Ye nahin hai koi chhoti si baat
Bhakt kee mehnat, Guruji kee rehmat
Dono ko chalna hai ek saath
Rehmat mein koi kami na hogi, ye toh pakki hai baat
Par mehnat ko chaahiye bhakt kee nek neeyat ka saath.

Kar ke manzil takk pahunchne ka dridh nishchay
Chod har sanshay, hokar nirbhay
Chalte jaana hai Guruji ke nakshe kadam par
Unhe prasann karte huey har ghadi, har peher.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Unhe Prasann Karte Huey (11/04/2024)

Kahaani Ek Deewaane Kee (11/03/2024)

dhirjabhatLeave a comment

November 3, 2024

Om Namaha Shivaya
Aaj Ka Suvichaar 🙏🏻🙏🏻

#2450
           Kahaani Ek Deewaane Kee

Ye kahaani hai ek deewaane kee
Jisey parvah na thi zamaane kee
Kyunki vo apne Guruji ke nashe mein jeeta thaa din raat
Uske jeevan ka har pal guzarta thaa Guruji ke saath.

Guruji ne diya usey abhay daan
Satsang simran dwaara usey milta raha gyan
Dheere-dheere gehra hota gaya uska dhyaan
Guruji karte rahe uska kalyaan.

Itnee prataapi thi Guruji kee maujoodagi ruhaani
Ki Unke noor se prakashit hoti rahi deewaane kee zindagaani
Yoon judi thi Guruji sangg uskee rooh kee taar
Ki dono ke beech chalti thi baat lagaataar.

Is ruhaani baat cheet ka anand aata thaa deewaane ko
Beshak kabhi kabhi Guruji se gambhir aadesh bhi milta thaa nimaane ko
Apni dinacharya ke kaam sambhaalte huey
Swayam ko Guruji ke bataaye saanche mein dhaalte huey
Deewaana santusht rehta thaa
Guruji ke prem bhaav mein behta thaa.

Bandagi mein na rakhta thaa vo koi vehem
Kumm hota chala thaa Guru kripa se uska ahem
Anekon kasht vo kar paata thaa sehen
Guruji ka thaa uspar bahut rehem.

Guruji kee kripa se kathin hotey chaley uske imtehaan
Guruji kar rahe thei kalyaan, veh gaya thaa jaan
Usey hoti jaa rahi thi apne uddeshya kee pehchaan
Khatm ho rahe thei uske duniyavi armaan.

Kaisa thaa is deewaane ka safar
Ye koi deewaana hee sakta hai jaan
Jis jis par ho jaaye Guruji kee aisee meher
Deewaana bann sakta hai har vo insaan.

Bahut raas aaye aisee deewaanagi
Is deewaanagi mein hai Guruji kee bakhshindagi
Aisee deewaanagi se sanvar jaaye zindagi
Guruji ke bahut kareeb le aaye bandagi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kahaani Ek Deewaane Kee (11/03/2024)

Aapki Rehmat, Aapki Mohabbat (11/02/2024)

dhirjabhatLeave a comment

November 2, 2024

Om Namaha Shivaya
Aaj Ka Suvichaar 🙏🏻🙏🏻

#2449
     Aapki Rehmat, Aapki Mohabbat

Param poojya Guruvar,

Meri kee hui ibadat kuch nahin
Aapki rehmat hee hai sab kuch
Meri kee hui khidamat toh kuch nahin
Aapki mohabbat hee hai sab kuch.

Aapke charnon ke taley kee dhool jitnee bhi nahin hai meri aukat
Aur phir bhi Aapne dee hai Apne aanchal kee suraksha kee saugat
Kaise na rahoon pal pal mai Aapki shukrguzaar
Saraahati hee jaaoon mai Aapka pyaara pyaar.

Mere liye toh Aap sabse jyeshth Guru roopi vyakti Hain parivaar mein
Aap sabse prataapi shakti Hain sansaar mein
Aap hee Araadhya Hain mere, Aap Hain mere sachche meet
Jis bhi roop mein jaanoon aur maanoon, Aapse laagi hai preet.

Dukh Aapka deeya nahin hai
Par Aapse hee hai sukh saara
Jabb se jaana ki yahee sahi hai
Tabb se ye rishta laagaa aur bhi pyaara.

