Author: dhirjabhat

October 15, 2023

Om Namaha Shivaya
Aaj Ka Suvichaar 🙏🏻🙏🏻

#2065

         Ruhaaniyat Ke Raaste Par

Ruhaaniyat ke raaste par
Gehraayee mein doob kar miltee hai oonchaayee
Aur uss oonchaayee par miltee hai jo tanhaayee
Vahaan bajti hai shuddhi kee veh shehnaayee….

Jis se antas ko praapt hota hai anand nirmal
Aur bheetar divya jyot hoti hai ujjwal
Jis se sada ke liye andhkaar jaata hai mit
Aur santosh anubhav karne mein magn rehta hai chitt.

Guruji kee guruyaayee kee vaddi hai vadiyaayee
Unke bhaav poorna simran se mil sakti hai ruhaaniyat kee veh gehraayee
Jismein doob kar praapt hoti hai tarr jaane kee sachchaayee
Aur tarte tarte bhakt paa leta hai veh oonchaayee……

Jahaan neevanpann yoon ho jata hai atmasaat
Ki bhakt Guruji ke charnon mein gira rehta hai din raat
Kyunki usey maalum hai chal jaata
Ki Unhee se hai uska asli naata.

Yahee naata hai jo aur unnati kee oar hai le jaata
Na ki laukik rishton ke bhautikvaad se neeche hai giraata
Guruji ka dikhaaya raasta aasakti se karey duur
Taaki bhakt vikaaron ke vash mein na ho majboor.

Aasakti se kumm hoti hai ruhaani shakti
Aasakti se baadhit hoti hai bhavna aur bhakti
Aasakti banti hai kaaran ashanti aur dukh ka
Aasakti se ruk jaata hai vikaas Gurumukh ka.

Isliye Guruji kee guruyaayee kee gehraayee mein doobne se na darr
Ve tujhe taar kar ruhaaniyat kee oonchaayee kee oar karenge agrasar
Teri atma har bandhan se ho jaayegi azaad
Tu jeevanmukt hokar karega Guruji ka dhanyawaad.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ruhaaniyat Ke Raaste Par (10/15/2023)

October 14, 2023

Om Namaha Shivaya
Aaj Ka Suvichaar 🙏🏻🙏🏻

#2064

               Dhundh Aur Dhoop

Gagan mein baadal thei chhaaye
Ik dooje se maano baat kar rahe hon ki kaun pehle paani barsaaye
Sooraj chhipa thaa baadalon ke peechhe
Phir bhi dekh paa raha thaa neeche
Kintu din ke ujaale ke baavajood nahin thi koi dhoop
Maano prakriti ne liya ho dhundh ka roop.

Ye dekha toh mann mein aaya khayaal
Ki aisa hee toh hai maya ka jaal
Prakriti se hee dhundh, prakriti se hee maya
Jiska prabhaav poori srishti par hai chhaaya.

Maya khelti hai khel ajab aur anek
Maya ke aavaran mein lupt ho jaata hai vivek
Na kuch aata hai samajh, balki dimaag jaata hai ulajh
Kuch spasht nahin deta dikhaayee, mann karne lagta hai rusvaayee.

Anivaarya hai dekh paana maya kee dhundh ke uss paar
Varna mumkin nahin hai atma-sudhaar
Guruji kee kripa se hoga uddhaar
Ve hee kar sakte Hain paropkaar.

Unkee mehar se maya kee dhundh hogi duur
Unkee rehmat se chhaayega prakriti par Unka noor
Kyunki Guruji toh Purush Pradhaan ke roop Hain, ismein nahin shak
Aur Prakriti aur Purush sada se Hain ek dooje ke poorak.

Guruji pavitrikaran kar Apni karuna se kar denge maaf
Guruji kee kripa se dikhne lagega sab saaf saaf
Baadalon ka parda hatega
Gagan mein sooraj dikhega.

