Author: dhirjabhat

September 18, 2024

Om Namaha Shivaya
Aaj Ka Suvichaar 🙏🏻🙏🏻

#2404

     Guruji Ke Bharose

Guruji ke bharose chalte jaao
Manzil mil hee jaayegi
Veeraanepann wale vann mein
Kalyaan kee kalee khil hee jaayegi.

Satark rehna, jaagte rehna
Zaroorat pade toh bhaagte rehna
Rukna pade toh rukte jaana
Sada Guruji ke charnon mein jhukte jaana.

Rukte huey, bhaagte huey, chalte huey
Soorat ke uday hotey aur dhalte huey
Guruji ko yaad karte rehna
Unse baatein karte rehna
Raasta katt hee jaayega
Kaaraj nipat hee jaayega.

Dekho toh sahi aisa kar ke
Arey, aaye ho Guruji ke dar pe
Kabhi na lautoge niraash yahaan se
Tabhi toh sangat aati hai yahaan vahaan se.

Guruji kee izaazat hui hai toh tum bhi aaye ho
Ve jaante Hain ki tum ghabraaye ho
Kalyuga aur karmon kee hain ye chunautiyan saari
Guruji bhugatvaayenge ek saath ya baari baari.

Ye Unn par hai nirbhar
Jo Hain mayapati Gangadhar
Jinse kaal bhi jaata hai darr
Jinke dwaara paapi takk jaate hain tarr.

Sewa aur simran mila hai tumhe bakhshish mein
Vishwaas aur shraddha rakhte chalo Guru roopi Ish mein
Guruji ke satsang suno sunaao
Guruji kee mahima gaate jaao
Unka naam duhraate jaao
Unke aur kareeb aate jaao.

Sakaaratmakta vichaaro
Guruji ko pukaaro
Sanshay chod do
Sankalp odh lo
Hota hai jo
Vo honei do
Raasta Guruji se
Manzil bhi Hain Vo.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Ke Bharose (09/18/2024)

September 17, 2024

Om Namaha Shivaya
Aaj Ka Suvichaar 🙏🏻🙏🏻

#2403

    Mere Sir Par Rakha Jo Aapne Haath

Param poojya Parwardigaar Guruvar mere,

Mere sir par rakha jo Aapne haath
Mil gaya mujhe jo Aap Paramatama ka saath
Toh mitt hee gaya akelapann
Kyunki Aapse jud gaya mera mann.

Aapse hee baatein hoti hain rehti
Kabhi mai sunti hoon Aapki
Kabhi apni baat hoon kehti
Aapka swaroop bhi nahin hota agar
Toh bhi mulaakaat chalti hai aksar
Kabhi kabhi darshan ho jaate hain sapne mein
Kabhi bhi lagte nahin Aap mujhe duur apne se.

Jabb dil mein hoti hai tadap ki Aapko 2007 se pehle nahin dekha
Toh swayam ko samjhaati hoon ki ye hai kewal bhautik samay kee ek rekha
Kya maalum mujhe ki huey hon Aapke darshan
Aur mainey Aapko pehchaana na ho uss kshan?

Ya phir uss se pehle Aapse miltee agar
Toh Aapko na maanti Bhagwaan
Jab ki aaj toh jaisi hai jeevan kee dagar
Aapke siwa na soojhe mujhe koi aur karunanidhaan.

Aap hee jaanein har kaaran
Kaaran karta Hain Aap Shiv avatari
Aisee sumat bakhshiye
Ki mai har haalaat mein jaaoon Aapke balihaari.

Aapke hee gunn mai gaaoon
Aapke charnon mein sees jhukaaoon
Divya Jyoti ek
Sabhi devi devta ke darshan ke liye jaaoon
Kintu Aapse seedhi taar judi rahe yoon
Ki Aapke dar se kaheen aur na jaaoon.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mere Sir Par Rakha Jo Aapne Haath (09/17/2024)

September 16, 2024

Om Namaha Shivaya
Aaj Ka Suvichaar 🙏🏻🙏🏻

#2402

                 Paheli Aur Saheli

Aye zindagi, tu bann kar reh gayi hai paheli
Aye maut, ek tu hee lagti hai aslee saheli
Tum dono hee ho Guruji ke niyantran mein
Isliye Unse arzi hai mann hee mann mein…

Ki chaahe ho maut ya zindagi ka pal
Mujhe sambhaale Unhee ka aanchal
Kyunki aur kaheen na milegi aisee suraksha
Aur kaheen na milega aisa pyaar
Jaisa unke aanchal mein milta hai baar baar.