Ye swaarth hai ya deewaanapann, mai na jaanoon
Par Aap toh jaanein sab kuch
Meri avikasit tuchh soch kuch nahin
Aapki vaddi vadiyaayee hai sab kuch.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapki Rehmat, Aapki Mohabbat (11/02/2024)

Diwali Ka Parv Hua Sampann (11/01/2024)

dhirjabhatLeave a comment

November 1, 2024

Om Namaha Shivaya
Aaj Ka Suvichaar 🙏🏻🙏🏻

#2448
      Diwali Ka Parv Hua Sampann

Diwali ka parv hua sampann
Gyan kee lau se ujjwal rahe mann
Diwali ke baad bhi
Har din aur har raat bhi.

Jalta rahe gyan ka deep
Noorani hota jaaye sabka naseeb
Sabhi ho paayein Guruji ke kareeb
Toh aaj ke baad koi na rahe gareeb.

Kyunki bin Guruji ke na miley vivek aur gyan
Guruji Hain sumat aur bakhshish kee khan
Ve karte aaye Hain sangat ka kalyaan
Aur aagey bhi dete rahenge daya ka daan.

Har din savera, har raat Diwali Guruji ke charan mein
Buss, mann yoon rahe Unke samaksh samarpan mein
Ki meetha lagta rahe Unka bhaana
Na shikva shikaayat, na koi bahaana.

Guruji bin gyan nahin
Gyan bina andhera
Guruji ke kamal charnon mein
Uddhaar tera aur mera.

Buss, phir toh aaj aur abhi se
Shuru karein agley varsh kee diwali kee tayyaari
Samast sangat par hai Guruji ka ashirwaad
Sabhi ke jeevan ke ujjwal honei kee aayegi baari.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Diwali Ka Parv Hua Sampann (11/01/2024)

Anand, Nirmal Aur Anant (10/31/2024)

dhirjabhatLeave a comment

October 31, 2024

Om Namaha Shivaya
Aaj Ka Suvichaar 🙏🏻🙏🏻

#2447

Anand, Nirmal Aur Anant

Paawan naam Hai Guruji ka
Japp le tu din raat
Abb lagan lagaa le ek tu Unse
Na bhatak tu ghat ghat.

Anmol hai tera har shwaas
Usey na jaane de vyarth
Abb nahin samjha toh kabb samjhega
Apne janam ke uddeshya ka arth?

Pooran Guru ne tujhe hai sweekaara
Agar abb bhi tu phirna chaahta hai maara maara
Toh ye hogi teri badnaseebi
Kyunki ho na paayegi Guruji se teri kareebi.

Aur jo tu raha Guruji se duur
Toh tujh par na chadh paayega Unka noor
Apni swatantra ichcha mein karna hoga tujhe sadupyog vivek ka
Is se pehle tu aur bhatak kar dhoondhta rahe dar araadhya anek ka.

Ek se kar preet
Ek ko kar samarpan
Ek sangg yoon jud
Ki Uss Ek ka ho jaaye tera mann.

Teri khushkismati ne tujhe galey se hai lagaaya
Jabb se tujhe Guruji ne Apne dar par hai bulaaya
Kitne khade hain is shubh mauke ke intazaar mein
Isliye sanshay na kar aakar is paawan dwaar mein
Kyunki Guruji ka dwaar hai sachkhand
Yahaan jalti hai jyot akhand
Yahaan kalyaan hota rahega beantt
Yahaan milta rahega anand, nirmal aur anant.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Anand, Nirmal Aur Anant (10/31/2024)

Kal Hai Diwali Ka Tyohaar (10/30/2024)

dhirjabhatLeave a comment

October 30, 2024

Om Namaha Shivaya
Aaj Ka Suvichaar 🙏🏻🙏🏻

#2446
           Kal Hai Diwali Ka Tyohaar

Kal hai Diwali ka tyohaar
Sangat kar rahi hai intazaar
Guruji ke sangg isey manaane ka
Unke swaagat mein deep jalaane ka.

Guruji kee rehmat kee roshni se jhilmilaaye jeevan tera aur mera
Unkee dee sumat se duur ho agyan ka andhera
Unke noor se ujjwal ho hum sabka har savera
Ye antas banaa rahe Unke satsang ka dera.

Guruji ke prataap ke prakash se Jagmagaaye saari sangat ke jeevan ka safar
Guruji ke ashirwaad ke akash taley
Sabhi kee zindagi jaaye guzar
Har raat ho jaise Diwali kee
Saugat ho Guruji kee leela niraali kee.

Jyot se jyot jalti rahe
Guruji ke nirmal naam kee
Pyaas badhti rahe
Guruji ke dham kee.

Antas kee roshni ne hee aana hai kaam
Jabb baahar hoga andhkaar
Uss roshni mein ho prem, vishwaas, imaan
Jiske dwaara sanvarta jaaye sansaar.

Sakaraatmakta aur saamanjasya se sajey sabka jeevan
Pavitrata ke ujaale se sajey sabka mann
Guruji kee daya se mann mein chale Unka simran
Har shwaas Unkee soch aur sewa mein rahe magan.

Sabhi par barsey Guruji kee meher-e-nazar
Unke noor se anugrahit ho jaaye saari sangat ka safar
Sabhi par chadhta jaaye Guruji ka ruhaani rangg
Aane wali Diwali sabke liye laaye ullaas aur umang.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kal Hai Diwali Ka Tyohaar (10/30/2024)

e

Dhanteras Ka Tyohaar (10/29/2024)

dhirjabhatLeave a comment

October 29, 2024

Om Namaha Shivaya
Aaj Ka Suvichaar 🙏🏻🙏🏻

#2445
               Dhanteras Ka Tyohaar

Param poojya Guruji Maharaj,

Aaj hai Dhanteras ke tyohaar ka din
Mere liye koi din tyohaar nahin Aapke bin
Koi karey aaj upasana Dhanvantari Bhagwaan kee
Koi karey Kuber kee pooja
Koi dhyaaye Maa Laxmi ko
Mujhe Aapke siwa soojhe na koi dooja.

Devi devta priya Hain sabhi
Sabhi ka darshan hai pyaara
Kintu jabb se Aapka ehsaas hua hai
Aap mein mila hai sukh saara.

Dhanteras ka din hai bahut hee khaas
Aapki kripa se swasth rahe sabhi ka har shwaas
Kyunki agar na ho achchi sehat
Toh kathin hai karna mehnat
Adhyaatmik raaste par badhne kee
Ruhaani oonchaayee par chadhne kee.

Guruji, Aapse hai vinamr vandan
Ki swasth rahe sabka dimaag, tann, aur mann
Bakhshiye aise sakaaratmak vichaar
Ki har din ko maan kar chalein hum tyohaar
Kyunki har din hai Aapka diya uphaar
Har din par hai Aapki kripa aparampaar.

Jaise hua thaa mahatvapoorna samudra manthan
Vaise hee, Aapki prerna se jaari rahe hamaare mann ka manthan
Shubhta aur shuddhi roopi amrit se bhar jaaye mann
Ekatrit hota rahe achchaayee aur sachchaayee roopi dhan.

Saari sangat ko Dhanteras kee mubarak bahut saari
Guruji, Aapki kripa se asal dhan paane kee koshish rahe jaari
Nirogi ho sabka tann aur mann
Aapke saanidhya mein beete har din, har tyohaar, har kshan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Dhanteras Ka Tyohaar (10/29/2024)

Aapke Charnon Mein (10/28/2024)

dhirjabhatLeave a comment

October 28, 2024

Om Namaha Shivaya
Aaj Ka Suvichaar 🙏🏻🙏🏻

#2444
            Aapke Charnon Mein

Mere param poojya Guruji Maharaj,

Aapke charnon mein maatha jo teka mainey
Toh lagaa ki sabhi devi devta ko maatha liya tek
Kitnee sangat ne toh Aapke charnon mein
Aapki meher se sampoorna Brahmand hee liya dekh.

Nahin jaanti thi tabb ki jabb maatha mera
Aapke kamal charan mein jhuka
Tabb se mere jeevan mein aane wala har kasht
Mujhe poornata se aahat karne se ruka.

Kyunki Aap, MahaShiv, bhakton ke rakshak
Lene lagey mere kashton ka adhiktar bhaar
Kya maalum thaa mujh agyani nimaani ko
Ki mai pahunchi hoon Pooran Guru ke dwaar.

Iske baad Aapke dwaara kiye gaye kalyaan kee kahaani
Vahee banti gayi mujh nacheez kee zindagaani
Aapka laad, Aapka pyaar
Aapka diya maargdarshan baar baar.

Aapki ruhaani awaaz jo Aapki meher se aksar deti hai sunaayee
Aapki divya chhavi jo Aapki kripa se deti hai dikhaayee
Aapki gambheerta, Aapki bakhshishein
Aapki muskuraahat, Aapki ashishein.

Beantt hai Aapki rehmatein, Guruvar
Aapki daya se ujjwal hua antas ka ghar
Aisa prabhaav Aapke prataap ka hua
Ki sakaraatmak hota gaya mera nazariya.

Rakhiyega mere har janam mein mujhe Apni sharan mein
Tekti rahoon mai maatha Aapke charan mein
Abb rukne aur jhukne kee zaroorat hee nahin mujhe dar dar par
Aap hee Hain mere Guru, Govind, rahnuma, Aap Hain mere humsafar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapke Charnon Mein (10/28/2024)