Maya kee dhundh ke bajaaye hogi
Param gyan kee sunehri dhoop
Guruji ke ashirwaad se nikhar jaayega Bheetar aur baahar ke ruhaani paryaavaran ka roop.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Dhundh Aur Dhoop (10/14/2023)

October 13, 2023

Om Namaha Shivaya
Aaj Ka Suvichaar 🙏🏻🙏🏻

#2063

Aapki Sharan Mein Hai Mera Jahaan

Param poojya Guruji,

Aapne sweekaara mujhe Apni sharan mein
Toh jeevan ke safar ne liya anokha moad
Aapki anant mehar hai, mere daata
Ki meri rooh khichee gayi Aapki oar.

Abb khokhli lagti hain adhiktar khwaahishein
Jo pehle hoti thiin itnee prabal
Abb jo kashish hai, usey lafzon mein na kar paaoon mai bayaan
Kintu mai jaanti hoon, ki Aapko hai uss kashish ka poorna gyan.

Balki ye kashish bhi hai Aapki kripa ka parinaam
Aur Aapke paas hee hai iskee poorti ka intazaam
Kyunki Aap swayam Hain Shiv tattva ka saar aur vistaar
Aap toh bin mere maange hee denge jo hai mere liye uchit daan.

Mujhe aaye nahin maangne ka sabhya saleeqa
Kya changa hai mere liye, mujhe nahin iskee pehchaan
Shukr hai Aapne jeevan kee doar hai thaami
Varna na jaane kya karti mai agyani anjaan.

Mai toh gin paane ke laayak nahin
Ki Aapke mujh par hain kitne ehsaan
Ye jaanoon aur maanoon mai
Ki Aap Apni daya barsaakar rehte Hain mujh par meharbaan.

Kitnee galatiyan karti hoon mai naadaan
Aur Aap kshama karte Hain Maheshwar mahaan
Himmat jo haarti hoon chalte chalte
Toh sambhaalte bhi Aap hee Hain, komal karunanidhaan.

Mera raasta chaahe yahaan ho ya vahaan
Mai chaloon jahaan hon Aapke kadmon ke nishaan
Kyunki Aap jaanein meri manzil hai kahaan
Mai kewal ye jaanoon ki Aapki sharan mein hai mera jahaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapki Sharan Mein Hai Mera Jahaan (10/13/2023)

October 12, 2023

Om Namaha Shivaya
Aaj Ka Suvichaar 🙏🏻🙏🏻

#2062

Har Janam Ke Jeevan Mein

Bann kar anaathon ke nath
Ho gaye har akele ke saath
Bin maa ke bhakt ko dein mamta
Bin kaabiliyat wale ko dete Hain kshamta.

Guruji ne liya maanav ka roop shareer dhaaran kar
Bulaane lagey bhakton ko Apne dar par
Taarne ke liye
Unka jeevan sanvaarne ke liye.

Unkee leela koi bhi na paaya hai samajh
Leela samajhne kee koshish mein aasaan hai jaana ulajh
Kyunki Guruji swayam roop Hain Bhagwaan ka
Jinkee leela samajhne ka saamarthya hee nahin insaan ka.

Unke ashirwaad se poornima mein parivartit hui amaavasya
Unkee kripa se gehri ho paaye bhakton kee tapasya
Jinhonei pehle na kiya thaa kabhi, unko bhi simran aur dhyan karaate Hain shuru
Sabhi par Apni bakhshish kee baarish barsaate Hain pyaare pooran Guru.

Is maade samay mein
Is aasann pralay mein
Milee hai Guruji kee sharan kalyaankaari
Is se behtar kismat nahin ho sakti hamaari.

Kabhi nahin ho sakta kaafi
Guruji ka jitna bhi shukrana kiya jaaye
Milee hamein kitne gunaahon kee maafi
Bin hamaare gidagidaaye
Phir shraddha bhaav se kee praarthana toh Awashya sweekaarte Hain Guruvar
Kyunki Ve toh Brahmaand ke Baadshaah ke roop mein
Hain Bholenath Har.

