Aaj Ka Suvichaar

July 15, 2022

Om Namaha Shivaya
Aaj Ka Suvichaar 🙏🏻🙏🏻 # 1608

          Rabb Mein Hee Sabb Hai

Rabb mein hee sabb hai
Aisa kal thaa aur aisa aaj aur abb hai
Jiske liye Guruji mein Rabb hai
Uske liye Guruji mein sab hai.

Rabb hee Hain Paramatama
Aur har atma hai Paramatama ka ansh
Isliye har atma divya hai
Chaahe usey dhaaran kiye shareer ka ho jo bhi vansh.

Kitna spasht hai is satya se ye samajhna
Ki vyarth hai ameeri gareebi kee maya mein ulajhna
Bhautikvaad aur duniyavi starr juda hai is nashvar shareer se
Lekin charitra ka starr juda hai adhyaatmik taqdeer se.

Atma hai har jann kee mitra
Zaroori hai nikhaarna chitt ka chitr
Jaise jaise chitt hota jaayega pavitra
Jaise jaise swarnamayi hota jaayega charitra
Vaise vaise toadte huey agyanta kee zanjeer
Sanvarti jaayegi adhyaatmik taqdeer.

Ye mumkin nahin hai kewal ek hee pal mein
Ye nahin honei wala kewal aaj aur kal mein
Iske liye mann ko shant aur sthir rehna hona hoga halchal mein
Taaki veh kaam aa sakey har uljhan ke hal mein.

Tabhi toh Guruji ne diya hai is jeevan ko darja safar ka
Taaki hamaare is safar mein pramaan ho Unke vachanon ke asar ka
Anivaarya hai sabhi ka yogdaan
Varna kalyugi spandan karta rahega sabko pareshaan.

Gungaan karein Guruji kee vadiyaayee ka
Anusaran karein Guruji kee guruyaayee ka
Prayaas karein adhyatmik oonchaayee ka
Mita dein is ukti ko, ki ‘zamaana nahin hai bhalaayee ka.’

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 14, 2022

Om Namaha Shivaya
Aaj Ka Suvichaar 🙏🏻🙏🏻 # 1607

           Shraavan Maas Hai Aaya

Shraavan maas hai aaya
Akash hai muskuraaya
Baadal hain jal se garbhit
Prassann hai prakriti ka chitt.

Shivmayi hai ye saara sansaar
Aur Shivji Hain sabke paalanhaar
Guruji Hain Shivji ke avatar
Karte Hain bhakton ka kalyaan baarambaar
Brahmand vyaapt hai Unka shareer
Aur Unke vash mein hai Brahmand kee taqdeer.

Tabhi toh Shraavan maas mein
Shraavan se hee hota hai Unka jal abhishek
Devi devta toh Hain anek
Lekin Devon ke Dev toh Hain Shivji ek.

Shraavan ke maheene mein baraste hain jabb baadal
Hota hai abhishek Shiv Ashutosh ka
Jaise veh neer dhota hai prithvi ko
Aur deta hai dharti ka roop nikhaar
Vaise hee kyun na hum bhi Guru naam ke amrit se
Paapon ko dhoyein aur laayein swayam mein sudhaar?

Guruji mein hee Shivji, Guruji mein hee Srishti
Sabhi bhakton par rahe Guruji kee daya drishti
Guruji kahein padhne aur sunn-ne ko Shiv Puran
Shraavan mein pathan aur shravan kee mahima aur bhi mahaan.

Shraavan mein toh khaaskar
Paramatama mein ramm jaati hai prakriti
Hum bhi kyun na is pavitra maas mein
Sanvaarein apni atma kee aakriti?

Jaise jaise soch aur karma mein vikaar aur paap jaate hain samaa
Vaise vaise duuri badhti hai atma aur Paramatama ke darmiyan
Koshish karein ki hamaare sanskaar ho jaayein paawan
Shuddhi ka vaada karein swayam se is Shraavan.

