Author: dhirjabhat

Chhaaya Hai Har Oar (10/27/2024)

dhirjabhatLeave a comment

October 27, 2024

Om Namaha Shivaya
Aaj Ka Suvichaar 🙏🏻🙏🏻

#2443
             Chhaaya Hai Har Oar

Chhaaya hai har oar Guruji ka noor
Na mehsoos kar apne ko tu Unse duur
Kintu Unke kareeb honei ka na kar tu guroor
Ve Shiv avatari Hain, karte Hain ahankar ko chuur.

Guruji ke noor mein rangg gaya hai tera jeevan
Ye mumkin na thaa Unkee karuna aur agya ke bin
Shukr kar ki Unke noor se ujjwal hai tera har din
Aur teri koi nisha bhi nahin beet-ti Unke noor ke bin.

Yaad kar, tu kis tareh ghabraata thaa
Kaise shanti kee khoj mein dar dar par tu jaata thaa
Aur abb yaad kar tere jeevan ka veh din khaas
Jabb Guruji ne tujhe bulaaya thaa Apne paas.

Tabb se lekar aaj takk
Tu karey Unka shukriya athak
Toh bhi veh kumm hoga, is se nahin kar sakta tu inkaar
Kyunki tere is safar mein Guruji ke tujh par hain anginat upkaar.

Jabb takk srishti hai, har subah ka sooraj dhalta rahega
Jabb takk jeevan hai, usmein utaar chadhaav toh chalta rahega
Guruji kee nadar se Unke noor kee nirmalta se tarta jaayega tera har shwaas
Na guroor kar, na hee ho udaas, kyunki Guruji Hain tere bheetar aur aas paas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Chhaaya Hai Har Oar (10/27/2024)

Kamla Sa Kookar (10/26/2024)

dhirjabhatLeave a comment

October 26, 2024

Om Namaha Shivaya
Aaj Ka Suvichaar 🙏🏻🙏🏻

#2442
                  Kamla Sa Kookar

Guruji ka kamla sa kookar
Guru ke dar par soya thaa
Sotey sotey bhi vo kookar
Guruji ke swapn mein khoya thaa.

Guruji ke swapn darshan usey thei ho rahe
Bhaav thaa aisa pyaara ki aansoo asal mein bahe
Chehra hua geela aansoo se toh kookar kee neend khuli
Chehre kee mayll ke saath saath antas kee mayll bhi dhuli.

Guruji kee komal kripa se
Badal gayi uske naseeb kee rekha
Kookar ko yakeen na hua
Jabb apne saamne usne Guruji ko dekha.

Kookar ko toh aisa lagaa
Ki vo thaa swapn mein tabb bhi
Usey lagaa hakeekat mein kya
Saakshaat dikhte Hain yoon Rabb kabhi?

Vo poonchh hilaakar lagaa muskuraane
Apne hee andaaz mein lagaa Guru mahima gaane
Guruji ke sundar divya noorani roop ko dekh
Kookar Guru charnon mein late gaya maatha tek
Guruji ne rakha Apna haath kookar ke sir par
Guruji kee meher se tarr gaya kookar.

Uskee bhakti mein thi bahut bhavna aur shakti
Meharbaan dayalu Guruji ne de dee usko mukti
Uskee rooh jo kitne janmon se thi Guruji kee sharan mein
Vo sada ke liye samaa gayi Guruji ke kamal charan mein.

Guruji ke kamal charan mein jannat aur vaheen par mukti
Guruji ke kamal charan mein samaane kee aas kee ho tripti
Karunanidhaan Hain Guruvar
Hum sab kamle kookar Unke dar par
Unkee kripa se hum bhi jaayein tarr
Toh kookar kee bhanti unnat hoga hamaara bhi safar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kamla Sa Kookar (10/26/2024)

Ye Rishta (10/25/2024)

dhirjabhatLeave a comment

October 25, 2024

Om Namaha Shivaya
Aaj Ka Suvichaar 🙏🏻🙏🏻

#2441
                        Ye Rishta

Na umr ka bandhan
Na janma ka
Na daur ka
Na kisee aur ka
Guruji ka rishta bhakt ke sangg
Uska hota hai alagg hee rangg.

Rakhne ke liye is rishte ko barkaraar
Anivaarya hai jodna Guruji se seedhi taar
Sangg ruhaani aakarshan ke
Bina kisee vikarshan ke.

Is seedhi taar ko tum jaano aur maano
Guruji kee dee hui bakhshish aur uphaar
Yahee seedhi taar le chalegi
Bhavsaagar ke paar
Is seedhi taar mein pirote raho tum
Bhola bhaav aur pyaar
Tum ek kadam badhaaoge Unkee oar
Ve tumhaari oar kadam badhaayenge kayi hazaar.