Guruji kee mehar hee hai madad dukh haran mein
Shat shat naman hai har kshan Unke charan mein
Unhee ke divya roop ka aabhaas aur deedar hota rahe simran mein
Miltee rahe Unhee kee sharan har janam ke jeevan mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Har Janam Ke Jeevan Mein (10/12/2023)

October 11, 2023

Om Namaha Shivaya
Aaj Ka Suvichaar 🙏🏻🙏🏻

# 2061

           Kehne Ko Jo Thaa Fakir

Duur kar ke baaki har vichaar
Fakir dil se raha thaa Guruji ko pukaar
Karte huey kisee shubh sanket ka intazaar
Pukaarta chala veh Guruji ko baar baar.

Uske dil kee awaaz mein thaa aseem pyaar
Uske bhaav mein thi shraddha aparampaar
Tabhi usey ek noor dikha vaadi ke uss paar
Aur akash mein tabb goonjne lagaa Onkar.

Usey ruhaani khushboo aayi
Uske dil mein khushi si chhaayi
Aankhein khuli rakhey ya moonde, usey iskee samajh na aayi
Uske intazaar kee jaise hui vidaayee.

Fakir ke aashcharya kee seema na rahi
Uske oopar toh jaise bakhshish kee baarish bahi
Usne dekha Guruji ko apne pratyaksh
Usey vishwaas na hua ki veh khada hai Ishwar ke samaksh.

Chalne lagi tabb sheetal hawaa
Mil gayi fakir ko uske har dard kee davaa
Mann hee mann soch kar ki uskee hai hee nahin koi aukat
Veh Guruji ka shukrana karne lagaa ki Unhonei dee sabse pavitra saugat.

Kabhi rota thaa, kabhi thaa muskuraata
Kabhi Guruji ko dekhta, kabhi uska sir thaa jhuk jaata
Guruji ne rakha uske sir par haath
Mamta bhari awaaz mein karne lagey uss se baat.

Guruji ne kaha usey ki usko dene padey kayi imtehaan
Kyunki pichhle janam mein veh thaa anjaan aur naadaan
Usne tabb kiye thei anek anuchit kaam
Aur is janam ke kasht thei pichhle karmon ke parinaam.

Guruji ne fakir se kaha ki Ve uss se uske is janam mein thei prasann
Guruji ne usey kalyaan ka vardaan de kiya usey sarvsampann
Fakir ko huey Guruji ke pratyaksh darshan
Fakir ne jaana ki uska toh safal ho gaya jeevan.

Fakir mishrit bhaavanaaon se gir pada Guruji ke paaon mein
Guruji ne usey sharan dee Apne aanchal kee chhaaon mein
Ujjwal hui fakir ke janam janam kee taqdeer
Kehne ko jo thaa fakir, veh dhanya hokar hua ameer.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kehne Ko Jo Thaa Fakir (10/11/2023)

October 10, 2023

Om Namaha Shivaya
Aaj Ka Suvichaar 🙏🏻🙏🏻

#2060

                 Mann Aur Darpan

Guruji sada rehte Hain Apne bhakton par meharbaan
Ve prasann hotei Hain sunn kar bhakt dwaara Unkee mahima ka gungaan
Dekar aadesh Gurbani ke shravan aur simran ka
Ve raasta dikhaate Hain jahaan se mal dhul jaata hai mann ka.

Gurbani hai mann ka ruhaani darpan
Is darpan se baat karne lagaa mann
Mann keh kar dola, mai hoon tadap raha
Darpan bola, kyunki tu hai bhatak raha

Mann ne rotei rotei kaha, mujhe kuch aata nahin samajh
Darpan ne uska rona saha, kaha ki tu bahut zyada raha hai ulajh
Mann ne poochha ki veh kaise safal karey jeevan
Darpan ne samjhaaya usey ki zaroori hai Guruji ka chintan.

Mann ko fikr thi ki kaise hoga uske mal ka haran
Darpan ne dee tasalli ki simran aur chintan dwaara hoga uska pavitrikaran
Mann chaahta thaa paana vikaaron par niyantran
Darpan ne diya sujhaav ki veh nirantar karey atma-nireekshan.

Mann jaise haar chuka thaa haunsala aur saahas
Lekin darpan ne bandhaaya usko dhaandhas
Mann apne vikaas kee oar dene lagaa dhyan
Darpan mein dekhte dekhte usey honei lagaa parmaarth ka gyan.

