Author: dhirjabhat

December 4, 2025

Om Namaha Shivaya
Aaj Ka Suvichaar 🙏🏻🙏🏻

#2846

            Mere Karmon Kee Khaayi

Gehri hai mere karmon kee khaayi
Isey akele paar kar mai aagey kaise jaaoon
Guruji, Aap angg sangg hee Hain har pal
Is satya se mai haunsla paaoon
Aapki kripa se hee ye khaayi kar paaoongi paar
Aap par hee hai mujhe poora aitbaar.

Agar Aapko lagta hai ki zaroori hai
Karmon ke liye jurmaana bharna
Toh khaayi paar karne ke liye
Manzoor hai mujhe girna
Kyunki Aap hee jaanein tareeka sabse uttam
Jiske dwaara mera praarabdh hoga khatam.

Yoon toh Aap girne se bachaane mein poori tareh se Hain samarth
Par shaayad girne se hee samajh aana ho mujhe uss rahasya ka arth
Jiske liye Aapne bakhsha hai ye janam
Jiske liye Aapne mujhe bulaaya Apni sharan.

Jaanti hoon ki Aap meri raksha karte aaye Hain aur karte rahenge
Aur karmon ke bhugtaan ke safar mein jabb jabb mere aansoo bahenge
Aap ponchhenge unhe Apni mamta ke divya jal se
Aur mujhe girne na denge Aap Apne aanchal se
Taaki karmon kee khaayi gehri
Bigaad na paaye meri aane wali subah sunehri
Aur raat bhi katt jaaye
Mere bin ghabraaye.

Mila hai Aapke haath ka sahaara
Mila hai Aapke saath ka aasara
Hota rahega mera uddhaar Aapke dwaara
Isliye khaayi mein girna bhi hai gavaara.

Nahin badi mujh nimaani kee mehnat ya chaah
Nahin badi hai vo khaayi jo rokti hai raah
Sabse badi hai Aapki Khudaayee
Jo mujhe Aapke charnon mein le aayi.

Aapse behtar koi na jaane is khaayi kee gehraayee
Aapse vaddi nahin hai kisee aur kee vadiyaayee
Anmol, adbhut, aur anupam hai Aapki guruyaayee
Khushkismat hoon mai ki mujhe milee hai Aapki rahnumaayee.

🌹🌹🌹🌹🌹🌹🌹

Jai Guruji 🙏🙏
Dhirja

Mere Karmon Kee Khaayi (12/02/2025)

December 3, 2025

Om Namaha Shivaya
Aaj Ka Suvichaar 🙏🏻🙏🏻

#2845

Guruji Ke Pyaare Darbar Mein

Guruji ke pyaare darbar mein
Sachkhand ke is sundar sansaar mein
Bheed kee zaroorat nahin
Zaroorat hai bhole bhakti bhaav kee
Chaalaaki aur dikhaawe kee koi jageh nahin
Jageh hai yahaan chaarul chaav kee.

Yahaan Guruji Maharaj ka hota hai stavan
Unhee se hoti hai arzi mann hee mann
Yahaan miltee hai bakhshish
Yahaan milta hai ashish
Bhakt kee kalpana se bhi behtar
Kyunki ye hai bakhshanhaar ka dar.

Guruji Maharaj ke darbar mein
Doob kar Unke paawan pyaar mein
Bhakt paa paaye Guruji mein sab kuch
Samajh paaye ki baaki sab hai tuchh
Besharte Guruji kee kripa ho bhakt par
Kyunki ye hai kirpadhaar ka ghar.

Yahaan Guruji jaanein sab, bina bhakt ke boley
Yahaan jo aaye, vo Guruji ka hee ho le
Duniyavi apne bhi hotey hain hamaare jin kashton se bekhabar
Guruji ko hoti hai unn sabki bhi khabar
Guruji toh antaryami Hain
Ve sansaar ke swami Hain.

Sabse nirmal hai ye nagariya
Yahaan behta hai daya ka dariya
Beshak is yug mein anekon bhakt hain pareshaan
Sabhi bhakt hain Guruji kee santaan
Bhakton ka hota hai is darbar mein kalyaan
Bhakton ko yahaan milta hai karuna ka daan
Guruji Maharaj toh Hain karunanidhaan
Guruji toh Hain Bhagwaanon ke Bhagwaan.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ke Pyaare Darbar Mein (12/03/2025)

December 2, 2025

Om Namaha Shivaya
Aaj Ka Suvichaar 🙏🏻🙏🏻

#2844

         Jabb Aapne Bulaaya Thaa…

Param poojya Guruji Maharaj,

Jabb Aapne bulaaya thaa
Tabb thi mai begaani
Aapki sharan mein aakar
Ho gayi Aapki deewaani
Tabb bhi thi aur abb bhi hoon nimaani
Na jaane kar jaati hoon kitnee baar naadaani.

Mai nahin bakhshishon ke bhi kaabil
Lekin Aapka hai atyant udaar dil
Bakhshte rehte Hain Aap
Harte Hain mere dukh santaap
Roti hoon toh Aap chup karaate Hain
Mujh par Apni mamta barsaate Hain.

Dil chaahta hai ki Aapko sada rakhoon prasann
Aap kripa karein toh poori ho ye chaahat
Yaad rakhoon ki Aap angg sangg Hain
Toh mujh takk nahin pahunch sakti pareshaani kee aahat.

Jo paristhiti mujhe lagti bhi hai agar pareshaani
Vo toh hai is zindagaani kee kahaani
Jo likhee mere hee karmon ne majboor hokar
Aur pareshaani chali jaayegi mujhe sirf chhookar
Ya phir ho sakta hai ki chhuye bin hee chali jaaye
Jo Aapki kripa chali aaye.

Kal takk bhi shukraguzaar thi Aapki aur shukraguzaar hoon aaj
Itnee niyaamaton se Aapne nawaaza hai, Maharaj
Itnee, ki andaaza lagaana bhi hai namumkin
Daave se keh sakti hoon ki koi ashish nahin hai Aapki daya ke bin.

Kal bhi suhaani bahaar ho ya ho bhayankar tufaan
Chal raha ho jeevan mein kaisa bhi imtehaan
Aisee sumat bakhshiyega mujhe, mere Bhagwaan
Ki Aapka shukrana karti rahe Aapki ye santaan.

🌹🌹🌹🌹🌹🌹🌹

Jai Guruji 🙏🙏
Dhirja

Jabb Aapne Bulaaya Thaa… (12/02/2025)

December 1, 2025

Om Namaha Shivaya
Aaj Ka Suvichaar 🙏🏻🙏🏻

#2843

               Guruji Ko Bhajo…

Guruji ko bhajo pyaar se
Guruji ko bhajo aadar satkaar se
Guruji ko bhajo aabhaar se
Guruji ko bhajo bhole bhaav ke bhandar se.

Guruji Hain Ve meet
Jo sada nibhaayein preet
Poori srishti bhi chod de agar saath
Guruji tabb bhi bhi na chodenge tumhaara haath.

Guruji Hain Ve nath
Jo sada raksha karte Hain
Koi haani na pahunche santaan ko
Ve gaur karte Hain.

Guruji Hain Ve hamdard
Jinke sangg haal baant sako tum kabhi bhi
Poori duniya bhi ho jaaye tumhaare viruddh
Guruji tumhe karuna se dekhenge tabhi bhi.

Guruji Hain ik aise
Jo tumhe sweekaarein tum ho jaise
Aur phir tumhe nikhaarein
Niswaarthta se tumhe taarein.

Guruji swayam roop Hain Ishwar ke
Aise kalyaan hotey hain Unke dar pe
Jo swabhavik taur pe hotey hain namumkin
Na ho paayein Ve atulneeya prataap ke bin.

Koi swaarth, koi shart nahin rakhte Hain Guruji
Na hee maangte tumse koi daan
Vaise bhi Unhe hum kya de sakte hain
Jo swayam Hain srishti ke daata aur Bhagwaan.

Baaki sabhi rishton mein ho sakta hai
Moh maya aur vyaapaar ka vaas
Kintu Guruji sangg jo naata hai
Uska saar hai sampoorna vishwaas.

Yahaan jageh nahin hai sanshay kee
Yahaan zaroorat nahin hai dehshat roopi bhayy kee
Yahaan mannat maane bin hee mil jaati hai jannat
Yahaan chadhti hai bhajne wale par aisee sundar rangat
Devi devta bhi Hain taraste jiske liye
Jalaa kar apne bheetar arzoo ke deeye.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ko Bhajo… (12/01/2025)

November 30, 2025

Om Namaha Shivaya
Aaj Ka Suvichaar 🙏🏻🙏🏻

#2842

               Chitt Kee Chunariya

Guruji ke naam ke rangg mein
Rangti rahe mere chitt kee chunariya
Guruji kee nirmal nazar se
Noorani hota jaaye mera nazariya
Guruji kee roshni ke prataap se
Ruhaani hota jaaye mera ravaiya
Toh Guruji ke dulaar se
Divyata se paripoorna hogi dil kee dagariya.

Kaantein hongei bhi toh saath mein hongei phool komal
Vivashtaayein hongi bhi toh raaste mein hongi tarangein taral
Kalyuga ke karkash shor ke beech gungunaa paaoongi mai sureeli gazal
Satyuga ka spandan bheetar hoga toh jeena honei lagega saral.

