Aaj Ka Suvichaar

March 9, 2026

Om Namaha Shivaya
Aaj Ka Suvichaar 🙏🏻🙏🏻

#2941

         Saarthak Hogi Meri Zindagi

Gyan ko utaara jaaye aacharan mein
Toh hee saarthak hoga vo gyan
Varna uss se badhega jhootha sammaan
Badhta jaayega apna abhimaan.

Ek toh jeevan kee alpagyata ka bhaar
Oopar se duniyavi gyan ka pahaad
Ye sab anubhav gyan ke samaksh nahin hain kuch
Ye sab hain anubhav gyan se bilkul tuchh.

Guruji ke samaksh kar liya sweekaar
Ki mai toh hoon bilkul agyani
Guruji se karti hoon shukrana
Ki Unhonei meri baahein Hain thaami.

Dekar sahaara mujh agyani nimaani ko
Sanvaar kar meri zindagaani ko
Diya Unhonei mujhe ye anubhav gyan
Ki koi nahin hai Unse adhik mahaan
Ki Ve swayam Hain SadaShiv karunanidhaan
Ki Ve dete Hain prerna aur chetna ka daan.

Jo aur jaisa Ve chaahein, mai vahee sochoon aur vaise hee
Karoon bhi vahee jo Ve chaahein aur jabb Ve chaahein, tabb hee
Apna sarvasva kar doon Unhe samarpit sada ke liye
Unkee kripa se bheetar ke agyan ka andhera hota rahe duur
Mere bheetar yoon chhaa jaaye Unkee divyata ka noor
Ki mera antar ho jaaye ujjwal
Mera antar ho jaaye nirmal
Guruji Apni ichcha se karein vo gyan pradaan
Jiske dwaara hota rahe kalyaan
Mera aur doojon ka bhi
Toh saarthak hogi meri zindagi.

🌹🌹🌹🌹🌹🌹🌹

Jai Guruji 🙏🙏
Dhirja

Saarthak Hogi Meri Zindagi (03/09/2026)

March 8, 2026

Om Namaha Shivaya
Aaj Ka Suvichaar 🙏🏻🙏🏻

#2940

      Satya Ke Bodh Ka Ashirwaad

Param poojya Guruji Maharaj,

Aapki sharan mein honei lagg raha hai dridh ehsaas
Ki koi aur kuch nahin hai Aapse khaas
Aap hee toh Hain ik satya
Baaki sukh dukh ka naam sansaar hai
Apne uss swaroop se karaayiye meri pehchaan
Jo is sansaar ke paar hai.

Kyunki jabb se Aapki meher se gehra ho raha hai Aapse naata
Toh yahaan lagta hee nahin hai abb jee, mere daata
Yahaan rehte huey jo bheetar dekh paaoon satya ka jahaan
Toh Aapki badi kripa hogi, mere karunanidhaan.

Sansaar ke is sukh dukh mein hee phans ke na reh jaaoon
Aapki yaad aur Aapke naam ka dhan kamaaoon
Laukik dhan kuch lamhon ka hoga isliye alaukik dhan paana chaahoon
Yogya nahin hoon iske liye, isliye ardaas Aapse ki Aapki daya mai paaoon.

Mai is oar yatna kar paaoon, deejiye mujhe aisee lagan
Aapki kripa se satya kee oar hee aakarshit ho mera mann
Aapse judi rahoon mai apna saara jeevan
Aapke swaroop ke satya ko samarpit ho mera janam maran
Toh phir is sansaar mein jeete huey
Yahaan ke sukh dukh kee nirarthakta rahegi yaad
Par ye tabhi mumkin ho sakta hai
Jabb Aap dein is satya ke bodh ka ashirwaad.

🌹🌹🌹🌹🌹🌹🌹

Jai Guruji 🙏🙏
Dhirja

Satya Ke Bodh Ka Ashirwaad (03/08/2026)

March 7, 2026

Om Namaha Shivaya
Aaj Ka Suvichaar 🙏🏻🙏🏻

#2939

Shuru Ho Chuka Hai Safar

Shuru ho chuka hai safar
Abb der na kar
Pahuncha hai Guruji ke dar
Matt chod dagar.

Din ho ya raat
Beshak ho barsaat
Beshak na miley kabhi chhaaon
Beshak thakk jaayein tere paaon
Tu dheeraj na khona
Aalas kee neend na sona.

Guruji ne thaami hai teri doar
Tu na dekhna dar koi aur
Aise Guru ka milna hai teri khushnaseebi
Virlon ko miltee hai Paramatama roop se aisee kareebi.

Jin Guru ne tera safar karaaya hai shuru
Mukammal bhi karaayenge Vahee Guru
Sotey jaagte tu Guruji ka shukr kar
Jitna ho sakey, Unkee mahima ka zikr kar.

Poore jagg mein Guruji ka gungaan ho
Har sthaan mein Unkee vadiyaayee ka bakhaan ho
Guruji kee sangat se paripoorna ye jahaan ho
Guruji sada sabhi par meharbaan hon.

Sabke liye sadbhaav rakhtey huey tu chal
Guruji par apna bharosa rakh atal
Jo Apni mauj se ik pal mein bhagya sakte Hain badal
Unkee sharan mein tera safar bhi awashya hoga safal.

🌹🌹🌹🌹🌹🌹🌹

Jai Guruji 🙏🙏
Dhirja

Shuru Ho Chuka Hai Safar (03/07/2026)

March 6, 2026

Om Namaha Shivaya
Aaj Ka Suvichaar 🙏🏻🙏🏻

#2938

     Guruji Kee Hatheli Ka Sahaara

Guruji ka naam lete huey rahi thi mai chal
Unkee mehar se kitne kasht rahe thei tal
Jabb bhi girne lagi zameen par
Guruji ne Apni hatheli bichhaa kar mujhe bachaa liya
Varna shaayad adhoora hee khatam ho jaata safar
Lekin Guruji ne saanson ka daan deeya.

Apni hatheli par Guruji ne mere liye le liya zakham
Aur dayalu itne ki mujhe dekar mamta ka marham
Mera dard kar deeya itna kumm
Aur mai uth kar phir se badhaa paayi kadam.

Guruji kee hatheli hai itnee komal
Aur itnee prataapi aur nirmal
Ki Unke sparsh se kismat sakti hai badal
Unkee hatheli ka spandan hai ati-prabal.

Guruji kee hatheli ka sahaara
Iske bin mera nahin hai guzaara
Ismein nahin hai mujhe koi sanshay
Ki Guruji duur kar rahe Hain mera har bhayy.

Apni saari sangat kee raksha karte karte
Sabhi kee jholiyan bharte bharte
Guruji swayam par kitna kasht Hain lete
Aur sangat ko bharpoor ashirwaad Hain dete.

Jo bhi aata hai Guruji kee sharan mein
Usey aise anubhav aksar hotey hain jeevan mein
Aisa parivartan laate Hain Guruji sabki rooh aur tann mann mein
Ki bhakt jhuk jaata hai Unke kamal charan mein.

Unke kamal charan mein hee kalyaan hai
Unke charan kee sharan milna ati-uttam vardaan hai
Bahut khushnaseeb hai is vardaan ko paane wala
Kyunki SadaShiv roopi Guru Hai sabka rakhwala.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Kee Hatheli Ka Sahaara (03/06/2026)

March 5, 2026

Om Namaha Shivaya
Aaj Ka Suvichaar 🙏🏻🙏🏻

#2937

Lambi Lagey Ya Lagey Pal Bhar Kee

Lambi lagey ya lagey pal bhar kee
Hawaa si hee hai ye zindagi
Kabhi hawaa ka halka sa jhonka
Kabhi halchal ya tufaan.

Jhonka meetha sa ho toh deta hai sukoon
Jo meetha na ho, toh nikal aata hai aksar bharey ghaav se bhi khoon
Hoti hai peeda phir
Mann hota hai asthir
Tabhi zaroori hai nirantar Guruji ka chintan
Uss se sthir reh paata hai mann.

Guruji se jo judi rahe ruhaani taar
Toh beshak teekhe jhonke ya tufaan aayein baar baar
Guruji ke sahaare ko sampoorna maankar aur jaankar
Aasaan hoga tayy karna ye safar.

Kyunki na hawaa ka jhonka apne buss mein hai
Na hee apne buss mein hai tufaan
Hum hain Guruji kee maya se bilkul anjaan
Ve har pal hamein Apne se jodey rakhein, ye hoga hamaare liye vardaan.

Kyunki hawaa toh bhinn bhinn roop leti rahegi
Tufaan bannkar kabhi, toh jhonka bannkar kabhi
Guruji ke hukm par chalenge uske roop sabhi
Aisa hee hota aaya hai pehle se, aur aisa hee hoga aagey bhi.

🌹🌹🌹🌹🌹🌹🌹

Jai Guruji 🙏🙏
Dhirja

Lambi Lagey Ya Lagey Pal Bhar Kee (03/05/2026)

March 4, 2026

Om Namaha Shivaya
Aaj Ka Suvichaar 🙏🏻🙏🏻

#2936

    Ik Dooje Ke Sangg

Aao, ik dooje ke sangg
Gehra karein praarthana ka rangg
Kaamna karte huey saare sansaar ke mangal kee
Unn Guruji ko, Jinhe khabar hai pal pal kee.

Lagaa dein Guruji kee dee hui poori shakti
Taaki gehra ho hamaara rangg-e-bhakti
Guruji se preet badhaayein
Ye sundar mauka na ganvaayein.

Har rangg hai ruhaani
Har rangg kee chhavi hai suhaani
Guruji ka hai hum par pehra
Unke prati prem ka rangg karein gehra
Nakaaratmakta se na honei dein usey dooshit
Shubh aur shuddh soch mein hai sabhi ka hitt
Bhole bhaav mein sada ke liye rangg jaaye ye chitt
Guruji ko chet kar har pratikool bhaav jaaye mitt.

Anukampa mein hriday jaaye rangg
Guruji kee yaad mein rahein malang
Ruhaani rangon se rangeen ho bandagi
Khushhal ho jaaye sabki zindagi.

🌹🌹🌹🌹🌹🌹🌹

Jai Guruji 🙏🙏
Dhirja

Ik Dooje Ke Sangg (03/04/2026)

March 3, 2026

Om Namaha Shivaya
Aaj Ka Suvichaar 🙏🏻🙏🏻

#2935

           Anta:karan Kee Aankhon se

Dekho anta:karan kee aankhon se
Guruji bilkul adrishya nahin
Pratyaksh Ve dikhenge tumhe
Tum nihaarna Unhe
Unke ruhaani roop mein
Ya Unke swaroop mein
Unke darshan anoop mein
Dhyan kee meethi dhoop mein.

Guruji ashaareerik huey Hain
Kintu Hain virajmaan, ye satya hai
Unkee maujoodagi ko sweekaarna
Unke har bhakt ka kartavya hai.

Guruji Hain roop Parameshwar ka
Avatar Hain Ve Maheshwar ka
Unka dwaar hai Sachkhand ka dwaar
Aisee hai Unkee mahima aparampaar.

Bhakt kee gati nahin Guruji kee kripa bin
Guruji sabke angg sangg Hain raat aur din
Unkee hee mehar se miley chetna aur prerna
Chahiye toh ek Unhee kee mamta aur
samvedana.

Kyunki Guruji swayam Hain Rabb
Unhee mein Hain Devi Devta sabb
Ye baat satya thi tabb bhi aur yahee satya hai abb
Abb bhi hum na samjhein toh samjhenge hum kabb?

🌹🌹🌹🌹🌹🌹🌹

Jai Guruji 🙏🙏
Dhirja

Anta:karan Kee Aankhon se (03/03/2026)

March 2, 2026

Om Namaha Shivaya
Aaj Ka Suvichaar 🙏🏻🙏🏻

#2934

         Aapke Kadmon Ke Nishaan

Param poojya Guruji Maharaj,

Na dikhey hotey Aapke kadmon ke nishaan
Toh mai hoti uddhaar ke raaste se anjaan
Abb jo Aapki daya se hui hai is raaste kee pehchaan
Kripa karte rahiyega ki Aapki marzi anusaar Aapse paaoon bhakti ka vardaan.

Khaamiyon se hoon bhari, hoon naadaan
Aapki mehar kee mohtaaj hoon, mere karunanidhaan
Kabhi raaste par bhatakne lagoon
Toh Prabhu, mujhe bhatakne se bachaana
Jo phir bhi kabhi kisee kaaran bhatak hee jaaoon
Toh kshama kar ke sahi raaste par vaapis le aana.

Aapke charnon ke taley kee dhool bann-ne kee bhi nahin hai meri aukat
Phir bhi Aapne dee hai Apni sharan kee soumya saugat
Shukr bayaan karne mein asamarth hain mere alfaaz aur meri buddhi
Bhaav se bayaan kar paaoon, deejiye mujhe aisee shuddhi.