Jiska thaa veh mann, veh bhakt banda gaya bann
Dekhna nahin choda usne kabhi bhi Gurbani ka darpan
Guruji kee mehar se uss se hota raha simran
Mann ke saaf honei se sanvar gaya uska jeevan.

Uss bande ka mann ho gaya shant aur sthir
Shukrana karne lagaa veh darpan ka phir
Darpan ne mann ko sada yaad dilaaya
Ki Guruji ne usey saadhan hai banaaya
Sabhi bhakton ke uddhaar ke liye
Taaki unke mann mein jalte rahein simran kee deeye.

Simran ka ujaala hai bahut prabal
Badhaata hai ye bhakton ka manobal
Guruji ne bhakton ko Gurbani roopi darpan kiya hai pradaan
Jisey sunvaakar Guruji karte Hain bhakton ka kalyaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mann Aur Darpan (10/10/2023)

October 9, 2023

Om Namaha Shivaya
Aaj Ka Suvichaar 🙏🏻🙏🏻

#2059

         Koshish Meri, Kripa Aapki

Mai Aapki shukrguzaar hoon, Guruvar
Ki Aapne bulaaya mujhe Apne dar par
Na milta jo Aapki mehar ka dhan
Toh mai jeevan bhar reh jaati nirdhan.

Koshish meri
Kripa Aapki, Guruvar
Tabhi toh jaagega mera zameer
Jis se sanvar jaayegi meri taqdeer
Aapke bakhshe huey simran se
Aapke naam ke dhan se.

Koshish ke liye jo bhi hai zaroori
Mai vo sab kar paaoon hokar honhaar
Aur koshish phalibhoot honei ke liye bhi
Anivaarya hai Aapki kripa, Poojya Parwardigaar.

Karmabhoomi par chalte huey mai girne lagoongi agar
Mujhe vishwaas hai ki Aap sambhaal lenge aur aagey badhaayenge mera safar
Jabb kabhi mai ho jaaoongi apne kisee aib kee vajeh se adheer
Aap antas par yoon barsaa deejiyega Apne naam ka amrit roopi neer
Ki prerit ho jaaye koshish karte rehne ka mera utsaah
Aur badhti chale mujh mein atma-sudhaar kee chaah.

Aapka pyaar banaa rahe meri prerna
Mujhe shakti de Aapki samvedana
Aapki rehmat se hee hai bandagi
Aapki rehmat se hee hai meri zindagi
Aapki nadar ka hoga meri koshish par prabal asar
Is poorvaabhaas mein shukrana se jhuk jaaye mera sir.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Koshish Meri, Kripa Aapki (10/09/2023)

October 8, 2023

Om Namaha Shivaya
Aaj Ka Suvichaar 🙏🏻🙏🏻

#2058

            Na Fikr Se, Na Zikr Se

Na fikr se, na zikr se hai faayda
Kyunki Guruji ka toh kuch alag sa hai kaayada
Ve Hain antaryaami
Jaanein Ve teri har khaami.

Adbhut hai Unkee leela kalyaan karne kee
Anokhi hai Unkee vidhi jholi bharne kee
Jaanein Ve teri har majboori
Aur kya hai tere liye zaroori.

Phir bhi tera jee chaahe
Toh beshak na rok tu zikr ko
Udaane kee koshish kar hawaa ke sangg
Tu apni fikr ko
Guruji ko saumpni hai jeevan kee doar
Toh apnaata chal tu shukr ko.

Guruji tere bin boley hee rakh rahe Hain tera khayaal
Kyun fikr kar raha hai jabb Unka naam hai teri dhaal
Tu kaayam rakh aastha
Ve dikhaate chalenge raasta.

Ye kathin samaa mehmaan hai
Darasal ye tera imtehaan hai
Simran mein milee shiksha ko atmasaat kar
Imtehaan se bilkul na darr.

Asthaayi hain dono, sukh aur dukh
Waqt ke saath ye badal lete hain rukh
Lekin Guruji kabhi na tujhse modenge Apna mukh
Tu mann mandir mein jhaank, Ve sada hongei tere sanmukh.

Fikr aur zikr tera chayyn lenge loot
Ye satya hai, ismein nahin hai koi jhooth
Na churaane de unhe tu shanti apne mann kee
Bahut anmol hai har ghadi is maanukh jeevan kee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Na Fikr Se, Na Zikr Se (10/08/2023)

October 7, 2023

Om Namaha Shivaya
Aaj Ka Suvichaar 🙏🏻🙏🏻

#2057

                   Atma Kee Pyaas

Baadalon ka rangg thaa
Gerua hee gerua
Mann pe yoon sitam hua
Jabb rooh ko rangg ne chhuaa.

Sooraj toh dhalta raha
Baadal bhi chalta raha
Divya dhun mein thaa gagan
Raasta bhi thaa magan.

Dil khicha chala thaa jaa raha
Dil mein ik awaaz ne kuch kaha
Jisey sunkar mai aagey chali
Socha ki intazaar tali.

Sachchaayee se waakif hua dil mera
Jabb dekha geruey gagan ka ghera
Kshitij dikha jahaan saagar se mila gagan
Samjhaane lagi mujhe mere dil kee dhadkan.

Mann mandir mein goonji awaaz
Ve Guruji thei, jo jaante Hain har raaz
“Aaya abhi nahin samaa
Tere jaane ka vahaan”
Guruji ne kaha
Mera ik aansoo baha.

Pyaasi hai meri atma
Mainey Guruji se kaha
Jaanoon ki abhi nahin hoon tayyaar
Mujh mein aana hoga bahut sudhaar.

Mainey Guruji se karte huey arzi
Kaha Unse ki mai bann jaaoon vaisi jaisi ho Unkee marzi
Guruji ne kaha “Tu karti chal prayatan
Meri kripa rahegi tere sangg har kshan
Phir chaahe lagg jaayein jitne bhi janam
Meri mehar se katt jaayenge tere karam.”

Mann hee mann chalti rahi Guruji se meri baat
Ve mahaan karunanidhaan jaise chalte rahe mere saath saath
Mai Unke saanidhya mein magn ho khoti rahi
Unkee dee tasalli se chinta duur hoti rahi.

Atma ka hai ye safar
Kewal vaahan hai ye tann
Milee hai Pooran Guru kee sharan
Unkee rehmat se sudharega jeevan.

Guruji kee bakhshish se meri koshish rahe jaari
Guruji kee dee sumat se ho paaye atma kee azaadi kee tayyaari
Guruji ko hai shukrana aur Unse hai ardaas
Ki Unke diye daya daan se bujhe meri atma kee pyaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Atma Kee Pyaas (10/07/2023)

October 6, 2023

Om Namaha Shivaya
Aaj Ka Suvichaar 🙏🏻🙏🏻

#2056

           Mere Antas Kee Gaagar

Param poojya Guruji, Aap Hain mahaatmay ke mahasaagar
Chhekon se ghaayal hai mere antas kee gaagar
Aapki rehmat bin mumkin nahin sudhaar
Aap gaagar theek kar ke keejiye mera uddhaar.

Aapki mehar bin gati nahin
Aapki kripa bin sumati nahin
Aap hee sakte Hain meri is vyatha ko har
Apni daya se gaagar ke chhek deejiye bhar
Aapka naam amrit vyarth na jaaye
Aapki rehmat se gaagar mein veh samaa paaye.

Niyantrit kar paaoon apne har vikaar ko
Samay ke saath saath mere charitra mein sudhaar ho
Mai chalti rahoon uss raaste par jo Aap dikhaayein
Samjhoon har veh baat jo Aap dhyan mein samjhaayein.

Gaagar mein amrit samaata jaaye Aapke naam ka
Taaki mai na ganvaaoon mauka apne kalyaan ka
Koshish meri, rehmat Aapki, Guruvar
Kalyaan mera, kripa Aapki, Guruvar.

Meri galatiyon ko kar deejiyega nazar andaaz
Sunn paaye mera antas mujhe aadesh deti hui Aapki divya awaaz
Aapke naam ke sahaare jaaoongi tarr
Apni mehar se mere antas kee gaagar deejiye bhar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mere Antas Kee Gaagar (10/06/2023)