Guruji, Shraavan ka ashish dete huey deejiye aisee subuddhi
Ki Aapki mehar se ho hamaari atma kee shuddhi
Kuch bhi nahin hai Aap Paramatama ko rijhaane se zyada zaroori
Aapki kripa se mitaa paayein hum atma aur Paramatama ke darmiyan kee duuri.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 13, 2022

Om Namaha Shivaya
Aaj Ka Suvichaar 🙏🏻🙏🏻 # 1606

Guruji Ne Kayi Dekhe Hain Hamaare Jaise

Guruji ne kayi dekhe hain hamaare jaise
Lekin humne na dekha koi bhi Guruji sa
Aur dikhega bhi kaise jabb Unke jaisa koi hai hee nahin
Har sangat Unkee deewaani hokar kehti hai yahee.

Shakti mein sarvashreshth
Gyan mein sarvottam
Rabb ke roop mein Sarvesh
Bashar ke roop mein Purushottam.

Ve Brahmaand ke shehenshah
Hum keechad ke keet-patang
Hum kalyuga ke neech praani
Guruji sada hamaare angg sangg.

Ve sikhaate sikhaate thakte nahin
Hum bhoolte bhoolte rukte nahin
Bemisaal hai Guruji ka dheeraj
Nirlep Hain Ve jaise neeraj.

Andhkaar mitaane aaye Hain
Tabhi toh Guru kehlaaye Hain
Sadhusheelta mein hai prabalta
Guruji tabhi sikhaayein saralta
Kahein har bhakt se ‘banda bann’
Aur kaun itna khayaal rakhta hai har kshan?

Guruji beshak swayam Hain agochar
Lekin hota hai nirantar Unkee maujoodagi ka ehsaas
Aise Guru ko paakar
Shishya kyun kabhi bhi ho udaas.

Sajag kiya Unhonei
Is maade samay ke baare mein
Koi kasar nahin hai chodi
Aaj bhi Apne diye sahaare mein.

Isliye abb takk nahin bhi kiya shuru
Toh abhi se kar dein aarambh
Mann ke bartan ko simran se dhone mein
Na karein hum abb aur vilamb
Vikaaron aur paapon se rahein duur
Taaki chitt par chadhey ruhaani noor.

Jitna khali aur saaf hoga mann roopi bartan
Utna hee grehen sheel hoga mann
Guru kripa toh baras rahi hai har kshan
Mann ekatrit kar paayega Guru naam ka dhan.

Aaj hai Gurupurnima ka shubh avsar
Tyaag kar hum kaam, krodh, lobh, aur matsar
Moh aur ahankar ko na hamla karne dein apne bheetar
Neeven hokar jhukaayein Guru dar par apna sir.

Sabhi ko bahut mubarak ho aaj ka yeh paawan din
Sach mein atma kee oordhvagati nahin hai Guru ke bin
Guruji bakhshte rahiye aur karte rahiye kalyaan
Shukrana Guruji Aapka, ki Aapne banaaya hamein Apni santaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 12, 2022

Om Namaha Shivaya
Aaj Ka Suvichaar 🙏🏻🙏🏻 # 1605

 Ho Sabka Kalyaan

Aapki niswaarthta ko shat shat naman
Aapki guruyaayee ko koti koti pranaam
Aap Bhagwaan ke roop mein Hain Guru
Aur Guru ke roop mein Bhagwaan.

Kyunki Aap Hain Shivji ke avatar
Bann kar aaye taaranhaar
Shuddh bann-ne kee shiksha dee
Apne nirmal naam kee deeksha dee.

Niswaarth prem ka paath hai padhaaya
Insaaniyat ka raasta hai dikhaaya
Is kalyuga mein baney Hain Aap hamaare Guru
Taaki hum abhi se satygugi jeevan jeena karein shuru.

Aap Hain murshid
Hum Aapke shishya
Aap parivaar ke nath
Hum parivaar ke sadasya
Aapke hukm ko sadaa
Maanein hum apna kartavya
Aapki mehar se hee miley hain hamein
Drishti aur drishya
Aap hee kripa keejiye
Ki pavitrataa rahe unn mein
Aapke prem mein mann yoon leen ho jaaye
Ki magn rahein hum sada Aapki dhun mein.

