Chalte chalte kabhi kabhi Saansein chalti rehti hain magar Sehsa ruk si jaati hai zindagi Jabb ki saamne hee hoti hai dagar.
Ismein bhi Guruji kee divyata ka pramaan hai Kyunki Unka kartavya Apne bhakt ka kalyaan hai Ve surakshit rakhte Hain bhakt ka atma-sammaan Kabhi nahin pahunchne dete usey nuksaan.
Imtehaan toh aate hee rahenge bhakti ke raaste par Ve hain oordhvagati kee oar badhne ke avsar Jo Guruji hamein dete rehte Hain Unmein Ve bhi toh kitne kasht sehte Hain.
Hum se bhi zyada Guruji ko hai hamaari fikr Beshak spasht zaahir na ho iska zikr Lekin Unke charnon mein bhakt paata hai yeh karuna daan Kyunki Guruji mein Hain Guru ke sangg nath aur Bhagwaan.
Unka hukm sir aankhon par rakhte huey Jo anand is safar mein aata hai Unse niswaarth prem karne wala har bhakt Is anand ka gyata hai.
Is anand ka anmol anubhav hee Zindagi ko jeene ke yogya banaata hai Varna bhautik sukh ka har anubhav toh Kshanabhangur khushi dekar chala jaata hai.
Isliye saanson ke chalte huey bhi agar zindagi tham si jaaye Toh bina apne antarmann kee jyot bujhaaye Guruji kee kripa se hamaara Unpar sada badhta rahe vishwaas Aur mann shant rahe bin huey udaas.
Guru pooja se jyot kee badhti jayegi oorja Is raaste se behtar na hoga koi raasta dooja Bhakt ka samarpan rangg laayega Uddhar karegi Guruji kee Guruyaayee Bhakt kee chhoti se chhoti zaroorat par Mehar karegi Guruji kee vaddi se vaddi vadiyaayee.
Aksar lamba lagta haina…. Kisee chaahat kee poori honei ka intazar? Lekin unn palon mein simran karne se Mann hota hai kumm bekaraar Kyunki jaise jaise simran mein ramne lagta hai mann Vaise vaise seedhi taar judti hai Guruji ke sangg Itna gehra hota jaata hai bhakti ka rangg Ki har bekaraari ko shant kar deti hai ek anokhi si taral tarang.
Saath mein samarpan ka bhaav badhta jaata hai Chaahat poori na bhi ho, toh mann samajh paata hai Ki Guruji ko hamaare liye veh nahin lagi sahi Varna Ve awashya poori kar dete vahee.
Isliye maangna aur zidd karna chhoot jaata hai Sweekriti ka ek adbhut sa andaaz jaag jaata hai Atal vishwaas hota hai ki Guruji kee baat maan lene mein hai kalyaan Aur safar ka nirmal anand aane lagta hai jabb hota hai is sachchaayee ka gyan.
Santosh ke saaz se aabaad rehta hai dil Gaata hai nagma Guruji ke pyaar ka Unhee ke deedar ke intazaar ka Baaki har chaahat ka nasha lagta hai phir bekaar ka.
Guruji kee kripa se sudharta hai drishtikon Mann tript hokar rehne lagta hai maun Simran ke abhyaas se sanvarta hai nazariya Guruji kee mehar ke phoolon se khil jati hai jeevan kee dagariya.
Guruji, Aapse meri hai yeh arzi Ki meri kismat par sada chale Aapki marzi Phir ho jaaye jeevan mein kuch bhi Veh bhi Aapki anumati se hoga hee.
Yahee hai tasalli sabse badi Is mein santosh paakar mai hoon khadi Varna is tufaani mausam mein Ya kisee mushkil ya gumm mein Niraash hokar girna hai itna aasaan Aur phir uth kar chalne mein chali jaati hai jaan.
