Aaj Ka Suvichaar

Om Namaha Shivaya
Aaj Ka Suvichaar 🙏🏻🙏🏻

#2814

         Mahadev Ke Gann Ho Tum

Mahadev ke gann ho tum
Maante chalo Guruji Maharaj ka hukum
Kyunki Guruji SadaShiv roopi Hain swayam
Unke nirdesh par aadhaarit hai tumhaara janam maran.

Tumhe Apni sewa ka dekar avsar
Guruji ne tumhaara naseeb nikhaara
Jaisa bhi hoga jeevan ka sangraam
Guruji dete rahenge tumhe sahaara.

Tum kintu-parantu kiya bina
Seekh lo jeena
Bin hichkichaaye bin ghabraaye
Unke aadesh ka paalan karo
Tum gann ho Guruji Mahadev ke
Isliye kisee chunauti se na daro.

Guruji tumhe bakhsh kar himmat aur taakat
Karte Hain har sangharsh ke liye tayyaar
Dekar Ve tumhe hunar kee nazaakat
Tumhe bheetar aur baahar se nikhaarte Hain baar baar.

Unhonei diya hai tumhe sabr
Aise raho ki Unhe tum par ho fakr
Unhonei tumhe saahas aur bharosa hai bakhsha
Aur Ve har yuddh mein karte aaye Hain tumhaari raksha.

Tumhaari sadasheelta aur viveksheelta ke daata Hain Guruji
Tumhaari har soch ke gyata Hain Guruji
Unpar rakho apne chitt ko kendrit
Ve sada karte rahenge tumhaara hitt.

Jabb jabb vikaar karein aakraman
Tum lado hokar nirbhay
Jabb jabb galat raaste par jaane lagey tumhaara mann
Tum usey niyantrit karo usee kshan.

Guruji de rahe Hain tumhe ashirwaad
Tum karte chalo Unka dhanyawaad
Har sangharsh hai tumhaara imtehaan
Har pal tumhe dekh rahe Hain Guru meharbaan.

Guruji kee yaad mein rehkar har pal
Badhaaye rakho apne mann ka haunsala aur bal
Tum ho Guruji Maharaj ke gann
Unkee sewa mein rehkar safal honei do apna jeevan.

🌹🌹🌹🌹🌹🌹🌹

Jai Guruji 🙏🙏
Dhirja

Mahadev Ke Gann Ho Tum (11/02/2025)

November 1, 2025

Om Namaha Shivaya
Aaj Ka Suvichaar 🙏🏻🙏🏻

#2813

Duniya Dhanyawaad Kee

Teri duniya ho duniya dhanyawaad kee
Guruji Maharaj ke ashirwaad kee
Yahaan fikr nahin apni nimaani aukat kee
Yahaan kamee nahin kisee saugat kee.

Kyunki Guruji kee rehmatein hain beantt yahaan
Jannat se bhi sundar hai ye jahaan
Guruji kee hee meharbaani se
Na ki teri naadaani se.

Guruji kee mahima mein hai apaar bal
Guruji ka dhanyawaad karta chal tu har pal
Beshak raaste mein hon dono phool aur shool
Tu Guruji ka dhanyawaad karna na bhool
Oopari dikhaawe ke liye nahin, balki tahe dil se kar
Arey, tujhe naseeb se mila hai SadaShiv ka dar
Tera bhaagya toh gaya hai sanvar
Guruji kee nigraani mein hai tera safar.

Dhanyawaad se rakh apna dil aur apni duniya aabaad
Dhanyawaad se sajaa apni bhakti ke jazbaat
Dhanywaad har dukh sukh ka, aaj, aur aaj ke baad
Dhanyawaad, kyunki Guru ka diya sab kuch hai Guru prasad.

🌹🌹🌹🌹🌹🌹🌹

Jai Guruji 🙏🙏
Dhirja

Duniya Dhanyawaad Kee (11/01/2025)

October 31, 2025

Om Namaha Shivaya
Aaj Ka Suvichaar 🙏🏻🙏🏻

#2812

Tere Bhaagya Kee Unnati Ka Shashwat Sahaara

Guruji Hain tere bhaagya kee unnati ka shashwat sahaara
Guruji Hain tere jeevan kee naiya ka kinaara
Unka ashirwaad hai nirantar behte amrit kee dhaara
Unpar poornata se nirbhar hai tera kalyaan saara.