Dabey rahenge sada Aapke ehsaanon ke taley
Guzaarish hai Aapse ki saare sansaar kee vipadaa taley
Har oar goonje Aapka paawan naam
Aapka naam lene se ho sabka kalyaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 11, 2022

Om Namaha Shivaya
Aaj Ka Suvichaar 🙏🏻🙏🏻 # 1604

              Rokey Se Na Rukey

Rokey se na rukey Bhagwaan ka faisla
Ek Guru hee Hain Jinke hastakshep se ye sakta hai badal
Guruji tabhi toh kahein bhakton se
Ki Unke paas na laayein bhakt apni akal aur rafal.

Kyunki Guruji ke sangg jo safar hai
Usmein akal aur rafal ka nahin koi kaam
Aur jabb takk inko na choda jaaye
Kaise dhool rahit hoga dil ka dhaam?

Dil ke dhaam kee maati kee dhool ko
Guruji ke naam ke amrit se zaroori hai dhona
Phir maati mein boyein beej satkarma ke
Aur Guruji kee mehar se upjaayein sona.

Sona, yaani ki swarnamayi ho karmon kee fasal
Guruji kee kripa se jeevan ka safar ho safal
Unke hukm par toh Brahmand bhi apna nirnay deta hai badal
Tu khud hee soch ki kya aukat rakhti hai teri akal aur rafal.

Jahaan teri soch hoti hai khatm
Vahaan se Guruji kee soch hoti shuru
Tabhi toh Ve agyan ke andhere ke naashak Hain
Aur isliye kehlaate Hain Ve Guru.

Aur Guruji toh swayam swaroop Hain Bhagwaan ke
Rakshak Hain tere atma-sammaan ke
Isliye abb jo tu aaya hai Guruji kee sharan
Apni akal aur rafal ka bandi na bann.

Guruji par apne naseeb ka har nirnay chod kar
Tu buss Guruji ke naam kee chunar odh kar
Nibhaata chal apna farz
Chaahe zamaana rahe khudgarz
Kyunki Guruji ke paas hai tere karmon kee khuli kitaab
Ve rakh rahe Hain tere har janam ke har karam ka hisaab.

Guruji tere bin boley sab jaante Hain
Ve har hakeekat pehchaante Hain
Isliye Unhee ko saump kar apni akal aur rafal
Apne chitt kee ekantataa mein na dene de kisee maajre ko dakhl
Tu apni khushakismati par karte huey fakr
Samarpan kar aur manaata chal Guruji ka shukr.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 10, 2022

Om Namaha Shivaya
Aaj Ka Suvichaar 🙏🏻🙏🏻 # 1603

             Hum Chayyn Paayenge

Ye safar hai insaaniyat ka
Ye safar hai ruhaaniyat ka
Hum sab hain ruhaani praani
Insaaniyat ka anubhav hai hamaari zindagaani.

Is safar mein anmol hai Guruji ka sthaan
Ve Guru aur nath ke roop mein Hain Bhagwaan
Banda bann-na sikhaate Hain
Ruhaaniyat kee raah dikhaate Hain.

Koi bandish nahin, koi roak toak nahin
Buss, rakhni hai soch sahi
Chaahe waqt kee leela kar de hamein dangg
Hamein uchit rakhna hai apna dhangg
Guruji Hain hamaare angg sangg
Unkee mehar se gehra ho hamaari bhakti ka rangg.

Ruhaani raaste par insaaniyat ka imaan jeevan bhar phalega
Aur ek din jabb hamaari saanson par samay ka sooraj dhalega
Toh Guru milan ka geet gaate huey pehne huey nakshatreeya noopur apne paaon mein
Hum chayyn paayenge Guruji ke aseem aur prem-bhare aanchal kee chhaaon mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 9, 2022

Om Namaha Shivaya
Aaj Ka Suvichaar 🙏🏻🙏🏻 # 1602

                 Koi Chaahe

Koi chaahe chhoona aasmaan
Koi chaahe mehel makaan
Koi chaahe hona dhanwaan
Koi chaahe shaukat shaan
Koi chaahe dena daan
Koi chaahe bechna imaan
Koi chaahe bachaana doojon kee jaan
Koi chaahe lena jaan ke badle mein jaan
Koi chaahe paana Bhagwaan
Koi anya armaanon ka banaa hai gulam.