Idhar udhar se tumhaara dhyan hatega jitna
Guruji sangg tumhaara rishta judega utna
Aur jabb chitt hoga buss Unmein kendrit
Toh tumhaari jholi mein aisa Guru prasad hoga ekatrit
Ki janam janam ke paap dhulne lagenge
Tumhaari kismat ke bandd kivaad khulne lagenge.

Beshak Guruji lagaayenge sewa mein ya dhyan mein
Ya phir simran ya satsang mein ya phir gyan mein
Ya phir tumhe buss farz nibhaana sikhaayenge
Buss, har tareh se Ve tumhe taarte jaayenge.

Apne is rishte ke darmiyan kisee aur ko na aane dena
Is rishte ko tum apni sampoorna nishtha dena
Ye rishta hai sabse achcha
Ek yahee rishta hai sachcha
Ye rishta hai sarvashreshth sarva sundar vardaan
Ismein tumhe Apne sangg jod rahe Hain swayam Bhagwaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ye Rishta (10/25/2024)

Aapki Panaah (10/24/2024)

dhirjabhatLeave a comment

October 24, 2024

Om Namaha Shivaya
Aaj Ka Suvichaar 🙏🏻🙏🏻

#2440
                      Aapki Panaah

Param poojya Guruji Maharaj,

Aap par hai aitbaar
Aapke sahaare hai intazaar
Khushi ke uss pal ka
Jo sajaayega naseeb mere kal ka.

Vo pal aayega kabb
Ye jaanein Aap Rabb
Aap hee jaanein uss khushi ka pataa aur naam
Mai toh in sabse hoon anjaan.

Bin jaane uska naam mai usey na sakoon pukaar
Bin jaane vo hai kahaan mai dhoondhoon idhar udhar baar baar
Lekin Aapke bulaane par khushi daudi chali aayegi, pyaare Parwardigaar
Vo Aapke hukm ko kabhi nahin karegi inkaar.

Ye sab kehte kehte aaya mujhe yaad
Ki khushi gumm dono mein hai Aapka ashirwaad
Kyunki Aap suljha rahe Hain mere praarabdh ke hisaab ko
Taaki aagey chalkar karmon kee kitaab saaf ho.

Ye mujhe yaad aaya, iske liye bhi Aapka shukrana
Aagey bhi mujhe bhoole na, Aap hee is galati se bachaana
Karti hoon yaachna kshamaa ke liye
Karti hoon shukriya Aapki panaah ke liye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapki Panaah (10/24/2024)

Taar Do (10/23/2024)

dhirjabhatLeave a comment

October 23, 2024

Om Namaha Shivaya
Aaj Ka Suvichaar 🙏🏻🙏🏻

#2439
                           Taar Do

Taar do, taar do
Guruji, mujhko taar do
Sudhaar do, sanvaar do
Mujhko Apna pyaar do
Taar do, taar do
Guruji, mujhko taar do.

Aapke bin gati nahin
Chalti meri mati nahin
Mujhko Apna dulaar do
Taar do, mujhe taar do.

Khayaal aate jaate hain
Mann ko bada sataate hain
Mita do abb har vikaar ko
Taar do, mujhe taar do.

Ashru behte jaate hain
Aapko buss ye bulaate hain
Abb Apna deedar do
Taar do, mujhe taar do.

Yahaan rehna bhi zaroori hai
Par rooh kee yahaan se duuri hai
Aap hee gyan ka saar do
Taar do, mujhe taar do.

Gustaakhiyan meri hain beantt
Par Aapki karuna toh hai anant
Bakhshishein aparampaar do
Taar do, mujhe taar do.

Mil gayi jo Aapki sharan
Safal hua mera janam
Shukrana mera sweekaar lo
Taar do, mujhe taar do.
Taar do, taar do
Guruji, mujhko taar do.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Taar Do (10/23/2024)

Kitna Shubh Thaa Veh Pal (10/22/2024)

dhirjabhatLeave a comment

October 22, 2024

Om Namaha Shivaya
Aaj Ka Suvichaar 🙏🏻🙏🏻

#2438
       Kitna Shubh Thaa Veh Pal

Kitna shubh thaa veh pal
Jabb Guruji ne mujhe bulaaya Apne dar par
Uss se pehle aur uske baad ka safar
Dono mein hai kitna antar.

Guruji ka chintan badhne laga hai
Chinta ho gayi hai kumm
Mushkilein abhi bhi hain kayi
Kintu Guruji ke samaksh kumm hai unka dumm.