Paheli boojhne kee mujh mein nahin hai kshamta
Guruji chalaa rahe Hain toh mai rahi hoon chal
Unhe hee maalum hai kabb saheli sahi hogi
Tabb takk vo bhi Unkee marzi se jaayegi tal.

Zaroori hai dono se preet
Kyunki dono hain ik reet
Jo hogi nibhaani
Jabb takk milan kee bela nahin hai aani.

Paramatama se rooh ke milan kee bela
Sabko ye safar tayy karna hai akela
Kewal Guruji ka saath aayega kaam
Vyarth hai baaki har intazaam.

Pehle bhi shukrana thaa Guruji ka
Aaj bhi hai shukrana
Waqt ne toh hai guzar jaana
Lekin shukrana ne sada kaam hai aana.

Shukrana Guruji kee bakhshindagi ka
Shukrana bandagi ka
Har paheli ka shukrana
Har saheli ka shukrana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Paheli Aur Saheli (09/16/2024)

September 15, 2024

Om Namaha Shivaya
Aaj Ka Suvichaar 🙏🏻🙏🏻

#2401

                      Preet Paraayi

Guruji kar rahe Hain tumhaari chinta
Tum karte raho Unka chintan
Bharosa daan maango
Karo vinamr vandan.

Guruji kee shakti
Nikhaarti rahegi tumhaari kee hui bhakti
Tum thakk jaaoge beshak
Unkee shakti kabhi nahin thakti.

Guruji ke saanidhya mein bitaaya koi bhi pal
Kabhi vyarth na jaayega
Yahaan Unkee yaad mein beetega jo samaa aaj aur kal
Vo vahaan kaam aayega.

Kyunki Unhee se saarthak hai har shwaas
Satya hai buss ek Unka ehsaas
Guruji sangg preet ka mahatva hai param
Is rishte kee maanyata ko rakho sarvapratham.

Guruji kee sharan sukhdaayi hai
Guruji kee suraksha sthaayi hai
Baaki sabb asthaayi hai
Baaki har preet paraayi hai.

🌹🌹🌹🌹🌹🌹🌹

Jai Guruji 🙏🏻🙏🏻🌹🌹
Dhirja

Preet Paraayi (09/15/2024)

September 14, 2024

Om Namaha Shivaya
Aaj Ka Suvichaar 🙏🏻🙏🏻

#2400

   Is Safar Kee Manzil

Andhere se shuru hua safar
Reh na jaana kaheen andhere mein
Safar safal tabhi hoga
Jabb mukammal hoga vo savere mein.

Ye safar hai andhkaar se prakash kee oar
Ye bhautik padaarthon kee talaash mein nahin, balki le chalega ruhaani oonchaayee kee oar.

Vaheen duur hoga andhera
Vaheen milega savera
Vaheen hogi ruhaani dhoop
Jismein nikharega rooh ka roop.

Guruji kar rahe Hain meharbaani
Ki mil jaaye hamein vo manzil suhaani
Par koshish karte rehna hamaara farz hai
Kyunki hum par hamaare hee karmon ka karz hai.

Is karz ko utaarna hoga
Jeevan ko sanvaarna hoga
Aagey badhne ke liye
Oonchaayee chadhne ke liye.

Chadhna jitna mushkil hai
Girna hai uss se bhi aasaan
Kyunki aur karma ho rahe hain saath saath
Aur unnati ko rok leta hai hamaara hee abhimaan.

Ajeeb baat hai na insaan mein
Ki hum baadha bante hain apne hee kalyaan mein
Kar ke naadaani
Kar ke manmaani.

Guruji karne kalyaan Hain aaye
Kyun na chitt ko Unmein lagaaye
Bina aur samay ko gavaaye
Guruji ka anusaran kiya jaaye.

Guruji ke aanchal mein hai vo savera
Jo duur karega andhera
Guruji ke charnon mein hai ruhaani oonchaayee ka shikhar
Yoon hee toh nahin Har ka hai Unka dar.

Antas mein basaa rahega jo Unka swaroop
Toh khilegi meethi ruhaani dhoop
Jiskee kiran dikhaayegi veh oonchaayee
Jo phir na reh jaayegi paraayee
Kyunki veh ho jaayegi haasil
Bannkar is safar kee manzil.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Is Safar Kee Manzil (09/14/2024)

September 13, 2024

Om Namaha Shivaya
Aaj Ka Suvichaar 🙏🏻🙏🏻

#2399

   Meri Har Khaami Ke Baavajood…….

