Author: dhirjabhat

September 8, 2024

Om Namaha Shivaya
Aaj Ka Suvichaar 🙏🏻🙏🏻

#2394

                        Ik Aansoo

Ik aansoo jo tera baha
Uss aansoo ne Guruji se kaha
Vo sab kuch jo tu na keh sakaa
Vo sab jo tera dil na seh sakaa.

Tabhi toh tere ik aansoo ne keh di vo baat
Jismein thei tere jazbaat
Jo beshak Guruji tere bin boley bhi lete jaan
Par shaayad tera dil na leta is satya ko maan.

Aansoo bahaane ka gumm na kar
Taqdeer kee takraar se na tu dar
Guruji ne diya hai jis manobal ka var
Usey badhaa, aur kar uskee kadar.

Guruji ka bakhsha hua simran
Tere prayaas se tujhe aagey badhaayega
Jitna juda rahega tu Guruji se simran aur chintan dwaara
Tera manobal utna hee badhta jaayega.

Tera ye ik aansoo hai bahut anmol
Anmol hain is aansoo ke bol
Aur koi jaane ya nahin, Guruji jaante Hain is ik aansoo mein basey tere bhaav ko
Pehchaante Hain Guruji tere samarpan ke bahaav ko.

Waaqif hai teri rooh
Ki tera ye ik aansoo
Tere bhaav ka hai prateek
Jo tujhe laayega nazdeek
Guruji Maharaj ke
Param poojya Sartaj ke.

Aisee ruhaani niyaamat hai ye nazdeeki
Jiske aagey sabse keemati heere kee chamak bhi padd jaaye pheeki
Is nazdeeki kee kar kadar
Ye hai tujh par Guruji kee nadar
Is nadar ne tere roam roam ko liya hai chhoo
Is nadar kee badaulat itna khushnaseeb hua hai tu.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ik Aansoo (09/08/2024)

September 7, 2024

Om Namaha Shivaya
Aaj Ka Suvichaar 🙏🏻🙏🏻

#2393

Guruji Ko Pyaar Se Lo Pukaar

Tum Guruji ko pyaar se lo pukaar
Pyaar se karo Unse tum apne pyaar ka izhaar
Guruji sunte bhi Hain, Ve samajhte bhi Hain
Ve bigde naseeb badalte bhi Hain.

Tum karo Guruji kee raza ko sweekaar
Na karo Unke hukm par tum inkaar
Guruji dekhte bhi Hain, Ve parakhte bhi Hain
Ve kasauti par rakhte bhi Hain.

Guruji ko arpit karo apne karma aur vichaar
Tum niyantran mein karo apne vikaar
Guruji sudhaarte bhi Hain, Ve sikhaate bhi Hain
Ve tumhe behtar banaakar dikhaate bhi Hain.

Tumhe Guruji kabhi bhi na chodenge beech majdhaar
Unkee kripa se awashya hoga tumhaara beda paar
Guruji sanvaarte bhi Hain, Ve taarte bhi Hain
Ve naummeed jeevan ko nikhaarte bhi Hain.

Tum Guruji ka shukrana karte raho baarambaar
Tum gaate chalo Unkee mahima aparampaar
Guruji bakhshte bhi Hain, Ve anugrahit bhi karte Hain
Ve har tareeke se bhakt ka hitt hee karte Hain.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Ko Pyaar Se Lo Pukaar (09/07/2024)

September 6, 2024

Om Namaha Shivaya
Aaj Ka Suvichaar 🙏🏻🙏🏻

#2392

    Guru Ke Roop Mein Parwardigaar

Satguru pyaare,

Aapse chhipaaye na chhipe mera gumm
Kumm se kumm Aapke saath baith vo ho toh jaata hai kumm
Lekin kabhi kabhi ye gumm dheeth ho jaata hai
Phir ye bada rulaata hai
Rula kar bahut sataata hai
Tabb kuch samajh nahin aata hai
Aur sehem kar dil ghabraata hai.

Bahut si kamiyaan hain meri bhakti mein
Par koi kamee ho nahin sakti Aapki shakti mein
Meri ashavaadi aankhon mein hai jo nami
Vo arzi karti hai ki duur keejiye meri bhakti mein kami
Taaki mai Aapki bhakti mein kabhi na thakoon
Aur mai Aapko prasann kar sakoon.

Gumm kee galiyon mein na kho jaaoon
Achche karmon ka beej bo paaoon
Sakaratmakta atmasaat karti rahoon
Mehnat din raat karti rahoon.

Aap toh rehmaton ka bhandar Hain
Aap toh mera sansaar Hain
Aap meri bhakti ka aadhaar Hain
Aap Guru ke roop mein Parwardigaar Hain.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guru Ke Roop Mein Parwardigaar (09/06/2024)

September 5, 2024

Om Namaha Shivaya
Aaj Ka Suvichaar 🙏🏻🙏🏻

#2391

Sabse Uttam Ashirwaad

Param poojya Guruji,

Aap sada Hain angg sangg
Aap bakhshte Hain shubh aarambh
Aap bakhshte Hain sthagit ka praarambh
Aap hee bakhshte Hain vilamb.

Aapka har ikraar hai uphaar
Aapka har inkaar bhi hai upkaar
Kyunki Aap har tareh se Hain udaar
Ek baar nahin, balki har baar.

Aapke kiye har kalyaan mein
Samaayi hain rehmatein kayi hazaar
Na minnat mein, na mannat mein waqt karoon bekaar
Aisee sumat aur shraddha bakhshte rahiye, mere Parwardigaar.

Buss, karti rahoon Aapse beintehaa pyaar
Karti rahoon Aapka aadar satkaar
Jin Guruvar ke adheen hai ye saara sansaar
Aap toh swayam Hain bhakton ke adheen Ve hee srijanhaar.

Taarne wale bhi Aap
Sudhaarne wale bhi Aap
Sanvaarne wale bhi Aap
Nikhaarne wale bhi Aap.

Aap hee Aap, aur nahin kuch
Aap hee sab kuch, baaki sab tuchh
Imtehaan aate rahe hain baari baari
Zamaane ne bhi koshishein kee dher saari…
Kintu shukr hai ki mann nahin maana
Mainey toh is raaste par ye hai jaana
Ki mujhe toh aur koi dar na aaye raas
Aur Aap par nirbhar hai mera toh har shwaas
Sabhi ke bhaav ko pranaam karte huey kehti hoon
Ki Aapki sharan mein mera ye safar ho gaya hai bahut hee khaas.

Sada Aapka shukrana karti rahoon
Aapki kripa se jholi bharti rahoon
Jholi mein Aap daalenge jo bhi prasad
Vahee hoga mere liye sabse uttam ashirwaad.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sabse Uttam Ashirwaad (09/05/2024)

September 4, 2024

Om Namaha Shivaya
Aaj Ka Suvichaar 🙏🏻🙏🏻

#2390

     Mann Mein Hain Kuch Khayaal

Param poojya Guruji Maharaj,

Mann mein hain kuch khayaal
Mere Guruvar deendayaal
Jaise jaise Aapke prati prem bhaav mein mai nimaani behti hoon
Mann ko jhuka kar Aapke charnon mein mai Aapse kehti hoon.

Na hai mujhe koi gyan
Na mujhe karna aaye dhyan
Hoon satya saar se anjaan
Aap deejiye sumat ka daan.

Aapka rutaba alishaan
Aap karunanidhaan
Aap pooran Guru mahaan
Aap swayam Shiv Bhagwaan.

Aapke dar pe aane ke baad
Kaheen aur jaane kee chaahat nahin
Aapke dar pe aane ke baad
Kaheen aur jaane kee zaroorat nahin.

Kyunki sabse ooncha dar hai Aapka dar
Yahaan se safar jabb se hua hai agrasar
Tabb se hua hai rooh aur mann par kuch aisa asar
Ki jee chaahe Aapke charnon mein hee har janam jaaye guzar.

Swarg ya mukti ka nahin maalum mujhe
Mujh nacheez ko toh kewal ye soojhe
Ki sukh praapti hai Aapke kamal charan mein
Isliye mai toh sada rehna chaahoon Aapki sharan mein.

Kyunki phir mai jis bhi haal mein hoon, hoon surakshit
Kyunki Aapki sharan mein sadaiv hai mera hitt
Aap Hain mujh bachchi ke liye mata pita, mujh shagird ke liye murshid
Ashish deejiye ki mai Aapke hukm ko sir aankhon par rakh kar maanoon nit nit.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mann Mein Hain Kuch Khayaal (09/04/2024)

September 3, 2024

Om Namaha Shivaya
Aaj Ka Suvichaar 🙏🏻🙏🏻

#2389

          Deewaanepann Kee Hadd

Deewanepann kee hadd se guzar jaane do
Guruji ke prati apne pyaar ko
Aise, ki aur kisee intazaar ka na ho tumhe intazaar
Kyunki Guruji aur tumhaare beech ka pyaar
Yahee toh hai tumhaare janam maran ka saar
Yahee hai vo rooh se rooh kee seedhi taar
Jiske akhand jod ke liye rooh rehti hai bekaraar.

Rooh ka rooh se hai ye rishta
Rooh ka hee hai ye safar
Paramatama ka ansh hai ye atma
Manzil kee toh karni hogi kadar.

Darr lagna toh nahin chahiye intazaar se
Par kabhi kabhi lagg jaata hai
Lekin jabb rooh judi ho Guruji sangg seedhi taar se
Toh phir deewaanapann umad aata hai uss pyaar se.

Is deewaanepann mein hai nirmal nirbhayta
Is deewaanepann mein hai anand aur akhandataa
Is deewaanepann mein chhalakta hai vishwaas
Is deewaanepann mein hai is pyaar ke badhte rehne kee aas.

Is deewaanepann mein utsaah ka ujaala hai
Is deewaanepann mein bhakti kee jyot kee jwaala hai
Is deewaanepann mein anand niraala hai
Is deewaanepann mein magn har bhakt hota matvaala hai.

Is deewaanepann kee hadd se guzar jaane ka avsar
Virlon ko hee hota hai naseeb
Guruji kee kripa bin na ho sakey koi Unka deewaana
Beshak apnaa lo koi bhi tarkeeb.

Guruji ko kar ke prasann
Mil paata hai ye deewaanapann
Khil paata hai mann ka upvan
Nikhar paata hai ye jeevan
Aur hadd se guzar kar
Behad khoobsoorat ho jaata hai safar
Kyunki mann har shikva har shikayat ko bhool kar
Jhukta hai shukrana mein Guruji ke dar par.

Har saans mein hota hai buss Guruji ka hee naam
Sunaayi deta hai toh buss Guruji ka hee paigaam
Chaahe ho sunehri subah ya ho saanvli shaam
Deewaane dil mein har pal basaa rehta hai Guruji ka dhaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Deewaanepann Kee Hadd (09/03/2024)

September 2, 2024

Om Namaha Shivaya
Aaj Ka Suvichaar 🙏🏻🙏🏻

#2388

            Bhola Bhakti Bhaav

Baazuon mein bal hona koi badi baat nahin
Zarooori hai dumm hona kirdaar mein
Varna beshak kaam chal jaayega is sansaar mein
Kintu badhauti hoti jaayegi sanchit karmon ke bhaar mein.

Guruji kee kripa se vish-rahit ho jaayein hamaare vichaar
Tabhi toh shuddh hongei hamaare sanskaar
Sanskaar shuddh hongei, toh anukool hoga swabhaav
Aur isee swabhaav ko pratibimbit karega hamaara bhaav.

Bhaav hoga jitna bhola aur saral
Bhaav hoga jitna nirmal aur komal
Guruji ko utna hee bhaayega
Aur bhakti ko utna hee badhaayega.

Na chalti yahaan chaalaaki
Na chalti yahaan chaturaayee
Na yahaan jhooth aur paakhand ka koi kaam
Na kaam aati yahaan apni vadiyaayee.

Guruji ko na rijhaayein dikhaawe bhare nazaare
Guruji Maharaj toh Hain Bholenath hamaare
Ve chaahein ki koi bhakt apna bhola bhaav na bisaare
Guruji ko paana mumkin hai bhole bhakti bhaav ke sahaare.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bhola Bhakti Bhaav (09/02/2024)

September 1, 2024

Om Namaha Shivaya
Aaj Ka Suvichaar 🙏🏻🙏🏻

#2387

  Unke Pyaar Kee Satya Gaathaayein

Bhakt ke liye apaar pyaar hai Guruji kee nazar mein
Bhakt ka uddhaar hai Guruji kee nadar mein
Bhakt ka pavitrikaran aur sudhaar hota hai is safar mein
Guruji ka ashirwaad barasta hai ghar ghar mein.

Jis bhakt par padd jaaye Guruji kee nazar
Uske bin jaane bhi uspar hota hai Guruji kee rehmat ka asar
Aisee hai Guruji kee vadiyaayee
Unke dar par hoti hai sabki sunvaayee.

Rehte huey duniya ke bhare bazaar mein
Bitaate huey jeevan ke kayi pal Guruji kee meher-e-nazar ke intazaar mein
Na bhoolna ki Unkee nadar kabhi basti hai Unke kiye inkaar mein
Aur kabhi Unkee inaayat-e-ikraar mein.