Mann nahin lagta Guruji ke khayaalon ke bin
Shubh hota hai abb har din
Har din kisee yathaarth kee oar
Le chalti hai chetna
Har din Guruji ke kareeb honei kee
Miltee rehti hai prerna.

Sewa aur simran ka atoot naata
Aane lagaa hai samajh
Sangat ke anubhav sunkar
Anek duvidhaayein jaati hain sulajh.

Guruji kee yaad mein jeeti hoon
Unke naam ka amrit peeti hoon
Ye Guruji ka hee ashirwaad hai
Har ashirwaad ke liye Unhe dhanyawaad hai.

Guruji ko prasann karte rehne ka
Har din badhta jaata hai chaav
Baat jo aur jaise bhi shuru ho kisee se
Guruji kee baaton kee oar le jaata hai bahaav.

Is bahaav mein yoon behti jaaoon
Ki poore jagg ko Unkee mahima sunaaoon
Guruji ke pyaar ke mahasaagar mein behti jaaoon
Aur Guruji mein hee samaa jaaoon.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kitna Shubh Thaa Veh Pal (10/22/2024)

Aayi Hoon Aapke Dwaar (10/21/2024)

dhirjabhatLeave a comment

October 21, 2024

Om Namaha Shivaya
Aaj Ka Suvichaar 🙏🏻🙏🏻

#2437
           Aayi Hoon Aapke Dwaar

Param pita Guruvar mere,

Aayi hoon Aapke dwaar
Kar rahi hoon intazaar
De deejiye Apna deedar
Pukaaroon mai baar baar.

Din se raat hoti hai
Raat se hota hai din
Meri toh par gati nahin Aapke bin
Abb takk intazaar ke lamhe rahi thi gin gin.

Abb aur gina na jaaye
Khud jeena na aaye
Jabb takk rooh Aap mein na samaaye
Tabb takk ye rooh kaise sukoon paaye.

Badhti jaa rahi hai pyaas
Uttejit hoti jaa rahi hai aas
Vireh mein honei lagi hoon udaas
Duniya nahin aati raas.

Shukrana Aapka ki neend khul rahi hai
Shukrana ki zameer kee zameen dhul rahi hai
Shukrana Aapka ki Aap laaye Hain yahaan takk
Varna mai toh chalte chalte kabb kee gayi thi thakk.

Aise anmol aur aseem hain mujh par Aapke ehsaan
Ki mera beantt shukrana bhi kumm hai, mere maalik meharbaan
Mera naman sweekar keejiye
Mujhe Apne kaabil banaa deejiye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aayi Hoon Aapke Dwaar (10/21/2024)

Subah Shaam Ka Khel (10/20/2024)

dhirjabhatLeave a comment

October 20, 2024

Om Namaha Shivaya
Aaj Ka Suvichaar 🙏🏻🙏🏻

#2436
             Subah Shaam Ka Khel

Subah shaam ke khel se
Koi nahin bach paaya hai
Kintu har veh jann khushkismat hai
Jis par Guruji kee chhatra chhaaya hai.

Kabb aa jaaye jeevan kee shaam
Kisee ko nahin hai khabar
Isliye kyun na jeevan kee subah kee har kiran ka
Anand lekar karein jeevan basar.

Shaam ke baad swaabhaavik hai subah ka aana
Lekin aksar mushkil ho jaata hai shaam ke saath raat ko bitaana
Guruji ke charnon mein ho jiska ashiyaana
Uske liye vaheen guzarta hai subah shaam ka afsaana.

Pehne huey Guruji ke naam ka raksha kavach
Bhakt kitne anginat kashton se jaata hai bach
Shaam kee mayoosi aur chunautiyan uska santulan nahin sakti hain toad
Kyunki Guruji uss se muh moad kar kabhi nahin dete usey chod.

Jiska ekmaatra sahaara ho Guruji ka naam
Uske liye Guruji ke charnon mein hai sukh ka dhaam
Ek vahee toh sthaan hai jahaan
Subah jaisi hee sunehri ho sakti hai jeevan kee shaam.

Kyunki Guruji ke charnon mein behti hai mamta kee dhaara
Kyunki Guruji ke charnon mein hai ruhaaniyat ka ujiyaara
Tabhi toh Unke charnon mein jhuk kar miltee hai ruhaani oonchaayee
Guruji ke charnon mein hai gyan kee gehraayee.

Guruji ke charnon mein hoti hai sabki sunvaayee
Unke charnon mein subah shaam kee niyati kee ho sakti hai dobaara likhwaayee
Guruji ke charnon ka amrit hai kalyaanmayi aur jeevan daayi
Unke prataapi charnon kee hai aisee vaddi vadiyaayee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Subah Shaam Ka Khel (10/20/2024)

Ye Guruji Ka Dar Hai (10/19/2024)

dhirjabhatLeave a comment

October 19, 2024

Om Namaha Shivaya
Aaj Ka Suvichaar 🙏🏻🙏🏻

#2435
 Ye Guruji Ka Dar Hai

Ye Guruji ka dar hai
Ye Bholenath ka ghar hai
Yahaan nirantar behta hai pyaar ka amrit
Har pal hota hai yahaan bhakton ka hit.

Guruji ka sparsh sheetal ruhaani
Paati hai saari sangat deewaani
Guruji ka hai aisa spandan
Ki bhaav vibhor ho jaata hai mann.

Is dar par bhoole bhatke aakar
Paa lete hain sahi disha
Is dar par Guruji ke darshan paakar
Beet jaati hai niraasha kee nisha.

Guruji khud hee yahaan bulaate Hain
Koi yoon hee nahin aa sakta yahaan
Janmon ke paap dhul sakte hain
Mit sakte hain atma par se paapon ke nishaan.

Guruji ke dar par mumkin hai
Bhakt ka sampoorna kalyaan
Unke liye sab ek se hain
Sabhi bhakt hain Unkee santaan.

Kalyuga ke is samay mein jo bhi
Pahunch paaya hai Guruji ke dar par
Usey zaroorat nahin jeene kee museebaton se darr kar
Kyunki uske angg sangg Hain mahaan Shiv avatari Guruvar.

Guruji ke dar par hotei aayein hain
Anginat bhakton ke imtehaan
Kaun, kabb, aur kaise utteerna hoga
Iska kewal Guruji ko hai gyan.

Roag ho tann ka
Bartan ho mann ka
Ya abhaav ho dhan ka
Guruji har kamee karein poori
Guruji ke dar par aa jaane se
Uddhaar kee khwaahish na rahe adhoori.

Guruji kee sharan mein har lok ka sukh hai
Unke dar kee oar hee pyaasi hawaaon ka rukh hai
Unke dar kee divyata ke aagey jhukta har dukh hai
Ve jaanein kaun Gurumukh aur kaun mannmukh hai.

Apna aanchal ashish se bhar kar
Guruji viraajmaan rehte Hain dar par
Unke dar par bhakt ka har janam jaaye guzar
Koi vardaan ho hee nahin sakta is se badhkar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ye Guruji Ka Dar Hai (10/19/2024)

Safar Kee Ghadiyan (10/18/2024)

dhirjabhatLeave a comment

October 18, 2024

Om Namaha Shivaya
Aaj Ka Suvichaar 🙏🏻🙏🏻

#2434
               Safar Kee Ghadiyan

Jabb raaste par ho makhmali ghaas
Aasaan hota hai chalna
Lagta hai ki bin ghadi dekhe hee
Palak jhapakne se pehle hee beet jaati hai har ghadi
Aur jabb raasta ho pathreela
Mushkil hota hai chalna
Aisa lagta hai ki ghadi kee ghadiyan beet jaane par bhi
Apni gati ruk kar vaheen kee vaheen hai khadi.

Har ghadi mein hotey hain ek jitne hee pal
Par mushkil paristhiti mein lagta hai aisa
Ki aane mein bahut der kar raha hai aane wala kal
Aur aise mein bahut zaroori hai manobal.

Isliye jo aa rahe hon raaste mein pathar
Toh awashya pichhle karmon ke phal de rahe hain takkar
Lekin Guruji tere angg sangg Hain har ghadi
Ye sachchaayee hai sabse badi.

Aur jo aa rahi hai paaon ke neeche makhmali ghaas
Toh yaad rakhna zaroori hai ye baat khaas
Ki kabhi bhi ubhar sakta hai koi pathar raahon mein
Jo rukaavat bann sakta hai tere chalte paaon mein.

Isliye jaise bhi tu har ghadi raha ho guzaar
Chaahe jaisi bhi mehsoos ho rahi ho waqt kee raftaar
Chaahe makhmali ghaas ho ya mil rahe hon pathar baar baar
Tu Guruji ka shukrana karta chal baarambaar.

Saath hee Unse bakhshish maang har kadam par
Tu Guruji par yakeen kar
Ye hai kalyaan ka dar
Jaisa bhi hoga tera safar
Is satya mein santosh kar
Ki Guruji kee meher sada rahegi tujh par.

Beet jaayengi safar kee saari ghadiyan
Banti jaayengi ve satsang kee ruhaani ladiyan
Aisee hai Guruji Maharaj kee vadiyaayee
Ki tanhaayee mein bhi goonj uthti hai shehnaayee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Safar Kee Ghadiyan (10/18/2024)