Har tareh ke loag hain
Har tareh ke bhog hain
Koi chaahe paana asal gyan
Koi jaane hee na ki vo hai kitna anjaan.

Kisee ko din se shikaayat hai toh kisee ko raat se
Kisee ko shikaayat hai shubhchintakon kee hee baat se
Koi khush hai Guruji kee dee kisee bhi saugat se
Toh kisee ko shikaayat hai Unkee dee badi se badi daat se.

Oorja kahein isey ya spandan ya mehez parivartan
Kalyuga mein badal sa gaya hai vandan
Guruji ne kaha thaa ki aayega yeh kshan
Jabb bhautikvaad aur bheed mein durlabh honei lagega dharam.

Durlabh beshak, lekin astitva heen nahin
Kyunki dharma kee buniyaad itnee ksheen nahin
Aaj bhi ho raha hai dharma ka poshan
Isee se toh hoga satyuga roshan.

Guruji Apni mehar rakhna banaaye
Ki antarmann ko Aapki bataayi asal cheez sada yaad aaye
Usee ko paane mein yeh jeevan beet jaaye
Aur Aapki kripa se satyuga laut kar aaye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 8, 2022

Om Namaha Shivaya
Aaj Ka Suvichaar 🙏🏻🙏🏻 # 1601

              Ummeed Na Chhoote

Ummeed na chhoote
Vishwaas na toote
Swayam ko yaad dilaata chal
Jaise jaise beete har pal.

Guruji ko samarpan karta chal
Aa raha hai tera sunehra kal
Bhar kar Apne paawan ashirwaad ka ruhaani rang
Guruji ke usey paripoorna karne ka hai anokha dhangg.

Itna sunehra hai yeh rangg
Ki tere aane wale kal mein laayega anand aur umang
Agar tu maanta hai ki tu hai Satguru kee patang
Toh udta chal Unke hukm mein hokar malang.

Guruji ke kar kamal mein hai teri doar
Tujhe zaroorat hee nahin jaane kee kaheen aur
Juda hai tu Apne paalanhaar se
Tu surakshit hai har prakaar se.

Rakh itminaan
Na ho pareshaan
Bharta chal udaan
Teri seema hai yeh aseem aasmaan
Yaani ki, asambhav bhi hai saadhya
Guru kripa se unnati hai praapya.

Simran ka saaz aur dhyan kee dhaara
Inke bal par udd ruhaaniyat ke gagan mein
Udaan mein girne bhi lagaa kabhi
Toh hoga Guruji ke kamal charan mein.

Ho jaa nirbhay
Tyaag de sanshay
Guruji ka ashirwaad hai akshay
Tu karta chal Guruji kee Jai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 7, 2022

Om Namaha Shivaya
Aaj Ka Suvichaar 🙏🏻🙏🏻 # 1600

        Saat July Ka Din Hai Aaya

Saat July ka din hai aaya
Niswaarth pyaar ka paigaam hai laaya
Guruji karte Hain saari sangat ke dilon par raaj
Pyaare Guruji ka avatar divas manaaya ja raha hai aaj.

Sajey huey Hain Guruji ke darbar
Ho rahe Hain Guruji ke satsang
Khushi ka mahaul hai chhaaya hua
Gehra hai ullaas ka rangg.

Baras rahi hai yoon Guruji kee mehar
Ki raat mein bhi dikh rahi hai sehar
Guruji kee mahima ka ho raha hai gungaan
Sangat ka ho raha hai kalyaan.

Guruji kee maujoodagi ruhaani
Sangat kee bhakti deewani
Guruji ke ashish se miley chai prasad aur langar prasad
Amrit mein ashirwaad ka meetha swad
Shabad divya Gurbani ke
Anubhav bhakton kee zindagani ke
Mangal gaan aur dhoomdham chaaron oar
Kritya aur nritya ke sangg tappon ka shor
In sab ke beech mein bhool na jaayein
Ki judi rahe Guruji ke sangg seedhi taar
Guruji se judey rehna anivaarya hai
Varna baaki sab hai bekaar.

Guruji ka Shukrana baarambaar
Ki Ve hum sab bhakton ko dete Hain aseem pyaar
Jo hum jaise mayle bartan ko saaf kar ke dete Hain taar
In saanson kee mala ko Unn Guruji ke naam par dein hum vaar.