Unka inkaar aur ikraar
Dono mein hai bhakt ka upkaar
Aisa upkaar hota hai baarambaar
Kyunki Guruji kee kripa hai aparampaar.

Kuch kuch aisa hee hai Guruji kee kripa ka vistaar
Is vistaar mein hai har bhakt ke kalyaan ka saar
Saral aur komal, kintu rahasyamayi aur gehra hai Guruji Maharaj ka pyaar
Srishti mein goonjti rahengi Unke pyaar kee satya gaathaayein sainkdon hazaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Unke Pyaar Kee Satya Gaathaayein (09/01/2024)

August 31, 2024

Om Namaha Shivaya
Aaj Ka Suvichaar 🙏🏻🙏🏻

#2386

Sugandh Ka Nazraana

Phoolon ne bheja apni sugandh ka nazraana
Guruji ke kamal charan mein
Toh phoolon kee sugandh pheeki padd gayi
Guruji kee saumya sharan mein.

Kyunki Guruji kee khushboo ruhaani
Uss se phoolon kee sudh budh hui deewani
Unkee sugandh ka astitva hee na raha
Aur phoolon ne jhuk kar Guruji se kaha,

“Guruji, Guruji, pyaare Guruji Maharaj
Aap Hain sartaajon ke sartaj
Aapki khushboo ko anubhav kiya aaj
Maan gaye hum ki Aap Hain viraajon ke viraaj.

Humne upvan dekhe kitne saare
Lekin abb jo aaye hain hum Aapke dwaare
Hamein hui hai naseeb jo khushboo
Uss se gadd gadd ho gayi hai hamaari rooh.

Aapki khushboo se hum tarr gaye
Aapki khushboo se hum sanvar gaye
Aapki khushboo mein Aapka pyaar hai samaaya
Jisey paakar hamaara roam roam hai harshaaya.

Na hua aaj se pehle kabhi aisa madhur ehsaas
Aapki karuna se Aapki khushboo se mehek utha hai hamaara har shwaas
Abb toh hum murjhaa bhi jaayein toh na hongei udaas
Kyunki Aapki khushboo sada rahegi hamaare paas. “

Guruji ne suni baatein phoolon kee
Unhonei phoolon ko Apni sehmati dee
Phoolon ne Guruji ke charnon mein jhuk kar kiya pranaam
Guruji ne meharbaani kee aur diya Unhe Apna naam daan.

Khil gayi phoolon kee kismat
Guruji ne karne dee unhe Apni khidamat
Guruji kee rehmat laayi rangg
Unkee khushboo rehne lagi sada ke liye phoolon ke sangg.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sugandh Ka Nazraana (08/31/2024)

August 30, 2024

Om Namaha Shivaya
Aaj Ka Suvichaar 🙏🏻🙏🏻

#2385

Raat Ke Aanchal Mein

Raat ke aanchal mein sonei kee khwaahish
Honei lagi thi shaam kee
Sooraj ko bhi zaroorat padd rahi thi
Thode se aaraam kee.

Panchhi laut rahe thei ghar
Dhoondhte huey apne apne taruvar
Intazaar karte huey agali bhor ka
Swaagat kar rahe thei ve andhere ghor ka.

Agla savera aayega
Unhe thaa poorna vishwaas
Andhere mein ujaale kee intazaar karte
Kaayam thaa unka ullaas.

Japte huey Guruji ka naam
Nisha mein ojhal ho gayi shaam
Bandd hui panchhiyon kee chehek
Kintu aati rahi Guruji kee meethi mehek.

Shant hua panchhiyon ka chitt
Guruji kee upasthiti mein ve thei surakshit
Ve jaante thei ki unke sotey huey bhi hota rahega unka hitt
Isee bharose ke sangg ve jaagte sotey thei nit.

Nirmal nisha ke upvan mein
Guruji kee khushboo ka raha basera
Panchhiyon ko milee Guruji kee suraksha
Jald hee hua savera.

Sooraj ne lee angdaayee
Pehli kiran jo nazar aayi
Toh panchhi ho gaye tayyaar
Safar jaari rakhne ko phir ek baar.

Guruji kee kripa se saari sangat ko
Hota rahe har pal suraksha ka ehsaas
Guruji ke saanidhya mein sampann rahe har das
Guruji kee ruhaani maujoodagi banaaye har das ke har lamhe ko khaas.

Guruji Maharaj kee divya sharan mein
Sada mehfooz rahe Unkee sangat saari
Saari sangat ka karte rahein kalyaan
Guruji Maharaj Shiv avatari.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Raat Ke Aanchal Mein (08/30/2024)