Jabb takk Aapke kamal charnon mein hoon Manzoor hai jis haal mein rahoon Kyunki Aapke charnon kee dhool ka ashish Paata rahega yeh sees Yahee hai meri suraksha sabse uttam Yahaan raahat paa leta hai har gumm.
Aapke pyaar se miltee rahe veh shakti Jis se nikharti rahe meri Aapke prati bhakti Yeh bhakti bann jaaye atmabal ka aadhaar Toh Aapki kripa se ho jaayega beda paar.
Aapki marzi ko mera naman Aapki marzi ko mera dhanyawaad Aapki marzi se hee chale mera jeevan Aapki marzi hai mere liye sabse bada ashirwaad.
Kar sakte hoon Jinse apne gumm ka izhaar Jinkee kripa se aati hai khushi kee bahaar Jinke deedar ka rehta hai intazaar Ve Hain Guruji, karunamayi kartar.
Mann karta hai karti hee jaaoon Jinse pyaar ka ikraar Jinkee ek haan ke liye sunn sakti hoon baaki sabka inkaar Kumm hai jitna bhi karoon Jinka Shukrana baarambaar Ve Hain Guruji, Shivji ke avatar.
Jo uthaate Hain mere karmon ka bhaar Jinse mujhe miltee hai maa kee mamta aur pita ka dulaar Jinhe kuch kehna nahin padta ek bhi baar Ve Hain Guruji, taral taaranhaar.
Jinse Unhee kee mehar se judti hai seedhi taar Jo bante Hain mere maargdarshak baar baar Jo yakeenan lekar jaayenge mujhe uss paar Ve Hain Guruji, pyaare Parwardigaar.
Jinka sowmya roop mai sakoon nihaar Mere antarmann ko aabaad karta hai Jinka vichaar Chayyn mil jaata hai Jinse kar ke baatein do chaar Ve Hain Guruji, poojya paalanhaar.
Jo Hain meri har saans ke aadhaar Jinkee prerna se koshish rehti hai ki sudhaaroon apne sanskaar Jinhe Unke kiye har upkaar ke liye Shukrana bhara namaskaar Ve Hain Guruji, shehenshahe sarkar.
Sheher ke shor se oob kar Apne gumm mein doob kar Na jaane kabb chalte chalte bhakt sheher se baahar gaya nikal Fikr thi usey ki kaisa hoga uska aana wala kal.
Sheher ke aagey chalkar raasta thaa veeraan Rasna se bhi zyada pyaasa thaa uska mann Paani na mita paa raha thaa uss pyaas ko Veh samajh na paa raha thaa is ehsaas ko.
Baith gaya raaste mein ek jheel ke paas Mann uska thaa bahut udaas Aise moad par aa gaya thaa naseeb Ki koi khushi na dikh rahi thi kareeb.
Ummeed kee koi bhi kiran na aa rahi thi nazar Aisa kiya thaa museebaton ne uskee nazar par asar Na chehre par thi khushi, na labhon par thi muskaan Thaa veh sehma sehma sa, aur bahut hee pareshaan.
Ghutnon ka baahon se kar ke aalingan Dekha apne pratibimb ko jheel ke paani mein Tabb usey ye gyat nahin thaa Ki veh pal laayega parivartan uskee zindagaani mein.
Usey apne chehre ke pratibimb ke aaspaas Dikhaayee diya aasmaan Uska parigreh kiye mandal ke roop mein Baadalon ke beech se jhaankti dhoop mein.
Paaon uske chhoo rahe thei dharaa Saamne jheel mein paani thaa bharaa Hawaa ka ek jhonka laaya gandh Jaise kuch jal raha ho Jaise kaheen se agni ka dhuan Hawaa ke sangg uskee oar baha ho.
Pehle toh usey kuch nazar na aaya Phir dayyveeya hastakshep ne usey dikhaaya Thodi duri par kisee mritak ka ho raha thaa daah sanskaar Uske aaspaas thei kuch jann, shaayad hoga uska parivaar.