Guruji kee hoti rahegi meher
Toh Unke naam se rangi hui chunariya ko odh kar
Chalti rahoongi jeevan kee dagar par
Tayy hota jaayega ye safar.

Guruji ka haath rahega jo mere sir par
Toh Unke ashirwaad ka hota rahega asar
Guruji kee bakhshish se rakh paaoongi sabar
Dagariya par chalte huey karti rahoongi Guruji ka shukar.

Naam se rangi chitt kee chunariya ke liye Guruji ka dhanyawaad
Dhanyawaad, ki Unhe chet kar Unse hai mera chitt aabaad
Ye chunariya rangti rahe nirantar Guruji ke naam se
Jahaan bhi rahoon, jis bhi haal mein rahoon, judi rahoon Guruji se aur Unke dhaam se.

🌹🌹🌹🌹🌹🌹🌹

Jai Guruji 🙏🙏
Dhirja

Chitt Kee Chunariya (11/30/2025)

November 29, 2025

Om Namaha Shivaya
Aaj Ka Suvichaar 🙏🏻🙏🏻

#2841

Abb Na Kar Aur Naadaani

Abb na kar aur naadaani
Mann suljha re, aye praani
Varna khud se karega beimaani
Isliye abb toh sudhaar le zindagaani.

Guruji bulaa rahe Hain
Ye bulaava hai mangalkaari
Shraddha se yahaan matha tek
Mann suljhaane kee kar tayyaari.

Guruji ke darbar mein
Gurbani ke amrit mein doob kar
Mann saaf honei lagega
Dekhna, tu jaayega tarr.

Guruji ke darbar mein
Mann jod lena vandan mein
Sadh sangat ke beechon beech
Anand lena ruhaani spandan mein.

Vikarshan hon toh unpar na dena dhyan
Guruji se judne mein lagaana apne praan
Guruji aasan par hongei virajmaan
Unkee maujoodagi ko dena tu poora sammaan.

Guruji ke chai prasad aur langar prasad ko
Grahan karna shuddh mann se
Mann aur bhi saaf hota chalega
Prasad ke har kann se.

Saaf hotey hotey sulajhta jaayega mann
Simran se duur honei lagegi har duvidha, har uljhan
Mann ke sulajhne se swasth honei lagega tann
Tu paata jaayega santosh aur shanti ka dhan.

Tera bhaav lagega sanvarne
Zindagaani lagegi sudharne
Is se pehle ki anmol pal lagein guzarne
Tu shuru kar apne vichaar badalne.

Sakaratmak vichardhaara par de zor
Shukrana karte rehne par kar gaur
Mann ko modta chal Guruji kee oar
Guruji ko saump de apne jeevan ka har daur.

🌹🌹🌹🌹🌹🌹🌹

Jai Guruji 🙏🙏
Dhirja

Abb Na Kar Aur Naadaani (11/29/2025)

November 28, 2025

Om Namaha Shivaya
Aaj Ka Suvichaar 🙏🏻🙏🏻

#2840

          Koi Prem Nahin Hai Aisa…

Koi prem nahin hai aisa
Jaisa Guruji dete Hain Apni sangat ko
Ye sundar ehsaas ho jaata hai
Dekhkar sangat kee rangat ko.

Anginat kee taadaad mein
Guruji kee yaad mein
Sangat Unke bulaane par aati hai Unke mandir
Ek baar aakar aati hai phir phir.

Aisa hai Guruji ka paawan prataap
Ki mit-te hain bhakton ke aise dukh santaap
Jinka kaheen aur na ho paaya upaay
Par dayalu Guruji Hain sabke liye sahaay.

Waqt hai Guruji ke haath mein
Aur Guruji Hain bhakton ke saath mein
Jiska Ve dilaate Hain swayam hee bhakt ko ehsaas
Bhakt jaan aur maan jaata hai ki Guruji Hain bheetar aur aaspaas.

Niswaarth prem hai Guruji ka saari sangat ke liye
Ve toh aaye jalaane kalyugi andhere mein ruhaaniyat ke deeye
Har bhatke huey ko raasta dikhaane
Saralta se satyugi sanskaar sikhaane.

Guruji ka Apni sangat ke liye prem hai jo
Vo hai anokha aur anoop
Unhonei toh Apni mahima se seench diya hai
Apna har chhota aur bada swaroop.

Guruji ke har swaroop mein
Hai Guruji kee maujoodagi pyaari
Isliye har swaroop ka aadar karna
Hai hum sangat kee zimmedari.

Guruji Apne swaroop ke dwaara
Bhakton ko ashish Hain dete
Kitnon ke toh kasht Guruji
Swaroop dwaara swayam par Hain lete.

Aisee atulneeya hai mahima Guruji meharbaan kee
Unhe har pal fikr rehti hai Apni har santaan kee
Sangat khushnaseeb hai paakar sharan Guruji karunanidhaan kee
Ye divya sharan swayam manzil hai sangat ke sampoorna kalyaan kee.

🌹🌹🌹🌹🌹🌹🌹

Jai Guruji 🙏🙏
Dhirja

Koi Prem Nahin Hai Aisa… (11/28/2025)

November 26, 2025

Om Namaha Shivaya
Aaj Ka Suvichaar 🙏🏻🙏🏻

#2838

      Guru Sahib Kee Sharan Jo Milee

Guru Sahib kee sharan jo milee
Toh kismat ne lee khushnaseebi kee karvat
Kismat jo khilee
Toh safar kee raftaar ho gayi behad.

Guruji Maharaj ne karma bhog karvaana liya jo Apne haath mein
Toh Ve khud hee ho liye mere saath mein
Aur jiske saath ho Srishti ka shehenshah
Usey aaj nahin toh kal mil hee jaayegi raah.

Sahi waqt Guruji jaanein
Sahi vidhi bhi Ve pehchaanein
Apne haath mein toh karma ke siwa kuch nahin
Aur Guruji jaisa chaahein aur karein vo hee hai sahi.

Unhee ke hukm par chalti jaaoon
Abb dooji nahin koi raah
Unke aanchal mein palti jaaoon
Abb dooji nahin koi chaah.

Maa Hain Guruji Maharaj
Unke aanchal mein hoon mai surakshit
Pita Hain mere sartaj
Unke charnon mein sada hoga mera hitt.

Murshid bhi Hain Guruji mahaan
Apne tareeke se dete Hain itna gehra gyan
Mujh nimaani mureed ko
Sweekaar kar meri preet ko.

Meet bhi aur bhraata bhi bannkar
Dete Hain Ve Apna saath
Duniya idhar se udhar bhi ho jaaye
Toh bhi Ve na chodenge mera haath.

Aisa vishwaas Guruji ne hai bakhsha
Ki karte rahenge Ve hee raksha
Toh phir raaste mein beshak aa jaayein pathar
Mai toh odh kar Guruji ke naam kee chaadar
Leti chaloon aagey kee oar har kadam
Unkee yaad mein guzaarte huey ye jeevan.

🌹🌹🌹🌹🌹🌹🌹

Jai Guruji 🙏🙏
Dhirja

Guru Sahib Kee Sharan Jo Milee (11/26/2025)

November 25, 2025

Om Namaha Shivaya
Aaj Ka Suvichaar 🙏🏻🙏🏻

#2837

        Guruji Dekh Rahe Hain Tumhe

Guruji dekh rahe Hain tumhe, chinta na karo
Guruji angg sangg Hain tumhaare, isliye tum na daro
Himmat na haaro
Ibadat kar ke har pal ko sanvaaro.

Gumm na karna jo na bhi laage dhyan
Koshish karte raho, bade hee anmol hain praan
Guruji ke saanidhya mein baith kar dekho
Mann se Unhe bhaavpoorna maatha teko.

Guruji tumhe dekh kar Apni ichcha se lenge joad Apne sangg
Anokhi hai Unkee leela, adbhut hain Unke dhangg
Dekhte dekhte kab jaaoge tarr, tum jaan bhi na paaoge
Guru kripa se mushkilon ke paar pahunch jaaoge.

Alag andekhe hotey hain aksar Guruji ke tareeke kalyaan ke
Tum toh charnon mein ho Guruji ke roop mein Bhagwaan ke
Jo hoga achcha tumhaare liye, Guruji karenge vahi
Tum vaise bhi kya jaano ki tumhaare liye kya hai sahi.

Tumhaari soch aur nazar jaa nahin sakti vahaan takk
Guruji kee soch aur nazar jaati hai jahaan takk
Tabhi Unke ashirwaad hotey hain sarvopari aur akath
Vahaan takk sochne ke kaabil nahin hai tumhaari matt.

Isliye Unkee sharan mein zaroori hai samarpan
Isliye chinta ke bajaaye zaroori hai Unka chintan
Sthiti aur paristhiti jaisi bhi ho, chal toh jaayega jeevan
Par Guruji ko sab saump kar jeevan kee disha aisee jaayegi bann
Ki Guruji ke haath mein hogi tumhaari naiya kee patvaar
Aur Guruji swayam lekar chalenge tumhe bhavsaagar ke paar.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Dekh Rahe Hain Tumhe (11/25/2025)