Param poojya Guruji Maharaj,

Meri har khaami ke baavajood mujhe Aapne sweekaara
Meri himmat haarne par diya mujhe sabse zyaada sahaara
Apni goad mein baithakar katvaakar mera har samaa maada
Aap dikhaate Hain Apni rehmat ka itna sukhad nazaara.

Mai toh kabhi gin bhi nahin sakti
Aapki kitnee rehmatein hain mujh nimaani par
Aapne toh taras kiya hai meri har naadaani par
Aapke ashish ke akash ka chandova hai meri zindagaani par.

Is aseem akash mein Aapki bakhshish ke baadal aate hain nazar
Ve baadal har pal barsaate rehte hain Aapki meher
Yakeen hai mujhe ki Aapki nadar ka hoga ye asar
Ki bakhshish kee is barsaat kee boondon mein bheegte huey beet jaayega mera ye safar.

Shukrana mujhe sweekaarne ka
Shukrana noorani nazaare dikhaane ka
Shukrana ashish ke akash ke taley mujhe chalaane ka
Shukrana bakhshish ke baadalon ke chhaa jaane ka
Shukrana in baadalon kee boondon ko barsaate rehne ka
Shukrana sada mere angg sangg rehne ka.

Shukrana simran ka jismein sukh hain saare
Shukrana satsang ka jo laata hai mujhe Aapke dwaare
Shukrana sewa ka paap dhulte hain jiske sahaare
Shukrana Aapke naam ka jo pahunchaayega mujhe kinaare.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Meri Har Khaami Ke Baavajood……. (09/13/2024)

September 12, 2024

Om Namaha Shivaya
Aaj Ka Suvichaar 🙏🏻🙏🏻

#2398

               Rooh Kee Tamanna

Guruji ne kitnon ko hai bakhsha
Ve karte Hain har bhakt kee raksha
Ve Hain Brahmaand ke samrat
Har shwaas hai Unkee dee daat.

Unkee mahima ke saamne bahut chhota hai Anant akash ka aseemit vistaar
Unkee shakti ke aagey kamzor hai Mahasaagar ka paraakram aparampaar.

Har khushboo pheeki padd jaati hai
Unkee ruhaani khushboo ke aagey
Unke paawan prem ke rass mein
Bheeg jaate hain bhaav ke dhaagey.

Japp Unke naam ka
Maan-na Unke paigaam ka
Darshan Unke dhaam ka
Yahee sabb lagta hai abb kaam ka.

Guruji ne Apni karuna se
Aise liya hai jod
Ki har khayaal
Le jaata hai Unkee hee oar.

Geeton mein Guruji ka ehsaas
Kavitaaon mein Guruji ka vaas
Chintan mein Guruji ka nivaas
Phir kaise khush na rahe ye das?

Guruji se hee prasannata
Guruji se hee sampannata
Guruji se hee shraddha aur saboori
Ho jaaye jo buss ye aas poori
Ki Guruji se duur ho jaaye har duuri
Toh rooh kee tamanna na rahegi adhoori.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Rooh Kee Tamanna (09/12/2024)

September 11, 2024

Om Namaha Shivaya
Aaj Ka Suvichaar 🙏🏻🙏🏻

#2397

             Sada Sada Shukrana 

Pinjaraa vichaaron ka
Aakraman vikaaron ka
Jaal khayaalon ka
Janjaal sawaalon ka.

Hisaab pichhle karmon ka
Karz na jaane kitne janmon ka
Asantosh baavajood suvidhaaon ke
Chalte rehna baavajood duvidhaaon ke.

Dukh ke kaante sukh ke upvan mein
Aate jaate aandhi tufaan jeevan mein
Muskuraahaton aur aansuon ka mela
Koi mehfil mein, koi mehsoos karey akela.

Guruji ka naam japte rehna
Guruji se dil kee baatein kehna
Unhe samarpan kar har paristhiti ko sehna
Har haal mein Unke prem bhaav mein behna.

Aur Guruji hee sab rahe Hain sambhaal
Varna in sab ke beech na jaane kaisa ho haal
Kuch kuch kasht hee toh jhelne padte hain
Adhiktar toh Guruji dete Hain taal
Saath saath dekar bakhshish aur ashish
Ve karte Hain nihaal.

Aseemit hai Guruji kee rehmat
Har bhakt ho jaata is satya se sehmat
Kabhi na kabhi is safar ke dauran
Jaise jaise hoti hai adhyaatma kee pehchaan.

Phir khushi hoti hai apni khushnaseebi par
Ki Guruji Maharaj ne bulaa liya Apne dar
Safar toh vaise bhi jaata hee guzar
Lekin haseen moad aaya jabb se Guruji kee meher ka hua hai asar.

Guruji kee karunamayi kripa se ye haseen moad
Yakeenan le chalega har bhakt ko usee oar
Jahaan Guruji chaahte Hain pahunchaana
Param poojya Guruji Maharaj ka sada sada shukrana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sada Sada Shukrana (09/11/2024)

September 10, 2024

Om Namaha Shivaya
Aaj Ka Suvichaar 🙏🏻🙏🏻

#2396

                   Matvaale Musaafir

Matvaale musaafir,

Abb jo tu chal pada hai Guruji ke dikhaaye raaste par
Toh na jaana is raaste ko chod kar
Kyunki Guruji ne thaam lee hai tere jeevan kee doar
Aur tujhe zaroorat nahin jaane kee kaheen bhi aur.

Tu na bhatak idhar udhar
Guruji Hain tere Ishwar aur tere humsafar
Guruji tere pita bannkar tujhe chalna sikha rahe Hain
Guruji tujhe sansaar kee asaliyat dikha rahe Hain
Ve de rahe Hain tujhe is safar ko tayy karne kee kshamta
Ve maa bannkar de rahe Hain tujhe Apni mamta
Mitr Hain Ve tere, har pal tere angg sangg rehte Hain
Murshid Hain Ve tere, andhere se roshni mein le jaane wali baat kehte Hain.

Na kar tu kisee baat ka dar
Guruji ne diya hai tujhe kalyaan ka var
Unhonei liya hai tera haath pakad
Tu bhi neevaan ho jaa tyaag kar apni akad.

Safar mein beshak thoda rukna
Safar mein sada Guruji ke samaksh jhukna
Rukte huey, chalte huey karna Guruji ka chintan
Har kadam par har karma kar tu Unhee ko arpan.

Samay nahin rukega aur raasta bhi ho jaayega tayy
Guruji ke diye ashish se tu ho jaayega nirbhay
Unke gyan kee jyot se ujjwal hota rahega raasta tera
Tu mehsoos karega ki tujhe phoolon ke gulistaan ne hai ghera
Uss gazab ke gulistaan mein hogi Guruji kee khushboo ruhaani
Aandhi tufaan bhi aayein toh bhi tere liye har ritu hogi suhaani
Isliye chalta chal tu raaste par karte huey Guruji se pyaar
Guruji ke hukm mein sajda kiye manzil kar rahi hai tera intazaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Matvaale Musaafir (09/10/2024)

September 9, 2024

Om Namaha Shivaya
Aaj Ka Suvichaar 🙏🏻🙏🏻

#2395

            Bheegti Jaa Rahi Hoon

Bheegti jaa rahi hoon
Guruji ke pyaar kee barsaat mein
Paani nahin, ye amrit hai
Jo barasta hai din aur raat mein.

Is amrit mein hai Guruji ka ashish
Is amrit mein hai Unkee dee bakhshish
Ismein bheegte huey jhukta hai mera sheesh
Jis par meher ka haath rakhte Hain mere Ish.

Mere Ish, yaani ki swayam mere Guruji Maharaj
Mere Har, mere Guruvar, mere sartaj
Jinka hai is baarish kee har boond par raj
Jo kal bhi usey barsaa rahe thei, aur barsaa rahe Hain aaj.

Ummeed hee nahin, balki ye hai mera vishwaas
Ki aane wale kal ke har pal mein bhi poori hoti rahegi meri aas
Guruji ke pyaar kee barsaat mein bheeg jaane kee
Pal pal param poojya pyaare Guruji ke saanidhya mein jee paane kee.

Unke saanidhya bin jeena vyarth hai
Unke saanidhya se hee jeevan ka arth hai
Guruji ka shukrana jeevan saarthak banaane ke liye
Guruji ka shukrana is saarthak afsaane ke liye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bheegti Jaa Rahi Hoon (09/09/2024)