Paaon ko jaise lagaa ho vidyut ka jhatka Yoon sehsa veh bhakt uth khada hua Usne bhi dua kee uss mrit kee atma kee shanti ke liye Jaan pehchaan na thi, phir bhi dukh toh bada hua.
Guruji se poochha usne mann hee mann mein Ki aakhir paana kya hai jeevan mein Sab toh yaheen reh jaana hai Aur agley janam mein kaam nahin aana hai.
Guruji ne uskee chetna bannkar samjhaaya Usey jaagrit kiya aur yaad dilaaya Maanav jeevan mein karmon ka hisaab hota hai Guru kee madad se har bhakt apne paap dhota hai Banda bann jaaye asal mainey mein toh poorna uddhaar hota hai Bachey huey karmon ka bhugtaan karaane ke liye janam baar baar hota hai.
Usne phir poochha ki kya sab yaheen reh jaata hai Guruji ne kaha, nahin, Guru Govind ka naam roopi dhan saath jaata hai Yahee atma ka beda paar karaata hai Usey janam maran ke chakkar se antt mein mukt karaata hai.
Guruji ne bheetar se uss bhakt se kaha ‘Om Namaha Shivaya’ japne se sahaayata miltee hai tarne mein Shraddha aur vishwaas se japaa jaaye jabb Guru Govind ka naam Toh madad miltee hai maansik dvandva duur karne mein.
Guruji ne yaad dilaaya usey Ki yaad karey veh har subah Ki agar janam maran ke chakkar se jaana hai chhoot Toh kabhi na bhooley veh ye panch mahabhoot Kyunki dharti, agni, vayu, akash, aur jal Aaj inse rachna hoti hai deh kee aur isee mein veh samaa jaati hai kal.
Yaad rahegi agar yeh hakeekat shareer ke antt kee Toh ‘mai’ tyaag kar neeven honei mein hogi aasaani Badhegi achchi neeyat, koshish aur lagan simran kee Sudharne lagegi har janam kee zindagaani.
Atmabal badhega, khula rahega sehensheelta ka dwaar Isliye doojon ke ravaiye par swayam ka dukh sukh na karega nirbhar Museebatein aur doojon ka vyavhaar Mumkin hoga uthna in sabse oopar.
Jitna aata jaayega antakaran mein Guru ke prati samarpan Utna hee kumm pareshaan rehne lagega mann Aane wale kal kee na hogi fikr Apna dharma nibhaate huey umr jaayegi guzar.
Asthaayitva bhautikvaad jeevan ka rahega yaad sada Aa jaayegi yahaan rehte huey swayam ko dhyan mein rakhne kee adaa Bhakt ko Guruji ke kahe in shabdon ko sunkar apne antakaran mein Vishwaas ho gaya ki jeene mein vo satya hai hee nahin jo satya hai marne mein.
Ehsaas hua usey ki yahaan jo bhi hai veh nashwar hai Kewal divyata, simran aur sadhna mein basaa Ishwar hai Panch mahabhoot se utpann hokar unhee mein jaana hai samaa Ruhaaniyat mein ramm kar sudhaarna hoga ye samaa.
Ek baar phir se usne dekha jheel ka paani Uske antakaran mein badh gayi roshni ruhaani Mann mein simran kee mala pehen kar ‘Om Namaha Shivaya’ kehne lagaa har kadam par.
Hum sab bhi inhee panch mahabhooton se huey hain utpann Inhee mein mil jaayenge jabb chodenge ye shareer Kyun na simran karte karte apni soch aur apne karma sudhaarein Chamak jaayegi phir isee janam mein aane wale janmon kee taqdeer.
Prem kee pratima kahoon Guruji ko Toh veh paryaapt stavan nahin hai Unke pyaar kee aseemta ka Saamarthya ka saagar kahoon Guruji ko Toh veh kaafi varnan nahin hai Unkee kshamtaa ka.
Ashirwaad ka aasmaan kahoon Unhe Toh aasmaan kuch nahin hai Unke ashirwaad ke samaksh Prerna ka paalna kahoon toh paalna mein samaa hee nahin sakti utnee prerna.
Bakhshish kee bagiya kehna chaahoon toh yaad aaye Ki bagiya chhoti aur Guruji kee bakhshish kee hai vaddi vadiyaayee Gyan ka stotra kehti hoon Guruji ko Toh mann mein aata hai ki anant hai Unke gyan kee gehraayee.
Guruji kee toh ek nazar hee Kaafi hai uddhaar ke liye Guruji kee nadar toh hai Sampoorna sansaar ke liye.
Na naapa jaaye, na tola jaaye Na gaaya jaaye, na bola jaaye Guruji ke mahatmay ko Guruji kee mahaanta toh aisa geet hai jo har pal goonjta hai brahmaand mein Guruji kee mahima toh aisa dhan hai jo badhta hee jaata hai Sansaar mein bhakt jann toh anginat hain Guruji ke Lekin koi virla hee Unka diya asal dhan maangta aur paata hai.
Sunkar Guruji kee mahaanta ka geet Har koi tarr jaata hai Lekin koi virla hee Asal dhan ko paata hai.
Guruji se har sukh suvidha paakar Har kisee ka bhaagya sanvar jaata hai Lekin koi virla hee Asal dhan ko paata hai.
Is asal dhan ko dete huey Guruji hotey Hain ati-prassann Yahee vo dhan hai Jis se bhakt kee atma takk hoti hai sampann.
Aisa badappan hai Guruji ka Aisa hai Unka prabhutwa Pooran Guru Hain Guruji Aisa hai Unka Gurutva.
Moh nahin, lekin pyaar toh basaa lein bhaav mein Ye duniya nahin hai kisee kee bhi jageer Kisee ko apne pyaar se vanchit karne se Hum na bann jaayenge pehle se zyaada ameer.
Na duniya apni hai na ye saansein Aao do chaar pal ke liye mil kar hansein Ya phir lein sirf muskuraa Kya maalum kiska waqt hai aa raha?
Waqt, is duniya ko chod ke jaane ka Usee mitti mein mil jaane ka Jiske oopar hum chalte hain bin kiye yaad Ki isee mein mil jaana hai aakhiri saans ke baad.
Hum mein se kewal kuch janon kee hoti agar ye kahaani Toh shaayad siddh kar sakte thei hum apni bahaanebaazi aur aanakani Lekin hum waakif hain is sachchaayee se Ki jeet nahin sakta koi bhi Khudaayee se.
Phir kaahe kee kanjoosi pyaar dene mein Kyun kisee ka dil dukhaana Sabhi panch bhoot se banei hain Aur sabhi ne unhee mein hai samaa jaana.
Vaise bhi Guru Govind ke alaawa Koi kisee ko bhi poori tareh se na hai samajh paaya Arey, ye toh phir bhi duur kee baat hai Kitnon ne toh swayam ko hee na jaan kar kiya hai waqt zaaya.
Guruji khush hotey Hain dekhkar saamanjasya Unke bhakt hain hum, Unka anusaran karna hai hamaara kartavya Ye paisa, yash, ahem, paap, aur naaraazagi Kyun kharaab karein in sabse ye zindagi?
Is se behtar hai ki simran se apne bheetar jaayein Dhyan dwaara samanvay(reconcilation) aur atmabodh ( self realization) kee oar jaa paayein Ruhaani rass mein yoon ramte jaayein Ki na vichlit karein mann ko chhoti ya badi balaayein.
Dukh bhi baantein, sahaanubhooti se doojon ke ghaav bharein Mann se har pal Guruji ke charnon mein sees dharein Guruji kahein aasakti ke bin pyaar karein Na jaane hum phir bhi kyun intazaar karein Arey, na jaane kitney pal miley hain hamein tumhe Kyun na Guruji kee baat maankar jee lein unhe?