Aapke kadmon ke nishaan dekh paane kee bakhshiyega mujhe drishti
Unka anusaran kar paaoon, keejiyega mujh par aisee sumat kee vrishti
Aapke kadmon ke nishaan le chalenge jahaan
Mai Aapke aanchal mein rehkar chal doon vahaan
Toh bhatakne aur girne se bach jaaoongi
Har pal Aapse suraksha paaoongi
Nimaani hoon, chhota muh badi baat kehti hoon
Par Aap toh jaanein ki Aapki yaad mein rehti hoon
Deejiye mujhe aisa ashirwaad
Ki na beete mera koi pal bin kiye Aapko yaad
Rahoon khushi mein ya gumm mein
Rahoon zyada mein ya kumm mein
Sada rahoon Aapki sharan mein
Aapke paawan kamal charan mein.

🌹🌹🌹🌹🌹🌹🌹

Jai Guruji 🙏🙏
Dhirja

Aapke Kadmon Ke Nishaan (03/02/2026)

March 1, 2026

Om Namaha Shivaya
Aaj Ka Suvichaar 🙏🏻🙏🏻

#2933

   Prem Ka Vo Dariya

Guruji ka prem aseemit hai
Guruji ke prem mein har bhakt ka sampoorna hitt hai
Maano toh sab kuch hai
Na maan-ne ka toh khayaal hee tuchh hai.

Ye prem ka vo dariya hai
Jismein jitne gotey khaaoge
Utna Guruji mein khotey jaaoge
Aur utna zyada anand paaoge.

Is dariya mein doob kar tarr jaana hee toh hai bandagi
Guruji ka naam har shwaas mein ho, ye hee toh hai zindagi
Varna kitne aaye aur chale gaye Guru kee sharan mein aaye bin
Jinhe milee hai Guruji kee sharan, vo kyun na tarein raat aur din?

Prem ke is dariya mein beet jaaye apni ye dastaan
Kin lafzon mein karoon apni ye khwaahish mai bayaan
Is dariya kee gehraayee mein hai prem ka jo ratna samooh
Usey hee paane ke liye abb takk taras rahi hai meri rooh.

🌹🌹🌹🌹🌹🌹🌹

Jai Guruji 🙏🙏
Dhirja

Prem Ka Vo Dariya (03/01/2026)

February 28, 2026

Om Namaha Shivaya
Aaj Ka Suvichaar 🙏🏻🙏🏻

#2932

             Sabse Shreshth Tayaari

Kal ke liye hai sabse shreshth tayaari
Ki aaj aur abhi se karo achcha
Duur karo jhooth kee beemaari
Khud ko banaa kar sachcha.

Kayion ne ye pehle se bunaa hai
Apne swabhaav aur sanskaar mein
Jinhonei aisa kiya nahin, ve bhi ye kar lein
Toh anukool parivartan hota rahe sansaar mein.

Guruji ne sabhi ko kiya hai anugrahit
Guruji kar rahe Hain sabka hitt
Phir kyun dena saath jhooth aur buraayee ka?
Kyun na anusaran karein Guruji kee vadiyaayee ka?

Achchaayee aur sachchaayee ka
Pavitrata se atoot naata hai
Insaan inhe apnaane se
Yakeenan Guru ke kareeb ho paata hai.

Sachchaayee aur achchaayee bahut duur takk le jaayegi
Ruhaani oonchaayee takk pahunchane mein hamaare hee kaam aayegi
Purusharth safal honei ke liye zaroori hai paana mukti
Guruji bhala karenge, par hamein karni hogi apni oar se yukti.

Jo aaj takk aisa karte aaye hain
Ve hain uttam udaharan aur prerna
Kyun na in sajjanon ko prerna-strot maankar
Baaki jann bhi sachchaayee aur achchaayee kee oar jagaayein apni chetna?

Apne buss mein kahaan hai
Kewal Guruji hee karaa sakte Hain ye tayyaari
Vishwaas hai ki chalte huey is safar mein
Ruhaani oonchaayee takk pahunchne kee meri bhi aayegi baari
Meri oar se koshish rahe jaari
Swayam ko dilaati rehti hoon yaad
Unke dikhaaye raaste par chal paaoon
Guruji se karti hoon fariyaad.

Aur kuch na hai chahiye zindagi mein
Guruji sangg judne ke baad bandagi mein
Mai na jaanoon ki ye pyaar hai ya hai bhakti
Par mujhe toh isee paawan judaav se miltee hai shakti
Jo nirantar bann rahi hai meri koshish kee yukti
Kyunki Guruji ke charnon mein hee mera swarg aur aakhirkaar meri mukti.

🌹🌹🌹🌹🌹🌹🌹

Jai Guruji 🙏🙏
Dhirja

Sabse Shreshth Tayaari (02/28/2026)