Guruji kee ek muskuraahat se
Guruji kee ek ruhaani aahat se
Teri zindagi khil jaati hai
Tujhe shanti mil jaati hai.

Guruji ke satsang aur simran se
Guruji kee sewa aur Unke chintan se
Badhne lagta hai tera utsaah
Dikhne lagti hai tujhe raah.

Guruji ko samarpan se
Guruji ke naman se
Tujh mein neevanpann aata hai
Tera mann aur sir jhuk jaata hai.

Guruji ke pyaar se
Guruji ke dulaar se
Tere ghaav jaate hain bhar
Sundar ho jaata hai tera safar.

Aise dayavaan Guruji par
Tu hai poori tareh se nirbhar
Ve Apni rehmaton se teri jholi rahe Hain bhar
Tu har shwaas se Unka shukrana kiya kar.

🌹🌹🌹🌹🌹🌹🌹

Jai Guruji 🙏🙏
Dhirja

Tere Bhaagya Kee Unnati Ka Shashwat Sahaara (10/31/2025)

October 30, 2025

Om Namaha Shivaya
Aaj Ka Suvichaar 🙏🏻🙏🏻

#2811

    Chetna Kee Oorja

Chetna kee oorja
Swayam se utpan hokar
Sampoorna hai swayam mein
Isliye tu na rehna aur kisee bhram mein.

Guruji Maharaj Hain is chetna ka aadhaar
Ve Hain chetna ke mool aur saar
Unhe jitna chetega tera chitt
Tu utna hee rahega jaagrit.

Aur anivaarya hai jaagriti
Vahee toh sanvaaregi teri atma kee aakriti
Aur Guruji kee meharbaani se
Mitega andhera teri zindagaani se.

Aur kuch chahiye nahin
Jo sangg ho Guruji kee meharbaani
Sab hona hee hai sahi
Tabhi toh poori hogi kahaani.

🌹🌹🌹🌹🌹🌹🌹

Jai Guruji 🙏🙏
Dhirja

Chetna Kee Oorja (10/30/2025)

October 29, 2025

Om Namaha Shivaya
Aaj Ka Suvichaar 🙏🏻🙏🏻

#2810

Tere Jeevan Ka Upvan

Beshak kathin hai samaa
Par Guruji ne dee hai panaah
Isliye aur na ghabraa
Tere jeevan ka upvan hoga hara bharaa.

Udaasi se murjhaaya hai ye upvan
Niraasha se ghira hai tera mann
Waqt ke aagey na teri chalegi na meri
Par Guruji ko har mukaam ka sahi waqt hai pataa
Aksar Guruji ke vilamb mein chuppi hoti hai
Ve waqt se pehle kayi baatein nahin sakte bataa
Kyunki shaayad vo teri samajh ke baahar hon
Ya phir teri sehenshakti ke paar
Par ek baat toh nishchit hai sada
Ki Guruji kalyaan karte Hain har baar.

Tu is satya se rehta chal sehmat
Ki nirantar baras rahi hai tujh par Guruji kee rehmat
Tu jeeta chal Unkee yaad mein
Varna pachhtaayega baad mein.

Jeevan beshak lagg raha hai abhi registaan
Par har sthaan par Guruji Hain virajmaan
Arey, Ve toh tere roam roam mein karte Hain vaas
Isliye tu na ho bilkul bhi udaas.

Jeevan ke kisee bhi daur mein
Guruji tujhe na denge chod
Ve har pal tere uddhaar par kar rahe Hain gaur
Isliye bhi aaye hain aise moad
Taaki tere karmon ka bhog ho paaye
Aur karmon ka bhaar halka ho jaaye.

Gurbani ke rass mein madhosh ho kar
Guruji ke khayaalon mein kho kar
Tu Unke bakhshe sewa aur satsang par de dhyan
Ve Hain tere jeevan ke upvan ke baghban.

Seench kar is upvan ko Apni mamta se
Guruji usey hariyali bakhshenge Apni kshamta se
Abb tu na reh mayoos aur daraa daraa
Tere jeevan ka upvan jald hoga haraa bharaa.

🌹🌹🌹🌹🌹🌹🌹

Jai Guruji 🙏🙏
Dhirja

Tere Jeevan Ka Upvan (10/29/2025)

October 28, 2025

Om Namaha Shivaya
Aaj Ka Suvichaar 🙏🏻🙏🏻

#2809

Deepak Prajvalit Ho Jaaye

Deepak prajvalit ho jaaye saagar ke paani kee gehraayee mein
Aisee apaar shakti hai Guruji kee vadiyaayee mein
Tum gumm kee gehraayee mein doobe ho
Ye na socho ki tum hee ek ajoobe ho
Anginat jann ko apne haalaat lagte hain pratikool
Ye tum na jaana bhool.

Apne vishwaas aur apni shraddha ko rakho prabal
Tumhaare gumm kee gehraayee mein bhi khushi ka deepak hoga ujjwal
Guruji kee meharbaani se
Unkee hee nigraani mein.

Guruji toh swayam Hain roop Bhagwaan ka
Unkee har meharbaani hai khazaana kalyaan ka
Uss deepak kee lau mein bhi Guruji kee dee hui oorja hogi samaahit
Isliye uss deepak ke jalne mein nishchay hee hoga tumhaara hitt
Is deepak ka prakash pahunchega gumm kee gehraayee ke paar
Tumhaare daaman mein khushi jagmagaayegi phir ek baar.

🌹🌹🌹🌹🌹🌹🌹

Jai Guruji 🙏🙏
Dhirja

Deepak Prajvalit Ho Jaaye (10/28/2025)

October 27, 2025

Om Namaha Shivaya
Aaj Ka Suvichaar 🙏🏻🙏🏻

#2808

         Jeevan Ke Bhinn Bhinn Pehlu

Anubhav ko na dekar sukh dukh ka naam
Jeevan ke bhinn bhinn pehlu agar lein maan
Toh shaayad jeene mein ho jaaye thodi aasaani
Kyunki inse toh paripoorna rehti hee hai zindagaani.

Sabb hai apne pichhle karmon ka parinaam
Aur saath hee hotey hain karma kriyamaan
Aur vaise bhi jabb Guruji Hain angg sangg
Toh sukh dukh dono buss hain jaise hon do rangg
Jo Guruji kee leela se sanvaarenge hamaara chitr
Jaise jaise Guruji kee kripa se hamaara antas hota jaayega pavitra.

Koi nahin hai Guruji se zyada nipun chitrakaar
Ye swayam ko yaad dilaana zaroori hai baar baar
Mudda hai ye is safar ka
Ki hota jaaye bheetar ka pavitrikaran
Isliye kyun na Guruji se judey rehkar
Sanvaarein hum apna ye janam.

Guruji ka bakhsha simran
Saaf karta chalega mann
Guruji kee yaad
Karegi antas ko aabaad
Guruji kee bataayi Gurbani
Karegi poshan ruhaani.

Guruji ke satsang mein jaa kar
Guruji ka chai aur langar prasad khaa kar
Milta rahega Guruji ka ashirwaad
Buss, kuch aur chahiye hee nahin iske baad.

Guruji kee kripa se shanti aur sthirta hogi mann mein
Sukh dukh mehez pehlu bannkar saath rahenge jeevan mein
Beshak ye pehlu dhoop chhaaon banenge zindagi ke gagan mein
Phir bhi anokha santosh milta rahega Guruji kee sharan mein.

🌹🌹🌹🌹🌹🌹🌹

Jai Guruji 🙏🙏
Dhirja

Jeevan Ke Bhinn Bhinn Pehlu (10/27/2025)

October 26, 2025

Om Namaha Shivaya
Aaj Ka Suvichaar 🙏🏻🙏🏻

#2807

           Ho Bemausam Kee Barsaat

Ho bemausam kee barsaat
Ya ho andheri tufaani raat
Guruji sada Hain tumhaare saath
Sambhaalne tumhaare haalaat.

Beshak lamba lagey andher
Sabb hai karmon ka her-pher
Beshak lagg rahi ho der
Zaroor hogi saver.

Guruji ke tum ho bachche
Aur jo tum ho neeyat ke sachche
Tum ho jaao befikr
Vaise bhi tum na bhi karo zikr
Toh bhi Guruji ne tumhaari har baat jaani hai
Tumhaara Guru sarvgyaani hai.

Tum toh phir bhi so lete ho
Par Guruji na soyein ek bhi pal
Unhee kee nirantar kripa se
Tumhaare andekhe kasht bhi rahe hain tal.

Shaayad unn kashton ko jaan paane kee bhi nahin hai tumhaari kshamta
Ya phir unka saamna karne kee nahin hai himmat ya sehensheelta
Isliye shukrana karo Guruji Maharaj ka
Jinhonei khayaal rakha hai tumhaare har kaaj ka
Aur aagey bhi rakhte rahenge
Tumhaare parde dhakte rahenge
Beshak tumhe na thi Guruji kee pehchaan
Par Ve toh sada karte aaye Hain kalyaan
Koi aur na hai, na hoga Unke jaisa meharbaan
Shukr hai tumne is satya ko liya hai jaan aur maan.

🌹🌹🌹🌹🌹🌹🌹

Jai Guruji 🙏🙏
Dhirja

Ho Bemausam Kee Barsaat (10/26/2025)

October 25, 2025

Om Namaha Shivaya
Aaj Ka Suvichaar 🙏🏻🙏🏻

#2806

                     Meri Kahaani

Guruji kee kripa bin nahin mera guzaara
Guruji kee daya hai mera ekmaatra sahaara
Jiske dwaara mujhe milega vo kinaara
Jahaan pahunchne ke liye mera janam hota raha hai dobara dobara.

Is kinaare ko paane mein lagenge kitne janam
Ye mai na jaanoon
Lekin jabb takk Guruji kee sharan mein hoon
Vaheen hai mere santosh kee yukti aur meri mukti
Isliye Guruji se hai ye guzaarish
Ki Ve poori kar dein meri ye khwaahish
Ki jabb takk lagaa rahe yahaan par mera aana jaana
Tabb takk rahe mera Unke charnon mein thikaana
Aur meri atma ne aakhir mein Unn Paramatma mein hai samaana
Jabb mukammal hoga uss atma ke safar ka afsaana.

Kaisa hoga vo pal
Kabb aayega vo kal
Ye jaanti nahin hoon mai nimaani
Magar itna toh jaanoon aur maanoon
Ki tabb poori ho jaayegi kayi janmon se chal rahi meri kahaani.

🌹🌹🌹🌹🌹🌹🌹

Jai Guruji 🙏🙏
Dhirja

Meri Kahaani (10/25/2025)

October 24, 2025

Om Namaha Shivaya
Aaj Ka Suvichaar 🙏🏻🙏🏻

#2805

                  Guruji Ka Pyaar

Har chamatkaar ke bhi paar
Hai Guruji kee leela ka saar
Unka aseem anmol pyaar
Deta hai sangat ko taar.

Guruji ke pyaar mein aisee shakti hai
Jo bhakt ko rukne nahin deti rukaavat ke baavajood
Guruji ke pyaar mein vo protsaahan hai
Jo bhakt mein zinda rakhta hai utsah ka wajood.

Apni sangat ko sabar aur bharosa
Guruji ke pyaar ne sada hai bakhsha
Sangat karma bhog ke dauran jis bhi haal mein ho
Guruji ka pyaar karta hai uskee raksha.

Guruji ka pyaar hai zakhmon ke liye marham
Guruji ka pyaar hai rehem
Guruji ke pyaar mein shaamil hai kshama daan
Guruji ka pyaar sabhi bhakton ke liye hai ek samaan
Baaki toh hum bhakton par nirbhar hai
Aakhirkaar karma bhoomi par hamaara vartmaan ka ghar hai.

Ruhaani unnati ke liye karma bhog hai majboori
Guruji ke pyaaron ke liye karma bhog hai zaroori
Guruji ke pyaar mein hai karma bhog karaane kee sampoorna kshamta
Guruji ke pyaar mein hai nirmal nyaay aur samta.

Guruji ke pyaar mein niyamnishthataa bhi hai
Guruji ke pyaar mein komal mamta bhi hai
Guruji ka pyaar duniya mein anginat praaniyon par raha hai baras
Na jaane kitne jann Guruji ke satsang mein aane ko jaate hain taras.

Guruji ka pyaar milta hai khushnaseebi se
Guruji ka pyaar duur kar deta hai gareebi se
Kyunki Jin Guru ke gulam hain sabhi praani, aur aasmaan, aur zameen
Uss bhakt ko phir kyun ho zindagi mein koi bhi kamee?

Dekar khoobsoorat khazaana Apne pyaar ka
Guruji sanvaarte Hain roop bhakt ke ghar parivaar ka
Is yug mein vartmaan se bahut dukhad haal hota sansaar ka
Agar duniya ke koney koney mein na hota paatr Guruji ke pyaar ka.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ka Pyaar (10/24/2025)