Guruji kee bakhshi saanson ka Karein Unke hukm anusaar prayog Yahee hai tareeka Unhe prassann karne ka Ismein nahin hai koi ittifaaq ya sanyog.
Faisla hai hamaare haath mein Kyunki ye hai hamaari swatantra ichcha aur neeyat Is mein Guruji hastakshep nahin karte Sahi lagey ya galat, yahee hai hakeekat.
Aap maanav shareer mein Shivji ke avatar Sangat ke liye Aap bhakti ka aadhaar Niyati ke nirmaata, Nirankaar Bandagi ke bakhshanhaar.
Devta Hain Aap dharma ke Gyata Hain Aap sabke har karma ke Daata Hain Aap praan ke Annadaata Hain Aap Apni har santaan ke.
Rakshak Hain har sangat ke parivaar ke Darshak Hain bhakton ke vyavhaar ke Jaan-ne wale Hain sabke har vichaar ke Rakhwale Hain Aap sabke ghar-baar ke.
Peer bhi Aap, Aap hee Prabhu Meet bhi Aap, Aap hee bandhu Aap Hain murshid, Aap hee Maa Aap hee Hain Guruji, Aap hee Gurupaa.
Amrit vaani hai Aapka har vachan Anmol prasad hai Aapka darshan Nirmal, ati nirmal hai Aapka ehsaas Atma ke anant aur anu mein hai Aapka vaas.
Na chheen sakta hai koi tujhse Tere hisse mein hai jo khushi Na hee koi baant sakta hai tere saath Jo hai tere hisse ka gumm Lekin kitnee hai khushi aur kitna hai gumm Veh Guruji ke lekh likhne se Sanvar sakta hai ek dumm.
Har kisee ke liye apne hee karmon ka bhaar sehna ek chunauti si hoti hai Koi uss dauran sahaanubhooti dena seekh jaata hai Koi vikaaron mein ulajh jaata hai Koi chaahta hai hona saansaarik janjaalon se duur Koi swayam ko paata hai bhautikvaad aur aakarshanon se majboor.
Khushi ya gumm na kar paaye hamaara shoshan Isliye anivaarya hai karna atma ka sahi poshan Jabb atma ke bheetar divyata ka diya rahega roshan Toh hota rahega aantarik shodhan.
Sabhi kee atma mein hai divyata ka diya Khushakismat hai vo jisne uskee lau ko pehchaan liya Hum sabhi hain is khushakismati ke haqdaar Is haq ke liye zaroori hai dhyan mein baithna baar baar.
Guruji kehte Hain hum rakhein sakaraatmak vichaardhaara Hamaara kalyaan nishchit hai Unke ashirwaad dwaara Dikhaaya hai Unhonei raasta sewa, satsang, aur simran ka Sikhaaya hai mahatva Shukrana aur samarpan ka.
Jo khushiyaan hamaare bhaagya mein nahin Guruji toh hum par ve khushiyaan bhi barsaa sakte Hain Unkee oar hamaare ek kadam ko badhaane se Ve hamaari oar anginat kadam badhaa sakte Hain.
Gumm ko kumm karne ka raasta bhi yahee hai Ki Guruji kee oar kadam hum badhaayein Guruji se maangein ashish Ki Unke dikhaaye raaste par hum chalte jaayein.
Jeevan mein khushi ho ya ho gumm Karte rahein is raaste ka anusaran Jeevan mein chaahe aate rahein khushi ya gumm Na bigadne dein apne antakaran ka santulan.
Isliye simran dwaara sthir kar ke mann ko Paana hai saantosh ke dhan ko Kyunki duniyavi khushi nahin hai sanatan Aur gumm bhi hai mehmaan Guruji ke sangg rishta hai anant Yahee rishta hai sabse sukhdaayee aur mahaan.