Guruji ke avatar divas kee mubarak ho saari sangat ko
Guruji kee mehar se roshan karte chalein hum ruhaaniyat kee rangat ko
Jo Guru hamaare bin boley hamaare dil kee har baat jaan jaayein
Hum bhi Unn param poojya Guruji kee har baat maan paayein
Toh kalyuga mein hee ho jaaye satyugi spandan ka shubh aagaman
Aur insaaniyat aur ruhaaniyat se khil jaaye sabke antakaran ka chaman.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 6, 2022

Om Namaha Shivaya
Aaj Ka Suvichaar 🙏🏻🙏🏻 # 1599

Nanhe Se Baalak Ne Liya Janam

Nanhe se baalak ne liya janam
Saat July ke din
Sanvaarne aaye bhakton ka janam maran
Sikhaane aaye hamein insaaniyat ka dharam.

Dugri ke paawan gaaon mein
Jabb Unka jeevan hua shuru
Tabb shaayad kisee ko gyat na thei
Ki Ve Hain pooran Guru.

Mata ji aur Bapu ji Hain kitne dhanya
Jinhe divyata ne saumpa uttardaayitva
Pyaare Guruji ko janam dekar laane ka is sansaar mein
Aur MahaShiv ko basaane ka apne neeven se parivaar mein.

Bachpan se hee Guruji pyaare
Dikhaate thei adbhut nazaare
Jeete thei saadhaaran jeevan
Aur jeet lete thei har kisee ka mann.

Paathshaala hoti ya khet ya ghar
Anekon jageh mein ek hee kshan mein aate thei nazar
Unkee leela kisee ko na aati thi samajh
Jitnee koshish karte thei loag, utna hee ve jaate thei ulajh.

Jaise jaise beeta Guruji ka bachpan
Suspasht hotei gaye Unke divya lakshan
Gupt na reh paayi Unkee leela ruhaani
Sangat hoti chali Unkee deewaani.

Dugri ke alaawa Guruji gaye Chandigarh aur Jalandhar
Delhi mein aaye aur banaaya Unhonei Bade Mandir
Karne lagey anginat bhakton ka kalyaan
Aur badhta chala Unkee mahima ka gungaan.

Gupt paath, gupt sewa, gupt daan
Bhakton ko sikhaate rahe Guru karunanidhaan
Dekar kitnee sangat ko jeevan daan
Guruji ne bachaayee Unkee jaan.

‘Aish kar’ kehkar Guruji ne bhakton se
Bhakton ka jeevan sukhmayi banaaya
‘Kalyaan kitta’ ka aashwaasan dekar
Kitnon par ashirwaad barsaaya.

Beemari theek karna ya dena dhan
Ye sab Guruji ke liye thi maamuli baat
Lekin adhyaatmik dhan aur insaaniyat bakhshna
Isey kehte thei Ve asal saugat.

Kalyuga ke bahaav mein kuch girne sa lagaa dharam aacharan
Tufaani vaig se badhne lagaa bhautikvaad ka spandan
Badhne lagin padaarthvaadi khwaahishein
Kuch khokhli si honei lagin numaishein.

‘Maango nahin, maano,’ Guruji ne sikhaaya
Baar baar sangat ko yaad dilaaya
Kayee bhakton ne raasta apnaaya vahee
Lekin kayiyon ne na maani Guruji kee kahee.

‘Asal cheez’ dene wale Shiv avatari
Poori kar sakte thei sangat kee maang saari
Lekin jo jo bhi bin maange niswaarth bhaav se aata
Veh beshak der se, lekin jholi kalyaan se bhar ke le jaata.

Aaj bhi Guruji kee guruyaayee
Pramaanit karti hai Unkee divyata kee vadiyaayee
Sansaar mein Guruji ke hain anginat bhakt jann
Aur badhte hee jaa rahe hain har kshan.

Aise Guruji kee milee hai hamein sharan
Kitna bhaagyashaali hai hum mein se har jann
Aaj bhi kar rahe Hain aur aagey bhi karte rahenge Guruji kashton ka haran
Yakeenan Guruji ke ashish se safal hoga sangat ka janam maran.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja